1-2. Amwaambe shakacitika Yesu kaatana kwaamba maswi akweelaako.

CAKALINGA ciindi camalumwi pabushiku bwa Nisani 14, mumwaaka wa 33 C.E. Pesule lyakubekesha Yesu makani akubeca akumupa mulandu ngwaatana kucita, bakatalika kumucobola, kumupensha, lyalo bakamupopa pacisamu cakupenshesha. Bakamupopa misipikili kumaansa alimwi akumyeendo. Aboobo kuyooya kabotu akwaamba cakalinga ciyumu. Nacibi boobo, wakalinga kuyandika kwaamba, mukwiinga kwakalinga makani ayandika ngaakalinga kweelete kwaamba.

² Amuleke tubandike maswi Yesu ngakaamba ndyaakalinga kufwa pacisamu cakupenshesha akubona nsheenga tweeyawo. Kucita boobo kutootucafwa ‘kumunyumfwila.’​—Mate. 17:5.

3. Ino cilyeelete mbaani Yesu mbaakalinga kwaamba ndyaakaamba ayi: “Ta, amubalekelele”?

³ Ino Yesu wakaamba nshi? Yesu ndyakapopwa pacisamu, wakapaila ayi: “Ta, amubalekelele.” Ino wakalinga kwaamba pakulekelela baani? Maswi atokonkelaawo inga atucafwa kushiba mbaakalinga kwaambawo. Wakaamba ayi: “Tabeshi ncebatoocita.” (Luka 23:33, 34) Cilyeelete Yesu wakalinga kwaamba pa bashilumamba ba bene Loma abo bakamupopa misipikili kumaansa alimwi akumyeendo. Tabakalinga kumushiiwo ayi ngani. Alimwi mpashi cilyeelete Yesu wakeelikawo bamwi mulikoto bakalinga kuyuminisha ayi apopwe sombi mukuya kwaciindi bakalinga kusa mukushoma muli nguwe. (Milimo 2:36-38) Yesu taakalinga kweelete kucaikwa. Nacibi boobo, taakwe kukalala akukaka kulekelela baabo bakalinga kumupensha. (1 Pit. 2:23) Muciindi cakucita boobo, wakasenga  Yehova kwaamba ayi alekelele baabo bakamucaya.

4. Ino nshiinshi nsheenga tweeya kuswa kucakubonenaako cakwe Yesu cakulekelela bakalinga kumupensha?

⁴ Ino nshiinshi nsheenga tweeya kuswa ku maswi Yesu ngakaamba? Bweenka Yesu mbwaakacita, aswebo tulyeelete kulekelela bamwi. (Kolo. 3:13) Bantu bamwi kwiilikaawo abeshikamukowa inga batupikisha ceebo cakwaamba ayi tabanyumfwishishi nshetushoma alimwi abuumi mbotwakasala. Inga batubekesha makani, kutulensha nsoni pabantu, kunyonyoola mabuku esu, nabi kutuloondesha ayi batootuuma. Muciindi cakubabikila mfundilishi, inga twapaila kuli Yehova kwaamba ayi abacaafwe bushiku bumwi bakeeye cancine. (Mate. 5:44, 45) Cimwi ciindi inga catubeta ciyumu kulekelela bamwi, bunene bunene na bakatucitila shintu shibiibi abuumbi. Nacibi boobo, kutolelela kubikila mfundilishi akutalekelela bamwi nkuliletela mapensho. Nankashi umwi wakaamba ayi: “Ndicishi kwaamba ayi na ndalekelela bamwi tacaambi ayi ico ncobakacita cakalingabo kabotu na mpashi kwaamba ayi ndakondwa bamwi kuncitila shibiibi. Sombi cilasansulula kutatolelela kubikila mfundilishi.” (Kulu. 37:8) Na twalekelela bamwi nkokwaamba ayi twasala kutatolelela kuba ukalalite pashibiibi nshobakatucitila.​—Efe. 4:31, 32.

5. Ino Yesu wakashomesha nshi kumwiipi womwi pabaabo bakalinga bapopwa pomwi anguwe, alimwi ino nceebonshi ncaakamushomeshela?

⁵ Ino Yesu wakaamba nshi? Kwakalinga beepi bobilo bakapopwa pomwi a Yesu pashisamu shakupenshesha. Pakutaanguna, bamucita shibiibi boonse bobilo abalo bakatalika kucobola Yesu. (Mate. 27:44) Ano ndipakeenda ciindi, womwi pabaabo wakacileka kumucobola. Wakesa mukubona kwaamba ayi “taaku cibiibi” Yesu ncaakacita. (Luka 23:40, 41) Alimwi wakaamba shakatondesha kwaamba ayi wakalinga kushoma ayi Yesu alaakubushikwa kuswa kubafu alimwi bushiku bumwi alaakuba mwaami. Aboobo wakaambila Yesu ayi: “Yesu, ukanjibaluke waakunjila mu Bwaami bwako.” (Luka 23:42, NWT) Musankwa uyu wakatondesha ayi wakalinga kucite lushomo luyumu! Aboobo Yesu wakakumbula ayi: “Ncakwiila ntookulwiita sunu ayi, ulaakuba andime mu Paladaiso.” (Luka 23:43, NWT) Maswi akaamba Yesu alatondesha ayi Yesu mwiine ngwaakashomesha mwiipi ulya, mukwiinga wakasebensesha maswi akwaamba ayi “ntookulwiita,”alimwi ayi “ulaakuba andime.” Yesu wakashomesha mwiipi ulya ceebo wakalinga kucishi ayi baIshi balicite nkumbu.​—Kulu. 103:8.

6. Ino nshiinshi nsheenga tweeya ku maswi Yesu ngaakalwiita mwiipi?

⁶ Ino nshiinshi nsheenga tweeya kuswa ku maswi Yesu ngakaamba? Yesu alibo bweenka mbuli baIshi. (Ebu. 1:3) Yehova alisuni abuumbi kutulekelela akututondesha nkumbu. Nacibi boobo, inga wacita boobo na twaana cancinencine kuswa kushibiibi nshetwakalinga kucita kale kale akutondesha ayi tulashoma mumulambu wacilubula cakwe Yesu Klistu. (1 Joni 1:7) Bamwi balaalilwa kushoma ayi Yehova inga wabalekelela shibiibi nshebakacita kale kale. Na amwebo cimwi ciindi mbomulinyumfwa, amuyeeye paceeci: Yesu ndyaakalinga pafwiifwi akucaikwa, wakaamba maswi akatondesha ayi wakanyumfwila nkumbu musankwa ulya wakalinga mwiipi, uyo wakatondesha lushomo muli Yesu peenka palya. Aboobo, Yehova inga taalilwi kunyumfwila nkumbu basebenshi bakwe bashomeka, batokweelesha kucita nsheenga bacikonsha kwaamba ayi bakonkele milawo yakwe!​—Kulu. 51:1; 1 Joni 2:1, 2.

7. Kweelana a Joni 19:26, 27, ino nshiinshi Yesu nshaakalwiita Maliya a Joni, alimwi ino nceebonshi?

⁷ Ino Yesu wakaamba nshi? (Amubelenge Joni 19:26, 27.) Yesu wakalinga kubikila maano abuumbi kuli banyina mpashi bakalinga bamukalubinje. Mpashi banike bakwe mbobakalinga kweelete kutolelela kulama banyina lwakumubili. Ino mbuyani lwakumushimu?  Taakuwo bumboni butondesha kwaamba ayi bamakwabo Yesu bakalinga bashikwiiya bakwe paciindi ici. Nacibi boobo, Joni wakalinga mutumwi ushomeka alimwi wakalinga womwi pabaabo bakalinga kunyumfwana abuumbi a Yesu. Aboobo boonse bakalinga kupaila Yehova pomwi anguwe, Yesu wakalinga kubabona mbuli mukwashi wakwe wakumushimu. (Mate. 12:46-50) Aboobo mukwiinga Yesu wakalinga kumusuni abuumbi Maliya alimwi wakalinga kumubikilaako maano, wakalwiita Joni ayi anomulama mukwiinga wakalinga kucishi ayi inga wacafwa Maliya kutolelela kusebensela Yehova. Aboobo wakalwiita banyina ayi: “Amubone! Ngooyu mwanaanu!” Alimwi wakalwiita Joni ayi: “Bona! Mbaaba banyoko!” Kuswabo bushiku bulya, Joni wakalingabo anga ngu mwanaakwe Maliya, alimwi wakalinga kulama Maliya bweenkabo  mbuli banyina. Yesu wakatondesha patuba kwaamba ayi wakalinga kubasuni abuumbi banyina bakamulama kabotu ndyaakashalwa, alimwi bakalinga akwe pafwiifwi ciindi ndyaakalinga kufwa!

8. Ino nshiinshi nsheenga tweeya kuswa ku maswi Yesu ngaakalwiita Maliya a Joni?

⁸ Ino nshiinshi nsheenga tweeya kuswa ku maswi Yesu ngakaamba? Inga twaba abushicibusa buyumu abuumbi abamakwesu abenankashi kwiinda bushicibusa mbotucite abeshikamukowa besu. Beshikamukowa besu inga batupikisha na kutukaka, nacibi boobo, Yesu wakatushomesha ayi na twatolelela kuba pafwiifwi a Yehova alimwi alibunga Lyakwe, tulaakutambula shintu shiinji kwiinda sheesho nshetwakashiya. Baanji balaakutusuna alimwi balaakubabo anga mbana besu banakashi, bana besu basankwa, bashali besu banakashi na bashali besu basankwa. (Maako 10:29, 30) Ino mulalinyumfwa buyani kuba lubasu lwamukwashi wakumushimu wabantu bacatene ceebo cakwaamba ayi balicite lushomo, balisunene, alimwi basuni Yehova?​—Kolo. 3:14; 1 Pit. 2:17.

9. Ino nshiinshi nsheenga tweeya kuswa ku maswi Yesu ngakaamba ngotucana pa Mateyo 27:46?

⁹ Ino Yesu wakaamba nshi? Yesu ndyaakalinga pafwiifwi akufwa wakaamba ayi: “NobaLesa bangu, nobaLesa bangu, ino nciinshi ncemwandekeleshesha?” (Mate. 27:46) Baibo tayaambi cakapa kwaamba ayi Yesu aambe maswi aya. Nacibi boobo amubone nshetwiiya kuswa ku maswi aya. Comwi nceenga tweeyawo ncakwaamba ayi Yesu ndyaakaamba maswi aya wakalinga kukumanisha bushinshimi bulembetwe palilembo lya Kulumbaisha 22:1. * Kwiilikaawo, maswi aya akatondesha patuba kwaamba ayi Yehova, taakalinga kushitilisha Mwanaakwe. (Jobo 1:10) Yesu wakalinga kucishi kwaamba ayi baIshi bakasuminisha balwani bakwe kwaamba ayi beeleshe lushomo lwakwe kushikila kulufu. Taakuwo muntu wakeeleshekwa mbuli mbwaakeeleshekwa Yesu. Alimwi maswi aya alatondesha ayi taakuwo mulandu ngwaakacita ngwakalinga kweelete kufwitaawo.

10. Ino nshiinshi nsheenga tweeya kuswa ku maswi Yesu ngaakalwiita baIshi?

¹⁰ Ino nshiinshi nsheenga tweeya kuswa ku maswi Yesu ngakaamba? Comwi nceenga tweeya ncakwaamba ayi tatweelete kulangila ayi Yehova alaakunootushitilisha mumapensho oonse eenga eelesha lushomo lwesu. Alimwi bweenka lushomo lwakwe Yesu mbolwakeeleshekwa kushikila kulufu, aswebo tulyeelete kuba balibambite kutolelela kushomeka kushikila kulufu na kaciyandika. (Mate. 16:24, 25) Nacibi boobo, inga twashoma cakutatoonsha kwaamba ayi Lesa teshi akatulekeleshe kwiinda mumeelesho ngeenga tatucikoonshi kukoma. (1 Koli. 10:13) Alimwi cimwi nceenga tweeya ncakwaamba ayi inga batupensha nabi kwaamba ayi taaku cibiibi ncetwacita. (1 Pit. 2:19, 20) Abo beshikutupikisha tabaciti boobo paceebo cakwaamba ayi kuli cibiibi ncetwacita sobwe, balatupikisha mukwiinga tatubete lubasu lwa cishi alimwi tulashimikila cancine. (Joni 17:14; 1 Pit. 4:15, 16) Yesu wakalinga kucishi Yehova ncaakasuminishila kwaamba ayi apenshekwe. Nacibi boobo, cimwi ciindi basebenshi bakwe Lesa bashomeka abo beenda mumapensho balaalilwa kunyumfwishisha Yehova ncaalekela shintu shimwi kubacitikila. (Abaku. 1:3) Lesa wesu shinkumbu alimwi ukalika moyo alicishi kwaamba ayi kucita boobo teshi kubula lushomo. Ncebayandika nkuyuminishikwa kuswa kuli Lesa eenkabo.​—2 Koli. 1:3, 4.

11. Ino nciinshi cakapa kwaamba ayi Yesu aambe maswi ngotucana pa Joni 19:28?

¹¹ Ino Yesu wakaamba nshi? (Amubelenge Joni 19:28.) Ino nciinshi Yesu ncakaambila ayi: “Ndafwa nyotwa”? Wakacita boobo kwaamba ayi “malembo akumanishikwe,” nkokwaamba ayi  bushinshimi mbotucana palilembo lya Kulumbaisha 22:15, yaamba ayi: “Nkusu shangu shayuma nta anga ncikaye; awalo mulaka wangu wacatilila kwiculu.” Alimwi cilyeelete kwaamba ayi pesule lyakupenshekwa abuumbi, uko kwakeelikaawo akumupopa pacisamu cakupenshesha, Yesu wakafwa nyotwa abuumbi. Wakalinga kuyandika bakumupako maanshi akunwa.

12. Ino nshiinshi nsheenga tweeya kuswa ku maswi Yesu ngakaamba ayi “Ndafwa nyotwa”?

¹² Ino nshiinshi nsheenga tweeya kuswa ku maswi Yesu ngakaamba? Yesu taakalinga kuyeeya ayi tacibete kabotu kwaamba mbwakalinga kulinyumfwa, aswebo tulyeelete kwaamba mbotutoolinyumfwa. Liinji mpashi inga twasuna kutalwiitaako bamwi nshetutoyandika. Nacibi boobo, na tutoyandika lucafwo, tatweelete kuwayawaya kulwiitaako bamwi kwaamba ayi batucaafwe. Kucakubonenaako, na twakuula na mpashi tulaciswa ciswa, inga twayandika kulwiitako umwi kwaamba ayi atucafweko kuula shintu na kututola kucipatela. Na twalinyumfwa kulefuka na kulisukama, inga twayandika kusenga bamanene na Beneklistu bamwi bashimpite lwakumushimu beenga batukutika na kutuyuminisha. (Tus. 12:25) Tutaluubi kwaamba ayi bamakwesu abenankashi balitusuni alimwi balisuni kutucafwa “mumapensho.” (Tus. 17:17) Sombi inga tabashibiwo nshetutooyeeya. Inga tabashibiwo ayi tutoyandika lucafwo na tatuna kubalwiita.

13. Ino nshiinshi shakakumanishikwa ceebo cakwaamba ayi Yesu wakatolelela kushomeka?

¹³ Ino Yesu wakaamba nshi? Cakuma 3 koloko malumwi, pabushiku bwa Nisani 14, Yesu wakoolobesha ayi: “Shakumanishikwa!” (Joni 19:30, NWT) Maswi aya Yesu ngakaamba alatwiisha ayi kaatana kufwa, wakashiba kwaamba ayi wakumanisha shoonse Yehova nshaakamutuma kucita. Kutolelela kushomeka kwakwe Yesu kushikila kulufu kwakakumanisha shintu shiinji. Cakutaanguna, wakapa kwaamba ayi cishibikwe ayi Satana ngumubeshi. Alimwi wakatondesha kwaamba ayi muntu umaninite inga wacikonsha kutolelela kushomeka, nabi kwaamba ayi Satana acite shintu shili buyani kuli nguwe. Cabili, Yesu wakaaba buumi bwakwe mbuli cilubula. Ici cakapa kwaamba ayi bantu batamaninite babe abushicibusa a Lesa alimwi akulangila kuba abuumi butamaani. Catatu, Yesu wakatondesha kwaamba ayi Yehova ngo mweendeleshi ululeme alimwi wakalengesha liina lya baIshi kulemekwa.

14. Amusansulule mbotweelete kunoobona bushiku buliboonse.

¹⁴ Ino nshiinshi nsheenga tweeya kuswa ku maswi Yesu ngakaamba? Bushiku abushiku tulyeelete kunoocita shoonse nsheenga twacikonsha kwaamba ayi tutolelele kushomeka kuli Yehova. Amuyeeye shakaamba Mukwesu Maxwell Friend, wakalinga kwiisha Mucikolo ca Baibo ca Gilyadi. Pakubungana kunene kwashishi, Mukwesu Friend ndyaakalinga kwaamba likani wakaamba ayi: “Na kuli nshemusuni kucita nabi kwaamba, mutawayiwayi akuyeeya ayi ndakwaamba na kucita ciilo. Ino mwashiba buyani na mulaakubaako ciilo? Munoobona bushiku buliboonse mbuli bushiku bwakweelaako mbomweelete kucita sheenga shapa kwaamba ayi mukeelele kukala kwamuyayaya.” Aboobo tunoobona bushiku buliboonse mbuli bushiku bwakweelaako mbotweelete kutondesha kwaamba ayi tulashomeka kuli Yehova! Lyalo nabi twafwa, tulaakwaamba ayi, “Yehova, ndacita nshendakalinga kucikonsha kwaamba ayi ntolelele kushomeka, kutondesha kwaamba ayi Satana ngumubeshi, akupa kwaamba ayi liina lyanu lilemekwe alimwi akutondesha ayi ndimwe nweenka nomweelela kweendelesha kwiculu apacishi capanshi!”

15. Kweelana a Luka 23:46, ino nciinshi Yesu ncaakalinga kushomete cakutatoonsha?

¹⁵ Ino Yesu wakaamba nshi? (Amubelenge Luka 23:46.) Yesu wakalinga kushomete cakutatoonsha  ndyaakaamba ayi: “Ta, muuya wangu ndaubika mumaansaanu.” Yesu wakalinga kucishi ayi buumi bwakwe bwakunembo bwakalinga kucinkite muli Yehova, alimwi wakalinga kushomete cakutatoonsha kwaamba ayi baIshi balaakumubusha.

16. Ino nshiinshi nsheenga mweeya kushakacitikila Kamboni waliina lya Joshua wakalinga kucite myaaka 15?

¹⁶ Ino nshiinshi nsheenga tweeya kuswa ku maswi Yesu ngakaamba? Amube bashinishite kutolelela kushomeka kuli Yehova nabi ndyemuli mumapensho anene. Kwaamba ayi mucikoonshe kucita boobo mulyeelete “kucinka manungo muli Yehova amoyo wanu woonse.” (Tus. 3:5) Amuyeeye cakubonenaako cakwe Joshua Kamboni ucite myaaka 15 uyo wakalinga kucite bulwashi bunene. Wakakaka kumushilika munshila yakalinga kweelete kupa kwaamba ayi apwaye mulawo wakwe Lesa. Ndyaakalinga pafwiifwi akufwa, wakalwiita banyina ayi: “Ma, ndi mumaansa akwe Yehova. . . . Ishi nshentoomulwiita ndishomete cakutatoonsha: Ndicishi kwaamba ayi Yehova alaakumbusha. Alishi miyeeyo yangu alimwi ambondinyumfwa, alimwi ndimusuni abuumbi.” Womwi awomwi wandiswe alyeelete kuliipusha ayi, ‘Na lushomo lwangu lukeeleshekwe acintu cimwi ceenga capa kwaamba ayi mfwe, sa ndaakutolelela kushomeka kuli Yehova?’

17-18. Ino nshiinshi nshotweeya? (Amubone kabokosi kacite mutwi utokwaamba ayi “ Nsheenga Tweeya ku Maswi Akweelaako Yesu Ngakaamba.”)

¹⁷ Kuli shiiyo shiinji shicafwa nsheenga tweeya kuswa ku maswi akweelaako Yesu ngakaamba! Alatucafwa kwiibaluka kuyandika kwa kulekelela bamwi akushoma kwaamba ayi Yehova inga watulekelela. Tulicite coolwe cakuba amukwashi wakumushimu wabamakwesu abenankashi balibambite kutucafwa. Nacibi boobo, tulyeelete kubalwiita na tulisuni lucafwo. Tulishi kwaamba ayi Yehova alaakutucafwa kuliyumya mumapensho ali woonse ngeenga twacaana. Alimwi tweeya kwaamba ayi tulyeelete kunoobona bushiku buliboonse mbuli bushiku bwakweelaako bwakutondesha kushomeka kwesu kuli Yehova, alimwi akuba bashomete cakutatoonsha kwaamba ayi nabi tufwe ceebo cakushomeka, Yehova alaakutubusha.

¹⁸ Ncakwiila, maswi akaamba Yesu ndyaakalinga kufwa pacisamu cakupenshesha alatwiisha shiinji! Aboobo na twakonkela nshotweeya kuswa ku maswi Yesu ngakaamba, nkokwaamba ayi tutoonyumfwila Yehova nshaakaamba pa Mwanaakwe ayi: “Amumunyumfwile.”​—Mate. 17:5.