1-2. Ki ti arive avan Zezi ti dir son bann dernyen parol?

I LE 14 Nizan lannen 33. Apre ki Zezi in ganny akize e ganny zize koupab pour en krim ki i pa’n komet, i ganny boufonnen, tortire e apre i ganny kloute lo en poto. Sa bann klou i pers son lanmen ek son lipye. Sak fwa i respire e sak fwa i koze, i dan douler. Me i bezwen koze parski i annan bann keksoz enportan pour dir.

² Annou diskit lo sa ki Zezi ti dir ler i ti pe mor lo poto e lo bann leson ki nou kapab aprann avek sa ki i ti dir. Andotmo, annou “ekout li.”​—Mat. 17:5.

3. Zezi ti pe refer avek lekel ler i ti dir: “Papa, pardonn zot”?

³ Ki Zezi ti dir? Ler Zezi ti lo poto, i ti priye: “Papa, pardonn zot.” Lekel ki Zezi ti anvi son Papa i pardonnen? Sa ki Zezi ti dir apre, i ed nou konpran lekel ki i ti pe koz lo la. I dir: “Zot pa konnen ki zot pe fer.” (Lik 23:33, 34) I tre probab ki Zezi ti pe refer avek bann solda Romen ki ti’n klout li lo sa poto. Zot pa ti konnen ki i ti Garson Bondye. I kapab osi ki i ti pe refer avek serten dimoun dan lafoul ki ti demande ki i ganny touye me ki pli tar ti pou annan lafwa dan li. (Akt 2:36-38) Zezi pa ti merit ganny touye. Me i pa ti ankoler e gard rankin avek bann ki ti pe persekit li. (1 Pyer 2:23) O kontrer i ti demann Zeova pour pardonn bann ki ti pe al touy li.

4. Ki nou kapab aprann avek lafason ki Zezi ti pare pour pardonn bann ki ti opoz li?

 ⁴ Ki nou kapab aprann avek sa ki Zezi ti dir? Parey Zezi, nou bezwen pare pour pardonn lezot. (Kol. 3:13) Serten dimoun, enkli nou fanmir, i kapab opoz nou parski zot pa konpran nou krwayans ek nou fason viv. Zot kapab dir bann mansonz lo nou, fer nou kanmi devan lezot, detri nou bann piblikasyon oubyen menm menase pour fer nou dimal. Olye gard rankin, nou kapab demann Zeova pour ed sa bann ki pe opoz nou pour aksepte laverite. (Mat. 5:44, 45) Parfwa i kapab difisil pour pardonn zot, sirtou si zot in bles nou en kantite. Me si nou kontinyen reste ankoler e gard rankin, nou fer dimal nou prop lekor. En ser ti dir: “Mon realize ki pardonn lezot pa vedir ki mon krwar ki sa ki zot in fer ti byen ouswa ki mon pe les zot fer mwan ditor. I zis vedir ki mon swazir pour pa gard rankin.” (Ps. 37:8, NWT) Ler nou deside pour pardonnen, nou pe swazir pour pa les bann move keksoz ki arive avek nou fer nou kontinyen reste ankoler.​—Efe. 4:31, 32.

5. Ki promes Zezi ti fer avek en kriminel ki ti lo en poto akote li e akoz i ti fer sa promes?

⁵ Ki Zezi ti dir? I ti annan de kriminel ki ti ganny kloute lo poto akote Zezi. Premye kou, tou le de ti boufonn Zezi. (Mat. 27:44) Me apre, enn ant zot ti arete. I ti realize ki Zezi pa ti’n fer “nanryen mal.” (Lik 23:40, 41) I ti osi montre ki i ti krwar ki Zezi ti pou ganny resisite e ki en zour Zezi ti pou dirize konman en lerwa. I ti dir avek Zezi: “Zezi, mazin mwan ler ou vin Lerwa.” (Lik 23:42) Sa zonm ti demontre en gran lafwa. Zezi ti reponn li e dir: “Laverite mon dir ou ozordi, ou pou avek mwan dan Paradi.” (Lik 23:43) Remarke ki Zezi ti fer sa promes vreman personnel par servi bann mo parey “mon,” “ou” ek “mwan.” Zezi ti kapab donn sa kriminel ki ti pe mor, sa lespwar parski i ti konnen ki son Papa i pran pitye.​—Ps. 103:8, NWT.

6. Ki nou aprann avek sa ki Zezi ti dir avek sa kriminel?

⁶ Ki nou kapab aprann avek sa ki Zezi ti dir? Zezi i resanble son Papa parfetman. (Ebr. 1:3) Zeova i pran pitye pour nou e i anvi pardonn nou. Me i pou fer sa, si nou vreman regret bann move keksoz ki nou’n fer dan lepase e si nou annan lafwa dan sakrifis Zezi Kri. (1 Zan 1:7) Serten i kapab vwar li difisil pour krwar ki Zeova pou pardonn zot pour bann fot ki zot in fer dan lepase. Si parfwa ou santi koumsa, mazin sa: Pa bokou letan avan Zezi ti mor, i ti pran pitye pour sa kriminel ki ti pe konmans demontre lafwa. Alor, nou asire ki Zeova pou pran pitye pour son bann serviter fidel ki pe fer zot mye pour obei son bann komannman!​—Ps. 51:1; 1 Zan 2:1, 2.

7. Dan Zan 19:26, 27, ki Zezi ti dir avek Zan ek Mari e akoz i ti dir sa?

⁷ Ki Zezi ti dir? (Lir Zan 19:26, 27.) Zezi ti anvi pran swen avek son manman ki tre probab ti en vev. Petet son bann frer ek ser ti pou kapab pran swen avek bezwen materyel zot manman. Me lekel ki ti pou ed li reste fidel avek Zeova? I napa nanryen ki montre ki son bann frer  ek ser ti’n fini vin son disip. Par kont, Zan ti en zapot fidel e enn bann zanmi pli pros Zezi. Zezi ti vwar bann ki ti ador Zeova ansanm avek li konman son fanmir spirityel. (Mat. 12:46-50) Zezi ti kontan Mari e i ti anvi fer sir ki i ganny sa ki i ti bezwen. Alor i ti demann Zan pour pran swen avek li parski i ti konnen ki Zan ti pou ed li kontinyen servi Zeova. Zezi ti dir avek son manman: “Gete! La ou garson.” Avek Zan, i ti dir: “Gete! La ou manman!” Depi sa zour, Zan ti vin parey en garson pour Mari e i ti pran swen avek li konmsi i ti son prop manman. Zezi ti demontre en gran lanmour anver sa madanm ki ti’n pran byen swen avek li ler i  ti pe grandi e ki ti pe debout lanmenm o bor ler i mor.

8. Ki nou kapab aprann avek sa ki Zezi ti dir avek Mari ek Zan?

⁸ Ki nou kapab aprann avek sa ki Zezi ti dir? Nou lanmitye avek bann frer ek ser Kretyen i kapab vin pli for ki nou relasyon avek nou fanmir pros. Nou fanmir i kapab opoz nou oubyen menm rezet nou me parey Zezi in promet, si nou reste pros avek Zeova ek Son lorganizasyon, nou pou “ganny 100 fwa plis” ki sa ki nou’n perdi. Bann frer ek ser pou vin parey bann garson, fiy, manman oubyen papa pour nou. (Mark 10:29, 30) Ki mannyer ou santi pour annan bann frer ek ser dan kongregasyon ki ini akoz zot lafwa e akoz zot lanmour pour Zeova e pour kanmarad?​—Kol. 3:14; 1 Pyer 2:17.

9. Ki nou kapab aprann avek sa ki Zezi ti dir dan Matye 27:46?

⁹ Ki Zezi ti dir? Zis avan Zezi i mor, i ti kriye: “Mon Bondye, mon Bondye, akoz ou’n abandonn mwan?” (Mat. 27:46) Labib pa dir akoz Zezi ti dir sa bann parol. Me annou vwar ki nou kapab aprann avek sa ki i ti dir. Ler Zezi i dir sa bann parol, Zezi ti pe akonpli sa profesi dan Psonm 22:1. * Osi, sa bann parol i montre ki Zeova pa ti’n met “en baraz otour” son garson. (Zob 1:10, NWT) Zezi ti konpran ki son Papa ti pe les bann ki ay li teste son lafwa ziska ki i mor. Napa okenn imen ki’n ganny teste parey Zezi. An plis, sa bann parol i montre ki i pa’n fer okenn krim ki merit lanmor.

10. Ki leson nou kapab aprann avek sa ki Zezi ti dir avek son Papa?

¹⁰ Ki nou kapab aprann avek sa ki Zezi ti dir? En leson nou kapab aprann, i ki nou pa devret ekspekte ki Zeova i protez nou kont bann problenm ki teste nou lafwa. Zis parey Zezi ti ganny teste ziska lanmor, nou osi nou bezwen pare pour reste fidel ziska lanmor si i neseser. (Mat. 16:24, 25) Par kont, nou kapab asire ki Bondye pa pou les nou ganny teste plis ki nou kapab siporte. (1 Kor. 10:13) En lot leson nou aprann, i ki parey Zezi, nou kapab soufer menm si nou pa’n fer nanryen mal. (1 Pyer 2:19, 20) Nou ganny opoze pa akoz nou’n fer en keksoz mal me akoz nou pa form parti sa lemonn e akoz nou rann temwannyaz lo laverite. (Zan 17:14; 1 Pyer 4:15, 16) Zezi ti konpran akoz Zeova ti les li soufer. Me i annan lezot serviter fidel ki’n soufer e ki parfwa zot in demande akoz Zeova i les serten keksoz arive. (Aba. 1:3) Nou Bondye ki pran pitye e ki annan pasyans, i konnen ki zot pa mank lafwa. I konnen ki zot bezwen sa rekonfor ki zis li ki kapab donnen.​—2 Kor. 1:3, 4.

11. Akoz Zezi ti dir sa bann parol ki dan Zan 19:28?

¹¹ Ki Zezi ti dir? (Lir Zan 19:28.) Akoz Zezi ti dir: “Mon swaf”? I ti fer sa “pour ki lekritir i ganny akonplir” setadir pour akonpli sa profesi ki dan Psonm 22:15 ki dir: “Mon labous i sek parey later dekoke dan lasesres. Mon lalang i reste kole dan mon pale.” Osi, apre tou sa soufrans ki Zezi in pas ladan, enkli sa douler ki i ti santi ler i ti lo poto, i ti bezwen vreman swaf. I ti bezwen led pour koup son laswaf.

12. Ki nou aprann avek sa parol ki Zezi ti dir “Mon swaf”?

 ¹² Ki nou kapab aprann avek sa ki Zezi ti dir? Zezi pa ti vwar li mal pour dir sa ki i ti pe santi e nou osi nou devret dir sa ki nou santi. I kapab ki tou dilon nou lavi nou’n prefere pour pa dir lezot konsernan sa ki nou bezwen. Me si nou bezwen led, nou pa devret ezite pour demann lezot pour ed nou. Par egzanp, si nou aze oubyen nou lasante pa bon, nou kapab demann en zanmi pour anmenn nou laboutik ouswa pour nou lapwentman kot dokter. Si nou dekouraze, petet nou bezwen demann en ansyen oubyen en lot Kretyen matir pour ekout nou ouswa pour ankouraz nou. (Prov. 12:25) Rapel ki nou bann frer ek ser i kontan nou e zot anvi ed nou dan “letan maler.” (Prov. 17:17, NWT) Me zot pa konn sa ki nou pe panse oubyen santi. I kapab ki zot pa konnen ki nou bezwen led ziska nou pran linisyativ pour koz avek zot.

13. Ki Zezi ti akonpli par reste fidel ziska i mor?

¹³ Ki Zezi ti dir? Ver apepre trwa-z-er apre midi le 14 Nizan lannen 33, Zezi ti kriye: “I’n ganny akonplir!” (Zan 19:30) Sa ki Zezi ti dir, i montre nou ki zis avan Zezi ti mor, i ti konnen ki in fer tou sa ki Zeova ti anvi i fer. Vi ki Zezi ti reste fidel ziska i mor, i ti akonpli plizyer keksoz. Premyerman, i ti prouve ki Satan i en manter. Zezi ti montre ki en imen ki parfe i kapab reste fidel malgre nenport kwa ki Satan i fer li. Dezyenmman, Zezi ti donn son lavi konman en ranson. Sakrifis Zezi i fer li posib pour imen enparfe annan en lanmitye avek Bondye e pour annan sa lespwar pour viv pour touzour. Trwazyenmman, Zezi ti montre ki Zeova i annan drwa dirize e i ti osi elimin tou repros ki’n ganny anmennen lo non son Papa.

14. Ki mannyer nou devret viv sak zour? Eksplike.

¹⁴ Ki nou kapab aprann avek sa ki Zezi ti dir? Nou bezwen fer tou sa ki nou kapab pour reste fidel sak zour. Annou vwar sa ki Frer Maxwell Friend, ki ti en formater kot Lekol Gilead, ti dir. Pandan en lasanble enternasyonal, Frer Friend ti fer en diskour konsernan fidelite. I ti dir: “Pa anvoy pour demen, sa ki ou kapab fer oubyen dir ozordi. Parski ou pa asire si demen ou pou ankor vivan! Alor, viv sak zour konmsi i ti ou dernyen sans pour montre ki ou vreman anvi ganny lavi eternel.” Annou viv sak zour konmsi i ti nou dernyen sans pour reste fidel! Alor, menm si nou mor, nou pou kapab dir: “Zeova, mon’n fer mon mye pour reste fidel, pour prouve ki Satan i en manter, pour sanktifye ou non e pour siport ou souvrennte!”

15. Dapre Lik 23:46, kwa ki Zezi ti asire?

¹⁵ Ki Zezi ti dir? (Lir Lik 23:46.) Avek konfidans, Zezi ti dir: “Papa, mon met mon lavi dan ou lanmen.” Zezi ti konnen ki son lavenir ti depan lo Zeova e i ti asire ki son Papa pa ti pou oubliy li.

16. Ki ou aprann avek leksperyans Joshua?

¹⁶ Ki nou kapab aprann avek sa ki Zezi ti dir? Reste fidel avek Zeova menm si ou lavi i an danze. Pour fer sa, ou bezwen “met ou konfyans dan [Zeova] avek tou ou leker.” (Prov. 3:5) Annou vwar legzanp en Temwen Zeova, ki apel Joshua.  I ti annan 15 an e i ti pe soufer avek en maladi grav. Me kantmenm sa, i ti refize pour aksepte okenn tretman ki ti pou kas lalwa Zeova. Pa bokou letan avan i mor, i ti dir son manman: “Manmi, Zeova pou pran swen avek mwan. . . . Mon kapab dir ou avek lasirans, ki mon konnen ki Zeova pou resisit mwan. I konn sa ki dan mon leker e mon vreman kontan li.” * Sakenn parmi nou i devret demann nou lekor: ‘Si mon lafwa i ganny teste par en keksoz ki kapab touy mwan, eski mon pou reste fidel avek Zeova e annan konfyans ki i pa pou oubliy mwan?’

17-18. Ki leson nou’n aprann? (Vwar osi sa bwat “ Sa ki nou aprann avek bann dernyen parol ki Zezi ti dir.”)

¹⁷ Nou kapab aprann bann leson enportan avek bann dernyen parol ki Zezi ti dir. Zot fer nou rapel ki nou bezwen pardonn lezot e annan konfyans ki Zeova pou pardonn nou. Nou annan sa privilez pour annan en kantite frer ek ser dan kongregasyon ki pare pour ed nou. Me ler nou bezwen led, nou bezwen demann zot pour ed nou. Nou konnen ki Zeova pou ed nou andir nenport problenm ki nou fer fas avek. Nou osi vwar ki i enportan pour viv sak zour konmsi i ti nou dernyen zour pour reste fidel parski nou annan konfyans ki Zeova pou resisit nou si nou mor.

¹⁸ Sa bann parol ki Zezi ti dir ler i ti pe mor lo poto i kapab montre nou en kantite keksoz. Ler nou aplik sa bann leson ki nou’n aprann, nou pou obei sa ki Zeova ti dir konsernan son Garson: “Ekout li.”​—Mat. 17:5.