1-2. Zwi konadzea hani u tevhela ṋayo dza Yesu? Fanyisani.

EDZANI u ḓivhona nga iṱo ḽa muhumbulo ni tshi khou tshimbila na tshigwada tsha vhathu muṱavhani, ni fhethu hune ha ofhisa vhukuma. Fhedzi hu na muthu ane a khou ni tshimbidza uri a ni sumbedze nḓila. Musi a tshi khou tshimbila, nga murahu hawe hu vhonala ṋayo dzawe dzine a khou dzi sia. Musi ni tshi sedza, na wana uri a ni tsha vhona muthu ane a khou ni tshimbidza. Fhedzi a ni ofhi. Nṱhani hazwo, inwi na tshigwada tshine na khou tshimbila natsho ni tevhela ṋayo dza onoyo muthu nga vhuronwane.

² Ḽino shango ḽivhi ḽine ra khou tshila khaḽo ṋamusi ḽi nga fanyiswa na henefho fhethu hu re na khombo nahone Vhakriste vha nga fanyiswa na tshenetsho tshigwada tshine tsha khou tshimbila henefho fhethu. Ri a takala ngauri Yehova o ri ṋea Murwa wawe Yesu Kristo uri a vhe mutshimbidzi washu, ane ra nga tevhela ṋayo dzawe nga vhuronwane. (1 Pet. 2:21) Iṅwe bugu ine ya ṱalutshedza Bivhili yo amba uri Petro o fanyisa Yesu na mutshimbidzi. Yesu o ri siela ṋayo dzine ra nga dzi tevhela u fana na onouḽa mutshimbidzi. Ri ḓo fhindula mbudziso tharu nga ha nḓila ine ra nga tevhela ngayo ṋayo dzawe: Zwi amba mini u tevhela ṋayo dza Yesu? Ndi ngani ri tshi fanela u dzi tevhela? Ri nga zwi ita hani?

3. Zwi amba mini u tevhela ṋayo dza muṅwe muthu?

³ Zwi amba mini u tevhela ṋayo dza muṅwe muthu? Bivhilini nga zwiṅwe zwifhinga, maipfi “tshimbila” na “milenzhe” a ambela kha nḓila ine muthu a tshila ngayo. (Gen. 6:9; Mir. 4:26) Nḓila ine muthu a tshila ngayo, i nga vhambedzwa na ṋayo dzine a dzi sia musi a tshi khou tshimbila. Nga zwenezwo, u tevhela ṋayo dza muṅwe zwi amba u tevhela tsumbo yawe kana u mu edzisa.

4. Zwi amba mini u tevhela ṋayo dza Yesu?

 ⁴ Zwino, zwi amba mini u tevhela ṋayo dza Yesu? Zwi amba u edzisa tsumbo yawe. Kha luṅwalo lwe ino thero ya thewa khalwo, muapostola Petro u khou amba nga ha tsumbo yavhuḓi ye Yesu a ri vhetshela yone nge a konḓelela musi a tshi tambudzwa. Naho zwo ralo, hu na zwinzhi zwe Yesu a zwi ita zwine ra nga zwi edzisa. (1 Pet. 2:18-25) Zwavhuḓivhuḓi, kha zwoṱhe zwe a amba na u zwi ita, Yesu o ri vhetshela tsumbo ine ra fanela u i edzisa.

5. Samusi roṱhe ri na tshivhi, naa ri nga kona u tevhela tsumbo ya Yesu? Ṱalutshedzani.

⁵ Samusi ri vhathu vha re na tshivhi, naa ri nga kona u edzisa tsumbo ya Yesu? Ee! Ri nga kona. Humbulani uri Petro o ri ṱuṱuwedza uri ri ‘tevhele tsumbo ya Yesu nga vhuronwane,’ hu si kokotolo. Arali ra tevhela tsumbo yawe nga hune ra nga kona ngaho, ri ḓo vha ri tshi khou ita zwe muapostola Yohane a zwi amba musi a tshi ri: “[Ri] tea u dzula [ri] tshi tshila u fana nae.”—1 Yoh. 2:6.

6-7. Ndi ngani ri tshi nga ri u tevhela ṋayo dza Yesu zwi ita uri ri sendele tsini na Yehova?

⁶ U tevhela ṋayo dza Yesu zwi ḓo ita uri ri sendele tsini na Yehova. Ndi ngani ri tshi ralo? Tshiitisi tsha u thoma ndi ngauri Yesu o ri vhetshela tsumbo yavhuḓi vhukuma ya nḓila ine ra nga tshila ngayo ri tshi takadza Mudzimu. (Yoh. 8:29) Nga zwenezwo, arali ra tevhela ṋayo dza Yesu, ri ḓo takadza Yehova. Nahone ri nga vha na vhungoho ha uri Khotsi ashu wa ṱaḓulu u ḓo sendela tsini na vhane vha lingedza nga nungo dzoṱhe u vha khonani dzawe.—Yak. 4:8.

⁷ Tshiitisi tsha vhuvhili ndi uri Yesu o edzisa Khotsi awe kokotolo. Ndi ngazwo Yesu o amba uri: “A vhonaho nṋe o vhona Khotsi.” (Yoh. 14:9) Ri nga edzisa tsumbo ya Yesu na nḓila ye a vha a tshi fara ngayo vhaṅwe. Sa tsumbo, o pfela vhuṱungu muthu we a vha e na mapele, mufumakadzi we a vha a tshi khou lwala vhukuma na u pfela vhuṱungu vhathu vhe vha felwa. Musi ri tshi  edzisa Yesu, ri vha ri tshi khou edzisa na Yehova. (Marko 1:40, 41; 5:25-34; Yoh. 11:33-35) Musi ri tshi bvela phanḓa ri tshi edzisa tsumbo ya Yehova, zwi ita uri ri vhe na vhushaka ha tsini nae.

8. Ṱalutshedzani uri u tevhela ṋayo dza Yesu zwi ḓo ri thusa hani u “kunda” shango.

⁸ U tevhela ṋayo dza Yesu zwi ḓo ri thusa uri ri si thithiswe kha u shumela Yehova. Nga vhusiku hawe ha u fhedzisela e kha ḽifhasi, Yesu o ri: “Nṋe ndo kunda shango.” (Yoh. 16:33) O vha a tshi khou amba uri ho ngo tendela mihumbulo, zwipikwa kana zwine zwa itwa nga vhaṅwe vhathu zwi tshi mu ṱuṱuwedza. Yesu o vha a songo hangwa uri musi a tshi ḓa kha ḽifhasi, o vha o ḓela u phumula dzina ḽa Yehova matope. Hu pfi mini nga riṋe? Kha ḽino shango, hu na zwithu zwinzhi zwine zwa nga ri thithisa kha u shumela Yehova. Fhedzi arali ra nga edzisa Yesu, ra livhisa ṱhogomelo kha u ita zwine Mudzimu a zwi funa, ri ḓo kona u “kunda” ḽino shango.—1 Yoh. 5:5.

9. Ri tea u ita mini uri ri wane vhutshilo vhu sa fheli?

⁹ U tevhela ṋayo dza Yesu zwi ḓo ita uri ri wane vhutshilo vhu sa fheli. Musi muṱhannga o pfumaho a tshi vhudzisa Yesu zwine a fanela u ita uri a wane vhutshilo vhu sa fheli, Yesu o mu fhindula a ri: “Ntevhele.” (Mat. 19:16-21) Kha vhaṅwe Vhayuda vhe vha vha vha sa tendi uri Yesu ndi ene Kristo, Yesu o ri: “Nngu dzanga . . . dzi a ntevhela. Ndi dzi ṋea vhutshilo vhu sa fheli.” (Yoh. 10:24-29) Nikodemo we a vha e muraḓo wa Sanihedrini, o vha e na dzangalelo vhukuma kha zwe Yesu a vha a tshi khou zwi funza nahone Yesu o mu vhudza uri “ane a mu tenda” u ḓo wana “vhutshilo vhu sa fheli.” (Yoh. 3:16) Ri sumbedza uri ri na lutendo kha Yesu nga u shumisa zwe a zwi funza na nga u edzisa zwe a zwi ita. Arali ra ita zwenezwo, ri ḓo wana vhutshilo vhu sa fheli.—Mat. 7:14.

10. Ndi mini zwine ra fanela u zwi ita uri ri bvele phanḓa ri tshi “ḓivha” Yesu khwine? (Yohane 17:3)

¹⁰ Musi ri sa athu u tevhela tsumbo ya Yesu nga vhuronwane, ri tea u mu ḓivha. (Vhalani Yohane 17:3.) U “ḓivha” Yesu ndi zwithu zwine ra fanela u bvela phanḓa ri tshi zwi ita. Ri fanela u bvela phanḓa ri tshi guda zwo engedzeaho nga hae, nḓila ine a vha ngayo, nḓila ine a humbula ngayo na nḓila ine a ita ngayo zwithu. Hu sa londwi uri ri na tshifhinga tshingafhani ri ngohoni, ri fanela u bvela phanḓa ri tshi ḓivha Yehova na Murwa wawe.

11. Bugu dza Evangeli dzi amba nga ha mini?

¹¹ Uri ri bvele phanḓa ri tshi ḓivha Yesu, Yehova o ri ṋea bugu nṋa dza Evangeli dzi re Bivhilini dzine dza ri vhudza nga ha vhutshilo na vhuḓinḓa hawe musi e kha ḽifhasi. Dzenedzi bugu nṋa dzi ri vhudza nga ha zwe Yesu a zwi amba, zwe a zwi ita na nḓila ye a ḓipfa ngayo. Dzi ri thusa u ‘humbulisisa’ nga ha tsumbo ya Yesu. (Vhahev. 12:3) Dzenedzi bugu ndi ṋayo dza lwa pfanyisedzo dze Yesu a ri siela dzone uri ri dzi tevhele. Nga zwenezwo, musi ri tshi guda dzenedzo bugu dza Evangeli, ri ḓo ḓivha Yesu khwine. Zwenezwi zwi ḓo ita uri ri tevhele ṋayo dzawe nga vhuronwane.

12. Ri nga vhuyelwa hani nga vhuḓalo nga bugu dza Evangeli?

 ¹² Uri ri vhuyelwe zwihulu nga u guda dzenedzi Evangeli, ri fanela u ita zwi fhiraho u sokou dzi vhala. Ri tea u ḓiṋea tshifhinga tsha u guda dzenedzo bugu nga vhuronwane na u elekanya nga ha zwine ra zwi guda. (Vhambedzani Yoshua 1:8, ṱhaluso i re magumoni a siaṱari.) Kha ri ambe nga zwithu zwivhili zwine zwa nga ri thusa u elekanya nga ha dzenedzi bugu dza Evangeli na u shumisa zwine ra zwi guda.

13. Ni nga ita hani uri zwine na khou zwi vhala kha bugu dza Evangeli zwi nge zwi khou itea?

¹³ Tsha u thoma, itani uri zwine na khou zwi vhala kha bugu dza Evangeli zwi nge zwi khou itea. Ḓivhoneni nga iṱo ḽa muhumbulo ni tshi khou ḓipfa nga nḓila ine muthu ane na khou vhala nga hae a ḓipfa ngayo, ni tshi khou vhona zwe zwa vha zwi tshi khou itea na u pfa zwe zwa vha zwi tshi khou ambiwa. Uri ni kone u zwi ita, ni nga ita ṱhoḓisiso ni tshi shumisa khandiso dza ndangulo. Vhalani ndimana dza mafhungo a re nga phanḓa kana a nga murahu ha zwine na khou guda nga hazwo. Itani ṱhoḓisiso nga ha vhathu kana fhethu ho bulwaho kha eneo mafhungo. Vhambedzani mafhungo ane na khou a vhala na mafhungo a fanaho na eneo kha iṅwe bugu ya Evangeli. Nga zwiṅwe zwifhinga, muṅwali wa Evangeli u vha o dzhenisa mafhungo e muṅwe muṅwali wa Evangeli a si a dzhenise.

14-15. Ri fanela u ita mini uri ri shumise zwine ra guda kha Dzievangeli?

¹⁴ Tsha vhuvhili, shumisani zwine na khou zwi guda kha bugu dza Evangeli vhutshiloni haṋu. (Yoh. 13:17) Musi no no guda mafhungo a re kha Evangeli nga vhuronwane, ḓivhudziseni zwi tevhelaho: ‘Naa hu na zwe nda guda kha enea mafhungo zwine nda nga zwi shumisa vhutshiloni hanga? Ndi nga shumisa hani zwe nda guda u thusa vhaṅwe?’ Lingedzani u humbula nga ha muthu ane na mu ḓivha ane na nga mu thusa uri a vhuyelwe nga zwe na zwi guda. Ni ambe nae nga nḓila ya lufuno na nga vhuṱali.

¹⁵ Kha ri ite tsumbo ya uri ri nga shumisa hani dzenedzi nḓila mbili. Ri ḓo amba nga ha mafhungo a tshilikadzi i shayaho ye Yesu a i vhona thembeleni.

16. Ṱalutshedzani mafhungo o ambiwaho kha Marko 12:41.

¹⁶ Itani uri zwine na khou zwi vhala zwi nge zwi khou itea. (Vhalani Marko 12:41.) Edzani u vhona nga iṱo ḽa muhumbulo zwe zwa itea nga 11 Nisani 33 C.E. Yesu o vha a tshi ḓo vhulawa nga murahu ha maḓuvha a si gathi. O vha o fhedza tshifhinga tshinzhi a tshi khou gudisa thembeleni. Fhedzi vharangaphanḓa vha vhurereli vho vha vha tshi khou mu pikisa. Vhaṅwe vho mu vhudzisa uri u wana ngafhi maanḓa a u ita wonoyu mushumo. Vhaṅwe vho lingedza u mu vhudzisa mbudziso dze vha vha vha tshi vhona u nga u ḓo kundelwa u dzi fhindula. (Marko 11:27-33; 12:13-34) Zwino Yesu o vha o no pfulutshela kha luṅwe lurumbu lwa thembele. Musi e henefho, o vha a tshi kona u vhona mbulungelo dza tshelede nahone khamusi fhethu he a vha e hone ndi fhethu hu vhidzwaho Muṱa wa Vhafumakadzi. O dzula fhasi nahone a sedza vhathu musi vha tshi dzhenisa miṋeelo mbulungeloni. A vhona vhathu vhanzhi vho pfumaho vha tshi khou dzhenisa tshelede nnzhi. Khamusi o vha o dzula tsini lwe a pfa tshelede i tshi khou dzhena mbulungeloni.

17. Tshilikadzi i shayaho yo ambiwaho kha Marko 12:42 yo ita mini?

¹⁷ Vhalani Marko 12:42. Nga murahu ha tshifhinganyana, Yesu o ṱhogomela muṅwe mufumakadzi. O vha e “tshilikadzi i shayaho.” (Luka 21:2) Vhutshilo hayo ho vha vhu tshi khou konḓa vhukuma nahone khamusi yo vha i si na tshelede yo eḓanaho ya u renga zwine ya zwi ṱoḓa u itela u tshila. Naho zwo ralo, yeneyo tshilikadzi ya ya kha iṅwe mbulungelo, ya posa zwipeni zwayo zwivhili vhathu vha sa khou zwi vhona. Khamusi zwenezwo zwipeni a zwo ngo vhuya zwa ita na phosho musi zwi tshi khou dzhena mbulungeloni. Yesu o vha a tshi ḓivha zwe onoyo mufumakadzi a dzhenisa mbulungeloni. Zwo vha zwi zwipeni zwivhili zwiṱukusa zwe zwa vha zwi si na ndeme nga tshenetsho tshifhinga. Zwenezwo zwipeni zwo vha zwi sa eḓani na u renga tshiṋoni tshiṱukusa tshe tsha vha tshi tshi ḽiwa nga tshenetsho tshifhinga, tshe tsha vha tshi sa ḓuri.

18. U ya nga Marko 12:43, 44, Yesu o ri mini nga ha muṋeelo wa tshilikadzi?

¹⁸ Vhalani Marko 12:43, 44. Yesu o takadzwa vhukuma nga zwe zwa itwa nga yeneyo tshilikadzi. Nga zwenezwo, a vhidza vhafunziwa vhawe, a vha sumbedza yeneyo tshilikadzi a ri: “Heyi tshilikadzi yo bvisa u fhira vhoṱhe.” Nga murahu a vha ṱalutshedza a ri: “Vhoṱhe [zwihuluhulu vho pfumaho] vho dzhenisa vha tshi bvisa kha zwinzhi zwine vha vha nazwo, fhedzi tshilikadzi yo bvisa zwoṱhe zwe ya vha i nazwo, zwe ya vha i tshi ḓo ḓitshidza ngazwo.” Musi yeneyo tshilikadzi i tshi ṋeela nga tshelede ṱhukhu-ṱhukhu ye ya vha i nayo nga ḽeneḽo ḓuvha, yo vha i tshi khou fhulufhela uri Yehova u ḓo i ṱhogomela.—Ps. 26:3.

19. Ri guda ngudo ifhio ya ndeme kha zwe Yesu a zwi amba nga ha tshilikadzi i shayaho?

¹⁹ Shumisani zwine na khou zwi guda vhutshiloni haṋu. Ḓivhudziseni uri: ‘Ndi nga guda mini kha maipfi e Yesu a a amba nga ha tshilikadzi i shayaho?’ Humbulani nga ha yeneyo tshilikadzi. Zwi tou pfala uri yo vha i tshi ṱoḓa u ṋea Yehova zwo engedzeaho. Yo ita zwe ya vha i tshi nga kona, yo ṋea Yehova zwa khwinesa. Nahone Yesu o vha a tshi zwi ḓivha uri Yehova u dzhiela nṱha muṋeelo wa yeneyo tshilikadzi. Riṋe ri guda ngudo ya ndeme ya uri Yehova u a takala musi ri tshi mu ṋea zwa khwinesa kana musi ri tshi mu shumela nga mbilu yashu yoṱhe. (Mat. 22:37; Vhakol. 3:23) Yehova u a takala musi a tshi vhona ri tshi ita zwoṱhe zwine ra nga kona tshumeloni yawe. Zwenezwi zwi katela tshifhinga na nungo zwine ra zwi fhedza ri tshi khou ya miṱanganoni na tsimuni.

20. Ni nga shumisa hani zwe na zwi guda kha mafhungo a tshilikadzi i shayaho? Ṋeani tsumbo.

²⁰ Ni nga shumisa hani zwe na zwi guda kha mafhungo a yeneyi tshilikadzi? Lingedzani u humbula  nga ha vhathu vhane vha nga ṱuṱuwedzea arali na vha humbudza uri Yehova u dzhiela nṱha zwine vha khou mu itela. Sa tsumbo, naa ni a ḓivha muṅwe wahashu wa tshifumakadzini wa mualuwa ane a ḓivhona mulandu ngauri ha tsha kona u ita zwo engedzeaho vhuḓinḓani nga nṱhani ha u sa vha na mutakalo wavhuḓi? Kana naa hu na wahashu wa tshinnani a re na vhulwadze vhu sa fholi, o kuleaho nungo ngauri ha tsha kona u ya miṱanganoni tshifhinga tshoṱhe? Ni nga thusa vhenevha vhahashu nga u vha vhudza “zwithu zwavhuḓi zwine zwa fhaṱa.” (Vhaef. 4:29) Vha ṱalutshedzeni nga ha zwithu zwi ṱuṱuwedzaho zwe ra zwi guda kha mafhungo a tshilikadzi i shayaho. Maipfi aṋu a ṱuṱuwedzaho a nga vha humbudza uri Yehova u a takala musi ri tshi mu ṋea zwa khwinesa. (Mir. 15:23; 1 Vhathes. 5:11) Musi ni tshi khoḓa vhaṅwe nge vha ṋea Yehova zwa khwinesa naho zwi zwiṱuku, ni vha ni tshi khou tevhela ṋayo dza Yesu nga vhuronwane.

21. No ḓiimisela u ita mini?

²¹ Ri livhuwa uri Dzievangeli dzi na mafhungo manzhi a vhutshilo ha Yesu ngauri zwenezwi zwi ri thusa u mu edzisa na u tevhela ṋayo dzawe nga vhuronwane. Zwi nga vha zwavhuḓi arali na guda dzenedzi Evangeli kha ngudo ya muthu nga eṱhe kana kha Vhurabeli ha Muṱa. Ri tea u dovha ra humbula uri, uri ri vhuyelwe nga u guda dzenedzo Evangeli, ri tea u ita uri zwenezwo zwithu zwi nge zwi khou itea na u zwi shumisa vhutshiloni hashu. Ro guda uri ri tea u edzisa zwe Yesu a ita, fhedzi ri tea u dovha ra thetshelesa zwe a zwi amba. Kha thero i tevhelaho, ri ḓo amba nga ha zwine ra nga zwi guda kha zwe Yesu a zwi amba musi a sa athu u fa.