1-2. Iesu ese ena hereva ginigabedia e gwaurai neganai dahaka e vara?

UNA NA dina horana, Nisan 14, 33 C.E. ai. Iesu na e habadelaia koikoi bona ena be asi ena kerere to e hahemaoro henia murinai, e kirikirilaia, e hahisia, bena au ta ai e kokoa kau. Ikoko amo imana bona aena palapaladia e koko uru. E hahodiva bona e herevava neganai hisihisi bada e mamiva. To, una negai ia na mai anina bada herevadia haida e gwaurai.

² Mani Iesu na e kokoa kau auna ai kahirakahira baine mase neganai e gwaurai herevadia bona unu amo baita dibamu ḡaudia aita herevalai. Eiava baita gwaumu, mani ia ‘erena aita kamonai.’​—Mat. 17:5.

3. Iesu ese ina hereva “Tamagu e, . . . davadia na basio henidia” e gwauraia neganai, ia be daidia e herevalaidia?

³ Iesu be dahaka e gwa? Iesu na au ai e kokoa kau neganai, e ḡuriḡuri: “Tamagu e, . . . davadia na basio henidia.” Daidia davadia basine heni? Mani e gwaurai herevadia aita lalo, eto: “Ina e karaiamu karana na asi dibadia.” (Luka 23:33, 34) Reana Iesu ese ia imana bona aenai ikoko e koko vareai Roma tuari taudia e herevalaidia. Idia na asi dibadia ia be daika. Eiava reana ia ese hutuma bogaraḡidiai iena mase e uralaiava taudia e herevalaidia, idia na gabeai ia e abidadama henia taudia ai ela. (Apos. 2:36-38) Ena be Iesu na inaina ese e hahemaoro henia kerere bona hisihisi e abi, to ia na se badu. (1 Pet. 2:23) Ia ese Iehova e noia ia e hamasea taudia edia dika baine gwautao.

4. Iesu na mai ena ura ida inaina edia dika e gwautao karana amo dahaka ta dibamu?

 ⁴ Iesu ena hereva amo dahaka ta dibamu? Iesu heḡereḡerena, namona na mai eda ura ida ma haida edia dika baita gwautao. (Kol. 3:13) Reana haida, ita varavarada danu, ese be daḡedaḡe henidamu, badina ta abi daemu ḡaudia bona eda mauri dalana na asie lalopararalaimu. Reana be sivarailaida koikoimu, haida vairadiai be hahemaraidamu, eda pablikeisin be hadikamu, eiava be hagaridamu be tomu ita bae hahisida. Basita badu henidia, to Iehova baita noia matadia baine keho, bena nega ta hereva momokani bae abia dae. (Mat. 5:44, 45) Nega haida, edai na be aukamu edia dika baita gwautao bema e hahisida kavamu. To, bema baita badumu bona kudouda amo edia dika basita gwautaomu, siboda baita hahedikamu. Taihu ta na e gwa: “Na laloparara, haida edia dika baina gwautao anina na dia edia kerere baina abi dae, o bae hahisigu karana baina abia dae. To anina na basina badu henidia.” (Sal. 37:8) Dika ta gwautaomu neganai, ta hahedinaraiamu asita uramu ta davari hisihisidia daidiai baita badu o baita lalohisihisi hanaihanai.​—Efe. 4:31, 32.

5. Iesu ese ia ida e hasatauroa kara dika tauna ta be dahaka e gwauhamatalai henia, bona dahaka dainai?

⁵ Iesu be dahaka e gwa? Kara dika taudia rarua na Iesu ida e hasataurodia hebou. Matamanai raruosi ese Iesu e kirikirilaia. (Mat. 27:44) To gabeai, ta na lalona e haidaua. E abia dae Iesu na “asi ena kerere.” (Luka 23:40, 41) Bona e abia dae Iesu na mase amo be toreisi loumu bona gabeai king ai be laomu. Una tau ese Iesu e hereva henia eto: “Iesu e, emu basileia bavabia negana ai, ba lalogu.” (Luka 23:42) Una tau ena abidadama na goada! Iesu ese e haere henia, e gwa: “Hari dina ai na hamaoromu momokanimu, oi na lau ida Paradaiso ai baita noho.” (Luka 23:43, NWT) * Mani a laloa, Iesu na una kara dika tauna ida mo una gwauhamata e karaia, una dainai ini hereva, “oi,” bona “lau” e ḡaukaralai. Iesu ese una kara dika tauna na helaro e henia badina ia na mai dibana Tamana na hebogahisi Diravana.​—Sal. 103:8.

6. Iesu ese kara dika tauna enai e gwauraia herevana amo dahaka ta dibamu?

⁶ Iesu ena hereva amo dahaka ta dibamu? Iesu na Tamana ena kara e hahedinarai ḡoevaḡoeva. (Heb. 1:3) Iehova na e uramu eda dika baine gwautao bona baine bogada hisi. To unu be kara tomamu bema mai momokanida ida baita helalo-kerehaimu bona Iesu Keriso rarana amo eda dika e gwautao karana baita abidadama heniamu. (1 Ioa. 1:7) Reana haida ediai na auka, bae abia dae Iehova ese edia kerere gunadia na be gwautao dibamu. Bema nega haida unu o hemami tomamu, ina ba laloa: Iesu na kahirakahira baine mase neganai, ia ese e abidadama matama kara dika tauna enai hebogahisi karana e hahedinaraia. Una dainai Iehova ese mai edia abidadama ida ia e tomadiho heniamu, bona e hekwarahimu ena haheḡani bae badina taudia ediai, hebogahisi karana e hahedinaraiamu!​—Sal. 51:1; 1 Ioa. 2:1, 2.

7. Ioane 19:26, 27 ena hereva heḡereḡerena, Iesu ese Maria bona Ioane be dahaka e hamaorodia, bona dahaka dainai?

⁷ Iesu be dahaka e gwa? (Ioane 19:26, 27 ba duahi.) Iesu ese sinana na e laloa bada,  badina ia na vabu. Ia vara-bouna ese reana tauanina dalanai bae naria bona bae durua diba. To daika ese lauma dalanai baine durua diba? Ḡau ta ese se hahedinaraiamu una negai ia vara-bouna na hahediba taudia ai vada ela. To Ioane na abidadama aposetolo tauna ta bona Iesu turana namona ta. Iesu ese ia ida Iehova e tomadiho heniava taudia na iena ruma bese bamona e lalodiava. (Mat. 12:46-50) Una dainai, Iesu ese Maria na e lalokau henia bona e laloa bada dainai, ia iduruna madunana na Ioane e henia, badina mai dibana Ioane ese lauma dalanai be duruamu. Iesu ese sinana e hamaoroa: “A itaia, natumu benai.” A Ioane e hamaoroa: “A itaia, sinamu benai.”  Una dina amo, Ioane na Maria natuna ai ela bona ia ese Maria e nariava sinana na heto. Iesu ese Maria na e lalokau henia bada, badina ia e vara negana amo e reḡua namonamo bona e mase neganai badinai e gini.

8. Iesu ese Maria bona Ioane e hamaorodia herevana amo dahaka ta dibamu?

⁸ Iesu ena hereva amo dahaka ta dibamu? Eda hetadikaka karana Kristen tadikaka taihu ida ese eda ruma bese taudia edia na e hereaia. Varavarada ese reana bae inai henida o bae dadaraida diba, to Iesu na e gwauhamata, bema Iehova bona ena orea baita badinadiamu, ita ese ta haboio ḡaudia na “sinahu sinahu” amo baita abimu. Momo na ita edai natu, sina, o tama lalokaudia ai be laomu. (Mar. 10:29, 30) Emu hemami be ede bamona, bema tadikaka taihu na kongrigeisin ai lalotamona ai e nohomu badina Iehova bona ta ta e helalokau hehenimu?​—Kol. 3:14; 1 Pet. 2:17.

9. Iesu ena hereva Mataio 27:46 ai ese dahaka e hadibadamu?

⁹ Iesu be dahaka e gwa? Iesu kahirakahira baine mase neganai, e lolo eto: “Egu Dirava e, egu Dirava e, dahaka lau ome rakatanigu.” (Mat. 27:46) Baibul ese na se hahedinaraia dahaka dainai Iesu na unu e hereva toma. To unu hereva amo baita diba ḡaudia baita lalodia. Ta dibaiamu ḡauna ta na, Iesu na unu hereva amo Salamo 22:1 * ena peroveta herevana e haḡuḡurua. Danu, unu hereva ese e hahedinaraia Iehova ese Natuna igimana ‘maḡuna’ ta se atoa. (Iobu 1:10) Iesu na e laloparara, Tamana ese na se koua inaina ese bae tohoa. Tanobada tauna ta na hahetoho unu bamona se abia. Danu, unu hereva ese e hamomokania, ia na asi ena kerere bona bae hamasea na dia maoro.

10. Iesu ese Tamana e hamaoroa herevadia amo dahaka ta dibamu?

¹⁰ Iesu ena hereva amo dahaka ta dibamu? Ta dibamu ḡauna ta na, basitato eda abidadama e tohoamu hahetohodia na Iehova ese be koudiamu. Iesu e tohoa ela bona dokona heḡereḡerena, ita danu baita heḡaeḡae baita abidadama ela bona mase. (Mat. 16:24, 25) To, ta dibamu, Dirava ese ita na basine rakatanidamu, eda goada e hereaiamu hahetohona baita vaira henia. (1 Kor. 10:13) Ta dibamu ḡauna ma ta na, Iesu heḡereḡerena, inaida ese be hahemaoro henida kereremu dainai baita hisihisimu. (1 Pet. 2:19, 20) Inaida na unu be kara tomamu, badina dia kerere ta ta karaia dainai, to ita na dia tanobada ena bona hereva momokani ta harorolaiamu. (Ioa. 17:14; 1 Pet. 4:15, 16) Iesu na e laloparara dahaka dainai Iehova ese ena hisihisi na se koua. To, nega haida Iehova e tomadiho heniamu abidadama taudia haida na hahetoho e davarimu neganai, e daradaramu dahaka dainai Iehova ese ḡau haida na se koumu. (Hab. 1:3) Eda hebogahisi bona haheauka Diravana na mai dibana, idia na ia e abidadama heniamu, to nega unu bamodiai ia sibona ese tauhalo baine henidia diba.​—2 Kor. 1:3, 4.

11. Dahaka dainai Iesu ese Ioane 19:28 ai e hetore herevadia e gwaurai?

¹¹ Iesu be dahaka e gwa? (Ioane 19:28 ba duahia.) Dahaka dainai Iesu na e gwa: “Ranu vada e masegu”? Unu e hereva toma “Buka Helaḡa herevana ihamomokanilaina.” Una peroveta herevana na Salamo 22:15 ai eto: “Egu goada na e kaukaumu,  ataga na heto, malagu na udugu ai e kaki taomu.” Danu, e davari hisihisidia iboudiai​—au ai e kokoa kau hisihisina danu​—muridiai, reana ranu ese e masea dikadika. Una dainai unu e hereva toma.

12. Iesu ena hereva, “ranu vada e masegu” amo dahaka ta dibamu?

¹² Iesu ena hereva amo dahaka ta dibamu? Iesu na se laloa heduru baine noi na manoka karana; ita danu unu baita lalo toma. Eda mauri lalonai, reana asita uramu eda dabu ḡaudia na haida baita hamaorolaidia. To bema nega ta ita na basita heḡereḡere neganai, namona na basita hemarai ma haida ediai heduru baita noi. Heḡereḡere, bema ita na buruka eiava gorere, reana turada ta baita noia stoa eiava dokta dekedia baine laohaida. Bema ita na ta lalohisihisimu o ta lalomanokamu, reana elda ta eiava lo Kristen tura namona ta baita noia, eda hekwakwanai baine kamonai o “hereva namona” ta amo baine hagoadada. (Her. 12:25) Baita helalotao, tadikaka taihu ese e lalokau henidamu, bona e uramu “dika negana” ai bae duruda. (Her. 17:17) To idia ese laloda na basie duahia dibamu. Basie dibamu ita na heduru ta uramu, ela bona ita ese baita hamaorodiamu.

13. Iesu ese Iehova e badinaia ela bona e mase neganai, dahaka e haḡuḡuru?

¹³ Iesu be dahaka e gwa? Adorahi 3 oklok Nisan 14 ai, Iesu e lolo, eto: “Vada e ḡuḡuru!” (Ioa. 19:30, NWT) Iesu ena mase na de kahirakahira neganai, Iehova ena ura iboudiai e haḡuḡurudia. Iesu na Iehova e badinaia ela bona e mase neganai, ḡau haida e haḡuḡurudia. Ginigunana, e hamomokania Satana na koikoi tauna. Iesu ese e hahedinaraia, ḡoevadae tauna ta ese Iehova baine badinaia diba, herevana Satana na dahaka baine kara. Iharuana, Iesu ese mauri idavalaina boubouna e heni. Iena boubou ḡauna dainai kara dika taudia na mai lalodia ḡoevadia ida Dirava bae hetura henia, bona mauri hanaihanai bae abia diba. Ihatoina, Iesu ese Iehova ena kara maoromaoro lohia siahuna e abia isi bona Tamana ladana e hahelaḡaia.

14. Laloda baita hadai dina ta ta ai dahaka baita kara? Ba herevalaia.

¹⁴ Iesu ena hereva amo dahaka ta dibamu? Namona na laloda baita hadai dina ta ta ai Dirava baita badinaia. Mani Tadikaka Maxwell Friend ena hereva a laloa, ia na Watchtower Bible School of Gilead ena hahediba ta. Intanesinol hebouna ta ai, Tadikaka Friend ese ena tok ai abidadama karana e herevalaia neganai, e gwa: “Hari ba kara o ba gwaurai ḡaudia na basio rakatanidia bena kerukeru ba gwaurai o ba kara. Oi mai dibamu kerukeru oiemu ai be dahaka be varamu, a? Dina ta ta na ba lalodia, una na oiemu dina ginigabena ba hahedinaraia oi na heḡereḡere ba mauri hanaihanai.” Namona na dina ta ta baita lalodia, una na eda dina ginigabena baita hahedinaraia ita na Dirava ta badinaiamu! Bena, ena be dibada baita masemu, to baita gwau diba, “Iehova, hanaihanai oi na badinamumu, badina na ura baina hamomokania Satana na koikoi tauna, bona ladamu bona emu lohia siahuna ena maoro na abia isi!”

15. Luka 23:46 ena hereva heḡereḡerena, Iesu be dahaka e diba?

¹⁵ Iesu be dahaka e gwa? (Luka 23:46, ba duahia. *) Iesu na mai ena abidadama ida, Tamana e hamaoroa: “Tamagu e, egu  mauri na imamu ai na atoamu.” Iesu na mai dibana, vaira neganai ienai bae vara ḡaudia na Tamana imanai, bona mai dibana Tamana ese ia na be laloataomu.

16. Laḡanina 15 Witnes merona ta enai e vara ḡauna amo dahaka o dibamu?

¹⁶ Iesu ena hereva amo dahaka ta dibamu? Mai emu ura ida emu mauri na Iehova imana ai bavatoa. Unu ba kara toma totona, namona na “Iehova bavabidadama henia mai lalomu idoinai.” (Her. 3:5) Mani Joshua, laḡanina 15 ena haheitalai aita laloa, ia na gorere badana ta e abia. Dirava ena taravatu e utua medikol daladia na e dadarai. Ia do se mase neganai, sinana e hamaoroa: “Sinagu, Iehova ese lau na be narigumu. . . . Ina na na abia dae momokanimu: Na dibamu Iehova ese lau na be hatoregu isi loumu. Egu lalohadai bona hemami na mai dibana, bona na lalokau henia momokanimu.” * Siboda baita henanadai diba, ‘Bema baina mase diba hahetohona ta baina abia neganai, lau be Iehova ba badinaia momokanimu bona ba abia daemu ia ese be lalogu taomu, a?’

17-18. Dahaka tame diba? (Maua ladana “ Iesu Ena Hereva Ginigabedia amo Ta Dibamu Ḡaudia” ba itaia danu.)

¹⁷ Iesu ena hereva ginigabedia amo ḡau momo tame diba! Eme hadibada, ma haida edia dika baita gwautao bona baita abia dae Iehova ese eda dika na be gwautaomu. Ta moalemu badina kongrigeisin ai tadikakada na momo herea, bona idia na e noho heḡaeḡaemu bae duruda, to heduru ta uramu neganai, namona na baita hadibadia. Mai dibada Iehova ese be durudamu ta davarimu hahetohodia baita hanaidia. Bona tame itaia namona na dina ta ta baita lalodia, una na eda dina ginigabena baita hahedinaraia Dirava ta badinaiamu, bona baita abia dae Iehova ese be hamauridamu.

¹⁸ Momokani, Iesu na hisihisi auna ai kahirakahira baine mase neganai e gwaurai herevadia na mai anidia bada! Ini tame diba ḡaudia baita badinamu neganai, ita na Iehova ena haheḡani ta badinaiamu, ia na e gwa ia Natuna ‘erena baita kamonai.’​—Mat. 17:5.