1-2. Ligongo chichi yili yakomboleka kukuya sajo sya Yesu? Apeleche chisyasyo.

TUWANICHISYE kuti wawojo ni achimjawo akupita mungalango jakogoya. Mungalangomu mwana mchenga wejinji soni wenyoŵe. Mundu jwasoŵelele kwenda mungalangomu ni jwakwalongolela. Pakuŵa mungalangomo mwana mchenga wenyoŵe, jwalakwe pakwenda sajo syakwe sikuwoneka mwakupondamo. Kaneko yikusimanikwa kuti jwakwalongolela jula ngakumwonasoni. Nambo mmalo mwakudandawula, jemanja agamba kukuya mwakusamala sajo sya mundu jwakwalongolelajo, ligongo mwapondileje mukuwoneka.

² Chilambo chakusakalachi chili mpela ngalango jakogoya jila. Soni Aklistu ŵasyesyene m’we tukulandana ni ŵandu ŵakwenda mungalangoji. Mwaupile Yehofa atupele jwakutulongolela jwambone mnope jwali Yesu Klistu, jwele tukusosekwa kukuya sajo syakwe mwakusamala. (1 Pet. 2:21) Mwakamulana ni yajasasile Baibulo jine, Petulo ŵam’wanichisye Yesu mpela jwakutulongolela. Mpela jwakwalongolela ŵandu jwele sajo syakwe sikuwoneka, nombenajo Yesu mwaŵapondile mukusawoneka soni mpaka tumkuyeje mwangasawusya. Sambano kwende tukambilane yiwusyo yitatu yakwamba kukuya sajo sya Yesu. Yiwusyo yakwe yili yakuti, Ana kukuya sajo sya Yesu kukusagopolela chichi? Ligongo chichi tukusosekwa kukuya sajo sya Yesu? Soni Ana mpaka tukuye chamtuli sajo sya Yesu mwakusamala?

3. Ana kukuya sajo sya mundu jwine kukusagopolela chichi?

³ Ana kukuya sajo sya mundu jwine jwakwe kukusagopolela chichi? M’Baibulo maloŵe gakuti “kwenda” soni “sajo” gakusajimila yakusatendaga mundu paumi wakwe. (Gen. 6:9; Mis. 4:26) Mwakusatendelaga  yindu mundu paumi wakwe, mpaka tuyilandanye ni mwasipondile sajo pakwenda. Myoyo kukuya sajo sya mundu jwine kukusagopolela kusyasya yakusatendaga jwalakwejo.

4. Ana kukuya sajo sya Yesu kukusagopolela chichi?

⁴ Sambano kwende tukambilane yayikusagopolela kukuya sajo sya Yesu. Mwakata mpaka tugambe kuti kuli kusyasya muŵatendelaga yindu jwalakwe. Mu lilemba lyalikulongolela nganiji, Petulo kusyesyene jwasalaga ya chisyasyo chambone chiŵalosisye Yesu. Pajatu jwalakwe jwapilile pandaŵi jiŵalagasidwaga. (1 Pet. 2:18-25) Kusala yisyene, yindu yosope yiŵaŵechete Yesu soni yaŵatesile paumi wakwe chili chisyasyo chambone champaka tuchikuyeje.

5. Alondesye naga mundu jwangali umlama mpaka akombole kukuya sajo sya Yesu.

⁵ Pakuŵapo tuli ŵangali umlama, ana mpaka tukumbole kukuya chisyasyo cha Yesu? Elo yili yakomboleka. Tukaliŵalila kuti Petulo ŵatulimbikasisye kuti ‘tukuyeje sajo [sya Yesu]’ mwakusamala, nambo ngaŵa mwangalemwesya. Naga m’weji tukukuya sajo sya Yesu mwakusamala, kwakuli kutenda yiliyose yampaka tukombole atamose kuti tuli ŵangali umlama, nikuti tuchipikanila maloŵe gaŵasasile Yohane gakuti, ‘Yitendo yenu yilandaneje ni yaŵatendaga Yesu.’—1 Yoh. 2:6.

6-7. Ligongo chichi kukuya sajo sya Yesu kukusatukamuchisya kumŵandichila mnope Yehofa?

⁶ Kukuya sajo sya Yesu mpaka kutukamuchisye kuti tumŵandichile Yehofa. Ligongo chichi tukuŵecheta myoyo? Chandanda, yindu yaŵatesile Yesu yikusatukamuchisya kumanyilila yampaka tutende kuti tumsangalasyeje Mlungu. (Yoh. 8:29) Myoyo kumsyasya Yesu mpaka kututendekasye kuti tumsangalasyeje Yehofa. Mpaka tuŵesoni ŵakusimichisya kuti Atati ŵetu ŵakwinani akusaŵa paunasi wambone ni ŵandu ŵakulingalinga kuti aŵe najo pa ujakwe.—Yak. 4:8.

⁷ Yesu ŵasyasyaga Atati ŵakwe mwangalemwesya chilichose. Ni ligongo lyakwe ŵasasile kuti,  “Mundu jwambweni une, ŵawenisoni Atati.” (Yoh. 14:9) Patukusyasya ndamo sya Yesu soni mwaŵatendelaga yindu ni ŵane, yikusaŵasoni kuti tukumsyasya Yehofa. Mwachisyasyo, ŵamtendele chanasa jwamatana, jwamkongwe jwaŵalwalaga ulwele wekulungwa soni ŵatendele chanasa ŵandu ŵaŵawililwe. (Maliko 1:40, 41; 5:25-34; Yoh. 11:33-35) Myoyo, patukutenda yindu mpela mwakusatendela Yehofa, ni patukusamŵandichila mnope.

8. Ligongo chichi kukuya sajo sya Yesu mpaka kutukamuchisye kuti ‘tuchipunde chilambo chapasi’?

⁸ Kukuya sajo sya Yesu kuchitukamuchisya kuti tukasokonechela ni yiliyose yayili m’chilambo chakusakalachi. Chilo chakumalisya cha umi wakwe wa pachilambo chapasi, Yesu jwaŵechete kuti, “Nachipundile chilambo chapasi.” (Yoh. 16:33) Jwalakwe jwagopolelaga kuti nganakunda yakutendekwa yiliyose ya m’chilambochi kumsokonasya. Ndaŵi syosope Yesu jwakumbuchilaga kuti ŵayiche pachilambo chapasi kukuswejesya lina lya Yehofa. Nambi uli m’weji? M’chilambochi mwana yindu yejinji yampaka yitusokonasye. Nambo tukusosekwa kuganichisyaga mnope yakutenda yindu yakusasaka Yehofa, mpela muŵatendele Yesu. Mwamti nombe m’we mpaka ‘tuchipunde’ chilambo.—1 Yoh. 5:5.

9. Ana tukusosekwa kutenda chichi kuti tupitilisye kwenda pa litala lya ku umi wangamala?

⁹ Kukuya sajo sya Yesu mpaka kutukamuchisye kuti tukapate umi wangamala. Mundu jwine ali awusisye yakusosekwa kutenda kuti akapate umi wangamala, Yesu jwajanjile kuti, “Myiche munguyeje.” (Mat. 19:16-21) Kwa Ayuda ŵanganakulupilaga yakuti Yesu ali Klistu, ŵasalile kuti, ‘Ngondolo syangu . . . sikusanguyaga. Une ngusasipa umi wangamala.’ (Yoh. 10:24-29) Yesu ŵamsalilesoni Nikodemo juŵaliji membala jwa mu luŵala lwekulungwa lwamagambo lwa Ayuda, soni juŵasangalalaga ni yiŵajiganyaga jwalakwejo kuti “jwalijose jwakukulupilila mwa [une]” chachipata “umi wangamala.” (Yoh. 3:16) Tukusalosya kumkulupilila Yesu, mwakutenda yaŵajiganyaga jwalakwe soni kusyasya mwaŵatendelaga yindu. Kutenda yeleyi mpaka kutukamuchisye kuti tupitilisyepe kwenda pa litala lya ku umi wangamala.—Mat. 7:14.

10. Ana tukusosekwa kutenda chichi kuti tummanyilile Yesu? (Yohane 17:3)

¹⁰ Mkanitutande kukuya sajo sya Yesu mwakusamala, tukusosekwa kummanyilila kaje Yesujo. (Aŵalanje Yohane 17:3.) ‘Kummanyilila’ Yesu kwangamalaga, mwamti kukusagamba kupitilisyape mpaka kalakala. Kuti tummanyilile jwalakwe, tukusosekwa kulijiganya ndamo syakwe, kaganisye kakwe soni malamusi gakwe. Chinga tutemi ndaŵi jelewu chamtuli mu usyesyene, tukusosekwa kupitilisya ‘kummanyilila’ chenene Yehofa soni Mwanache jwakwe.

11. Ana mabuku mcheche ga Ngani Syambone gakusasala ya chichi?

¹¹ Pakusaka kutukamuchisya kuti tummanyilile Mwanache jwakwe, Yehofa ŵakundile kuti m’Baibulo apwatichemo mabuku ga Ngani Syambone.  Mabukuga gakusalondesya ya umi wa Yesu soni masengo gaŵakamwile pa utumiki wakwe. Gakusasalasoni yaŵaŵechete jwalakwe soni mwaŵapikanilaga mumtima. Mabukuga gakusatukamuchisya ‘kuganichisya’ mwaŵatendelaga yindu Yesu. (Aheb. 12:3) Mpaka tujilesoni kuti mabukuga gakusalosya mwaŵapondaga Yesu ni sajo syakwe. Myoyo, kulijiganya mabuku gelega mpaka kutukamuchisye kuti tummanyilileje chenene Yesu soni kuti tukuyeje sajo syakwe mwakusamala.

12. Ana mpaka tutende chichi kuti tupinduleje mnope patukulijiganya mabuku ga Ngani Syambone?

¹² Kuti tupinduleje ni mabuku ga Ngani Syambonega tukusosekwa kutenda yejinji mmalo mwakwambaga kuŵalanga. Tupateje ndaŵi jwakulijiganya yayili m’mabukuga soni kuyiganichisyaga mwakusokoka. (Alole Yoswa 1:8.) Kwende tukambilane matala gaŵili gampaka gatukamuchisye kuti tuganichisyeje soni kukamulichisya masengo yatuŵalasile m’mabuku gelega.

13. Ana mpaka atende chichi kuti ajiwoneje ngani jakuŵalanga mpela kuti jikutendekwa kwene?

¹³ Chandanda, asiwoneje ngani syakuŵalanga m’mabuku ga Ngani Syambone mpela kuti sikutendekwa kwene. Aliwanichisyeje mpela kuti akuyiwona soni kupikana yayikutendekwayo. Kuti akombole kutenda yeleyi, awungunyeje m’mabuku gajakopwesye Gulu ja Yehofa. Aloleje ngani josope, yayikupwatikapo yayatendekwe mkanijiŵe kutendekwa ngani jakuŵalangajo kapena yayatendekwe pasogolo pakwe. Awungunyeje yindu yine yakwamba malo kapena ya ŵandu ŵane ŵakwakolanga munganijo. Mpaka alolesoni m’buku jine ja Ngani Syambone, yajatite pakulondesya nganijo. Ligongo ndaŵi sine mpaka yisimanikwe kuti jwakulemba Ngani Syambone jwine, jwalondesisye chenene nganijo mwakulengana ni muŵalondechesye mjakwe.

14-15. Ana mpaka tutende chichi kuti tukamulichisyeje masengo yindu yatulijiganyisye m’mabuku ga Ngani Syambone?

¹⁴ Chaŵili, akamulichisyeje masengo yindu yalijiganyisye m’mabuku ga Ngani Syambone. (Yoh. 13:17) Panyuma pakulijiganya ngani jinejakwe m’mabuku ga Ngani Syambone, aliwusyeje kuti, ‘Ana pana yiliyose yangulijiganya yele ngusosekwa kuyikamulichisya masengo paumi wangu? Ana mpaka nakamuchisye ŵane chamtuli  ni yanalijiganyisyeyi?’ Akusosekwa kuganichisya ya mundu jwine jwakwe jwampaka apindule ni yalijiganyisyeyo, kaneko nikumsalila mundujo pandaŵi jakuŵajilwa soni mwachinonyelo.

¹⁵ Kwende tulole yampaka tutende pakamulichisya masengo matala gaŵili gatukambilene mundime syelesi. Chitutende yeleyi, mwakulola ngani ja jwamkongwe jwine jwamasije, juŵam’weni Yesu m’nyumba jakulambilila.

16. Ana pa Maliko 12:41 pana ngani jamtuli?

¹⁶ Kujiwona ngani mpela jikutendekwa kwene. (Aŵalanje Maliko 12:41.) Agambe kulinga kuyiwona yindu mwayaŵelele pandaŵijo. Paliji pa Nisani 11, mu 33 C.E., kuli kusigele wiki jimo kuti Yesu awulajidwe. Pa lisikuli Yesu jwamalile ndaŵi jakwe jejinji ali mkwiganya mu nyumba jakulambilila. Nambo pandaŵiji, achimlongola ŵadini ŵaliji mkumsisya jwalakwe. Nambosoni ŵandu ŵane ŵasakaga kumanyilila jwaŵampele Yesu machili gakutendela masengo gaŵakamulaga. Ŵanesoni ŵamwusyaga yiwusyo pakusaka kumpala pakamwa. (Maliko 11:27-33; 12:13-34) Kaneko Yesu ŵapite kumbali jine ja m’nyumba jakulambilila jila. Ali ayiche kumalo gane gaŵagakolangaga kuti Luŵala lwa Achakongwe, ŵagaweni mabokosi gaŵaponyaga ŵandu mbiya. Jwalakwe ŵatemi pasi ni kwawonaga ŵandu ali mkujakuponya mbiya m’mabokosimo. Jwaweni ŵandu ŵakusichila ali mkuponya mbiya syawo. Komboleka kuti jwalakwe ŵatemi mwakuŵandikana ni malogo mwamti jwapikanaga masegwe ga mbiyasyo pasyagwilaga m’mabokosimo.

17. Ana jwamkongwe jwamasije jwakusamkolanga pa Maliko 12:42, ŵatesile chichi?

¹⁷ Aŵalanje Maliko 12:42. Kaneko Yesu ŵam’weni jwamkongwe jwine ali mkwika. Jwamkongweju ŵaliji “jwamasije.” (Luk. 21:2) Jwalakwe jwaliji jwakulaga mnope mwamti jwalepelaga kupata mbiya syakusumila yakusosechela ya paumi. Nambope jwapite pagali mabokosi gakupelechela mbiya ni kuponya tumbiya tuŵili twanganitupikanika masegwe paŵaponyaga. Papopo Yesu jwamanyilile kuti jwamkongwejo waponyisye tumbiya tuŵili twaŵatukolangaga kuti leputoni, twele twaliji twangali machili pandaŵijo. Tumbiyatu twaliji twangakwanila kusumila atamose chijuni chimo chatimba chakuti akalye, chachaliji chakuchipa mnope pandaŵijo.

18. Ana Yesu jwaŵechete yamtuli pa Maliko 12:43, 44, pakwamba ya mbiya siŵapeleche jwamkongwe jwamasije?

¹⁸ Aŵalanje Maliko 12:43, 44. Yesu jwatesile chidwi mnope ni yiŵatesile jwamkongwe jwamasijeju. Myoyo ŵaŵilasile ŵakulijiganya ŵakwe, nikwalanjila kwali jwamkongwe jwamasije jula, soni kwasalila kuti, “ Jwamkongwe jwamasije jwakulagaju aponyisye kwapunda ŵandu ŵane wosopeŵa. Ŵane wosopeŵa [kwambaga ŵakusichila ŵala] agambile kuponya syasapwile pewunjili lyakwete. Nambo jwamkongweju ni kulaga kwakwe aponyisye syosope siŵakwete, atamose syakasumile yakulya.” Jwamkongweju paŵagambile kuponya tumbiyatu palisikuli, jwakulupililaga kuti Yehofa chamsamalileje.—Sal. 26:3.

19. Ana mpaka tulijiganye chindu chakusosekwa mnope chapi pa maloŵe gaŵaŵechete Yesu gakwamba ya jwamkongwe jwamasije?

¹⁹ Kukamulichisya masengo yalijiganyisye. Mpaka aliwusye kuti, ‘Ana ngulijiganya chichi pa maloŵe gaŵaŵechete Yesu gakwamba ya jwamkongwe jwamasije?’ Aganichisye mwayaŵelele yindu paumi wa jwamkongwe jwamasije jula. Yili yangakayikasya kuti jwaliji jwakusachilila kumpa Yehofa yindu yejinji. Nambo jwagambile kupeleka yakakombwele, yayikulosya kuti jwapeleche ya jwakwete. Yesu jwamanyililaga kuti tumbiyatu, twaliji twakusosekwa mnope kwa Yehofa. Apatu pana chindu chakusosekwa mnope champaka tulijiganye. Yehofa akusaŵa jwakusangalala patukumtumichila ni mtima wetu wosope soni umi wetu wosope. (Mat. 22:37; Akolo. 3:23) Jwalakwe akusasangalala pakutuwona tuli mkutenda yiliyose yampaka tukombole. Yeleyi yikupwatikapo  machili soni ndaŵi jatukusamalila pakutenda yindu yakwayana ni kulambila, mpela kulalichila soni kusimanikwa pamisongano.

20. Ana mpaka akamulichisye masengo chamtuli yakulijiganya mungani ja jwamkongwe jwamasije? Apeleche chisyasyo.

²⁰ Ana mpaka tukamulichisye masengo chamtuli yatukulijiganya mungani ja jwamkongwe jwamasije? Aganichisye ya ŵandu ŵele mpaka yalimbikasye ali ŵasalile kuti Yehofa akusasangalala ni yiliyose yakusakombola kutenda pakumtumichila. Mwachisyasyo, ana akumanyilila ya mlongo julijose jwachikulile jwakusalipikana kuti ali jwangali mate ligongo lyakuti akusalwalalwala kapena jwangali machili, yayikumtendekasya kuti akatenda yejinji mu utumiki? Kapena ana pana m’bale jwine jwakulaga ni ulwele kwandaŵi jelewu, soni akusalepela kusimanikwa ku Nyumba ja Uchimwene kaŵilikaŵili? Akusosekwa kwakamuchisya jemanjaji mwakuŵecheta maloŵe gagali gambone soni “gakulimbikasya mitima.” (Aef. 4:29) Mpaka ŵasalile jemanjaji yindu yambone yalijiganyisye mungani ja jwamkongwe jwamasije. Maloŵe gampaka aŵechetega mpaka gasimichisye jemanjaji kuti Yehofa akusasangalala ni yindu yakukombola kutenda. (Mis. 15:23; 1 Ates. 5:11) Pakwayamichila ŵane ligongo lya kumpa Yehofa yindu yampaka akombole atamose yinandipe chamtuli, mpaka yilosye kuti akukuya sajo sya Yesu mwakusamala.

21. Ana wawojo ali ŵakusachilila kutenda chichi?

²¹ Tukusayamichila mnope Ngani Syambone syakusala ya umi wa Yesu ligongo sikusatukamuchisya kuti tumsyasyeje jwalakwe, kwakuli mpela kukuya sajo syakwe mwakusamala. Naga yakomboleka mpaka atende yakuti alijiganye mabuku ga Ngani Syambone, pakulambila kwa peŵasa kapena kulijiganya pajika. Tukaliŵalila kuti chindu champaka chitukamuchisye kuti tupindule patukulijiganya mabuku gelega chili kujiwona ngani jatukuŵalanga mpela jikutendekwa kwene soni kukamulichisya masengo yatulijiganyisye. Konjechesya pakusyasya yiŵatesile Yesu, tukusosekwa tupikanileje yiŵaŵechete jwalakwe. Mungani jakuyichisya, tuchilola yampaka tulijiganye pamaloŵe gakumalisya gaŵaŵechete Yesu ali asigele panandi kuwa.