1-2. Jesu wainga pa mugariro wakadini paakananga magama ake okupejisira? Durujiranyi.

WARI i masikati o njiku 14 wo mweji wa Nisani gore ra 33 Kristu Aviya. Jesu paanopera kupumbwa zvokunyepa no kutongehwa kuti ano ndava yaacikazivi kuita, Jesu anoshohwa, wotambujwa zvakashata maningi no kukohomehwa pa mutanda wo kutambujikira. Perego jinomubovora nyara no soka. Kufema no kuvereketa kwaanoita, zvinohwaja maningi. Asi anodikana kuvereketa ngokuti ano zviro zvinosisira maningi zvaanodikana kunanga.

² Ngatibhuye ngo magama akanangwa ndi Jesu paiifa pa mutanda wo kutambujikira, tinozobhuyazve ngo zvatinojija ngo magama ondhoo. Ngo masoko amweni tingananga kuti ‘ngatimupurukire.’—Mateu 17:5.

3. Jesu wainangira yaani paakananga kuti “Baba, vakungurirenyi”?

³ Jesu waida kunangenyi? Paaikohomehwa pa mutanda Jesu wakakumbira kudari: “Baba! Vakungurirenyi.” Kukungurira kana kuregerera yani? Zvakazonanga Jesu zvinotibesera kuzwisisa zvaainanga paakati: “Ngokuti avabzizivi bzo vanoita.” (Luka 23:33, 34) Jesu wainangira masoca o Ciroma akamukohomeraya nyara no soka. Ivona avacainasa kumuziva kuti iyena ndiyani kamare. Iyena wairangarirazve ngo vandhu vamweni vainga pa mbhungano vainanga kuti ngaaurawe asi vaizomutenda pa kufamba ko mukuvo. (Maitiro o Vapostori 2:36-38) Jesu aazivi kutendera kuti kutama kururama kwaaitihwa kumunyangajise woguma pa kutama kuregerera. (1 Pedru 2:23) Kusiyapo izvo iyena wakakumbira kuna Jehovha kuti aregerere vandhu vaidaya kumuuraya.

4. Tinojijenyi ngo kuda ka Jesu kuregerera vaimutevereraya?

 ⁴ Tinojijenyi ngo magama a Jesu? Inga ndi Jesu tinodikana kuva no cido co kuregerera vamweni. (VaKolosi 3:13) Vandhu vamweni kubatanijavo no ukama hwedu vangativenga ngokuti avazwisisi zvatinotenda no maponero atinoita. Ivona vangatinyepera, kutipseruja pambeji po vandhu, kupisa mabhuku edu kana kutithyisijira kuti vanozotiitira zvakashata. Kusiyapo kugara no bundu, tingakumbira Jehovha kuti afunungure meso o vandhu vanotizonda kuti njiku imweni vazowane cokwadi. (Mateu 5:44, 45) Pa mukuvo umweni, tingavona kuti zvinonesa maningi kuregerera maningi-ningi kudari takaitihwa zviro zvakashata maningi. Asi kudari tikatendera kuti kunyangajwa no bundu zvimere miji mu mwoyo mwedu, ndisu tinokhuvazikazve. Hambzaji imweni yakadurujira kudari: “Kuregerera azvirevi kuti zvovandiitiraro azvizivi kushata kana kuti ndinotendera kuti vandiitire zvakashata. Asi zvinoreva kuti ndakheta kutama kugara no bundu.” (Nduyo 37:8) Patinotema civaringo cokuregerera, tiri kukheta kuti zviitiko zvakashata zvakatiitikira zvitame kutinyangajisa.—VaEfeso 4:31, 32.

5. Cigondiso capi cakaita Jesu ku mushaishi waingaya wakakohomehwa pa mutivi pake? Ngenyi wakaita cigondiso ici?

⁵ Jesu waida kunangenyi? Vashaishi vaviri vaingaya vakakohomehwa pa mutivi pa Jesu, pa kutanga vese vo vaviri vaimushora. (Mateu 27:44) Pa kufamba ko nguva, umwe wavo wakacinja murangariro. Iyena wakaguma pa mbhejiso yokuti Jesu “aazivi kuita ciro” cakashata. (Luka 23:40, 41) Zvinosisira maningi ngo zvokuti iyena wakatatija rutendo hwokuti Jesu waizomuswa ko vakafa wova mambo njiku iri yese. Iyena wakavhunja Muponesi waifari kudari: “Jesu, ceukijanyi inini mukaguma ku umambo hwenyu.” (Luka 23:42) Rutendo wakatatijwari ngo mwanarume uwu, hwakakura maningi! Jesu wakamudavira kuti: ‘Zvokadi, ndinokuvhunja nyamasi kuti: Iwewe unozova na inini [haiwa mu Umambo, asi] mu Paradhiso.’ (Luka 23:43, Shanduro yeNyika Itsva) Vonanyi kuti Jesu wakaita cigondiso ici ecinangira iyena kamare, ecinanga kuti “iwewe” na “inini.” Eciziva kuti Baba wake vano usizi, Jesu wakabhuya masoko anopekeja vetero ku mushaishi waifari. —Nduyo 103:8.

6. Tinojijenyi ngo magama a Jesu ku mushaishi wiya?

⁶ Tinojijenyi ngo magama a Jesu? Jesu i citatijo cakaperera ca Babake. (Vaheberi 1:3) Jehovha anoda maningi kutiregerera no kutiitira usizi kudari tikanasa kukhauya ngo zviro zvakashata zvatakaita kare totenda kuti tinokwanisa kuregerehwa zvishaishi zvedu ngo muripo wo ngazi ya Jesu Kristu. (1 Johani 1:7) Vamweni vanovona kuti zvinonesa maningi kutenda kuti Jehovha anoregereradi kamare zvovakaposa kare. Kudari munojizwa kudaro nguva jimweni, rangariranyi basi, pa mukuvo mushomani Jesu acito afa, iyena wakabhuya magama anokhombija usizi ku mundhu waivha kumutenda pa mukuvo wondhowo. Ngo kudaro, Jehovha anozoitiravo maningi usizi ku vanamati vake vakagondeka vanoita mbhera panoperera simba ravo kuti vazwire mupango jake!—Nduyo 51:3; 1 Johani 2:1, 2.

7. Jesu wakavhunjenyi Mariya na Johani inga zvakatahwa pa Johani 19:26, 27, i ngenyi iyena wakananga kudaro?

⁷ Jesu waida kunangenyi? (Verenganyi Johani 19:26, 27.) Jesu waikaya-kaya maningi ngo pamusoro pa mai wake, kangaije vainga vaanoni pa mukuvo uwu. Hama jake  kangaije jaizovakorondha no kuvapa zvavaida zvo kunyama. Waro ndiyani waizovabesera kuti vave vakagondeka kuna Jehovha? Apana zvinotatija kuti hama jake jainga jaavajiji. Asi Johani wainga mupostori wakagondeka i waingazve shamwari yo phedo ya Jesu. Jesu waivona vaya vaainamata naivona Jehovha inga mbhuri yake. (Mateu 12:46-50) Asi ecikwevejehwa ngo rudo no kukaya-kaya ndi Mariya, Jesu waida kugondesa kuti Johani azovakorondhe, eciziva kuti waizokwanisa kuita kuti vave vakagondeka kuna Jehovha. Iyena wakavhunja mai wake kuti: “Nga uu mwana wako!” Wovhunjavo Johani kuti: “Nga ava mai wako!” Kuvhira pa njiku yondhoyo, Johani wakaita inga mwana wa Mariya ecimukorondha  inga ndi mai wake. Jesu wakatatija rudo wakakura maningi kuno mwanakaji uwu anosisira wakamukorondha ngo rudo kuvhira paakabahwa, wovazve phedo naye paakafa!

8. Tinojijenyi ngo zvakavhunja Jesu kuna Mariya na Johani?

⁸ Tinojijenyi ngo magama a Jesu? Ushamwari hwedu no hama no hambzaji jedu jo Cikristu hungavanga maningi kupinda kuzwirana kwatinoita no ukama hwedu hwo kunyama. Ukama hwedu hungatizonda kana kutisiya, asi Jesu wakagondesa kuti ngo kubatisisa Jehovha no sangano Rake, tinozowana “zvinodarika zana” kupinda zvotakaruza. Vazinji vanozoita vana vorume, vana vokaji, mai kana baba. (Marco 10:29, 30) Munojizwa kudini ngo kuita divi ro mbhuri yo umwari yakabatana ngo rutendo no rudo kuna Jehovha no ku umwe no umweni?—VaKolosi 3:14; 1 Pedru 2:17.

9. Tinojijenyi ngo magama a Jesu anowanika pana Mateu 27:46?

⁹ Jesu waida kunangenyi? Mukuvo mushomani acito afa, Jesu wakamima kuti: “Mwari wangu, Mwari wangu mandisia ngenyi?” (Mateu 27:46) Bhaibheri aridurujiri kuti ngenyi Jesu wakananga magama aya. Asi vonanyi zvaanotivhunja magama aya. Ciro cimwe ngo cokuti, ngo kunanga magama aya, Jesu waikwanirisa ciporofita cinowanika pana Nduyo 22:2. * Kusiyapo izvo, magama aya anojekesa kuti Jehovha aazivi ‘kutendeneja [mwana wake] ngo mufimbiji.’ (Jobe 1:10) Jesu waizviziva kuti Baba wake vakamuregera kamare mu nyara jo vavengi vake, kuti aejwe mbhera panoperera simba rake inga zvicizivi kuejwa mundhu ari wese. Mukuengejera, magama aya anokhombija pambhene kuti iyena wainga acina ndava yaifanera kuti aurawe ndiyona.

10. Zvijijo zvapi zvatinowana pa magama a Jesu aakavhunja Baba wake?

¹⁰ Tinojijenyi ngo magama a Jesu? Ciro cimwe catinojija ngo cokuti, atidikani kuvetera kuti Jehovha atijivirire ku zviejo zvinoeja rutendo hwedu. Inga ndi Jesu wakaejwa mbhera panoperera simba rake, itusu tinodikana kuva takanasirira kuti tive takagondeka mbhera kufa kudari zvecidiwa weya. (Mateu 16:24, 25) Asi tinodikana kuva no cokwadi cokuti Mwari aazotiregeri teciejwa kupindirija zvatinokwanisa kucijikira. (1 VaKorinto 10:13) Cijijo cimweni ngo cokuti, inga ndi Jesu itusu tinotambujwa ngo njira icizivi kururama. (1 Pedru 2:19, 20) Vaya vanotizonda, avatizondi ngokuti taita ciri cese cakashata, asi vanotizonda ngokuti atiiti divi ro nyika. Cimwenizve ngo cokuti tinoita ucapupu hwo cokwadi. (Johani 17:14; 1 Pedru 4:15, 16) Jesu waizwisisa kuti ngenyi Jehovha waitendera kuti iyena atambujike. Asi mukusiyana na Jesu, vanamati vakagondeka vanowanana no zvineso zvokuti nguva jimweni vanojivhunjisa kuti ngenyi Mwari anotendera kuti zviro zvimweni zvivaitikire. (Habakuki 1:3) Mwari wedu ano usizi no kusengerera, anozwisisa kuti vandhu vakadari vanahwo rutendo, asi ivona vanoda vangiso inovha kwaari basi.—2 VaKorinto 1:3, 4.

11. Ngenyi Jesu wakananga magama anowanika pa Johani 19:28?

¹¹ Jesu waida kunangenyi? (Verenganyi Johani 19:28.) Ngenyi Jesu wakananga kuti: “Ndino nyota”? Iyena wakananga kudaro ‘kuti zvikwanirisike zvakatahwa’ kana ciporofita cinowanika pana Nduyo 22:16, cinoti:  “Muromo wangu wakaoma inga gangavia, rurimi hwangu hwakanamirira mu xaya jangu.” Cimwenizve ngo cokuti, Jesu paakapera kutambujika, kubatanija kukohomehwa kunohwaja maningi pa mutanda wokutambujikira, iyena wakava no nyota huru. Iyena waida besero kuti apeje nyota yake.

12. Tinojijenyi ngo magama a Jesu okuti “ndino nyota”?

¹² Tinojijenyi ngo magama a Jesu? Jesu aazivi kurangarira kuti zvakashata kuvhunja vamweni mazwiro ake, itusu tinodikanavo kubhuya mazwiro edu. Kazinji mu upenyu hwedu tinodakarira kutama kuvhunja vamweni zvatinotama. Asi kudari ukaguma mukuvo watinoda besero, atidikani kuthya kukumbira besero vamweni. Inga muezaniso, kudari taavasharuka kana tiri kuhwaja, tingakumbira bhureya shamwari jedu kuti tiende ku bazari kana ka medhiko. Kudari takasuruvara kana takapera simba tingakumbira besero mukuru kana shamwari yo Cikristu yakaivha kumujimu kuti itipurukire kana kutibhuira “izwi rakanaka” kuti itivangise. (Mazwi Akangwara 12:25) Narini mucakanganwa kuti hama no hambzaji jedu jinotida maningi. Cimwenizve, jinoda kutibesera “pa bonezi.” (Mazwi Akangwara 17:17) Ijona ajikwanisi kuziva zviri mu murangariro mwedu. Ijona ajikwanisi kuziva kuti tiri kuda besero kudari tikatama kujivhunja.

13. Jesu wakaitenyi ngo kuva wakagondeka mbhera kufa kwake?

¹³ Jesu waida kunangenyi? No jokwedera kuita nguva ndhatu jo madeko ondhoo, o njiku 14 ya Nisani Jesu wakakhuwa eciti: “Bzese bzainga bzapera!” (Johani 19:30) Magama a Jesu anotijijisa kuti paainga acito afa, Jesu waizviziva kuti wapera kuita zviro zvese zvaida Jehovha kuti iyena aite. Ngo kuva kwake wakagondeka mbhera kufa, Jesu wakakwanirisa zviro zvakawanda. Cokutanga, iyena wakakhombija kuti Sathana imunyepi. Jesu wakakhombija kuti mundhu wakakwana anokwanisa kugara akagondeka pikija kuti Sathana amuejese kudini. Cocipiri, Jesu wakapa upenyu hwake kuita muripo. Kufa kwaakaita, kwakaita kuti zvikwanisike kuti vandhu vacikazivi kukwana vave no ushamwari na Jehovha, wovapa vetero yo kupona kwenda no kwenda. Cocitatu, Jesu wakavonesa kuti matongero a Jehovha akarurama, wocenesa zina ra Babake pa kushohwa kwese.

14. Tinodikana kutema civaringo cokuda kuponesa kudini njiku imwe nga imwe? Durujiranyi.

¹⁴ Tinojijenyi ngo magama a Jesu? Tinodikana kutema civaringo co kugara takagondeka njiku jese. Rangariranyi zvakananga hama Maxwel Friend, vakashanda inga mujijisi wo Cikora co Bhaibheri co Giriyadhi co Watchtower. Pa gungano rimweni ro ndharaundha ro nyika zinji, hama Friend vakaita hurukuro ngo pamusoro po ugondeki, yokuti: “Ucavetera mbhera mangwana kuti uite zvawaida kuita nyamasi. Unozviziva kuti unozova uri penye mangwana? Ngatipone njiku imwe nga imwe inga mukana wedu wokupejisira wokupona kwenda no kwenda.” Ngo kudaro, ngatipone njiku imwe nga imwe inga mukana wedu wokupejisira wokutatija ugondeki hwedu. Pikija tikafa, tinozokwanisa kunanga kuti, “Jehovha ndakaita zvese zvandaikwanisa kuti ndive ndakagondeka, nditatije kuti Sathana munyepi no kucenesa zina renyu no ukuru-kuru hwenyu!”

15. Mukuzwirana na Luka 23:46, Jesu waithembenyi?

¹⁵ Jesu waida kunangenyi? (Verenganyi Luka 23:46.) Ecithemba kamare, Jesu wakati: “Baba, mu nyara menyu ndinopa mwiha wangu.”  Jesu waiziva kuti upenyu hwake hwo kumbeji hwainga mu nyara ja Jehovha, wova no cokwadi cokuti Baba wake vaizomurangarira.

16. Majijenyi ngo zvakaitikira mujaha umweni wainga no gumi ro makore no makore mashanu?

¹⁶ Tinojijenyi ngo magama a Jesu? Tinodikana kuva no cido cokuva takagondeka kuna Jehovha pikija upenyu hwedu uri pa ngozi. Kuti tiite kudaro, tinodikana, ‘kugonda Tenji Mwari ngo mwoyo wedu wese.’ (Mazwi Akangwara 3:5) Vonanyi muezaniso wo mujaha umweni ano gumi ro makore na makore mashanu, anodaninjwa Joshuwa wainga no ndhendha yaizomuuraya. Iyena wakaramba marapihwe acikazwirani no mutemo wa Mwari. Mukuvo mushomani acito wafa, wakavhunja make kudari: “Mai, Jehovha anozondikorondha. . . . Ndinomuvhunja izvi mai ngo kuthemba kwese kamare: Ngokuti ndinozviziva kuti Jehovha anozondimusa kamare kuti ndiponezve. . . . Iyena anoziva murangariro jangu no mazwiro angu, inini ndinomuda maningi.” * Umwe nga umwe wedu waizoita zvaushoni kujivhunjisa kudari: ‘Rutendo hwangu uri kuejwa ngo ciri cese caizondiuraya? Ndaizogara ndakagondeka kuna Jehovha ndecithemba kuti anozondirangarira?’

17-18. Tajijenyi? (Vonanyi bhokiso rinoti: “ Zvatinojija ngo Magama Okupejisira a Jesu.”)

¹⁷ Tinojija zvizinji maningi pa magama okupejisira a Jesu! Iwona anoticeuja kuti tinodikana kuregerera vamweni no kuthemba kuti Jehovha anotiregerera. Zvinodakajisa maningi kuva no hama no hambzaji mu ungano jakanasiririka kuti jitibesere. Itusu tinoda besero, asi kuti jitibesere tinodikana kujikumbira. Itusu tinoziva kuti Jehovha anozotibesera kuti ticungirire cineso ciri cese catingasongana naco. Tavona kusisira ko kupona njiku imwe nga imwe inga mukana wedu wokupejisira wokutatija kugondeka kwedu, tecithemba kuti upenyu hwedu wakangwaririka mu nyara ja Jehovha.

¹⁸ Zvokadi kamare magama akabhuiwa ndi Jesu paiuraiwa pa mutanda anoreva zviro zvakawanda maningi! Ngo kushandisa zvatajijari, tinozozwira magama a Jehovha ngo pamusoro po Mwana wake, okuti: “Mupurukirenyi.”—Mateu 17:5.