1-2. Hokolola shoka sha li sha ningwa po manga Jesus inaa popya oohapu dhe dhahugunina.

OSHA li omutenya, 14 Nisan, mo 33 E.N. Konima sho Jesus a lundilwa e ta monika ondjo moshinima shoka inaa ninga shili, okwa shekwa, okwa hepekwa nonyanya, opo nduno e ta alelwa komuti gwomahepeko. Okwa ululwa noomboha kiikaha nokoompadhi. Kehe ethimbo ta fudha nenge ta popi okwa li te ehama noonkondo. Ihe okwa li e na oku shi ninga, oshoka okwa li e na iinima ya simana mbyoka e na okupopya.

² Natu ka kundathaneni kombinga yoohapu ndhoka Jesus a li a popi sho a li e li pokusa komuti gwomahepeko nosho wo shoka tatu vulu okwiilonga moohapu dhe ndhoka. Niitya yimwe, natu mu “pulakene!” — Mat. 17:5, NW.

3. Jesus otashi vulika a li ta popi kombinga yoolye, sho a ti: “Tate, ya dhimina po oondjo dhawo”?

³ Jesus okwa li a hala okutya shike? Sho Jesus a alelwa komuti gwomahepeko, okwa galikana a ti: “Tate, ya dhimina po oondjo dhawo.” Oolye a li ta pula ya dhiminwe po? Oohapu dhe dha ka landula ko otadhi tu kwathela tu uve ko kutya oolye a li ta popi. Jesus okwa gwedha ko a ti: “Inaa tseya shoka taa ningi.” (Luk. 23:33, 34) Otashi vulika Jesus a li ta popi kombinga yaakwiita Aaroma mboka ye mu alele komuti gwomahepeko noomboha. Kaya li ye shi kutya oye lye naanaa. Otashi vulika wo a li ta popi kombinga yaamboka ya li taya igidha kutya na dhipagwe, mboka lwanima ya li taye ke mu itaala. (Iil. 2:36-38) Nonando Jesus ka li i ilongela okusa, ka li e etha okuningilwa okwaanuuyuuki hoka ku mu geyithe nenge a kale e na onkone. (1 Pet. 2:23) Pehala lyaashono, okwa pula Jehova a dhimine po mboka ye mu dhipaga.

4. Oshike tatu vulu okwiilonga koshiholelwa shaJesus shokudhimina po aapataneki ye?

 ⁴ Oshike tatu vulu okwiilonga moohapu dhaJesus? Ngaashi Jesus, natse otwa pumbwa okukala hatu dhimine po yalwe. (Kol. 3:13) Yamwe, mwa kwatelwa aapambele yetu, otashi vulika haye tu pataneke, molwaashoka kaye uvite ko shoka twi itaala nosho wo eihumbato lyetu. Otashi vulika ya popye iifundja kombinga yetu, ye tu sithe ohoni komeho gayalwe, ya hanagula po iileshomwa yetu, nenge nokuli ye tu ningile omatilitho kutya otaye ke tu ehameka palutu. Pehala lyoku ya kwatela onkone, otatu vulu okupula Jehova e ya kwathele ya taambe ko oshili. (Mat. 5:44, 45) Omathimbo gamwe, otashi vulika tu shi mone oshidhigu okudhimina po yalwe, unene tuu ngele oyu ungaungiwa natse nayi. Ihe ngele otwe etha ongeyo nonkone yi tu pangele, otatu ki iyetela owala omaupyakadhi. Omumwameme gumwe okwa popi, a ti: “Onde shi ndhindhilika kutya okukala ho dhimine po yalwe itashi ti kutya owa taamba ko okukala ho ningwa nayi nenge kutya owe ya pitika ya kale haya ungaunga nangoye momukalo ngoka. Ihe otashi ti kutya onda tokola okukala inaandi ya kwatela onkone.” (Eps. 37:8) Ngele otwa hogolola okudhimina po yalwe, kungawo otwa ninga etokolo kaatu kale twa geya omolwiinima iiwinayi mbyoka ye tu ningila. — Ef. 4:31, 32.

5. Jesus oku uvanekele shike gumwe gwomaakolokoshi mboka ya dhipagwa pamwe naye, nomolwashike e mu ningile euvaneko ndyoka?

⁵ Jesus okwa li a hala okutya shike? Aakolokoshi yaali oya li ya alelwa komiti dhomahepeko pamwe naJesus. Petameko, aakolokoshi mboka yaali nayo oya li taye mu sheke. (Mat. 27:44) Ihe lwanima, gumwe gwomuyo okwa lundulula iikala ye. Okwe shi ndhindhilike kutya Jesus ina ninga “nando uuwinayi washa.” (Luk. 23:40, 41) Shoka oshindhindhilikwedhi, oku ulike kutya okwi itaala kutya Jesus ota ka yumudhwa kuusi, nota ka pangela e li omukwaniilwa esiku limwe. Omukolokoshi ngoka okwa lombwele Jesus ngoka a li e li pokusa, a ti: “Jesus, dhimbulukwa ndje ngele wa thiki mOshilongo shoye.” (Luk. 23:42) Omulumentu ngoka omukolokoshi ka li tuu u ulike eitaalo! Jesus okwe mu yamukula a ti: “Ongame tandi ku lombwele, nena tuu ndjika oto ka kala pamwe nangame [hamUukwaniilwa, ihe] mOparadisa.” (Luk. 23:43) Ndhindhilika kutya Jesus euvaneko ndyoka okwe li popi ta longitha iitya “tandi,” “oto” nosho wo “nangame.” Molwaashoka Jesus okwa li e shi kutya He omunahenda, okwa popi oohapu ndhoka dha li dha pe omukolokoshi ngoka e li pokusa etegameno. — Eps. 103:8.

6. Oshike tatu ilongo moohapu dhaJesus ndhoka a lombwele omukolokoshi?

⁶ Oshike tatu vulu okwiilonga moohapu dhaJesus? Jesus oku na omaukwatya ga fa gaHe. (Heb. 1:3) Jehova okwa halelela oku tu ulukila ohenda noku tu dhimina po ngele otwi iyele ombedhi, omolwiinima iiwinayi mbyoka twa ninga monakuziwa, nongele otu na eitaalo mekuliloyambo lyaJesus Kristus. (1 Joh. 1:7) Yamwe otashi vulika ye shi mone oshidhigu okwiitaala kutya Jehovah ota vulu oku ya dhimina po omayono gawo ngoka ya ninga monakuziwa. Ngele omathimbo gamwe osho ho kala wu uvite ngawo, dhiladhila kwaashika: Nziya manga inaa sa, Jesus oku ulukile ohenda omukolokoshi ngoka opo owala a tameke okukala e na eitaalo. Shoka otashi tu shilipaleke kutya Jehova ote ku ulukila ohenda aalongeli ye aadhiginini, mboka taya ningi ngaashi taya vulu ya vulike kiipango ye. — Eps. 51:1; 1 Joh. 2:1, 2.

7. Ngaashi sha popiwa muJohannes 19:26, 27, Jesus okwa li a lombwele Maria naJohannes shike, nomolwashike?

⁷ Jesus okwa li a hala okutya shike? (Lesha Johannes 19:26, 27.) Jesus okwa li ti ipula nayina, ngoka tashi vulika pethimbo ndyoka a ningi omuselekadhi. Aamwayina yaJesus otashi vulika ya li  taya vulu oku mu sila oshimpwiyu palutu nopainiwe. Ihe mbela olye a li ta ke mu sila oshimpwiyu pambepo? Kapu na shoka tashi ulike kutya aamwayinamati yaJesus pethimbo ndyoka oya adhika nale ya ningi aalongwa ye. Ihe Johannes okwa li omuyapostoli omudhiginini nokwa li gumwe gwomookuume kaJesus kopothingo. Jesus okwa li a tala ko mboka ye mu wayimina mokulongela Jehova ye li aamwayina ye yopambepo. (Mat. 12:46-50) Onkee ano, molwaashoka Jesus okwa li e hole yina noku na ko nasha naye, okwi inekelele Johannes oshinakugwanithwa shokusila Maria oshimpwiyu pambepo. Jesus okwa li a lombwele yina, a ti: “Meme, omumwoye oye ngo!” Nokwa lombwele Johannes, a ti: “Nyoko oye ngo!” Okuza esiku ndyoka, Johannes okwa kala ongomwana  gwaMaria nokwa kala he mu sile oshimpwiyu onga yina. Jesus okwa li lela u ulikile Maria ohole, ngoka a kala noku mu sila oshimpwiyu pahole okuza kuunona, naasho a li pokudhipagwa okwa li nokuli a thikama komeho ge.

8. Oshike tatu vulu okwiilonga moohapu dhaJesus ndhoka a lombwele Maria naJohannes?

⁸ Oshike tatu vulu okwiilonga moohapu dhaJesus? Ekwatathano lyetu naamwatate naamwameme otali vulu okukala lya kola li vulithe pwaandyoka tu na naapambele yetu. Aapambele yetu otashi vulika ye tu pataneke nenge nokuli ye tu ekelehi, ihe ngaashi Jesus u uvaneka, ngele otwa kala popepi naJehova nosho wo nehangano Lye, otatu ka ‘mona lwethele’ shoka twa kanitha. Oyendji yomooitaali ooyakwetu otaya ka kala onga aanona yetu aaholike, oomeme, nenge ootate. (Mark. 10:29, 30) Owu uvite ngiini sho wu li oshitopolwa shuukwanegumbo wopambepo mboka wa hangana meitaalo nomohole, ano wu hole Jehova nowu holathane? — Kol. 3:14; 1 Pet. 2:17.

9. Oohapu dhaJesus ndhoka tadhi adhika muMateus 27:46, otadhi tu longo shike?

⁹ Jesus okwa li a hala okutya shike? Nziya manga inaa sa, Jesus okwi igidha, a ti: “Kalunga kandje, Kalunga kandje, omolwashike we ekelehi ndje?” (Mat. 27:46) Ombiimbeli inayi yelitha kutya omolwashike Jesus a popi oohapu ndhoka. Ihe natu taleni shoka oohapu ndhoka tadhi tu longo. Oshinima shimwe shoka tatu ilongo mo osho kutya Jesus sho a popi oohapu ndhoka, kungawo okwa gwanitha po ehunganeko ndyoka tali adhika mEpisalomi 22:1. * Shimwe ishewe, oohapu ndhoka odhe shi yelitha kutya Jehova ka li ta “gamene” Omwana. (Job 1:10) Jesus okwa li e shi uvite ko kutya He okwe mu gandja miikaha yaatondi ye, opo ya vule oku mu makela sigo omeso. Kapu na omuntu gulwe a makelwa ngaashi Jesus. Oohapu ndhoka odha koleke wo kutya ka li e na ondjo ya gwana oku mu dhipagitha.

10. Oshike tatu vulu okwiilonga moohapu dhaJesus ndhoka a lombwele He?

¹⁰ Oshike tatu vulu okwiilonga moohapu dhaJesus? Shimwe shomiinima mbyoka tatu vulu okwiilonga mo osho kutya katu na okutegelela Jehova e tu gamene komaupyakadhi ngoka taga ka makela eitaalo lyetu. Ngaashi naanaa Jesus a li a makelwa sigo omeso, natse otu na okuulika uudhiginini wetu sigo omeso ngele osha pumbiwa. (Mat. 16:24, 25) Nando ongawo, otu na eshilipaleko kutya Kalunga ite ke tu ethela memakelo li vule oonkondo dhetu. (1 Kor. 10:13) Oshinima shilwe tatu vulu okwiilonga mo osho kutya ngaashi Jesus, natse otatu vulu okuhepekwa kaashi li pauyuuki. (1 Pet. 2:19, 20) Mboka haye tu pataneke ihaye shi ningi molwaashoka twa ninga sha sha puka, ihe omolwaashoka kaatu li oshitopolwa shuuyuni naasho hatu uvitha onkundana ombwanawa. (Joh. 17:14; 1 Pet. 4:15, 16) Jesus okwa li e shi uvite ko kutya omolwashike Jehova e etha a monithwe iihuna. Ihe mepingathano naJesus, omathimbo gamwe aapiya yamwe aadhiginini mboka hayi iyadha momashongo ohaya kala ya limbililwa kutya omolwashike Jehova e etha iinima yontumba yi ya ningilwe. (Hab. 1:3) Kalunga ketu omunahenda nomunalukeno oku uvite ko kutya aapiya ye mboka haya kala yu uvite ngawo oye na eitaalo, ihe oya pumbwa owala ehekeleko ndyoka oye awike ta vulu oku li ya pa. — 2 Kor. 1:3, 4.

11. Omolwashike Jesus a li a popi oohapu ndhoka tadhi adhika muJohannes 19:28?

¹¹ Jesus okwa li a hala okutya shike? (Lesha Johannes 19:28.) Omolwashike Jesus a ti: “Onda sa enota”? Okwe shi popi, “opo shoka sha nyolwa shi gwanithwe,” ano ehunganeko ndyoka tali adhika mEpisalomi 22:15, ndyoka  tali ti: “Omuligu gwandje ogwa kukuta kwele, nelaka lyandje lya kakatela kondaathelo.” Shimwe ishewe, konima yomahepeko agehe ngoka Jesus a piti mugo, mwa kwatelwa wo uuwehame mboka a li u uvite sho e li komuti gwomahepeko, okwa li e na okukala a sa enota. Onkee ano okwa li a pumbwa sha shokunwa, opo a ze enota.

12. Oshike tatu vulu okwiilonga moohapu dhaJesus ndhoka tadhi ti “onda sa enota”?

¹² Oshike tatu vulu okwiilonga moohapu dhaJesus? Jesus ka li ta dhiladhila kutya osha puka okupopya nkene u uvite. Natse wo katu na okudhiladhila ngawo. Oyendji yomutse otashi vulika okukalamwenyo kwetu akuhe twa kala ihaatu lombwele yalwe nkene tu uvite. Ihe ngele otwi iyadha monkalo moka twa pumbwa ekwatho, katu na okukakadhala okupula ekwatho kuyalwe. Pashiholelwa, ngele otwa kulupa nenge kaatu na uukolele, otatu vulu okupula kuume ketu e tu fale kositola tu ka lande iikulya nenge kondohotola. Ngele otwi iyadha twa teka omukumo, otatu vulu okupula omukuluntugongalo nenge kuume a pyokoka pambepo tu mu lombwele nkene tu uvite noku tu tse omukumo ‘noohapu dhuukuume.’ (Omayel. 12:25) Natu dhimbulukwe kutya aamwatate naamwameme oye tu hole, noya hala oku tu kwathela uuna twi iyadha ‘muudhigu’ wontumba. (Omayel. 17:17, NW) Ihe ihaya vulu okuthimbula shoka tatu dhiladhila. Otashi vulika ya kale kaaye shi ngele otwa pumbwa ekwatho, ngele inatu ya lombwela.

13. Jesus okwa gwanitha shike sho a kala omudhiginini sigo omeso?

¹³ Jesus okwa li a hala okutya shike? Lwopondatu yokomatango 14 Nisan, Jesus okwi igidha muule, a ti: “Ayihe ya gwanithwa!” (Joh. 19:30) Oohapu dhe otadhi tu longo kutya nziya manga inaa sa, Jesus okwa li e shi kutya okwa gwanitha ayihe mbyoka Jehova a li a hala a ninge. Sho Jesus a kala omudhiginini sigo omeso, kungawo okwa gwanitha iinima yontumba. Shotango, oku ulike kutya Satana omufundja. Jesus oku ulike kutya omuntu a gwanenena ota vulu okukala omudhiginini, nonando Satana oku mu makele shi thike peni. Oshitiyali, Jesus okwa gandja omwenyo gwe gu li iikulila. Ekulilo lye olye shi ningi tashi wapa, opo aantu inaaya gwanenena ya kale ye na ekwatathano naKalunga noya kale ye na etegameno lyokukala nomwenyo sigo aluhe. Oshititatu, uudhiginini waJesus owa yukipalitha uunamapangelo waJehova nowa yapulitha wo edhina lyaHe.

14. Otu na okukala twa tokola toko okwiihumbata ngiini esiku kehe? Shi yelitha.

¹⁴ Oshike tatu vulu okwiilonga moohapu dhaJesus? Otu na okukala twa tokola toko okukala aadhiginini esiku kehe. Natu taleni kwaashoka sha popiwa komumwatate Maxwell Friend, ngoka a li omulongi kOsikola yaGilead. Poshigongi shimwe shopaigwana sho omumwatate Friend a li ta gandja oshipopiwa she tashi popi kombinga yuudhiginini, okwa ti: “Ino dhiladhila kutya shoka wa li wu na okuninga nenge okupopya wu popile oshili nena, oto shi ningi ngula. Mbela owu na ngaa uushili kutya ngula oto kala wu na omwenyo? Kala wa tala ko esiku kehe li li ompito yoye yahugunina yokuulika kutya owa gwana oku ka mona omwenyo gwaaluhe.” Natu kale twa tala ko esiku kehe li li esiku lyetu lyahugunina lyokuulika uudhiginini wetu. Opo nduno ngele otwi iyadha twa taalela eso, otatu vulu okutya: “Jehova, onda ningi ashihe shoka tandi vulu ndi kale omudhiginini kungoye, ndi ulike kutya Satana omufundja nondi simanekithe edhina lyoye nokwaambidhidha uunamapangelo woye!”

15. Shi ikolelela kuLukas 23:46, Jesus okwa li e na uushili wuni?

¹⁵ Jesus okwa li a hala okutya shike? (Lesha Lukas 23:46.) Jesus okwa li i inekela He thiluthilu, nomolwaashono e mu lombwele a ti: “Tate, omwenyo gwandje otandi gu gandja miikaha  yoye.” Jesus okwa li e shi kutya Jehova oye owala ta vulu oku mu yumudha, nokwa li e na uushili kutya He ote ke mu dhimbulukwa.

16. Oshike wi ilonga moshimoniwa shomumwatate gwomimvo 15?

¹⁶ Oshike tatu vulu okwiilonga moohapu dhaJesus? Kala wu na ehalo lyokugandja omwenyo gwoye miikaha yaJehova. Opo wu vule oku shi ninga, “inekela Omuwa nomutima gwoye aguhe.” (Omayel. 3:5) Natu taleni koshiholelwa shomumwatate Joshua gwomimvo 15, ngoka a kala ta hepekwa kuuvu woshinamenena. Okwa li a tindi omapango ngoka itaaga tsu kumwe nompango yaKalunga. Manga inaa sa, okwa lombwele yina, a ti: “Meme, ondi li miikaha yaJehova. . . . Shika otandi vulu oku shi ku lombwela ndi na uushili kutya Jehova ota ka yumudha ndje. Jehova oku shi shoka shi li momutima gwandje, nondi Mu hole noonkondo.” * Kehe gumwe gwomutse ota vulu okwiipula ngeyi, ‘Mbela ngele ondi iyadha monkalo moka omwenyo gwandje gu li moshiponga notayi makele eitaalo lyandje, mbela otandi ka gandja ngaa omwenyo gwandje miikaha yaJehova, nokukala ndi inekela kutya ota ka dhimbulukwa ndje?’

17-18. Iiyilongomwa yini twi ilonga? (Tala wo oshimpungu “ Shoka tatu ilongo moohapu dhaJesus dhahugunina.”)

¹⁷ Moohapu ndhoka Jesus a popi sho e li pokusa otatu vulu okwiilonga mo iinima ya simana shili. Otadhi tu dhimbulukitha kutya otwa pumbwa okukala hatu dhimine po yalwe nokwiinekela kutya Jehova ote ke tu dhimina po. Otu na uuthembahenda wokukala tu na aamwatate naamwameme megongalo mboka ye li aamwayina yetu yopambepo noyi ilongekidha oku tu kwathela. Ihe uuna twa hala ye tu kwathele otwa pumbwa oku ya pula. Otu shi kutya Jehova ote ke tu kwathela tu idhidhimikile eshongo kehe tatu ki iyadha mulyo. Otu wete nkene sha simana okukala twa tala ko esiku kehe li li ompito yetu yahugunina yokuulika uudhiginini wetu, nokukala tu na einekelo kutya ngele otwa si, Jehova ote ke tu yumudha.

¹⁸ Odhoshili kutya oohapu ndhoka Jesus a popi sho a li e li pokusa komuti gwomahepeko, otadhi tu longo oshindji. Ngele otwa tula miilonga shoka twi ilonga mo, kungawo otatu vulika koohapu dhaJehova ndhoka a popi kombinga yOmwana sho a ti: “Mu uveni!” — Mat. 17:5.