1-2. ˈAyaw no mapatay ci Yis somowalay to pina sowal, ˈayaw no somowal cingra mifekaday ko maanan a demak?

ITINIAY i kongyen 33 miheca no Yutay Nisan folad 14 romiˈad. Mapakokotay no tamdaw ci Yis ato misaˈosi to raraw, micadaay to salikaf ato pisamsam, ikor mipacekan i pisemseman hecek. Pafeseray ko pacek i kamay ato waˈay ningra, kahacecay a saselaˈ, kahacecay no sowal, tahiraay i falocoˈ ko adada. Kawra kamayan mihadidi a somowal cingra, samanen kalimlaan koniya sowal.

² Dotoc lengoen ita ko misowalan ni Yis i pisemseman hecek, ato mamananam ita ko maanan kalimlaan a kimad toniya sowal. Mihaen, wa ngaˈayto kita ‘mitengil a mihakelong’ cingranan.—Matay 17:5.

3. Micangacang ci Yis ci Yihofaan o cima tamdaw ko sasododen hani?

³ O maanan ko sowal ni Yis? Mapacek ci Yis i pisemseman hecek i sanay mitolon: ‘Amaaw, nanay sododen Iso cangra.’ O cima ko mitoroˈan to ‘cangraˈ hani? Mikitini dotoc a sowal ni Yis wa mafanaˈ kita. Sanay cingra: ‘Cowa kafanaˈ cangra to midemakan no niyah.’ (Luka 23:33, 34) O mitoroˈan ni Yis oyaan tano pacekay mipacek to kamay ato waˈay ningra a sofitay no Loma, oniya tamdaw cowa ka fanaˈ to o wawa no Kawas cingra. Roma i, o maharatengay ningra oya misaaliay to papatayen cingra, kawra ikor paihkalay to pakasoˈlinay a tamdaw. (Dmak 2:36-38) Pakayni caka sadafdaf ko macadaay cowa ka maketer ci Yis, ˈintel ko falocoˈ. (1 Pitiro 2:23) Masafelitay,  micangacangay cingra ci Yihofaan misodod toya mipatayay cingranan a tamdaw.

4. Makahiay ci Yis misodod to misafelitay cingranan a tamdaw, ngaˈay kita samaan a minanam cingranan?

⁴ Mikitini i sowal ni Yis mamananam ita ko maanan? Wa mitodong kita ci Yisan, makahi a misodod to tao. (Kolosay 3:13) O salawina ita anca roma tamdaw cowa ka cipinang to pihakelongan ato pakayraan ita maˈorip, mansa misafelit kitaanan. Pakidemay ko pidokaˈ nangra kitaanan alatek, pakangodo kitaanan, mipalak to cudad ita, paˈangiho to mamidokaˈ kitaanan. Soˈlin mahaen, cowa ko aˈintel ko falocoˈ ita. Ngaˈayay cangacangen ita ci Yihofa padama cangranan mihapinang to demak, ikor micada to soˈlinay kimad. (Matay 5:44, 45) Kawra, ano pakidemay ko dokaˈ ita, pasangar a misodod alatek. Kawra ano palamiten ita ko ˈintelay i falocoˈ, o niyah ko mamadokaˈ. Cecay fafahiyan salikaka sanay: “Mahapinangay ako misodod cowa ko mihaydaay to waywayan no tao, anca pakiyadi saan papidokaˈ to tao takowanan. Dengan cowa ka padotoc a maketer, misawad a ˈintel.” (ˈOlic 37:8) Ano misaˈosiay kita misodod to tao, o cowato ko papakayni mataˈlifay a demak padotoc a maketer.—Ifiso 4:31, 32.

5. (1) Mikiˈokay ci Yis to itihiay ningra a mararaway to maanan? (2) Hano mihadak ci Yis toniya sakiˈok?

⁵ O maanan ko sowal ni Yis? Iraay ko tatosaay mararaway tamdaw, malacafayay ci Yisan mapacek i pisemseman hecek. Salakat, oniya tatosaay malacafayay to roma tamdaw pakangodo ci Yisan. (Matay 27:44) Kawra ikor mafalicay ko harateng no cecay, mahapinangay ningra ‘cowa pidemak to mararaway demak’ ci Yis. (Luka 23:40, 41) Cowa ka hatini aca, o sowal ningra paihkalay to pakasoˈlinay cingra to papatikol ci Yis a maˈorip, mikowan i Hongti Kitakit noikor. Sanay cingra: ‘Yisaw, micada kiso to fadangalan no Hongti i, nanay haratengen kako.’ (Luka 23:42) Tada pakasoˈlinay koniya tamdaw ci Yisan! Pasowalan ni Yis cingra: ‘Soˈlinen ako pasowal kiso anini, wa kalacafay kiso takowanan i Lakoing.’ (Luka 23:43) Sinanoten, misaka dademakan ni Yis ko “Kako” ato “Kiso,” paihkalay konini oniya sakiˈok pasayraay toya mararaway tamdaw a hadaken. Mafanaˈay ci Yis matomesay to siniˈad ko kakarayan Wama, mansa ngaˈay mikiˈok cingranan, itini ˈayaw no mapatay koniya mararaway paira to hatokel.—ˈOlic 103:8.

6. Mikitini i sowal ni Yis tonini a mararaway mananam ita ko maanan hani?

⁶ Mikitini i sowal ni Yis mamananam ita ko maanan? Malefotay ko paihkal ni Yis to capeling no kakarayan Wama. (Hipray 1:3) Matomesay to siniˈadaay ci Yihofa, makalimay misodod kitaanan. Ano soˈliˈlin kita pasasiyor, pakasoˈlin to mamikorac ko ˈirang ni Yis to raraw ita, o sasododen no Kawas kita. (1 Yohani 1:7) Harateng no roma tamdaw, cato pilifok koniyah to sasodod ni Yihofa sanay. Ano mahaenay ko harateng iso, haratengen: O cecay citatodongay patayan a mararaway paihkal sanayho to pakasoˈlin ci Yisan, milifokayto siniˈada ni Yis, mihaenay, oyaho padotocay madimadi midoko ci Yihofaan, misarocoday midofdof to limoˈot Ningra a tamdaw, coko aikaka ko pilifok to siniˈada ni Yihofa han?—ˈOlic 51:1; 1 Yohani 2:1, 2.

7. Mikitini Yohani 19:26, 27, o maanan ko sowal ni Yis ci Mariyaan aci Yohanian hani? Hano mihaen ko sowal ningra?

⁷ O maanan ko sowal ni Yis? (ˈOsien ko Yohani 19:26, 27.) O wina ni Yis itiya o maponengayto alatek, tada ciharatengay ci Yis  cingranan. O safasafa ni Yis wa ngaˈay midimokos tono dafongan a saali no wina, kawra cima ko mamidimokos to saali no wina i noˈadingoan, padama cingranan padotoc a tanektek ko pakasoˈlinay falocoˈ hani? O safa ni Yis cowaho ko nisawawaan ningra itiya. Ci Yohani saan o madimadiay a tarokos, o ngaˈayay a widang ningra. Minengneng ci Yis to kalacafayay cingranan midoko ci Yihofaan malecaday o paro no lomaˈ. (Matay 12:46-50) Mansa mikitini kaolah ato kaciharateng ni Yis to wina, patoroden ni Yis ci Mariya ci Yohanian, pakasoˈlin to dadimokosen ni Yohani ko saali no wina i noˈadingoan. Sanay ko sowal ningra to wina: ‘Nengnengen, o wawato iso cingra!’ Dotoc pasowal ci Yohanian: ‘Nengnengen, o winato iso cingra!’ Mikitiya, malecaday wina hananayto ni Yohani a midimokos ci Mariya.  Mikitini kahofoc ci Yisan misongilaˈay ci Mariya a midimokos cingranan, itini ˈayaw no mapatay cingra itiniay itihi ningra a pacafay, tada o ngaˈayay a wina ci Mariya, mansa tada maolah ci Yis cingranan!

8. Mikitini i sowal ni Yis ci Mariyaan aci Yohanian mananam ita ko manan hani?

⁸ Mikitini i sowal ni Yis mamananam ita ko maanan? Pakaynien kitaanan, mikikakaay ko kalangaˈay ita to cowa ko ˈaˈirangan a Krisciyang a salikaka. Misafelitay ko salawina ita anca mifalahay kitaanan alatek. Malecad o mikiˈokan ni Yis, ano madimadi kita ci Yihofaan ato likakawa Ningra, ˈalomanay salikaka wa malo wawa, wina anca wama a minengneng kitaanan, o malifokay ita wa ‘simoˈot tingloh’ no malahdaway. (Marko 10:29, 30) Tada makedecay ko paro no lomaˈ no Krisciyang, o kahacecay tamdaw mitadiˈecay ato maolahay ci Yihofaan, masasiolahayho. Masalalomaˈ no mahaenay paro no lomaˈ, samanay ko harateng iso hani?—Kolosay 3:14; 1 Pitiro 2:17.

9. O sowal ni Yis itini Matay 27:46 mitadtaday to maanan hani?

⁹ O maanan ko sowal ni Yis? ˈAyaw no mapatay ci Yis taˈangayay ko piowaw a somowal: ‘Kawas ako, Kawas ako, hano liyasen Iso kako?’ (Matay 27:46) Cowa pitadtad ko Fangcalay Cudad hano mihaen ko sowal ni Yis, kawra oniya sowal mitadtaday to pina demak. Salakat, mihaen ko sowal ni Yis, matatodongay ko sapairasol no ˈOlic 22:1. * Saka tosa, mitadtaday koniya sowal cowa ka ‘pisangaˈ to ˈadipelˈ ci Yihofa itiya midipot to Wawa ningra. (Yopu 1:10) Mafanaˈay ci Yis, masongilaˈay no kakarayan Wama paiken i kamay no ˈada cingra, ho masongilaˈ cingra a mapalifet, o hatiniay sapalifet awaayho ko tahalifaay a tamdaw. Roma i, paihkalay ko sowal ni Yis, o awaay ko raraw ningra, cowa ko papatayen.

10. Mikitini i sowal ni Yis to kakarayan Wama mananam ita ko maanan hani?

¹⁰ Mikitini i sowal ni Yis mamananam ita ko maanan? O mananamay ita a cecay i, aka mihamham kita to papalahdawen ni Yihofa ko kihcod a pasangaray ato sacara, hoeca ka palifet ko pakasoˈlinay falocoˈ ita. Wa malecad kita ci Yisan, micada to pakidemay a sapalifet alatek, mihaenay o papaˈayaw kita a misaday tahatolas ko madimadi, soˈlin kinafalah to ˈorip cowa ko tatalalikor. (Matay 16:24, 25) Mikiˈokay ko Kawas, cowa ko papataˈlifen Ningra ko mamadangar ita a sapalifet. (1 Korinto 10:13) Mananamayho ita, wa malecad kita ci Yisan tahalifa to cowa ka sadafdaf a demak alatek. (1 Pitiro 2:19, 20) Misafelit ko roma tamdaw kitaanan, cowa ko mararaway ko demak ita, ao cowa ko noniya hekal kita, hanaca misawacayay to soˈlinay kimad. (Yohani 17:14; 1 Pitiro 4:15, 16) Mafanaˈay ci Yis hano haien ni Yihofa cingra micada to roray. Kawra, tahalifa ko madimadiay a Krisciyang to sapalifet, cowa ka cipinang hano mihai ci Yihofa mifekad ko tatiihay demak. (Hapakuk 1:3) Iraay ko mihadidiay no Kawas, matomesay to siniˈada, cipinangay Cingra cowa ko awaay ko pakasoˈlin noniya tamdaw, dengan misaaliay cangra to sahinom, dengan ko Kawas ko papafeli to soˈliˈlinay a sahinom.—2 Korinto 1:3, 4.

11. Hano somowal ci Yis to Yohani 19:28 a sowal hani?

¹¹ O maanan ko sowal ni Yis? (ˈOsien ko Yohani 19:28.) Pasowalay ci Yis: ‘Masoˈaway kako?’ Mihaen ko sowal ningra ‘pakayniay sapalaˈosiaw to sowal no Fangcalay Cudad,’ sapairasol i ˈOlic 22:15. Sowal no sinael:  ‘Makelahayto ko ˈicel ako, malecad o mafolfolay a kawala, cipat sato ko sema ako i kananel no wadis.’ Roma i, adihayay ko macadaay ni Yis a semsem, mahawpay ko adada i pisemseman hecek, madeng masoˈaway cingra, misaaliay to sadama no tao.

12. Sowal ni Yis ‘masoˈaway kako,’ mikitini sowal ningra mananam ita ko maanan?

¹² Mikitini i sowal ni Yis mamananam ita ko maanan? Mihadak ci Yis to nafalocoˈan noniyah o malonayay cowa ka saan miharateng, ano kita to aka mahaen ko harateng. Latekay, cowa ka sapifanaˈaw kita to tao to saali noniyah, matalaway maafad ko tao. Kawra ano soˈlinay misaali kita to sadama, aka cisasa, ka talaˈayaw a micangacang to sadama. Tinakoen, ano matoˈasay malonayay ko tireng ita, mamitahidang to widang parakat to paliding miˈorong kitanan micakay to dafong anca paising. Ano tatiih ko harateng anca matoled ko falocoˈ, papasowalen ko malohemay malitengay anca matenesay a salikaka alatek, o mihadakan nangra ‘ngaˈayay sowal’ o papalipahak kitaanan. (Taneng 12:25) Haratengen, maolahay ko salikaka kitaanan, tahalifa kita to pades makalimay sapadamaaw kitaanan. (Taneng 17:17) Kawra cowa ka fanaˈ cangra to harateng ato nafalocoˈan ita, ano caka talaˈayaw kita a somowal, cowa ko mamafanaˈ cangra to o maanan ko misaalian ita.

13. Madimadi ci Yis tahira i patay, malaˈosiay ko manan a demak hani?

¹³ O maanan ko sowal ni Yis? Nisan folad 14 romiˈad madeng 3 ko toki kalahokan, miowaway ci Yis a somowal: “Malaheciayto Ako ko demak!” (Yohani 19:30) Caka halafin, maketonayto ko selaˈ ni Yis, malaheciayto ko patorodan ni Yihofa cingranan a kihcod ˈinorong. Samanen tahiraay i patay a madimadi, malaˈosiayto ni Yis ko pina demak. Saka1, misawacayay ci Yis o mangah ko sowal ni Satan. Hakelong no kaˈorip ni Yis paihkalay, ano samaanto ko demak ni Satan, o malefotay tamdaw wa ngaˈay madimadi to Kawas. Saka 2, kinafalah ci Yis to ˈorip malo sapatefoc, pairaay to toki no cowa kalefot a tamdaw miingid to Kawas, ira ko tokel midaˈoc a maˈorip. Saka 3, misawacayay ci Yis o matatodongay ko saˈakawangay sapikowan a fadangalan ni Yihofa, hanaca mikoracay to mapakaditay a fangcalay ngangan no Kawas.

14. Wa misetek kita to falocoˈ samaan ko kaˈorip to romiˈamiˈad? Tadtaden.

¹⁴ Mikitini i sowal ni Yis mamananam ita ko maanan? Oha mamisetek kita to falocoˈ, to romiˈamiˈad mitafo to madimadiay. Ci Makeswie Forante faˈinayan salikaka nao singsi no Kiliyat Picudadan, itini cecay koksay taykay, itini kimad ningra milengoay to mitafo to madimadiay, sanay: “Ano ngangaˈay kiso anini midemak ato somowal to maanan, aka minayal tahacira, samanen cowa kafanaˈ kiso airaho ko nocira hokira. O salikorayto a toki anini, misawacay to iraay ko tatodong noniyah milifok to midaˈocay ˈorip.” Nanay minengneng kita to kahacecay romiˈad o salikorayto a toki mitafo to madimadiay, mihaen soˈlin misiˈayaw to patay, wa ngaˈayho somowal kita: “Yihofaaw! Misarocodayto kako mitafo to madimadi, misawacay to misamangahay ci Satan, pakayni sapatalahkalaw to fangcalay ngangan Iso, midama to saˈakawangay fadangalan Iso, o dademaken, malaheciayto ako midemak.”

15. Mikitini Luka 23:46, masongilaˈay ko pakasoˈlin ni Yis to manan hani?

¹⁵ O maanan ko sowal ni Yis? (ˈOsien ko Luka 23:46.) Matomesay ko pakasoˈlin ni Yis  a somowal: “Wamaaw patoroden ako i Tisowanan ko ˈorip ako!” Mafanaˈay ci Yis, sasamaan ko noikor ningra, ci Yihofa ko piˈarawan, pakasoˈlinay cingra cowa ko mamapawan ko kakarayan Wama cingranan.

16. Mikitini nalifetan no cecay 15 ko mihecaan a salikaka mananam iso ko manan hani?

¹⁶ Mikitini i sowal ni Yis mamananam ita ko maanan? Patoroden ko ˈorip no niyah i kamay ni Yihofa. Oha ‘misarocod a mitadiˈec ci Yihofaan’ kita ngaˈ, makahi a mihaen to demak. (Taneng 3:5) Nengnengen ko taˈarawan no faˈinayan salikaka ci Ciyawsoya, 15 ko mihecaan ningra ciadadaay to ekang, kawra manaˈayay cingra micada to misafelitay to Rikec no Kawas a sapiadah. Tiya mamapatay cingra pasowalay to wina: “Ina, wa dipoten ni Yihofa kako . . . pakasoˈlinay kako, papatikolen ni Yihofa paˈorip kako, samanen cipinangay Cingra takowanan, mafanaˈay to maolahay kako Cingranan.” * Kita kahacecay tamdaw licayen ko niyah: “O pakasoˈlinay falocoˈ ano misiˈayaw to sakapatay a sapalifet, wa patoroden ako ko ˈorip no niyah i kamay ni Yihofa, pakasoˈlin to mamaharateng Ningra kako han?”

17-18. O maanan ko mananamay ita kalimlaan a kimad? (Nengnengen ko sapatongal lalakaw “ Mikitini Sowal ni Yis i ˈAyaw no Mapatay Mananam Ita ko Maanan?”)

¹⁷ Mikitini kita i sowal ni Yis i ˈayaw no mapatay, mananamay ko kalimlaan a kimad! Mananamay ita, makahi misodod to tao, pakasoˈlin to mamisodod ci Yihofa kitaanan. Masalalomaˈay no damsayay a taˈangayay lomaˈ no Krisciyang kita, ˈalomanay salikaka makahiay mihadak to sapadama, tada rahekerayto kita. Kawra, ano ira ko saali ita i, talaˈayaw a micangacang to sadama. Mafanaˈay kita, ano samaanto ko sapalifet noikor, wa ngaˈay padama ci Yihofa kitanan mihadidi. Mamisetek kita to falocoˈ, minengneng to kahacecay romiˈad o salikoray a toki mitafo to madimadiay, hanaca rihaday a patorod to ˈorip no niyah i kamay ni Yihofa.

¹⁸ O sowal ni Yis i pisemseman a hecek soˈlinay iraay ko tatodong! Misaˈicel kita miskadademak to minanaman, o mitooray to limoˈot ni Yihofa ‘mitengil mihakelong’ ci Yisan.—Matay 17:5.