Kele vôm ô ne lañe de

Kele tep

ASU AYÉ’É 15

Mame Yésus a nga jô éyoñ a mbe a tyele élé mintaé yôp

Mame Yésus a nga jô éyoñ a mbe a tyele élé mintaé yôp

“Nyina a ne Mone wom ma nye’e, ma yene nye mvaé; vô’ôla’ane nye.”​—MT. 17:5

JIA 17 “Ma kañese”

ÔBALEBAS *

1-2. Jé be nga bo Yésus ôsusua na ba tyelé nye élé mintaé yôp?

BI NE mbu 33 ya É.J., Ngone Nisan é too melu 14. Éyoñ be maneya bôte nye ajô na a nga bo mbia be mam, besiñe be Yésus ba kpwe’ele nye, be wo’o nye ébôm, éyoñ éte nje ba su’ulane bômôlô nye mesene mo a mebo, a tyelé nye élé mintaé yôp. Yésus a mbe a wô’ô mintaé éyoñ ése a mbe a vebe’e nge ke kobô. Ve a mbe a yiane kobô, amu a mbe a bili abui mame ya jô.

2 Bi tame zu la’ase mame Yésus a nga jô éyoñ a mbe a tyele élé mintaé yôp, a miñye’elane bi ne nyoñ été. Nalé a tinane na bia zu tame ‘vô’ôlô nye.’​—Mt. 17:5.

“A TAT, JAMÉ’É BE”

3. Beza mbe ñhe Yésus a mbe a jô’ô be éyoñ a nga jô na: “A Tat, jamé’é be”?

3 Jé Yesus a nga jô? Éyoñ a mbe a tyele élé mintaé, Yésus a nga ye’elane Zambe a jô na: “A Tat, jamé’é be.” Beza mbe Yésus a mbe a yi na Ésaa wé a jamé? Mame Yésus a nga jô mvuse ya valé ma volô bia na bi yeme beza a mbe a jô’ô be: “Be nji yeme jam ba bo.” (Luc 23:33, 34) Yésus a mbe a yiane kômbô kobô ajô Beromain be nga bômôlô nye mesene mo a mebo. Be nji be be kôme’e yeme za a né. Éko éziñ a mbe fe a simesa’ane bôte béziñ be nga yemete bijôé na bi wôé nye, ve mvuse ya valé be mbe na ba su’ulane bo beyé’é bé. (Mam. 2:36-38) Yésus a nji kañese na ékotekote bôte be nga bo nye é soo nye ziñ nlem, nge ke bo na a bo éyôé. (1 P. 2:23) Ve a nga sili Yéhôva na a jamé be.

4. Nkômbane Yésus ya jamé bôte bevok wo ye’ele bia jé?

4 Jé jame Yésus a nga jô da ye’ele bia? Aval ane Yésus, bia fe bia yiane jamé bôte bevok a nlem ôse. (Beco. 3:13) Bôt béziñ, to’o bivuvuman biangan, ba tibili bia amu ba yeme ki amu jé bia kañe Zambe, nge ke amu jé bia bo mam méziñ. Be ne laane minsos ajô dangan, be ne samele bia, be ne nyabe bekalate bangan, nge ke si’ili bia na bé bo bia mbia jam. A lôte na bi ba’ale ziñ nlem, bi ne ye’elane Yéhôva na a kui be mis, nde’ete be ne yeme benya mejôô. (Mt. 5:44, 45) Biyoñ biziñ bi ne yen ayaé ya jamé bôte bevok, e dañedañ ba be nga tibili bia abui. Ve nge bi jô’é na ziñ é tabe bia nlem, bia bo biabebien abé. Sita éziñ a nga jô na: “Me nga yene na e jamé bôte bevok, a nji tinane na mam ba bo ma me ne mvo’é, nge ke na me ne ñwôwoñ. A ne fo’o ve na, ma kômbô vaa ziñ nleme wom.” (Bs. 37:8) Éyoñe bia nyoñ ntyi’ane ya jamé bôte bevok, bia liti na bi nji ve’ele kañese na mbia be mam ba kui bia me soo bia ziñ nlem, nge ke bo na bi bo éyôé.​—Beép. 4:31, 32.

“BIA WO BIA YE TABE PARADIS”

5. Ngaka’a fé Yésus a nga bo môt a mbe a tyele élé mintaé fefele jé, a amu jé a nga bo nye ngaka’a éte?

5 Jé Yésus a nga jô? Be nga tyelé Yésus élé mintaé yôp a mimbô’ô mibaé mife. Nde bebaane be nga taté na ba kpwe’ele nye. (Mt. 27:44) Ve mvuse ya valé, wua ya be be a nga tyendé ôsimesane wé. A nga su’ulane yene na Yésus “a nji bo jam [e ne] abé.” (Luc 23:40, 41) A nga liti fe na a to ndi na Yésus é wômô miñwuan, a na é bo Njôô môs éziñ. A nga jô Yésus na: “Ô simesa’ane ma éyoñ wo ye kui ayoñe dôé [nge ke Éjôé jôé].” (Luc 23:42) Môt ate a nga liti fo’o na a bili ngule mbunan. Ane Yésus a nga jô nye na: “Ma bele fo’o ane ma jô wo dene na, bia wo bia ye tabe [sa ke Éjôé Zambe, ve] paradis.” (Luc 23:43, nwt) Yésus a nga belane bifia “ma” a “wo” asu na a liti na ngaka’a éte é mbe é fombô’ô mot ate, sake bôte bese be mbe valé. Yésus a nga bo nye ngaka’a éte amu a mbe a yeme’e na Ésaa wé a ne mvam abui.​—Bs. 103:8.

6. Jé jame Yésus a nga jô mone mimbô’ éziñ da ye’ele bia?

6 Jé jame Yésus a nga jô da ye’ele bia? Yésus a nga vu Ésaa wé mimfa’a mise. (Beh. 1:3) Yéhôva é jamé bia a mvamane bia, nge bia sili nye njaman asu mam abé bi nga bo melu mvus, a nge bi too ndi na metyi me Mone wé ma kôté bia. (1 Jean 1:7) Bôt béziñ ba yen ayaé ya buni na Yéhôva a ne jamé mam abé be nga bo melu mvus. Nge wo fe ô wô’ô simesane nalé biyon biziñ, tame fas ajô di: Mon éyoñ ôsusua na a wu, Yésus a nga mvamane mone mimbôk a mbe a ndeme taté na liti mbunan. Ngumane ke bia! Ke Yéhôva é dañe mvamane bebo bisaé bé amu ba bibane môs ane môs na be bo nye mewôk!​—Bs. 51:1; 1 Jean 2:1, 2.

“TAME YENE NYO MONE! . . . TAME YENE NYUA!”

7. Bela’ane Jean 19:26, 27 asu na ô ngôné mam Yésus a nga kate Marie ba Jean, a amu jé a nga jô nalé.

7 Jé Yésus a nga jô? (Lañe’e Jean 19:26, 27.) Yésus a mbe a yi na a toñe nyia wé, amu éko éziñ a mbe nkus éyoñ éte. Bobeñyan bé be mbe ve toñe nye mfa’a ya minsôn. Za ke a mbe ve toñe nye mfa’a ya nsisim? Teke jam éziñ da liti na bobenyañ bé be mbe be nto beyé’é bé éyoñ éte. Ve Jean nye a mbe nlômane wé, a mbamba mvôé wé. Yésus a mbe a yene’e ba bese ba kañe Yéhôva ane bobenyañ bé ya nsisim. (Mt. 12:46-50) Yésus a mbe a nye’e nyia wé nya abuii. A mbe fe a yi na nyia wé a ke ôsu a kañe Yéhôva. Ajô te a nga jô Jean na a ba’ale nyia wé, amu a mbe a yeme’e na Jean é volô nye na a ke ôsu a bo Yéhôva ésaé. Yésus a nga kate nyia wé na: “Tame yene nyo mon.” A kate ke Jean na: “Tame yene nyua.” Ataté môs ôte, Jean a nga nyoñe Marie ane nyia wé. Yésus a nga liti fo’o na a nyan édima minga é nga nyoñe nye ngab ataté éyoñ a nga bialé akekui awu.

8. Jé jame Yésus a nga kate Marie ba Jean da ye’ele bia?

8 Jé jame Yésus a nga jô da ye’ele bia? Élat bi bili a bobejañ a besita é ne bo ngul a lôt élat bi bili a bivuvuman biangan. Bivuvuman biangan bi ne tibili bia, nge ke lume bia mvus. Ve Yésus a nga ka’ale bia na, nge bi kele ôsu a wulu ba’aba’a a Yéhôva a ékôane jé, bii bi bon, benyia, a beésa biyoñ “ntet.” (Marc 10:29, 30) Wo wô’ôtan aya éyoñe wo simesane na ô bili beta ékôane bobejañ a besita be ne nlatan amu ba nye’e Yéhôva, be bili ngule mbunan, a ba nye’esan?​—Beco. 3:14; 1 P. 2:17.

“A ZAMBE WOM, Ô LI’IYA MA AMU JÉ?”

9. Jé jame Yésus a nga jô Matthieu 27:46 da ye’ele bia?

9 Jé Yésus a nga jô? Mon éyoñ ôsusua na a wu, Yésus a nga loone Ésaa wé a jô’ô na: “[A] Zambe wom, [A] Zambe wom, ô li’iya ma [amu] jé?” (Mt. 27:46) Bible a nji bia kate amu jé Yésus a nga jô nalé. Jé mejô mete ma ye’ele bia? Jam ôsu e ne na, mejô mete me nga tôé nkulan ajô bia koone wô Besam 22:1. * Ma liti fe ne fômelé na Yéhôva a nji futi beta “nka’ale” wo bômane Mone wé asu na minjuk mi bo teke kui nye. (Job 1:10) Yésus a mbe a yeme’e na Ésaa wé a nga jô’é na besiñe bé be tibili nye akekui awu. Môt mfe a ngenane teke tame tôban avale minjuk Yésus a nga tôbane de. Mejô mete ma bo’olô fe na, Yésus a nji bo jam éziñ da yian awu.

10. Jé jame Yésus a nga jô Ésaa wé da ye’ele bia?

10 Jé jame Yésus a nga jô da ye’ele bia? Jam ôsu, bi nji yiane simesane na Yéhôva é kamane na mbunan wongan ô tebe meve’ele été. Aval ane Yésus a nga jibi meve’ele akekui awu, bia fe bia yiane bo nkômesane ya kamane mbunan wongan, to’o awu e ne bia bebé. (Mt. 16:24, 25) Ve bi ne tabe ndi na Zambe a ye ke ve’ele kañese na meve’ele me dañ abim bi ne ngule ya jibi. (1 Bec. 10:13) Jam afe bi ne yé’é e ne na, bôt be ne tibili bia a too ke na bi nji bo jam e ne abé. (1 P. 2:19, 20) Bôte ba wosane ke bia amu bi ne mbia be bôt, a ne fo’o ve amu bi nji nyoñe ngap a mame ya émo ji, a amu bia kañete benya mejôô. (Jean 17:14; 1 P. 4:15, 16) Yésus a mbe a yeme’e amu jé Yéhôva a nga jô’é na a tôbane meve’ele. Ve bebo bisaé be Yéhôva béziñ be nji be be wô’ô amu jé Yéhôha a jô’é na mbia be mam be kui be. (Hab. 1:3) Éyoñe nalé a kui, mvame Zambe a ôjibi wé bia bo na a bo teke a tyi’i bebo bisaé bé ajô na be nji beta bi mbunan, ve a yeme na ba sili mvolan minlem wo so be nye.​—2 Bec. 1:3, 4.

“MA WÔ’Ô ÉVÉ”

11. Amu jé Yésus a nga jô mejô bia koone me Jean 19:28?

11 Jé Yésus a nga jô? (Lañe’e Jean 19:28.) Amu jé Yésus a nga jô na: “Ma wô’ô évé”? A mbe asu na a tôé “mejô me ne ntilane Kalate Zambe.” Bia koone mejô mete Besam 22:15: “Ngule jam é nto nkôt aval ane éfuse viek; A ôyeme viam ô [yeme] me minke’ été”. Bi ne wôk amu jé Yésus a nga wô’ évé. A nga jibi mam mese be nga bo nye ataté éyoñ be nga bi nye, akekui éyoñ be nga tyelé nye élé mintaé yôp. E mbe e sili’i na môt a ve nye mendime ya nyu.

12. Jé jame Yésus a nga jô da ye’ele bia?

12 Jé jame Yésus a nga jô da ye’ele bia? Yésus a nji wô’ô ôsone ya kate aval a mbe a wô’ôtan. Bia yiane nye vu mfa’a ôte. E wô’ô kui abui biyoñe na bi bo teke kate bôt bevok na bia yi mvolan. Ve nge é kui na jam éziñ é lôteya bia nkôñ, bi nji yiane ko woñe ya sili bôte bevok mvolan. Éko éziñ ô ne ntutuñ, nge ke na ô nji wô’ô nyule mvo’é, ô ne sili mvôé jôé éziñ na a volô wo bo makit, nge ke na a ke litane wo nda biañ. Nde fe na, nge bi bili ate’e nlem, bi ne loone mvendé éziñ nge éwôlô Kristen éfe na bi kulane nye mam me ne bia nlem, nge ke na a zu kate bia “mbamba éfia” a ne ve bia ngule nyul. (Min. 12:25) Te bia vuane na bobejañ a besita ba nye’e bia abui, a be ne ôjeja’a ya volô bia éyoñ ya minjuk. (Min. 17:17) Ve be nji bi ngule ya yeme mam me ne bia ôsimesan, nge ke avale bia wô’ôtan. Ajô te, nge bia fete menyu, be ne bo teke yeme na bia yi mvolan.

“E MANEYA TÔÉBAN”

13. Minsôñane mivé ényiñe Yésus é nga tôé?

13 Jé Yésus a nga jô? Ngone Nisan é too melu 14, zia mewolo mela ya mame ngô’é, Yésus a nga yôtane na: “E maneya [tôéban].” (Jean 19:30) Mejô mete ma liti bia na ôsusua na a wu, Yésus a nga yeme na a maneya bo mam mese Yéhôva a nga lôme nye na a zu bo si va. Yésus a nga bo Yéhôva ésaé akekui awu, teke feñelan. Nalé a nga tôé abui minsôñan. Jam ôsu, Yésus a nga liti na Satan a ne nlaa minsos a dañ, amu ényiñ jé ja liti ne fômelé na môt a ne teke ayeñ a ne tebe ne bip to’o Satan a bo nye jé. Jame baa, Yésus a nga ve ényiñe jé ane ntañ asu bôt bese. Awu dé da ve bôt bese fane ya bi mbamba élat a Yéhôva a ndi nlem ya nyiñ nnôm éto, akusa bo be be’e metyi ya abé. Jame lale, Yésus a nga fubu jôé Ésaa wé, a liti na Nnye a yiane jôé si ése.

14. Jé bia yiane nyoñ ntyi’ane ya bo môs ôse ya yôp, a amu jé?

14 Jé jame Yésus a nga jô da ye’ele bia? Bia yiane ve ngule jangan ése na bi ba’ale mbunan wongan môs ane môs. Mojañ Maxwell Friend, ñye’ele éziñ ya Sikôlô ya Galaad, a nga bo nkañete beta étôkan éziñ a jô’ô na: “Te jô na wé bo jam éziñ akiti a to ke na ô ne de bo den. Ye ô to ndi na wé kui akiti nga? Bo’o ve ane éyoñ ése wo kôlô si mame tyé, wo kandane bi fane ya liti Yéhôva na wo kômbô nyiñ nnôm éto.” Ngo’o nge bia bese bia yene môs ôse ane wu wo su’ulan. Nalé é bo na, nge awu nde e ntele bia ôsu le, bi bo ngule ya jô na: “A Yéhôva me nga ve ngule jam ése na me ba’ale mbunan wom, me litiya na Satan a ne nlaa minsos, me fubuya ya jôé dôé, a me litiya na wo étam wo yiane jôé si ése.”

“MA KEE WO NSISIME WOM MO MÔÉ”

15. Bela’ane Luc 23:46 asu na ô liti ndi nleme Yésus a mbe a bili?

15 Jé Yésus a nga jô? (Lañe’e Luc 23:46.) A ndi nlem ése, Yésus a nga jô na: “A Tat, ma kee wo nsisime wom mo môé.” Yésus a mbe a yeme’e na Yéhôva nye étam a ne beta bo na a nyiñ. A mbe a to ndi na Ésaa wé a ye ke vuane nye.

16. Jé éve’ela Joshua ja ye’ele bia?

16 Jé jame Yésus a nga jô da ye’ele bia? Ba’ale’e mbunane wôé, to’o awu e ne wo bebé. Asu na ô bo de, wo yiane ‘tabe Yéhôva mebun a nleme wôé ôse.’ (Min. 3:5) Tame yene jam e nga kui Joshua, Ngaa Yéhôva éziñ é mbe é bili mimbu 15. A mbe a bili ngul ôkoñ, ô mbe na wo wôé nye. A nga bene nyoñ avale mebiañ e mbe e tyame’ atiñe Zambe. Mon éyoñ ôsusua na a wu, a nga kate nyia wé na: “A Ma, Yéhôva é nyoñe ma ngap. . . . Me to ndi a nleme wom ôse na, Yéhôva é wômôlô ma miñwuan. A yeme mam me ne ma nlem été, a yeme na, ma nye’e nye nya abuii.” * Môt ase ya be bia a yiane sili émiene na: ‘Nge mbunane wom ô tebe meve’ele aval e ne na, awu nde e li’iya ma, ye mé fo’o futi ényiñe jam ése mo me Yéhôva, a tabe ndi na a ye ke vuane ma?’

17-18. Mam mevé bia te yé’é? (Fombô’ô fe nka’ale ô ne nlô ajô na “ Mame Yésus a nga jô éyoñ a mbe a tyele élé mintaé yôp ma ye’ele bia jé.”)

17 Za avale mbamba miñye’elan mejô me Yésus ma ye’ele bia di! Bia te yé’é na bia yiane jamé bôte bevok a tabe ndi na Yéhôva fe é jamé bia. Bi bili mvome ya bo bibu’a ya beta ékôane bobejañ a besista be ne ôjeja’a ya volô bia, bi yeme’e na bi ne be loone éyoñ ése bia yi mvolan. Bia yeme fe na Yéhôva é su’u bia éyoñ ése bii tôbane meve’ele. A bia te yene mfi ya bo Yéhôva ésaé a ngule jangan ése môs ane môs, bi to ndi na Yéhôva é wômôlô bia nge bia wu.

18 Teke vaa nge beté, mame Yésus a nga jô éyoñ a mbe a tyele élé mintaé yôp me ne ye’ele bia abui mam. Éyoñe bia ve ngule na bi tôñe mam mete ényiñe jangan, bia liti na bia bo Yéhôva mewôk, amu Nnye a nga jô bia na: “Vô’ôla’ane [Yésus].”​—Mt. 17:5.

JIA 126 Momba’ané, yema’ané ngul, bo’ané ngul

^ É.N. 5 Matthieu 17:5 a kate bia na Yéhôva a yi na bi vô’ôlô Mone wé. Ayé’é di, bia zu yene mame Yésus a nga jô éyoñ a mbe a tyele élé mintaé yôp, a miñye’elane mejô mete ma ve bia.

^ É.N. 9 Asu na ô kôme wôk amu jé Yésus a nga belane mejô bia koone me Besam 22:1, fombô’ô nlô ajô ô ne na: “Minsili bôte ba sili,” Nkume mmombô nyi.

^ É.N. 16 Fombô’ô nlô ajô ô ne na “La foi de Joshua: une victoire pour les droits de l’enfant,” Vee ôyo! ya mbu 1995, Ngon ôsu é to melu 22.