1-2. Kai si terjadi sope belasken Jesus kata-katana si terakhir?

PAKSA si e tanggal 14 Nisan 33 Masehi. Jesus ituduh ngelakoken kejahaten si la pernah ilakokenna. Kenca si e, itokoh-tokohi ia, isiksa alu kejam, janah ipakuken nahe ras tanna i tiang siksan. Mesui kel akapna tiap erkesah ras ngerana. Tapi arus ia ngerana perban penting kel si man katankenna e.

² Mari sibahas kerna kata-kata Jesus si belaskenna sanga ia nandangi mate i tiang siksan janah kai pelajarenna man banta. Emaka, gundari mari ‘sibegiken ia.’​—Mat. 17:5.

3. Ise maksud Jesus si iampuni sanga katakenna, “O Bapak, ampunilah kalak e”?

³ Kai si ikataken Jesus? Sanga ipakuken ia i tiang siksan, ertoto Jesus, nina, “O Bapak, ampunilah kalak e.” Ise maksudna? Arah kata-kata Jesus seterusna siteh ise maksud Jesus, nina, “La angkana kai si lakokenna.” (Luk. 23:33, 34) Banci saja maksud Jesus tentera Roma si makuken tan ras nahena bas tiang. La tandai kalak e ise situhuna Jesus e. Selain si e, banci saja maksud Jesus eme kalak si ersura-sura gelah ia ibunuh, tapi bas pudi wari erkiniteken man bana. (Perb. 2:36-38) Amin pe la adil perbahanen kalak e man Jesus labo ia merawa ntah pe segat ate Jesus kalak e. (1 Pet. 2:23) Tapi, pindona man Jahwe gelah kalak si munuh ia iampuni.

4. Kai si banci sipelajari arah Jesus si nggit ngampuni kalak si niksa ia?

 ⁴ Kai si banci sipelajari arah kata-kata Jesus? Arus nggit kita ngampuni bali bagi Jesus. (Kol. 3:13) Banci saja lit kalak si nentang kita, termasuk anggota keluargata. Itentang kalak e kita perban la angkaina kinitekenta ras cara geluhta. Banci saja kataken kalak e si la tuhu kerna kita, ipermelakenna kita i lebe-lebe kalak si deban, ikernepkenna publikasita, janah icilakaina kita. Labo segat ateta kalak e, tapi sipindo gelah sampati Jahwe kalak e ngaloken kebenaren. (Mat. 5:44, 45) Mon-mon banci saja mesera siakap ngampuni kalak adi jahat kel perbahanenna man banta. Tapi adi terus kita merawa janah la nggit ngampuni, situhuna e ngerugiken kita. Sekalak turang seninata ngataken, “Sadar aku maka ngampuni labo ertina benar kuakap kai si lakoken kalak man bangku ntah kupediat ilakokenna kai si la mehuli man bangku. Tapi, ngampuni ertina la aku terus merawa man kalak e.” (Ms. 37:8) Jadi adi siampuni kalak, e ertina la kita dendam man bana.​—Ep. 4:31, 32.

5. Kai si ijanjiken Jesus man sekalak penjahat? Janah engkai maka ibanna janji e?

⁵ Kai si ikataken Jesus? Lit dua penjahat si ipakuken i samping Jesus. Tangtangna duana kalak e nokoh-nokohi Jesus. (Mat. 27:44) Tapi dungna, salah sada arah kalak e lanai nokohi Jesus. Sadar ia maka Jesus e “la lit salahna.” (Luk. 23:40, 41) Tek ka ia maka ipekeke pagi Jesus e janah merentah jadi raja. Nina penjahat e man Jesus, “O Jesus, inget min aku sanga kam masuk ku Kerajanndu.” (Luk. 23:42) Mbelin kel kiniteken dilaki e! Nina Jesus ngaloi ia, “Situhuna kukataken man bandu wari enda: Kam ras aku [labo bas Kerajan, tapi] i Pardis pagi.” (Luk. 23:43) Cuba perdiateken kata-kata Jesus sanga erjanji ia man penjahat e. Igunakenna kata “aku” ras “kam.” Banci Jesus erjanji man penjahat e perban itehna Bapakna perkuah.​—Ms. 103:8.

6. Kai si banci sipelajari arah kata-kata Jesus man sekalak penjahat?

⁶ Kai si banci sipelajari arah kata-kata Jesus? Jesus e bali kel bagi Bapakna. (Heb. 1:3) Mekuah ate Jahwe kita janah merhat kel Ia ngampuni kita adi tuhu-tuhu kita robah janah lanai siulihi kesalahenta. Selain si e, perlu ka kita erkiniteken man korban tebusen Jesus Kristus. (1 Joh. 1:7) Tapi banci saja lit kalak si erpengakap maka labo mungkin iampuni Jahwe kesalahenna si mbarenda. Adi sempat bage perasanndu, ukurilah enda: Sope Jesus mate, icidahkenna perkuah atena man sekalak penjahat si edenga erkiniteken. Pasti ndauh belinen perkuah ate Jahwe man umatNa si setia si ndalanken perentah-perentahNa asa ngasupna.​—Ms. 51:1; 1 Joh. 2:1, 2.

7. Menurut Johanes 19:26, 27, kai nina Jesus man Maria ras man Johanes? Engkai maka bage nina?

⁷ Kai si ikataken Jesus? (Baca Johanes 19:26, 27.) Keleng ate Jesus mamakna janah ermediate kel ia man mamakna si banci saja paksa si e enggo janda. Situhuna agi-agina banci nge ncukupi keperlun mamakna e. Tapi perban paksa si e kalak e lenga jadi muridna,  ise kari si nampati mamakna gelah terus setia ngelayani Jahwe? Lit sekalak rasul Jesus si setia si gelarna Johanes janah ia salah sada teman Jesus si rembakna. Ianggap Jesus kalak si nembah Jahwe radu ras ia bali bagi keluargana. (Mat. 12:46-50) Emaka, isuruhna Johanes ngurus mamakna. Tek ia maka pasti isampati Johanes kari mamakna e gelah terus ngelayani Jahwe. Emaka bagenda nina man mamakna, “Gundari nari ia me anakndu.” Janah man Johanes bagenda nina, “Gundari nari, ia me mamakndu.” Mulai bas wari e, Johanes bali bagi anak Maria janah urusna Maria bali bagi ngurus mamakna. Keleng kel ate Jesus diberu  e, si enggo ngurus ia kitik-kitik nari janah gundari diberu e cinder i deherna sanga ia nandangi mate.

8. Kai si banci sipelajari arah kata-kata Jesus man Maria ras Johanes?

⁸ Kai si banci sipelajari arah kata-kata Jesus? Banci saja rembaken kita ras turang seninata asangken ras anggota keluargata. Anggota keluargata banci saja nentang kita ntah pe nadingken kita. Tapi bagi si ijanjiken Jesus, adi tetap kita rembak ras Jahwe bage pe organisasiNa, banci sidat “100 kali terbuen” asangken kai si enggo sitadingken. Turang seninata banci bagi anak, mamak, ntah pe bapak si perkeleng man banta. (Mrk. 10:29, 30) Kita kerina banci ipersada jadi keluarga secara rohani perban tek kita man Jahwe, keleng ateta Ia, janah keleng ateta kalak si deban.​—Kol. 3:14; 1 Pet. 2:17.

9. Kai si banci sipelajari arah kata-kata Jesus si lit bas Matius 27:46?

⁹ Kai si ikataken Jesus? La ndekah sope ia mate, serko ia, nina, “O Dibataku, o Dibataku, engkai maka tadingkenNdu aku?” (Mat. 27:46) La lit ijelasken bas Pustaka engkai maka bage nina Jesus. Tapi, cuba ukuri kai si banci sipelajari arah kata-katana e. Salah sadana, kata-katana e erban nubuat si lit bas Masmur 22:1 terjadi. * Selain si e, arah kata-katana e siteh maka labo lalap ‘lindungi’ Jahwe anakNa. (Jop 1:10) Iteh Jesus maka enggo ibereken Bapakna ia ku tan musuh-musuhna. Alu bage banci tuhu-tuhu iuji kalak e kinitekenna seh asa mate. La lit manusia si iuji bagi Jesus beratna. Arah kata-katana e ka teridah maka la lit kejahaten si ilakokenna si erban ia patut mate.

10. Pelajaren kai si banci sidat arah kata-kata Jesus man Bapakna?

¹⁰ Kai si banci sipelajari arah kata-kata Jesus? Banci jadi la ilindungi Jahwe kita arah tentangen si nguji kinitekenta. Bali bagi Jesus si iuji seh ngasa mate, kita pe perlu terus ersikap guna mbuktiken kinitekenta janah la kita mbiar mate. (Mat. 16:24, 25) Tapi, tek kita maka labo ipediat Dibata kita iuji lebih asa ngasupta. (1 Kor. 10:13) Selain si e bali bagi Jesus, banci jadi sinanami kiniseran labo perban silakoken kesalahen. (1 Pet. 2:19, 20) La mehuli perbahanen kalak man banta labo perban enggo silakoken kai si salah, tapi perban la kita nggit jadi bagin doni enda ras perban siberitaken kebenaren. (Joh. 17:14; 1 Pet. 4:15, 16) Iteh Jesus engkai maka ipediat Jahwe inanamina kiniseran. Tapi kalak Kristen si setia mon-mon tersungkun-sungkun ia engkai maka ipediat Jahwe inanamina kiniseran. (Hab. 1:3) Bapakta si perkuah ras sabar itehNa maka labo perban kurang kiniteken kalak e maka bage perasanna. Kalak e perlu iapuli janah Jahwe ngenca si banci ngapulisa.​—2 Kor. 1:3, 4.

11. Engkai maka ibelasken Jesus kata-kata si icatat bas Johanes 19:28?

¹¹ Kai si ikataken Jesus? (Baca Johanes 19:28.) Engkai maka ikataken Jesus “muas aku”? Perban “alu bage, terjadi  kai si tertulis bas ayat e.” Ayat si apai? Ayat bas Masmur 22:15, si ngataken, “Gegehku enggo kerah bagi pecahen kudin taneh. Dilahku enggo leket ku kalah-kalahku.” Selain si e, perban kerina kiniseran si inanami Jesus, termasuk uga suina akapna bas tiang siksan, pasti muas kel ia. Emaka perlu ia penampat kalak guna mere ia minem.

12. Kai si banci sipelajari arah kata-kata Jesus sanga ikatakenna “muas aku”?

¹² Kai si banci sipelajari arah kata-kata Jesus? Labo salah iakap Jesus nuriken perasanna. Emaka kita pe arus ka situriken perasanta. Banci saja jarang situriken man kalak si deban kai keperlunta. Tapi adi perlu kita penampat, ula kita sangsi mindo penampat kalak si deban. Contohna, adi kita enggo metua janah kurang sehat, banci sipindo penampat kalak guna nemani kita belanja ntah ku dokter. Adi kitik ukurta, banci saja perlu kita teman ngerana guna mbegiken kita. Emaka turikenlah kerna si e man pertua ntah pe man turang senina si paguh kinitekenna gelah ipesehna “ranan si mehuli” guna mpegegehi kita. (Kua. 12:25) Ingetlah, maka keleng ate turang seninata kita janah merhat ia nampati kita “sanga lit kesusahen.” (Kua. 17:17) Tapi adi la sikataken labo teh kalak e. Emaka sikatakenlah adi perlu kita penampat.

13. Kai saja si berhasil ilakoken Jesus perban terus ia setia seh ngasa mate?

¹³ Kai si ikataken Jesus? Kira-kira jam telu karaben tanggal 14 Nisan, serko Jesus, nina, “Enggo dung!” (Joh. 19:30) Arah kata-kata Jesus e teridah maka iteh Jesus enggo ilakokenna kerina si isuruh Bapakna sope ia mate. Alu tetap setia seh asa mate, lit piga-piga si berhasil ilakokenna. Pertama, ibuktikenna maka Setan e perbual. Ibuktikenna maka manusia si sempurna banci tetap setia la soal kai pe si ilakoken Setan. Si peduaken, ibereken Jesus kegeluhenna jadi tebusen. Perban enggo ikorbankenna geluhna, manusia si la sempurna banci rembak ras Dibata janah dat arapen kegeluhen si rasa lalap. Si peteluken, ipebadia Jesus gelar Bapakna janah ibuktikenna maka Bapakna ngenca penguasa si benar.

14. Kai nge si arus siusahaken tiap wari? Jelasken.

¹⁴ Kai si banci sipelajari arah kata-kata Jesus? Arus siusahaken asa ngasupta gelah tetap setia tiap wari. Cuba ukuri kai si kataken Maxwell Friend si pernah jadi sekalak instruktur Sekolah Alkitab Gilead Menara Pengawal. Bas sada khotbahna i kebaktin internasional, ijelaskenna kerna kesetian, nina, “Kai pe si atendu ilakokenndu ras ikatakenndu gundari, kataken ras lakokenlah. Ula timai wari si pepagi. Tek nge kam maka nggeluh denga kam pagi? Banlah tempa-tempa tiap wari eme wari terakhirndu guna mbuktiken maka metunggung kam ndatken kegeluhen si rasa lalap.” Mbera siban tiap wari tempa-tempa jadi wari terakhirta guna mbuktiken maka kita tetap setia! Alu bage, bicara arus pe kita mate, banci bagenda ninta, “O Jahwe, enggo kulakoken asa ngasupku gelah tetap setia, enggo kubuktiken maka Setan e perbual, enggo kupebadiaken gelarNdu, janah enggo kudukung hakNdu guna merentah!”

15. Menurut Lukas 23:46, Jesus tek nandangi kai?

¹⁵ Kai si ikataken Jesus? (Baca Lukas 23:46.) Alu kiniteken si paguh bagenda nina Jesus man Bapakna, “O Bapak, kubereken geluhku ku tanNdu.” Iteh Jesus maka banci ipegeluh Bapakna ia mulihi janah tek kel ia maka pasti inget Bapakna ia.

16. Kai nge si banci ipelajarindu arah pengalamen sekalak Saksi Jahwe si umurna 15 tahun?

¹⁶ Kai si banci sipelajari arah kata-kata Jesus? Tetaplah setia man Jahwe amin pe terancam kegeluhenndu. Gelah banci kam setia, “teklah man Jahwe alu bulat ukurndu.” (Kua. 3:5) Cuba ukuri pengalamen Joshua, sekalak Saksi Jahwe si umurna 15 tahun janah mekelek kel pinakitna. La ia nggit ngaloken perawaten kesehaten si ngelanggar undang-undang Dibata. La ndekah sope ia mate, bagenda nina man mamakna, “Mak, tek kel aku pasti ijaga Jahwe aku. . . . Banci bagenda ningku perban kuteh pasti ipekeke Jahwe aku pagi. ItehNa isi pusuhku janah keleng kel ateku Ia.” * Emaka, siukurilah penungkunen enda, ‘Adi iuji aku alu kai si banci erban aku mate, tetap nge aku setia man Jahwe janah tek aku maka pasti ingetNa aku?’

17-18. Kai saja si enggo sipelajari? (Nen ka kotak “ Kai si Banci Sipelajari arah Kata-Kata Jesus si Terakhir?”)

¹⁷ Melala pelajaren si penting si banci sidat arah kata-kata terakhir si ibelasken Jesus! Iingetken kita gelah siampuni kalak si deban janah pasti ampuni Jahwe kita. Selain si e, siteh maka lit turang seninata bas runggun si nggit nampati kita. Tapi gelah banci isampati kalak e kita, arus sikataken maka perlu kita penampat. Siteh maka pasti isampati Jahwe kita gelah tetap setia sanga ngadapi masalah kai pe. Penting ka kel gelah sianggap tiap wari tempa-tempa kesempaten terakhirta guna mbuktiken kesetianta, janah tek kita maka pasti ipekeke Jahwe kita amin pe kita mate.

¹⁸ Melala si banci sipelajari arah kata-kata si ibelasken Jesus sanga ia nandangi mate bas tiang siksan. Adi sidalanken kerina pelajaren e, sipatuhi me kata-kata Jahwe guna megiken Jesus.​—Mat. 17:5.