1-2. Was is pasiirt foer Yeesus sayn letste wërter?

ES WAAR 14^te Nisan fom yoerkang 33 N.K. kewees. Ti layt hon tëm falx akusiirt un xultich aus kexproch, opwool eyer niks ferkheertes kemacht hat. Tii hon fon tëm kexpot, tëm kekweelt un tan tëm uf een kweel phoste aan kenaachelt. Ti neechel hon tëm sayn hënt un fiis kextoch. Un yeetes mool woo eyer luft in ketsoo hot un praucht etwas xpreche, hot es tëm fiil wee kemacht. Awer eyer hat etwas wichtiches fer se saan.

² Was hot Yeesus in tëm kweel phoste kesaat? Un was fer lisyoone khene mer too temit lërne? Tas is was mer in tiise artikel noo kuke tuun. Un es tuut uns helfe ‘tëm aan heere’. (Mat. 17:5)

3. Iwer weem waar Yeesus tsiimlich sicher am xpreche wën eyer kesaat hot: “Fater, fertsay se”?

³ Was hot Yeesus kesaat? Wii eyer ufm kweel phoste aan kenaachelt waar, hot eyer tsu Yeehoowa kepeet: “Fater, fertsay se.” Weer praycht fertsayt wëre? Yeesus sayn neekste wërter helfe uns ti antwort fine: “Tii wise net was se am mache sin.” (Luk. 23:33, 34) Fiilaycht waar tee am xpreche iwer ti romaanixe soltaate, woo hon ti neechel in tëm sayn hënt un fiis rin keklopt. Tii wuste net tas eyer Kot sayn Soon waar. Orer im xtant waar eyer iwer ti layt am xpreche, woo wolte tas eyer um keprung weyer awer woo teete noo heyer tëm sayn tisipele wëre. (Aph. 2:36-38) Yeesus is net pees orer piterlich kep weeche ti unkerechtichkheet woo eyer kelit hot. (1 Phe. 2:23) Xtats tas, hot eyer fer sayn Fater ferlangt tas Eyer fertsaye teet tii woo tëm um keprung hon.

4. Yeesus waar wilich fer se fertsaye tii woo sich keeche tëm kextelt hon. Was khene mer too temit lërne?

 ⁴ Was khene mer mit Yeesus sayn wërter lërne? Soo wii Kristus, prayche mer ti anere fertsaye. (Kol. 3:13) Welche, too tepay unser parente, khene sich keeche uns xtele; fiilaycht ferxteen se net aan was mer klaape orer warom tuun mer soo wii Kristus leepe. Im xtant, khene se keeche uns liie, uns foer te anere niter xtele, unser puplikatsyoone fernichte orer soo kaar saan tas se uns wee mache tuun. Xtats pees wëre, khene mer tsu Yeehoowa ferlange tas eyer tëne heleft ti woerheet lërne. (Mat. 5:44, 45) Manich mool, khene mer es xweyer fine se fertsaye, hauptseechlich wën mer xlecht pehantelt waare. Awer, wën mer piterlich orer pees plaype, meyer tuun uns selepst wee mache. Een xwester hot aus keleet: “Wën ich ti anere fertsaye, wil es net saan tas ich mëne tas was se kemacht hon richtich is. Un es wil aach net saan tas ich lose tëne mich ruych xlecht pehantele. In woerheet, es petayt tas ich raus suuche net pees orer piterlich plaype.” (Psal. 37:8) Wën mer ëntxlise se fertsaye, lose mer net tas tas xlechtes woo mer mit keleept hon uns pees lost. (Ëfe. 4:31, 32)

5. Was hot Yeesus fer een xpitspuup ferxproch, woo ufm kweel phoste neewich tëm am xtërpe waar? Un warom hot eyer tas kemacht?

⁵ Was hot Yeesus kesaat? Wii Yeesus ufm kweel phoste waar, es waare tswaay xpitspuupe neewich tëm, woo aach aan kenaachelt waare. Am aanfang, hon ti tswaay fon tëm kexpot. (Mat. 27:44) Awer noo heyer, eene fon tëne hot noo kelos tas mache wayl eyer kemërkt hot tas Yeesus hat ‘niks ferkheertes kemacht’. (Luk. 23:40, 41) Un noch, tee hot keklaapt tas Yeesus teet fom toot uf xtaye un wii kheenich rechiire. Tes weeche, hot tee kesaat: “Yeesus, tenk aan mich wëns tuu in tayne Raych khomst.” (Luk. 23:42) Tiise man hot een kroos klaape ketsaycht. Un weeche tas, hot Yeesus tëm keantwort: “Wërklich, ich saan teer hayt: Tuu wërst mit meer [net im Raych, awer] im Paratiis sin.” (Luk. 23:43) Mërk ti wërter woo Yeesus penutst hot: “ich”, “teer”, “tuu” un “meer”. Tiise wërter hon taytlich kelos tas tiise ferxpreche waar perseenlich kewees. Yeesus hot tas kesaat wayl eyer wust tas sayn Fater parmhërtslich is un tas Eyer fertsaye tuut. Yeesus sayn wërter hon een hofnung fer te xpitspuup kep. (Psal. 103:8)

6. Was lërne mer mit Yeesus sayn wërter fer een xpitspuup?

⁶ Was khene mer mit Yeesus sayn wërter lërne? Yeesus is tas perfekte pilt fon sayn Fater. (Hep. 1:3) Un Yeehoowa wil uns fertsaye un parmhërtslichkheet tsayche. Awer, meyer sole unser teel mache: uns wërklich peroye fon te xlechte tinge woo mer kemacht hon un aan Yeesus sayn fray khaaf opfer klaape. (1 Yo. 1:7) Welche khene es xweyer fine se klaape tas Yeehoowa tëne fertsaye khan fon te xlechte tinge woo se friier kemacht hon. Xpiirst tuu tich als mool soo? Tan, mërk mool: Yeesus hot een xpitspuup fertsayt woo kraat aan kefang hat aan tëm klaape. Wii fiil mee tuut Yeehoowa fertsaye un parmhërtslichkheet tsayche fer sayn troye tiiner, woo sich aan xtrenge fer tëm sayn kepoote aan heere! (Psal. 51:1; 1 Yo. 2:1, 2)

7. Tëm noo Yoohan 19:26, 27, was hot Yeesus fer Maria un Yoohan kesaat, un warom hot eyer tas kesaat?

⁷ Was hot Yeesus kesaat? (Lees Yoohan 19:26, 27.) * Yeesus hot sich mit sayn muter  wërklich kekhimert, woo tsiimlich sicher een witfraa waar. Tëm sayn priiter khente Maria in fiisix un materyaalix aat uf kephast hon; awer, weer teet se in kaystlich aat uf phase? Niks tsaycht tas sayn priiter waare xon tisipele kewees. Awer Yoohan waar een troy aphostel un eene fon Yeesus sayn peste froynte. Un fer Yeesus, tii woo Kot aan kepeet hon waare aach fon sayn familye — sayn kaystlich familye. (Mat. 12:46-50) Tan, weeche liip tsu Maria, hot tee Yoohan ferlangt fer tëne uf phase; eyer wust tas Yoohan teet tëne helfe Yeehoowa wayter aan peete. Tan, hot Yeesus fer Maria kesaat: “Tee too is tayn soon!” Un tee hot aach fer Yoohan kesaat: “Tii too is tayn muter!” Fon tat aan, es waar wii wën Yoohan Maria sayn soon weyer.  Un tee hot tëne keholef wii wën se sayn aychne muter weyer. Yeesus hot fiil liip ketsaycht fer tiise kiltich fraa, woo tëm liiplich uf kephast hot wii eyer uf te welt khom is, un woo neewich tëm kewees waar wii eyer kextorep is.

8. Was lërne mer fon Yeesus sayn wërter fer Maria un Yoohan?

⁸ Was khene mer mit Yeesus sayn wërter lërne? Ti froyntxaft woo mer mit unser priiter un xwestere hon khan xtërker sin wii ti froyntxaft mit unser familye. Ti parente khene sich keeche uns xtele orer uns im xtich lose; awer, wën mer ticht pay Yeehoowa un Sayn Orkanisatsyoon plaype, kriin mer “hunert mools mee” wii was mer ferloer hon, soo wii Yeesus kesaat hot. Fiile wëre wii een fater, een muter, een soon un een tochter fer uns sin. (Mar. 10:29, 30) Unser kaystlich familye is eenich weeche te klaape un ti liip tsu Yeehoowa un eene tsu te aner. Was fer een eer is teel too temit hon, kël? (Kol. 3:14; 1 Phe. 2:17)

9. Was lërne mer mit Yeesus sayn wërter in Matheus 27:46?

⁹ Was hot Yeesus kesaat? Kraat foer sayn toot, hot Yeesus mit hart xtim aus kexproch: “Mayn Kot, mayn Kot, warom host tuu mich im xtich kelos?” (Mat. 27:46) Ti Piipel leet net aus warom hot eyer tas kesaat. Awer kuk mool was khene mer mit tiise wërter lërne. Wën Yeesus tas kesaat hot, hot eyer Psalm 22:1 erfiilt. * Tas tsaycht aach tas Yeehoowa net een “tsaun” um Yeesus rom ketuun hot. (Yoop 1:10) Yeehoowa hot erlaupt tas Yeesus sayn faynte tëm pis aan toot proope teete. Khee aner mënx waar xon soo keproopt kewees un Yeesus hot tas ferxtan. Un noch: wën eyer kefroot hot ‘warom?’, hot eyer ketsaycht tas es khee uersach waar fer tëm um pringe — tee waar unxultich kewees.

10. Was lërne mer fon Yeesus sayn wërter fer sayn Fater?

¹⁰ Was khene mer mit Yeesus sayn wërter lërne? Meyer sole net waarte tas Yeehoowa uns xitse tuut fon yeete kefoer woo unser klaape proope khan. Yeesus waar pis aan toot keproopt; un mer mise aach fërtich sin fer pis aan toot troy tsu Yeehoowa plaype wën es neetich wërt. (Mat. 16:24, 25) Awer mer khene uns sicher sin tas Yeehoowa lost net tas mer mee keproopt wëre wii mer aus hale khene. (1 Kor. 10:13) Meyer lërne aach tas, soo wii Yeesus, khene mer layte opwool mer niks ferkheertes kemacht hon. (1 Phe. 2:19, 20) Ti layt woo sich keeche uns xtele mache tas, net wayl mer xultich sin, awer wayl mer khee teel fon te welt sin un wayl mer iwer ti woerheet xpreche. (Yoo. 17:14; 1 Phe. 4:15, 16) Yeesus hot ferxtan warom Yeehoowa kelos hot tas eyer keproopt weyer. Toch, anere troye tiiner fon Yeehoowa hon tsu Tëm ferlangt: ‘Warom erlaupst tuu xlechte tinge mit mich pasiire?’ (Hap. 1:3) Yeehoowa is parmhërtslich un ketultich; eyer ferxteet tas es feelt net klaape fer tiise troye tiiner — tii prauche ploos ti troost kriin woo fon tëm khomt. (2 Kor. 1:3, 4)

11. Warom hot Yeesus ti wërter fon Yoohan 19:28 kesaat?

¹¹ Was hot Yeesus kesaat? (Lees Yoohan 19:28.) * Warom hot Yeesus kesaat: “Ich hon torst”? Tee hot tas kemacht fer ‘ti Xrifte erfiile’ — es wil saan, ti profetsii fon Psalm  22:15, woo saat: “Mayn kraft hot sich ap ketrokent wii een xtik leet xisel; mayn tsung papt in mayn maul.” Un noch: Yeesus hat fiiles kelit un fiil phayn kexpiirt in tëm kweel phoste; tan, sicher hat eyer torst un praucht hilef hon fer te torst kaput mache.

12. Was lërne mer mit Yeesus sayn wërter “Ich hon torst”?

¹² Was khene mer mit Yeesus sayn wërter lërne? Yeesus hot sich net kexeemt fer ti anere saan wii eyer sich kexpiirt hot. Tas kilt aach fer uns. Welche fon uns tuun net kërn hilef fer ti anere ferlange, awer wën mer es prayche, sole mer es mache. Tsum payxpiil: wën mer alt orer krank sin, sole mer uns net xeeme een karona fer een froynt ferlange fer pis te merkaato orer pis te tokter keen. Wën mer oone muut sin, fiilaycht prayche mer hilef fer een elteste orer een rayfe krist ferlange fer uns horiche orer uf muute. (Xpr. 12:25) Meyer sole uns nii mools ferkese: ti priiter un ti xwestere liipe uns un tii wole uns helfe wën mer torich “unruyche tsayte keen”. (Xpr. 17:17) Awer tii kriin net unser ketanke leese... Tes weeche, sole mer te eyerste xrit kepe un hilef ferlange.

13. Was hot Yeesus hin kriit wayl eyer troy pis aan toot keplip is?

¹³ Was hot Yeesus kesaat? Noo mitaach, um 3 uer rom fon 14^te Nisan, Yeesus hot mit hart xtim aus kexproch: “Es is fërtich!” (Yoo. 19:30) Was lërne uns tiise wërter? Kraat foer sayn toot, hot Yeesus fërtich keprung ales was Yeehoowa fon tëm hon wolt. Wayl Yeesus troy pis aan toot keplip is, hot eyer fiiles hin kriit. Eyerst: Yeesus hot pewayst tas Satanaas een liichner is. Tee hot ketsaycht tas eene perfekte mënx khan troy tsu Kot plaype, ekaal was Satanaas keeche tëm macht. Tsweet: Yeesus hot sayn leepe wii fray khaaf opfer kep. Weeche tas, is es meechlich fer imperfekte mënxe een froyntxaft mit Kot hon un eewiche leepe kriin. Un trit: Yeesus hot pewayst tas Yeehoowa eene kerechte rechiirente is; un tee hot aach Yeehoowa sayn naame fon te liie keeche tëm sauwer kemacht.

14. Was sole mer pextimt sin yeete taach se mache? Lee tas aus.

¹⁴ Was khene mer mit Yeesus sayn wërter lërne? Meyer mise pextimt sin yeete taach troy tsu Yeehoowa sin. Yets wole mer noo kuke ti wërter fom pruuter Maxwell Friend, woo waar een leerer in te Xileat Xuul kewees. Tee hot een reet iwer troyheet in een internatsyonaal konkrës kemacht. Tee hot kesaat: “Tuu net fer moye xupe was tuu khanst hayt mache orer saan. Khanst tuu tich wërklich sicher sin tas tuu moye noch too pist? Leep yeete taach wii wën es tayn letste xans weyer fer se tsayche tas tuu fertiinst tas eewiche leepe kriin.” Xeene wërter, kël? Wole mer yeete taach leepe wii wën es unser letste keleechenheet weyer fer troy plaype. Tan, soo kaar wën mer foer te toot wëre, kriin mer es saan: “Yeehoowa, ich hon mayn pestes kemacht fer troy plaype, fer se pewayse tas Satanaas een liichner is, fer tayn naame sauwer mache un fer ti aat wiis tuu rechiirst pay xteen.”

15. Tëm noo Lukas 23:46, fon was waar Yeesus sich sicher?

¹⁵ Was hot Yeesus kesaat? (Lees Lukas 23:46.) * Yeesus hot mit kans sicherheet aus kexproch: “Fater, in tayn hënt fertraue ich mayn kayst.” Yeesus wust tas sayn futuer  waar in Yeehoowa sayn hënt kewees, un tee waar sich sicher tas sayn Fater tëm net ferkese teet.

16. Was host tuu mit Joshua sayn speryens kelërnt?

¹⁶ Was khene mer mit Yeesus sayn wërter lërne? Meyer sole wilich sin fer unser leepe in Yeehoowa sayn hënt tuun. Awer fer tas mache, prayche mer ‘uf Tëm mit kans hërts traue’. (Xpr. 3:5) Joshua, een 15 yoore alt pruuter, hot tas kemacht. Tee hat een krankheet woo teet tsum toot nëme un tee hot tratamente ap kextos woo waare keeche Yeehoowa sayn kesetse. Kraat foer sayn toot, hot eyer fer sayn muter kesaat: “Mama, ich sin in Yeehoowa sayn hënt. (...) Un Mudi, ich khan tich mit sicherheet saan: ich wees tas Yeehoowa tuut mich fom toot uf ruufe! Tee hot mayn hërts keleest, un ich liipe Tëm wërklich fiil.” * Yeete eene fon uns sol sich frooe: ‘Wën mayn klaape im frooch kextelt wërt, un mayn leepe ins kefoer is, tuun ich troy tsu Yeehoowa plaype? Tuun ich traue tas eyer sich fon mich erinere tuut?’

17-18. Was fer lisyoone hon mer kelërnt? (Kuk aach te khaste “ Yeesus sayn letste wërter un ti lisyoone hiner traan”.)

¹⁷ Meyer hon wichtiche lisyoone mit Yeesus sayn letste wërter kelërnt! Tsum payxpiil: meyer sole ti anere fertsaye un traue tas Yeehoowa uns aach fertsaye tuut. Es is een eer fer uns een wunerlich kaystlich familye hon woo imer fërtich is fer uns helfe. Awer wën mer hilef prayche, sole mer te eyerste xrit kepe un tas ferlange. Meyer wise tas Yeehoowa heleft uns mit unser proope um keen. Noch etwas woo mer kelërnt hon, is tas mer sole yeete taach aan siin wii unser letste xans fer troy plaype — soo kaar foer te toot. Meyer kriin tas hin wayl mer sicher sin tas unser leepe in Yeehoowa sayn hënt is.

¹⁸ Yeesus sayn letste wërter in tëm kweel phoste hon fiile lisyoone hiner traan. Wën mer tëne in fiire, foliche mer Yeehoowa sayn wërter iwer sayn Soon: “Heert tee aan.” (Mat. 17:5)