1-2. Hali nchi Yesu alirimo amango aderhaga ebinwa byage bizinda?

LILI zuba, Siku 14, Mwezi gwa Nisani 33 N.K.Y. Enyuma y’okumala kushobekwa n’okuderha okw’ahanwe oku gosa arhajirire, Yesu ali ashekerwa, ali alibuzwa kubi, bamanamushurha mw’emisumari oku murhi gw’amalibuko. Emisumari yarhulire efune n’amagulu mage. Buli kuyisa, na buli kuderha chintu chilebe, kuli kwamulerhera amalumwa bwenene. Aliko bihemere aderhe; agwerhe ebintu by’akamaro by’okuderha.

² Rhushambalage oku binwa bizinda Yesu aderhaga amango aliri hofi kufa oku murhi gw’amalibuko, n’amasomo rhwakayiga kugerera ebyola binwa. Rhwakashuba kuderha oku, rhukala “kumuyunviriza.”​—Mt. 17:5.

3. Biboneke okw’eju ya bande Yesu aliri aderha amango aderhaga mpu: “Darha, obabalirebo”?

³ Bichi Yesu aderhaga? Bamalire kumubamba oku murhi, Yesu asalira ntya: “Darha, obabalirebo.” Bande abola Eshe ababalirage? Ebinwa bikulikire birhurhabere rhumenye abola bantu: “Barhamenyere ebi bali bajira.” (Lu. 23:33, 34) Bibonekene oku Yesu aliri aderha eju y’abasoda be Roma bashurhaga emisumari omu fune n’omu magulu mage. Kweri barhalimenyere aliri nde. Kandi, akaba ey’aliri ayibuka bantu baguma omu chigusho baliri baderha okw’ayirhwe, aliko bayinjaga kugwarha obwemere muye. (Mdo. 2:36-38) Yesu arhayemeraga obubi alikoleerwe bwarhuma agwarha ebisirani n’okubika omujinya. (1 Pe. 2:23) Chirhabuzaga arhabwira Yehova ababalire abamuyirhaga.

4. Bichi omufano gwa Yesu g’okuba juba-juba kubabalira abapinzani bage gwakarhuyigiriza?

 ⁴ Bichi ebyola binwa bya Yesu byakarhuyigiriza? Kuguma na Yesu, rhukwanene okuba juba-juba kubabalira abandi. (Kol. 3:13) Bantu baguma, kuheba han’abantu b’omulala gwerhu bakarhupinga bulala barhayunvirhe obwemere bwerhu n’okuntu rhulamire. Bakarhubeshera, bakarhukoza eshonyi embere z’abandi, bakabera ebitabu byerhu, changwa chiro bakarhushurha yi barhulibuza. Ahali h’okubika omujinya, rhwakahema Yehova afungule amasu ma balala bali barhupinga, yi lusiku luguma nji bayemera okuli. (Mt. 5:44, 45) Mango maguma rhwakabona nka birhukomerere okubabalira, ahanene nka bavire barhukolera kubi bwenene. Aliko nka rhulekere ebisirani n’omujinya bigenderere kubeera omu murhima gwerhu, rhwachilumiza rhwenyine. Mwali-werhu muguma ashambere ntya: “Nalibwene ok’okubabalira abandi kurhali kulekerera obubi changwa mpu kuyemera abandi bambonerere. Si kuli kukula omujinya omu murhima gwani.” (Zb. 37:8) Amango rhwamababalira abandi, ahola eyi rhurhasimire ebisirani byarhuma rhwabakolera kubi.​—Efe. 4:31, 32.

5. Chilagane chihe Yesu ahaga muguma mu banyankola-maligo balibambirwe eburhambi bwage, na bulagurhe amulaganyaga ntyo?

⁵ Bichi Yesu aderhaga? Banyankola-maligo babiri balibambirwe eburhambi bwa Yesu. Oku murhondero, abola banyankola-maligo bombi nabo balirhangire kuyinja bashekera Yesu. (Mt. 27:44) Aliko buzinda, muguma mubo ayinja kuleka kumushekera. Arhegera oku “nta chintu chibi” Yesu alijirire. (Lu. 23:40, 41) Ech’akamaro bwenene, ayemera oku Yesu akafuukire, na lusiku luguma akarhambwire nka mwami. Abwira Omuchunguzi waliri hofi kufa nta: “Yesu, nj’onyibuke amango waja omu Bwami bwawe.” (Lu. 23:42) Kweri oyola mulume aliyerekene obwemere bukomeere! Omu kumushubiza, Yesu aderha ntya: “Kweri inkubwirire zene, nji waba haguma nani [arhali omu Bwami, s’aliko] omu Paradizo.” (Lu. 23:43) Obwene oku mw’echola chilagane Yesu akoleseze echinwa nka “Inkubwirire,” chiyerekene okw’ali abwira oyola muntu bwage-bwage. Bulala Yesu alimenyere oku Eshe aba wa lukogo, abwira oyola nyankola-maligo waliri hofi kufa ebinwa byamuhaga obulangalire.​—Zb. 103:8.

6. Ebinwa Yesu abwiraga olala nyankola-maligo, bichi birhuyigirize?

⁶ Bichi ebyola binwa bya Yesu byakarhuyigiriza? Yesu guli mufano gushinganyanya gw’Eshe. (Ebr. 1:3) Ali juba-juba okurhubabalira n’okurhuyereka olukogo, akaba kweri rhuyunvirhe rhubabere eju y’ebintu bibi rhwajiraga mira n’akaba rhugwerhe obwemere oku rhwakababalirwa ebyaha bwerhu kugerera eshagama Yesu Kristu asheshaga. (1 Yo. 1:7) Byakakomerera bantu baguma kuyemera oku Yehova akababalirabo oku magosa mabo bajiraga mira. Akaba hanagera amango wachiyunva ntyo nawe, waza kw’echila: Bisanzi bigeke embere afe, Yesu aderha echinwa ch’olukogo k’olala nyankola-maligo wahwanzaga kuyerekana obwemere ahola han’aho. Echola chirhuyerekere bwinja oku kweri Yehova anayereka abakozi bage bimana olukogo, bali bachihangana kujira okwabo koshi yi bakenga amarhegeko mage!​—Zb. 51:1; 1 Yo. 2:1, 2.

7. Nk’oku olwandiko lwa Yohana 19:26, 27 luderhere, bichi Yesu abwiraga Mariya na Yowane, na bulagurhe aderhaga ntyo?

⁷ Bichi Yesu aderhaga? (Osome Yohana 19:26, 27.) Yesu alilonzeze nyina ashishikalwe,  wakaba ey’aliri mukana amola mango. Nkabaga bene-babo bakahere nyina ebintu by’omubiri akenere. Aliko si nde wakamurhabere agenderere kubera mwimana embere za Yehova? Ntacho chiyerekene oku bene-babo babaga bakala bali banafunzi bage mw’amola mango. Aliko, Yowane aliri ntumwa mwimana na muguma omu bera b’oku murhima ba Yesu. Yesu aliri abona balala baliri baharamya Yehova haguma naye nka mulala gwage gw’ekiroho. (Mt. 12:46-50) Yesu alizigiire Mariya, alonza kuchizera oku hali omuntu wakagenderere kumushishikala. Aj’abwira Yowane amushishikale bulala aliyinji oku Yowane akamurhabere agenderere kukolera Yehova. Abwira nyina ntya: “Hala mugala  wawe!” Abwira na Yowane ntya: “Hala nyoko!” Kurhenga olola lusiku, Yowane aba nka mugala wa Mariya n’okuhwanza kumushishikala nka nyina. Yesu aliyerekere oyola mukazi w’akamaro buzigire bunene wamushishikalaga kurhenga aburhwa, wanaliyumangire eburhambi bwage omu kasanzi aliri hofi kufa!

8. Bichi ebinwa Yesu abwiraga Mariya na Yowane byakarhuyigiriza?

⁸ Bichi ebyola binwa bya Yesu byakarhuyigiriza? Obwira bwerhu haguma na bene-berhu na bali-berhu b’Abakristu, bwakakomera kulusha obwira rhwakaba rhugwerhe n’abantu b’omulala gwerhu. Abantu b’omulala gwerhu bakarhupinga chiro n’okurhujahika, aliko Yesu alilaganyize ok’omu kuchishwekera ku Yehova n’olubaga lwage, rhwapata “kali 100 kurhaluka” ebi rhwahezeze. Rhwayinja rhwabona banene nka bali-berhu, basheja-berhu, banyama changwa badarha b’obuzigire. (Mk. 10:29, 30) Gurhe ochiyunvirhe okubona oli mulala gw’ekiroho guheberwe haguma kugerera obwemere n’obuzigire, k’okuderha obuzigire ku Yehova na ku buli muguma n’owindi?—Kol. 3:14; 1 Pe. 2:17.

9. Bichi ebinwa bya Yesu bili omu Matayo 27:46 birhuyigirize?

⁹ Bichi Yesu aderhaga? Bisanzi bigeke embere Yesu afe, ahamagala ntya na mulenge gunene: “Mungu wani wee, Mungu wani wee, bulagurhe wandekerere?” (Mt. 27:46) Ebiblia erhafasiriye bulagurhe Yesu aderhaga ntyo. Aliko, rhulolage bichi ebyola binwa byakarhuyigiriza. Chintu chiguma chili, ok’omu kuderha ebila binwa, Yesu aliri ayeneza obulebi buli omu Zaburi 22:1. * Kandi ebila binwa, byaliyerekene wazi oku Yehova arhalihebere “olugurhu l’okulanga” Omugala. (Yob. 1:10) Yesu abona oku Eshe alekerere abashombanyi bage bageregeze obwemere bwage loshi kugera oku lufu; nta muntu wachigerere kugeregezwa okuntu Yesu ageregezwaga. Kandi, eby’ola binwa byaliyerekene oku nta gosa alijirire lyakarhumire ayirhwa.

10. Masomo machi rhwakayiga kugerera ebinwa Yesu abwiraga Eshe?

¹⁰ Bichi ebyola binwa bya Yesu byakarhuyigiriza? Somo liguma rhwakayiga lili oku, rhurhakwanene kuwaza oku Yehova abuza ebibazo birharhuhikiraga byakageregeza obwemere bwerhu. Kuguma n’oku Yesu ageregezwaga kuhika oku lufu, nerhu rhukwanene kuyorha rhumenyere oku hali ok’obwemere bwerhu bwakageregezwa kuhika oku lufu. (Mt. 16:24, 25) Aliko rhuchizere oku Mungu arhakayemera rhwageregezwa kuchubusya oku rhwakagala kulembera. (1 Ko. 10:13) Hali elindi somo rhwakayiga. Kuguma na Yesu, nerhu rhwakalibuzwa na nta gosa rhwajirire. (1 Pe. 2:19, 20) Balala bali barhupinga bakajira ntyo, arhali mpu hali echintu chibi rhwajirire, si bulala rhurhali chigabi ch’egulu rhunali rhwahaana obuhamirizi eju y’okuli. (Yoh. 17:14; 1 Pe. 4:15, 16) Yesu alimenyere bulagurhe Yehova amulekaga alibuzwe. Aliko abandi bakozi bimana ba Yehova balibukire bisanzi biguma, baliri bachibaza bulagurhe Yehova alekere ebintu bibi bibahikire. (Ebr. 1:3) Mungu werhu w’olukogo onalindiira amenyere okw’abola barhahezeze obwemere bwabo; bakenere echirhulizo yenyine akahaana.​—2 Ko. 1:3, 4.

11. Bulagurhe Yesu aderhaga ebinwa bili mu Yohana 19:28?

¹¹ Bichi Yesu aderhaga? (Osome Yohana 19:28.) Bulagurhe Yesu aderhaga:  “Namayunva enyorha”? Aderhaga ntyo “omu kuyeneza olwandiko”; k’okuderha obulebi buli omu Zaburi 22:15 buderhere ntya: “Emisi yani yayumire nka lujo; olulimi lwani lwafarhene n’ebiraka-raka byani.” Kandi amalibuko moshi Yesu abaga agereremo, kuheba han’amaliri ayunva oku murhi gw’amalibuko, byakarhumire ayunva nyorha nene. Alikenere echintu ch’okumucha enyorha.

12. Bichi rhwakayiga kugerera ebinwa bya Yesu, “namayunva enyorha”?

¹² Bichi ebyola binwa bya Yesu byakarhuyigiriza? Yesu arhalibwene oku buli buhwinja okuderha okuntu aliri achiyunva; nerhu rhurhakwanene kuwaza ntyo. Ahanene omu kalamo kerhu, rhwakabona oku kuli kwinja okurhabwira abandi ebi rhulagirire. Aliko nka hamagera akasanzi rhukenere oburhabale, rhurhakwanene kuyunva engangane z’okuhema abandi oburhabale. Omufano, akaba rhushajire changwa rhugwerhe bulema bulebe, rhwakabwira mwira werhu arhujiire omu soko, changwa arhuherekeze rhuje kubonana na munganga. Akaba rhuvunikire omurhima, rhwakahema omushamuka changwa Mukristu muguma okulire ekiroho oli mwira werhu arhuyunvirize changwa arhubwire “echinwa chinja” ch’okurhuliriza. (Mez. 12:25) Rhuyibuke oku bene-berhu na bali-berhu barhuzigiire, banalonzeze kurhurhabala omu “mango m’ebibazo.” (Mez. 17:17) Aliko barhamenyere ebi rhuli rhwawaza changwa okuntu rhuli rhwachiyunva. Ntako bakamenya oku rhulagiriire oburhabale nka rhurhababwirire.

13. Bichi Yesu aliyeneze omu kugendereza obushwekerezi bwage kuhika oku lufu?

¹³ Bichi Yesu aderhaga? Sa 9 ntya, egolo lya Siku 14 Mwezi gwa Nisani, Yesu aderha ntya na mulenge gunene: “byamayenera!” (Yoh. 19:30) Ebila binwa bya Yesu birhuyigirize oku, kasanzi kageke embere afe, abaga ajirire buli chintu Yehova alisimire ajire. Omu kugendereza obushwekerezi bwage kuhika oku buzinda, Yesu aliyeneze bintu bilebe. Ech’oburhanzi, ayerekana oku Shetani ali mubeshi. Yesu ayerekana ok’omuntu mushinganyanya akagendereza obushwekerezi bwage, chiro akaba byoshi Shetani akajira. Echa kabiri, Yesu ahaana akalamo kage nka nchungu. Bulala ahaanaga akalamo kage, abantu barhali bashinganyanya bakala bakagwarha obwira na Mungu, bagwarhe n’obulangalire b’okulama esiku n’amango. Echa kasharhu, Yesu aliyerekene oku Yehova yekwanene okuba murhegesi mukulu kulusha boshi, anachesa ezino ly’Eshe oku bisobe byoshi.

14. Gurhe rhukwanene kuhigirira kulama buli lusiku? Ofasiriye.

¹⁴ Bichi ebyola binwa bya Yesu byakarhuyigiriza? Rhukwanene kuhigirira kugendereza obushwekerezi bwerhu buli lusiku. Waza oku binwa Mwene-werhu Maxwell Friend, waliri mwalimu oku Masomo me Biblia me Gileyadi aderhaga. Oku mbuganano nguma nkulu yaliri ku bene-berhu na bali-berhu barhengaga omu bindi-bindi bihugo, Mwene-werhu Friend aderha ntya mu jambo liguma oku bilolere obwimana: “Orhalingirizaga mp’omusezi yi wajira changwa mpu yi waderha ebya zene. K’oyinji akaba nji wabaho omusezi? Olame buli lusiku nka l’olusiku lwawe luzinda l’okuyerekana ok’okwanene kupata akalamo k’esiku n’amango.” Rhujage rhwalama buli lusiku nka l’olusiku lwerhu luzinda l’okugendereza obushwekerezi bwerhu! Ahola, nka rhwamaja rhwafa, rhwanaba nk’abamaderha ntya, “Yehova, najirire okwani koshi yi ngendereza  obushwekerezi bwani, omu kuyerekana oku Shetani ali mubeshi, n’omu kuchesa ezino lyawe kw’ebisobe byoshi n’okushigikira oburhegesi bwawe bukulu!”

15. Nk’oku olwandiko lwa Luka 23:46 luderhere, bichi Yesu alichizerere?

¹⁵ Bichi Yesu aderhaga? (Osome Luka 23:46.) Yesu aliderhere ntya n’obwizere boshi: “Darha, namahira eroho lyani omu fune zawe.” Yesu alimenyere okw’amango mage mayinjire mali omu fune za Yehova, analichizerere oku Eshe akamuyibukire.

16. Ebi Muhamirizi muguma waligwerhe myaka 15 ageragamo, bichi bikuyigirize?

¹⁶ Bichi ebyola binwa bya Yesu byakarhuyigiriza? Ogenderere kuba mwimana embere za Yehova, chiro akaba akalamo kawe kali m’obuhanya. Y’ogala kujira ntyo, okwanene “kulangalira Yehova n’omurhima gwawe goshi.” (Mez. 3:5) Waza oku mufano gwa Joshua, Muhamirizi waligwerhe myaka 15, wanaliri hofi kufa eju y’obulwala. Alilahire kubukwa omu njira evunire amarhegeko ma Mungu. Kasanzi kageke embere afe, abwira nyina ntya: “Mama, indi omu fune za Yehova. . . . Mama, inkubwirire ntya n’obwizere boshi: Imenyere bwinja-bwinja oku Yehova nj’anfula. Ayinji ebili omu murhima gwani, Imuzigiire bwenene.” * Kwakaba kwinja buli muguma werhu achibaze ntya, ‘Nk’obwemere bwani bwamageregezwa na chintu chilebe chakarhuma nafa, ka nakagenderera kubera mwimana emwa Yehova n’okulangalira oku nj’anyibuka?’

17-18. Masomo mahe wayigire? (Olole echisanduku “ Echi Rhwakayiga Kugerera Ebinwa Bizinda bya Yesu.”)

¹⁷ Kweri ebinwa bizinda bya Yesu birhuyigirize amasomo m’akamaro! Rhwayibwiswe oku chili ch’akamaro oku babalira abandi, n’okulangalira oku Yehova naye arhubabalira. Rhugwerhe olukengo l’okuba omu mulala gwinja gw’ekiroho gwa bene-berhu na bali-berhu bali tayari kurhurhabala. Aliko amango rhukenere oburhabale, rhukwanene kuba juba-juba kubahemabo. Rhumenyere oku Yehova nj’arhurhabala rhulembere echigeregezo choshi-choshi rhwakahurana nacho. Rhunabwene n’akamaro k’okulama buli lusiku nka l’olusiku lwerhu luzinda l’okuyerekana obushwekerezi bwerhu, n’okuchizera oku Yehova nj’arhufula nka rhufire.

¹⁸ Kweri, ebinwa bizinda Yesu aderhaga amango aliri hofi kufa oku murhi gw’amalibuko, birhuyigirize bintu binene! Omu kukolesa byoshi rhwayigire, rhwaba eyi rhuli rhwakenga ebinwa Yehova yenyine aderhaga oku bilolere Omugala: “Mumuyunvirize.”​—Mt. 17:5.