1-2. Ano ang naeksperiensiahan ni Jesus antes niya ginhambal ang katapusan niya nga mga ginsiling?

NISAN 14, 33 C.E. sadto. Gin-akusahan si Jesus sang sala nga wala niya ginhimo kag ginsentensiahan sia. Dayon, ginyaguta sia, mapintas nga ginpaantos, kag ginlansang sa usok sang pag-antos. Naglapos ang mga lansang sa iya mga kamot kag mga tiil. Kada ginhawa niya kag kada hambal niya, mabatyagan niya ang kasakit. Pero dapat gid sia maghambal kay may importante sia nga isiling.

² Binagbinagon naton ang mga ginsiling ni Jesus sang nagatagumatayon sia sa usok sang pag-antos kag kon ano ang matun-an naton sa sini. Paagi sa sini, ‘nagapamati kita sa iya.’—Mat. 17:5.

3. Sin-o ang posible nga ginpatuhuyan ni Jesus sang nagsiling sia: “Amay, patawara sila”?

³ Ano ang ginsiling ni Jesus? Sang nalansang na si Jesus sa usok, nangamuyo sia: “Amay, patawara sila.” Sin-o ang gusto niya nga patawaron sang iya Amay? Mabuligan kita sang masunod nga ginsiling ni Jesus para mabal-an kon sin-o ang posible nga ginapatuhuyan niya. Nagsiling sia: “Wala sila makahibalo sang ila ginahimo.” (Luc. 23:33, 34) Posible nga ang ginapatuhuyan ni Jesus amo ang Romano nga mga soldado nga naglansang sa iya sa usok. Wala sila kabalo nga sia ang Anak sang Dios. Posible man nga ginapatuhuyan niya ang pila ka tawo nga ato didto nga gusto gid nga ipapatay sia pero sang ulihi nagtuo sa iya. (Binu. 2:36-38) Bisan pa nag-antos si Jesus, wala sia naakig kag nagdumot sa mga naghingabot sa iya. (1 Ped. 2:23) Sa baylo, ginpangabay  niya si Jehova nga patawaron ang mga nagpapatay kag naglansang sa iya.

4. Ano ang matun-an naton sa kahanda ni Jesus nga magpatawad sa mga nagpamatok sa iya?

⁴ Ano ang matun-an naton sa ginsiling ni Jesus? Pareho kay Jesus, dapat handa man kita nga patawaron ang iban. (Col. 3:13) Posible nga pamatukan kita sang iban, lakip na sang aton mga paryente, bangod wala nila mahangpan ang aton mga ginapatihan kag ang aton paagi sang pagkabuhi. Mahimo nga sugiran nila ang iban sang indi matuod parte sa aton, pakahuy-an nila kita sa atubangan sang iban, gision ukon sunugon nila ang aton mga publikasyon, ukon basi pahugon pa gani nila kita nga sakiton nila kita. Sa baylo nga maakig, pangabayon naton si Jehova nga kuntani matun-an man sang mga nagapamatok sa aton ang kamatuoran. (Mat. 5:44, 45) Kon kaisa, posible nga nabudlayan kita magpatawad, ilabi na gid kon grabe nga pag-antos ang naagyan naton sa ila. Pero kon magdumot kita kag indi kita magpatawad, ginapabudlayan lang naton ang aton kaugalingon. Ang isa ka sister nagsiling: “Narealisar ko nga kon patawaron ko ang nakasala sa akon, indi man gali buot silingon nga ginakunsinti ko sila ukon daw wala lang sa akon ang ila ginhimo. Ginapatawad ko sila kay indi ko gusto nga magdumot sa ila.” (Sal. 37:8) Kon magpatawad kita, ginapakita naton nga indi naton gusto magdumot bisan pa ginhimuan kita sang malain.—Efe. 4:31, 32.

5. Ano ang ginpromisa ni Jesus sa isa ka kriminal nga ara sa usok sa tupad niya, kag ngaa ginpromisa niya ini?

⁵ Ano ang ginsiling ni Jesus? Sa tupad ni Jesus, may duha ka kriminal nga ara man sa mga usok sang pag-antos. Sang primero, ginayaguta nila nga duha si Jesus. (Mat. 27:44) Sang ulihi, narealisar sang isa nga “wala sing nahimo nga malain” si Jesus, gani nag-untat sia sa pagyaguta. (Luc. 23:40, 41) Ginpakita man niya nga nagapati sia nga pagabanhawon si Jesus kag mangin hari sa ulihi. Nagsiling sia sa nagatagumatayon nga Manluluwas: “Jesus, dumduma ako kon magsulod ka sa imo Ginharian.” (Luc. 23:42) Ini nga tawo may daku gid nga pagtuo. Nagsabat si Jesus sa iya: “Sa pagkamatuod ginasiling ko sa imo karon nga adlaw, mangin kaupod ko ikaw [indi sa Ginharian, kundi] sa Paraiso.” (Luc. 23:43) Talupangda nga gingamit ni Jesus ang mga tinaga nga “ko,” “imo,” kag “ikaw” nga nagapakita nga para gid sa kriminal ang iya promisa. Kabalo si Jesus nga maluluy-on ang iya Amay, gani ang iya ginsiling naghatag sing paglaum sa nagatagumatayon nga kriminal.—Sal. 103:8.

6. Ano ang matun-an naton sa ginsiling ni Jesus sa kriminal?

⁶ Ano ang matun-an naton sa ginsiling ni Jesus? Pareho gid si Jesus sa iya Amay. (Heb. 1:3) Gusto gid kita patawaron ni Jehova kag pakitaan sang kaluoy. Pero himuon lang niya ini kon nagahinulsol gid kita sa mga sala nga nahimo naton sang una kag kon nagatuo kita sa halad-gawad ni Jesucristo. (1 Juan 1:7) May pila nga indi makapati nga mapatawad pa sila ni Jehova sa ila mga sala sang una. Kon amo sini ang imo ginabatyag kon kaisa, binagbinaga ini: Antes mapatay si Jesus, ginpakitaan niya sang kaluoy ang kriminal bisan pa bag-o lang sia nagpakita sang pagtuo. Gani sigurado gid nga pakitaan ni Jehova sang kaluoy ang mga matutom nga nagasimba sa iya kag nagatuman sa iya mga sugo sa ila bug-os nga masarangan.—Sal. 51:1; 1 Juan 2:1, 2.

7. Suno sa Juan 19:26, 27, ano ang ginsiling ni Jesus kay Maria kag kay Juan, kag ngaa ginsiling niya ini?

⁷ Ano ang ginsiling ni Jesus? (Basaha ang Juan 19:26, 27.) Nabalaka gid si Jesus sa iya  iloy nga mahimo nga balo na sadto. Posible nga mahatag man sang mga utod ni Jesus ang materyal nga mga kinahanglanon sang ila iloy. Pero sin-o ang magabulig sa ila iloy para padayon sia nga mangin matutom kay Jehova? Wala kita sang mabasa sa Biblia nga nagapakita nga nangin disipulo na niya ang iya mga utod sadto nga tion. Pero suod kay Jesus ang iya matutom nga apostol nga si Juan. Para kay Jesus, pamilya niya ang mga nagaupod sa iya sa pagsimba kay Jehova. (Mat. 12:46-50) Bangod palangga ni Jesus si Maria, ginsigurado niya nga may maatipan sa iya. Gani ginpangabay niya si Juan nga mag-atipan kay Maria bangod kabalo sia nga buligan gid ni Juan si Maria nga padayon nga mag-alagad kay Jehova. Nagsiling si Jesus  sa iya iloy: “Yari ang imo anak!” Dayon, nagsiling sia kay Juan: “Yari ang imo iloy!” Sugod sadto nga adlaw, ginkabig ni Maria si Juan nga daw iya anak kag gin-atipan sia ni Juan nga daw iya gid iloy. Palangga gid ni Jesus ang iya iloy nga nag-atipan sa iya sugod sang nabun-ag sia kag ara sa tupad niya sang nagatagumatayon sia.

8. Ano ang matun-an naton sa ginsiling ni Jesus kay Maria kag kay Juan?

⁸ Ano ang matun-an naton sa ginsiling ni Jesus? Mahimo nga mas suod kita sa aton mga kauturan sa kongregasyon sangsa aton mismo pamilya. Mahimo nga pamatukan kita sang aton mga paryente ukon sikwayon pa gani nila kita. Pero suno sa ginpromisa ni Jesus, kon matutom kita kay Jehova kag sa Iya organisasyon, magadamo “sing 100 ka pilo” ang aton anak, iloy, ukon amay. Buot silingon, mas madamo ang magapalangga sa aton. (Mar. 10:29, 30) Ano ang ginabatyag mo kay may mga kauturan ka sa kongregasyon nga nahiusa bangod sang ila pagtuo kag bangod palangga nila si Jehova kag ang isa kag isa?—Col. 3:14; 1 Ped. 2:17.

9. Ano ang matun-an naton sa ginsiling ni Jesus sa Mateo 27:46?

⁹ Ano ang ginsiling ni Jesus? Antes mapatay si Jesus, nagsinggit sia: “Dios ko, Dios ko, ngaa ginpatumbayaan mo ako?” (Mat. 27:46) Wala ginapaathag sang Biblia kon ngaa ginsiling ini ni Jesus. Pero binagbinaga kon ano ang matun-an naton sa iya ginsiling. Matun-an naton nga ginatuman ni Jesus ang tagna sa Salmo 22:1. * Matun-an man naton nga sadto nga tion, wala ‘gin-amligan’ ni Jehova ang iya Anak. (Job 1:10) Nahangpan ni Jesus nga gintugutan sang iya Amay ang iya mga kaaway nga tilawan sia sing bug-os asta sa iya kamatayon. Si Jesus pa lang ang nakaagi sang amo sini nga pagtilaw. Matun-an man naton sa iya ginsiling nga wala sia sing nahimo nga sala kag wala sing rason nga patyon sia.

10. Ano ang matun-an naton sa ginsiling ni Jesus sa iya Amay?

¹⁰ Ano ang matun-an naton sa ginsiling ni Jesus? Matun-an naton nga indi kita dapat magpaabot nga amligan kita ni Jehova kon tilawan ang aton pagtuo. Pareho kay Jesus nga gintilawan sing bug-os, dapat handa man kita nga mangin matutom asta sa kamatayon. (Mat. 16:24, 25) Pero makasalig kita nga indi magtugot ang Dios nga tilawan kita labaw sa aton masarangan. (1 Cor. 10:13) Matun-an man naton nga mahimo kita mag-antos pareho kay Jesus bisan pa wala kita sing nahimo nga sala. (1 Ped. 2:19, 20) Ginapamatukan kita, indi bangod nga nakahimo kita sang malain, kundi bangod indi kita bahin sang kalibutan kag nagabantala kita sang kamatuoran. (Juan 17:14; 1 Ped. 4:15, 16) Nahangpan ni Jesus kon ngaa gintugutan ni Jehova nga mag-antos sia. Pero indi mahangpan kon kaisa sang pila ka matutom nga mga alagad ni Jehova kon ngaa gintugutan niya nga mag-antos sila. (Hab. 1:3) Nahangpan sila sang aton maluluy-on kag mapinasensiahon nga Dios. Wala sia nagahunahuna nga kulang sila sang pagtuo. Paumpawan gid niya sila.—2 Cor. 1:3, 4.

11. Ngaa ginsiling ni Jesus ang mabasa naton sa Juan 19:28?

¹¹ Ano ang ginsiling ni Jesus? (Basaha ang Juan 19:28.) Ngaa nagsiling si Jesus: “Ginauhaw ako”? Ginsiling niya ini “agod matuman ang kasulatan” ukon ang tagna sa Salmo 22:15, nga nagasiling: “Nadulaan ako sing kusog kaangay sang isa ka tipik sang kolon; nagapilit ang akon dila sa akon alingagngag.” Kag  bangod sang tanan nga gin-antos ni Jesus, lakip ang grabe nga kasakit sa usok sang pag-antos, posible gid nga nauhaw sia. Kinahanglan niya ang bulig para madula ang iya kauhaw.

12. Ano ang matun-an naton sa ginsiling ni Jesus: “Ginauhaw ako”?

¹² Ano ang matun-an naton sa ginsiling ni Jesus? Wala ginhunahuna ni Jesus nga sala kon ihambal niya ang iya nabatyagan. Dapat naton sia ilugon. May pila sa aton nga indi gusto magpangayo sang bulig sa iban. Pero kon kinahanglan naton ang bulig, indi kita dapat mahuya nga magpangayo sang bulig sa iban. Halimbawa, kon tigulang na kita ukon nagamasakit, mahimo nga kinahanglan naton pangabayon ang aton abyan nga updan kita sa pagpanindahan ukon sa doktor. Kon naluyahan kita sang buot, mahimo nga kinahanglan naton nga pangabayon ang isa ka gulang ukon ang isa ka hamtong nga utod nga pamatian kita ukon palig-unon kita. (Hulu. 12:25) Tandaan naton nga palangga kita sang aton mga kauturan, kag gusto nila nga buligan kita sa “tion sang kalisdanan.” (Hulu. 17:17) Pero wala sila kabalo sang aton ginahunahuna ukon ginabatyag. Mahimo nga indi nila mabal-an nga kinahanglan naton ang bulig kon indi naton sila pagsugiran.

13. Ano ang nahimo ni Jesus bangod nangin matutom sia asta sa iya kamatayon?

¹³ Ano ang ginsiling ni Jesus? Sang mga alas tres sang hapon sang Nisan 14, nagsiling si Jesus sing matunog: “Natuman na!” (Juan 19:30) Ginapakita sang ginsiling ni Jesus sang lapit na lang sia mapatay nga nahimo na niya ang tanan nga ginpahimo sa iya ni Jehova. Bangod nangin matutom si Jesus asta sa iya kamatayon, madamo sia sang nahimo. Una, napamatud-an niya nga butigon si Satanas. Ginpakita niya nga puede mangin matutom ang perpekto nga tawo bisan ano pa ang himuon ni Satanas. Ikaduha, ginhatag niya ang iya kabuhi bilang gawad. Bangod ginhalad niya ang iya kabuhi, posible na nga mangin suod sa Dios ang indi perpekto nga mga tawo kag may paglaum na sila nga mabuhi sing wala sing katapusan. Ikatlo, ginpamatud-an niya nga si Jehova ang may kinamatarong sa paggahom kag ginpakabalaan niya ang ngalan sang iya Amay.

14. Ano ang dapat naton panikasugan nga himuon kada adlaw? Ipaathag.

¹⁴ Ano ang matun-an naton sa ginsiling ni Jesus? Dapat naton panikasugan nga mangin matutom pirme kada adlaw. Binagbinaga ang ginsiling ni Brother Maxwell Friend, nga nangin instruktor sa Watchtower Bible School of Gilead. Sa isa ka internasyonal nga asembleya, nagpamulongpulong si Brother Friend parte sa katutom. Nagsiling sia: “Kon may gusto ka nga himuon ukon isiling kag mahimo mo man lang ini subong, indi na ini pagpabuasi. Kay man, indi kita sigurado kon buhi pa kita buas. Pensaron naton kada adlaw nga amo ini ang katapusan naton nga tsansa nga ipakita nga dapat kita padyaan sang kabuhi nga wala sing katapusan.” Kabay nga ipakita naton kada adlaw nga amo ini ang katapusan naton nga tsansa nga pamatud-an nga matutom kita. Gani kon ara kita sa sitwasyon nga mahimo kita mapatay, makasiling kita, “Jehova, ginhimo ko ang akon bug-os nga masarangan nga mangin matutom sa imo, ginpamatud-an ko nga butigon si Satanas, ginpakabalaan ko ang imo ngalan, kag ginbindikar ko ang imo pagkasoberano.”

15. Suno sa Lucas 23:46, sa ano sigurado si Jesus?

¹⁵ Ano ang ginsiling ni Jesus? (Basaha ang Lucas 23:46.) Nagasalig gid sing bug-os si Jesus sa iya Amay, gani nagsiling sia: “Amay, ginatugyan ko sa imo ang akon espiritu.” Kabalo si Jesus nga si Jehova lang ang makahatag sa iya  sang kabuhi, kag sigurado sia nga dumdumon sia sang iya Amay.

16. Ano ang matun-an mo sa eksperiensia sang 15 anyos nga Saksi?

¹⁶ Ano ang matun-an naton sa ginsiling ni Jesus? Magpabilin nga matutom kay Jehova bisan ano man ang matabo sa imo kabuhi. Para mahimo mo ini, dapat ka ‘magsalig kay Jehova sa bug-os mo nga tagipusuon.’ (Hulu. 3:5) Binagbinaga ang eksperiensia sang 15 anyos nga Saksi nga si Joshua nga may malala nga balatian nga indi na mag-ayo. Ginpangindian niya ang mga pamaagi sang pagbulong nga nagalapas sa kasuguan sang Dios. Antes sia mapatay, ginsilingan niya ang iya iloy: “Ma, si Jehova na ang bahala sa akon. . . . Sigurado ako nga banhawon ako ni Jehova. Nabasa niya ang akon tagipusuon, kag palangga ko gid sia.” * Pamangkuton naton ang aton kaugalingon, ‘Kon ginatilawan ang akon pagtuo kag mahimo nga mapatay ako bangod sini, magapabilin bala ako nga matutom kay Jehova kag magasalig nga dumdumon niya ako?’

17-18. Ano ang mga natun-an naton? (Tan-awa man ang kahon nga “ Ano ang Matun-an Naton sa mga Ginsiling ni Jesus Antes Sia Mapatay?”)

¹⁷ Madamo gid kita sang matun-an sa mga ginsiling ni Jesus antes sia mapatay. Ginapahanumdom kita sini nga dapat naton patawaron ang iban kag dapat kita magtuo nga patawaron kita ni Jehova. Nalipay gid kita nga madamo kita sang kauturan sa kongregasyon nga handa magbulig sa aton. Pero kita mismo ang dapat maghambal sa ila kon kinahanglan naton ang bulig. Kabalo kita nga buligan kita ni Jehova nga mabatas ang bisan ano nga problema. Kag dapat naton ipakita kada adlaw nga daw amo na ini ang katapusan nga tsansa nga pamatud-an nga matutom kita. Nagasalig kita nga banhawon kita ni Jehova kon mapatay kita.

¹⁸ Madamo gid kita sang natun-an sa mga ginsiling ni Jesus sang nagatagumatayon sia sa usok sang pag-antos. Kon iaplikar naton ang aton mga natun-an, ginatuman naton ang ginsiling ni Jehova parte sa iya Anak: “Magpamati kamo sa iya.”—Mat. 17:5.