1-2. Tongana nyen la e lingbi ti mû peko ti gere ti Jésus? Mû mbeni tapande ti fa ni.

IMAGINÉ so mo na ambeni zo ayeke tambela na mbeni sioni ndo so mbutu ayeke dä. Mbeni zo so ahinga ndo ni nzoni ayeke fa lege na ala. Na ngoi so lo yeke tambela, ala yeke bâ peko ti gere ti lo na yâ ti mbutu ni. A si na mbeni ngoi, ala peut ti bâ zo ni ape, me li ti ala aga kirikiri ape. Ala sara kue ti mû tâ gï peko ti gere ti lo.

² So e yeke atâ Chrétien, e lingbi ti tene so e yeke tambela na mbeni sioni ndo: sioni dunia so. Nzoni ye ni ayeke so Jéhovah amû na e Zo so ayeke mbilimbili-kue ti fa lege na e: Molenge ti lo, Jésus Christ, so e lingbi ti mû tâ gï peko ti gere ti lo (1 Pi. 2:21). Mbeni mbeti so asara tënë na ndö ti Bible atene, ge, Pierre ayeke haka Jésus na mbeni zo so ayeke fa lege na azo. Tongana ti so azo apeut ti bâ peko ti gere ti zo so ayeke fa lege na ala, e lingbi ti bâ peko ti gere ti Jésus na ti mû peko ni. Zia e bâ ahunda ota na ndö ti tënë ti mungo peko ti gere ti Jésus: Ti mû peko ti gere ti Jésus aye ti tene nyen? Ngbanga ti nyen la a lingbi e mû peko ti gere ti lo? E lingbi ti sara ni tongana nyen?

3. Ti mû peko ti gere ti mbeni zo aye ti tene nyen?

³ Ti mû peko ti gere ti mbeni zo aye ti tene nyen? Na yâ ti Bible, na ambeni ngoi tënë ‘tambela’ nga na tënë “gere” aye ti sara tënë ti aye so mbeni zo asara na yâ ti gigi ti lo (Gen. 6:9; aProv. 4:26). A lingbi ti haka tapande so mbeni zo azia na place ti gere ti lo so angbâ na ngoi so lo yeke tambela. Tongaso, ti mû peko ti gere ti mbeni zo aye ti tene ti mû tapande ti lo wala ti sara ye tongana lo.

4. Ti mû peko ti gere ti Jésus aye ti tene nyen?

 ⁴ Tongaso, ti mû peko ti gere ti Jésus aye ti tene nyen? Na nduru tënë, a ye ti tene ti mû tapande ti lo. Na yâ ti versê so ayeke mama-tene ti article so, bazengele Pierre asara tënë mbilimbili na ndö ti nzoni tapande ti gbungo ngangu na yâ ti pasi so Jésus azia; ye oko, ambeni ye mingi ayeke dä so Jésus asara so e lingbi ti mû tapande ti lo (1 Pi. 2:18-25). Ti tâ tënë ni, gigi ti Jésus kue, so ti tene, aye kue so lo tene nga lo sara, ayeke mbeni tapande so a lingbi e mû peko ni.

5. Eskê azo so ayeke mbilimbili-kue ape alingbi biani ti mû tapande ti Jésus so ayeke mbilimbili-kue? Fa ndani so mo tene tongaso.

⁵ So e yeke mbilimbili-kue ape so, eskê e lingbi biani ti mû tapande ti Jésus? En, e lingbi ti sara ni. Pierre awa e “ti mû peko ti gere ti [Jésus] mbilimbili”, me lo tene e sara ye tâ gï tongana lo ape. Tongana e mû peko ti gere ti lo mbilimbili, so ti tene, e sara kue ti mû tapande ti lo atâa so e yeke mbilimbili-kue ape, andâ e yeke sara ye alingbi na wango ti bazengele Jean la. Lo tene: “Ngbâ ti tambela gï tongana ti so [Jésus atambela] giriri.”—1 Jean 2:6.

6-7. Ngbanga ti nyen la e lingbi ti tene so tongana e mû peko ti gere ti Jésus, e yeke ga nduru mingi na Jéhovah?

⁶ Tongana e mû peko ti gere ti Jésus, e yeke ga nduru mingi na Jéhovah. Ngbanga ti nyen la e tene tongaso? Kozo ni, Jésus azia na e tapande so ayeke tâ nzoni mingi na ndö ti aye ti sara ti zia ngia na bê ti Nzapa (Jean 8:29). Tongaso, tongana e mû peko ti gere ti Jésus, e yeke zia ngia na bê ti Jéhovah. E lingbi ti hinga na bê ti e kue so Babâ ti e ti yayu ayeke ga nduru na azo so asara kue ti ga akamarade ti lo.—Jacq. 4:8.

⁷ Use ni, Jésus asara ye tâ gï tongana Babâ ti lo. Ndani la lo tene lani: “Zo so abâ mbi abâ nga Babâ awe.” (Jean 14:9). E lingbi ti mû tapande ti asarango ye ti Jésus nga na fason so lo sara  na ye na mbage ti azo. Na tapande, lo bâ lani mawa ti mbeni zo ti buruma, lo zia lani terê ti lo na place ti mbeni wali so ayeke na mbeni ngangu kobela nga lo bâ mawa ti azo so ambeni zo so ala ye ala akui. Tongana e mû tapande ti Jésus, e yeke mû nga tapande ti Jéhovah (Marc 1:40, 41; 5:25-34; Jean 11:33-35). Tongana e mû tapande ti Jéhovah mingi, e yeke ga nduru mingi na lo.

8. Fa ndani so tongana e mû peko ti gere ti Jésus, a yeke mû maboko na e ti “hon” dunia so na ngangu.

⁸ Ti mû peko ti gere ti Jésus ayeke mû maboko na e ti tene sioni dunia so agboto lê ti e ape. Na ndangba bï ti Jésus na ndö ti sese, lo tene: “Mbi hon dunia so na ngangu awe.” (Jean 16:33). Lo ye lani ti tene so lo ke ti tene apensé ti azo ti dunia, aye so ala zia na gbele ala nga na asarango ye ti ala asara ngangu na ndö ti lo. Jésus agirisa lâ oko ape ndani so a tokua lo na sese, so ayeke ti sara si iri ti Jéhovah aga nzoni-kue. Ka ti e? Na yâ ti dunia so, aye mingi alingbi ti gboto lê ti e. Me tongana ti Jésus, tongana e ngbâ ti zia li ti e na ndö ti sarango ye so bê ti Jéhovah aye, e nga e yeke “hon” dunia so na ngangu.—1 Jean 5:5.

9. Nyen la e doit ti sara ti ngbâ na ndö ti lege so ague na fini ti lakue lakue?

⁹ Ti mû peko ti gere ti Jésus ayeke gue na zo na fini ti lakue lakue. Na ngoi so mbeni maseka-koli so ayeke zo ti mosoro ahunda Jésus ti hinga ye so lo doit ti sara ti wara fini ti lakue lakue, Jésus atene na lo: “Ga mo mû peko ti mbi.” (Mat. 19:16-21). Jésus atene na ambeni Juif so amä na bê pëpe so lo yeke Christ, lo tene: ‘Ataba ti mbi amû peko ti mbi. Mbi mû na ala fini ti lakue lakue.’ (Jean 10:24-29). Lo tene na Nicodème, mbeni membre ti Sanhédrin so aye mingi ti hinga ye na ndö ti afango ye ti lo, lo tene azo so “amä na bê na lo” ayeke na “fini ti lakue lakue.” (Jean 3:16). E yeke fa so e mä na bê na Jésus tongana atënë ti yanga ti e nga na sarango ye ti e ague oko na aye so lo fa. Tongana e sara tongaso, e yeke ngbâ na ndö ti lege so ague na fini ti lakue lakue.—Mat. 7:14.

10. Nyen la a lingbi e sara ti “gi ti hinga” Jésus nzoni ahon ti kozo? (Jean 17:3).

¹⁰ Kozo ti mû peko ti gere ti Jésus mbilimbili, a lingbi e gi ti hinga lo. (Diko Jean 17:3.) Ti gi ti hinga Jésus ayeke mbeni ye so e doit ti ngbâ ti sara ni. A lingbi e ngbâ lakue ti gi ti hinga ye na ndö ti lo, so ti tene, ti hinga ye na ndö ti asarango ye ti lo, apensé ti lo nga na aye so ayeke nzoni na lê ti lo. Atâa e sara ngu oke na yâ ti tâ tënë, a lingbi e ngbâ ti gi ti hinga Jéhovah nga na Molenge ti lo.

11. A-Évangile osio asara tënë na ndö ti nyen?

¹¹ Ti mû maboko na e ti gi ti hinga Molenge ti lo, na ndoye, Jéhovah azia a-Évangile osio na yâ ti Bible. A-Évangile so asara tënë na ndö ti fini ti Jésus nga na kua ti fango tënë ti lo. A fa na e atënë so Jésus atene, aye so lo sara nga na atënë ti bê ti lo na ndö ti aye. Ambeti osio  so asara si e ‘bâ mbilimbili’ tapande ti Jésus (aHéb. 12:3). Ambeti so afa na e peko ti gere ti lo. Tongaso, tongana e manda atënë so ayeke na yâ ti a-Évangile, e lingbi ti hinga Jésus nzoni mingi ahon ti kozo. A yeke sara si e lingbi ti mû peko ti gere ti lo mbilimbili.

12. Nyen la e lingbi ti sara ti wara ye ti nzoni mingi na lege ti a-Évangile?

¹² Ti wara ye ti nzoni mingi na lege ti a-Évangile, a lingbi e diko gï ni dikongo ape. A lingbi e manda ni nzoni nga e gbu li nzoni na ndö ni. (Bâ Josué 1:8, kete tënë na gbe ni.) Zia e sara tënë na ndö ti aye use so alingbi ti mû maboko na e ti gbu li na ndö ti a-Évangile nga ti sara ye alingbi na aye so e diko na yâ ni.

13. Tongana nyen la mo lingbi ti sara si ambaï na ndö ti fini ti Jésus so ayeke na yâ ti a-Évangile aga tâ ye na lê ti mo?

¹³ Kozo ni, sara si ambaï so ayeke na yâ ti a-Évangile aga tâ ye na lê ti mo. Sara kua na ngangu so mo yeke na ni ti imaginé aye so asi lani: ti bâ aye ni, ti mä totongo ti aye ni nga ti bâ so aye ni asi na mo. Ti sara ni nzoni, sara recherche na yâ ti ambeti so bungbi ti Jéhovah asigi na ni. Diko aversê so aga kozo na mbaï so mo yeke manda ye na ndö ni wala aversê so aga na pekoni. Gi ti hinga ye mingi na ndö ti azo nga na ando so a sara tënë ni na yâ ti mbaï ni. Bâ ye so mbeni Évangile nde atene na ndö ti oko mbaï ni so. Na ambeni ngoi, mbeni wasungo Évangile ayeke fa mbeni nzene nzene tënë so ayeke pendere mingi na ndö ti mbaï ni so mbeni nde asara tënë dä ape.

14-15. Nyen la a lingbi e sara ti sara ye alingbi na aye so e manda na lege ti ambaï ti fini ti Jésus?

¹⁴ Use ni, sara ye alingbi na aye so mo manda na lege ti ambaï so ayeke na yâ ti a-Évangile (Jean 13:17). Na peko ti so mo manda nzoni mbeni mbaï so ayeke na yâ ti mbeni Évangile, hunda terê ti mo: ‘Eskê mbeni ye ti manda ayeke na yâ ti mbaï so, so mbi lingbi ti sara ye alingbi na ni? Tongana nyen la mbi lingbi ti sara kua na mbaï so ti mû maboko na mbeni zo?’ Gbu li na ndö ti mbeni zo so mo hinga lo, na pekoni na ndoye nga na kode, fa na lo ye so mo manda.

 ¹⁵ Zia e bâ mbeni tapande so afa tongana nyen la e lingbi ti sara ye alingbi na aye use so. E yeke sara tënë na ndö ti wali-mua so ayeke wayere so Jésus abâ lo na yâ ti temple.

16. Diko Marc 12:41 na fa tongana nyen la mo imaginé ye ni asi lani.

¹⁶ Sara si mbaï ni aga tâ ye na lê ti mo. (Diko Marc 12:41.) Imaginé ye so asi lani. A yeke na lango 11 ti Nisan, ngu 33, lango mingi ape kozo na kuâ ti Jésus. Jésus amû ngoi mingi na yâ ti lango ni ti fa ye na azo na yâ ti temple. Me akota zo ti nzapa agi lani ti kanga lege na lo. Ngoi kete kozo, ambeni ahunda wala lo wara komandema ti sara na aye so lo yeke sara so na ndo wa. Ambeni ahunda na lo atënë so ala pensé so lo peut ti kiri tënë na ni ape (Marc 11:27-33; 12:13-34). Fadeso Jésus ague na mbeni place nde na yâ ti temple ni. Na place so lo peut ti bâ asanduku so azo ayeke bi nginza dä. Peut-être lo yeke na ndo so a iri ni Lacour ti awali. Lo duti, na lo yeke bâ azo so ayeke bi nginza na yâ ti asanduku ni. Lo bâ gbâ ti azo ti mosoro so ayeke bi gbâ ti alê ti nginza na yâ ni. Peut-être lo yeke kamême nduru na asanduku ni, tongaso lo lingbi ti mä go ti anginza so ayeke tï na yâ ni.

17. Nyen la wali-mua so ayeke wayere, so a sara tënë ti lo na Marc 12:42, asara?

¹⁷ Diko Marc 12:42. Kete na pekoni, lê ti Jésus atï na ndö ti mbeni wali. A yeke mbeni “wali-mua so ayeke wayere”. (Luc 21:2). Gigi akpengba na lo mingi; peut-être nginza so lo yeke na ni alingbi ape ti tene lo vo na aye so lo bezoin ni ti vivre. Ye oko, lo gue na terê ti mbeni sanduku ni nga, sân ti gboto lê na ndö ti lo, lo bi na yâ ni akete lê ti nginza use, na peut-être a mä go ni ape na ngoi so a tï na yâ ni. Jésus ahinga ye so lo bi na yâ ti sanduku ni: akete lê ti nginza ti lepta use, so azo ayeke sara na kua na ngoi ni so. Nginza so alingbi pëpe ti vo même nzêrë oko, ndeke so ngere ni ayeke kete mingi so azo ayeke te ni lani.

18. Tënë ti nyen la Jésus atene na Marc 12:43, 44 na ndö ti pata so wali-mua so abi?

¹⁸ Diko Marc 12:43, 44. Ye so wali-mua so asara apika bê ti Jésus mingi. Tongaso, lo iri adisciple ti lo, lo fa wali-mua ni, na lo tene: “Wali-mua so ayeke wayere so abi ye mingi ahon azo kue.” Na pekoni lo fa ndani, lo tene: “Ala kue [mbilimbili azo ti mosoro] abi gï nginza ti ala ti ndö ni, me wali so, na yâ ti yere ti lo, abi ye kue so lo yeke na ni, ye kue so lo yeke na ni ti bata na fini ti lo.” Na ngoi so wali-mua so ayeke be-ta-zo so ayeke mû tanga ti nginza ti lo na lango ni so, lo yeke lani na confiance so Jéhovah ayeke bâ lege ti lo.—Ps. 26:3.

19. Kpengba ye wa la e lingbi ti manda na lege ti atënë so Jésus atene na ndö ti wali-mua so ayeke wayere so?

¹⁹ Sara ye alingbi na aye so mo manda na lege ti mbaï ni. Hunda terê ti mo: ‘Nyen la mbi lingbi ti manda na lege ti atënë so Jésus atene na ndö ti wali-mua so ayeke wayere so?’ Gbu li na ndö ti wali-mua so. Kite ayeke dä ape so lo ye lani ti mû ye mingi na Jéhovah. Me lo sara lani ye so lo peut ti sara; lo mû na Jéhovah tâ nzoni ye so lo yeke na ni. Na Jésus ahinga lani so ye so lo mû ayeke kota mingi na lê ti Babâ ti lo. Ge, kpengba ye so e lingbi manda ayeke so: Tongana e mû na Jéhovah nzoni ye ti e, so ti tene e sara na lo na bê ti e kue nga na âme ti e kue, a yeke nzere na lo (Mat. 22:37; aCol. 3:23). Jéhovah ayeke na ngia tongana lo bâ so e yeke sara aye kue so e lingbi ti sara ti voro lo. Ye so andu ngoi so e mû nga na ngangu so e sara ti voro na lo, na tapande na fango tënë nga na gango na abungbi.

20. Tongana nyen la mo lingbi ti sara ye alingbi na ye ti manda so ayeke na yâ ti mbaï ti wali-mua so? Mû mbeni tapande ti fa ni.

²⁰ Tongana nyen la mo lingbi ti sara ye alingbi na ye ti manda so ayeke na yâ ti mbaï ti wali-mua  so? Gbu li na ndö ti aita so ayeke peut-être na bezoin ti tene mo tene na ala so a-effort so ala sara anzere na Jéhovah. Na tapande, eskê mo hinga mbeni ita-wali mbakoro so abâ so tënë ayeke na li ti lo wala abâ so lo yeke ye oko ape ndali ti so seni ti lo nga ngangu ti lo amû lege na lo ti fa tënë mingi tongana ti kozo ape? Wala mo lingbi ti pensé na mbeni ita-koli so ayeke na mbeni ngangu kobela so ason mingi so adécouragé ndali ti so lo lingbi ape ti gue na abungbi kue na Da ti Royaume? Mû maboko na aita tongaso na tenengo na ala atënë so ayeke “nzoni ti kpengba zo”. (aÉph. 4:29). Fa na ala ye ti manda so akpengba zo so ayeke na yâ ti mbaï ti wali-mua so ayeke wayere so. Atënë so mo tene ti kpengba ala alingbi ti dabe ti ala so Jéhovah ayeke na ngia tongana e sara ye kue so e lingbi ti sara ti voro lo (aProv. 15:23; 1 aThes. 5:11). Tongana mo gonda aita ndali ti so ala sara ye kue so ala lingbi ti sara ti voro Jéhovah, atâa so na bango ni ye so ala sara ayeke kete, andâ mo yeke mû peko ti gere ti Jésus mbilimbili la.

21. Nyen la mo leke na bê ti mo ti ngbâ ti sara?

²¹ E kiri singila mingi so, na yâ ti a-Évangile, e yeke wara gbâ ti anzene nzene tënë na ndö ti fini ti Jésus so amû maboko na e ti mû tapande ti lo, wala ti mû peko ti gere ti lo mbilimbili. Mo lingbi ti leke ti manda ye mingi na ndö ti a-Évangile na ngoi ti mandango ye mo wani wala vorongo Nzapa na yâ ti sewa. Zia e girisa ape so ti wara aye ti nzoni mingi na ngoi so e yeke manda ambaï so ayeke na yâ ti a-Évangile, a lingbi e sara si ambaï ni aga tâ ye na lê ti e nga e sara ye alingbi na ni. A lingbi e sara ye tongana ti so Jésus asara lani, me a lingbi e mä nga atënë so lo tene. Na yâ ti article ti peko, e yeke bâ aye so e lingbi ti manda na lege ti andangba tënë so Jésus atene kozo si lo kui.