1-2. Aber a Jesus kãa ne nsɛm a otwa tun wɔ n’asaase do asetsena mu no, nna ebɛn tsebea na ɔwɔ mu?

NNA da no yɛ Nisan 14, 33 H.B. Wotwaa asɛm too Jesus do na wobuu no kumfɔ wɔ bɔn a ɔnnyɛe ho. Iyi ekyir no wosii no atwetwe, wɔyɛɛ no ayakayakadze, na ewiei koraa no wɔbɔɔ no asɛndua mu. Nna wɔdze mprɛgow abobɔ ne nsa na n’anan mu. Sɛ nna ɔrekasa anaa ɔregye ahom a ɔtse yaw, naaso nna ɔsɛ dɛ ɔkasa, osiandɛ nna ɔwɔ nsɛm bi a no ho hia kã.

² Hom mma yɛnhwɛ nsɛm a Jesus kãe ber a nna oruwu wɔ asɛndua no do no, nye dza yebotum esũa efi mu. Wɔ kwan bi do no, ‘hom mma yentsie no.’—Matt. 17:5.

3. Aber a Jesus kãa dɛ: “Egya, fa kyɛ hɔn” no, obotum aba dɛ nna woananom hɔnho asɛm na ɔrekã?

³ Ebɛn asɛm na Jesus kãe? Aber a wɔbɔɔ Jesus asɛndua mu no, ɔbɔɔ mpaa dɛ: “Egya, fa kyɛ hɔn.” Ɔmfa nkyɛ woananom? Asɛm a ɔkãe toaa do no ma yehu hɔn a nna ɔrekã hɔnho asɛm no. Ɔkãa dɛ: “Wonnyim dza wɔreyɛ.” (Luke 23:33, 34) Obotum aba dɛ nna Jesus rekã Rome nsordaafo a wɔdze mprɛgow bobɔɔ ne nsa na n’anan mu no ho asɛm. Nna wonnyim nyimpa kor a Jesus yɛ. Obotum so aba dɛ nna binom a wɔwɔ nyimpadɔm no mu a wɔpeen do dɛ wonku no naaso ekyir yi wobenya no mu gyedzi no ho asɛm wɔ ne tsir mu. (Andw. 2:36-38) Jesus annkasa enntsia hɔn a wɔyɛɛ no ayakayakadze no, na ɔammfa hɔnho ebufuw annhyɛ no mu. (1 Pet. 2:23) Mbom, ɔserɛɛ Jehovah dɛ ɔmfa hɔn a nna woruku no no hɔn bɔn nkyɛ hɔn.

4. Nna Jesus wɔ ɔpɛ dɛ ɔdze n’asoɛrtsiafo hɔn bɔn bɛkyɛ hɔn. Ebɛnadze na yebotum esũa efi mu?

⁴ Ebɛnadze na yebotum esũa efi Jesus n’asɛm yi mu? Ɔsɛ dɛ yenya ɔpɛ dɛ yɛdze afofor hɔn bɔn bɛkyɛ hɔn dɛ mbrɛ Jesus  yɛe no. (Col. 3:13) Dza yɛgye dzi nye mbrɛ yesi bɔ hɛn bra no, nyimpa binom a hɛn ebusuafo ka ho nntse ase, iyi ntsi, bi a wɔbɔsoɛr etsia hɛn. Bi a wɔbɛkã nsɛm a ɔnnyɛ nokwar afa hɛnho, wobogu hɛn enyim ase wɔ afofor enyim, wɔbɛsɛɛ hɛn nwoma, anaa mpo wobohunahuna hɛn dɛ wobepira hɛn. Dɛ nkyɛ yɛdze hɛn asoɛrtsiafo ho ebufuw bɛhyɛ hɛn mu no, mbom, yebotum aserɛ Jehovah dɛ ɔmboa hɔn ama daakye bi hɔn so woeehu nokwar no. (Matt. 5:44, 45) Ɔtɔ da a, bi a ɔbɛyɛ dzen papaapa dɛ yɛdze afofor hɔn bɔn bɛkyɛ hɔn nkanka ber a wɔayɛ hɛn ayakayakadze no. Naaso, sɛ yɛdze hɔnho ebufuw hyɛ hɛn mu na yaammfa hɔn bɔn annkyɛ hɔn a, yɛbɛhaw hɛnara hɛnho. Akyerɛbaa bi kãa dɛ: “Mebohu dɛ, afofor hɔn bɔn a medze bɛkyɛ hɔn no nnkyerɛ dɛ mososɔw dza wɔayɛ no do, anaa mepɛ dɛ wosisi me. Dza ɔkyerɛ ara nye dɛ memmpɛ dɛ medze hɔnho ebufuw bɛhyɛ mo mu.” (Ndw. 37:8) Sɛ yesi gyinae dɛ yɛdze bɔn a afofor ayɛ hɛn no bɛkyɛ hɔn a, ɔkyerɛ dɛ yɛmmpɛ dɛ asɛm a osii no ma hɛn bo fuw.—Eph. 4:31, 32.

5. Ebɛn anohoba na Jesus dze bɔɔ ndzebɔnyɛfo a wɔbɔɔ hɔn asɛndua mu wɔ ne nkyɛn no mu kor? Ebɛnadze ntsi na ɔbɔɔ dɛm anohoba no?

⁵ Ebɛn asɛm na Jesus kãe? Wɔbɔɔ ndzebɔnyɛfo beenu bi asɛndua mu wɔ Jesus ne nkyɛn. Ahyɛse no hɔn beenu nyinara dzii Jesus noho fɛw. (Matt. 27:44) Naaso ekyir yi hɔn mu kor nyaa adwensesa. Ɔbɛgyee too mu dɛ Jesus nnyɛɛ “biribiara.” (Luke 23:40, 41) Afei so, ɔdaa no edzi dɛ ɔwɔ gyedzi dɛ wobenyan Jesus efi owu mu, na oeedzi hen daakye. Ɔkãa kyerɛɛ Agyenkwa a nna oruwu no dɛ: “Jesus, sɛ eba w’ahendzi mu a, kaa me.” (Luke 23:42) Hwɛ gyedzi kɛsenara a ɔtse dɛm! Jesus yii no ano dɛ: “Nokwar mese wo ndɛ dɛ, ebɛka mo ho [nnyɛ Ahendzi no mu, mbom] wɔ Paradise.” (Luke 23:43, NWT) Hyɛ no nsew dɛ anohoba a Jesus bɔɔ ɔbarimba no, nna ɔyɛ hɔn ntamu asɛm. Osiandɛ, ɔdze nkasafua “mese,” “wo,” nye “mo ho” na ɔdze dzii dwuma. Nna Jesus nyim dɛ n’Egya yɛ mbɔbɔrhufo, ntsi ɔkãa enyidado nsɛm kyerɛɛ ɔdzebɔnyɛnyi a nna oruwu no.—Ndw. 103:8.

6. Ebɛnadze na yesũa fi asɛm a Jesus kãa kyerɛɛ ɔdzebɔnyɛnyi no mu?

⁶ Ebɛnadze na yebotum esũa efi Jesus n’asɛm yi mu? Jesus daa n’Egya no suban edzi pɛpɛɛpɛ. (Heb. 1:3) Jehovah wɔ ɔpɛ dɛ ɔdze hɛn bɔn bɛkyɛ hɛn na oeehu hɛn mbɔbɔr. Naaso sɛ ɔbɛyɛ dɛm a, gyedɛ yenu hɛnho nokwar mu wɔ bɔn a yɛayɛ etwa mu no ho, na yenya gyedzi wɔ Jesus Christ n’afɔrbɔ no mu. (1 John 1:7) Nyimpa binom wɔ hɔ a, bi a ɔyɛ dzen ma hɔn dɛ wɔbɛgye ato mu dɛ Jehovah botum dze mfom bi a wodzii ber bi a etwa mu no akyɛ hɔn. Ɔtɔ da na sɛ etse nka dɛm a, susu dɛm asɛm yi ho: Aka kakra ma Jesus ewu no, ɔdaa ehumbɔbɔr edzi kyerɛɛ ɔdzebɔnyɛnyi no a woebu no kumfɔ a nna afei na ɔahyɛ ase rinya Jesus mu gyedzi no. Dɛm ntsi, mpɛn ahen ara na Jehovah rennda ehumbɔbɔr edzi nnkyerɛ n’asomfo anokwafo a wɔreyɛ dza wobotum biara dɛ wobedzi n’ahyɛdze do no!—Ndw. 51:1; 1 John 2:1, 2.

7. Dɛ mbrɛ wɔayɛ ho kyerɛwtohɔ wɔ John 19:26, 27 no, ebɛn asɛm na Jesus kãa kyerɛɛ Mary nye John? Ebɛnadze ntsi na ɔkãa dɛm asɛm no?

⁷ Ebɛn asɛm na Jesus kãe? (Kenkan John 19:26, 27.) Nna Jesus rodwen ne maame a obotum aba dɛ ɔyɛ okunafo no ho. Obotum aba dɛ nna Jesus no nuanom no botum dze ne maame no honam afamu ehiadze ama no. Naaso nna woana na ɔdze no sunsum afamu ehiadze bɛma no? Biribiara  nnyi hɔ a ɔkyerɛ dɛ dɛm aber no nna no nuanom no abɛyɛ n’esuafo. Naaso nna John yɛ n’asomafo anokwafo no nye n’anyɛnkofo a wɔbɛn no paara no mu kor. Nna Jesus bu hɔn a wɔnye no bɔ mu som Jehovah no dɛ n’ebusuafo. (Matt. 12:46-50) Dɛm ntsi, ɔdɔ a Jesus wɔ ma Mary nye dwen a ɔdwen noho no kaa no ma ɔdze no hyɛɛ John ne nsa, osiandɛ nna onyim dɛ ɔdze no sunsum afamu ehiadze bɛma no. Ɔkãa kyerɛɛ ne maame dɛ: “Hwɛ, wo ba nye yi”! Nna ɔkãa kyerɛɛ John so dɛ: “Hwɛ, wo nã nye yi”! Ofitsi dɛm da no rokɔ no, John faa Mary dɛ ne maame, na ɔhwɛɛ no dɛ mbrɛ ɔbɔhwɛ ne maame ara pɛr. Hwɛ ɔdɔ a Jesus daa no edzi kyerɛɛ ɔbaa a nna ɔda n’akoma do no; nyia ofii ɔdɔ mu hwɛɛ no wɔ no mbofraber mu, na ogyinaa ne nkyɛn aber a oruwu no!

8. Ebɛnadze na yebotum esũa efi asɛm a Jesus kãa kyerɛɛ Mary nye John no mu?

 ⁸ Ebɛnadze na yebotum esũa efi Jesus n’asɛm yi mu? Ebusuabɔ a yɛnye hɛn nuanom Christianfo wɔ no mu botum ayɛ dzen koraa akyɛn ebusuabɔ a yɛnye hɛn ebusuafo a wɔbɛn hɛn paara wɔ no. Bi a hɛn ebusuafo bɔsoɛr etsia hɛn anaa woeeyi hɛn tokyen mpo, naaso dɛ mbrɛ Jesus bɔɔ anohoba no, sɛ yɛdze hɛnho takyer Jehovah nye n’ahyehyɛdze no ho a, yebenya dza yɛahwer no ho “mbɔho mpɛn ɔha.” Enuanom no mu piinara bɛba abɛyɛ hɛn mbabanyin, mbabaa, nanom anaa egyanom a wɔdɔ hɛn. (Mark 10:29, 30) Gyedzi a yɛwɔ nye ɔdɔ a yɛwɔ ma Jehovah nye hɛnho no ma koryɛ tsena hɛn ntamu. Ka a eka ebusua a ɔtse dɛm ho no ma etse nka dɛn?—Col. 3:14; 1 Pet. 2:17.

9. Ebɛnadze na yebotum esũa efi Jesus n’asɛm a ɔwɔ Matthew 27:46 no mu?

⁹ Ebɛn asɛm na Jesus kãe? Wɔaka mber kakraabi ma Jesus ewu no, ɔdze ndze kɛse kaa mu dɛ: “Me nyankopɔn, me Nyankopɔn, ɔyɛ dɛn na apa me yi?” (Matt. 27:46) Siantsir a Jesus kãa dɛm asɛm yi no, Bible no nnkã ho asɛm. Naaso, hom mma yɛnhwɛ dza yebotum esũa efi dɛm asɛm no mu. Adze kor a yebotum esũa efi mu nye dɛ, asɛm a Jesus kãe no, nna ɔrema nkɔnhyɛ a ɔwɔ Ndwom 22:1 * no enya ne mbamu. Bio so, dɛm asɛm yi maa no mu daa hɔ pefee dɛ dɛm aber no, nna Jehovah mmbɔɔ ne Ba no ‘ho ban nnhyiae.’ (Job 1:10) Nna Jesus nyim dɛ n’Egya dze no ahyɛ n’atamfo nsa koraa mbrɛ ɔbɛyɛ a wɔbɔsɔ ne gyedzi ahwɛ ekesi dɛ obowu. Nyimpa biara nnyi hɔ a oehyia nsɔhwɛ kɛse akyɛn dza Jesus hyiae no. Ɔno da nkyɛn a, dɛm asɛm yi si do dua dɛ, nna Jesus nnyɛɛ bɔn biara a ntsi ɔsɛ dɛ woku no.

10. Asɛm a Jesus kãa kyerɛɛ n’Egya no, ebɛn esuadze na yebotum enya efi mu?

¹⁰ Ebɛnadze na yebotum esũa efi Jesus n’asɛm yi mu? Adze kor a yebotum esũa efi mu nye dɛ, ɔnnsɛ dɛ yɛhwɛ kwan dɛ Jehovah bɔbɔ hɛnho ban efi nsɛndzendzen a ɔbɔsɔ hɛn gyedzi ahwɛ no ho. Dɛ mbrɛ wɔsɔɔ Jesus hwɛe kesii owu mu no, dɛm pɛpɛɛpɛr na hɛn so, ɔsɛ dɛ yɛyɛ krado dɛ, sɛ no ho ba hia a, yebedzi nokwar ekesi owu mu. (Matt. 16:24, 25) Naaso, yɛwɔ awerɛhyɛmu dɛ Nyankopɔn remma wɔnnsɔ hɛn nnhwɛ nnkyɛn dza yebotum egyina ano. (1 Cor. 10:13) Esuadze fofor a yenya fi mu nye dɛ, tse dɛ mbrɛ wɔyɛɛ Jesus ayakayakadze ber mpo a nna ɔnnyɛɛ adze bɔn biara no, bi a hɛn so, yebehyia tsebea a ɔtse dɛmara. (1 Pet. 2:19, 20) Hɔn a wɔsoɛr tsia hɛn no, nnyɛ dɛ yɛayɛ biribi bɔn bi ntsi na wɔsoɛr tsia hɛn, mbom osiandɛ yɛnnyɛ wiadze no fã na yedzi nokwar no ho dase ntsi na wɔyɛ dɛm. (John 17:14; 1 Pet. 4:15, 16) Nna Jesus nyim siantsir a Jehovah maa kwan ma ohun amandze no. Naaso, ɔtɔ da a, Jehovah n’asomfo anokwafo binom a wohyia nsɔhwɛ no nntse siantsir a Jehovah ma kwan ma ndzɛmba ahorow bi sisi no ase dɛ mbrɛ nna Jesus tse ase no. (Hab. 1:3) Hɛn Nyankopɔn a ɔwɔ ehumbɔbɔr nye abotar no tse ase dɛ n’asomfo a wɔtse dɛm no, nnyɛ dɛ wonnyi gyedzi na mbom wohia awerɛkyekyer a nankotsee na obotum ama woeenya.—2 Cor. 1:3, 4.

11. Ebɛnadze ntsi na Jesus kãa asɛm a ɔwɔ John 19:28 no?

¹¹ Ebɛn asɛm na Jesus kãe? (Kenkan John 19:28.) Ebɛnadze ntsi na Jesus kãa dɛ: “Nsukɔm dze me”? Ɔkãa dɛm “mbrɛ ɔbɛyɛ ma kyerɛw no aaba mu.” Kyerɛw no nye nkɔnhyɛ a  ɔwɔ Ndwom 22:15 a ɔkã dɛ: “M’ahoɔdzen awew dɛ tankofɛr; na me gyirama fam m’adadaw mu.” Bio so, atseetsee a Jesus faa mu wɔ asɛndua no do nyina ekyir no, nna nsukɔm so dze no papaapa. Ntsi nna ɔrepɛ nsu anom.

12. Asɛm a Jesus kãa dɛ “nsukɔm dze me” no, ebɛnadze na yebotum esũa efi mu?

¹² Ebɛnadze na yebotum esũa efi Jesus n’asɛm yi mu? Jesus ennya adwen dɛ ɔyɛ mfom dɛ ɔbɛda mbrɛ osi tse nka edzi, na dɛmara na hɛn so ɔsɛ dɛ yɛda mbrɛ yesi tse nka edzi. Obotum aba dɛ wɔ hɛn asetsena mu no, mpɛn pii no yɛmmpɛ dɛ yɛkã dza yehia ho asɛm kyerɛ afofor. Naaso, sɛ ɔba no dɛ yehia mboa a, ɔnnsɛ dɛ yɛtwentweɔn hɛn ananadze dɛ yɛbɔhwehwɛ mboa efi afofor hɔ. Dɛ nhwɛdo no, sɛ hɛn mfe akɔ enyim anaa yennyi apɔwmudzen a, yebotum akã akyerɛ onua bi ma ɔdze ne kaar abɛfa hɛn akɔ gua mu anaa ɔdze hɛn akɔ ayarsabea. Sɛ hɛn abaw mu bu anaa hɛn werɛ how a, bi a no ho behia dɛ yɛkã hɛn asɛm kyerɛ asafo mu panyin anaa hɛn nyɛnko Christiannyi bi a noho akokwaa a obetsie hɛn anaa ɔbɛkã “asɛmpa” bi akyerɛ hɛn ma hɛn enyi aagye. (Mbɛ. 12:25) Hom mma yɛnkaa dɛ hɛn nuanom no dɔ hɛn na wɔpɛ dɛ wɔboa hɛn wɔ hɛn ahokyer ber mu. (Mbɛ. 17:17) Naaso wonnyim hɛn tsirmu asɛm. Bi a worunnhu dɛ yehia mboa gyedɛ yɛkã ana.

13. Ebɛnadze na Jesus nam n’emudzi mu a okurae kesii owu mu no do yɛe?

¹³ Ebɛn asɛm na Jesus kaẽ? Wɔ Nisan 14 ewiaber aber a nna wɔabɔ bɛyɛ ndɔn ebiasa no, Jesus dze ndze kɛse kaa mu dɛ: “Woewie!” (John 19:30) Aka kakra ma Jesus ewu no, nna onyim dɛ biribiara a Jehovah hwehwɛ dɛ ɔyɛ no, ɔayɛ ewie. Osiandɛ Jesus kuraa n’emudzi mu kesii owu mu ntsi, otumii yɛɛ ndzɛmba pii. Odzi kan, ɔmaa ɔdaa edzi dɛ Satan yɛ ɔtorfo. Jesus maa ɔdaa edzi dɛ nyimpa a odzi mũ botum ekura n’emudzi mu ekesi ase ɔmmfa ho dza Satan dze bɛyɛ no biara. Otsĩa ebien, Jesus dze no nkwa maa dɛ werdam. N’afɔrbɔ wu no buee ho kwan a ɔbɛma nyimpa a wonndzi mũ enya gyinabew pa wɔ Nyankopɔn enyim, nye ho kwan a obotum ama wɔaatsena ase afebɔɔ. Otsĩa ebiasa, Jesus maa ɔdaa edzi dɛ ɔkwan a Jehovah fa do dzi tum no fata, na ɔtseew n’Egya ne dzin no ho.

14. Ebɛnadze na ɔsɛ dɛ yesi hɛn bo dɛ yɛbɛyɛ da biara da? Kyerɛkyerɛ mu.

¹⁴ Ebɛnadze na yebotum esũa efi Jesus n’asɛm yi mu? Ɔsɛ dɛ yesi hɛn bo dɛ yɛbɔkɔ do ekura hɛn emudzi mu da biara da. Hom mma yɛnhwɛ asɛm a Onua Maxwell Friend a nna ɔkyerɛ adze wɔ Ɔweɔn-Aban Gilead Bible Skuul kãe no. Wɔ amanaman ntamu ehyiadzi bi ase no, Onua Friend kãa nokwardzi ho asɛm wɔ ɔkasa bi a ɔmae mu. Ɔkãa dɛ: “Mma nntu biribi a ibotum ayɛ no ndɛ anaa asɛm bi a ibotum akã no ndɛ no nnhyɛ ɔkyena. Ana egye dzi dɛ ɔkyena bɔto wo? Bɔ wo bra da biara tse dɛ mbrɛ ɔnye da a otwa tun wɔ w’asetsena mu a ɔbɛkyerɛ dɛ epɛ dɛ etsena ase afebɔɔ.” Ɔmbra dɛ yɛbɔbɔ hɛn bra da biara tse dɛ mbrɛ ɔnye da a otwa tun wɔ hɛn asetsena mu a yɛdze bokura hɛn emudzi mu! Dɛm no, sɛ ɔba no dɛ owu mpo na yebowu a, yebotum akã dɛ, “Jehovah, mayɛ dza mubotum biara dze ekura m’emudzi mu, makyerɛ dɛ Satan yɛ ɔtorfo, matsew wo dzin no ho na mataa wo tumdzi ekyir!”

15. Dɛ mbrɛ Luke 23:46 kyerɛ no, nna ebɛn ahotodo na Jesus wɔ wɔ n’Egya mu?

¹⁵ Ebɛn asɛm na Jesus kaẽ? (Kenkan Luke 23:46.) Jesus dze ahotodo kɛse kãa dɛ: “Egya, wo nsamu na medze mo sunsum mehyɛ.”  Nna Jesus nyim dɛ ne daakye wɔ Jehovah ne nsamu, na onyim paara dɛ n’Egya no werɛ rimmfir no da.

16. Ebɛnadze na isũa fi Ɔdasefo bi a nna oedzi mfe 15 no n’asɛm no mu?

¹⁶ Ebɛnadze na yebotum esũa efi Jesus n’asɛm yi mu? Sɛ ɔba no dɛ, wo nkwa da esian mu mpo a, kɔ do dzi Jehovah nokwar. Sɛ ibotum ayɛ dɛm a, ɔsɛ dɛ edze “wo werɛ nyina hyɛ [Jehovah] mu.” (Mbɛ. 3:5) Hom mma yɛnhwɛ Ɔdasefo bi a wɔfrɛ no Joshua a nna oedzi mfe 15 no n’asɛm no; yarba bi a ɔyɛ hũ bɔɔ no. Ɔpoow dɛ ɔbɛgye ayarsa a otsia Nyankopɔn ne mbra. Aka kakraabi ma oeewu no, ɔkãa kyerɛɛ ne maame dɛ: “Maa, mo nkwa wɔ Jehovah ne nsamu. . . . Maa, mubotum akã esi no pi akyerɛ wo dɛ: Minyim dɛ wɔ ɔkwan biara do no Jehovah benyan me. Onyim dza ɔwɔ m’akoma mu, na modɔ no papaapa.” * Ɔsɛ dɛ hɛn mu biara bisa noho dɛ, ‘Sɛ tsebea bi a ɔdze mo nkwa bɔto esian mu sɔ me gyedzi hwɛ a, ana medze mo nkwa bɛhyɛ Jehovah ne nsamu na meenya ahotodo wɔ no mu dɛ ɔbɛkaa me anaa?’

17-18. Ebɛn esuadze na yeenya? (Hwɛ adakaba a wɔato dzin “ Dza Yesũa Fi Jesus Ne Nsɛm A Otwa Tun No Mu.”)

¹⁷ Hwɛ esuadze etsitsir a yebotum enya efi nsɛm a otwa tun a Jesus kãe ansaana oruwu no mu! Wɔkaa hɛn dɛ no ho hia dɛ yɛdze afofor hɔn bɔn bɛkyɛ hɔn na yeenya ahotodo dɛ Jehovah so dze hɛn dze bɛkyɛ hɛn. Afei so, yeenya ho kwan dɛ yɛwɔ enuanom a yɛnye hɔn som a wɔayɛ krado dɛ wɔbɔboa hɛn. Naaso sɛ yehia hɔn mboa a, ɔsɛ dɛ yebisa. Bio so, yenyim dɛ Jehovah bɔboa hɛn ma yeegyina nsɔhwɛ biara a yebehyia no ano. Nkyii so, yeebohu hia a no ho hia dɛ yɛbɔbɔ hɛn bra da biara da tse dɛ mbrɛ ɔnye da a otwa tun wɔ hɛn asetsena mu a yɛdze bokura hɛn emudzi mu, na yenya awerɛhyɛmu dɛ sɛ yewu mpo a, Jehovah benyan hɛn.

¹⁸ Nokwasɛm nye dɛ, yebotum enya esuadze pii efi nsɛm a Jesus kãe ber a nna oruwu wɔ asɛndua do no mu! Sɛ yɛdze esuadze a yeenya yi yɛ edwuma a, nna yeridzi Jehovah nankasa n’asɛm a ɔkãe faa ne Ba no ho no do. Ɔkãa dɛ: “Hom ntsie no.”—Matt. 17:5.