1, 2. მუჭო რე ჩქინო შეიოლებერ, გივაჸუნათ ქრისტეშ ნაკვალუს? ქიმიჸუნით მაგალით.

წერმიდგინით, ნამდა შხვეფწკუმა ართო თირით ფორილ ოშქურანჯ შარას გეჸუნთ. წოხოლე გამოცდილ გიდ ეწორჸუნა დო თირს ნოქურს იტენს. შილებე მუდგარენ მომენტის ვარწყედათ გიდის, მარა შიშის ვენოლუთ, მუშენდა თქვა დო თქვანწკუმა ართო რენან თინეფ, მუთ შეილებნა ზუსტას გეჸუნთ გიდიშ დოტებულ ნოქურს!

² მუჭოთ ჭეშმარიტ ქრისტიანეფ, ჩქი ხოლო თეცალ სიტუაციას ვორეთ დო გივორეთ ოშქურანჯ შარას თე უბადო ქვეყნიერებას. საბედნეროთ, იეჰოვაქ სრულყოფილ გიდ — მუშ სქუა, იესო ქრისტე — გემრინეს, მიდგაშ ნაკვალუს შემლებნა ზუსტას გივაჸუნათ (1 პეტ. 2:21). ართ ბიბლიურ წყაროშ თანახმათ, პეტრექ თე მუხლის იესო გიდის შეადარ. მუჭოთ გიდ იტენს ნოქურს, თეშ იესოქ ხოლო დომტეს ნაკვალუ, ნამდგას შემლებნა გივაჸუნათ. მორთ გუვარჩუათ სუმ კითხვა: მუს ნიშნენს, გივაჸუნათ ქრისტეშ ნაკვალუს? მუშენ ოკო გივაჸუნათ თის? დო მუჭო შემლებნა თეშ კეთება?

3. მუს ნიშნენს, გივაჸუნათ მიდგაინიშ ნაკვალუს?

³ მუს ნიშნენს, გივაჸუნათ მიდგარენიშ ნაკვალუს? ბიბლიას, სიტყვეფ „ულა“ დო „შარა“ მინშა გიმორნაფილ რე პიროვნებაშ ცხოვრებაშ კურსიშ ეიოჭარალო (დაბ. 6:9; იგავ. 4:26). პიროვნებაშ მოჩამილ მაგალით შემლებნა შევადარათ ნოქურს, ნამდგას თინა გილულაშ დროს იტენს. თაშ ნამდა, გივაჸუნათ მიდგაინიშ ნაკვალუს ნიშნენს, მივაჸუნათ თიშ მაგალითის.

4. მუს ნიშნენს, გივაჸუნათ იესოშ ნაკვალუს?

⁴ მუს ნიშნენს, გივაჸუნათ იესოშ ნაკვალუს? მარტივო ქოფთქუათინ, თენა ნიშნენს, მივაჸუნათ თიშ მაგალითის. თე სტატიაშ  მთავარ მუხლის მოციქულ პეტრე იჩიებ იესოშ მოთვინებაშ გურშენ, ნამუთ წამებაშ დროს გიმირჩქინ. მარა ხოლო ბრელნერო შემლებნა მივაჸუნათ იესოშ მაგალითის (1 პეტ. 2:18—25). ნამდვილო, იესოშ მთელ ცხოვრება — ირფელ, მუთ თიქ თქუ დო აკეთ — ჩქინო მაგალით რე.

5. შეულებნანო არასრულყოფილ ადამიანეფს, მიაჸუნან იესოშ სრულყოფილ მაგალითის? გენწყით.

⁵ ჩქი, მუჭოთ არასრულყოფილ ადამიანეფს, შემლებნანო, მივაჸუნათ იესოშ მაგალითის? მუშო ოკო რაგად, ქო. ქიგიშინით, პეტრეს ვა უთქუალ, ნამდა სრულყოფილო გივაჸუნათ ქრისტეშ ნაკვალუს. თეშ გინაწონს, ელამჩეს, ზუსტას გივაჸუნათ თის. მუჟამსით მთელ მონდომათ ვეცადებუთ, ზუსტას გივაჸუნათ ქრისტეშ ნაკვალუს დო ირფელს გუვაკეთენთ, მუთ არასრულყოფილ ადამიანეფს შემლებნა, თეშნერო გეგმიბრინუანთ მოციქულ იოანეშ სიტყვეფს: „თეშ ოკო იცხოვრას, მუჭოთ თინა [იესო] ცხოვრენდჷ“ (1 იოან. 2:6).

6, 7. მუშენ შემლებნა ფთქუათ, ნამდა იესოშ ნაკვალუშ გეჸუნა უმოსო დუმაახლოვენა იეჰოვაწკუმა?

⁶ იესოშ ნაკვალუშ გეჸუნა უმოსო დუმაახლოვენა იეჰოვაწკუმა. მუშენ შემლებნა თეშ რაგად? პირველ, იესოქ დომტეს არგამა მაგალით, მუჭო ოკო იფცხოვრათ თეშ, ნამდა იეჰოვას ვასიამოვნათ (იოან. 8:29). ათეშენ, იესოშ ნაკვალუშ გეჸუნათ ვასიამოვნენთ იეჰოვას დო შემლებნა დარწმუნებულ ვორდათ, ნამდა ჩქინ ზეციერ მუმა დეახლოვებ თინეფს, მით მანგარო ოცად, გინირთას თიშ მეგობარო (იაკ. 4:8).

⁷ მაჟია, იესო სრულყოფილო მეჸუნდჷ მუშ მუმაშ მაგალითის. ათეშენ შეულებუდ თქუკო: „მა ბძირუნ თიქ, მუმა ხოლო ძირჷ“ (იოან. 14:9). ჩქი შემლებნა გიმიფრჩქინათ იესოშ თვისებეფ დო თეშ მივექცუათ შხვეფს, მუჭოთ თინა ოქცუდ. მაგალთო, თის ეცოდ კეთროვანქ დო მიშელ აუტანელ ლახალა ოჭირუდუნ ფერ დო საჸოროფო ადამიან აფუდ ღურელინ ფერ პიროვნებეფიშ  მდგომარეობაშა. თეშნერო, იესოშ მაგალითიშ მეჸუნათ, იეჰოვაშ მაგალითის ხოლო მეპჸუნთ (მარ. 1:40, 41; 5:25—34; იოან. 11:33—35). მუთ უმოსო გიმიფრჩქინანთ იეჰოვაშ თვისებეფს, თით უმოსო ვეახლოებუთ თის.

8. გენწყით, მუშენ მიმეხვარებნა იესოშ ნაკვალუშ გეჸუნა, „გივორჯგინათ“ ქვეყნიერებას.

⁸ იესოშ ნაკვალუშ გეჸუნა მოხვარნა, თე უბადო ქვეყნიერებაქ ღორონთიშ მსახურებაშე შხვა მუდგარენშა ვეგნმოღალაფუან ყურადღება. დედამიწას ცხოვრებაშ ბოლო სერს იესოს შეულებუდ თქუკო: „მა გივორჯგინ ქვეყნიერებას“ (იოან. 16:33). თინა გულისხმენდჷ, ნამდა ქვეყნიერებას ვემეჩ საშვალება, იმოქმედკო მუშ აზროვნებაშა, მიზნეფშა დო მოქმედებეფშა. თის დღას ვემუჩამ მუშ დუდშა უფლება, გიჭყოლიდუკო დედამიწაშა მოულაშ მიზეზ — განწმინდკო იეჰოვაშ სახელ. მუშ რაგად შილებე ჩქინდე? თე ქვეყნიერებას ბრელ მუდგარენს შეულებ ყურადღება შხვაშა გეგნმოღალაფუან. მარა, იესოცალო, ირო იეჰოვაშ ნებაშ შესრულებაშე ქიფიფქრენთ-და, ჩქი ხოლო „გივორჯგინანთ“ ქვეყნიერებას (1 იოან. 5:5).

9. მუ ოკო ვაკეთათ, ნამდა მარადიულ სიცოცხლეშ შარას ქუდოფსქიდათ?

⁹ იესოშ ნაკვალუშ გეჸუნა მემჸონანა მარადიულ სიცოცხლეშა. მუჟამსით მდიდარ ახალგაზრდაქ იკითხჷ, მუ აკეთკო მარადიულ სიცოცხლეშ მიოღებელო, იესოქ უპასუხ: „ქუმორთ დო ქეკმაჸუნ“ (მათ. 19:16—21). თი ნამთინე იუდეველს, მიდგას ვა ჯერდჷ, ნამდა თინა ქრისტე რდუ, იესოქ უწუ: „ჩქიმ შხურეფ . . . ეკოპჸუნა. მა თინეფს მარადიულ სიცოცხლეს მეფჩანქ“ (იოან. 10:24—29). სინედრიონიშ ართ-ართ წევრის, ნიკოდემეს, ნამდგაქ თიშ გურაფეფით დეინტერეს, იესოქ თინეფიშ გურშენ, „მიდგას თინა წანსჷ“, უწუ, ნამდა შეულებნა მარადიულ სიცოცხლე მიღან (იოან. 3:16). ჩქი იესოშ მიმართ რწმენას გიმიფრჩქინანთ თიშ კეთებათ, მუთ სიტყვათ დო საქმეთ დუმოგურეს. თეს გუვაკეთენთ-და, მარადიულ სიცოცხლეშ შარას ქუდოფსქიდუთ (მათ. 7:14).

10. მუ მიშურს იესოშ უჯგუშო გაჩინებაფაშა? (იოან. 17:3)

¹⁰ პირველ რიგის ოკო გეფჩინებაფუათ იესო, ნამდა შემალებუან ზუსტას გივაჸუნათ თიშ ნაკვალუს (წეკითხით იოანეშ 17:3). იესოშ გაჩინებაფა, დღას ვეთებუნ ფერ, პროცეს რე. ჩქი თის უმოსო დო უმოსო ოკო იფჩინებაფუანდათ — იბგურუანდათ თიშ თვისებეფს, აზროვნებას დო ნორმეფს. ვა უღჷ მნიშვნელობა, მუსხი ხან რე, ჭეშმარიტებას ვორეთ, დღას ოკო ვემვოტუათ იეჰოვა დო თიშ სქუაშ გაჩინებაფა.

11. მუ რე ოთხ სახარებას მოჩამილ?

¹¹ იეჰოვაქ ჸოროფათ ინაჭარ მუშ სიტყვას ოთხ სახარება, ნამდა ქიმმეხვარესკო იესოშ გაჩინებაფას. თე სახარებეფს მოჩამილ რე იესოშ ცხოვრება დო მსახურებას მოხვალამირ ისტორიულ შემთხვევეფ. თინეფ გინოფჩანა იესოშ სიტყვეფს, საქმეეფს დო გრძნობეფს. ბიბლიაშ თე ოთხ წიგნ მოხვარნა, ჯგირო დეფიფქრათ იესოშ მაგალითშე (ებრ. 12:3). თექ მოჩამილ რე, მუ ნაკვალუ  დომტუეს თიქ. თაშ ნამდა, სახარებეფიშ გურაფათ შემალებენა იესოშ უმოსო დო უმოსო გაჩინებაფა დო თიშ ნაკვალუშ ზუსტას გეჸუნა.

12. მუჭო შემლებნა სრულ სარგებელ მიბღათ სახარებეფშე?

¹² სახარებეფქ სრულ სარგებელ ქუმომღანინ, უმოს მეტ რე საჭირო, ვინემ ხვალე კითხირ. ჩქი დრო ოკო გეგმურთათ თინეფიშ გურგედვალირო გურაფას დო უკულ ტომბაშე ფიქრის (ქეშუდარით იესო ნავეს ძეშ 1:8, სქოლიო). მორთ გუვარჩუათ ჟირ რჩევა, ნამუთ მიმეხვარებნა, იფიფქრათ სახარებეფშე დო გეგმიბრინუათ თინა, მუდგას თექ ბკითხულენთ.

13. მუჭო შეილებნა სახარებეფს მოჩამილ შემთხვევეფ თქვანო რეალურო გინაშქვათ?

¹³ პირველ: სახარებეფს მოჩამილ შემთხვევეფ თქვანო რეალურო გინაშქვით. გეგმირინეთ თქვან წარმოსახვაშ უნარ, ნამდა ქოძირათ, ქიგეგონათ დო ქიგინათ თინა, მუდგაშ გურშენ კითხულენთ. თეშ კეთებას მიგეხვარებნა იეჰოვაშ ორგანიზაციაშ გიშაშქუმალირ ოგურაფალ საშვალებეფიშ გიმორკვიება. ყურადღება ქიმიაქცით კონტექსტის — მუ შემთხვევა აწოჸუნს ვარდა ეკოჸუნს თი მონაკვეთის, ნამდგას ასე გურაფლენთ. დოგორით ინფორმაცია თექ მოშინაფილ ხალხიშ დო ადგილიშ გურშენ. ქეშუდარით თე მონაკვეთ იგივე შემთხვევას, ნამუთ შხვა სახარებას რე მოჩამილ. მინშა სახარებაშ ართ მაჭარალ მიშინუანს საინტერესო დეტალეფს, ნამდგას შხვა მაჭარალ გიშეტალენს.

14, 15. მუჭო შემლებნა ცხოვრებას გიმიბრინუათ სახარებეფს მოჩამილ შემთხვევეფ?

¹⁴ მაჟია: გეგმირინეთ სახარებეფს მოჩამილ შემთხვევეფ ცხოვრებას (იოან. 13:17). სახარებეფშე შემთხვევაშ კითხირიშ უკულ ქოკითხით თქვან დუდის: „თიცალ მუთუნს ქობგურაფლენქო თე შემთხვევაშე, მუდგაშ გიმორნაფა ცხოვრებას შემლებ? მუჭო შემლებ თე შემთხვევაშ გიმორნაფა შხვეფიშ საჯგირობუოთ?“. ქეცადით, ქიფიქრათ კონკრეტულ ადამიანშე დო უკულ, შესაფერის დროს ჸოროფათ დო ტაქტიანო გეგნოჩით თინა, მუთ დიგურეთ.

¹⁵ მორთ დეფიფქრათ ართ მაგალითშე დო ქობძირათ, მუჭო შემლებნა გიმიბრინუათ  თე ჟირ რჩევა. გუვარჩიენთ ღარიბ ქომონჯღურელ ოსურკოჩიშ მაგალითის, მით იესოქ ტაძარს ძირჷ.

16. გეჭარით მარკოზიშ 12:41-ის ინოჭარილ სიტუაცია.

¹⁶ რეალურო გინაშქვით თე შემთხვევა თქვანო (წეკითხით მარკოზიშ 12:41). წერმიდგინით თე სიტუაცია: ახ. წ. 33 წანაშ 11 ნისან რე, იესოშ ღურაშა ართ მარაშე ნაკლებ მეძჷ. თინა დიდ დროს უთმენს ტაძარს გურაფას, მარა რელიგიურ ლიდერეფ ოწინააღმდეგნა. თეიშახ თინეფშე ნამთინექ მუშ ძალაუფლებაშ გურშენ კითხჷ იესოს. შხვეფ ოცადდეს თიშ კითხვეფით ინოჭკირუას (მარ. 11:27—33; 12:13—34). ასე იესოქ ტაძარიშ შხვა მხარეშა გეგნორთჷ. თე ადგილს საეგებიოთ ოსურკათაშ ოზეს უძახდეს. თინა გეხე დო იჭყანს ხალხიშ დაკვირებას, მუჭო ინაჸათანა თინეფ შესაწირავს ყუთეფს. იესო ორწყე მდიდარეფს, მით ბრელ ფარას ინარღვანა. შილებე თინა შესაწირავიშ ყუთეფწკუმა თიშნერ ხოლოს ხედას, ნამდა მონეტეფიშ ინოლაფაშ ხონარ ხოლო არჩქილედას.

17. მუ აკეთ მარკოზიშ 12:42-ს მოშინაფილ ღარიბ ქომონჯღურელ ოსურკოჩიქ?

¹⁷ წეკითხით მარკოზიშ 12:42. თეშ უკულ იესოქ ართ პიროვნებას მიაქცუ ყურადღება. თინა რდუ ღარიბ ქომონჯღურელ ოსურკოჩ (ლუკ. 21:2). თიშო ცხოვრება მანგარ ძნელ რდუ დო ალბათ ბრელ აფუდ ოხანდებელ, ნამდა სიცოცხლეშო აუცილებერ მუდგარენეფ ქუღუდკო. თეშ უმკუჯინუო, მეურს შესაწირავიშ ყუთშა დო ტყობაშე ინაჸათანს ჟირ ჭიჭე მონეტას, ალბათ თინეფიშ ინოლაფაშ ხონარ ონდეთ ირჩქილე. იესოს უჩქჷ, თე ოსურკოჩიქ მუ ინაჸათ — ჟირ ლეპტა, თიმ დროს არძაშ უმოს ჭიჭე ღირებულებაშ მონეტა. თე ფარა თიშო ხოლო ვა უბაღუდ, ნამდა თიმ დროს ოჭკუმალო ირინუანდესინ ფერ, არძაშ უმოს ეფიან ჩიტ, ბეღურა, ქიჸიდას.

18. მუჭოთ მარკოზიშ 12:43, 44-ის ჭარჷ, მუ თქუ იესოქ ქომონჯღურელ ოსურკოჩიშ შესაწირავშენ?

¹⁸ წეკითხით მარკოზიშ 12:43, 44. იესოშა მანგარო იმოქმედ თე ქომონჯღურელ ოსურკოჩიშ საქციელქ. ათეშენ თინა უძახ მუშ მოწაფეეფს, ყურადღებას მიოქციებაფუანს თე პიროვნებაშა დო ურაგად: „თე ღარიბ ქომონჯღურელ ოსურკოჩიქ არძაშე უმოს ინაჸათჷ“. უკულ თიქ ენწყჷ: „არძაქ [განსაკუთრებულო მდიდარ ადამიანეფქ] თინა ინაჸათ, მუთ ზედმეტ უღუდ. თე ოსურკოჩ გაჭირებას ცხოვრენს, მარა თიქ ირფელ ქინაჸათჷ, მუთ დუდიშ ეიოჯუმალარო აპალუდ“. მუჟამსით თე ართგურ ქომონჯღურელ ოსურკოჩიქ ბოლო კაპეკეფ ქინაათ, თიქ მუშ ცხოვრება იეჰოვაშ მზრუნველ ხეს გეგნოჩ (ფსალმ. 26:3).

19. მუ მნიშვნელოვან მუდგარენიშ გურაფა შემლებნა იესოშ სიტყვეფშე, ნამუთ ღარიბ ქომონჯღურელ ოსურკოჩიშ გურშენ თქუ?

¹⁹ გეგმირინეთ თე შემთხვევა ცხოვრებას. ქოკითხით თქვან დუდის: „მუშ გურაფა შემლებ იესოშ სიტყვეფშე, ნამუთ ღარიბ ქომონჯღურელ ოსურკოჩიშ გურშენ თქუ?“. დეფიქრით თე პიროვნებაშე. მუშო ოკო რაგად, თის ოკოდკონ იჸიდ, იეჰოვაშა უმოს ქიმუჩამუდკო. მარა თე ოსურკოჩიქ მუთ შეულებუდუნ თინა აკეთ დო იეჰოვას ნამ უღუდუნ, თინა მეჩჷ. იესოს უჩქუდ, ნამდა თიშ შესაწირ ძვირფას რდუ მუშ მუმაშ თოლს. თავრეშე მნიშვნელოვან მუდგარენს ბგურაფლენთ: იეჰოვას ახარენს, მუჟამსით ნამ შემლებნან თის ვორთუთ — მთელ შურდოგურით ვომსახურუთ (მათ. 22:37; კოლ. 3:23). თინა ბედნერ რე, მუჟამსით თაშ იფქციებუთ! თე პრინციპ ოხუ ჩქინ დროშ დო ენერგიაშ ღორონთიშ თაყვანიშცემაშო დათმებას, მუდგაშა მსახურებაშა მონაწილება დო შეხვალამეფშა დასწრება მიშურს.

20. მუჭო შეილებნა თიშ გიმორნაფა, მუთ ქომონჯღურელ ოსურკოჩიშ შემთხვევაშე დიგურეთ? ქიმიჸონით მაგალით.

²⁰ მუჭო შეილებნა თიშ გიმორნაფა, მუთ ქომონჯღურელ ოსურკოჩიშ შემთხვევაშე  დიგურეთ? ქეცადით, ქიფიქრათ კონკრეტულ პიროვნებეფშე, მიდგას შილებე ოსაჭირდან თიშა დარწმუნება, ნამდა იეჰოვას ახარენს თინეფიშ ხანდა. მაგალთო, ხომ ვეჩინენთ თიცალ ხანშამიშულირ დას, მიდგას დუდ დამნაშავეთ ვარდა ურგებელო მიორჩქ თიშენ, ნამდა ჯამრთელობა ვარდა ენერგია ხეს ვა უნწყუნს, თიზმა გაკეთას იეჰოვაშ მსახურებას, მუზმას თეიშახ ორთუდ? ვარდა შეილებნანო დეფიქრათ ჯიმაშე, ნამდგას ქრონიკულ ლახალაშ გურშენ მანგარ ჭუეფ უღჷ დო გურგოტახილ რე თიშენ, ნამდა ირ შეხვალამაშ დროს დარბაზშა ვეგლართე? ქიმეხვარით თინეფს თიცალ სიტყვეფით, ნამუთ გამანგარენს (ეფეს. 4:29). ქეჩით თი გურიშემაკინალ აზრეფ, მუთ ღარიბ ქომონჯღურელ ოსურკოჩიშ შემთხვევაშე დიგურეთ. თქვან თეცალ სიტყვეფს შეულებ დარწმუნას თინეფ, ნამდა იეჰოვას ოხიოლ, ნამ შემლებნან თის ვორთუთინ (იგავ. 15:23; 1 თეს. 5:11). მუჟამსით ოცქვანთ შხვეფს თიშ გურშენ, ნამდა იეჰოვაშო ნამ შეულებნან თის ორთნა, ვა უღჷ მნიშვნელობა მუზმათ ჭიჭეთ იძირე თე საქმე, თქვა ზუსტას გეჸუნთ იესოშ ნაკვალუს.

21. მუშ კეთება გაფნა გინოჭყვიდილ?

²¹ მანგარ მარდულეფ ვორეთ თიშენ, ნამდა სახარებეფს მოჩამილ შემთხვევეფშე იესოშ ცხოვრებაშ ბრელ დეტალ იძირე! თენა მოხვარნა მივაჸუნათ იესოშ მაგალითის თიშ ნაკვალუშ ზუსტაშე გეჸუნათ. ჯგირ იჸუაფ პირად გურაფაშ ვარდა ოჯახურ თაყვანიშცემაშ დროს სახარებეფს ყურადღებას ქიმვაქციენთ-და. ფშუდან, ნამდა გურაფაშე სრულ სარგებელიშ მიოღებელო, საჭირო რე, უმოს რეალურო გინვოშქვათ შემთხვევა დო გეგმიბრინუათ თინა ცხოვრებას. თეს გეძინელ, იესოშ მაგალითის ქიმვაჸუნათინ, საჭირო რე, ქუმურჩქილუათ თიშ ნარაგადის. ანწიან სტატიას გუვარჩიენთ, მუშ გურაფა შემლებნა ღურაშ წოხოლე იესოშ ნარაგად სიტყვეფშე.