1-2. Avan Jézi di sé dènyé pawòl-la i di la, ka ki pasé ?

NOU an 33 a épòk an nou. Sé lè 14 nizan. Yo jijé afè a Jézi, yo di kè i koupab alòskè i pa té pé pi inosan ki sa. Yo ka fè jé èvè-y, yo ka fè-y vwè bon mizè é yo ka kloué-y asi on poto-siplis. Yo ka kloué ki men a-y ki pyé a-y. Chakfwa i ka éséyé pran souf a-y, chakfwa i ka di on mo, i ka soufè bon soufè la. Men i ka palé kanmenm pas i ni onlo biten enpòwtan a di.

² An-nou palé dè sa Jézi di lè i té anlè poto-siplis-la é kè i té k’ay mò, é an-nou vwè ka sé pawòl-lasa ka aprann-nou. Si nou fè sa, sé konsi nou ka ‘kouté Jézi’ (Mat. 17:5).

3. Lè Jézi di : « Padonné-yo, Papa » pétèt dè kimoun i té ka palé ?

³ Ka Jézi di ? Lè Jézi té asi poto-siplis-la i di Pap’a-y : « Padonné-yo ». Dè kimoun i té ka palé ? Rèstan a vèwsé-la ka édé-nou konprann dè kimoun i té ka palé. Mi sa i ka di : « Pas yo pa sav sa yo ka fè » (Lik 23:33, 34). Pétèt i té ka palé dè sé Women-la ki kloué-y asi on poto pas yo pa té sav kimoun i té yé. Pétèt osi i té ka sonjé moun ki monté konplo kont li pou mété-y asi on poto (Akt 2:36-38). Men magré tousa i sibi, i pa lésé sa rann-li égri, é i pa gadé sé moun-lasa asi tchè a-y (1 Pyè 2:23). Sé pousa i mandé Pap’a-y padonné-yo.

4. Jézi té byen désidé a padonné sé moun-la ki té kont li la. Ka sa ka aprann-nou ?

 ⁴ Ka sé pawòl-la Jézi di la ka aprann-nou ? Menmjan ki Jézi, fò-nou toujou paré a padonné (Kol. 3:13). Ni onlo moun ki kont nou, é délè, sé pwòp fanmi an nou. Yo bizwen anpéché-nou sèvi Jéova. Yo pé ka fè sa pas yo pa’a konprann jan-la nou ka viv la é pas yo pa dakò èvè kwayans an nou. Défwa, yo ka manti asi nou, yo ka fè-nou hont douvan toutmoun, yo ka chiré piblikasyon an nou, yo ka mennasé-nou é yo ka simé bon kou si nou. Men olyé nou fè kòlè èvè moun ki kont nou, nou ka mandé Jéova wouvè zyé a yo. Konsa, pétèt kè on jou yo ké asèpté lavérité (Mat. 5:44, 45). Délè, nou pé ni dimal a padonné, siwtou si sa yo fè-nou la fè-nou mal toubònman. Men si nou ka lésé rankin pran rasin an tchè an nou, noumenm an nou ké pran plon adan sa. Mi sa on sè ka èspliké : « An ka rann-mwen kont kè lè an ka désidé padonné on moun, sa pa vlé di kè an dakò èvè sa i fè la oben kè an ka lésé-y pran pyé a-y asi mwen. Sa vé di tou senplèman, kè an ka woté tout rankin an pé ni an tchè an mwen » (Sòm 37:8). Lè nou ka désidé padonné, sa vé di kè nou pa’a lésé sa yo fè-nou la aji asi nou ankò (Éféz. 4:31, 32).

5. Pannan i té asi poto-la, Jézi fè on kriminèl ki té akoté a-y on bèl pwomès. Ki pwomès ésa é poukwa i fè-y pwomès-lasa ?

⁵ Ka Jézi di ? Jézi asi poto-la é ni 2 kriminèl owa a-y. Yo k’ay tchouyé-yo. Odépa, yo toulédé ka fè jé èvè tèt a Jézi (Mat. 27:44). Men apré, yonn adan yo ka rèkonnèt kè Jézi pa té fè ayen pou mérité sa (Lik 23:40, 41). Anplisdisa, i ka di i sèten kè Jézi ké résisité é kè i ké vin Wa on jou. Mi sa i di Jézi : « Jézi, sonjé-mwen lè ou ké vin adan wayòm a-w » (Lik 23:42). Misyé-lasa montré kè i té ni onlo fwa toubònman. Mi sa Jézi réponn-li : « Vréman, an ka di-w sa jòdla, ou ké èvè mwen adan paradi-la » (Lik 23:43). Nou ka konstaté kè Jézi pa di misyé-la kè ni on rézirèksyon ki ké fèt. Men i di misyé-la kè li i ké résisité. Jézi té pé ba misyé-la on bèl èspwa pou dèmen pas i té sav byen kè Pap’a-y plen mizérikòd (Sòm 103:8).

6. Ka sé pawòl-la Jézi di kriminèl-la ka aprann-nou ?

⁶ Ka sé pawòl-la Jézi di la ka aprann-nou ? Jézi kon Pap’a-y (Ébr. 1:3). Jéova vé padonné-nou é i ké fè-y sèlman si nou ka règrété vréman érè kè nou fè, é si nou ni fwa adan sakrifis a Gason a-y (1 Jan 1:7). Ni sèwten moun ki ni dimal a kwè kè Jéova ké padonné-yo on jou. Si sé ka a-w, réfléchi asi sa : Si Jézi padonné kriminèl-la ki té sòti koumansé ni fwa adan-y la, a pa vou ki ka fè éfò pou fè sa Bondyé ka mandé kè Jéova pé’é padonné ! (Sòm 51:1 ; 1 Jan 2:1, 2).

7. Sèlon Jan 19:26, 27, ka Jézi di Mari é ka i di Jan é poukwa i di-yo sa ?

⁷ Ka Jézi di ? (Li Jan 19:26, 27). Jézi té enkyèt pou manman-y pas a moman-lasa, malérèz-la té ja pèd mari a-y. Pétèt kè frè é sè a Jézi té’é pé pwokiré Mari sa i bizwen pou viv. Men ès yo té’é pé édé-y rété bon bon zanmi èvè Jéova ? Pa ni ayen an Bib-la ki ka montré kè frè a Jézi té ja ka sèvi Jéova a épòk-lasa. Pawkont, Jan sé té on apòt fidèl é sé té bon bon zanmi a Jézi. É pou Jézi,  dépi ou té ka fè volonté a Jéova, ou té an menm fanmi ki-y (Mat. 12:46-50). Jézi té enmé manman-y onlo. Sé pousa i mèt on moun pou okipé dè-y. I mandé Jan okipé dè Mari pas i té sav kè Jan té’é édé-y kontinyé sèvi Jéova. Mi sa Jézi di manman-y : « Gadé ! Mi gason a-w ! » É mi sa i di Jan : « Gadé ! Mi manman-w ! » Dépi jou-lasa, Jan mété-y ka aji èvè Mari konsi sé té manman-y é i pran swen a-y byen. Jézi montré kè i té enmé manman-y fò é kè i té ni onlo rèkonésans pou-y. I pa jen oubliyé kè dépi toupiti, Mari pran swen a-y èvè tandrès. É mi konnyéla, jou a mò a-y, Mari doubout a koté a-y.

8. Lè nou ka gadé sa Jézi di Mari é sa i di Jan, ka sa ka aprann-nou ?

 ⁸ Ka sé pawòl-la Jézi di la ka aprann-nou ? Défwa, nou pé enmé frè é sè an nou an lasanblé-la pi fò ki pwòp fanmi an nou. Pas fanmi an nou pé ban-nou bon gaz pas nou ka sèvi Jéova é yo pé jous lagé-nou. Jézi té ja di kè si nou rété bon bon zanmi èvè Jéova é si nou ka fè sa òwganizasyon a-y ka mandé, nou ké ni 100 fwa plis ki sa nou pèd. Nou ké touvé manman, papa, gason, fi an lasanblé-la ki ké enmé-nou fò (Mawk 10:29, 30). Ou ka rann-vou kont : ou adan on fanmi ki soudé ! Toutmoun-la ni fwa an Bondyé, yo enmé Bondyé é yonn enmé lòt. Si sé pou palé dè sa ou ka rèsanti, ka ou té’é di ? (Kol. 3:14 ; 1 Pyè 2:17).

9. Ka sé pawòl-la Jézi di la an Matyé 27:46 ka aprann-nou ?

⁹ Ka Jézi di ? Tibwen tan avan i mò, Jézi di sé pawòl-lasa: « Bondyé an mwen, Bondyé an mwen, poukwa ou lagé-mwen ? » (Mat. 27:46). Labib pa’a di-nou poukwa i di sa, men an-nou pran on tan pou ègzaminé ka sé pawòl-lasa vé di. Prèmyèwman, lè Jézi di sé pawòl-lasa, i réyalizé on pwofési nou ka touvé an Sòm 22:1 *. Anplisdisa lè Jézi di sé pawòl-lasa, sa té ka montré kè Jéova pa té ka pwotéjé-y ankò (Jòb 1:10). Jézi byen konprann sa Pap’a-y fè. An réyalité, Bondyé lésé-y débouyé-y tousèl a-y pou montré kè i té pé rété fidèl menmsi fò i té mò. Pa ni ponmoun si latè ki viv sa Jézi viv. Anplisdisa, sé pawòl-lasa té ka montré kè Jézi té inosan é kè i pa té mérité yo tchouyé-y konsa.

10. Lè nou ka pran on tan pou ègzaminé sa Jézi di Pap’a-y, ka sa ka aprann-nou ?

¹⁰ Ka sé pawòl-la Jézi di la ka aprann-nou ? Sé pawòl-la Jézi di la ka aprann-nou on prèmyé biten : a pa paskè nou ka sèvi Jéova kè fò-nou konpranndèdi kè i ké anpéché-nou jwenn difikilté ki ké mèt fwa an nou a léprèv. Kon nou sòti vwè, Jézi jwenn gwo éprèv toubònman. Alò, nou osi, fò-nou préparé-nou pou nou rété fidèl menmsi vi an nou an danjé (Mat. 16:24, 25). Pawkont, nou pé sèten kè Bondyé pé ké jen lésé on tantasyon nou ka sibi ay pi lwen ki sa nou pé sipòté (1 Kor. 10:13). Sa Jézi di la ka aprann-nou on dézyèm biten : menmjan ki-y, yo pé rivé a fè-nou soufè alòskè nou pa mérité sa (1 Pyè 2:19, 20). Lè yo ka pèwsékité-nou, a pa paskè nou fè on biten ki pa bon men sé davwa nou pa’a mélanjé-nou an mond-la é davwa nou ka préché bon nouvèl-la (Jan 17:14 ; 1 Pyè 4:15, 16). Li Jézi té ja byen konprann poukwa Jéova té ka lésé-y soufè. Men pawkont, ni sèwten frè é sè ki ka jwenn gwo éprèv é ki pa’a konprann poukwa Jéova ka lésé sa rivé-yo (Abak. 1:3). Men Bondyé an nou plen mizérikòd é i ni onlo pasyans. I sav byen kè lè yo ka rézonné konsa, a pa paskè yo pa ni fwa ankò men sé kè yo bizwen kè on moun konsolé-yo é sé li tousèl ki pé ba-yo konsolasyon-lasa (2 Kor. 1:3, 4).

11. Poukwa Jézi di sé pawòl-la nou ka touvé an Jan 19:28 la ?

¹¹ Ka Jézi di ? (li Jan 19:28). Poukwa Jézi di : « An swèf » ? I di sé pawòl-lasa  pou pwofési-la nou ka touvé an Sòm 22:15 réyalizé. Mi sa pwofési-lasa ka di : « An pèd fòs é an vin kon mòso potich ; lang an mwen ka kolé asi jansiv an mwen ». Nou ka tou konprann kè i té ka soufè bon soufè la. Sèten i té swèf toubònman é i té bizwen on moun ba-y tibwen dlo pou i pé sa bwè.

12. Jézi di : « An swèf ». Ka sé pawòl-lasa ka aprann-nou ?

¹² Ka sé pawòl-la Jézi di la ka aprann-nou ? Pou Jézi, sa té toutafè natirèl dè di sa i té ka rèsanti. I pa té ka vwè ayen dè mal adan sa. Sé konsa pou nou vwè sa osi. Pétèt kè nou pa enmé mandé moun tanprisouplé a yo lè zafè an nou mélé. Men fò pa nou ézité mandé lézòt édé-nou lè nou bizwen-yo. Pétèt kè si nou ja ni on bèl laj oben kè nou enfim, pétèt kè nou bizwen kè on moun fè on ti kous ban nou oben kè i menné-nou owa mèdsen-la. Si nou dékourajé, fò pa nou pè mandé on ansyen oben on zanmi ki ni èkspéryans konsolé-nou. Konsa, i ké pé édé-nou é i ké pé di-nou dè bèl ti pawòl ki ké fè-nou dibyen (Pwov. 12:25). Fò pa nou jen oubliyé kè frè é sè an nou enmé-nou é yo ké toujou paré a édé-nou lèwvwè nou an détrès (Pwov. 17:17). Men sé frè é sè-la pé pa li an tchè an nou. Donk, si nou vé kè yo édé-nou, fò-nou di-yo lè nou an pwoblèm.

13. Jézi rété fidèl a san pou san. Ka sa montré ?

¹³ Ka Jézi di ? Jou a mò a-y, koté twazè-d-laprémidi, Jézi di : « Sa réyalizé ! » (Jan 19:30). Sé pawòl-lasa ka montré kè tibwen tan avan i mò, Jézi té sav i té fè tousa Pap’a-y té vé i fè. Konm i rété fidèl a san pou san, sa pèwmèt-li montré plizyè biten. Prèmyèwman, i montré kè Satan sé on mantè. Menmsi Satan fè-y vwè bon mizè, i rété fidèl a san pou san. Sa vé di kè on nonm ki pawfé pé rété fidèl a Jéova menmsi Satan ka fè-y vwè bon mizè. Dézyèmman, Jézi bay vi a-y an ranson. Konm i sakrifyé vi a-y pou nou, nou pé vin bon bon zanmi èvè Jéova é nou ni lèspwa dè viv pou touttan ki sé an syèl-la, ki sé asi latè. Twazyèmman, Jézi montré kè Pap’ay sé méyè dirijan ki tini. É i lavé non a Pap’a-y pas Satan té sali-y toubònman.

14. Touléjou, ka fò-nou byen désidé a montré ? Bay on ti èsplikasyon.

¹⁴ Ka sé pawòl-la Jézi di la ka aprann-nou ? Touléjou, fò-nou fè tousa nou pé pou nou rété fidèl a Jéova. Frè Maxwell Friend, sé on frè ki té ka fòwmé zélèv a Galaad. Adan on lasanblé entèwnasyonal, i fè on diskou pou montré kijan pou nou rété fidèl a Jéova. Mi sa i té ka di adan diskou a-y : « Fò pa ou di kè sa pou ou fè jòdla ou ké fè-y dèmen. Pas kimoun i di-w kè dèmen ou ké la ? Alò, chakjou Bondyé fè, fò ou montré kè ou mérité viv pou touttan. » An-nou viv konsi sé dènyé fwa nou pé montré Jéova kè nou fidèl a-y. Konsa, menmsi on jou lanmò chayé-nou nou ké pé di : « Jéova, an fè tousa an té pé mwen té rété fidèl a-w, mwen té montré Satan kè i sé on mantè, mwen té lavé non a-w é mwen té montré kè sé-w ki andwa gouvèné ! »

15. Dapré Lik 23:46, dé ki biten Jézi té sèten ?

¹⁵ Ka Jézi di ? (Li Lik 23:46). Jézi té ka fè Pap’a-y konfyans a san pou san. Kifè, i pa té pè di-y : « Papa, an ka mèt lèspri an mwen an men a-w. » Jézi té sav kè sèl moun ki té pé fè on biten ba-y lè i mò, sé  Pap’a-y é i té sèten kè Pap’a-y pa té’é jen oubliyé-y.

16. Ka ègzanp a on jenn ti frè ka aprann-nou ?

¹⁶ Ka sé pawòl-la Jézi di la ka aprann-nou ? Fò ou rété fidèl a Bondyé menmsi ou ka riské dè pèd vi a-w. Pousa, fò ou « fè Jéova konfyans èvè tout tchè a-w » (Pwov. 3:5). An-nou pran ègzanp a Joshua, on jenn ti frè ki té ni 15 an. I té sav kè i té ni on maladi ki grav é kè i pa té ni onlo tan a viv. Men magrésa, lè yo té vé ba-y on trètman ki pa té annakò èvè sa Jéova ka mandé, i rèfizé pran-y. Kèlkètan avan i mò, mi sa i di manman-y : « Manman, pa pè ! Vi an mwen an men a Jéova. An sèten kè lè moman-la ké rivé, i ké résisité-mwen ! I konnèt sa ki an tchè an mwen é i sav kè an enmé-y vréman *. » Nou osi, fò nou mandé-nou : « Si janmé on jou an ka touvé-mwen adan on sitiyasyon ki rèd é kè an ka riské dè pèd vi an mwen, ès an ké rété fidèl a Jéova ? Ès an sèten kè i ké sonjé-mwen ? »

17-18. Ka nou aprann adan awtik-lasa ? (gadé ti karé-la «  Ka sé dènyé pawòl-la Jézi di la ka aprann-nou »).

¹⁷ Sé dènyé pawòl-la Jézi di la avan i mò la ka aprann-nou onlo biten toubònman. Yo ka fè-nou sonjé kè sa enpòwtan toubònman kè nou padonné frè é sè an nou é kè sa enpòwtan kè nou mèt fon an tèt an nou kè Jéova ké toujou paré a padonné-nou. Nou ka fè pawti a fanmi a Jéova é sé on fanmi ki bèl toubònman ! Frè é sè an nou toujou paré a édé-nou. Alò, lè zafè an nou mélé, fò pa nou pè mandé-yo on pal. Nou pé sèten kè Jéova ké édé-nou tchenbé kèlkèswa éprèv nou ké jwenn. Nou vwè osi kè sa enpòwtan kè nou viv konsi sé té dènyé fwa nou pé montré Jéova kè nou fidèl a-y. É nou pé sèten kè si janmé nou mò, Jéova ké résisité-nou.

¹⁸ Aaa sèlman, nou pé di kè sé pawòl-la Jézi di la lè i té asi poto-siplis-la aprann-nou onlo biten toubònman ! Si nou mèt sa nou aprann an pratik, nou ké fè sa Jéova mandé-nou, kivédi, nou ké kouté Gason a-y (Mat. 17:5).