1, 2. ¿Tiʼtoq in bʼaj tiʼj Jesús tej tqʼama qe mankbʼil tyol?

ATZUN qʼij 14 te nisán te abʼqʼi 33. Tej otoqxi txi kyqʼamaʼn aj qʼoj nya ax tok yol tiʼj Jesús, kubʼ kyqʼoʼn tkastiw maske mintiʼ til, e ok ten xmayil tiʼj, bʼaj kykʼixbʼisaʼn ex jaw kyyobʼin twitz tzeʼ. Kubʼ tnaʼn Jesús kʼixkʼoj tej tjatz t-xew ex tej tyolin tuʼnju ex qʼoʼn clav toj tqʼabʼ ex toj tqan. Pero iltoq tiʼj tuʼn tyolin tuʼnju attoq junjun tiʼchaq nim toklen tuʼn ttzaj tqʼamaʼn.

² Qo xnaqʼtzan tiʼjju tqʼama Jesús tej tjaw yobʼin twitz tzeʼ ex tiʼ xnaqʼtzbʼil jaku tzʼel qiʼn kyiʼj tyol. Toj juntl yol, bʼaʼn tuʼn t-xi qbʼiʼn aju tqʼama (Mat. 17:5).

3. ¿Alqiʼj yolin Jesús tej tqʼama: «Tat, najsama kyil xjal lu»?

³ Aju tqʼama Jesús. Tej otoq jaw qʼoʼn Jesús twitz tzeʼ, xi tqanin jlu te Jehová: «Tat, najsama kyil xjal lu». ¿Alqiʼj yolin Jesús? Aju tqʼama yajxitl jaku tzʼonin qiʼj tuʼn tel qnikʼ tiʼj. Tqʼama jlu: «Porke mintiʼ nneʼl kynikʼ tiʼj ju in kybʼinchaʼn» (Luc. 23:33, 34). Bʼalo atz yolin kyiʼj soldad te Roma, aqeju ex qʼonte clav toj tqʼabʼ ex toj tqan. Mintiʼtoq ojtzqiʼn kyuʼn alkyetoq. Ax ikx, bʼalo atz yolin kyiʼj junjun xjal otoq txi kyqʼamaʼn tuʼn tkubʼ bʼyoʼn, pero yajxitl kʼokel qeʼ kykʼuʼj tiʼj (Hech. 2:36-38). Mintiʼ xi tkʼuʼn Jesús qʼoj toj tanmi kyiʼj xjal otoq tzʼok kybʼinchaʼn  nya bʼaʼn tiʼj (1 Ped. 2:23). Sino xi tqanin te Jehová tuʼn tkubʼ tnajsaʼn kyil xjal otoq kubʼ bʼyonte te.

4. ¿Tiʼ xnaqʼtzbʼil jaku tzʼel qiʼn tiʼj Jesús tej tkubʼ tnajsaʼn kyil aj qʼoj tiʼj?

⁴ Aju xnaqʼtzbʼil jaku tzʼel qiʼn kyiʼj tyol Jesús. Ik tzeʼn bʼant tuʼn Jesús, ax ikx qe nim toklen tuʼn tkubʼ qnajsaʼn kyil txqantl (Col. 3:13). Bʼalo jaku qo el ikʼun kyuʼn junjun xjal, axpe ikx kyuʼn toj qja tuʼnju mintiʼ in nel kynikʼ tiʼj tiquʼn mintiʼ in kubʼ qbʼinchaʼn junjun tiʼchaq. Bʼalo jaku tzaj kyqʼamaʼn nya ax tok yol qiʼj, jaku kubʼ kyqʼoʼn qchʼixwi kywitz txqantl, jaku kubʼ kylaqin qe quʼj, axpe ikx jaku tzaj kyqʼamaʼn tuʼn qok kykʼixbʼisaʼn. Miʼn txi qkʼuʼn qʼoj toj qanmi kyiʼj, bʼaʼn tuʼn t-xi qqanin te Jehová tuʼn tonin kyiʼj tuʼn tel kynikʼ tiʼj axix tok (Mat. 5:44, 45). At maj kwest tuʼn tkubʼ qnajsaʼn kyil txqantl, mas qa o tzʼok kybʼinchaʼn nim nya bʼaʼn qiʼj. Pero qa ma txi qkʼuʼn qʼoj toj qanmi, jaku tzaj tiʼn nya bʼaʼn qiʼj. In tzaj tchikʼbʼaʼn jun ermana jlu: «In nel nnikʼe tiʼj qa aj tkubʼ nnajsaʼne kyil txqantl, mintiʼ in yolin jlu tiʼj qa tbʼanel in nela toj nwitze aju nya bʼaʼn in nok bʼinchaʼn wiʼje, sino a t-xilen tuʼn miʼn txi nkʼuʼne qʼoj kyiʼj txqantl» (Sal. 37:8). Aj tkubʼ qnajsaʼn kyil txqantl, ya mintiʼ in qo qʼojin ex in qo tzalaj (Efes. 4:31, 32).

5. ¿Tiʼ xi ttziyen Jesús te eleqʼ jaw yobʼin junx tukʼil ex tiquʼn bʼant jlu tuʼn?

⁵ Aju tqʼama Jesús. Tej tjaw qʼoʼn Jesús twitz tzeʼ, ax ikx e jaw yobʼin kabʼe eleqʼ junx tukʼil. E xmayin kabʼe xjal lu tiʼj Jesús (Mat. 27:44). Pero at jun kye ya mintiʼ xmayin tiʼj Jesús tuʼnju el tnikʼ tiʼj qa mintiʼ «jun mya bʼaʼn» otoq bʼant tuʼn (Luc. 23:40, 41). Nya oʼkx jlu el tnikʼ tiʼj, ax ikx ok qeʼ tkʼuʼj tiʼj qa kjawil anqʼin Jesús kyxol kyimni ex qa kʼokel te aj Kawil. Tuʼntzunju tqʼama jlu: «Jesús, bʼiʼx chin ule tiʼj tkʼuʼja ok tula tuʼn tkawina» (Luc. 23:42). Tuʼn jlu in nel qnikʼ tiʼj qa ten nim qʼuqbʼil tkʼuʼj, ex xi tqʼamaʼn Jesús jlu te: «Ax tok kxel nmaʼne teya: Bʼiʼx jaʼlo ktela wukʼile tuj lugar te nim tzalajbʼil Paraíso tbʼi» (Luc. 23:43). Mintiʼ xi tqʼamaʼn Jesús te xjal tuʼn tten toj Tkawbʼil. Pero tej t-xi tqʼamaʼn «ktela wukʼile», in nel qnikʼ tiʼj qa te xjal xi ttziyen tyol. Ojtzqiʼntoq tuʼn Jesús qa in tzaj qʼaqʼin tkʼuʼj Ttat kyiʼj xjal, tuʼntzunju xi tqʼoʼn jun qʼuqbʼil tkʼuʼj xjal tej chʼixtoq tkyim (Sal. 103:8).

6. ¿Tiʼ xnaqʼtzbʼil jaku tzʼel qiʼn tiʼjju xi tqʼamaʼn Jesús te eleqʼ?

⁶ Aju xnaqʼtzbʼil jaku tzʼel qiʼn kyiʼj tyol Jesús. Kubʼ tyekʼin Jesús qe tmod Jehová toj jun tten tzʼaqlixix (Heb. 1:3). Taj Jehová tuʼn tkubʼ tnajsaʼn qil ex tuʼn ttzaj qʼaqʼin tkʼuʼj qiʼj qa ax tok ma tzʼajtz tiʼj qanmi ex qa ma tzʼok qeʼ qkʼuʼj tiʼj chojbʼil bʼant tuʼn Jesús (1 Juan 1:7). Pero, ¿tiʼ jaku bʼant quʼn qa kwest tuʼn t-xi qnimen qa o kubʼ tnajsaʼn Jehová qil bʼant toj ambʼil ojtxe? Qo ximen tiʼj jlu, tej chʼixtoq tkyim Jesús tzaj qʼaqʼin tkʼuʼj tiʼj eleqʼ tzmatoq in nok qeʼ tkʼuʼj tiʼj. Qa ikju, ¿mlaype kubʼ tyekʼin Jehová qʼaqʼbʼil tkʼuʼj kyiʼj tmajen in nok tilil kyuʼn tuʼn kynimen te? (Sal. 51:1; 1 Juan 2:1, 2).

7. Ik tzeʼn in tzaj tqʼamaʼn Juan 19:26 ex 27, ¿tiʼ xi tqʼamaʼn Jesús te María ex te Juan, ex tiquʼn?

⁷ Aju tqʼama Jesús (kjawil uʼjit Juan 19:26, 27). Tajtoq Jesús tuʼn tok xqʼuqin  ttxuʼ tuʼnju otoqlo kyim tchmil. Ajtzun tkyim, kukx jakutoq txi kyqʼoʼn titzʼin aju at tajbʼen te ttxuʼ, pero naʼmxtoq tok qeʼ kykʼuʼj tiʼj Jesús toj ambʼil aju. Qa ikju, ¿alkyetzun jaku tzʼonin tiʼj María tuʼn kukx tten tbʼanel tamiwbʼil tukʼil Jehová? Kukx ok lepeʼ apóstol Juan tiʼj Jesús ex otoq tzʼok te jun tbʼanel tamiw. Ok tqʼoʼn Jesús qe xjal e ajbʼen te Jehová ik tzeʼn qe toj tja (Mat. 12:46-50). Tuʼntzunju, xi tqʼamaʼn te Juan tuʼn t-xqʼuqin tiʼj ttxuʼ. ¿Tiquʼn bʼant jlu tuʼn? Tuʼnju kʼujlaʼntoq María tuʼn ex ojtzqiʼntoq tuʼn qa jaku tzʼonin Juan tiʼj tuʼn kukx tajbʼen te Jehová. Xi tqʼamaʼn jlu te María: «Atzun tala jlu», ex xi tqʼamaʼn te apóstol Juan:  «Atzun ttxuʼya jlu». Atxix toj ambʼil aju, ok tqʼoʼn María Juan ik tzeʼn tal, atzunte Juan xqʼuqin tiʼj ik tzeʼn ttxuʼ. Otoq ten tkʼujlabʼil Jesús tiʼj María tuʼnju otoq xqʼuqin tiʼj atxix tej tul itzʼj ex ten tukʼil toj qʼij tej tkyim.

8. ¿Tiʼ xnaqʼtzbʼil jaku tzʼel qiʼn tiʼjju xi tqʼamaʼn Jesús te María ex te Juan?

⁸ Aju xnaqʼtzbʼil jaku tzʼel qiʼn kyiʼj tyol Jesús. Bʼalo mas tbʼanel qamiwbʼil jaku ten kyukʼil erman twitzju kyukʼil toj qja. Jakulo tzaj kyqʼoj toj qja qiʼj moqa jaku qo kyaj kykolin. Pero ik tzeʼn kyaj ttziyen Jesús, tzul qʼoʼn «jun syent maj t-xel» qe qa mintiʼ ma tzʼel qpan qibʼ tiʼj Jehová ex qa kukx ma qo ten toj ttnam. Ateʼ nim erman jaku che ok te qkʼwal, te qal, te qtxuʼ ex te qman (Mar. 10:29, 30). ¿Tiʼ in kubʼ qnaʼn tuʼnju at mujbʼabʼil qxol kyukʼil erman ex tuʼnju at qʼuqbʼil qkʼuʼj tiʼj Jehová ex kʼujlaʼn quʼn? (Col. 3:14; 1 Ped. 2:17).

9. ¿Tiʼ xnaqʼtzbʼil in nel qiʼn kyiʼj yol tqʼama Jesús toj Mateo 27:46?

⁹ Aju tqʼama Jesús. Tej chʼixtoq tkyim Jesús, tqʼama jlu tuʼn tkyaqil tqʼajqʼajel twiʼ: «Nman Dios, Nman Dios, ¿tiquʼn ma chin kyaj tkolina?» (Mat. 27:46). Mintiʼ in tzaj tchikʼbʼaʼn Tyol Dios tiquʼn tqʼama Jesús qe yol lu. Pero qo ximen tiʼj tiʼ xnaqʼtzbʼil in tzaj kyqʼoʼn qe. Tnejel, tej tqʼama Jesús qe yol lu, japun twi jun profecía tuʼn aju otoq kyaj qʼamaʼn toj Salmo 22:1. * Tkabʼin, kyuʼn yol lu in nel qnikʼ tiʼj qa mintiʼ xi tjyoʼn Jehová tumel tuʼn miʼn tikʼ Tkʼwal toj yajbʼil (Job 1:10). El tnikʼ Jesús tiʼj qa otoq kyaj kolin tuʼn Tman tuʼn tok bʼinchaʼn nya bʼaʼn tiʼj kyuʼn aj qʼoj ex tuʼn tkubʼ tyekʼin qʼuqbʼil tkʼuʼj tzmaxi aj tkyim. Ni jun xjal otoq tzikʼ toj joybʼil ik tzeʼn jlu. Nya oʼkxju, ax ik kubʼ tyekʼin kyuʼn yol lu qa mintiʼ otoq kubʼ tbʼinchaʼn jun il tuʼntzun tkubʼ bʼyoʼn.

10. ¿Tiʼ xnaqʼtzbʼil jaku tzʼel qiʼn tiʼjju tqʼama Jesús te Ttat?

¹⁰ Aju xnaqʼtzbʼil jaku tzʼel qiʼn kyiʼj tyol Jesús. Tuʼn jlu in nel qnikʼ tiʼj qa in tzaj tqʼoʼn Jehová ambʼil tuʼn qikʼ toj nya bʼaʼn. Ik tzeʼn bʼant tuʼn Jesús, nim toklen tuʼn tbʼaj qbʼinchaʼn qten tuʼn kukx qten tzʼaqli twitz Jehová axpe ikx qa ma qo kubʼ bʼyoʼn (Mat. 16:24, 25). Noqtzun tuʼnj, ojtzqiʼn quʼn qa mlayx tzaj tqʼoʼn Jehová ambʼil tuʼn qikʼ toj joybʼil aju mlayx tzikʼx quʼn (1 Cor. 10:13). Ax ikx in nel qnikʼ tiʼj qa jaku tzʼok bʼinchaʼn nya bʼaʼn qiʼj ik tzeʼn bʼaj tiʼj Jesús (1 Ped. 2:19, 20). Mintiʼ in qo el ikʼun kyuʼn xjal tuʼnju in kubʼ qbʼinchaʼn jun nya bʼaʼn, sino tuʼnju mintiʼ in nok qmojbʼan qibʼ kyukʼil ex tuʼnju in qo pakbʼan tiʼj tbʼanel tqanil (Juan 17:14; 1 Ped. 4:15, 16). Ojtzqiʼntoq tuʼn Jesús tiquʼn tzaj tqʼoʼn Jehová ambʼil tuʼn tikʼ toj yajbʼil. Atzun kye junjuntl tmajen Jehová kubʼ kyxjelin tiquʼn tzaj tqʼoʼn ambʼil tuʼn kyikʼ toj yajbʼil (Hab. 1:3). At qʼaqʼbʼil tkʼuʼj Jehová ex at tpasens. Tuʼntzunju, aj tkubʼ kyxjelin tmajen tiquʼn in tzaj jun nya bʼaʼn kyiʼj, in nel tnikʼ tiʼj qa nya tuʼnju mintiʼ qʼuqbʼil kykʼuʼj in xi kyqanin jlu, sino in jyon tumel tuʼn tchewix kyanmi ex oʼkx te jaku bʼant jlu tuʼn (2 Cor. 1:3, 4).

11. ¿Tiquʼn tqʼama Jesús qe yol tkuʼx toj Juan 19:28?

¹¹ Aju tqʼama Jesús (kjawil uʼjit Juan 19:28). ¿Tiquʼn tqʼama Jesús qa attoq  kʼaj tiʼj? Tuʼntzun tjapun twi profecía in kanet quʼn toj Salmo 22:15, aju in tqʼamaʼn: «Puro tzqij tuj ntziʼye, mer ik tzaʼn xkʼoʼn, ex bʼiʼx ma tzʼok tlakʼon tibʼ waqʼe twitz nkʼoʼne». Ax ikx, tzaj tqanin Jesús chʼin tkʼaʼ tuʼnju attoq toj kʼixkʼoj tej tjaw qʼoʼn twitz tzeʼ ex otoq tzikʼx nim yajbʼil tuʼn.

12. ¿Tiʼ xnaqʼtzbʼil jaku tzʼel qiʼn tej tqʼama Jesús qa attoq kʼaj tiʼj?

¹² Aju xnaqʼtzbʼil jaku tzʼel qiʼn kyiʼj tyol Jesús. Mintiʼ kubʼ t-ximen Jesús qa mintiʼ tipumal tej t-xi tqʼamaʼn tiʼtoq in kubʼ tnaʼn, ax ikx qe mintiʼ tuʼn tkubʼ qximen jlu. Bʼalo jaku kubʼ qnaʼn nya bʼaʼn aj t-xi qqʼamaʼn kye txqantl tiʼ onbʼil qaj. Pero qa qaj onbʼil, miʼn kubʼ qximen kabʼe maj tuʼn t-xi qqanin. Jun techel, qa ma qo tijen moqa yabʼ atoʼ, bʼalo kxel qqanin xtalbʼil te jun qamiw tuʼn qxi tiʼn loqʼel moqa tuʼn qxi tiʼn tukʼil aj qʼanil. Qa in tzaj bʼaj qkʼuʼj, bʼalo kxel qqanin onbʼil te jun ansyan moqa jun erman at tojtzqibʼil tuʼn qok tbʼiʼn, moqa tuʼn ttzaj tqʼamaʼn jun tbʼanel yol qe tuʼn tchewix qanmi (Prov. 12:25). Bʼaʼn tuʼn ttzaj qnaʼn qa kʼujlaʼn qoʼ kyuʼn erman ex qa kyaj tuʼn kyonin qiʼj aj «ttzaj jun mya bʼaʼn» (Prov. 17:17). Noqtzun tuʼnj, mintiʼ ojtzqiʼn kyuʼn erman toj alkye ambʼil qaj onbʼil, oʼkx jaku tzʼel kynikʼ tiʼj qa ma txi qqʼamaʼn kye.

13. ¿Tiʼ tzaj tuʼnju ten Jesús tzʼaqli twitz Jehová tzmaxi tej tkyim?

¹³ Aju tqʼama Jesús. Bʼalo las 3 te qale te 14 te nisán tqʼama Jesús jlu: «Ma japun tkyaqil» (Juan 19:30). Tej chʼixtoq tkyim Jesús, el tnikʼ tiʼj qa otoq kubʼ tbʼinchaʼn tkyaqilju taj Jehová. ¿Tiʼ tzaj tuʼnju ten tzʼaqli twitz Jehová tzmaxi tej tkyim? Tnejel, kubʼ tyekʼin qa nya ax tok tyol Satanás tuʼnju kubʼ tyekʼin qa jaku ten jun xjal tzʼaqli twitz Jehová maske in nok weʼ twitz nim nya bʼaʼn. Tkabʼin, xi tqʼoʼn tchwinqlal te chojbʼil. Tuʼn chojbʼil bʼant tuʼn, xi qʼoʼn ambʼil kye xjal tuʼn kyok te tamiw Dios ex tuʼn kyanqʼin te jumajx maske aj il qeʼ. Ex toxin, kolin Jesús tiʼj toklen Jehová tuʼn Tkawin ex tiʼj tbʼi.

14. Chikʼbʼantza tzeʼn tuʼn qanqʼin junjun qʼij.

¹⁴ Aju xnaqʼtzbʼil jaku tzʼel qiʼn kyiʼj tyol Jesús. Bʼaʼn tuʼn tkubʼ qximen tuʼn kukx qten tzʼaqli twitz Jehová tkyaqil qʼij. Qbʼinx aju tqʼama ermano Maxwell Friend, aju qʼon xnaqʼtzbʼil te Galaad te Watchtower. Toj jun asamblea internacional, tqʼama jlu toj jun chikʼbʼabʼil tej tyolin tiʼj tuʼn kukx qten tzʼaqli twitz Jehová: «Miʼn kyaj tqʼoʼna te nchiʼj aju jaku bʼant tuʼna jaʼlo moqa aju jaku txi tqʼamaʼna. ¿Bʼiʼnpe tuʼna qa kjawel weʼya nchiʼj? Ximinkuya qa atzun mankbʼil qʼij in nanqʼina ex bʼaʼn tuʼn tkubʼ tyekʼina qa tzʼaqli taʼya twitz Jehová tuʼntzun ttzaj qʼoʼn tchwinqlala te jumajx». Ik tzeʼn tqʼama ermano, qo anqʼin junjun qʼij ik tzeʼn mankbʼil maj tuʼn tkubʼ qyekʼin qa tzʼaqli atoʼ twitz Jehová. Qa ma bʼant jlu quʼn, jaku txi qqʼamaʼn jlu te Jehová qa ma qo kyim: «Ma tzʼok tilil wuʼne tuʼn ntene tzʼaqli twitza, tuʼn tkubʼ nyekʼine qa nya ax tok tyol Satanás ex tuʼn nkoline tiʼj tbʼiya ex tuʼn tkubʼ nyekʼine qa oʼkx teya at toklen tuʼn Tkawin».

15. Ik tzeʼn in tzaj tqʼamaʼn Lucas 23:46, ¿tiʼ qʼuqlitoq tkʼuʼj Jesús tiʼj?

¹⁵ Aju tqʼama Jesús (kjawil uʼjit Lucas 23:46). Tuʼn tkyaqil tkʼuʼj Jesús tqʼama  jlu: «Nman, tuj tqʼabʼa kxel woqxenane wanmiye». Ojtzqiʼntoq tuʼn Jesús qa toj tqʼabʼ Jehová taʼ tchwinqlal ex qʼuqlitoq tkʼuʼj tiʼj qa jaku tzaj naʼn tuʼn.

16. ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj Joshua?

¹⁶ Aju xnaqʼtzbʼil jaku tzʼel qiʼn kyiʼj tyol Jesús. Bʼaʼn tuʼn tok tilil quʼn tuʼn tkyaj qqʼoʼn qchwinqlal toj tqʼabʼ Jehová. Tuʼn tbʼant jlu quʼn, il tiʼj tuʼn tok qeʼ qkʼuʼj tiʼj tuʼn tkyaqil qanmi (Prov. 3:5). Qo ximen tiʼjju bʼaj tiʼj Joshua, jun ermano qʼiʼntoq 15 abʼqʼi tuʼn ex tzaj jun yabʼil tiʼj, ex ya mlaytoq tzʼanqʼin tuʼn. Mintiʼ xi tqʼoʼn ambʼil tuʼn kyok qʼanbʼil tiʼj aju in tzaj tqʼamaʼn Tyol Dios qa nya bʼaʼn. Tej chʼixtoq tkyim, xi tqʼamaʼn jlu te ttxuʼ: «Toj tqʼabʼ Jehová taʼ nchwinqlale». Ex tqʼamatl jlu: «Mami, jaku txi nqʼamaʼne jlu tuʼn tkyaqil nkʼuʼje, ojtzqiʼn wuʼne qa chin jawil anqʼine tuʼn Jehová. Ojtzqiʼn tuʼn tiʼ tkuʼx toj wanmiye ex qa ax tok kʼujlaʼn wuʼne». * Tuʼntzunju, bʼaʼn tuʼn tkubʼ qxjelin jlu qkyaqilx: «Qa ma chin ok weye twitz jun nya bʼaʼn ex qa ma chin kyime, ¿kukxpe chin tele tzʼaqli twitz Jehová ex qʼuqlipe nkʼuʼje tiʼj qa chin jawil anqʼine tuʼn?

17, 18. ¿Alkyeqe xnaqʼtzbʼil ma tzʼel qnikʼ tiʼj? (Qʼonka twitza tiʼj recuadro « Aju xnaqʼtzbʼil jaku tzʼel qiʼn kyiʼj mankbʼil tyol Jesús»).

¹⁷ Ma tzʼel qiʼn nim xnaqʼtzbʼil kyiʼj mankbʼil yol tqʼama Jesús tej chʼixtoq tkyim. Ma tzʼel qnikʼ tiʼj qa nim toklen tuʼn tkubʼ qnajsaʼn kyil txqantl ex tuʼn tok qeʼ qkʼuʼj tiʼj qa in kubʼ tnajsaʼn Jehová qil. Ax ikx, in qo tzalaj tuʼnju in che onin erman qiʼj ex in che ok ik tzeʼn qe toj qja. Noqtzun tuʼnj, qa qaj onbʼil il tiʼj tuʼn t-xi qqanin. Ojtzqiʼn quʼn qa kʼonil Jehová qiʼj tuʼn qex twitz alkyexku nya bʼaʼn. Ex ma tzʼel qnikʼ tiʼj qa nim toklen tuʼn qten tzʼaqli twitz Jehová tkyaqil qʼij tuʼntzun tok qeʼ qkʼuʼj tiʼj qa qo jawel anqʼin tuʼn.

¹⁸ Qa ma kubʼ qanqʼin tkyaqilju ma tzʼel qnikʼ tiʼj, tuʼn jlu in kubʼ qyekʼin qa in xi qbʼiʼn aju tqʼama Jehová tiʼj Tkʼwal: «Kybʼinxe tyol» (Mat. 17:5).