1-2. Nama nyadi sebedau Jesus bejaku ba kali ti penudi?

MAYA nya siang hari kena 14 Nisan, 33 Masihi. Jesus dituduh besalah taja pan iya enda ngereja utai ti salah. Iya dikeduan, diperinsa, lalu udah nya dipantang ba tiang perinsa. Jari enggau kaki iya dipantang ngena paku lawang. Tiap kali iya deka enseput sereta bejaku, nya amat tusah ba iya. Tang iya enda tau enda bejaku laban iya bisi utai ti beguna ke deka disebut.

² Aram kitai berandauka jaku Jesus lebuh iya dipantang ba tiang perinsa, lalu belajarka utai ke ulih dipelajarka kitai ari nya. Aram kitai ‘mendingka iya.’—Mat. 17:5.

3. Jaku Jesus “Apai, ampun sida” ditujuka ngagai sapa?

³ Nama utai ke disebut Jesus? Lebuh Jesus ba tiang perinsa, Jesus besampi: “Apai, ampun sida.” Ampunka sapa? Kitai ulih nemu tu ari jaku Jesus ti nangkanka tu: “Sida enda nemu utai ti dikereja diri.” (Luk. 23:33, 34) Jaku Jesus engka ditujuka ngagai soldadu Rome ke mantang jari enggau kaki iya ngena paku lawang. Sida enda nemu sapa iya ke bendar. Iya mega engka berunding pasal orang ke deka iya dibunuh, tang pengudah nya arapka iya. (SKR. 2:36-38) Jesus enda patut mati. Tang iya enda ringat tauka nyalahka sida ke merinsaka iya. (1 Pet. 2:23) Tang Jesus ngasuh Jehovah ngampunka sida ke munuh iya.

4. Nama ulih dipelajarka kitai ari Jesus ke sanggup ngampun orang ke nyakal iya?

 ⁴ Nama ulih dipelajarka kitai ari jaku Jesus? Baka Jesus, kitai patut sedia ngampun pangan diri. (Kol. 3:13) Sekeda orang, nyengkaum kaban belayan, engka nyakal kitai ketegal sida enda mereti jalai pengarap sereta chara pengidup kitai. Sida engka bebula pasal kitai, ngemaluka kitai ba mua orang bukai, ngerusakka litaricha kitai, indah ngemba deka ngemediska kitai. Ari ke berasai ringat, kitai ulih ngasuh Jehovah nulung orang ke nyakal kitai nerima pemendar. (Mat. 5:44, 45) Kekadang, kitai engka tusah deka ngampun, kelebih agi enti sida balat jai enggau kitai. Tang enti kitai terus ringat tauka enggai ngampun, kitai ngemediska diri empu. Seiku menyadi indu nerangka: “Aku sedar ngampun ukai reti aku setuju tauka ngasuh orang bukai ngambi ulih ba aku. Tang aku milih enda terus ringat ngagai sida.” (Mas. 37:8) Au, orang engka jai enggau kitai. Tang lebuh kitai milih deka ngampun, kitai enda ngelakka utai nya ngasuh kitai tusah ati sereta ringat.—Eps. 4:31, 32.

5. Nama utai ke disemayaka Jesus ngagai seiku penjenayah ke diukum ba sepiak iya, lalu nama kebuah iya ngaga semaya tu?

⁵ Nama utai ke disebut Jesus? Dua iku penjenayah sama dipantang ba sepiak Jesus. Keterubah, seduai iya ngeleseka Jesus. (Mat. 27:44) Tang pengudah nya, seiku ari seduai iya berubah. Iya nemu Jesus “nadai udah ngereja penyalah.” (Luk. 23:40, 41) Iya mega nunjukka diri arapka Jesus deka diangkatka ari pemati, lalu merintah nyadi raja. Iya madah ngagai Jesus: ‘Jesus, kingatka aku lebuh nuan datai ngagai Perintah nuan!’ (Luk. 23:42) Lelaki tu nunjukka diri bisi pengarap ti tegap ngagai iya. Jesus nyaut iya: ‘Enggau bendar aku madah ngagai nuan, sehari tu nuan deka sama enggau aku di Paradais.’ * (Luk. 23:43, nota kaki) Lebuh Jesus nyebut “aku” enggau “nuan,” tu nunjukka Jesus empu ngaga semaya enggau penjenayah nya. Jesus ulih meri pengadang tu ngagai penjenayah nya ketegal iya nemu Apai iya bisi pengasih.—Mas. 103:8.

6. Nama ulih dipelajarka kitai ari jaku Jesus ngagai seiku penjenayah?

⁶ Nama ulih dipelajarka kitai ari jaku Jesus? Jesus sama baka Apai iya. (Heb. 1:3) Jehovah keran deka ngampunka kitai sereta ngayanka pengasih. Tang Iya semina ngereja nya enti kitai nesal ati ke utai ti udah digaga kitai suba sereta arapka genselan tebus Jesus. (1 Jhn. 1:7) Sekeda orang engka tusah pechayaka Jehovah ulih ngampunka penyalah sida. Enti nuan ngasaika nya, perundingka tu: Bedau lama sebedau Jesus mati, iya nunjukka pengasih ngagai seiku penjenayah ke diukum mati. Penjenayah nya baru deka ngayanka pengarap ngagai Jesus. Jehovah tentu lebih agi nunjukka pengasih ngagai nembiak Iya ke tetap ati sereta enggau naka ulih nitihka pesan Iya!—Mas. 51:1; 1 Jhn. 2:1, 2.

7. Nitihka John 19:26, 27, nama utai ke disebut Jesus ngagai Maria enggau John, lalu nama kebuah iya nyebut nya?

⁷ Nama utai ke disebut Jesus? (Bacha John 19:26, 27.) Jesus ibuhka indai iya.  Maya nya, indai iya udah nyadi balu. Bala menyadi Jesus engka ulih nyaga utai ke diguna Maria. Tang sapa ke ulih nulung Maria tetap ati ngagai Jehovah? Maya nya, bala menyadi Jesus empai nyadi murid iya. Taja pia, bisi John, iya nya rasul ke tetap ati sereta seiku ari kaban rapat Jesus. Ba Jesus, orang ke sama nyembah Jehovah baka diri sebilik. (Mat. 12:46-50) Nya alai, ketegal Jesus rindu sereta ibuhka Maria, Jesus ngasuh John nyaga Maria. Jesus nemu John ulih nulung Maria terus nyembah Jehovah. Nya alai, ngagai Maria iya nyebut: “Tu anak nuan.” Lalu ngagai John, iya nyebut: “Tu indai nuan.” Berengkah ari maya nya, John nyadi baka anak Maria, lalu  John nyaga Maria baka indai iya. Naka meh pengerindu Jesus ngagai Maria ke udah nyaga iya ari ada lalu bisi ba sepiak iya maya iya mutuska seput!

8. Nama ulih dipelajarka kitai ari jaku Jesus ngagai Maria enggau John?

⁸ Nama ulih dipelajarka kitai ari jaku Jesus? Kaul kitai enggau bala menyadi Kristian ulih rapat agi ari kaul kitai enggau diri sebilik. Kaban belayan kitai engka nyakal kitai tauka ninggalka kitai. Tang Jesus besemaya enti kitai mengkang semak enggau Jehovah sereta gerempung Iya, kitai deka nerima “seratus kali lipat mayuh agi.” Mayuh ari sida deka nyadi baka anak, indai tauka apai ke kitai. (Mrk. 10:29, 30) Nama asai ati nuan bisi bala menyadi Kristian ke bepengerindu sereta beserakup ba pengarap?—Kol. 3:14; 1 Pet. 2:17.

9. Nama ulih dipelajarka kitai ari jaku Jesus ba Matthew 27:46?

⁹ Nama utai ke disebut Jesus? Maya iya nyauka mati, Jesus ngangau: ‘Petara aku, Petara aku, nama kebuah Nuan ninggalka aku?’ (Mat. 27:46) Bup Kudus nadai nerang kebuah Jesus nyebut munyi tu. Perundingka, nama utai ke ulih dipelajarka kitai ari jaku tu? Siti utai ke ulih dipelajarka kitai, iya nya, lebuh Jesus nyebut jaku nya, iya benung ngamatka jaku ti benabi ba Masmur 22:1. * Pia mega, jaku nya terang madahka Jehovah enda “seruran nyaga” Anak Iya. (Jop 1:10) Jesus nemu Apai iya deka ngemendarka munsuh nguji pengarap iya nyentukka iya mati. Nadai mensia kala diuji baka enggi Jesus. Nambahka nya, jaku Jesus nunjukka iya enda kala ngereja penyalah ke tau ngujungka iya diukum mati.

10. Nama ulih dipelajarka kitai ari jaku Jesus ngagai Apai iya?

¹⁰ Nama ulih dipelajarka kitai ari jaku Jesus? Siti utai ke ulih dipelajarka kitai, iya nya, kitai enda patut ngarapka Jehovah nyaga kitai ari penguji ke nguji pengarap kitai. Baka Jesus ke diuji nyentukka iya mati, kitai mega patut besedia tetap ati indah enti kitai lenyau nyawa. (Mat. 16:24, 25) Taja pia, kitai ulih andal Jehovah enda ngelakka kitai diuji lebih ari ti ulih ditatka kitai. (1 Kor. 10:13) Siti agi utai ke ulih dipelajarka kitai, iya nya, baka Jesus, kitai engka merinsa taja pan kitai enda ngereja penyalah. (1 Pet. 2:19, 20) Kitai disakal ketegal kitai ukai sebagi ari dunya sereta besaksika pemendar, ukai ketegal kitai udah ngereja penyalah. (Jhn. 17:14; 1 Pet. 4:15, 16) Jesus nemu kebuah Jehovah ngemendarka iya merinsa. Tang nembiak Jehovah ke tetap ati engka kekadang berunding kebuah Jehovah ngelakka sida merinsa. (Hab. 1:3) Jehovah ti pengasih sereta liat ati nemu sida ukai lemi ba pengarap, tang sida begunaka pengelantang ke semina ulih diberi Iya.—2 Kor. 1:3, 4.

11. Nama kebuah Jesus nyebut jaku ba John 19:28?

¹¹ Nama utai ke disebut Jesus? (Bacha John 19:28.) Nama kebuah Jesus nyebut ‘aku aus’? Iya nyebut tu kena “ngamatka Bup Kudus”—iya nya jaku ti benabi ba Masmur 22:15 ke madahka: “Batang rekung aku nyau rangkai baka amau, lalu dilah aku nyau lekat ba kelakanit aku.” Nambahka nya, pengudah Jesus diperinsa nyengkaum  dipantang ba tiang perinsa, iya berasai amat aus. Iya begunaka tulung kena muai asai aus nya.

12. Nama ulih dipelajarka kitai ari jaku Jesus ‘aku aus’?

¹² Nama ulih dipelajarka kitai ari jaku Jesus? Jesus enda ngumbai nya salah madahka asai ati iya, lalu kitai mega patut madah utai ke diasaika kitai. Ba pengidup kitai, kitai engka enggai madah ngagai orang bukai pasal utai ke diguna kitai. Tang lebuh kitai begunaka tulung, kitai enda patut kakang ati minta tulung ngagai orang bukai. Ambika chunto, enti kitai udah tuai tauka enda bepengerai, kitai engka patut minta menyadi Kristian ke ulih nganjung kitai ngagai kedai tauka betemu enggau lutur. Enti kitai tusah ati, kitai engka patut minta tuai gempuru tauka menyadi Kristian ke tegap ba pengarap mendingka kitai lalu bekunsika jaku ti siru kena “ngelantangka ati” kitai. (J-lam. 12:25) Anang enda ingat, bala menyadi rinduka kitai lalu sida deka nulung kitai “natka penusah.” (J-lam. 17:17) Tang sida enda nemu nama utai ti diperundingka kitai. Sida tusah deka nulung kitai enti kitai enda madahka diri begunaka bantu.

13. Nama utai ke udah ditembuka Jesus ketegal iya tetap ati nyentukka mati?

¹³ Nama utai ke disebut Jesus? Kira-kira pukul tiga lemai, 14 Nisan, Jesus nyebut enggau inggar: “Udah tembu!” (Jhn. 19:30) Sebedau iya mati, Jesus nemu iya udah ngereja semua utai ke diasuh Jehovah. Kesatu, iya nunjukka Sitan nya pemula. Jesus nunjukka mensia ti sempurna ulih tetap ati enda ngira nama utai ti digaga Sitan ngagai iya. Kedua, Jesus meri nyawa iya nyadika tebus. Pemati iya muka jalai ngagai mensia ti enda sempurna bisi kaul enggau Petara, lalu bisi pengadang ulih idup belama iya. Ketiga, Jesus nunjukka Jehovah nya Pemerintah ti lurus lalu ngemuliaka nama Apai iya. Semua tu ulih dikereja ketegal iya tetap ati nyentukka mati.

14. Baka ni kitai ngena pengidup kitai ninting hari? Terangka.

¹⁴ Nama ulih dipelajarka kitai ari jaku Jesus? Kitai patut bebendar ngayanka diri tetap ati ninting hari. Peratika komen Menyadi Maxwell Friend, ke gawa nyadi pengajar ba Sekula Gilead. Ba gempuru besai entarabansa, Menyadi Maxwell nyebut ba cheramah pasal tetap ati: “Anang betangguh ngereja utai ke ulih digaga tauka disebut nuan sehari tu. Baka ni nuan nemu, nuan agi idup pagila? Nya alai, kena meh pengidup nuan ninting hari enggau manah. Tunjukka diri empu layak nerima pengidup meruan belama iya.” Aram meh kitai ngena pengidup kitai ninting hari nunjukka diri empu tetap ati, indah enti kitai lenyau nyawa. Kitai ulih madah: “Jehovah, aku udah enggau naka ulih tetap ati, nunjukka Sitan nya pemula, ngemuliaka nama Nuan sereta nyukung hak Nuan merintah!”

15. Nitihka Luke 23:46, nama utai ke diandalka Jesus?

¹⁵ Nama utai ke disebut Jesus? (Bacha Luke 23:46.) Enggau penuh andal, Jesus nyebut: ‘Apai! Aku nyerahka semengat [“nyawa,” NWT] aku ngagai jari Nuan!’ Jesus nemu, pengidup iya jemah ila bepanggai ba Jehovah, lalu iya andal Apai iya deka ingatka iya.

16. Nama ulih dipelajarka nuan ari peneleba Joshua?

 ¹⁶ Nama ulih dipelajarka kitai ari jaku Jesus? Mengkang tetap ati ngagai Jehovah taja pan nuan napi penanggul ke ulih ngasuh nuan lenyau nyawa. Kena ngereja tu, nuan patut ‘manggaika diri ba Jehovah enggau pengabis ati nuan.’ (J-lam. 3:5) Peratika chunto Joshua, seiku Saksi ke beumur 15 taun. Iya napi penyakit ti raya, lalu enggai nerima chara berubat ti ngelaban adat Jehovah. Sebedau iya mati, iya madah ngagai indai iya: “Indai, Jehovah deka nyaga aku. . . . Aku ulih enggau andal madahka nuan, aku nemu Jehovah deka ngangkatka aku idup baru ari pemati. Iya nemu ati aku lalu aku amat sayauka Iya.” Tiap iku kitai ulih nanya diri empu, ‘Enti sema pengarap aku diuji nyentukka aku lenyau nyawa, ulih aku mengkang tetap ati ngagai Jehovah, lalu arapka Iya deka ingatka aku?’

17-18. Nama utai ke udah dipelajarka kitai? (Peda mega kutak “ Utai ke Dipelajarka Kitai Ari Jaku Jesus ti Penudi.”)

¹⁷ Kitai ulih belajar utai ti beguna ari jaku Jesus ti penudi. Jaku Jesus ngingatka kitai, kitai patut ngampunka orang bukai, lalu andalka Jehovah mega ulih ngampunka kitai. Kitai bisi bala menyadi Kristian ba gempuru ke sedia deka nulung kitai. Tang lebuh kitai begunaka bantu, kitai patut madahka sida. Enti kitai ditinggang penusah, kitai nemu Jehovah ulih nulung kitai betan. Lalu kitai nemu kebuah nya beguna ngayanka penetap ati ninting hari sereta andalka Jehovah deka ngangkatka kitai ari mati enti sema kitai lenyau nyawa.

¹⁸ Endang amat, jaku ke disebut Jesus lebuh iya dipantang ba tiang perinsa ngajar kitai mayuh utai! Enti kitai ngena utai ke dipelajarka kitai, kitai ulih ngasika jaku Jehovah pasal Anak Iya: ‘Pendingka iya.’—Mat. 17:5.