1-2. Tu kuama ndati volomãhi via Yesu? Tukula ocindekaise cimue.

SOKOLOLA okuti o kasi pokati kocimunga cimue ci kasi oku linga ungende vekalasoko limue mu koka ohele. Omunu umue wa kũlĩha ekalasoko liaco o songola onjila. Osimbu eye a enda olomãhi viaye vi sia ondimbukiso. Noke yokatembo kamue, ku moli vali una o kasi oku songola! Pole, ku sakalala. Ove locimunga comanu vu kasi oku lingila kumosi ungende vu kuama ondimbukiso yolomãhi viaye!

² Cimuamue haico okuti, etu Tuakristão vocili tu kasi vekalasoko muli ohele okuti, voluali lua vĩha. Kuenje Yehova wa tu ĩha Usongui wa lipua okuti Omõlaye Yesu Kristu, oco tu kuame volomãhi viaye. (1 Pet. 2:21) Embimbiliya limue li lombolola okuti Petulu o sokisa Yesu ndusongui umue. Ndeci omunu umue o songola a sia ondimbukisa yolomãhi viaye, Yesu wa tu silavo ondimbukiso yolomãhi viaye oco tu vi kuame. Tu konomuisa apulilo atatu atiamẽla koku kuama volomãhi via Yesu ndeci, nye ci lomboloka oku kuama volomãhi via Yesu? Momo lie tu ci lingila? kuenda Ndamupi tu ci linga?

3. Nye ci lomboloka oku kuama volomãhi viomunu umue?

³ Nye ci lomboloka oku kuama volomãhi viomunu umue? Vembimbiliya ondaka “oku endaenda” kuenda “olomãhi” ci lomboloka ekalo liomuenyo womunu umue. (Efet. 6:9; Olosap. 4:26) Onjila ndomo omunu ambata omuenyo waye ci sokisiwa londimbukiso violomãhi viaye a sia konyima osimbu  eye a enda. Kuenje oku kuama volomãhi viomunu umue ci lomboloka oku kuama ongangu yaye, oco tu u setukule.

4. Nye ci lomboloka oku kuama volomãhi via Yesu?

⁴ Oco hẽ, nye ci lomboloka oku kuama volomãhi via Yesu? Voku teta onimbu, ci lomboloka oku setukula ongangu yaye. Vosapi yocipama cetu, upostolo Petulu o tukula ongangu yiwa Yesu a sia yoku pandikisa kohali; kuenda ovina vikuavo Yesu a linga okuti tu pondola oku vi setukula. (1 Pet. 2:18-25) Ocili okuti, Yesu vomuenyo waye wosi cosi a linga, leci a popia, ongangu yimue yiwa tu sukila oku kuama.

5. Anga hẽ omanu ka va li puile va tẽla muẽle oku kuama ongangu ya Yesu? Ci lombolola.

⁵ Omo okuti ka tua li puile, anga hẽ tu tẽla muẽle oku kuama ongangu ya Yesu? Oco, tu tẽla. Ivaluka okuti Petulu ka tu sapuilile okuti tu sukila oku li pua oco tu ‘kuame volomãhi via Yesu.’ Nda tua kuama lutate olomãhi via Yesu, poku likolisilako oku linga ovina tu tẽla, ndaño ka tua li puile, tu ka pokola kolondaka viupostolo Yoano viokuti: “Endaenda ndeci [Yesus] a endaenda.”—1 Yoa. 2:6.

6-7. Momo lie tu popela okuti nda tua kuama volomãhi via Yesu tu kala akamba va Yehova?

⁶ Nda tua kuama volomãhi via Yesu ci ka tu kuatisa oku kala akamba vocili va Yehova. Momo lie? Tete, Yesu wa sia ongangu yiwa ndomo tu ambata omuenyo u sanjuisa Suku. (Yoa. 8:29) Omo liaco, nda tua kuama volomãhi via Yesu, tu ka sanjuisa Yehova. Kuenda kolela okuti, Isietu wokilu amela ku vana va likolisilako oku kala akamba vaye.—Tia. 4:8.

⁷ Vali, Yesu wa setukula ciwa Isiaye. Eli olio esunga lieci Yesu a popela hati: “Wosi o mola ame, o molavo Isia.” (Yoa. 14:9) Eci tu setukula ovituwa via Yesu kuenda onjila ndomo a  tata vakuavo ndeci, ohenda a kuatela umue ukavilundu, ukãi umue wa vela calua, ocikembe a kuatela vana va fisa, tu kasi oku setukulavo Yehova. (Mar. 1:40, 41; 5:25-34; Yoa. 11:33-35) Osimbu tu setukula ovituwa via Yehova ukamba wetu laye u pama.

8. Lombolola esunga lieci ci kuetele esilivilo oku kuama volomãhi via Yesu ci tu kuatisila oku “yula” oluali.

⁸ Oku kuama volomãhi via Yesu ci tu kuatisa oku yuvula oku yapuisiwa loluali lulo lua vĩha. Yesu kuteke wa sulako womuenyo waye palo posi, wa popia hati: “Ame nda yula oluali.” (Yoa. 16:33) Eye wa yonguile oku popia okuti, ka ecelele oku yapuisiwa lovisimĩlo, olonjongole kuenda ovituwa violuali. Yesu lalimue eteke a ivaleleko ocimãho ceci a tumiwila palo posi okuti, oku kemalisa Yehova. Nye ci popiwa kokuetu? Voluali muli ovina vialua vi pondola oku tu tateka oku tiamisila utima kupange wa Yehova. Pole, nda tu setukula Yesu poku amamako oku tẽlisa ocipango ca Yehova, tu ka ‘yulavo oluali?—1 Yoa. 5:5.

9. Nye tu sukila oku linga oco tu kale vonjila yi tuala komuenyo ko pui?

⁹ Oku kuama volomãhi via Yesu ci tuala komuenyo ko pui. Eci ukuenje umue ohuasi a pulisa nye a sukilile oku linga oco a kuate omuenyo ko pui, Yesu wo tambulula hati: “Enju, linga ondonge yange.” (Mat. 19:16-21) Ku va Yudea vana ka va tavele okuti eye Kristu, Yesu wa popia hati: “Olomeme viange . . . vi ndi kuama. Ame ndi va ĩha omuenyo ko pui.” (Yoa. 10:24-29) Ku Nikodemo una wa pangele onepa Kekanga Linene okuti wa yonguile oku kũlĩha vali ovina viatiamẽla kalongiso a Yesu, Yesu wa popia hati, wosi una “o kolela kokuaye” wa laikele oku “kuata omuenyo ko pui.” (Yoa. 3:16) Tu lekisa ekolelo ku Yesu poku kapako ovina a longisa kuenda oku setukula ovina a linga. Nda tua ci linga, tu ka kala vonjila yi tuala komuenyo ko pui.—Mat. 7:14.

10. Nye tu sukila oku linga oco tu ‘kũlĩhe’ ciwa Yesu? (Yoano 17:3)

¹⁰ Osimbu ka tua kuamele volomãhi via Yesu tu sukila oku u kũlĩha. (Tanga Yoano 17:3.) Oku “kũlĩha” Yesu ocina cimue tu sukila oku amamako oku ci linga. Tu sukila oku amamako oku lilongisa vali catiamẽla kokuaye, kovituwa viaye, kovisimĩlo kuenda kolonumbi viaye. Ndaño tu kasi otembo yalua vocili, tu sukila oku amamako oku “kũlĩha” Yehova kuenda Omõlaye.

11. Ovolandu api tu sanga Vavanjeliu akuãla?

¹¹ Yehova locisola calua, Vondaka yaye wa kongelamo Avanjeliu akuãla oco a tu kuatise oku kũlĩha Omõlaye. Vavanjeliu aco, mu sangiwa ulandu womuenyo wa Yesu kuenda upange waye woku kunda. Ovolandu aco a tu sapuila eci Yesu a popia, eci eye a linga kuenda  ndomo eye a liyeva. Alivulu a-a akuãla a tu kuatisa oku ‘sokolola’ ciwa kongangu ya Yesu. (Va Hev. 12:3) Ocili okuti, mu sangiwa ongangu Yesu a sia. Kuenje poku konomuisa Avanjeliu aco, tu kũlĩha ciwa Yesu. Poku ci linga tu ka kuama volomãhi viaye.

12. Nye tu sukila oku linga oco tu kuatisiwe Lavanjeliu?

¹² Oco tu kuatisiwe Lavanjeliu aco, tu sukila oku linga ovina vikuavo okuti oku a tanga lika ci sule. Tu sukila oku sanda otembo yoku lilongisa Avanjeliu aco kuenda oku sokolola kovolandu aco. (Sokisa la Yehosua 1:8.) Tu konomuisi ovina vivali vi tu kuatisa oku sokolola Kavanjeliu kuenda oku kapako ovina tu tanga Vavanjeliu aco.

13. Nye o sukila oku linga oco o kuate elomboloko liwa liovolandu o tanga Vavanjeliu?

¹³ Tete, sokolola kovolandu a sangiwa Vavanjeliu. Sokolola poku tala, poku yeva kuenda poku limbuka eci ca pita. Oco o kuatisiwe oku ci linga, linga akonomuiso valivulu a sandekiwa locisoko ca Yehova. Konomuisa ulandu waco wosi wovina via pita lovina via kuamamo osimbu o kasi oku lilongisa. Kũlĩhĩsa vali alomboluilo akuavo atiamẽla komanu kuenda kovitumãlo viatukuiwa vulandu. Sokisa ulandu o kasi oku tanga lowu u sangiwa Kavanjeliu akuavo. Pamue Evanjeliu limue li tukula ulandu umue okuti Avanjeliu akuavo ka va u tukuile.

14-15. Nye tu sukila oku linga oco tu kapeko eci tua lilongisa kovolandu omuenyo wa Yesu?

¹⁴ Vali, kapako ovolandu o tanga Vavanjeliu komuenyo wove. (Yoa. 13:17) Noke lioku lilongisa lutate ulandu Wevanjeliu limue, lipula ndoco: ‘Nye nda lilongisa kulandu owu oco ndu u kapeko kumuenyo wange? Ndi kuama ndati ulandu owu oco ndi kuatise omunu umue?’ Sokolola komunu umue wa kũlĩha kuenda noke vepuluvi liwa, locisola kuenda utate sapela laye eci wa lilongisila kulandu wa tanga.

¹⁵ Tu konomuisi ndomo tu kapako olonumbi evi vivali. Tu konomuisa ulandu  wacimbumba cimue ohukũi una Yesu a mola vonembele.

16. Lombolola ulandu u sangiwa ku Marko 12:41.

¹⁶ Sokolola kulandu o tanga. (Tanga Marko 12:41.) Sokolola kueci ca pita. Ca kala 11 ya Nisana yunyamo 33 K.K. okuti kua kambele osemana yimosi oco Yesu a fe. Yesu wa pita eteke liosi oku longisa vonembele. Pole, asongui vatavo, vo suvukile. Noke vo pulisa, lomoko yelie a linga upange waco. Vakuavo va enda oku u linga apulilo va simile okuti ka tẽla oku a tambulula. (Mar. 11:27-33; 12:13-34) Kuenje Yesu wa enda konele yikuavo yonembele. Konele yaco kua enda oku tukuiwa okuti Kocitali Cakãi, noke eye wa mola olokasia vimue via kala kocitali caco. Eye wa tumala loku tala omanu oku kapa olombanjaile viavo volokasia. Eye wa mola omanu valua olohuasi oku kapa ovingangu vialua. Citava okuti eye wa kala naito ocipepi kuenje wa enda oku yeva onjuela yovingangu vi kapiwa vokasia yaco.

17. Ocimbumba cimue ohukũi nye ca linga ndomo ca tukuiwa ku Marko 12:42?

¹⁷ Tanga Marko 12:42. Noke yokatembo kamue Yesu o mola ukãi umue. Ukãi waco “ocimbumba” haiye o suke. (Luka 21:2) Omuenyo wa tĩlile calua kokuaye; citava okuti oco a kuate cimue a sukila, ka ca lelukile. Ocimbumba caco camela pokati kolokasia vimue kuenje vuyombeki wa kapamo ovingangu vivali vitito okuti pamue ka via yuelele calua osimbu a vimba. Yesu wa kũlĩhĩle okuti ukãi waco wa imbamo ocingangu cololepta vivali, okuti via kala ovingangu vitito kotembo yaco. Olombongo viaco ka via tẽlele oku landa lavio onjila yimue yitito, okuti ya kala onjila yimue ya enda oku leluka oku yi landa oco yi liwe.

18. Ndomo ca tangiwa ku Marko 12:43, 44, nye Yesu a popia catiamẽla kombanjaile ya cimbumba?

¹⁸ Tanga Marko 12:43, 44. Yesu wa komoha calua leci cimbumba a linga. Kuenje wa kovonga olondonge viaye, loku va sapuila hati: “Ocimbumba eci ohukũi, ca kapamo calua okuti vakuavo va kapa olombongo volokasia ci sule.” Yu wa lombolola hati: “Vosi [ca piãla enene vana okuti olohuasi] va kapamo ovisupe viavo, pole, ukãi kusuke waye wa kapamo cosi a kuatele, haico eteku liaye.” Eci cimbumba ukuekolelo a kapamo cosi a kuatele keteke liaco, eye wa kolelele okuti Yehova u ko kuatisa.—Osa. 26:3.

19. Nye tu lilongisila kolondaka via Yesu viatiamẽla kucimbumba ohukũi?

¹⁹ Kapako ulandu waco komuenyo wove. Lipula ndoco, ‘Nye nda lilongisila kolondaka via Yesu catiamẽla kucimbumba ohukũi?’ Sokolola eci catiamẽla kucimbumba. Ka kuli atatahãi okuti, eye wa yonguile oku eca vali calua ku Yehova. Ocili okuti, wa linga eci a tẽla; kuenda wa eca ku Yehova ocina ca velapo a kuata. Yesu wa kũlĩhĩle okuti ombanjaile yacimbumba caco, ya soliwile calua la Yehova. Eci ci kuete esilivilo lialua kokuetu: Yehova o sanjuka eci tu eca ovina via velapo kuenda oku vieca lutima wosi kupange waye. (Mat. 22:37; Va Kol. 3:23) Yehova o sanjuka calua eci a limbuka okuti tu kasi oku likolisilako oku linga eci tu tẽla! Tu pondola oku ci linga kotembo tu eca kokuaye efendelo lietu, ndeci kupange woku kunda kuenda oku endaenda kolohongele.

20. O kapako ndati ulandu watiamẽla kucimbumba? Tukula ocindekaise cimue.

²⁰ Tu kapako ndati ulandu wa tiamẽla kucimbumba? Sokolola komanu o pondola oku pamisa loku va sapuila okuti Yehova o sanjukila alikolisilo va siata oku linga kupange  waye. Anga hẽ wa kũlĩha manji umue ukãi wa kuka okuti o livetela evelo omo liuhayele utito kuenda ka kuete vali ongusu yoku linga calua kupange woku kunda? Ale wa kũlĩha manji umue ulume okuti o kasi luvei umue ka u piti haeye wa sumua calua omo ka tẽla vali oku kala kolohongele viosi Vonjango Yusoma? Kuatisa vamanji vaco poku va sapuila “ondaka yiwa yi kolisa.” (Va Efe. 4:29) Sapela lavo catiamẽla kueci tu lilongisila kulandu wacimbumba ohukũi. Olondaka viove vievetiyo vi pondola oku va kolisa oku kũlĩha okuti Yehova o sanjuka eci tu linga upange waye lutima wosi. (Olosap. 15:23; 1 Va Tes. 5:11) Eci o pandiya vakuene omo lialikolisilo avo ndaño kovina vitito, o ka lekisa okuti okuãi volomãhi via Yesu.

21. Nye wa nõlapo oku linga?

²¹ Tu eca olopandu omo okuti ovolandu a sangiwa Vavanjeliu, a tu sapuila ovina vialua viatiamẽla komuenyo wa Yesu kuenje ci tu kuatisa oku u setukula loku kuama volomãhi viaye! Momo lie ku sokiyila elilongiso liove liopokolika ale Liepata vulandu u sangiwa Vavanjeliu? Omo liaco, ivaluka okuti oco tu kuatisiwe lelilongiso liaco, tu sukila oku sokolola ovolandu aco kuenda oku a kapako vomuenyo wetu. Handi vali, tu sukila oku setukula ovina Yesu a linga loku yevelela ovina a popia. Vocipama cikuaimo tu kũlĩhĩsa ovina tu pondola oku lilongisa volondaka via sulako via Yesu osimbu ka file.