1-2. Gini kpiapai naundo rani ani rugutirani na agu afugo du rogo 1 Petero 2:21?

MO MAKIANGA patiro nga oni nandu na gu kura badona nga ga aboro rogo kere ngbakungba nga gu du na ngume rogoho. Gu boro naima ino gu rago re wenengai ngbembatayo furoni. Wa ni andu, fuo nduni nanye sayo rogo gu ngume re. Mo ima rengba kaa zanga bi ni ti kura aregbo! Ono tie, mo agundenga te. Kuba gure, mo na agu aboro mo andu na yo napekafuo gu boro nangbembatayo furoni re wa rengbe omeroni na ni!

² Gi gbegberẽ zegino ani araka rogoho areme re wakina kere ngbakungba, na ndikidi aKristano wakina gu badona aboro nandu rogoho re. Ani na tambuahe nga Yekova afu bawene bangbembatayo furani, nga Wiriko, du nga Yesu Kristo, nga guko ani narengbe ka pekafuoko. (1 Pet. 2:21) Ringbisihe kuti kura buku sa du mburuhe rii Ziazia Kekeapai, Petero aaringbisa Yesu ane kuti bangbembatayo. Wakina gu bangbembatayo nambu fuoni sayo, Yesu ambu fuo nduko watadu fuoko, nga gu rengbe ani ka pekafuoho. Ani sakingo pai tipa asanahe biata nibipa pekafuo Yesu: Rogo gupai yo nga ka pekafuo Yesu nga gine? Tipagine si aida ani mangi gupai re ti ni? Wai du rengbe ani ka manga gupai re?

3. Rogo gupai yo nga ka pekafuo boro nga gine?

³ Rogo gupai yo nga ka pekafuo boro nga gine? Rogo Ziazia Kekeapai yo, agu afugo nga ‘ta’ gbiati ‘ndue,’ i namangasunge na ni ti kura aregbo tipa ka yugopa ga boro gene raka. (Bam. P. 6:9; Snz. 4:26) I ima rengba ka ringbisa gu gene boro araka ngbaha kuti gu fuo boro ni ambuhe sayo ho ni andu ni. Sidu, ka pekafuo boro nga ka pekafuo gani kpiapai, tipa ka wirika ni.

4. Rogo gupai yo nga ka pekafuo Yesu nga gine?

⁴ Rogo gupai yo tie nga ka pekafuo Yesu nga gine? Ka pe pai ngba taata gene, rogoyo nga ka wirika gako kpiapai. Rogo gu veresi yo i nadi gaani riipai rogoho, gu mokedi nangia Petero afura tipa gu wene kpiapai Yesu amoihe nga ga hi arungosiro; ono tie, gu kura dungu agene kinaho rengbe ani ka wirika Yesu ngbaha. (1 Pet. 2:18-25) Nirengo, ga Yesu raka naabaha—agu apai dunduko  ko agumbaha na ki mangihe—si nga gu kpiapai du furani tipa ani pekefuoho.

5. Ya mo kpakpa aboro rengbe nzunzu ka pekafuo ga Yesu rengberengbe kpiapai? Oni sakingo rogoyo.

⁵ Sidu, wa du ani ni kpakpa aboro, ya mo ani rengbe nzunzu ka pekafuo ga Yesu kpiapai? Ii, ani ima rengba ka pekafuoho. Anga gupai Petero aapehe nga ani pekefuo Yesu teketeke ngba rengberengbe gene te. Kuba gure, ko angarasi rani nga ani ‘pekefuo Yesu.’ Sidu, ka ani pekefuoko sirisiri wenengai wa rengbe omerani na ni wangia ani kpakpa aboro, ani nika mangapai kuti ga gu mokedi nangia Yoane afugo nga gu naya: ‘Oni naata a wa Yesu anaata tigako.’—1 Yo. 2:6.

6-7. Tipagine rengbe ani ka pe gupai ti ni nga pekafuo Yesu nika mbedisa rani gbe na Yekova?

⁶ Pekafuo Yesu nika mbedisa rani gbe na Yekova. Tipagine rengbe ani ka pehe ti ni wo? Bambatapai nga, Yesu amoi bawene kpiapai nga ga wai ka raka ngba gu gene nafu ngbarago fu Mbori. (Yo. 8:29) Sidu, ni peka ani fuo Yesu, ani nika fu ngbarago fu Yekova. Na ani rengbe kadu na gu kido nga, gu Barani du ngbangbaturũ yo nika mbeda na agu aboro namanga ome nyanyaki kadu ni abakureako.—Yak. 4:8.

⁷ Uepai nga, Yesu awiriki Bako ngba rengberengbe gene. Si du nga ndu gupai Yesu arengbe ka ya ti ni wẽ: “Gu ni bi re ni bi Buba.” (Yo. 14:9) Ani ima rengba ka wirika ga Yesu asino gbiati gu gene ko amangipai na kura aboro ngbaha. Ni kpiapai, ko ayugu nunga fu boro ngbataka, ko ayugu nunga fu gu dee naadu na kere kaza tiri, na ko ayugu nunga fu agu aboro naazanga gayo aboro rogo kpio yo. Ho ani awirika Yesu ni, gure nga ani nawirika Yekova a. (Mk. 1:40, 41; 5:25-34; Yo. 11:33-35) Kina wai ani nikaa wirika asino Yekova ni bakerehe, kinawo a gaani pabakure na ko nikaa nyaka.

8. Oni sakingo pai tipa ndu gupai pekafuo Yesu nika undo rani ti ni ani ‘dibe’ zegino.

⁸ Ka ani apekafuo Yesu, ani ambunga gi gbegberẽ zegino re si sa rani ani mbu maaberã rani kuti gaani sunge fu Yekova te. Rogo gu yangara yuru Yesu adu ni ungako auru kpotosende, ko  adu na rengba ka pe gupai nga: “Mi di be zegino.” (Yo. 16:33) Gupai ko aaida ka pehe nga, ko aambunga gu berãpai, agu asasa, gbiati gu mangaapai nga ga agu aboro du rogo zegino si du na maapai kurii ko te. Bangiri Yesu aagonga ti gu ndupai i akedi ko ti ni ku auru kpotosende te—gu ndupai re angia ka ziasi rimo Yekova. Na ani tigaani? Rogo gi zegino re, badungu apai kinaho rengbe ka sarani ani mbu maaberã rani kuti gaani sunge fu Yekova. Ono wakina Yesu, ka ani amaaberã rani kuti manga gupai Yekova akpinyemuhe, ani nika ‘dia’ be zegino a.—1 Yo. 5:5.

9. Ginipai si aida ani mangihe tipa ka nye ngba gu gene nandu koyo du nyenye unga ni?

⁹ Pekafuo Yesu nandu sa nyenye unga. Ho kumukokumuko paranga asanahe ni tipa gupai si aida ko mangihe tipa ka gbia nyenye unga, Yesu akaragapai ki ya: ‘Mo ye kaa peka re.’ (Mt. 19:16-21) Yesu ape gupai fu gu kura aYudo naaidanga kuti gupai nga ko angia Kristo ya nga: ‘Gimi akandoro napeka re. Mi nafu nyenye unga fu ra.’ (Yo. 10:24-29) Nikodemo nangia boro sa dagba ga aYudo aboro rondo yo aaida ka ino badungu apai tipa ga Yesu ayugopai, Yesu ape gupai fuko nga, agu aboro “ka idi pa ko, . . . nyenye unga du adu” beyo. (Yo. 3:16) Ani nayugo gupai nga ani ima ida kuti Yesu ni manga ani pai kuti agu apai ko ayuguhe na ni wirika ani gako kpiapai. Ka ani mangihe wo, ani nika nye ngba gu gene nandu koyo du nyenye unga ni.—Mt. 7:14.

10. Ginipai si aida ani mangihe tipa ka ‘ino’ Yesu wenengai gbe? (Yoane 17:3)

¹⁰ Mbata fu ani pekefuo Yesu, si naida ani iniko. (Oni gedi Yoane 17:3.) ‘Ino’ Yesu nga gupai si aida si naamanga amanga kindi. Si naida ani naawirika badungu apai kindi tipa Yesu, naida ka ya, ka wirikapai tipa gako asino, gako aberãpai, gbiati gako arugute. Ka si vura du nga ani ima dia gbanga regbo ku rogo rengo, ani du wa ka ani andu kindi kumbatayo kaa ‘ino’ aYekova na Wiriko.

11. Ginipai du rogo agu Akitabu Wene Pangbanga du biama?

¹¹ Yekova amoi Akitabu Wene Pangbanga biama ku rogo Fugoko yo tipa ka undo rani ani ini Wiriko. Agu Akitabu Wene Pangbanga re na apangbanga rogoho nga ga ga Yesu raka gbiati gako sunge tungusapai. Agi akitabu re napepa agu apai furani Yesu agumbaha na ki mangihe, gbiati agu abipai ko adu na ni. Agi akitabu du biama re naundo rani ani ‘mákiapa’ ga Yesu kpiapai wenengai. (Eb. 12:3) Gure wa ka i ya, si na gu fuo Yesu rogoho ko ambuhe sayo. Sidu, ni wisigo ani agu Akitabu Wene Pangbanga re, ani rengbe ka ino Yesu wenengai gbe. Ni sangbana gipai re, ani rengbe ka pekafuo Yesu wenengai gbe.

12. Waigu rengbe ani ka gbia undo bakere gbe ti Akitabu Wene Pangbanga?

¹² Tipa ka gbia undo ni bakerehe gbe ti Akitabu Wene Pangbanga, si naida ani mangi kurapai amanga kisusi gu gbua nga ka gedaha. Si naida ani di regbo ka wisigoho wenengai na kini berẽ dudunguro kuriihe. (Oni ringbisihe na Yosua  1:8) Ani sakingo pai tipa aberãpai ue nga gu rengbe ka undo rani ani berẽkurii Akitabu Wene Pangbanga na ki mangi gupai ani agedaha rogoho.

13. Waigu rengbe mo ka sa agu apangbanga du rogo Akitabu Wene Pangbanga yo si du berãro yo wa gupai mo abihe abi si nimangi?

¹³ Bambatapai nga, mo sa agu apangbanga du rogo Akitabu Wene Pangbanga yo wa agu apai mo abihe abi si nimangi. Mo mangisunge na berãro tipa ka bi, ka gia, watadu ka berãpa gupai naamanga. Tipa ka undo ro mo mangi gupai re, mo mangi wetekapai rogo agu awaraga ga Yekova riigbu akusaha. Mo wisigipai tipa agu apai namangi mbata fu gupai mo awisigopai tipaha, watadu agu naamangi tingbafuoho. Mo ngere tipa kura dungu apai nibipa agu aboro i nafura tipa yo rogo gu pangbanga re, gbiati agu aba i nafura tipaha. Mo ringbisi gu pangbanga mo awisigopai tipaha re na gu pangbanga nafura tipa kina gu bangisapai re rogo kura Kitabu Wene Pangbanga. Ti kura aregbo, Kitabu Wene Pangbanga sa ima rengba ka koda kura futufutuapai nga gu gu kura gu afuranga tipaha ya.

14-15. Ginipai si aida ani mangihe tipa ka mangapai kuti agu apai ani awirikaha ti agu apangbanga du tipa Yesu?

¹⁴ Uepai nga, mo mangipai kuti agu apai du rogo agu apangbanga yo nga ga Akitabu Wene Pangbanga rogo gamo raka yo. (Yo. 13:17) Fuo mo wisigipai sirisiri tipa pangbanga rogo Kitabu Wene Pangbanga yo, mo sananga tiro nga: ‘Ya mo pai ho rogo gi pangbanga re rengbe mi ka mangapai kutini rogo gimi raka yo? Waigu rengbe mi ka mangasunge na gi pangbanga re tipa ka undo kura boro?’ Mo asadi ka berãpa gu boro mo aida ka undo ni, na fuo gure ti gu regbo rẽarẽ, mo ki peke agu apai funi mo nawirikihe, ono rogo nyemuse yo na ni tatamana.

¹⁵ Ani sakingo pai tipa kpiapai nga ga wai rengbe ani ka mangapai kuti agi aberãpai ue re. Ani nika sakapai tipa gu pangbanga du tipa gu rungorungo dekurugbo Yesu abiri yekaru yo.

16. Oni sakingo pai tipa gupai du ni kekehe rogo Marako 12:41.

¹⁶ Mo sa gu pangbanga re wa gupai mo abihe abi si nimangi. (Oni gedi Marako 12:41.) Mo makianga pa gupai naamangi. Si angia  Nisana 11, rogo gu garã nangia 33 Fuo Batikayo Kristo. Yesu aandu ka kpi tingbafuo bete arame. Yesu aima dia bakere regbo rogo gu uru re kaa yugopai fu aboro yekaru yo. Ono abarumbatayo rogo pambori aasoga ko asoga. Mbata kusayo, agu akurayo aima sana ko nga gini tandu ko amanga gako sunge na ni. Agu akurayo aˈasadi ka sanako na agu asanahe i aberẽ gupai nga ka ko karaganga pai kutini te. (Mk. 11:27-33; 12:13-34) Sidu, Yesu aguari ki ndu kurogo gu kura papara yekaru. Ho ko adu ni yo, ko aabi gu ba abi i anaatumo ni amarã ku rogoho, sidu, si nawira gupai nga ko adu rogo gu ba i anaayambaha nga gu Ba Ngbanga Nga ga Adee. Ko asungu kini bi aboro wa i aaye kaa ba gayo agamahe ku rogo ba gamahe. Ko abi badungu kumukokumuko aboro i niba dungu amarã. Isoke, ko aima du mbembedi na ba ba marã, na ko kini gi woro amarã agia aboro niba ra.

17. Ginipai gu rungorungo dekurugbo i napepa ri rogo Marako 12:42 amangihe?

¹⁷ Oni gedi Marako 12:42. Fuo bete regbo, Yesu abi dee nga guri ko agbeberã ko kuti ri. Ri angia “rungorungo dekurugbo.” (Rk. 21:2) Raka aima du ni kpakarakpakaraha furi; na si nawira gupai nga marã aadunga beri rengbe arengba tipa ka ngbe agu ahe na ni ri aaidaha tipa raka te. Ono tie, ri andu ku rogo kura ba ba marã sa ki ba rukutu marã sirigi ue koyo, nga agura si awira gupai nga woro ra aapaanga ho ri abara ni te. Yesu aima ino pa gu marã ri aba ru, ri aba rukutu marã sirigi ue, nga gu yangara rukutu marã sirigi i anaamanga sunge na ni ti gu regbo re. Abavurukporo adu dagba agu aziree yo i anaabaga ra geno ra aima umba gbe kisusi, sidu, gu marã ri afu ru re aarengbanga ka ngbe kandara bavurukporo sa te.

18. Ringbisihe kuti Marako 12:43, 44, ginipai Yesu agumbaha tipa gu gamahe dekurugbo afuhe?

¹⁸ Oni gedi Marako 12:43, 44. Rago aima ngba ti Yesu gbe na gu dekurugbo re. Sidu, ko ayambu gako abawiriki, ki gbe berãyo kuti gu dekurugbo re na ki pe gupai nga: “Gi rungorungo dekurugbo re, ri ba ra kii ti agu yo dunduko ninaba ra.” Fuo gure, ko ape gupai nga: “Agu yo dunduko [gbe, kumukokumuko aboro] ninaba ra bakere i niba ra wa kumuko yo akumuko; ono ri niba ra aba dunduko koyo a wa ami adu be ri ni gari zingo, kina ra ningia gari he sa ni rengo.” Ho gu ruru dekurugbo re afu gu yangara marã ni naadu beri rogo gu uru re, ri aamaa raka ri ku be Yekova, kidu na gu kido nga ko nika ngera angerafuo ri.—Tam. 26:3.

19. Gini nyanyakipa pai rengbe ani ka wirikaha ti agu afugo Yesu du tipa rungorungo dekurugbo?

¹⁹ Mo mangipai kuti gupai du rogo gu pangbanga re rogo gamo raka yo. Mo sananga tiro nga, ‘Ginipai rengbe mi ka wirikaha ti agu afugo Yesu du tipa gu rungorungo dekurugbo re?’ Mo berẽnga pa gu dekurugbo re. Zanga kapa, ri aabihe nga ka ri nifunga gamahe afu ni bakerehe kisusi gure fu Yekova. Ono wa si avura duwo, ri amangi gupai ri adu na rengba ka mangaha; ri afu guhe fu Yekova nangba kisusi wa omeri arengbe na ni. Na Yesu aima ino gupai nga gari gamahe aima du na nyanyakipaha bangiri Bako. Gu nyanyakipa pai ani awirikaha ane nga: Yekova na ngbarago ho ani afu guhe ni fuko ngba kisusi wa rengbe omerani na ni—du nga gu sunge ani amangaha fuko na ngbaduraniyo dũ. (Mt. 22:37; Koro. 3:23) Yekova na ngbarago ho ko abi rani ni ani nimangi ai gupai rengbe ani ka mangaha! Gipai re nabipa bakio gu regbo gbiati ome rengbe ani ka fuhe tipa gaani irisombori, kodihe na sunge tungusapai gbiati adunguratise.

20. Waigu rengbe mo ka mangapai kuti gupai du rogo gu pangbanga du tipa dekurugbo tipa ka undo kura aboro? Oni funga kpiapai.

²⁰ Waigu rengbe mo ka mangapai kuti gupai du rogo gu pangbanga du tipa dekurugbo tipa ka undo kura aboro? Mo berẽpa aboro nga aguyo rengbe ka gbia ngarasaro ka mo tingidiyo na gupai nga Yekova na ngbarago na gupai du yo na rengba ka mangaha fuko. Ni kpiapai, ya mo mo iningo pa wirina ni dee nga guri si narengbe  kadu nga ri na gberãrago watadu ri nabi tiri nga sunge tiri te bambiko gupai nga kpotori wenengai na ome tiri ka mangasunge tungusapai ni bakerehe wa gu ri anaamangaha mbata te? Watadu ya mo mo rengbe ka berãpa wirina nga guko du na iigirã bangabanga kaza tiko na du na gberãrago mbiko gupai nga ko na rengba kadu Bambu Kindo yo tipa adunguratise dunduko te? Mo undo gu ngbatunga aboro re ni peka mo agu afugo fuyo “ngba angba sa nyakasa.” (Ef. 4:29) Mo pepa gu wenepai fuyo ani nawirikihe ti gu pangbanga du tipa rungorungo dekurugbo. Gamo afugo ngarasaro rengbe ka fu gu kido fuyo nga Yekova na ngbarago na ani ho ani afu guhe ni fuko ngba kisusi wa rengbe omerani na ni. (Snz. 15:23; 1 Tesa. 5:11) Ho mo atambua kura aboro ni tipa wai i afu guhe fu Yekova ngba kisusi ringbisihe kuti ome yo—ka si vura kaa ngera ni umbaha wai vurũ—gure nga mo napekafuo Yesu wenengai gbe.

21. Ginipai mo nadiberã ka mangaha?

²¹ Nairiwo wai du ani na tambuahe tipa gupai nga agu apangbanga du rogo Akitabu Wene Pangbanga napeka dungu futufutuapai furani tipa ga Yesu raka, kini sarani ani pekefuoko wenengai gbe! Si angba gbe ka oni di regbo ti regbo gaoni wisigopai nisase watadu ti regbo Gu Irisombori Nga ga Aborokporo ka sakapai gbe tipa agu apai du rogo Akitabu Wene Pangbanga. Si naida ani tingidi gupai nga, tipa ka gbia undo ni bakerehe gbe ti ngbatunga gu wisigopai re, si naida ani sa agu apangbanga re si du wa ka i ya agu apai ani abihe si nimangi amanga berãraniyo, na ki mangipai kutini rogo gaani raka yo. Kurii gu nga ka wirika agu apai Yesu amangihe, si naida ani degeturani kuti agu apai ko agumbaha. Rogo gu kekeapai ngbefuo gere, ani nika sakapai tipa gupai rengbe ani ka wirikaha ti gu yangara afugo Yesu ko agumbaha mbata fu ko kpi.