1, 2. Ka gádanbalin Hesusu dan le lariñagunbalin lagumuhóun dimurei lubaragiñe lounwen?

WEYU 14 lidan nisán irumu 33 lidaaniwagu Hesusu. Lárigiñe híchugun liduru íbini madurun lan aba hasiadiruni luagu aban duru le mama ladüga, aba hadügün bula lau bulesei haméi lau magudemehabu lárigiñe aba hádaraguni luagu wagabu. Lau lúhabu luma lugudi dáwaguañu, sagü lawaragun aba lasandirun aba óunwenbu gáriti. Lau sun lira meredeti maniñu, lugundun anihein dimurei súdiniti lun lariñagun.

² Akutiha waméi le lariñagubei Hesusu dan le dáwaguañu liña lubéi luagu wagabu, luma giñe le gayaraabei wafurendeiruni lídangiñe le lariñagubei. Lidan amu dimurei: aganba waméi (Mat. 17:5).

3. Ka uagu layanuha Hesusu dan lariñagubei: “Núguchi, feruduna baña”?

³ Le lariñagubei Hesusu. Lárigiñe hádaraguni luagu wagabu, aba lamuriahan Hesusu luma Heowá: “Núguchi, feruduna baña”. Ka uagu layanuha? Líderagubadiwa dimurei le lariñagubei Hesusu lun warihini ka lan uagu layanuha. Ariñagati: “Ladüga ibidiñeti houn ka lan hadügübei” (Luk. 23:33, 34). Másiñati layanuhaña lan hawagu súdaragu rómana ha ádaragubalin lúhabu lau sun lugudi. Ibidiñeti meha houn katei ñein lan. Másiñati giñe layanuhaña lan meha hawagu gürigia ha amuriahabalin lafarún ani lárigiñe hafiñeruba meha luagu (Adü. 2:36-38). Mígirunti meha Hesusu lun ladügün marichaü le lasufurirubei lun tabuinchun lanigi lau íruni luma igañi (1 Fe. 2:23). Amuriaharügüti Hesusu luma Heowá lun feruduna lániña ha áfarubalin.

4. Ka larufudahabei Hesusu lau aranseñu liña lan lun feruduna lániña amu?

 ⁴ Le wafurendeirubei. Ítara kei Hesusu, mosu aranseñu wamá lun feruduna wamaniña amu (Kol. 3:13). Gayaraati añahein lan hádangiñe gürigia íbini waduheñu aba hagarabaagun wawagu ladüga ua lan gunfuranda hamani wafiñen luma ligaburi wawinwandun. Gayaraati hariñaguba lan iyeeni wawagu, hanabaguniwa hagibugiñe amu, haheiridagunu wani agumeiraguagüdüni o darí burí lun hasiadirúniwa hadügüba lan wuribani woun. Lubaragiñe werederun areidaha igarihabu habá, gayaraati wamuriaha luma Heowá lun ladararun hagu lun lachülürün aban weyu lun hánharun lun inarüni (Mat. 5:44, 45). Anihein dan hénrenguti woun lun feruduna wamaniña, dántima le óusera hamaadiwa wuriba. Ánhawa ígira lun tabuinchun wanigi lau igarigu lanügüba lira wuribani woun. Ariñagatu aban íbiri: “Gunfuranda numuti dan le lan feruduna nan amu úati mini lan gunda nan lau ligaburi hóuserun ni lau le hadügübei nun; mini lan ferudun, meredebadina lan agüra iyereehabúni habá” (Sal. 37:8). Dan le feruduna wamaniña gürigia, mini lan wígiragüdüñei lan katei le adügübei lun wagañidun o le adügübei lun wuriba lan wasandiragun woungua (Efe. 4:31, 32).

5. Ka füramasei lubéi Hesusu lun aban hádangiñe híwerutiña ha lóubagiñebaña ani ka uagu ladügei?

⁵ Le lariñagubei Hesusu. Dáwaguatiña bián híwerutiña lurugabu Hesusu. Furumiñe, gumesetiña yebe biángubei hagía adüga bula lau (Mat. 27:44). Lárigiñe aba madügün laali lan aban hádangiñe, aba líchugun fe luagu madügünti lan Hesusu “ni kata wuribati” (Luk. 23:40, 41). Ani arufuda lumuti afiñe lan luagu láguyuguba lan Hesusu ani urúeibei lan. Aba lariñagun lun: “Hesusu, haritaguabatia nuagun danme le lagumeserun Barúeihan” (Luk. 23:42). Furanguti larihin lueirin lafiñen. Aba lounabún Hesusu: “Númabadibu lidan paraísu”, mama lidan Arúeihani (Luk. 23:43, TNM). Dan lariñagun “númabadibu” mini lan lira aba lan füramasei lun gürigia. Subudi lumuti meha Hesusu gudemehabu lan Lúguchi; ligíati líchugubei aban emenigini lun híweruti ligira murusun dan lubaragiñe lounwen (Sal. 103:8).

6. Ka wafurendeirubei lídangiñe le lariñagubei Hesusu lun híweruti?

⁶ Ka gayaraabei wafurendeirun. Ítara liña Hesusu kei Lúguchi (Ebü. 1:3). Ayumahati Heowá lun feruduna lániwa luma lun larufudun gudemehabu woun ánhawa asaküriha tídangiñe sun wanigi luagu katei wuribati le meha wadügübei ani afiñe wagíame luagu lani Hesukrístu sákürifisiu (1 Huan 1: 7). Gama lumoun ka gayaraabei wadügüni anhein anihein lubéi dan hénrengu lan woun wafiñerun feruduna lani Heowá charati le wadügübei? Samina wamá luagu le: murusun dan lubaragiñe lounwen Hesusu, arufudati gudemehabu lun híweruti le agumeserubei afiñera luagu. Ligíati, ida luba marufudun lan Heowá gudemehabu houn lubúeingu ha úaraguabaña, ha áfaagubaña lun gaganbadi hamá lun? (Sal. 51:1; 1 Huan 2:1, 2).

7. Según Huan 19:26, 27, ka lariñagubei Hesusu tun María luma lun Huan, ani ka uagu?

⁷ Le lariñagubei Hesusu (aliiha huméi Huan 19:26, 27). Busenti meha Hesusu letenirún tun lúguchu, másiñati hilaali lan meha tani María weiriei dan ligía. Lárigiñe lounwen Hesusu, gayaraati meha híchuguni lamulenu sun le temegeirubei háguchu tun. Gama lumoun, genegeti mámagiña lan meha  disipulugu. Ligíati kaba méhati ariha luagu tumadagu luma Bungiu? Aban meha apostolu úaraguati Huan ani ligía meha besi lumada Hesusu. Gürigia meha ha áhuduragubaña lun Heowá hagía meha larihubaña Hesusu keisi liduheñu (Mat. 12:46-50). Ligíati, kei hínsiñe tubéi lúguchu lun ani nidiheriti meha tuagu, aba lariñagun lun Huan, lun lóunigirunu María, ladüga subudi lumuti meha Hesusu líderaguboun lan Huan lun tasigirun eseriwida lun Heowá. Aba lariñagun Hesusu tun María: “Anihán biráü”, lárigiñe aba lariñagun lun Huan: “Anuhán búguchu”. Lúmagiñe oura ligía, aba tarihini María, Huan kamá le tiráü ani góunigi lumutu Huan kamá le lúguchu. Arufudati Hesusu aba lanarime ínsiñeni tuagu  würi to óunigirubalin lúmagiñe liñüraü, ani yarafañu tiña lun weyu le lóunwenbei.

8. Ka wafurendeirubei lídangiñe le lariñagubei Hesusu tun María luma lun Huan?

⁸ Le wafurendeirubei. Le linarün katei, buídutimati wanügagun woungua hama wíbirigu ha lílana damuriguaü sügǘ lau wanügagun woungua hama waduheñu ha yarafatimahaña woun. Gayaraati lasuseredun lun hagarabaagun waduheñu wawagun o hadisedun wawéi. Ítara kei füramase lani Hesusu, ánhawa eredera yarafa lun Heowá luma tun lóundarun, weresibiruba “san wéiyaasu” lanwoun sügǘ luéi le weferidirubei. Gíbebaña íbirigu ha ítarabaña woun kamá le wasaanigu, wamulenu, wíbugañanu, wítunu o kamá hamuga wagübürigu (Mar. 10:29, 30). Ida liña wasandiragun woungua hádanñadiwa lan íbirigu ha lídanbaña sun ubóu ha ítarabaña woun kei iduheñu, ladüga sun lan wagía afiñetiwa luagu Heowá ani hínsiñe ligía woun? (Kol. 3:14; 1 Fe. 2:17).

9. Ka wafurendeirubei lídangiñe le lariñagubei Matéu 27:46?

⁹ Le lariñagubei Hesusu. Murusun dan lubaragiñe, lounwe Hesusu aba lagúaragun here: “Nubungiute, Nubungiute ka san uagu bígirana?” (Mat. 27:46). Mafuranguagüdün tumuti Bíbülia ka lan uagu lariñagei Hesusu dimurei burí le. Gama lumoun, samina wamá luagu le tarufudahabei woun. Luagu le aban oubaü, lau lariñaguni dimurei le lagunfuliruñein meha Hesusu profesía le adarirubei lidan Sálumu 22:1. * Furanguti warihini madügün lan Heowá lun maguurun hamá ni aban luagu lisaani (Hob. 1:10). Gunfuranda lumuti Hesusu ígira lani lúguchi háhaburugu láganiñu lun buga larufuduni lafiñen darí lounwe, aban óuchawaguni le másügürün lágili ni aban wügüri. Lau dimurei ligía, lafuranguagüdüñein lau madügün lan ni murusun duru le adügübei lun lafarún hilagubei luéigiñe.

10. Ka wafurendeirubei lídangiñe le lariñagubei Hesusu lun lúguchi?

¹⁰ Le wafurendeirubei. Furendeitiwa moun lumuti lan wagurabun lóunigirubadiwa lan Heowá luéi burí óuchawaguni. Ítara kei Hesusu, mosu aranseñu wamá lun úaragua wamá íbini wounwen (Mat. 16:24, 25). Subudi wamuti, migirúnbei lan Bungiu lun wóuchawagun lóugiñe le wayaraabei awanda (1 Ko. 10:13). Ámuya katei le wafurendeirubei, másiñati wasufurirun marichaü ítara kei Hesusu (1 Fe. 2:19, 20). Mama ladüga adüga wamá somu katei wuribati mínsiñe wabéi houn gürigia, ladüga mama wamá lánigu ubóu luma ladüga wapurichihani inarüni (Huan 17:14; 1 Fe. 4:15, 16). Gunfuranda lumuti Hesusu ka lan uagu ligira Heowá lun lasufurirun. Luagu le aban oubaü, añahein lubúeingu Heowá ha úaraguatiña, dan le hásügürün lídangiñe óuchawaguni, álügüdaguatiña houngua ka lan uagun ligira Heowá lun lasuseredun (Abak. 1:3). Kei gudemehabu lan Heowá ani gaguraasunti, gunfuranda lumuti mama lan lilouguan afiñeni hawagubei, gurasu lan hemegeirubei ani ligíarügüñein gayara líchuguni houn (2 Ko. 1:3, 4).

11. Ka uagu lariñagei Hesusu dimurei le waliihabei lidan Huan 19:28?

¹¹ Le lariñagubei Hesusu (aliiha huméi Huan 19:28). Ka uagu lariñaga Hesusu mágürabu hali lan? Lun lagunfulirun profesía le lídanbei Sálumu 22:15, le ariñagubei: “Mábeiha nagülerugu kei kaliki; badüle niñeñe luagu nisielun”. Ani lau sun le súfuri láalibei, lau lanarime gáriti le lasandirubei Hesusu dan  dawaguañu liña lubéi luagu wagabu, chóuruti sandí lan mágürabu. Ani mégeiti meha ídemuei lun gayara lan labulubudun gáriti le luágubei.

12. Ka wafurendeirubei da le lariñagubei Hesusu magurabun lan?

¹² Le wafurendeirubei. Masaminarunti meha Hesusu débili lan lau lariñaguni le lasandirubei, ligía moun lumuti lubéi wasaminarun ítara. Libe agei dan, masandiraguntiwa woungua buidu lun wayanuha houn amu luagu katei le wemegeirubei. Ani anhein achülüra dan lun megei wamá ídemuei, madarasaha wamá lun wamuriahani. Kéiburi, anhein derebuguhadiwa lubéi o sándiñadiwa lan, másiñati wamuriaha luma aban wamada lun lanügüniwa agañeiha o lun lanügüniwa ariha surusia. O anhein sandigua wabéi woungua kamá hamuga lábürühaña warüna, másiñati wamuriahan luma aban wéiyaali lidan afiñeni o luma aban íbiri le derebuguti lafiñen lun laganbúniwa ariñaga ligíame “dimurei buiti” woun lun lichugún dǘgüdaguaü (Ari. 12:25). Mabulieida waméi weiri lan wínsiñe houn wíbirigu ani busentiña híderaguniwa “lidan lidaani idiheri” (Ari. 17:17). Lau sun lira, siñati haliihani wasaminan, ligíati ibidiñebei houn ka lan wemegeirubei anhein mariñagun wamá houn.

13. Ka libihinbei Hesusu luagu úaraguni le larufudubei darí lounwe?

¹³ Le lariñagubei Hesusu. Kéiburi ladaünrün ǘrüwa rábounweyu 14 lidan nisán, aba lariñagun Hesusu: “Gúnfuliha sun katei!” (Huan 19:30). Murusun dan lubaragiñe lounwen, subuditi meha lun adüga laali lan sun le lamuriahabei Heowá lúmagiñe. Ka libihubei Hesusu ladüga úaragua lan darí lounwen? Furumiñe, arufuda lumuti Hesusu marasualugu lan Satanási, arufudaléi gayara lan úaragua lan aban wügüri le macharati lau sun áfaagua lan Satanási lun lábürügüdüni. Libiaman, ru lumuti libagari lebegime asalbaruni. Seremei lani Hesusu sákürifisiu, gayaraati gamadagua hamá gürigia gafigountiña luma Bungiu luma lun hemenigi hamá lun hawinwandun lun súnwandan. Luma, lǘrüwan, ayanuhati Hesusu luéigiñe lufulesein liri Lúguchi arufudaléi Lúguchirügüñein lan garicha lun larúeihan.

14. Afuranguagüda waméi ida luba lan wawinwanduni kada weyu.

¹⁴ Le wafurendeirubei. Lunti aranseñu wamá lun úaragua wamá sagü weyu. Ariha waméi le lariñagubei íbiri Maxwell Friend, le meha arufudahabei tidan Leskuela Galaadü. Lidan aban adamurini le ñein lubéi hóundaragua íbirigu lídangiñetiña ámuñegueinarügü ageiraü, ariñagati lidan aban yanu: “Mígirabei lubá haruga le biyaraabei adüga o ariñaga uguñe. Chouru bumuti bawinwanduba lan haruga? Winwan huméi kada weyu kamá hamuga lagumuhóun chansi lun harufuduni gadüna humá lun hawinwandun lun súnwandan”. Kei lariñaguni íbiri, winwan waméi kada weyu kamá hamuga lagumuhóun weyu le ídanbei warufudei gadüna wamá lun wawinwandun lun súnwandan. Ítara, ánhawa ounwe, gayaraabei wariñagun lun Heowá: “Adüga naali sun niyaraati lun úaragua nan bun, lun narufuduni yee lan Satanási, luma lun nayanuha luéigiñe lufulesein biri ani arufudanéime buguyarügüñein lan garicha lun barúeihan”.

15. Según Lúkasi 23:46, ka chouru lubéi Hesusu?

¹⁵ Le lariñagubei Hesusu (aliiha huméi Lúkasi 23:46). Buin lau ichouruni, aba lariñagun Hesusu: “Núguchi, derege numutu nuani búhaburugu!”. Subudi lumuti meha Hesusu lúhaburuguñein lan Heowá, ani chouru lumuti laritaguba lan Lúguchi luagu.

16. Ka wafurendeirubei lúmagiñe Joshua?

 ¹⁶ Le wafurendeirubei. Aranseñu wamá lun wíchuguni wabagari lúhaburugu Heowá. Lun wadügüni lira, mosu wafiñerun luagu tau sun wanigi (Ari. 3:5). Samina wamá luagu lani Joshua hénpulu, aban nibureinti Gefenti keinsi meha irumu lau ani lasufuriruña meha lau aban sandi máraninati. Máhati meha lun agaranihani le aubei magundan lan Bungiu. Murusun dan lubaragiñe lounwen, ariñagati tun lúguchu: “Lúhaburugu ñáadina Heowá”. Sigiti ariñaga: “Gayaraati nariñaguni le hun lau ichouruni, núguchu: subudi numuti láguyuguagüdün baadina lan Heowá. Ariha laaru nanigi ani subuditi lun hínsiñe lan nun lau sun ninarün”. * Sun wagía lunti wadügüni álügüdahani le wóuniwagua: “Ánhana agagibudagua luma lénrengunga ani lídanñein denchaü nibagari, úaraguabadina san lun Heowá? Nafiñeruba san laritaguba lan Heowá nuagu ani láguyuguagüdübadina lan?”.

17, 18. Ka katei súdiniti wafurendeirubei? (Ariha huméi rekuáduru “ Le larufudahabei lagumuhóun dimurei le lariñagubei”).

¹⁷ Furendeitiwa aban katei súdiniti, lídangiñe lagumuhóun dimurei le lariñagubei Hesusu. Haritaguagüda lumutiwa lunti lan aranseñu wamá lun feruduna wamaniña amu luma lun wachoururuni feruduna lubadiwa lan Heowá. Ibihatiwa aban lubuidun chansi lun hádangiñe wamá íbirigu ha lídanbaña sun ubóu ani aranseñuhaña lun híderaguniwa. Gama lumoun, dan le megei wamá ídemuei, amuriaha waméi. Chouru wamuti híderagubadiwa lan wíbirigu danme le wagagibudagu luma furumiñeguarügü óuchawaguni. Gunfuranda wamuti súdini lan lun wawinwanduni kada weyu kamá hamuga lagumuhóun wachansin lun warufuduni úaragua wamá lun Heowá ani chouru wamani láguyuguagüdübadiwa lan ánhawa ounwe.

¹⁸ Anhein wíchiga sun adundehani le lidan wabagari, wadügüñein le lariñagubei Heowá luagu Lisaani: “Adüga huméi le lubeibei” (Mat. 17:5).