1-2. Hikuyini zvi kotekako ku landzela a nkondzo wa Jesu? Mufananiso muni wu hi vhunako ku zvi zwisisa?

TI ALAKANYELE wena ni van’wani na mu famba lomu ka ciwula co tshisa, le phambeni na ku rangile munhu a ku tivako khwatsi lomu mu yako kona kasi a mu komba ndlela. A cikhati mu fambako, ku sala mikondzo yakwe lahasi. Loku mu fambile a pfhuka wo kari, mu guma mu nga ha mu woni loyi a mu kombako ndlela. Kanilezvi, a wu chavi. Wena ni lava mu fambako zvin’we mu sangula ku maha zvontlhe mu zvi kotako kasi mu landzela khwatsi a nkondzo wa loyi a mu kombako ndlela!

² Kota maKristu ya lisine, hi ndlela yo kari hi famba lomu ciwuleni co tshisa — ku nga tiko legi go biha ga Sathani. A ya ku tsakisa hi ku Jehovha i hi nyikile Murangeli wa mu nene ka vontlhe — a N’wana wakwe, Jesu Kristu, loyi zvi kotekako ku hi landzela khwatsi a nkondzo wakwe. (1 Ped. 2:21) Hi kuya hi bhuku go kari gi tlhamuselako Bhibhiliya, laha ka vhesi legi, Pedro i fananisa Jesu ni munhu a rangileko a komba ndlela van’wani. Makunu, a ku fana ni lezvi loyi a rangako a komba ndlela a siyako nkondzo wakwe, Jesu yenawu i siyile nkondzo, lowu hi nga wu landzelako. Zvezvi a hi woneni ku zvi wula yini a ku landzela nkondzo wa Jesu? Hikuyini hi faneleko ku wu landzela? Hi nga wu landzelisa kuyini?

3. Zvi wula yini a ku landzela a mikondzo ya wokari?

³ Zvi wula yini a ku landzela a mikondzo ya wokari? Lomu ka Bhibhiliya a magezu “ku famba” ni ‘mikondzo’ ka zvikhati zvo kari ma wula lezvi a munhu a mahako wutomini gakwe. (Gen. 6:9; Mav. 4:26) A cikombiso leci a munhu a vekelako van’wani, ci nga fananisiwa ni mikondzo leyi yi salako loku a famba. Makunu, a ku  landzela nkondzo wa munhu zvi wula ku landzela cikombiso cakwe, a ku mu pimanyisa.

4. Zvi wula yini a ku landzela nkondzo wa Jesu?

⁴ Makunu, zvi wula yini a ku landzela nkondzo wa Jesu? Hi magezu ma tsongwani, zvi wula ku pimanyisa cikombiso cakwe. Ka mutsalo-tshinya wa ndzima leyi, mupostoli Pedro hi ku kongoma i wulawula hi cikombiso leci Jesu a hi vekeleko mhakeni ya ku timisela tixanisa. Hambulezvo, ku ni tindlela tin’wani to tala ta ku hi pimanyisa Jesu. (1 Ped. 2:18-25) Hi lisine, a wutomi gontlhe ga Jesu — zvontlhe a nga wula ni zvontlhe a nga maha — i hi vekele cikombiso kasi hi mu pimanyisa.

5. A vanhu vo kala ku mbhelela va nga zvi kota futsi a ku pimanyisa cikombiso ca Jesu? Tlhamusela.

⁵ Vakahina, lezvi hi nga vanhu vo kala ku mbhelela, hi nga zvi kota futsi a ku pimanyisa a cikombiso ca Jesu? Ina, hi nga zvi kota. Alakanya ku Pedro i hi kucile ku “landzela [khwatsi] a nkondzo” wa Jesu — a nga te hi fanele ku wu landzela hi kumbhelela. Loku hi wu landzela khwatsi a nkondzo wakwe, hi maha zvontlhe hi zvi kotako kota vanhu vo kala ku mbhelela, hi ta ngha hi ingisa lezvi mupostoli Johani a nga tsala, zvaku: ‘Fambisani zvalezvi Jesu a nga fambisa zvona.’ — 1 Joh. 2:6.

6-7. Hikuyini hi nga wulako lezvaku a ku landzela khwatsi a nkondzo wa Jesu zvi ta maha ku hiva vanghana va Jehovha?

⁶ A ku landzela khwatsi a nkondzo wa Jesu zvi ta maha ku hiva vanghana va Jehovha. Hikuyini hi nga wulako lezvo? Co sangula, hi ku Jesu i hi vekele cikombiso ca ci nene nguvhu mhakeni ya ku hanya wutomi gi tsakisako Jehovha. (Joh. 8:29) Makunu, loku hi landzela nkondzo wa Jesu, hi ta tsakisa Jehovha. Ha zvi tiva khwatsi kambe ku a Papayi wa hina wa le tilweni i tava munghana wa lava va ti karatelako ku maha wunghana naye. — Jak. 4:8.

⁷ Ca wumbiri, Jesu i mu pimanyisile hi  kumbhelela a Papayi wakwe. Hi cigelo leco, zvi kotekile ku a wula lezvi: “Loyi a wonileko mina i wonile na Papayi.” (Joh. 14:9) Jesu i kombisile matshamela yo kota ku zwela wusiwana a vanhu va hlokonho, a kombisa tipswalo ka wasati a nga hi ni mababyi yo bayisa a tlhela a va zwela wusiwana lava va nga felwe. Makunu, loku hi pimanyisa Jesu ka lezvi a nga hanyisa zvona ni van’wani hi tlhela hi pimanyisa matshamela yakwe, ho pimanyisa Jehovha kambe. (Mar. 1:40, 41; 5:25-34; Joh. 11:33-35) Laha hi yako hi mu pimanyisa khwatsi Jehovha, a wunghana nga hina na yena giya gi tiya.

8. A ku landzela nkondzo wa Jesu zvi ta hi vhunisa kuyini a ku “hlula” tiko?

⁸ A ku landzela khwatsi a nkondzo wa Jesu zvi hi vhuna ku hi nga pengisiwi hi tiko legi go biha. Ka wusiku gakwe go gumesa laha misaveni, Jesu i zvi kotile ku wula lezvi: “Mina ndzi hlulile tiko.” (Joh. 16:33) I wa wula lezvaku a nga vhumelangi kuva ni mawonela, mixuvo, ni ku maha lezvi a tiko gi zvi mahako. A nga zangi a vhumela ku pengisiwa, a tsika lezvi a nga tela zvona laha misaveni — ku nga ku basisa vito ga Jehovha. Hina ke? A lisine hi ku ka tiko legi, ku ni zvilo zvo tala nguvhu zvi nga hi colopetelako. Kanilezvi, loku hi fana na Jesu hi veka kupima ntirweni wa Jehovha, hinawu hi ta “hlula tiko”.— 1 Joh. 5:5.

9. Zvini hi faneleko ku maha kasi hi kuma wutomi ga pindzukelwa?

⁹ A ku landzela khwatsi a nkondzo wa Jesu zvi hi yisa wutomini ga pindzukelwa. Laha a jaha go kari go ganya gi nga wutisa Jesu a ku zvini gi nga fanele ku maha kasi gi kuma wutomi ga pindzukelwa, i no mu hlamula lezvi: “Tana u ta ndzi landzela.” (Mat. 19:16-21) Jesu i byelile vaJudha vo kari va nga kala va nga kholwi a ku hi yena Kristu, aku: “A tiyivhu ta mina . . . ta ndzi landzela. Ndza ti nyika wutomi ga pindzukelwa.” (Joh. 10:24-29) I tlhelile a byela Nikodhemusi, a ciro ca Tribhunali ya Hombe, loyi a nga lava ku tiva lezvi Jesu a nga kari a gondzisa, aku: “Ni wihi loyi a kholwako” ka mina i ta “kuma wutomi ga pindzukelwa.” (Joh. 3:16) Hi kombisa kukholwa ka Jesu hi ku maha lezvi a nga gondzisa ni ku zvi maha. Loku hi maha lezvo, hi tava ndleleni ya ku kuma wutomi ga pindzukelwa. — Mat. 7:14.

10. Zvini hi faneleko ku maha kasi hi mu “tiva” khwatsi Jesu? (Joh. 17:3)

¹⁰ Kasi hi zvi kota ku landzela khwatsi a nkondzo wa Jesu, hi fanele ku mu tiva. (Lera Johani 17:3.) A “ku tiva” Jesu a zvi gumesi ka, zvilo hi faneleko ku simama hi zvi maha. Zvi lava ku siku ni siku hiya hi mu tiva khwatsi — hi gondza matshamela yakwe, mawonela yakwe, ni milayo yakwe. Kani hi ni cikhati muni na hi hi lisineni, hi fanele ku simama hi “tiva” Jehovha ni N’wana wakwe Jesu.

11. Zvini hi nga zvi kumako lomu ka bhuku ga Matewu, Marku, Luka, na Johani?

¹¹ Kasi ku hi vhuna ku mu tiva khwatsi Jesu,  Jehovha, i kombisile lirandzo hi ku lomu ka Mhaka yakwe a patsa matimu ya wutomi, ni ntiro wa Jesu laha misaveni. A matimu lawo hi ma kuma lomu ka bhuku ga Matewu, Marku, Luka, na Johani. A matimu lawa ma hi komba lezvi Jesu a nga wula, lezvi a nga maha, ni lezvi a nga ti zwisa zvona ka zviyimo zvokari. A mabhuku lawa ya mune ma hi vhuna ku ‘alakanya’ cikombiso ca Jesu. (Mah. 12:3) Hi nga zvi wulisa ku, ma na ni nkondzo lowu Jesu a wu siyileko. Hikwalaho, loku hi gondza tiIvhangeli, hi ngaya hi mu tiva khwatsi Jesu. Lezvo zvi ta hi vhuna ku hi wu landzela khwatsi a nkondzo wakwe.

12. Hi yihi ndlela ya ku vhuneka khwatsi hi tiIvhangeli?

¹² Kasi hi vhuneka hi mabhuku lawa ya tiIvhangeli a hi faneli ku ma lera basi. Hi fanele ku ti nyika cikhati ca ku ma gondza khwatsi hi tlhela hi ehleketa khwatsi hi lezvi hi gondzako. (Wona mongo wa Joxua 1:8.) A hi woneni mawonela mambiri ma nga hi vhunako ku ehleketa khwatsi hi matimu ya tiIvhangeli ni ku tlhela hi hanya hi lezvi hi lerako.

13. U nga maha yini kasi u wona lezvi zvi mahekako ka matimu lawa u lerako?

¹³ Co sangula, zama ku wona lezvi zvi mahekako ka lezvi u lerako. Tirisa kupima ka wena, u zama ku wona, ni kuzwa lezvi zvi nga kari zvi maheka ka lezvi u lerako. Kasi ku ku vhuna ku maha lezvo, kambisisa lomu ka mabhuku ya hlengeletano ya Jehovha. Hlola mongo wa matimu lawo — ku nga lezvi zvi nga ranga zvi maheka, ni lezvi zvi nga maheka andzhako ka lezvi u lerako. Hlota mahungu man’wani ma wulawulako hi vanhu ni matshamu ma kumbukiwako ka matimu lawa u lerako. A matimu lawo u lerako, zama ku ya ma wona lomu ka Ivhangeli yin’wani. Ka zvikhati zvin’wani, lomu ka Ivhangeli yo kari ku na ni zvokari zvi wuliwako zvi kalako zvi nga hi kona ka leyi yin’wani.

14-15. Zvini hi nga mahako kasi hi tiva ndlela ya ku tirisa lezvi hi nga gondza ka matimu yo kari ma nga lomu ka tiIvhangeli?

¹⁴ Ca wumbiri, tirisa lezvi u nga zvi gondza ka matimu lawo. (Joh. 13:17) Andzhako ka loku u gondzile hi wukheta khwatsi a matimu yo kari, ti  wutise lezvi: ‘Ci kona ndzi nga gondza ka matimu lawa ndzi nga ci tirisako wutomini ga mina? Ndzi nga ma tirisisa kuyini a matimu lawa kasi ku vhuna wokari?’ Zama ku alakanyela wokari, loku makunu u kuma mole, u nga mu byela hi lirandzo ni wunene lezvi u zvi gondzileko.

¹⁵ Hi nga zvi mahisa kuyini lezvi hi nga zvi wula laha? A hi woneni a cikombiso co kari. Hi ta maha lezvo hi ku kambisisa matimu ya wasati wo kari wa cisiwana wo felwa hi nuna, loyi Jesu a nga mu wona lomu tempeleni.

16. Tlhamusela lezvi u alakanyelako ku zvi mahekile ma matimu ya Marku 12:41.

¹⁶ Zama ku wona lezvi zvi mahekako. (Lera Marku 12:41.) Hi nga alakanyela lezvi zvi nga maheka: I dhiya 11 ka Nisani, wa lembe ga 33 Nguveni ya hina, na ko kiyela masiku matsongwani kasi Jesu a dawa. Ka cikhati leco, Jesu i wa mbhetile tihora to tala na a gondzisa lomu tempeleni. I wa gangi gi relela hi ku vhukelwa hi valala vakwe, a varangeli va wukhongeli. A vokari va wa mu wutisile ku i wu kuma kwihi a ntamu wa ku maha lezvi a nga kari a maha ke. A van’wani va mu wutisile zvilo zvo karata na va zama ku mu phasa. (Mar. 11:27-33; 12:13-34) Jesu i wa sukile laha a nga hi kona, i wa hi ka wutshamu gin’wani kwalomu tempeleni. Laha a nga hi kona makunu — zvi wonekisako ku hi laha ku vitaniwako ku i Tsendzele wa vavasati — zvi wa koteka ku a wona lomu va nga chela kona minyikelo. I no tshama a cuwukisela lava va nga chela minyikelo yabye; a guma a wona vanhu vo tala vo ganya na va chela zvingerengere zvo tala. Kuzvilava i wa hi kusuhani ka ku a ngazwa guwa ga zvingerengere lezvo a cikhati zvi cheliwako.

17. Zvini a nga maha a wasati wa cisiwana a kumbukiwako ka Marku 12:42?

¹⁷ Lera Marku 12:42. Ndzeni ka cikhati co kari, Jesu i no wona wasati a nga hi “cisiwana wo felwa hi nuna”. (Luka 21:2) A wutomi gakwe gi wa bindza. Zvi wonekisa ku i wa nga hi na mali ya ku xava zva ku ti hanyisa. Hambulezvo, i noya ka gin’we ga matshamu ya ku chela minyikelo, aya chela zvingerengere zva zvi tsininani, zva ku ne zvi wa nga vangi guwa a cikhati zvi chikelako le hasi. Jesu i no yi tiva a mali leyi a nga chela— tileptoni timbiri, yi nga hi yona mali ya yitsongwani yi nga tira ka cikhati leco. Ne yi wa nga ringani ku xava cinjingiri cin’we, ci nga hi cona cinyanyani ca bharato ka zvontlhe!

18. Hi kuya hi Marku 12:43, 44, zvini a nga wula Jesu xungetano hi munyikelo wa wasati wa cisiwana?

¹⁸ Lera Marku 12:43, 44. Jesu i no hlamala nguvhu hi lezvi zvi nga mahiwa hi wasati loyi wa cisiwana. A se vitana vapizani vakwe, a va komba wasati loye, aku: “A wasati loyi wa cisiwana wo felwa hi nuna i chelile zvotala a ku hundza vontlhe lava van’wani.” A guma a tlhamusela lezvi: “Vontlhe [nguvhunguvhu lava vo ganya] va no chela lezvi zvi nga va salela, kanilezvi a wasati loyi, ka wusiwana gakwe, i chelile zvontlhe a nga hi nazvo, zvontlhe a nga wa ta hanya hi zvona.” Laha a wasati loyi a nga nyikela zvontlhe a nga hi nazvo wutomini gakwe, i wo mu nyika wutomi gakwe Jehovha, a tsumba lezvaku i ta mu hlayisa. — Lis. 26:3.

19. I nchumu muni wa lisima hi gondzako ka magezu ya Jesu xungetano hi wasati wa cisiwana?

¹⁹ Tirisa lezvi u nga gondza ka matimu lawo. Ti wutise lezvi: ‘Zvini ndzi nga gondzako ka magezu ya Jesu xungetano hi wasati wa cisiwana wo felwa hi nuna?’ Alakanyela wasati loye. Handle ko kanakana laha a nga hi kona i wa xuva ku ngana a nyikele mali yo tala ka Jehovha. Hambulezvo, i mahile lezvi a nga zvi kota. I nyikile Jehovha lezvi zvi nga hi ntan’wini wa yena; niku Jesu i wa zvi tiva ku a munyikelo lowo wa lisima nguvhu ka Papayi wakwe. Makunu hi kwalaho hi gondzako nchumu wa lisima, waku: Jehovha wa xalala loku hi mu nyika zvontlhe zvi nga ntan’wini wa hina — loku hi mu tirela hi mbilu ni muhefemulo  wontlhe. (Mat. 22:37; Kol. 3:23) Jehovha wa zvi wona loku hi maha zvontlhe zvi nga ntan’wini wa hina! Lezvo zva yelana ni cikhati ni ntamu hi wu tirisako kasi ku khozela Jehovha— a ku patsa kuchumayeleni ni mitlhanganweni.

20. Hi yihi ndlela ya ku tirisa lezvi hi nga gondza ka matimu ya wasati wa cisiwana wo felwa hi nuna? Nyika cikombiso.

²⁰ Hi yihi ndlela ya ku tirisa lezvi hi nga gondza ka matimu ya wasati wa cisiwana ni wo felwa hi nuna? Alakanyela vokari va lavako ku tiyisekiswa lezvaku lezvi va zvi kotako ku maha zva lisima mahlweni ka Jehovha. Hi cikombiso, ku na ni makabye wa cisati a kulileko hi tanga loyi kuzvilava a ti zwako nandzu kutani a ti wonako na a nga vhuni nchumu hi lezvi a tshamelako ku babya kutani a nga hiko ni ntamu wa ku maha lezvi a nga maha kale? Ku na ni makabye a karatekako nguvhu hi lezvi a nga zvi kotiko kuta mitlhanganweni vhiki ni vhiki hi kota ya mababyi yo bayisa nguvhu yo kala ma nga hundzi ke? Vhuna vamakabye lavo hi ku wulawula magezu ya ‘ma nene kasi ku va aka’. (Efe. 4:29) Va bhulele a zvilo zvo tiyisa u zvi gondzako ka matimu lawa ya wasati wa cisiwana wo felwe hi nuna. A magezu ya wena yo tiyisa ma nga va vhuna ku wona lezvaku Jehovha wa tsaka loku hi mu mahela zvontlhe zvi nga ntan’wini wa hina. (Mav. 15:23; 1 Tes. 5:11) Loku u dzundza van’wani hi lezvi va mahako lezvi zvi nga ntan’wini wabye ntirweni wa Jehovha — hambu zvova zvitsongwani ku kota kwihi — wo landzela a nkondzo wa Jesu.

21. Zvini u ti yimiseleko ku maha?

²¹ A ho ku bonga hi lezvi a bhuku ga Matewu, Marku, Luka, na Johani ma hi tlhamuselako zvilo zvo tala hi wutomi ga Jesu. Lezvo zvi hi vhuna ku hi mu pimanyisa, ina, hi landzela a nkondzo wakwe! Zvi ngo yini ku ka cigondzo ca wena kutani ka Wukhozeli ga Ngango mu ti nyika ntiro wa ku gondza zvi eta a matimu ya wutomi ga Jesu lomu ka tiIvhangeli? Alakanya a mhaka leyi: Kasi hi vhuneka khwatsi hi matimu lawo, hi fanele ku zama ku wona lezvi zvi mahekako ka matimu lawo hi tlhela hi tirisa lezvi hi nga gondza. Ahandle ka ku pimanyisa lezvi Jesu a nga maha, hi fanele ku ingisela lezvi a nga wula kambe. Ka ndzima yi landzelako, hi ta wona lezvi hi gondzako ka magezu yo gumesa ya Jesu kota munhu wa nyama laha misaveni.