1-2. Rosai Yesus ismai na fyor ikofen wos ḇepupes ḇyena ḇaim?

RAS ani tanggal 14 Nisan taun 33 M. Yesus dakfrur sasar oḇaḇeri ḇesyaḇo skursof Yesus i ḇo soḇo ifrur ḇarḇor. Roi ine ifnai ḇo skoryae i ma siprer i ra iduf fayayaḇa ramnai brasi ma wesi spai kaku naro ai kandera ya. Inja, fafisu imbe iyer knaref ke ḇaido imbe dawos ido, iduf kaku. Imḇape, roi oso ḇefandun kaku imbe ikofen na.

² Mgorama kawos Yesus roi dawos na fafisu ḇyekandera ro ai kandera ya. Nari kawos kako rosai farkarkor ḇyena faro ko. Ḇaido kokofen ido, mgorama ’komnaf i.’​—Mat. 17:5.

3. Fafisu Yesus doḇe, ”Mami, buk ampun farosi” imbude wos ine kyur faro mansei?

³ Rosai Yesus ikofeni? Fafisu ḇyeḇepai ro ai kandera ya, Yesus ḇyenadi radine, ”Mami, buk ampun farosi.” Mansei ḇesmai ampun kaku ya? Kankarem ḇyena nasya ro Yesus wos ḇyena ḇekofen wer, ”Snar sifawi rosai sifrur ineḇa.” (Luk. 23:33, 34) Inja, Yesus imbude ikofen wos ani ḇe sordade Romawi ḇepai ḇrasi ma wesi ro ai kandera ansya. Sordade ansya sakmambir Yesus i ḇa. Osower ido, imbude Yesus ikofen ḇe snonggaku ḇeḇeso ḇero diansya kako snar randakya simarisen Yesus imardi ḇape ḇarpur ya sakyar faro Yesus i. (Kis. 2:36-38) Snonggaku ansya sifrur pyum Yesus ḇa raryano, Yesus dakmsor si ḇa ḇaido sneri dosam si, oroḇaḇeri. (1 Ptr. 2:23) Ḇape, dor ḇe Yahwe fa ḇyuk ampun faro si.

4. Farkarkor rosai bisa kun ro Yesus rari ḇyedi isoine ḇyuk ampun faro ḇefrur duf i sya?

 ⁴ Rosai kofarkor ro Yesus wos ḇyena? Raris Yesus i, imbe kakbuk ampun faro ḇesesya. (Kol. 3:13) Snonggaku sya, imbude karyer koḇesya simsor ko snar sfawi muraro kakyar ma kenem koḇena rai. Imbude sfawar roi ḇekaku ḇa faro ḇesesya, imbude skoryae koro ḇarpon snonggaku ḇebor, sifrur rusak syap kobena, ḇaido sikofen ḇo soḇo nari smun ko. Nari komewer kokram masasor faro si. Imboi, kofararyor ḇe Yahwe fa ifnoḇek si insama sakfawi kakaku ya. (Mat. 5:44, 45) Fyorno ido, samswen fa koḇuk ampun faro ḇesesyandi, syadi ya fafisu sifrur roi ḇeḇyeḇa faro ko. Ḇoi, koswarepen komsor ker si ma komewer koḇuk ampun faro si ido, kakuya ine kofrur duf manggun ko. Imbesrar oso ikofen radine, ”Yafawi yabuk ampun faro ḇesesya ido, ine nfasnaiḇair ḇa snar yaḇesetuju faro sasar sifrur na ḇaido yamam monda sifrur roi ḇeḇyeḇa faro aya. Ḇape, kuker yaḇuk ampun faro si, yakinfir fa yamsor ker si ḇa. (Mz. 37:8) Imbo, fafisu koḇuk ampun faro ḇesesya, ine nfasnai sifrur pyum koḇa rariryano, kokinfir fa kokram masasor ḇa.​—Ef. 4:31, 32.

5. Rosai Yesus ḇyeasas faro snon mamun ro ḇar ḇyedi ma rosai ḇefnai fa ḇyuk asas ani?

⁵ Rosai Yesus ikofen i? Ro Yesus ḇar raku ma ḇar rasar ḇyedi snon mamun risuru suisya sakkaf suro ai kandera fnoḇek Yesus i. Randak ya suyakkoryae Yesus i. (Mat. 27:44) Ḇape, ḇarpurya suminya imnai kyoryae Yesus i snar myam ḇoi Yesus ”dakfrur sasarḇa.” (Luk. 23:40, 41) Ikyar nari Yesus ḇyeḇebawes ma nari ḇye raja. Ikofen ḇe Yesus i radine, ”Waswarepen aya, rofyor wafyafer imnis wairek.” (Luk. 23:42) Snon anine kakyar ḇyena naḇa kaku! Mura Yesus ikofen faro i, ”Yakofen kaku faro aw, kaku ḇeri ras ine nari awsya kuker aya ro Firdaus.” * (Luk. 23:43) Komam kada Yesus doḇo ”ausya” ma ”aya”. Ine nfasnaiḇair manggundi ḇyeasas faro snon mamun ani. Yesus ḇyuk asas ani snar fyawi Kmari man bena sawarwar kaku.​—Mz. 103:8.

6. Rosai bisa kofarkor ro Yesus wos ḇyena faro snon mamun ani?

⁶ Rosai kofarkor ro Yesus wos ḇyena? Yesus rari-rari ḇyena namnis kaku kuker Kmari rari-rari Ḇyena. (Ibr. 1:3) Yahwe imarisen ḇyuk ampun faro ko ma Iswar ko fyor kombror kaku ro sasar koḇena ma kokyar faro Yesus fasaspar ḇyena. (1 Yoh. 1:7) Imbude ono sḇaḇir na Yahwe ipok fa ḇyuk ampun faro sasar sifrur ro ḇepon naiwara ḇa. Ḇaḇir rarya nido, kwarauser roi ine: Fafisu Yesus imar ḇaime, ḇyuk sawarwar faro snon mamun ḇefasnai kakyar ro fafisu anya ani. Inja, Yahwe nari fyasnai sawarwar Ḇyena faro manfamyan ḇesouser Ḇyesi, ḇesewar kwar fa ḇesouser sasoser Ḇyena!​—Mz. 51:1; 1 Yoh. 2:1, 2.

7. Raris Yohanes 19:26, 27 ikofen na, rosai Yesus ikofen ḇe Maria ma Yohanes suni, ma ikofen rarirya snaro?

⁷ Rosai Yesus ikofen i? (Wasya Yohanes 19:26, 27.) Yesus myam faduru snari kaku, fafisu ya imbude Maria ḇye bin kabom kwar. Yesus ḇeknik ḇyesi  imbude na smam snari fandandun rasras ḇyena. Ḇape, manseiso na ḇemamo snari fandandun rur ḇyedi? Fafisu ya, imbude Yesus ḇeknik ḇyesya sakḇe manfamyan ḇyedi ḇaim. Injariso Yesus dor manfamyan ma bati ḇyedi isoine Yohanes i fa myam snari. Faro Yesus, manseiriryawer ḇesyom Yahwe I sima kina ḇyesirya. (Mat. 12:46-50) Yesus ikyar nari Yohanes myam fandandun rur ro snari ḇyedi. Inja Yesus ikofen ḇe snari, ”Awine, inekada romawa bedi!” Ramnai dawos wer ḇe Yohanes i doḇo, ”Inekada sna bedi!” Ro ras ani, Maria myam Yohanes iḇe roma ḇyedi ma nari myam faduru Maria i raris sna ḇekapar i. Nasnai kaku  snar Yesus iswar kaku snari, bin ḇefaduru iro ḇyekapira isof dores fanam i fafisu imbe imar ya!

8. Rosai kofarkor ro Yesus wos ḇyena faro Maria ma Yohanes su?

⁸ Rosai kofarkor ro Yesus wos ḇyena? Bisa kofanam syadi kuker naek srar koḇesya ma bisa nasyadi ro wis koḇena kuker karyer ḇaido kina koḇansya. Karyer koḇesya imbude simsor ko ḇaido sibur ko. Ḇape, raris Yesus ḇyeasas kwar, kofanam pdef kuker Yahwe ma organisasi Ḇyena ido, nari ’kosma sadwer syadi ḇe utin’ kina. Naek srar ḇebor sya nari siswar ko nari sḇe kma, sna, ma romawa faro ko. (Mrk. 10:29, 30) Kokame bisa koḇeoser koḇe kina ro rurya snar kokyar faro Yahwe, koswar I, koswar min koḇesi?​—Kol. 3:14; 1 Ptr. 2:17.

9. Rosai bisa kofarkor ro Yesus wos ḇyena ḇero Matius 27:46 ya?

⁹ Rosai Yesus ikofen i? Fyor Yesus ryo ḇaime dor naḇa, ”Allah Yedi, Allah Yedi, snaro Wabur Aya?” (Mat. 27:46) Refo ikofenḇair ḇa snaro Yesus ikofen radirya. Ḇape, wos ḇyena ine kyur ḇe rosai? Oser yaiso, rofyor Yesus dawos wos ani, bardadi ḇero Mazmur 22:1 ine nḇendarirya. * Osower ido, Yesus wos ḇyena ine fyasnaiḇair snar Yahwe kyadaunwarek Rumkun Ḇyanine ḇa. (Ayb. 1:10, catatan kaki) Yesus fyawi snar Kmari ḇyuk i mura ḇe mbroḇ ḇyesi kwar ma kyadaunwarek i ḇa insamaido kakyar ḇyena neḇeuji isof ro imar ya. Snonggaku oso ḇaḇeri ḇesmai roi ḇemnis Yesus i ḇa. Osower ido, Yesus wos ḇyena kako nfasnaiḇair snar kakuya ismai samamyai marmar ya ḇa kukro ifrur roi ḇeḇarḇor noḇa.

10. Rosai bisa kofarkor ro Yesus wos ḇyena faro Kmari?

¹⁰ Rosai kofarkor ro Yesus wos ḇyena? Oser ya, kofarkor imbude Yahwe nari kyadaun koro roi samswen nakam ḇa nbeuji kakyar koḇena. Yesus isouser pdef fyor kakyar ḇyena neḇeuji isof ro imar ya. Baboine kako kofasos kofa kosouser pdef, syadiwer isof komar. (Mat. 16:24, 25) Ḇape, kokyar snar Yahwe nari myam monda ḇa kakyar koḇena neḇeuji syadi ro samambraḇ koḇena ḇa. (1 Kor. 10:13) Farkarkor ḇese wer imbude kakfrur sasar oḇaḇeri mboi bisa snonggaku sya sakfrur kandera ko kako raris Yesus i. (1 Ptr. 2:19, 20) Spampum ko, snar kofrur roi ḇeḇarḇor na ḇa ḇoi roi ḇefnai yaiso snar kakro ḇar dunya ine ḇa ma koḇaryas kakaku. (Yoh. 17:14; 1 Ptr. 4:15, 16) Yesus fyawi roi ḇefnai fa Yahwe myam Yesus ḇyekandera. Ḇape, imbude Allah manfamyan Ḇyesi ḇeḇeso sia sifuken rosai ḇefnai fa Yahwe myam monda sḇekandera ri. (Hab. 1:3) Snar Yahwe isawarwar ma ikaḇaḇaḇ, Fyawi snar manfamyan Ḇyesya sifuken radirya ine nfasnaiḇair ḇa sna kakyar noḇa. Imboi, sfandun wosneprei snar I monda ḇebuk saneprei faro si.​—2 Kor. 1:3, 4.

11. Rosai ḇefnai fa Yesus dap wos ḇero Yohanes 19:28?

¹¹ Rosai Yesus ikofen i? (Wasya Yohanes 19:28.) Snaro Yesus doḇe, ”Yambrow”? Insamaido mnuk ḇero Mazmur 22:15 nbendarirya kaku. Mnuk ya ryok radine, ”Papoik ayena nasyor imnis uren  saprop ḇerik ḇekpef; ramar yedi nasef ro nafen yedi.” Kandera ḇyenakam isoine dafduf ismai ro ai kandera ya na nafrur fa Yesus imbrow. Inja, na dinem war fa imbrow ḇa.

12. Rosai bisa kofarkor ro Yesus wos ḇyena ḇekofen ”yambrow”?

¹² Rosai kofarkor ro Yesus wos ḇyena? Yesus imai ḇa fa ikofen ḇe ḇesnonggaku ḇesesya rosai fyandun na. Ine nfasnaiḇair ḇa snar ima snonggaku ḇesambraḇ ḇa. Imbude komai fa kokofenḇair roi koḇaḇirna ḇaido roi kofandun na faro snonggaku ḇesesya. Ḇape, kofandun fanfnoḇek ido, komkak awer fa kor fanfnoḇek. Rupa radine, koḇesinan kwar ḇaido kosambraḇ wer ḇa bisa kor oso fa dun pyan kofa kora kokaḇkoḇes ḇaido dun pyan koḇe dokter. Kosya koḇesanekar ido, bisa kor imbude bisa kor fanfnoḇek ro penatua ḇaido naek srar ḇemas ro sidang. Na srower ko fyor kokofen roi ḇero kosnemna. Na sbuk kako wosneprei kuker ”wos ḇeḇye” sena. (Ams. 12:25) Waswarepen snar naek srar ro sidang koḇedi siswar ko ma imbe sifnoḇek ko fafisu koḇe susa. (Ams. 17:17) Ḇape koswarepen snar sfawi mura raro swaruser koḇena ḇa. Inja kokofenḇair ḇe si ḇa ido nari sfawi ḇa snar kofandun fanfnoḇek.

13. Snar isouser isof imar ya, bon rosai monda Yesus ifrur na?

¹³ Rosai Yesus ikofen i? Indokada oras rikyor arkok ya tanggal 14 Nisan, Yesus dor naḇa, ”Imnis kwar” (Yoh. 19:30) Yesus imar ḇaime, ifrur roi nakam faro rosai Yahwe dor ro i na. Snar isouser isof ro imar ya, roi ḇeḇeso ifrur na Yesus ismai bon rona. Oserya, fyasnaiḇair snar Setan ima danggarkar. Yesus fyasnaiḇair snar Setan ḇyuk farawrowes nabor rariryano snonggaku ḇenapes bisa sisouser pdef. Ḇesuruya, Yesus ḇyuk kankenem ḇyedi ḇe fasaspar. Bonya, Yesus ḇyuk snonggaku ḇenapes ḇa sya swaf fa sakna wis ḇepyum kuker Yahwe ma insa sismai kankenem fyoro-fyoro. Ḇekyori, Yesus fyasren Kmari snonsnon ḇesren Ḇyedi ma fyasnaiḇair snar Yahwe iso Manḇepoik ḇepyum kaku.

14. Rosai imbe kofrur ro ras ḇe ras na? Fasnaiḇair pan.

¹⁴ Rosai kofarkor ro Yesus wos ḇyena? Ro ras ḇe ras, koḇesewar kaku fa kosouser ḇesya kwar. Mgomam rosai Naek Maxwell Friend ikofen na, ḇepondi dakḇe instruktur Sekolah Alkitab Gilead Menara Pengawal. Ro munara sarawrow internasional Naek Friend dun faya kuker ḇaḇesouser. Ro faya ani, ikofen radine, ”Imbe wakofen ḇaido imbe wafrur roi oso ro ras ine ido, wawaf awer rawo meser insape wafrur na. Na wakyar meseri wakenem kaker ke? Mam ras nakam rya nḇe ras ḇepupes fa fasnaiḇair snar auma wasyus fa wasmai kanenem fyoro ya.” Iḇye kada komam ras nakam ḇe ras ḇepupes fa souser pdef! Rarirya ido, komar rariryano, bisa kokofen, ”Yahwe, yaḇesewar marmar kwar fa yasouser, infa yasfasnaiḇair snar Setan iso ḇeanggarkar, ma yafasren snonsnon ḇepyum Ḇedi, ma yafasnaiḇair snar Au iso Manḇepoik ḇepyum kaku!”

15. Raris Lukas 23:46 ikofen ya, Yesus ikyar faro rosai?

¹⁵ Rosai Yesus ikofen i? (Wasya Lukas 23:46.) Kuker kakyar Yesus doḇe,  ”Mami, ro ḇramsu yarir rur ayedi.” Yesus fyawi snar kankenem ḇyena kam ndrama ro Yahwe I, ma ikyar na Kmari ḇyawes kaḇer i.

16. Rosai kofarkor ro Joshua fawar ḇyedine?

¹⁶ Rosai kofarkor ro Yesus wos ḇyena? Wasmai roi ḇemun rariryano wasouser pdef faro Yahwe I. Inja fandun kaku ’wakyar faro Yahwe kuker sne ḇesiper’. (Ams. 3:5) Mgomam fawar ro Saksi oso ḇenir Joshua ḇyeumur taun ri 15 daksmai dafduf ḇemun. Imewer sḇuk perawatan medis snar namnis kuker Allah sasoser Ḇyena ḇa. Fyor ryo ḇaime, ikofen ḇe snari radine, ”Awine, yarir kenem yena ro Yahwe ḇramin ḇesuya. . . . Yakyar Yahwe nari ḇyawes kaḇer aya wer. Fyawi roi ḇero sneri, ma yaswar kaku I.” * Imbo, kokame na kofuken manggun ko oser-oser: ’Kosmai roi ḇeyun koḇe marmar ma nafrur kakyar koḇena neḇeuji ido, nari kosouser pdef faro Yahwe ma kokyar nari Iswarepen ko ma Ḇyawes kaḇer ko ke?’

17-18. Rosai monda kofarkor kwar na? (Mam kako kotak ” Farkarkor ḇe Ko ro Yesus Wos Ḇepupes Ḇyena.”)

¹⁷ Kawos kwar farkarkor nabor kwar ḇeyun fainda ro Yesus wos ḇepupes ḇyena! Kofarkor kwar fa kobuk ampun faro ḇesesya ma kokyar Yahwe nari dakbuk ampun faro ko. Kofarkor kako snar kona naek srar nari ḇefnoḇek koḇeri, inja fandun fa kokofenḇair ḇe si. Kofarkor kako Yahwe nari ifnoḇek ko fa kofarmgu ro samswen ḇebor kosmai na. Kofarkor kako fa kosouser pdef ras ḇe ras ine rya ras ḇepupes fa kosouser pdef ma kokyar faro Yahwe snar komar ido nari ḇyawes ko.

¹⁸ Yesus wos ḇepupes ḇyena naser wos ḇeknam! Koso rosai kofarkor na ido, kakuya kosya kosouser Yahwe parenta Ḇyena fa komnaf Yesus i.​—Mat. 17:5.