1-2. Diskraebem taem ya we Jisas i talemaot ol laswan tok blong hem.

HEMIA i 14 Nisan, long yia 33 K.T. Long dei ya, ol man oli talemaot ol giaman poen agens long Jisas, mo oli jajem hem from wan rong we hem i no mekem, biaen oli jikim hem mo oli kilim nogud hem. Biaen long samting ya, oli tekem hem mo oli go nilim hem long wan pos, oli nilim tufala han mo tufala leg blong hem. Samting ya i mekem se evri taem we hem i pulum win, hem i harem i soa we i soa. Be yet, hem i mas toktok from we hem i gat sam impoten samting blong talem.

² I gud yumi tokbaot ol laswan tok we Jisas i talem bifo we i ded, mo ol lesen we yumi save lanem long olgeta. Yes, i gud yumi “lesin long hem.”—Mat. 17:5.

3. ?Jisas i stap tokbaot hu taem hem i se: “Papa, yu fogivim olgeta”?

³ ?Jisas i talem wanem? Taem oli nilim hem long pos, Jisas i prea se: “Papa, yu fogivim olgeta.” ?Fogivim hu? Jisas i gohed i se: “Oli no save samting we oli stap mekem.” (Luk 23:33, 34) I klia se Jisas i stap tokbaot ol soldia blong Rom we oli nilim tufala han mo leg blong hem, from we olgeta oli no save se hem i hu. Maet hem i stap tingbaot sam long ol hip man ya tu we oli stap askem blong hem i ded, we biaen bambae oli bilif long hem. (Wok 2:36-38) Jisas i no wantem letem ol trabol blong hem oli mekem hem i kros long ol man ya. (1 Pita 2:23) Be hem i askem long Jehova blong i fogivim olgeta ya we oli kilim hem i ded.

4. ?Yumi lanem wanem long fasin blong Jisas blong fogivim ol enemi blong hem?

⁴ ?Yumi lanem wanem from? Olsem Jisas, yumi mas  rere blong fogivim ol narafala. (Kol. 3:13) Sam man, maet ol famle blong yumi tu, oli agensem yumi from we oli no kasemsave long bilif blong yumi mo long fasin blong laef blong yumi. Maet oli talem ol giaman tok long saed blong yumi, oli mekem yumi sem long fored blong ol narafala, oli spolem ol buk blong yumi, o maet oli se bambae oli kilim yumi. Be yumi no mas kros long olgeta. I moagud yumi prea long Jehova mo yumi askem blong hem i openem ae blong olgeta, blong oli kasemsave long trutok. (Mat. 5:44, 45) Be samtaem i had blong fogif, speseli sipos oli mekem yumi harem nogud. Be sipos yumi gohed blong stap kros long olgeta, yumi stap spolem yumi nomo. Wan sista i eksplenem se: “Mi mi kasemsave se taem mi fogivim narafala, hemia i no min se mi agri long rong we hem i mekem, o se mi letem hem i spolem mi. Be hem i minim se mi no moa kros long hem.” (Sam 37:8) Taem yumi jusum blong fogivim narafala, yumi stap jusum blong no letem ol trabol oli mekem yumi kros.—Efes. 4:31, 32.

5. ?Jisas i talem wanem promes long man blong brekem loa, mo from wanem hem i mekem olsem?

⁵ ?Jisas i talem wanem? Tu man blong brekem loa tufala i stap hang klosap long hem. Long stat, tufala tu i stap tok strong long hem. (Mat. 27:44) Be biaen, wan long tufala i jenisim tingting blong hem. Hem i kasemsave se Jisas i no mekem “wan samting nating we i rong.” (Luk 23:40, 41) Mo tu, hem i soemaot se hem i bilif we Jisas bambae i laef bakegen, mo wan dei bambae hem i rul olsem wan king. Taswe hem i talem long Sevia se: “Jisas, taem yu go long Kingdom blong yu, yu tingbaot mi.” (Luk 23:42) !Man ya i gat strong bilif! Ale Jisas i ansa long hem se: “Tru mi talem long yu tede, bambae yu stap wetem mi [i no long Kingdom, be] long Paradaes.” (Luk 23:43) I gud blong makem se Jisas i promes stret long man ya, taem hem i yusum ol tok olsem “mi” mo “yu.” Jisas i save se Papa blong hem i gat sore, taswe hem i yusum ol tok we oli givim hop long man ya.—Sam 103:8.

6. ?Yumi lanem wanem long ol tok we Jisas i talem long man blong brekem loa?

⁶ ?Yumi lanem wanem from? Jisas i stret pija blong Papa blong hem. (Hib. 1:3) Jehova i wantem tumas blong fogivim yumi mo sore long yumi. Be blong mekem olsem, yumi mas soem se yumi rili sore from ol rong we yumi bin mekem bifo, mo yumi bilif long sakrefaes blong Jisas Kraes. (1 Jon 1:7) Maet samfala oli no bilif se Jehova i save fogivim ol mastik we oli mekem bifo. Sipos yu tu yu olsem, traem tingbaot samting ya: Bifo we Jisas i ded, hem i sore long wan man blong brekem loa we i jes stat blong bilif. !Hemia i soem se Jehova bambae i sore moa long ol gudfala man blong hem, we oli mekem bes blong olgeta blong obei long ol loa blong hem!—Sam 51:1; 1 Jon 2:1, 2.

7. Folem Jon 19:26, 27, ?Jisas i talem wanem long Meri mo Jon? ?From wanem hem i talem olsem?

⁷ ?Jisas i talem wanem? (Ridim Jon 19:26, 27.) Jisas i stap wari from mama blong hem we i wan wido. Maet ol brata blong hem oli save givim ol samting we mama blong hem i nidim long bodi. ?Be  olsem wanem long ol nid blong hem long spirit? I luk olsem se long taem ya, ol brata blong hem oli no kam disaepol yet. Be Jon i wan gudfala aposol mo i wan gudfala fren blong Jisas. Mo Jisas i luk ol man we oli joenem hem blong wosipim Jehova, se oli famle blong hem long spirit. (Mat. 12:46-50) Jisas i lavem Meri mo i wari from hem, taswe hem i mekem Jon i lukaot long Meri, from hem i save se Jon bambae i givim samting we Meri i nidim long spirit. Hem i talem long mama blong hem se: “!Hemia pikinini blong yu!” Mo long Jon, hem i se: “!Hemia mama blong yu!” Stat long dei ya i go, Jon i kam olsem wan boe blong Meri mo i lukaotgud long hem olsem we hem i mama blong hem. !Jisas i lavem tumas  gudfala woman ya, from we hem i bin lukaotgud long hem taem hem i bon!

8. ?Yumi lanem wanem long ol tok we Jisas i talem long Meri mo Jon?

⁸ ?Yumi lanem wanem from? Fasin joen blong yumi wetem ol brata sista, i strong moa i bitim hemia blong ol stret famle. Maet ol famle blong yumi oli agensem yumi, o oli lego yumi. Be olsem we Jisas i promes, sipos yumi fasgud long Jehova mo oganaesesen blong Hem, bambae yumi kasem ol samting “100 taem antap bakegen,” i bitim we yumi lusum. Plante man bambae oli kam olsem ol gudfala boe, gel, mama, o papa blong yumi. (Mak 10:29, 30) ?Bambae yu yu harem olsem wanem sipos yu pat blong wan famle we oli gat sem bilif, oli lavem Jehova, mo oli lavlavem olgeta?—Kol. 3:14; 1 Pita 2:17.

9. ?Yumi lanem wanem long ol tok blong Jisas long Matiu 27:46?

⁹ ?Jisas i talem wanem? Smoltaem bifo we hem i ded, hem i singaot se: “God blong mi, God blong mi, ?from wanem yu lego mi?” (Mat. 27:46) Baebol i no eksplenem from wanem Jisas i toktok olsem. Be tingbaot samting we yumi save lanem long ol tok ya. Taem Jisas i talem tok ya, hem i stap mekem profet tok blong Ol Sam 22:1 i kamtru. * Mo tu, tok ya i soemaot klia se Jehova i no “pulum fenis i goraon long [Pikinini blong hem] blong protektem hem.” (Job 1:10) Jisas i kasemsave se Papa blong hem i letem hem i kasem traem fulwan, hemia wan samting we i neva hapen long wan man bifo. Mo tu, ol tok ya oli soem se hem i no mekem wan rong nating.

10. ?Yumi lanem wanem long ol tok we Jisas i talem long Papa blong hem?

¹⁰ ?Yumi lanem wanem from? Yumi lanem se yumi no mas ekspektem se Jehova i protektem yumi long ol trabol we oli traem bilif blong yumi. Olsem Jisas, yumi tu yumi mas rere blong pruvum se yumi naf blong fasgud long God go kasem ded. (Mat. 16:24, 25) Be God i promes se bambae hem i no letem wan samting we i strong tumas blong yumi winim, i kam traem yumi. (1 Kor. 10:13) Wan narafala lesen we yumi lanem, hemia se olsem Jisas, maet ol narafala oli mekem yumi safa, nating se yumi no mekem wan rong. (1 Pita 2:19, 20) Ol man oli stap agensem yumi, from we yumi no man blong wol mo yumi talemaot trutok, be i no from we yumi mekem samting we i rong. (Jon 17:14; 1 Pita 4:15, 16) Jisas i kasemsave from wanem Jehova i letem hem i safa. Be sam man blong God oli mekem olsem. Taem oli kasem trabol, oli stap askem se from wanem Jehova i letem samting ya i hapen. (Hab. 1:3) God blong yumi i gat longfala tingting mo i gat sore. Taswe hem i kasemsave se ol man ya oli askem kwestin olsem, i no from we oli no gat bilif, be from we oli nidim we hem i kamfotem olgeta.—2 Kor. 1:3, 4.

11. ?From wanem Jisas i talem ol tok long Jon 19:28?

¹¹ ?Jisas i talem wanem? (Ridim Jon 19:28.) ?From wanem Jisas i se: “Mi tosta”? Hem i mekem olsem “blong mekem  tok blong Baebol i kamtru,” hemia profet tok long Ol Sam 22:15, we i se: “Paoa blong mi i drae olgeta olsem wan pis graonpot. Tang blong mi i fas strong long gam blong mi.” Mo tu, ol man oli mekem Jisas i safa longtaem, mo hem i stap harem nogud bitim mak long pos ya, taswe i sua se hem i tosta tumas. Hem i nidim help blong ol narafala, blong oli givim wota long hem.

12. ?Yumi save lanem wanem long tok ya blong Jisas se “mi tosta”?

¹² ?Yumi lanem wanem from? Jisas i no ting se i rong blong hem i talemaot filing blong hem, yumi tu yumi mas gat sem tingting. Maet yumi gat fasin ya blong no talemaot nid blong yumi long ol narafala. Be sipos wan dei, yumi no moa naf blong mekem evri samting, yumi no mas fraet blong askem help blong ol narafala. Eksampol, sipos yumi kam olfala o yumi sik, yumi save askem wan fren blong i tekem yumi i go long stoa, o go luk wan dokta. Sipos tingting blong yumi i foldaon, yumi save askem wan elda o wan fren we i bigman long spirit blong i lesin long yumi, o i talemaot ol gudfala toktok we “i save mekem [yumi] harem gud bakegen.” (Prov. 12:25) I gud yumi tingbaot se ol brata sista oli lavem yumi, mo oli wantem halpem yumi “long taem blong trabol.” (Prov. 17:17) Be oli no save ol tingting blong yumi. Sipos yumi no toktok long olgeta, bambae oli no save se yumi nidim help.

13. Taem Jisas i holemstrong go kasem ded, ?hem i mekem wanem i kamaot?

¹³ ?Jisas i talem wanem? Samwe tri klok long aftenun blong Nisan 14, Jisas i singaot bigwan se: “!Olgeta samting i finis nao!” (Jon 19:30) Klosap nao bambae Jisas i ded, be hem i finisim olgeta samting we Jehova i wantem hem blong mekem. Taem Jisas i holemstrong go kasem ded, hem i mekem tri samting i kamaot. Faswan, hem i pruvum se Setan i wan man blong giaman. Jisas i soemaot se wan man we i stretgud olgeta i naf blong holemstrong long God, nating se Setan i mekem evri samting blong traem hem. Sekenwan, Jisas i givim laef blong hem olsem wan ransom. Ded blong hem i mekem se ol sinman oli save kam stret man long fes blong God, mo oli save gat hop blong laef olwe. Namba 3, Jisas i leftemap hae rul blong Jehova, mo i tekemaot doti long nem blong Papa blong hem.

14. ?Evri dei yumi mas gat strong tingting blong mekem wanem? Yu eksplenem.

¹⁴ ?Yumi lanem wanem from? Yumi mas gat strong tingting blong holemstrong evri dei. Tingbaot tok blong Brata Maxwell Friend we i wan tija long Gilead Skul. Long wan intenasnal asembli, Brata Friend i givim wan tok long saed blong fasin blong stap tru, mo i se: “Samting we yu save talem o mekem tede, yu mekem. Yu no sua se bae yu stap tumoro. Evri dei, soem long ol fasin blong yu se yu naf blong kasem laef olwe.” !I gud evri dei yumi soem long ol fasin blong yumi se yumi naf blong holemstrong! Nao, nating sipos yumi fesem ded, be yumi naf blong talem se: “!Jehova, mi mi mekem bes blong mi blong holemstrong, blong pruvum se Setan i man blong giaman, mo blong leftemap nem blong yu mo hae rul blong yu!”

15. Folem Luk 23:46, ?Jisas i sua long wanem?

¹⁵ ?Jisas i talem wanem? (Ridim Luk 23:46.) Jisas i trastem Papa blong hem fulwan, nao i talem se: “Papa, mi mi putum spirit blong mi long han blong yu.” Hem i save se fiuja blong hem i stap long han blong Jehova, mo hem i sua se Papa blong hem bambae i rimemba hem.

16. ?Yu lanem wanem long stori blong yangfala ya we i gat 15 yia?

¹⁶ ?Yumi lanem wanem from? Yu mas rere blong putum laef blong yu long han blong Jehova. Blong mekem olsem, yu mas “trastem Jehova long fulhat blong yu.” (Prov. 3:5) Tingbaot eksampol blong Joshua we i gat 15 yia mo i kasem wan sik we bambae i ded from. Hem i no wantem akseptem ol tritmen we i brekem loa blong God. Smoltaem bifo we hem i ded, hem i talem long mama blong hem se: “Mama, mi mi stap long han blong Jehova. . . . Mama, mi talem stret long yu se: Mi save se bae Jehova i mekem mi mi laef bakegen. Hem i save hat blong mi, mo mi mi lavem hem.” * I gud yumi evriwan yumi askem se: ‘Sipos mi fesem wan traem we mi save ded from, ?bambae mi putum laef blong mi long han blong Jehova mo trastem hem se bambae hem i rimemba mi?’

17-18. ?Wanem ol lesen we yumi lanem? (Mo yu luk bokis ya “ Lesen We Yumi Lanem Long Ol Laswan Tok Blong Jisas.”)

¹⁷ !Yumi lanem plante impoten lesen long ol laswan tok blong Jisas! Oli rimaenem yumi se yumi mas fogivim ol narafala mo trastem se Jehova bambae i fogivim yumi. Yumi gat wan nambawan famle blong ol brata sista we oli rere blong halpem yumi, be yumi nao yumi mas faswan blong askem help ya taem yumi nidim. Yumi save se Jehova bambae i halpem yumi blong stanap strong long eni traem we yumi save kasem. Mo yumi luk se i impoten we evri dei, yumi soemaot long ol fasin blong yumi se yumi naf blong holemstrong long God, mo yumi trastem se laef blong yumi i stap sefgud long han blong Jehova.

¹⁸ !I tru nomo, ol tok we Jisas i talem taem hem i stap hang long pos, oli gat fulap mining! Sipos yumi mekem ol lesen ya oli wok long laef blong yumi, hemia i olsem we yumi stap obei long Jehova we i talem long saed blong Pikinini blong hem se: “Lesin long hem.”—Mat. 17:5.