1-2. Bilg-y yɛlã sẽn da yaa to-to ne a Zeezi, a sẽn wa n togsd a yaoolem goam nand t’a ki wã.

RA YAA yʋʋmd 33 Nizã rasem 14 raare. B rõda a Zeezi t’a tʋma tʋʋm-wẽnga, n kao a bʋʋd n ning-a taale. Rẽ poore, b yaal-a lame, n nams-a ne wẽnem la b ka-a ra-luk zugu. B kaa a nusã ne a naoã ne põent-rãmba. A sã n da rat n vʋʋs fãa, wall a rat n gom fãa, ra zabda wʋsgo. La ra yaa tɩlɛ t’a gome, bala a ra tara koɛɛg sẽn tar yõod wʋsg n na n taase.

² Bɩ d gom a Zeezi sẽn yeel bũmb ningã, a sẽn wa n be ra-lukã zug n dat n ki wã yelle, la d ges yam ning d sẽn tõe n dɩk gom-kãens pʋgẽ. Rat n yeel bal tɩ d ‘kelg-a.’—Mat. 17:5.

3. A Zeezi sẽn yeel tɩ: “M Ba, kõ-y bãmb sugrã,” tõe tɩ yaa ãnd dãmb yell la a ra gomda?

³ Bõe la a Zeezi yeel-yã? A sẽn wa n be ra-lukã zugã, a pʋʋsame n yeel yaa: “M Ba, kõ-y bãmb sugri.” Ãnd dãmb la a Zeezi sẽn da rat t’a Ba wã kõ-b sugrã? A sẽn yeel bũmb ning rẽ poorã sõngdame tɩ d bãng sẽn yaa neb ninsi. A yeelame: “B pa mi b sẽn maandã ye.” (Luk 23:33, 34) Tõe tɩ yaa Rom sodaas nins sẽn ka a nusã la a naoã ra-lukã zugã yell la a sẽn da gomdã. B ra pa mi a Zeezi sẽn sɩd da yaa ned ningã ye. Tõe me t’a Zeezi ra tagsda neb kẽer sẽn da be kʋʋngã sʋk n kos tɩ b kʋ-a wã yelle. Nin-kãensã ra na n wa n teka yam n tẽ a Zeezi. (Tʋʋ. 2:36-38) A Zeezi pa bas tɩ b sẽn maan-a kɛgrã kɩt t’a lebg sũ-to-neda, wall a tall sũ-kẽk  ye. (1 Pɩy. 2:23) A pʋd n kosa a Zeova t’a kõ neb nins sẽn kʋ-a wã sugri.

4. A Zeezi sẽn sak n kõ a bɛɛbã sugrã wilgda tõnd bõe?

⁴ Yam-bʋg la d tõe n dɩk a Zeezi goamã pʋgẽ? Wa a Zeezi, tõnd me segd n sakd n kõta d taabã sugri. (Kol. 3:13) Neb kẽere, baa d roagdb meng tõe n tugda beem ne tõndo, b sẽn pa wʋmd d sẽn tẽed bũmb ninsã, la d sẽn vɩ to-to wã võorã. B tõe n yag-d-la ziri, n ning-d yãnd neb a taab taoore, n sãam d sɛbã, bɩ n yeel meng tɩ b na n maan-d-la yelle. D pa segd n tall sũ-kẽk ne-b ye. D pʋd n tõe n kosa a Zeova t’a vẽneg b yamã, tɩ b wa bãng sɩdã. (Mat. 5:44, 45) Wakat ninga, tõe n yɩɩ toog wʋsg tɩ d sak n kõ sugri, sẽn yɩɩd fãa sã n mikame tɩ b maan-d-la kɛgr wʋsgo. La d sã n bas tɩ sũ-toogã la sũ-kẽkã tall pãng d sũurẽ wã, d maanda d meng wẽnga. Ad saam-bi-poak a ye sẽn yeele: “M wa n bãngame tɩ m sã n kõ ned sugri, pa rat n yeel t’a sẽn maan bũmb ningã zemsame, bɩ tɩ m sakame tɩ neb a taabã wẽg-m ye. Rat n yeelame bal tɩ m yãka yam n pa na n tall sũ-kẽk ye.” (Yɩɩn. 37:8) D sã n kõ ned sugri, wilgdame tɩ d yãka yam n pa na n bas tɩ b sẽn maan-d wẽngã kɩt tɩ d lebg sũ-to-ned ye.—Efɛ. 4:31, 32.

5. Bõe la a Zeezi pʋlem bi-bɛɛg a ye b sẽn da ka n yɛgl-a, la bõe yĩng t’a pʋlm-a woto?

⁵ Bõe la a Zeezi yeel-yã? B ra kaa bi-bees a yiib n yɛgl a Zeezi. Sɩngrẽ wã, bãmb b yiibã ra naaga nebã n yaand-a. (Mat. 27:44) La rẽ poore, b nin-yend n toeem yam. A wa n bãngame t’a Zeezi “pa maan bũmb sẽn yaa wẽng ye.” (Luk 23:40, 41) Sẽn paase, a wilgame t’a tẽedame t’a Zeezi na n wa vʋʋga kũ-rãmbã sʋka, n wa lebg rĩma. A yeela a Zeezi yaa: “Zeezi, yãmb sã n wa be y Rĩungã pʋgẽ bɩ y tẽeg mam yelle.” (Luk 23:42) Ad sɩd yaa tẽeb tɛkẽ la ra-kãngã wilg-yã! A Zeezi leok-a lame yaa: “Rũndã, mam pʋlemda foo tɩ f na n zĩnda ne maam [pa Rĩungã pʋgẽ ye. La yaa] Arzãnã pʋgẽ.” (Luk 23:43) Bãng-y t’a Zeezi sẽn yeel tɩ “mam,” “foo,” la ‘maamã,’ wilgdame tɩ yaa pʋleng yẽ ne raoã sʋk bala. A Zeezi sẽn mi t’a Ba wã yaa nimbãan-zoɛtã, a togsa gomde, tɩ raoã sẽn yaa bi-bɛɛg n da be ra-lukã zug n dat n ki wã bãng tɩ manegr n wate.—Yɩɩn. 103:8.

6. A Zeezi sẽn yeel bi-bɛɛgã bũmb ningã wilgda tõnd bõe?

⁶ Yam-bʋg la d tõe n dɩk a Zeezi goamã pʋgẽ? A Zeezi wõnda a Ba wã kɛpɩ. (Ebre. 1:3) A Zeova tʋlla ne a sũur fãa n kõ tõnd d yel-wẽnã sugr la a zoe d nimbãanega, sã n mikame tɩ d maanda d bãngẽ ne d pĩnd tʋʋm-wẽnsã, la d tar tẽeb tɩ d tõe n paama d yel-wẽnã sugr a Zeezi Kirist maoongã maasem yĩnga. (1 Zã 1:7) Tõe n yaa toog ne neb kẽer tɩ b sak n deeg t’a Zeova tõe n kõ-b-la b pĩnd yel-wẽnã sugri. Sã n mi n yaa woto ne yãmba, ad bũmb sẽn tõe n sõng-yã: Nand t’a Zeezi ki, a zoee bi-bɛɛgã b sẽn da ka a sɛɛgẽ wã nimbãanega, tɩ yaool n yaa ned sẽn da nan sɩng bal n wilgdẽ t’a tẽeda a Zeezi. Rẽ wã, a Zeezi kõn zoe neb nins sẽn maand sɩd ne-a wã nimbãaneg n yɩɩd sɩda, sẽn mik tɩ b maanda b sẽn tõe fãa n na n sak a noyã?—Yɩɩn. 51:3; 1 Zã 2:1, 2.

7. Wa Zã 19:26, 27 wã sẽn wilgdã, bõe la a Zeezi yeel a Maari ne a Zã, la bõe yĩng t’a yeel-b woto?

⁷ Bõe la a Zeezi yeel-yã? (Karm-y Zã 19:26, 27.) A Zeezi ra ratame tɩ b ges a ma wã yelle. Wõnda wakat-kãng t’a ra lebga pʋg-kõore. A yaopã ra tõe n gesame tɩ b  ma wã paam futu, rɩɩb la bũmb a taaba. La ãnd n da na n ges a tẽebã yelle, n sõng-a t’a kell n maan sɩd ne a Zeova? Bũmb pa be n wilgdẽ tɩ wakat-kãng t’a Zeezi yaop nins sẽn yaa kom-dibli wã ra lebga a karen-biis ye. A Zã ra yaa tʋm-tʋmd sẽn maand sɩd ne a Zeezi, n leb n da yaa a zoa hakɩɩka. A Zeezi ra geta neb nins sẽn naag yẽ n tũud a Zeova wã wa a zak rãmba. (Mat. 12:46-50) A sẽn da nong a ma a Maari la a tagsd a yell wʋsgã yĩnga, a kɩtame t’a Zã na n ges a yelle, a sẽn mi t’a tõe n sõng-a lame t’a ket n tũud a Zeova wã yĩnga. A yeela a ma wã yaa: “Ad f biiga!” la a yeel a Zã yaa: “Ad f ma!” Baraarã tɛka, a Zã lebga wa a Maari biiga, n ges a yell wa a ma-roaka. A Zeezi  wilgame t’a nonga a Maari sẽn da yaa pʋg-sõng tɛkẽ wã hal wʋsgo. Sɩd me, a Maari gesa a Zeezi yell ne nonglem hal a rogmã tɛka, n le yals a sɛɛgẽ a kũumã wakate.

8. A Zeezi sẽn yeel a Zã la a Maari bũmb ningã wilgda tõnd bõe?

⁸ Yam-bʋg la d tõe n dɩk a Zeezi goamã pʋgẽ? Nonglem ning sẽn be tõnd ne d tẽed-n-taasã sʋkã pãng tõe n yɩɩga nonglem ning sẽn be tõnd ne d zakã rãmb sʋkã. D sẽn kĩ ne b rãmbã tõe n namsa tõnd d tẽebã yĩnga, wall b pʋd n daag tõnd n base. La wa a Zeezi sẽn pʋlmã, d sã n kell n gãd a Zeova kãn-kãe la d ket n be a siglgã pʋgẽ, d na n paama sẽn yɩɩd d sẽn bõnã “naoor koabga.” Wʋsg na n lebga d kom-dibli, d kom-pugli, d ma-rãmb wall d ba-rãmb d sẽn nong wʋsgo. (Mark 10:29, 30) Yãmb tagsg yaa wãn to, y sẽn paam n be ne y tẽed-n-taasã tɩ y yaa wa zak a ye neba, b sẽn tar tẽebo, la b nong a Zeova la b taabã yĩnga?—Kol. 3:14; 1 Pɩy. 2:17.

9. A Zeezi sẽn yeel bũmb ning tɩ be Matiye 27:46 pʋgẽ wã wilgda tõnd bõe?

⁹ Bõe la a Zeezi yeel-yã? Nand t’a Zeezi ki, a kelmame n yeel yaa: “Mam Wẽnnaam, mam Wẽnnaam, bõe yĩng tɩ yãmb bas maam?” (Mat. 27:46) Biiblã pa wilgd bũmb ning sẽn kɩt t’a Zeezi yeel woto wã ye. La d ges a sẽn yeelã sẽn tõe n sõng-d tɩ d bãng bũmb ninga. Bũmb a ye d sẽn mi, yaa t’a Zeezi sẽn togs gom-kãensã wã, a pidsa bãngr-gomd ning sẽn be Yɩɩn-sõamyã 22:2 pʋgẽ wã. * Sẽn paase, gom-kãensã ra wilgdame t’a Zeova pa ‘wẽ yãgr n gũbg’ a Bi-riblã ye. (Zoob 1:10) A Zeezi bãngame t’a Ba wã bas-a-la a bɛɛbã nusẽ zãng-zãnga, sẽn na yɩl tɩ b mak a tẽebã hal n tãag a kũum. Ninsaal baa a ye ra nan zɩ n paam mak-kãngã buud ye. Sẽn paase, gom-kãensã wilgame t’a ra pa tar taal ne wẽng baa a ye sẽn segd ne kũum ye.

10. A Zeezi sẽn yeel a Ba wã bũmb ningã sõngda tõnd tɩ d bãng bõe?

¹⁰ Yam-bʋg la d tõe n dɩk a Zeezi goamã pʋgẽ? Bũmb a ye yaa tɩ d pa segd n gũ t’a Zeova kogl tõnd ne zu-loees nins sẽn makd d tẽebã ye. Wa b sẽn mak a Zeezi n tãag a kũumã, tõnd me segd n segla d mens n na n kell n maan sɩd ne a Zeova, baa sã n na n tũu ne d yõore. (Mat. 16:24, 25) La d tõe n basa d yam, t’a Zeova pa na n bas tɩ makr sẽn yɩɩd d pãng paam-d ye. (1 Kor. 10:13) Bũmb a to d sẽn bãnge, yaa tɩ wa a Zeezi, b tõe n namsa tõnd zaalem yĩng bala. (1 Pɩy. 2:19, 20) Nebã sẽn namsd tõndã pa d sẽn maan bũmb sẽn yaa wẽng yĩng ye. Yaa d sẽn pa maand wa dũniyã nebã, la d sẽn kõt sɩdã kasetã yĩnga. (Zã 17:14; 1 Pɩy. 4:15, 16) A Zeezi bãnga bũmb ning sẽn kɩt t’a Zeova bas t’a namsã. La wẽn-sakdb kẽer sẽn paam namsg soka b mens bõe yĩng tɩ Wẽnnaam bas tɩ yell a woto buud paam-ba. (Hab. 1:3) Tõnd Wẽnnaamã sẽn yaa nimbãan-zoɛt la sũ-mar soabã miime tɩ nin-kãensã pa neb sẽn pa tar tẽebo, la tɩ yaa neb sẽn dat belsg ning yẽ bal sẽn kõtã.—2 Kor. 1:3, 4.

11. Bõe yĩng t’a Zeezi togs gomd ning sẽn be Zã 19:28 pʋgẽ wã?

¹¹ Bõe la a Zeezi yeel-yã? (Karm-y Zã 19:28.) Bõe yĩng t’a Zeezi yeel tɩ: “Ko-yũud n tar maam.” A yeela woto “sẽn na yɩl tɩ Gʋls-sõamyã sẽn yeelã pidsi.”  Yaa bãngr-gomd ning sẽn be Yɩɩn-sõamyã 22:16 pʋgẽ wã. Be b yetame yaa: “Mam pãngã sɛɛ wa sar sẽn wã, mam zelemdã tabendeda m dagsendakã. Yãmb gãnega maam kũum tomẽ.” Sẽn paase, a Zeezi sẽn yã namsg ning fãa wã yĩnga, nams-toaagã a sẽn paam ra-lukã zugã sẽn naage, ko-yũud wʋsg n da segd n tar-a. A ra ratame tɩ b kõ-a koom t’a yũ.

12. A Zeezi sẽn yeel tɩ ‘ko-yũud n tar maamã’ wilgda tõnd bõe?

¹² Yam-bʋg la d tõe n dɩk a Zeezi goamã pʋgẽ? A Zeezi ra pa get t’a sã n togs yell sẽn namsd-a yaa pãn-komsem ye. Bɩ tõnd me maan wa yẽ. Tõe tɩ naoor wʋsgo, d nongẽ lame n da togsd neb a taabã d sẽn dat sõngr ninsã ye. La sã n wa mik tɩ d rata sõngre, d segd n kosa neb a taabã n da yɛɛs ye. Wala makre, d sã n kʋʋlame wall d yaa koamsa, d tõe n kosa d zoa t’a rɩk-d n kẽng tɩ d tɩ ra teedo, bɩ n tall-d n kẽng logtor-yiri. D sũur sã n sãamame wall d sã n komsa raoodo, d tõe n kosa kãsem-soab bɩ d zoa sẽn yaa kiris-ned tẽeb sẽn bɩ t’a maag a yĩng n kelg-do, wall t’a togs-d “gom-noog” tɩ keng d pɛlga. (Yel. 12:25) D tẽeg tɩ d tẽed-n-taasã nong-d lame, la tɩ b rat n sõng-d-la “yel-pakr wakate.” (Yel. 17:17) La b pa tõe n bãng sẽn be d sũurẽ ye. B tõeeme n pa bãng tɩ d rata sõngre, sã n pa d togs-b lame ye.

13. A Zeezi sẽn kell n maan sɩd ne a Zeova n tãag a kũumã, a pidsa bõe?

¹³ Bõe la a Zeezi yeel-yã? Nizã rasem 14 daare, sẽn wa n zems zaabr wakat a tãabo, a Zeezi zẽka a koɛɛg n yeel yaa: “A pidsame!” (Zã 19:30) A sẽn yeel bũmb ningã wilgame tɩ nand t’a ki, a bãngame t’a maana bũmb nins fãa a Zeova sẽn da rat t’a maanã. A Zeezi sẽn kell n maan sɩd ne a Zeova n tãag a kũumã, a pidsa bũmb wʋsgo. Pipi, a wilgame t’a Sʋɩtãan yaa ziri-yagda. A Zeezi wilgame tɩ ninsaal sẽn zems zãng tõe n kell n saka a Zeova zãng-zãnga, baa ne a Sʋɩtãan sẽn na n maan-a bũmb ninga. Yiibu, a Zeezi kõo a vɩɩmã n na n dol tõnd yel-wẽnã. A kũumã sẽn yɩ maoongã kɩtame tɩ ninsaalbã sẽn pa zems zãngã tõe n yɩ tɩrs Wẽnnaam nifẽ, la b saagd n na n wa paam vɩɩm sẽn kõn sa. Tãabo, a Zeezi wilgame t’a Zeova n zems ne yɩ yĩngr la tẽng Naaba. Sẽn paase, a roka taal ning fãa sẽn da be a Ba wã yʋʋrã zugã.

14. Bõe la y segd n yãk yam n maand daar fãa, la bõe yĩnga?

¹⁴ Yam-bʋg la d tõe n dɩk a Zeezi goamã pʋgẽ? D segd n yãka yam n na n kell n maand sɩd ne a Zeova daar ne a to fãa. Ad saam-biig a Maxwell Friend sẽn yɩ Galaad lekollã karen-saamb a ye wã sẽn togse. A wɛgsa sõsg tigis-kãseng sẽn tigim tẽns toɛy-toɛy neb sasa, n gom wẽn-sakrã yell n yeel yaa: “F sã n tõe n tʋm tʋʋm wall n yeel bũmb rũndã, bɩ f ra viig n ning beoog ye. F kɩsa sɩd tɩ f na n taa beoogo? Daar fãa bɩ f vɩɩmd wa yaa f yaoolem daar f sẽn na n wilg a Zeova tɩ f zemsa ne vɩɩm sẽn kõn sa wã.” Bɩ d vɩɩmd wa yaa d yaoolem daar d sẽn na n kell n maan sɩd ne a Zeova. Woto, baa d sã n na n ki, d tõe n yeelame: “Zeova, mam maana m sẽn tõe fãa n kell n tall m burkĩndã, n wilg t’a Sʋɩtãan yaa ziri-yagda, la m waoog f yʋʋrã, n wilg tɩ foo n zems ne yɩ yĩngr la tẽng Naaba!”

15. Wa Luk 23:46 sẽn wilgdã, gom-bʋg la a Zeezi togs ne bas-m-yam?

¹⁵ Bõe la a Zeezi yeel-yã? (Karm-y  Luk 23:46.) A Zeezi yeela ne bas-yard zãng-zãng yaa: “M Ba, mam ningda m vʋʋsmã yãmb nugẽ.” A Zeezi ra miime t’a beoog-daarã bee a Zeova nugẽ, n da bas a yam t’a Ba wã na n tẽega a yelle.

16. Saam-biigã sẽn tar yʋʋm 15 wã sẽn yeel bũmb ningã wilgda tõnd bõe?

¹⁶ Yam-bʋg la d tõe n dɩk a Zeezi goamã pʋgẽ? Kell-y n yãk-y yam n na n bas y vɩɩmã a Zeova nugẽ. Sẽn na yɩl n maan woto, y segd n ‘teega a Zeova ne y sũur fãa.’ (Yel. 3:5) D gom saam-biig a Zozuwe yelle. A ra tara yʋʋm 15, n da bẽed a yõor bãaga. A zãgsame t’a pa na n sak tɩbsg sẽn pa zems ne Wẽnnaam noyã ye. Nand t’a ki, a yeela a ma wã yaa: “M ma, mam vɩɩmã bee a Zeova nugẽ. . . . M tõe n yeel-f-la vẽeneg tɩ m mii hakɩɩk t’a Zeova na n wa vʋʋg-m lame. A mii sẽn be m sũurẽ, la m nong-a-la ne m sũur fãa.” * Tõnd ned kam fãa segd n soka a meng yaa: ‘Mam sã n wa segd yell sẽn makd m tẽebã, la sẽn tõe n tũ ne m yõore, m na n basa m vɩɩmã a Zeova nugẽ, n kɩs sɩd t’a na n tẽega m yell bɩ?’

17-18. Bõe la d bãng-yã? (Ges-y zĩ-gũbrã me: “ A Zeezi yaoolem goamã sẽn sõngd tõnd tɩ d bãng bũmb ninga.”)

¹⁷ A Zeezi yaoolem goamã sɩd sõnga tõnd tɩ d bãng bũmb wʋsg sẽn tar yõodo. D yãame tɩ d segd n kõta d taabã sugri, la d bas d yam t’a Zeova me na n kõ-d-la sugri. D sẽn tar tẽed-n-taas tɩ d yaa wa zak a ye neb sẽn dat n sõng tõndã yaa zu-zẽkr menga. La d sã n dat sõngre, d segd n kos-b lame. D miime tɩ sẽn wa n yaa zu-loɛɛg ning fãa, a Zeova na n sõng-d lame tɩ d tõog toogo. D leb n yãame tɩ tara yõod tɩ d vɩɩmd daar fãa wa yaa d yaoolem daar d sẽn na n maan sɩd ne a Zeova, n kɩs sɩd tɩ d vɩɩmã bee a nugẽ, tɩ bũmb pa tõe n maan-a ye.

¹⁸ Hakɩɩka, goam nins a Zeezi sẽn togs a sẽn wa n be ra-lukã zugã sɩd sõngda tõnd tɩ d bãng bũmb wʋsgo. D sã n tũud bũmb ning d sẽn bãngã, wilgdame tɩ d sakda a Zeova sẽn yeel bũmb ning a Bi-riblã wɛɛngẽ wã. A yeelame: “Kelg-y-yã-a.”—Mat. 17:5.