1-2. Yisinke ya horokere komeho Jesus a uyunge nonkango dendi dokuhulira pevhu?

SIRUWO kwa kere mutenya mo Nisani 14 momvhura 33. Konyima zapa Jesus va mu rundilire nokumupangura morwa nzo ezi ga dilire kutura, vantu kwa mu swawire nokumutoona ntani nokumupampara kositji. Awo kwa mu pamparere nombohwa kononyara nokomaguru. Nye nampili ngomu ga zuvhire kukora kokunene, age ga kere noyininke yomulyo eyi ga hepere kuuyunga.

² Tu zeni tu ka zogere nonkango edi ga uyungire Jesus kositji komeho a fe ntani tatu ka tara eyi natu lirongera ko. Monkango zimwe, tu zeni tu ka purakene kwaJesus.—Mat. 17:5.

3. Wolye nampo ga tembe Jesus apa ga uyungire asi: “Tate va dongwenena po”?

³ Yisinke ga uyungire Jesus? Apa Jesus ga kere kositji oku va mu pamparere, age kwa kandere asi: “Tate, va dongwenena po.” Wolye ga tembe Jesus? Nonkango dokukwama ko edi ga uyungire kuvhura di tu vatere tu dive ava ga tembe. Age kwa tente asi: “Kapi vana diva eyi vana kurugana.” (Ruk. 23:33, 34) Nampo Jesus kwa tembe kovakwayita woVaroma ava va mu pamparere nombohwa kononyara nokomaguru. Awo kapi va divire nawa asi yilye Jesus. Age nampo hena kwa tembe vamwe ava va tokwere ku mu dipaga, nye konyima yipo va tulire epuro mwendi. (Yirug. 2:36-38) Jesus kapi ga pulisilire nkedi ezi va mu tekwire zi mu ninkise a handuke nokukara nonkoko.  (1 Pet. 2:23) Nye age kwa pulire Jehova a gusire po ava va mu dipagere.

4. Yisinke natu lirongera ko kwaJesus kweyi ga gusilire po ava va mu rwanesere?

⁴ Yisinke natu lirongera ko kononkango daJesus? Twa hepa kugusira po wopeke ngwendi moomu gayi rugene Jesus. (Koros. 3:13) Vantu vamwe kukwatera mo vanekoro, kuvhura va tu rwanese morwa kapi va kwata egano eyi twa pura ntani nomu atu paruka. Awo kuvhura va tantere vantu yimpempa kutuhamena nokutuswaura komeho zovantu nokutavagura yimbapiratjangwa yetu ndi kuvhura va tu tjilise asi ngava tu rugana yoyidona. Mevango lyokukara nonkoko, twa hepa kupura Jehova a vatere ava ava tu rwanesa yipo ngava tambure usili ezuva limwe. (Mat. 5:44, 45) Poyiruwo yimwe ayo udigu kugusira po wopeke, unene po nsene kwa tu tekura momudona. Nye nsene tu twikira kukara nehandu nonkoko, ngatu likoresa nyamwetu komutjima. Munazinyetukadi gumwe kwa tanta asi: “Ame na yi dimburura asi kugusira po wopeke kapi ayi tanta asi eyi va rugana kuna kara yininke yoyiwa ndi asi ame ngoso kuna kuvapulisira va tekure nge momudona. Nye kugusira po kutanta asi kunyokera po kukara nehandu kwava va ku zonena.” (Epis. 37:8) Apa atu gusire po wopeke, ose ngoso kuna kunyokera po yininke yoyidona eyi ya horoka yipo yi dire kutuhandukisa.—Efe. 4:31, 32.

5. Yisinke ga tumbwidilire Jesus munamahaka gumwe ogu va mu pamparere kumwe nendi ntani morwasinke ga mu tumbwidilire?

⁵ Yisinke ga uyungire Jesus? Vanamahaka vavali kwa va pamparere koyitji kumwe naJesus. Vanamahaka owo, nawo kwa swawire Jesus pomuhowo. (Mat. 27:44) Nye konyima, gumwe po kwa hagekere kuswaura Jesus. Age ga ya dimbwilire asi Jesus “neisi ga rugana yoyidona.” (Ruk. 23:40, 41) Age hena ga tamekere kuyipura asi Jesus ngava mu vhumbura ntani ezuva limwe nga kara hompa. Age kwa tanterere Jesus asi: “Hompa, diworoka nge nsene no za moUntungi woge.” (Ruk. 23:42) Mugara ogo kwa likidire epuro lyenene. Jesus makura ta mu tantere asi: “Yosili nina kukutantera asi, naina to ka kara kumwe name moParadisa.” (Ruk. 23:43) * Nonkango daJesus kulikida asi Jesus mwene yige ga geve etumbwidiro eli komunamahaka gwina. Jesus kwa tanterere munamahaka gwina nonkango dehuguvaro morwa ga yi divire asi oGuhwe kwa kara nonkenda.—Epis. 103:8.

6. Yisinke natu lirongera ko kononkango daJesus edi ga tanterere munamahaka?

⁶ Yisinke natu lirongera ko kononkango daJesus? Jesus kuhonena oGuhwe nawa-nawa. (Heb. 1:3) Jehova ana hara kutugusira po nokutufira nkenda nsene tu litezurura kononzo detu danare ntani nokukara nepuro monzambo zaJesus Kristusa. (1 Joh. 1:7) Vamwe kuvhura yi va karere udigu kuyipura asi Jehova kuvhura kuvagusira po nonzo dawo danare. Nsene nove yimo o lizuvhu ngoso poyiruwo yimwe, diworoka sitwa esi: Komeho Jesus a fe, age kwa likidire nkenda munamahaka ogu ga tamekere kulikida epuro. Eyi kulikida asi Jehova kulikida nkenda, unene po kovakareli vendi wovalimburukwi ava ava limburukwa nompangera dendi.—Epis. 51:1; 1 Joh. 2:1, 2.

7. Kuliza naJohanesa 19:26, 27, yisinke Jesus ga tanterere Mariya naJohanesa ntani morwasinke?

⁷ Yisinke ga uyungire Jesus? (Resa Johanesa 19:26, 27.) Jesus kwa kere nosinka  kozina ava nampo va fisire mugara gwawo. Vamumbya vendi nampo va vhulire kuvatera ozina noyihepwa yopanyama. Nye yilye ga hepere kuvatera ozina pampepo? Kwato maumbangi aga ga likida asi vamumbya vendi kwa kere nawo varongwa. Nye Johanesa kwa kere mupositoli gomulimburukwi ntani kaume gwaJesus gomunene. Jesus kwa tere ava ngava karere Jehova asi awo epata lyendi lyopampepo. (Mat. 12:46-50) Jesus kwa here Mariya ntani ga kere nosinka kwendi, makura yipo ga tanterere Johanesa a va pakere mbili morwa ga yi divire asi Johanesa nga vatera Mariya a twikire kukarera Jehova. Age kwa tantererere ozina asi: “Tara ogo munoge!” ntani age kwa tanterere Johanesa asi: “Tara, ogo  nyoko!” Kutunda ezuva olyo, Johanesa kwa tere Mariya ngwendi ozina ntani ngava pakere mbili. Jesus kwa likidire eharo lyenene kozina ava va mu pakerere mbili kutunda pezuva lyehampuruko ntani awo kwa sikeme pepi nendi komeho a fe.

8. Yisinke natu lirongera ko kononkango daJesus edi ga tanterere Mariya naJohanesa?

⁸ Yisinke natu lirongera ko kononkango daJesus? Twa hepa kukara nelikwatakano lyenene novanavazinyetu kupitikana ekoro lyetu. Vanekoro kuvhura va tu rwanese nokutusigilira, nye Jesus ga tumbwidilire asi nsene tu kara pepi naJehova ntani nombunga zendi, ose ngatu gwana yoyinzi kupitakana eyi twa zumbanesa. Vapuli vakwetu ngava kara ngwendi vana vetu wovamati nava wovakadona ntani vazinya novaguhya. (Mar. 10:29, 30) Ngapi o lizuvhu kweyi wa hamena kepata lyopampepo omu mwa kara vantu ava va kara mouumwe morwa epuro ntani morwa va hara Jehova novapuli vakwawo?—Koros. 3:14; 1 Pet. 2:17.

9. Yisinke natu lirongera ko kononkango daJesus edi da kara mwaMateusa 27:46?

⁹ Yisinke ga uyungire Jesus? Komeho tupu a fe Jesus, age kwa zigilire asi: “Karunga gwange, Karunga gwange, yisinke yokusigilira nge?” (Mat. 27:46) Bibeli kapi za faturura konda zeyi Jesus ga uyungilire nonkango odo. Nye tu tareni eyi natu lirongera ko kononkango odo. Sininke simwe esi tuna kulirongera ko sesi asi apa Jesus ga uyungire nonkango edi, age kwa sikisire mo uporofete ou wa kara mEpisarome 22:1. * Ntani nonkango odo kwa likidire nawa-nawa asi Jehova kapi ga ‘gamenene’ ndi a popere Munwendi. (Joba 1:10) Jesus ga yi kwete egano asi oGuhwe kwa pulisilire nonkore dendi di heteke epuro lyendi dogoro konomfa. Kwato muntu ogu va heteka unene ngwendi Jesus. Nonkango odo kulikida hena asi Jesus kapi ga rugene nzo ezi ngano za mu twaredesere va mu dipage.

10. Yisinke natu lirongera ko kononkango daJesus edi ga tanterere oGuhwe?

¹⁰ Yisinke natu lirongera ko kononkango daJesus? Sirongwa simwe tuna kulirongera ko kuna kara asi twa ha ndindira Jehova a tu popere komaudigu aga naga heteka epuro lyetu. Ngwendi moomu tupu va mu hetekere Jesus dogoro konomfa, nose twa hepa kulimburukwa dogoro konomfa detu. (Mat. 16:24, 25) Nye twa hepa kudiworka asi Karunga kapi nga tarerera maheteko ga pitakane nonkondo detu. (1 Kol. 10:13) Sirongwa simwe tuna kulirongera ko sesi asi nose kuvhura ngava tu tekure momudona ngwendi Jesus. (1 Pet. 2:19, 20) Vantu kutuhepeka morwa kapi twa hamena kouzuni ou ntani morwa yeeyi a tu zuvhisa, nye kapisi asi morwa koyili yoyidona eyi atu rugana. (Joh. 17:14; 1 Pet. 4:15, 16) Jesus ga kwete egano konda zeyi Jehova ga mu pulisilire a hepe. Nye vakareli vaJehova vamwe ava va li gwanekerere nomaudigu kwa li pulire asi morwasinke Jehova a pulisilire yininke yimwe yi horoke. (Hab. 1:3) Karunga gwetu gonkenda nelididimiko ga yi diva asi vantu vangoso va kara nepuro, nye vana hepa ehengagwido lyokutunda kwendi.—2 Kol. 1:3, 4.

11. Morwasinke Jesus ga uyungilire nonkango da kara mwaJohanesa 19:28?

¹¹ Yisinke ga uyungire Jesus? (Resa Johanesa 19:28.) Morwasinke Jesus ga uyungilire asi: “Na fu enota”? Age kwa yi rugene yipo  a sikise mo uporofete ou wa kara mEpisarome 22:15, ou au tanta asi: “Muliu gwange kuna kukuta ngwendi sikwangwa, ano eraka lyange lina kakatere mokana kange.” Ntani mokumona asi Jesus kwa mu hepekere unene kukwatera mo kukora oku ga lizuvhire apa va mu pamparere kositji, age nampo ga fire kenota. Age ga hepere evatero yipo a dire kukara nenota unene.

12. Yisinke natu lirongera ko kononkango daJesus asi “Na fu enota”?

¹² Yisinke natu lirongera ko kononkango daJesus? Jesus kapi ga gazarere asi ayo epuko kuuyunga omu ga lizuvhire, yipo nye, nose twa hepa kuuyunga omu tuna kulizuvha. Vamwe vetu kapi twa hara kupura evatero. Nye nsene tuna hepa evatero, twa hepa kupura vakwetu va tu vatere. Pasihonena, nsene asi tuna kurupa ndi kuvera-vera, kuvhura tu pure ko mukwetu a tu tware kositora ndi kwandokotora. Nsene tuna dompo mutjima ndi tuna guwu, kuvhura tu pure mukuronambunga ndi Mukriste mukwetu ogu ga kura pampepo a tu korangede. (Yis. 12:25) Tu diworokeni asi vanavazinyetu kwa tu hara ntani vana hara kutuvatera ‘moyiruwo youdigu.’ (Yis. 17:17) Nye kapi va diva malizuvho getu ndi eyi atu gazara. Awo kuvhura va dire kudiva asi tuna hepa evatero, yipo nye, ntudi twa hepa kuvatantera.

13. Yisinke ga sikisire mo Jesus apa ga limburukwire dogoro konomfa dendi?

¹³ Yisinke ga uyungire Jesus? Koyiha yovili zautatu kositenguko moNisani 14, Jesus kwa zigilire asi: “Yina siki mo.” (Joh. 19:30) Nonkango daJesus kuna kuturonga asi komeho a fe, age kwa sikisire mo nayinye eyi ga mu tanterere Jehova. Mokumona asi Jesus kwa limburukwire dogoro konomfa dendi, age kwa sikisire mo yininke yoyinzi. Sokuhova, age kwa yi likidire asi Satana munayimpempa. Jesus kwa yi likidire asi muntu gokusikilira mo kuvhura kutwikira kulimburukwa yi kare asi yisinke na rugana Satana. Sauvali, Jesus kwa geve eparu lyendi ngosizoweseso. Nomfa dendi kwa gava mpito kovantu wokudira kusikilira mo yipo va kare nelikwatakano naKarunga ntani nokuvapa ehuguvaro lyokukaparuka narunye. Sautatu, Jesus kwa yi likidire asi Jehova yige mupangeli gouhunga ntani ga zeresere edina lyoGuhwe koyimpempa.

14. Yisinke natu tokomena kurugana nkenye ezuva? Faturura.

¹⁴ Yisinke natu lirongera ko kononkango daJesus? Twa hepa kulimburukwa Jehova nkenye ezuva. Koneka nonkango edi ga uyungire munazinyetu gomugara Maxwell Friend ogu ga kere murongi koSikora zoBibeli zaGiliyata. Posigongi simwe, munazinyetu Friend kwa geve siuyunga sokuhamena ulimburukwi. Age kwa uyungire mo asi: “Wa ha ndindira dogoro mungura ntani ngo rugana ndi o uyunge yuma. O yi diva asi mungura ngo kara muzuni ndi? Paruka nkenye ezuva ngwendi asi yizo mpito zoge zokuhulilira mokulikida ulimburukwi woge.” Ngano tu paruke nkenye ezuva ngwendi asi yizo mpito zetu zokuhulilira mokulikida ulimburukwi wetu. Makura nsene ngatu fa, ose kuvhura ngatu uyunge asi “Jehova ame na rugana paapa na hulira ni kwaterere koulimburukwi wange nokulikida Satana asi munayimpempa nokupongoro edina lyoge ntani nokukwatesa ko upangeli woge.”

15. Kuliza naRukasa 23:46, yisinke ga pulire nawa-nawa Jesus?

¹⁵ Yisinke ga uyungire Jesus? (Resa Rukasa 23:46.) Jesus kwa uyungire nehuguvaro  asi: “Tate, mwenyo gwange tani gu gava momawoko goge!” Jesus ga yi divire asi eparu lyendi lyokomeho kwa korerere mwaJehova ntani ga yi pulire nawa-nawa asi oGuhwe ngava mu diworoka.

16. Yisinke ono lirongere ko kosihonena somudinkantu gomumati gonomvhura 15?

¹⁶ Yisinke natu lirongera ko kononkango daJesus? Twikira kulimburukwa Jehova nampili eparu lyoge mosiponga lina kara. Mokuyirugana oyo, wa hepa ‘kuhuguvara mwaJehova nomutjima goge nagunye.’ (Yis. 3:5) Koneka sihonena somudinkantu gomumati goMbangi zaJehova gonomvhura 15 ogu nga vere unene. Age kwa nyokere kutambura uhaku ou wa lilimba nonompango daKarunga. Komeho tupu a fe, age kwa tanterere ozina asi: “Yina, Jehova nga pakera nge mbili. . . . Ta ni mu tantere nehuguvaro asi ame na yi diva asi Jehova nga ka vhumbura nge. Ga diva magazaro gange ntani na mu hara.” Natuvenye twa hepa kulipura asi, ‘nsene ngani li gwanekera noukaro ou ngau heteka epuro lyange, ngani limburukwa Jehova nokumuhuguvara asi nga diworoka nge ndi?’

17-18. Yisinke tuna lirongo mosirongwa esi? (Tara kakende “ Eyi natu lirongera ko kononkango edi ga uyungire Jesus komeho a fe.”)

¹⁷ Yisinke natu lirongera ko kononkango edi ga uyungire Jesus komeho a fe? Tuna lirongere ko asi twa hepa kugusira po wopeke ntani nokukara nehuguvaro asi Jehova ngatu gusira po. Ose twa kara novapuli vakwetu ava nava vhura kutuvatera. Nye nsene tuna hara evatero, twa hepa kuvapura. Twa yi diva asi Jehova ngatu vatera tu lididimikire maudigu aga ngatu ligwanekera nago. Ntani twa dimburura mulyo gokuparuka nkenye ezuva ngwendi asi yizo mpito zetu zokuhulilira mokulikida ulimburukwi wetu nokuyipura asi Jehova ngatu vhumbura nsene tu fa.

¹⁸ Yousili nonkango edi ga uyungire Jesus apa va mu pamparere kositji, kuvhura tu lirongere ko yoyinzi. Nsene tu sikisa mo eyi tuna lirongo, ose ngoso kuna kulimburukwa nonkango edi ga uyungire Jehova kuhamena Munwendi asi: “Omu mu zuvhe.”—Mat. 17:5.