1-2. Mavọ yen e se vwo nene ichiyin ri Jesu? Djudje rọyen.

VWẸ ẹwẹn roro nẹ wọ hẹ usun rẹ ihwo re yan vwẹ aton ro muoshọ rọ vọnre vẹ ehavwo. Ohwo rọ nabọ riẹn asan na yen kobaro kẹ ovwan. Ọ vwọ yanran na, jẹ wọ mrẹ ichiyin rọyen vwẹ ehavwo na. O rhi vwo te ọke ọvo, ovwan rha mrẹ ohwo ro sun ovwan na-a! Ẹkẹvuọvo, oshọ mu we-e. Ukperẹ ọtiọyen, wẹ vẹ usun wẹn ki nene ichiyin rẹ awọ rẹ ohwo na kpẹkpẹkpẹ!

² Kerẹ Inenikristi rẹ uyota, a sa tanẹ avwanre yan vwẹ aton tiọyena ro muoshọ, rọ dia akpọ umwemwu nana. Oma vwerhen avwanre nẹ Jihova kẹ avwanre Oniru rọ gbare rọ dia Ọmọ rọyen Jesu Kristi re se nene ichiyin rọyen kpẹkpẹkpẹ. (1 Pita 2:21) Kirobo rẹ ehiahiẹ ri Baibol ọvo djere, Pita vwẹ Jesu vwo dje ohwo rọ kobaro kẹ otu. Kirobo rẹ ohwo tiọyena yanjẹ ichiyin rọyen vwo, ọtiọyen Jesu je yanjẹ ichiyin rọyen vwo kẹ avwanre. E jẹ a ta ota kpahen enọ erha ri shekphen enene rẹ ichiyin ri Jesu. Die yen o mudiaphiyo re vwo nene ichiyin rọyen? Diesorọ e vwo nene? Kẹ mavọ yen e se vwo nene?

3. Die yen o mudiaphiyọ re vwo nene ichiyin rẹ ohwo?

³ Die yen o mudiaphiyọ re vwo nene ichiyin rẹ ohwo? Vwẹ Baibol na, ọke evo a reyọ eta na “yan” vẹ “owọ” vwo dje oborẹ ohwo yeren akpọ wan. (Jẹn. 6:9; Isẹ 4:26) A sa reyọ udje rẹ ohwo phi phiyotọ vwo dje ichiyin rọ yan jovwo. Ọtiọyena, re vwo nene ichiyin rẹ ohwo mudiaphiyọ ra vwọ vwẹrokere udje rọyen.

4. Die yen o mudiaphiyọ re vwo nene ichiyin ri Jesu?

⁴ Die yen o mudiaphiyọ re vwo nene ichiyin ri Jesu? O mudiaphiyọ ra vwọ vwẹrokere udje rọyen. Vwẹ ẹkpo ri  Baibol re mu uyono nana kpahen, ọyinkọn Pita ta ota kpahen omamọ rẹ udje rẹ Jesu phi phiyotọ ro vwo chirakon rẹ oja; ẹkẹvuọvo, o vwo idjerhe efa ra sa vwọ vwẹrokeri Jesu. (1 Pita 2:18-25) Vwọrẹ uyota, oborẹ Jesu tare vẹ obo ro ruru vwẹ akpeyeren rọyen eje, ọyen udje ro fori nẹ a vwẹrokere.

5. Ihwo ri jẹgba sa ghene vwẹrokere udje ọgbagba ri Jesu? Djekpahọn.

⁵ Kere ihworakpọ ri jẹgba, avwanre sa ghene vwẹrokere udje ri Jesu? E, a sa vwẹrokere. Karophiyọ nẹ Pita bru avwanre uche nẹ a “vwẹ ẹro kere” Jesu kpẹkpẹkpẹ, ọ dia ọ tare nẹ a vwẹrokere gbagba-a. Dede nẹ avwanre gbare-e, avwanre da davwẹngba vwo nene ichiyin rọyen kpẹkpẹkpẹ, kọyen avwanre ruẹ nene eta nana rẹ ọyinkọn Jọn tare: “Yan kirobo rẹ ekpuyovwi rọye [Jesu] yanre.”—1 Jọn 2:6.

6-7. Diesorọ a vwọ tanẹ e che sikẹrẹ Jihova phiyọ siẹrẹ e de nene ichiyin ri Jesu?

⁶ E che sikẹrẹ Jihova phiyọ siẹrẹ e de nene ichiyin ri Jesu. Diesorọ a vwọ ta ọtiọyen? Ẹsosuọ, Jesu phi omamọ rẹ udje phiyotọ kpahen obo re se vwo yeren akpọ vwẹ idjerhe rẹ Ọghẹnẹ guọnọre. (Jọn 8:29) Ọtiọyena, oma cha vwerhen Jihova siẹrẹ e de nene ichiyin ri Jesu. Avwanre se vwo imuẹro nẹ Ọsẹ rẹ avwanre rọhẹ obo odjuvwu che sikẹrẹ ihwo re davwẹngba rẹ ayen vwọ dia igbeyan rọyen.—Jems 4:8.

⁷ Ọrivẹ, Jesu nabọ vwẹrokere Ọsẹ rọyen gbagba. Kọyensorọ ọ vwọ ta: “Ọ rọ mrẹ vwẹ nu yọ mrẹ Ọsẹ na re.” (Jọn 14:9) A sa vwẹrokere iruemu ri Jesu vẹ obo ro nene ihwo yerin wan. Kerẹ udje, o gbe arodọnvwẹ kẹ ọhọnvwoti ọvo, o dje  erorokẹ kẹ aye ọvo rọ họnvwa okpọga, o de ji dje ẹguọnọ kẹ ihwo ri muomaphiyọ fikirẹ ohwo rayen ro ghwuru. Avwanre da vwẹrokere Jesu, jẹ avwanre vwẹrokere Jihova. (Mak 1:40, 41; 5:25-34; Jọn 11:33-35) Avwanre vwọ vwẹrokere Jihova ye, jẹ avwanre siẹkẹrẹ phiyọ.

8. Dje oboresorọ enene rẹ udje ri Jesu sa vwọ chọn avwanre uko vwo “phi akpọ na kparobọ.”

⁸ E de nene ichiyin ri Jesu, akpọ ọbrabra nana rhe che se si ẹwẹn rẹ avwanre nẹ ẹga ri Jihova-a. Vwẹ ason rọ koba o ki ghwu, Jesu da ta: “Mi phi akpọ na kpare obọ nure.” (Jọn 16:33) Ọnana mudiaphiyọ nẹ ọ vwẹ uphẹn kẹ uruemu rẹ ihwo, oborẹ ayen vwọ tua, kugbe iroro rayen nẹ i sun ọye-en. Jesu kpairoro vrẹ obo ri muro rhe akpọ na-a, rọ dia orufon rẹ odẹ ri Jihova. Kẹ avwanre vwo? Vwẹ akpọ nana, erọnvwọn buebun herọ ri se si ẹwẹn rẹ avwanre nẹ ẹga ri Jihova. Ẹkẹvuọvo, avwanre da tẹnrovi eruo rẹ ọhọre ri Jihova kirobo rẹ Jesu ruru, kẹ avwanre ji se “phi akpọ na kparobọ.”—1 Jọn 5:5.

9. Die yen e che ru rere e se vwo arhọ ri bẹdẹ?

⁹ E che vwo arhọ ri bẹdẹ siẹrẹ e de nene ichiyin ri Jesu. Ọke rẹ eghene ọvo rọ dia ọdafe vwọ nọ Jesu obo ro se ru rere o se vwo vwo arhọ ri bẹdẹ, Jesu da kpahen kẹ: “Yanrhe ri wo nene uvwe.” (Mat. 19:16-21) Jesu ta eta nana kẹ ihwo ri Ju evo ri sere gbuyota nẹ ọyen Kristi na-a: “Igodẹ mẹ . . . nene uvwe; me . . . kẹ ayen arhọ ri bẹdẹ.” (Jọn 10:24-29) Jesu vuẹ Nikodimọs rọ dia ọvo usun rẹ ihwo ri chidia aguare ri Sahẹdrin, ro ji vwo omavwerhovwẹn kpahen iyono rọyen nẹ ohwo “ro sere gbuyota” che “vwo arhọ ri bẹdẹ.” (Jọn 3:16) Avwanre djephia nẹ avwanre vwo esegbuyota kpahen Jesu siẹrẹ a da reyọ obo ro yonori vwo ruiruo je vwẹrokere. E de ru ọtiọyen, ka cha dia bẹdẹ.—Mat. 7:14.

10. Die yen o churobọ si ra vwọ “riẹn” Jesu phiyọ? (Jọn 17:3)

¹⁰ A cha riẹn Jesu tavwen e ki se nene ichiyin rọyen kpẹkpẹkpẹ. (Se Jọn 17:3.) Ọ guọnọ ẹgbaẹdavwọn rẹ ọkieje a ke sa “riẹn” Jesu. E che rhe yono kpahọn nọke ra ruọke rere a sa vwọ riẹn iruemu, iroro, kugbe iwan rọyen. O toro uche ikpe ra dia ukoko na kri te re-e, ofori nẹ e muomaphiyọ ẹgbaẹdavwọn ra vwọ riẹn Jihova vẹ ọmọ rọyen.

11. Die yen e si phiyọ Ẹbe ẹne rẹ Ikuegbe ri Jesu na?

¹¹ Jihova phi Ẹbe ẹne rẹ Ikuegbe ri Jesu phiyọ Baibol na rere avwanre sa vwọ riẹn ọmọ rọyen. Ẹbe ẹne na ta ota kpahen akpeyeren ri Jesu vẹ iruo  aghwoghwo ro ruru vwẹ akpọ na. Ayen nẹrhẹ a riẹn oborẹ Jesu tare, obo ro ruru, kugbe ẹro ro vwo nẹ emu. Ayen je chọn avwanre uko vwo “roro” kpahen udje ri Jesu. (Hib. 12:3) Kọyen a sa tanẹ ichiyin ri Jesu hẹ evunrẹ ẹbe ẹne yena. Ọtiọyena, a cha nabọ riẹn Jesu phiyọ siẹrẹ a da fuẹrẹn ẹbe ẹne yena. Ukuotọ rọyen, avwanre ki se nene ichiyin rọyen kpẹkpẹkpẹ.

12. Mavọ yen a sa vwọ mrẹ erere vọnvọn vwo nẹ Ẹbe ẹne rẹ Ikuegbe ri Jesu na?

¹² O teri e di vwo se ẹbe ẹne yena-a. Ofori nẹ a nabọ ghwọrọ ọke vwo yono ji roro kokodo kpahen ayen. (Ni Joshua 1:8.) E jẹ a ta ota kpahen iroroẹjẹ ivẹ re sa chọn avwanre uko vwo roro kokodo kpahen ẹbe ẹne yena vẹ obo ra sa vwọ reyọ ayen vwo ruiruo.

13. Mavọ yen wọ sa vwọ vwẹ ẹwẹn roro ikuegbe rehẹ ẹbe ẹne na?

¹³ Ẹsosuọ, vwẹ ẹwẹn roro ikuegbe rehẹ ẹbe ẹne rẹ ikuegbe ri Jesu na. Vwẹ ẹwẹn roro nẹ wọ hẹ etiyin mrẹ obo re phia, ji nyo edo na. Wo se vwo ru ọtiọyen, vwẹ ẹbe rẹ ukoko na vwo ru ehiahiẹ. Fuẹrẹn eta re riariẹ ẹkpo wo se na phiyọ. Guọnọ evuẹ efa re ta ota kpahen ihwo na vẹ asan rẹ ayen dia. Reyọ idjedje rẹ ikuegbe ru wo se na vwọ vwanvwe obo re gbere wan vwẹ ọbe ọfa vwẹ usun rẹ ẹbe ẹne na. Ọkiọvo, ọbe ọvo sa vwẹ ẹkpo evo phia rẹ ọ ro chekọ na vwọphia-a.

14-15. Mavọ yen a sa vwọ reyọ obo re yono vwo nẹ Ẹbe ẹne rẹ Ikuegbe rẹ akpeyeren ri Jesu vwo ruiruo?

¹⁴ Ọrivẹ, reyọ oborẹ wo yonori vwo ruiruo. (Jọn 13:17) Wọ da nabọ yono kpahen ikuegbe rẹ akpeyeren ri Jesu nu, wọ me nọ oma wẹn: ‘O vwo oborẹ mi yono vwo nẹ ikuegbe nana re me sa reyọ vwo ruiruo? Mavọ me sa vwọ reyo ikuegbe nana vwọ chọn ohwo ọfa uko?’ Roro kpahen ohwo ọvo wo vugheri, rere wọ guọnọ ọke ro fori wọ vuẹ oborẹ wo yonori vwẹ idjerhe rẹ ẹguọnọ kugbe erorokẹ.

 ¹⁵ E jẹ a mrẹ udje rẹ obo ra sa vwọ reyọ iroroẹjẹ ivẹ nana vwo ruiruo. A cha fuerẹn ikuegbe rẹ ayeuku ọvo rẹ Jesu mrẹre vwẹ uwevwin rẹ ẹga na.

16. Djisẹ rẹ obo re phiare vwẹ Mak 12:41.

¹⁶ Vwẹ ẹwẹn roro ikuegbe na. (Se Mak 12:41.) Vwẹ ẹwẹn roro obo re phiare vwẹ Nisan 11, 33 C.E. rọ dia udughwrẹn rọ koba tavwen Jesu ki ghwu. Vwẹ ẹdẹ yena, Jesu ghwọrọ ọke buebun vwo yono ihwo vwẹ uwevwin rẹ ẹga na. Ilori rẹ ẹga na vwọsuọ mamọ. O kri nọ-ọ na, evo usun rayen nọ Jesu kpahen asan rẹ ẹgba rọyen nurhe. Efa da rha nọ enọ rẹ ayen rorori nẹ ọ cha sa kpahenphiyọ-ọ. (Mak 11:27-33; 12:13-34) Enẹna, Jesu kpo ẹbẹre ọfa rẹ uwevwin rẹ ẹga na re. Ọ sa dianẹ Otegodo rẹ Eya na yen ọ rare, kidie ọ kparo mrẹ ekpeti rẹ utoro na vwo nẹ asan rọ hepha. O de chidia, jẹ o nẹ ihwo ri phi igho phiyọ ekpeti na. Ọ da mrẹ edafe beubun ri phi igho buebun phiyọ ekpeti na. Ọ sa tobọ dianẹ o nyo edo rẹ igho na ri she phiyọ ekpeti na.

17. Die yen ayeuku re djunute vwẹ Mak 12:42 ruru?

¹⁷ Se Mak 12:42. Ọke evo vwọ wan nu, Jesu de vwo oniso rẹ aye ọvo. Aye na ovwiogbere, “ayeuku” yen o ruẹ. (Luk 21:2) Erọnvwọn gan kẹ mamọ, ọ tobọ mrẹ igho vwọ dẹ erọnvwọn rọ ghene guọnọ-ọ. Dedena, o kpo asan rẹ ekpeti na hepha, o de phi imigho ivẹ phiyọ. Ọ sa dianẹ e nyo edo vuọvo ọke ro vwo phi ayen phiyọ ekpeti na-a. Jesu riẹnre nẹ imigho ivẹ re se lepta yen o phi phiyọ ekpeti na. Lepta yen igho rọ ma hanvwe kparobọ vwẹ ọke yena. O te vwọ dẹ ogue ọvo rọ dia ọmọphran ro me ku kparobọ re vwo chere emu vwẹ ọke yena-a.

18. Vwo nene obo rehẹ Mak 12:43, 44, die yen Jesu ta kpahen utoro rẹ ayeuku na?

¹⁸ Se Mak 12:43, 44. Oma vwerhen Jesu mamọ kpahen oborẹ aye na ruru. Ọtiọyena, o de se idibo rọyen, o de dje aye na kẹ ayen, ọ da ta: “Ayeuku nana rẹ ogbere na phihọ bunọ ayen ejobi.” Vwọba, ọ da ta: “Ayen ejobi [ma rho kẹ edafe na] phihọ tiobo rẹ ayen vwo bu te: ẹkẹvuọvo ayeuku nana, vwẹ evun rẹ obẹnvwẹ rọye o de phi obo ro vwori ejobi phihọ, ọye ọvo obo ro vwori vwẹ akpọ na.” Ayeuku na phi obo ro vwori eje phiyọ ekpeti na, kidie ọ vwẹroso Jihova nẹ ọ cha vwẹrote ọyen.—Une 26:3.

19. Die yen e se yono vwo nẹ oborẹ Jesu ta kpahen ayeuku na?

¹⁹ Reyọ oborẹ wo yonori vwo ruiruo. Nọ oma wẹn: ‘Die yen mi se yono vwo nẹ oborẹ Jesu ta kpahen ayeuku na?’ Roro kpahen ayeuku na. O muẹro dẹn nẹ ọ guọnọ kẹ Jihova vrẹ ọtiọyen jovwo. Dedena, o ru oborẹ ẹgba rọyen muru, ọ da kẹ Jihova obo ri me yovwin ro vwori. Jesu riẹnre nẹ obo ro torori na ghanre kẹ Jihova. Orọnvwọn ọghanghanre ọvo re yono nẹ ikuegbe na rhe kọna: Oma cha vwerhen Jihova siẹrẹ avwanre da vwẹ ẹga ọsoso vwọ kẹ, nẹ otọ rẹ ẹwẹn rhe. (Mat. 22:37; Kọl. 3:23) Oma vwerhen Jihova siẹrẹ ọ da mrẹ ẹgbaẹdavwọn rẹ avwanre vẹ ọke rẹ avwanre ghwọrọ phiyọ ẹga rọyen, re vwo kpo uyono ji vwobọ vwẹ iruo aghwoghwo na.

20. Mavọ yen wọ sa vwọ reyọ oborẹ wo yonori vwo nẹ ikuegbe rẹ ayeuku na vwo ruiruo? Djudje rọyen.

²⁰ Mavọ yen wọ sa vwọ reyọ oborẹ wo yono vwo nẹ ikuegbe rẹ ayeuku na vwo ruiruo? Roro kpahen ihwo evo rẹ  oma cha vwerhen siẹrẹ wọ da vuẹ ayen nẹ oma vwerhen Jihova kpahen oborẹ ayen se ruẹ vwẹ ẹga rọyen. Kerẹ udje, wọ riẹn oniọvo aye ọvo rọ vwẹ ẹro okueku vwo nẹ oma rọyen kidie nẹ o rhe se ruẹ tobo o ruẹ jovwo-o fikirẹ ọga? Yẹrẹ oniọvo ọshare ọvo rẹ ofu dje kidie nẹ o rhe se kpo uyono ọkieje-e fikirẹ okpọga rọ họnvwa? Vwẹ ota “esiri rọ vọnre vẹ uyono” vwọ chọn ihwo tiọyena uko. (Ẹfe. 4:29) Reyọ oborẹ wo yono vwo nẹ ikuegbe rẹ ayeuku na vwo phiuduphiyọ ihwo tiọyena awọ. Eta rẹ ọbọngan tiọyena cha nẹrhẹ ayen karophiyọ nẹ Jihova vwo omavwerhovwẹn kpahen oborẹ ayen se ruẹ vwẹ ẹga rọyen. (Isẹ 15:23; 1 Tẹsa. 5:11) Ọke wo de jiri ihwo efa fikirẹ ẹgbaẹdavwọn rayen vwẹ ẹga ri Jihova, jẹ wo nene ichiyin ri Jesu kpẹkpẹkpẹ.

21. Die yen wo brorhiẹn wo vwo ru enẹna?

²¹ Avwanre kpẹvwẹ Jihova mamọ nẹ Ẹbe rẹ Ikuegbe rẹ akpeyeren ri Jesu na vuẹ avwanre erọnvwọn buebun kpahen Jesu, re cha nẹrhẹ a sa vwẹrokere, ji nene ichiyin rọyen kpẹkpẹkpẹ! Wọ sa reyọ Ẹbe rẹ Ikuegbe rẹ akpeyeren ri Jesu na vwo ru uyono romobọ yẹrẹ Ẹga rẹ Orua. Karophiyọ nẹ a sa vwọ mrẹ erere vọnvọn vwo nẹ uyono tiọyena, ofori nẹ a vwẹ ẹwẹn roro ikuegbe na, je reyọ vwo ruiruo. Ofori nẹ a vwẹrokerẹ oborẹ Jesu ruru, je kerhọ rẹ obo rọ tare. Vwẹ uyono rọ vwọ kpahen ọnana, a cha ta ota kpahen obo re se yono vwo nẹ eta rẹ Jesu ta kuko tavwen o ki ghwu.