1-2. Ethu baani yampadduwela Yesu mudhidhi awogaga madhu oogomihera?

VAALI mambesi labo na 14 mweri wa nisa, yaka ya 33. Yesu winkedhiwa ni othongeliwa okwa mwaha wa yothega aheriliyena. Voharela Yesu oteyiwa, wukuthiwa vanlubale nuwindo okomeliwa vantxikwani nagoyi. Madaye ni manyalwaye otoroliwa ni peregu. Vano afunaga owoga ni aavumaga makwaddaye enonvoreya vanlubale. Mbwenye dhihikalawo dhithu dhofuneya anahoweliye owoga.

² Kabeni noone madhu oogomihera a Yesu agaali vantxikwani nagoyi ni noone dhithu nnahudherihu. Nimadhu mamodha, ‘kabeni ninvuruwane.’ — Mat. 17:5.

3. Yesu awagana aani nuwawoga madhu ala owi: ‘Babani, kaaleveleleni’?

³ Yesu awonge ddi? Agaali vantxikwani nagoyi, Yesu ahilobela egi: ‘Babani, kaaleveleleni.’ Yesu afuna Ababe emulevelele aani? Madhu oharela a Yesu enowoniha ethu afuniye owoga, oliye wera: Aliwa ‘kinonne dhithu eneriwana.’ (Luc. 23:33, 34) Podi wera Yesu awagana anyakoddo oRoma yamukomele vantxikwani nagoyi. Aliwa kiyamunonne pama Yesu. Teto podi wera Yesu aagana muthithi ole waathu walombe wihina Yesu apiwe, mbwenye nuuvira mudhidhi yere okanna nroromelo. (At. 2:36-38) Yesu keenyile wihina goyi ooneye emuthukulele okala muthu abure ni okoya ntxiga. (1 Ped. 2:23) Mbwenye, oliye omuloba Yehova wihina alevelele ale yafuna ompa.

4. Nnahudheravo ddi ni ekalelo ya Yesu yowalevelela amwiddani aye?

 ⁴ Nnahudhera ddi ni madhu awogile Yesu? Ninga Yesu nnofwanelela walevelela athu amodha. (Col. 3:13) Malabo mamodha athu obe amudhihu podi onisadduwela mwaha ohonelamo pama ndhe nnarumedhihu obe mweddelo muxa nthukunlihu. Aliwa podi wambela oniwoga obure oniteya vaari vaathu, watala malivuru ehu obe onithuusa. Ohiya okoya ntxiga iyo podi omuloba Yehova wihina afugule mubuwelo wewa ofiyedha ohudhera ebaribari. (Mat. 5:44, 45) Olevelela kahi ethu yokweya, thabwa-thabwa nereliwa obure. Mbwenye nahiya wi mmurimani mwehu mukale obure ni ntxiga, nnere witotela makathamiho mwigumini mwehu. Murogola dhaala ohusoriha egi: “Gihonelamo wihina olevelela kinatapulela orumedha mubuwelo wabure waathu egipujhile newene kinatapulela wahiya wihina egiddodde. Mbwenye enatapulela osakula ohukoya ntxiga.” (Sal. 37:8) Nathoma olevelela, nnathoma wihina dhithu dhatedhene dhabure dhinanereyela dhihinthukulele okala athu abure. — Efé. 4:31, 32.

5. Yesu ampaganyile ddi mpanga ole apiwe vamodha nuliye, mwahaya bwaddi adhe ampaganyege?

⁵ Yesu awonge ddi? Apanga abili yahikomeliwa vantxikwani nagoyi wula ni wula. Omambelelowene aliwa yahimuruwana Yesu. (Mat. 27:44) Mbwenye vasogolova mmodha osaddula mubuwelo waye. Wonelamo wihina Yesu kerilena ‘ethu yabure.’ (Luc. 23:40, 41) Ohiya eyeneve, ahiroromela wi Yesu labo nimodha ere ovenyihiwa muukwani nuwindo atikiteriwe ninga mwene. Oliye owoga ni Yesu egihina: ‘Yesu onagidduwale wavolowa Mumweneni mwawo.’ (Luc. 23:42) Mwebaribarene mulobwana ola ahikanna nroromelo! Yesu omwakula egihina: ‘Mwebaribarene, ginowuwaddela peeno: We onodha okale ni miyo [ohiya Mumweneni, mbwenye] mParayizu.’ (Luc. 23:43) Wonelemo wihina Yesu ampagannye mulobwana ole yeka. Oliye walabihedha madhu ninga “miyo”, “we”, vamodha “nimiyo”. Yesu ahimpaganya naarive anonaga wihina ahanle neena nuukwa, mwaha ahinona wihina Babe dathagaraga. — Sal. 103:8.

6. Madhu awonge Yesu ni mpanga ole enanihudhiha ddi?

⁶ Nnahudhera ddi ni madhu awogile Yesu? Yesu oomutajhiha Babe nimakalelo oologomana. (Heb. 1:3) Yehova onofuna omulevelela kadda muthu wa iyo nuneddela thagaraga. Mbwenye oliye anere onilevelela nathwaruwa ni murima watene mwaha wa dhego dhabure nerilihuna kale ni naroromela mukutho wa Yesu. (1 João 1:7) Athu amodhaya podi wambela wanganyedha wihina Yehova kananilevelele mwaha wa dhego nerilihuna mundduli. Akala malabo mamodha onowubuwela ndo, karajhiha okirati wubuwele: Yesu ahinathi okwa, ahimweddela thagaraga mpanga athongeliwe okwa naarive eraga wambelawene woniha nroromelo. Ni iyowa podi okanna ebaribari wihina Yehova anere wakalela thagaraga adharaaye oororomeleya, enilibihedha vanlubale wihina yawiwelele malamulo aye. — Sal. 51:1; 1 João 2:1, 2.

7. Mowiwanana ni yolebela ya João 19:26, 27, Yesu awonge ddi ni Mariya vamodha ni Juwawu?

⁷ Yesu awonge ddi? (Omwileri João 19:26, 27.) Yesu omuthuwathuwela maye, podi wera aali maamukwele. Addibile Yesu egahiwedha wasapela amaye. Mbwenye, baani aasapelege epaddi yomuzimuni? Kaavo ethu enatonyihedha wihina addibile Yesu yahikala anamahara aye. Mbwenye Juwawu aali  Namahara Oororomeleya a Yesu, teto vadhuluva okala mukwaye. Monelo wa Yesu ale yamulabela Yehova nuliye yaali amudhaaye omuzimuni. (Mat. 12:46-50) Yesu omudhivela vanlubale Mariya ni afuna wihina akanne muthu amuhalena amusamalelaga. Bumwahaya, adhe amulobege Juwawu wihina erena ndo. Yesu ahinona wihina Juwawu agahimukavihera Mariya omulabelaga Yehova. Oliye ahiwoga naamaye egihina: ‘Mmani, obajha peeno ola dimwaninyu!’ Voharela omwaddela Juwawu egi: ‘Ola dimmawo!’ Obajha labo nenne odhowa osogolo Juwawu akale ninga mwaana a Mariya amusamalelegiye ninga maye. Mariya omusamalela Yesu obajhana ehimaye, ni mudhidhi akwaga oliye kaamuthawile.  Sithu yela yamuthukulele Yesu okanna odhivela ni Mariya!

8. Madhu Yesu awongeye ni Mariya vamodha ni Juwawu enanihudhiha ddiniyani?

⁸ Nnahudhera ddi ni madhu awogile Yesu? Wandana ninnihuna naaddibila amunroromeloni, podi okala woliba okwaranya wandana ninnihuna namwanddamanihu. Amudhihu podi onisadduwela obe naari onithawa, mbwenye Yesu ohupaganya wihina nadidela weedda ni Yehova ni naparela pama mulogo waye, iyo nnere wakela “okunamo”. Addibila owinjhiva enanonege ninga aniwa, iyo nnawonege ninga ababihu obe amayihu. (Mar. 10:29, 30) Iyo nnokosa epaddi ya emudhi yomuzimuni eniwanana mwaha nroromelo ni odhivela — mwaha womudhivela Yehova ni odhivelana mmodha nimukwaye. Ononamo aavi mwigumini mwawo? — Col. 3:14; 1 Ped. 2:17.

9. Madhu awonge Yesu eli va Mateus 27:46 enanihudhiha ddi?

⁹ Yesu awonge ddi? Yesu ahinathi okwa, ahiwoga egi: ‘Mulugwaga, Mulugwaga, mugihiyele ddi meeka?’ (Mat. 27:46) Bibliya kanasoriha mwahaya bwaddi Yesu adhe asorihege madhu ala. Mbwenye madhu ala enosoriha dhego dhowinjhiva. Motajhiha, mwaha wawoga madhu ala Yesu ahakwaneliha yovuhulela enafwanyeya va Salmos 22:1. * Ohiya eyo, madhu ala enotonyihedha wihina Yehova “kabarele” epaddi yamwanaye. (Jó 1:10) Vadhuluva oliye weenya wihina mwanaye eehiwe ni amwiddani aye, teto eyo Yesu ahinona. Ela yaali yoweha enlubale, kavo muthu oomaningoni onafwanyiwa yoweha ninga yela. Madhu ala a Yesu enotonyihedha wihina ahikanna ebaribari wi kathegile ethu newene kafwanelela okwa.

10. Madhu awonge Yesu ni babe enanihudhiha ddiniyani?

¹⁰ Nnahudhera ddi ni madhu awogile Yesu? Ethu nnahudherihu sowi iyo kannajhehera wihina Yehova anibarele makathamiho aatene eneeha nroromelo nehu. Mowindala ninga Yesu ehiwiye, iyo nnofwanelela wiwegeredha wihina ntonyihedhe wi nili oororomeleya ofiyedha okwa, akala enohoweleya. (Mat. 16:24, 25) Mbwenye Mulugu onanipaganya wihina kanindha nifwanyiwa yoweha nahinandihu ogonjhiha. (1 Cor. 10:13) Ethu emodha nnahudherihu ni Yesu sowi, vilegele vihilegele nnere ofwanyiwa dhoweha. (1 Ped. 2:19, 20) Athu ale enanisadduwela kinerana mwaha wi nere wawerela obure, mbwenye enerena mwaha wohikala epaddi yelabo ni nnowakihedha ebaribari. (João 17:14; 1 Ped. 4:15, 16) Yesu owonelamo mwahaya bwaddi Yehova adhe amwenyege woona goyi. Mbwenye addibila amodha ororomeleya, yaafwanyiwaga makathamiho malabo mamodha enowikoha mwahaya bwaddi Yehova agenya yeyo. (Hab. 1:3) Mulugu ehu dathagaraga ni kanaguvela wanyanyuwela addibila yala. Yehova onowonelamo wi mubuwelo enniwana kinatonyihedha wi kinna nroromelo, mbwenye enunlela wihina oliye alibihe. — 2 Cor. 1:3, 4.

11. Mwahaya bwaddi Yesu adhe awogege madhu ala enafwanyeya va João 19:28?

¹¹ Yesu awonge ddi? (Omwileri João 19:28.) Mwahaya bwaddi Yesu adhe erege: ‘Gihikanna nthona’? Awogile ndo ‘wihina Dholebela dhakwanele’ ninga madhu ala elebiwe va Salmos 22:15, enihina: ‘Kopolo dhaaga dhihumamo ninga nipale nabiya yamathaka; nlumi naaga nihidhaala muwano.’ Yowoneleyamo  wihina Yesu ahikanna nthona: oliye ahivilelana goyi, ohiya goyi ooniliye vantxikwani. Mudhidhi yole omuhoowela muthu wihina anvahe manjhe oopana nthona.

12. Madhu awonge Yesu egi ‘Gihikanna nthona’ enanihudhiha ddiniyani?

¹² Nnahudhera ddi ni madhu awogile Yesu? Yesu konelamo wasoriha makathamiho yanfwanya ninga ekalelo yohukanna nroromelo. Ni iyowa nnofwanelela omutajhiha. Mwigumini mwehu malabo mamodha, kannasoriha ethu baani nnahowelihu. Mbwenye akala malabo mamodha dhithu dhimodha dhinonirusa, kanikanne manyazo oloba nikavihero naakwihu. Motajhiha, nuuluvala obe nakala aredda, podi wera nnere omuhoowela mukwihu wihina anitxove nikaro yaye nadhowaga omusika obe naari ospitale. Nakwerebeya podi omuloba namaholela mulogo obe naari ddibila owithwa omuzimuni wihina anivuruwane obe awoge ‘madhu’ enanihagalase murima. (Pro. 12:25) Kanidduwale wihina addibilihu ni arogolihu enonidhivela ni enofuna onikavihera ‘nafwanyiwa makathamiho.’ (Pro. 17:17) Mbwenye addibila kinona dhinereya mmubuweloni mwehu. Aliwa kinawedhe woona nnahowelihu nahawaddela.

13. Yesu erile ddiniyani mwaha okala ororomeleya ofiyedha okwa?

¹³ Yesu awonge ddi? Waddamelaga mudhidhi wa 15 woora, Yesu owoga nindhu nootaama egi: ‘Dhihakwanela!’ (João 19:30) Madhu a Yesu enonihudhiha wihina ahinathi okwa, oliye ahikanna ebaribari wihina ahakwaneliha dhaamurumile Yehova. Mwaha wokala ororomeleya ofiyedha okwa, Yesu aherana dhego dhowinjhiva. Yobajha, ahooniha wi Saddana muliba woota. Yesu otonyihedha wi muthu oologomana podi okala ororomeleya naarive Saddana amwehaga. Yanabili, Yesu ohupeleka egumaye ninga yowobola. Mwaha wookutha mukutho egumaye, Yesu ohutonyihedha wihina athu ohilogomana podi wandana ni Mulugu ni podi okanna ejhehedhelo yokalawo nimukala-kala. Yanatharu, Yesu ohoniha wi Yehova namathonga apama ni aahibarela ekalelo ya Yehova.

14. Enofwanelela niikome kadda labo okalawo nimakalelo baani? Katapulelamo.

¹⁴ Nnahudhera ddi ni madhu awogile Yesu? Enofwanelela nikome wihina nikale ororomeleya kadda labo. Kasugwa madhu awonge Maxwell Friend, alaba ninga namahudhiha Eskola yo Jileyadi. Agaali vamusonkanoni wa elabo yatene, ddibila Maxwell ahasoriha madhu muwari mwa mwahaye wavathaddo wodhela okala ororomeleya: “Ethu onafuniwe werana obe owoge peeno, kuhiye wihina yereye mangwaana. Ohukanna ebaribari wihina onere ofiyedha mangwaana? Kadda labo okalegewo dila modha ninga labo noogomihera onafuniwe otonyihedha wihina onofwanelela okanna egumi yohimala.” Kadda labo nikalegewo dila modha ninga makalelo otonyihedha wihina nili ororomeleya vamentoni va Yehova! Naarive nithusiwaga nuukwa iyo podi owoga: “Yehova, gihiilibihera wihina gikale ororomeleya, goonihe wi Saddana muliba woota, gibarele ekalelo yenyu ni onamathonga weenyu Nabwiya!”

15. Mowiwanana ni Lucas 23:46, ebaribari baani Yesu anniyena?

¹⁵ Yesu awonge ddi? (Omwileri Lucas 23:46.) Nibaribari yatene Yesu ahiwoga egi: ‘Babani, ginoopeleka egumaaga mmadani mweenyu.’ Yesu ahikanna ebaribari wihina egumaye eli mmadani mwa Yehova, oliye ahinona wi babe kanadha amudduwala.

16. Onahudhera ddiniyani ni yopadduwa ya muzombwe aanna yaka 15?

 ¹⁶ Nnahudhera ddi ni madhu awogile Yesu? Wikome wihina egumawo ohiye mmadani mwa Yehova. Wihina wande werana yeyo, ‘omuroromelege Yehova ni murima wawo watene.’ (Pro. 3:5) Kasugwa yoladdaniha ya ddibila Joshua, Namona a Yehova a yaka 15 anna oredda wahinayila. Oliye ahikoodda ojha murombwe walupa malamulo a Mulugu. Ahinathi okwa, ahiwoga naamaye egihina: “Mmani, egumaga eli mmadani mwa Yehova. Ginowoga nimurimaga watene, mmani: Gihikanna ebaribari wihina Yehova anere ogivenyiha muukwani. Oliye ohunona dhili mmurimani mwaaga teto miyo ginomudhivela.” * Kadda muthu wa iyo ikohege: ‘Gahere gifwanyiwa makathamiho yehe nroromelo naga ofiyedha okwa obe okalawo, gere opweha egumaga mmadani mwa Yehova giroromelaga wihina oliye kanadha agidduwala?’

17-18. Nihudhere ddiniyani? (Osugwe kwaduru “ Nnahudhera ddi ni madhu oogomihera a Yesu.”)

¹⁷ Ninga nsorihilihu mundduli, madhu oogomihera a Yesu enonihudhiha dhithu dhowinjhiva! Nnowubuwela wihina nihudhera wi nnohowela walevelela amodha ni ororomela wi Yehova anere onilevelela. Nikanna oneti wokanna addibilihu amunroromeloni eli owiwegeredhene wihina enlevelele. Mbwenye nnohowela naalobe nikavihero, yahoweleyaga. Nihinona wi Yehova anere onikavihera owanana makathamiho bi makathamiho enaakumelele. Nihoona wihina sathima okalawo kadda labo ninga ofuru ninnihuna wotonyihedha wihina nikanna nroromelo. Niroromele wihina napweha egumihu mmadani mwa Yehova, oliye onere onibarela.

¹⁸ Mwebaribarene, madhu awogile Yesu agaali vantxikwani na goyi enonihudhiha ethu enlubale! Awogaga wodhela mwanaye, Yehova ahiwoga egi: “Kanvuruwaneni.” Naparihedha mabasa dhiwogile yohudhera ela nnere werana mowiwanana niile Yehova anirumiliye. — Mat. 17:5.