1-2. Aha do na masa bani tanggal 14 Nisan 33 M?

BAYANGKON ma aha na masa bani tanggal 14 Nisan 33 M. Dobkonsi ituduh Jesus mangkorjahon hajahaton, iejek ma ia janah igantung bani sada hayu. Ipakuhon ma tangan pakon naheini bani hayu ai. Sanggah ai, marhosah pe domma borit pangahapni, tarlobih ma laho marsahap. Hassi pe sonai, marusaha do ia marsahap halani dong na ponting na laho ihatahon ia.

² Sonaha hita boi ‘manangihon’ Jesus? Ulas hita ma aha na ihatahon Jesus paima matei ia, anjaha parlajaran aha do na boi dapot hita hunjai.​—Mat. 17:5.

3. Sanggah ihatahon Jesus, “Ham Bapa, marpangulaki ma uhur-Mu”, ise do na itonggohon Jesus?

³ Aha do na ihatahon Jesus? Sanggah igantung bani sada hayu, martonggo ma Jesus sonon, “Ham Bapa, marpangulaki ma uhur-Mu.” Bani ise ma ipindo Jesus ase marpangulaki uhur ni Bapani? Ibotoh hita do balosni ai anggo ipardiateihon hita aha na ihatahon ia use. Nini do, “Ai seng ibotoh sidea na binahenni ai!” (Luk. 23:33, 34) Jadi, ra do na imaksud Jesus sanggah ai marpangulaki uhur ni Jahowa bani tentara Rom na mamakuhonsi halani lang ibotoh sidea ise do Jesus sasintongni. Ra do homa na imaksud Jesus piga-piga halak na mangindo ase ia ibunuh, hape i pudian ni ari ra do adong sidea na porsaya hu bani. (Lah. 2:36-38) Age pe jahat tumang pambahenan ni sidea, lang ra Jesus mardomdom. (1 Ptr. 2:23) Tapi martonggo do ia ase isalpuhon Jahowa hasalahan ni sidea.

4. Isalpuhon Jesus do hasalahan ni halak na jahat bani. Aha ma parlajaranni hubanta?

 ⁴ Aha ma parlajaranni hubanta? Songon Jesus, maningon ra ma hita manasap hasalahan ni halak. (Kol. 3:13) Ra do adong halak atap pe kaluarganta na marsogam ni uhur banta halani haporsayaonta. Halani ai, gabe ipasambor-sambor ma hita janah iparmaila i lobei ni halak. Ra do homa itutung sidea buku-bukunta, atap ibogbogi sidea hita. Ulang ma hita mardomdom halani ai. Tapi, martonggo ma bani Jahowa ase ibuka uhurni janah ra sidea manjalo hasintongan i pudian ni ari. (Mat. 5:44, 45) Sipata, ra do lang urah iahap hita manasap hasalahan ni sidea halani domma jahat tumang pambahenan ni sidea hubanta. Tapi, anggo lalab borit uhurta, hita do holi na sunsah. Dong sada botou na mangkatahon, “Sanggah isasap hita hasalahan ni halak, sedo artini setuju hita bani pambahenan ni sidea na jahat ai. Tapi artini ipilih hita do lang lalab idingat-dingat hita pambahenan ni sidea ai.” (Ps. 37:8) Jadi, anggo ra hita manasap hasalahan ni halak, on patuduhkon lang ra hita lalab marborit ni uhur.​—Ep. 4:31, 32.

5. Aha ma na ijanjihon Jesus bani parjahat na i lambungni, janah mase ibahen ia janji ai?

⁵ Aha do na ihatahon Jesus? Dong dua parjahat na ipakuhon rap pakon Jesus. Mungkahni, iejek sidea do Jesus. (Mat. 27:44) Tapi, dong ma sada na lang ra be mangejeksi halani gabe ibotoh ia ma “seng dong ihorjahon [Jesus] na so patut”. (Luk. 23:40, 41) Leganni ai, gabe porsaya do ia ipapuho do holi Jesus janah mamarentah gabe raja bani ari simagira. Jadi nini ma, “Ham Jesus, ingat ham ma ahu anggo das ma ham bani Harajaonmu.” (Luk. 23:42) Banggal tumang do haporsayaon ni parjahat ai! Halani ai ihatahon Jesus ma bani, “Sintong do hatangkon bam sadari on, rap pakon ahu ma ho [sedo i Harajaon ni Naibata, tapi] i Paradeiso!” (Luk. 23:43) Pardiateihon ma, sanggah Jesus mambahen janji ai ihatahon ia do “ahu” pakon “ho”. On patuduhkon hubani parjahat ai do langsung Jesus marjanji. Ibahen Jesus janji ai halani mambotoh paridop ni uhur do Bapani.​—Ps. 103:8.

6. Aha ma na boi iparlajari hita humbani na ihatahon Jesus bani parjahat ai?

⁶ Aha ma parlajaranni hubanta? Itiru Jesus do Bapani. (Heb. 1:3) Maidop do uhur ni Jahowa hubanta janah ra do Ia manalpuhon hasalahanta. Tapi maningon isolsoli hita do hasalahanta janah porsaya hita bani tobusan ni Jesus. (1 Joh. 1:7) Ra do adong na mangahap lang ra Jahowa manasap hasalahan na ongga ibahen ia hinan. Anggo sonai do homa pangahapmu, dingat ma paima matei Jesus, ipatuduh ia do idop ni uhurni hubani sahalak parjahat na baru pe porsaya hu bani. Tontu maridop ni uhur ma homa Jahowa hubani juakjuak-Ni na ongga mambahen hasalahan hinan, tapi domma marusaha ia mambahen na sidearan laho mandalankon parentah-Ni.​—Ps. 51:3; 1 Joh. 2:1, 2.

7. Domu bani Johannes 19:26, 27, aha do na ihatahon Jesus hubani si Maria pakon si Johannes, janah mase ihatahon ia sonai?

⁷ Aha do na ihatahon Jesus? (Basa Johannes 19:26, 27.) Parduli tumang do Jesus bani inangni. Ra, domma mabalu si Maria sanggah ai. Sasintongni dong  do anggi ni Jesus na boi mansarihon haporluan ni si Maria, inangni ai. Tapi ise ma holi na mangurupi ia ase totap dohor hubani Jahowa? Sanggah ai, ra do lape adong anggini na gabe susianni. Halani ai iondoskon ia ma inangni hubani si Johannes, susian haholongan ni uhurni. Ise pe na mangkorjahon harosuh ni Jahowa, ai do na gabe sanina botou ni Jesus. (Mat. 12:46-50) Pos uhurni boi do si Johannes mangurup inangni ase totap dohor bani Jahowa. Jadi ihatahon ma bani si Maria, “Andin ma Inang, anakmu!” Anjaha nini ma hubani si Johannes, “Andin ma inangmu!” Humbani ari ai, songon anakni ma iahap si Maria si Johannes. Janah si Johannes pe isarihon do si Maria, songon inangni sandiri. Hunjon taridah ma holong  tumang do uhur ni Jesus hubani si Maria na manubuhkonsi janah na mangkasomani ia ronsi matei.

8. Aha ma na boi iparlajari hita humbani na ihatahon Jesus hubani si Maria pakon si Johannes?

⁸ Aha ma parlajaranni hubanta? Orotan do parhasomananta pakon sanina botou marimbangkon hade-hadenta. Ra do adong hade-hade na marsogam ni uhur banta atap pe manadingkon hita. Tapi, domma marjanji Jesus, barang ise pe na totap setia hubani Jahowa pakon organisasi-Ni, “lompit saratus” do holi jaloonni pasu-pasu. Bahat do sanina botou na songon anak, boru, inang, pakon bapa hubanta. (Mrk. 10:29, 30) Jadi sonaha ma pangahapmu boi gabe sakaluarga pakon sanina botou na marsihaholongan janah rap mangidangi Jahowa?​—Kol. 3:14; 1 Ptr. 2:17.

9. Aha ma na boi ibotoh hita humbani na ihatahon Jesus na isurat bani Mateus 27:46?

⁹ Aha do na ihatahon Jesus? Lang piga dokah paima matei ia, ihatahon Jesus ma sonon, “Ale Naibatangku, Naibatangku, mase ma itadingkon Ham ahu?” (Mat. 27:46) Lang dong ipatugah bani Bibel mase sonai ihatahon Jesus. Tapi, domu do ai bani panjahaion na isurat bani Psalmen 22:2. * Janah, humbani hatani ai gabe ibotoh hita ma lang “iramotkon” atap ilinggomi Jahowa Anak-Ni sanggah ai. (Job 1:10) Ibotoh Jesus ipaturut Bapani do ia manaron hamarsikon ronsi matei ibahen munsuhni. Lang adong na ongga mangahapkon hamarsikon na sisonai. Leganni ai, tangkas ma sedo halani mangkorjahon na jahat ia matei.

10. Aha do na iparlajari hita humbani na ihatahon Jesus bani Bapani?

¹⁰ Aha ma parlajaranni hubanta? Ulang ma mangarap ase Jahowa manlinggomi hita sanggah iuji haporsayaonta. Songon Jesus, maningon totap ma hita setia bani Jahowa age pe maningon matei hita halani ai. (Mat. 16:24, 25) Tapi pos ma uhurta seng ipaturut Ia hita ilajou lobih humbani na tartaron hita. (1 Kor. 10:13) Leganni ai, songon Jesus ra do hita manaron hasunsahan sedo halani lepak pambahenanta. (1 Ptr. 2:19, 20) Bahat do halak marsogam ni uhur banta halani seng hun dunia on hita, janah halani ibaritahon hita hasintongan. (Joh. 17:14; 1 Ptr. 4:15, 16) Anggo Jesus, iarusi ia do mase ipaturut Jahowa ia marsitaronon. Tapi ra do adong hasomanta sanggah marsitaronon ia, sipata sungkun-sungkun do ibagas uhurni, ‘Mase ma ipaturut Jahowa masa sisonon bangku?’ (Hab. 1:3) Age pe sonai, sabar do Jahowa anjaha maidop do uhur-Ni anggo adong juakjuak-Ni na mangahap sisonai. Halani ai, ipasirsir Ia do apoh-apoh laho patoguhkon uhur ni sidea.​—2 Kor. 1:3, 4.

11. Mase ma ihatahon Jesus horahan ia? (Johannes 19:28)

¹¹ Aha do na ihatahon Jesus? (Basa Johannes 19:28.) Dob ai, ihatahon Jesus ma, “Horahan ahu!” Mase ma ihatahon Jesus sonai? Ihatahon ia pe sonai “ase jumpah na tarsurat” bani Psalmen 22:16. Ijai ihatahon, “Horah do tolonanku songon sanga-sanga, anjaha dilahku longkot do bani langit-langitku.” Tontu horahan ma ia halani marsik tumang sitarononni  janah borit pangahapni sanggah igantung bani hayu ai. Jadi porlu do ia iurupi ase malum horahni ai.

12. Aha ma na boi iparlajari hita sanggah ihatahon Jesus “horahan ahu”?

¹² Aha ma parlajaranni hubanta? Lang iahap Jesus galek ia halani ipatugah ia aha na ihaporluhonsi. Maningon sonai ma homa hita. Ra do lang marosuh hita anggo gati mangindo pangurupion. Tapi sipata ra do maningon iurupi hasoman hita. Halani ai, ulang malang uhurta mangindo pangurupion. Umpamani, anggo domma matua hita atap borit-boritan, pindo ma ase dong sanina botou na mangkasomani sanggah marbalanja atap pe manaruhkon hita hu dokter. Sanggah maretek ni uhur, saritahon ma ai hubani sintua atap sanina botou. Ra do gabe ipatoguh holi uhurta halani ‘parsahap sidea na basar’. (Pod. 12:25) Dingat ma, holong tumang do sanina botou mangidah hita janah sihol do sidea mangurupi hita sanggah “ibagas hasosakan”. (Pod. 17:17) Tapi halani lang ibotoh sidea aha na ibagas uhurta, maningon ipatugah hita ma sonaha pangahapta ase ibotoh sidea sonaha mangurupi hita.

13. Tugas aha ma na idobkon Jesus marhitei hamateanni?

¹³ Aha do na ihatahon Jesus? Bani tanggal 14 Nisan, hira-hira jam tolu botari, ihatahon Jesus ma, “Domma salosei!” (Joh. 19:30) Paima matei, domma ibotoh Jesus ihorjahon ia do ganup na iharosuhkon Jahowa. Marhitei hamateanni dong tolu tugas na ibere Jahowa na idobkon ia. Na parlobei, ibuktihon ia ma parladung do Sibolis ai. Ipatuduh Jesus do anggo manisia na sempurna boi totap setia hubani Jahowa lang soal aha na ibahen Sibolis. Na paduahon, ibere Jesus do hagoluhanni gabe tobusan. Halani ai, gabe boi ma manisia na lang gokan dear marhasoman pakon Naibata anjaha mandapot hagoluhan na sadokah ni dokahni bani ari simagira. Na patoluhon, ipatuduh Jesus ma pitah Jahowa dassa na talup mamarentah anjaha ipapansing ia do homa goran ni Bapani.

14. Aha ma na sihol bahenonta bai ganup ari? Patorang.

¹⁴ Aha ma parlajaranni hubanta? Bai ganup ari maningon marusaha ma hita totap setia bani Jahowa. Pardiateihon ma na ihatahon Sanina Maxwell Friend, na ongga mangidangi gabe instruktur i Sikolah Gilead. Sanggah padaskon ambilan bani kebaktian internasional, nini ma, “Ulang paima ronsi asogod aha na boi ihorjahon ham sonari. Ai ibotoh ham do na manggoluh ope ham asogod? Halani ai, bai ganup ari gunahon ma ai gabe kesempatan laho patuduhkon talup do ham manjalo hagoluhan na sadokah ni dokahni.” Jadi, anggap ma ganup ari kesempatan na parpudi laho patuduhkon anggo hita setia. Porini maningon matei pe hita, gabe boi ma ihatahon hita sonon, “Ham Jahowa, domma marusaha ahu totap setia Bamu. Hubuktihon do parladung Sibolis ai, hupapansing do goran-Mu, janah hupatuduh do pitah Ham dassa na talup mamarentah!”

15. Domu bani Lukas 23:46, aha ma na ihatahon Jesus?

¹⁵ Aha do na ihatahon Jesus? (Basa Lukas 23:46.) Pos do uhur ni Jesus sanggah mangkatahon, “Ham Bapa! Hubagas  tangan-Mu ma huondoskon [goluhku].” Jadi, marondos bani Jahowa do Jesus janah pos uhurni idingat Bapani do ia.

16. Aha ma na boi iparlajari hita humbani sada garama na marumur 15 tahun ?

¹⁶ Aha ma parlajaranni hubanta? Maningon marondos bani Jahowa ma hita. Ase boi ibahen ham sonai, maningon “tenger ma uhurmu bani Jahowa humbani gok ni uhurmu”. (Pod. 3:5) Pardiateihon ma siusihan na ipatuduh hasomanta si Joshua, na marumur 15 tahun. Parah tumang do naboritni. Hassi pe sonai, lang ra ia manjalo partambaran na lang mardomu pakon prinsip ni Bibel. Paima matei ihatahon ia do bani inangni, ‘Nang, huondoskon do goluhku bani Jahowa. Pos do uhurhu isarihon Ia do ahu anjaha papuhoon-Ni do holi ahu. Ibotoh Ia do aha na ibagas uhurhu, janah holong tumang uhurhu Bani.’ * Jadi, porlu do homa irimangi hita sungkun-sungkun on, ‘Porini dong situasi na manguji haporsayaonku, anjaha ra do halani ai maningon matei ahu, huondoskon do goluhku bani Jahowa janah porsaya idingat Ia do holi ahu?’

17-18. Aha ma na domma iparlajari hita? (Tonggor ma kotak “ Na Boi Iparlajari Hita Humbani na Ihatahon Jesus Paima Matei Ia”.)

¹⁷ Bahat tumang do na boi iparlajari hita humbani na ihatahon Jesus paima matei ia. Ipasingat do hita ase ra manasap hasalahan ni hasoman, janah maningon pos do homa uhurta anggo Jahowa pe ra manasap hasalahanta. Malas tumang uhurta halani bahat sanina botou i kuria na sirsir mangurupi hita. Tapi, maningon ra do homa hita mangindo pangurupion bani sidea. Iurupi Jahowa do hita ase martahan ibagas sagala sitarononta. Maningon marusaha do hita ase boi totap setia bani Jahowa bai ganup ari. Porini matei pe hita, papuhoon-Ni do holi hita.

¹⁸ Hassi pe domma bahat na iparlajari hita humbani na ihatahon Jesus, tapi maningon idalankon hita do ai. Anggo ibahen hita sonai, dos do artini domma idalankon hita parentah ni Jahowa tarsingat Anak-Ni. Ia mangkatahon, “Tangihon hanima ma ia.”​—Mat. 17:5.