1-2. Tiheeni yeeren’ye Yesu ahaakumve oloca masu awe ookuchula?

NAARI nihiku na 14 a Nisani a 33 E.K. Amanle wootheriwa ni othorihiwa wi owo aari mulipa oohuhula, echu yeeyo owo ahenreiyeno, Yesu aanyemuliwa, aahooxiwa, voocharela aakhomeliwa va mwiri woohooxiwavo. Ipereko saathorola mata ni inaani sawe. Vaavaa aamumuleiye, nave tho vaavaa aaloceiye, owo aanoona wiicela nyenya aaphwanela oloca woona wi owo aakhalano ichu soochuneya wi aloce.

² Hankooni nthokororye masu yaawo aalonceiye vaavaa owo aareiye va mwiri woohooxiwavo ni ichu nnahuseryaahu orweela wa masu yaawo. Mmasu makina, hankooni ‘ninwiriyane.’—Mat. 17:5.

3. Taani Yesu aawaaheiye vaavaa aalonceiye: “Atiithi, mwaakhurumuwele”?

³ Tiheeni Yesu aalonceiye? Vaavaa Yesu aareiye va mwiri woohooxiwavo, owo aavekela: “Atiithi, mwaakhurumuwele.” Achu taani Yesu aachuneiye wi Atiithi awe yaakhurumuwele? Masu oocharela a Yesu annanikhaviherya wiiwexexa taani yaawo owo aaloceiye. Owo aaloca: “Hanasuwela aneeraaya.” (Luka 23:33, 34) Mwawooneya Yesu aawaaha anakhoco o Roma yaawo yaamukhomenle va mwiri woohooxiwavo. Awo hiyaasuwela chiryene wi owo aari taani. Yesu aawaaha tho achu yaawo yaakhulenle wi owo iiphiwe nyenya ohoolo waya yaamuroromenle yoowo. (Saw. 2:36-38) Yesu heemerenrye wi ohookololowa yoowo aahoolenleiye omweerihe okhala oonyeenyeya ni okuha mathowa. (1 Ped. 2:23) Ohiya yeeyo, owo aamveka Yehova wi aakhurumuwele oothene yaale yaamwiimphe.

4. Tiheeni nnahuseryaahu orweela wa Yesu vooloca sa waakhurumuwela ni murima woothene yaawo yaamwaakaaha?

 ⁴ Tiheeni nnaweryaahu ohuserya orweela wa masu a Yesu? Ntoko Yesu, nnaphwanela waalevelela akina. (Kol. 3:13) Akina anaphitaanyerya amusi, yaawo akhweya ananiica nthowa nawi akhweya haniiwexexa soororomela sahu ni mukhalelo ahu wa okumi. Awo ananwerya onootherya, onuuliha muru ohoolo wa akina, waahula soolaleeryiwa sahu, naari tho onikhaliha moonanara. Ohiya okhala oonyeenyeya, nnaphwanela omveka Yehova wi awerye waakhaviherya yaawo ananaakaaha wi yeemererye eparipari. (Mat. 5:44, 45) Ikwaha ikina, onanwerya okhala woovila waakhurumuwela xaxaxa wakhala wi aanikhaliha moonanaraxa. Nyenya wakhala wi nootitelela onyeenyeya ni ohikhurumuwela, nniihooxa mukhatiihu. Murokora mmoha oothariha: “Kinoona wi waakhurumuwela akina henataphulela wi yeeyo akeerenlaaya ti yaphaama naari kineemererya wi kikhalihiweke moonanara. Ela pahiru enataphulela ohititelela onyeenyeya ni yaawo.” (Sal. 37:8) Vaavaa nnalakelelaahu okhurumuwela, nnathanla oheemererya wi ichu soonanara seiho sineerenle ititelele oninyeenyeiha.—Éfe. 4:31, 32.

5. Yoororomeliha taani Yesu aamvanheiye mulipa oohuhula mmoha yoowo aakhomeliwe mmakupa awe, nave ntakhara heeni owo aamvanheiye yoororomeliha yeela?

⁵ Tiheeni Yesu aalonceiye? Alipa oohuhula eeli yaakhomeliwa va mwiri mmakupa a Yesu. Voopaceryani oopiili yaala yaamunyemula Yesu. (Mat. 27:44) Nyenya voocharela mmoha a yaawo aatoroka moonelo awe. Owo aaphiyerya makuchuwelo wi Yesu ‘heenre echu yoonanara.’ (Luka 23:40, 41) Owo tho aahooniherya nroromelo wi Yesu aahaala oviihiwa mookhwani nave wi aahaala olamulela ntoko mwene. Owo aaloca wa Yesu: “Yesu, okuupuwele vaavaa oneeraawe ovolowe moomweneni mwaa.” (Luka 23:42, TNM) Ola aahooniherya nroromelo ntokweene! Yesu aamwaakhula ariki: “Eparipareene kinnooleela olelo: Onarwa okhala ni miyo [ohiya Moomwene, nyenya] Mparataiso.” (Luka 23:43) Masu a Yesu annooniherya wi Yesu mwaneene taapanke yoolaiherya yeela wa mulipa oohuhula. Asuwelaka wi Tiithi awe ta ikharari, Yesu aahiloca masu yaala yaavanhe ewehereryo wa mulipa oohuhula.—Sal. 103:8.

6. Tiheeni nnahuseryaahu orweela wa masu a Yesu wa mulipa oohuhula?

⁶ Tiheeni nnahuseryaahu orweela wa masu a Yesu? Yesu onnamutakiherya Tiithi awe moophaameya. (Ahe. 1:3) Yehova ori ooreheryeya onikhurumuwela ni onooniherya ikharari. Owo onahaala weerano yeeyo pahiru wakhala wi noocharuwa soocheka seiho naapakaahu khalai nave tho wakhala wi nookhalano nroromelo mmukucho wa woopola wa Yesu Kristu. (1 Yoh. 1:7) Wa akina onamukhala woovila ororomela wi Yehova onamukhurumuwela soocheka seiho apankaaya khalai. Wakhala wi mu ilukuluku ikina munniisoona mmukhalelo ntoko yoowo, muupuwele ela: Ahaalaka vakhaani okhwa, aahooniherya ikharari wa mulopwana oohuhula yoowo ampaceraru wooniherya nroromelo. Mweeparipari Yehova onahaala wooniherya ikharari wa alapeli awe oororomeleya yaawo aniilipixerya wiiwelela malamulo awe!—Sal. 51:1; 1 Yoh. 2:1, 2.

7. Masu taani anaphwanyeya mu Yohani 19:26, 27, yaawo Yesu aalonceiye wa Mariya ni Yohani, nave ntakhara heeni aalonceiye yeela?

⁷ Tiheeni Yesu aalonceiye? (Mwaalakhanye Yohani 19:26, 27.) Yesu aachuna wi amamaawe ekhapeleliwe woona wi yaari naamukhweli. Akhweya asinnawe a Yesu yaanwerya  omukhaviherya Mariya ni soothowa soomwiilini. Nyenya taani aahaala omukhaviherya Mariya otitelela okhala oororomeleya wa Yehova? Hiyaavo yawooniherya yawi asinnawe a Yesu yaari oohuserya. Mwawiihiiha, Yohani aari murummwa oororomeleya nave tho mmoha a asinthamwene a Yesu awaacameleya. Yaale Yesu aamurumeeleiyeno Yehova vamoha aawoona ntoko amusi awe oomunepani. (Mat. 12:46-50) Yesu aanamusivela Mariya nave aachuna ororomela wi owo aahaala okhapeleliwa. Mwawiihiiha Yesu aahimveka Yohani wi amukhapelele Mariya nthowa nawi Yesu aanasuwela wi Yohani aahaala omukhaviherya Mariya otitelela omurumeela Yehova. Yesu aaloca ni amamaawe ariki: “Mwaninyu owo vaa!” Nave tho aaloca ni Yohani ariki: “Amayi aa awo vaa!” Ovinyerya mu nihiku nenle Yohani aahikhala  ntoko mwaana a Mariya nave Yohani aanamukhapelela owo ntoko wi yaari amamaawe. Yesu aahooniherya osivela wa muthiyana asisapo yoowo aamukhapelenle ovinyerya elukuluku aayariweiye nave aari vakhiviru vawe elukuluku iiphiweiye!

8. Tiheeni nnahuseryaahu orweela wa masu a Yesu yaawo aalonceiye wa Mariya ni Yohani?

⁸ Tiheeni nnahuseryaahu orweela wa masu a Yesu? Onthamwene ahu ni anna ni arokora Eekristu onanwerya okhala woolipa opwaha onthamwene nryaahuno ni amusi ahu. Amusi ahu ananwerya oniica naari ophiyerya onnyanyala, nyenya Yesu ooniroromeliha wi wakhala wi ninnatitelela omwaacamela Yehova ni marehereryo Awe, nnahaala “waakhela . . . ikwaha nsana” opwaha seihe n’yelenlaahu. Akristu akhwiihu anamukhala ntoko mwaana, maayi naari tiithi oosivela. (Mar. 10:29, 30) Munoona hai opaka makupa a emusi yeela eri yawiiwanana ni yoosivela—yeeyo enamusivela Yehova ni enooniherya osivela wa mukina ni mukhwaawe?—Kol. 3:14; 1 Ped. 2:17.

9. Masu a Yesu anaphwanyeya mu Mateu 27:46 ananihusiha eheeni?

⁹ Tiheeni Yesu aalonceiye? Ahaalaka vakhaani okhwa, Yesu aahikhuwela ariki: “Muluku aka, Muluku aka, mukihiyeryeni miyo?” (Mat. 27:46) Piipiliya hanathariha ntakhara heeni Yesu aalonceiye yeela. Nthokororye yeeyo nnaweryaahu ohuserya mmasu yaala. Echu emoha nnahuseryaahu tiyawi moorweela wa oloca masu yaala, Yesu aakhwaniherya yooloherya enaphwanyeya mu Salumu 22:1. * Masu yaala annooniherya mookwakwaleya wi Yehova ‘haamurukurerinhe mukuso wa miiwa’ Mwanawe. (Yobi 1:10) Yesu aahiiwexexa wi Tiithi awe aaheemererya wi nroromelo nawe neereriwe ophiyerya okhwa. Haavo muchu eereriwe ompwaha Yesu. Mwawaaceererya, masu yaala onnooniherya wi Yesu haapanke echu yoonanara yaahaala omweeriha wi iiphiwe.

10. Tiheeni nnaweryaahu ohuserya orweela wa masu a Yesu yaawo aalonceiye wa Atiithi awe?

¹⁰ Tiheeni nnaweryaahu ohuserya orweela wa masu a Yesu? Echu emoha nnahuseryaahu tiyawi hannaphwanela owehererya wi Yehova anikhapelele wa makacamiho yaawo aneeha nroromelo nahu. Hiiha ntoko Yesu eehiweiye ophiyerya okhwa wawe, hiyaano tho nnaphwanela wooniherya ororomeleya wahu ophiyerya okhwa wakhala woochuneya. (Mat. 16:24, 25) Mwawiihiiha, nnaphwanela ororomela wi Muluku harwa eemererya wi neehiwe opwaha nnaweryelaahuvo. (1 Kor. 10:13) Echu ekina nnahuseryaahu tiyawi, moolikana ni Yesu, nnahaala ohooxiwa naamwi nihipanke echu yoonanara. (1 Ped. 2:19, 20) Yaale ananiica annanihooxa tho, ohiya nthowa nawi nipanke echu yoonanara, nyenya nthowa nawi hannapaka makupa a elapo nave wi ninneerela onamoona eparipari. (Yoh. 17:14; 1 Ped. 4:15, 16) Yesu aaniiwexexa ntakhara heeni Yehova eemerenryeiye wi owo ahooxeye. Moohiyana ni Yesu, alapeli oororomeleya akina anniikoha ntakhara heeni Yehova eemerenryeiye wi ichu soonanara siweereele yaawo. (Hab. 1:3) Muluku ahu a ikharari ni oopisa murima onniiwexexa wi alapeli ntoko yaawo haayelenle nroromelo; nyenya anachuna nihakararyo nnarweela wa yoowo.—2 Kor. 1:3, 4.

11. Ntakhara heeni Yesu aalonceiye masu anaphwanyeya mu Yohani 19:28?

¹¹ Tiheeni Yesu aalonceiye? (Mwaalakhanye Yohani 19:28.) Ntakhara heeni Yesu aalonceiye ariki: “Kookhala ni nthanana”? Owo aalonce yeela “wi soorempwa ikhwaaniheryiwe” —eyo tiwi, aakhwaniherye yooloherya enaphwanyeya mu Salumu 22:15, yeeyo eni: “Mmilo aka wohuuma ntoko nivali, nlumi naka nohuumelela nipatelela mwaano.” Nave tho, amanle ohooseya ophitaanyerya wiicela yoowo ooneiye vamwirini woohooxiwavo, owo aahikhalano nthanana. Owo aanachuna nikhaviheryo wi iiphe nthanana.

12. Tiheeni nnahuseryaahu orweela mmasu a Yesu awi “kookhalano nthanana”?

¹² Tiheeni nnaweryaahu ohuserya orweela wa masu a Yesu? Yesu hatonko wuupuwela wi yaari yooheseya oloca mukhalelo ooneiye nave hiyo tho nnaphwanela oloca mukhalelo nnoonaahu. Moovira wa elukuluku yincipale mweekumini, nnanwerya ohaaveka akina nikhaviheryo. Nyenya vaavaa nnachunaahu nikhaviheryo, hinnaphwanela woovelela oveka nenlo. Ntoko yootakiherya, waakhanle wi nohuuluvala naari wiiceliwa, nnawerya waaveka asinthamwene wi enihoole olooxa naari wa matotore. Wakhala wi nohuukhuwa, nnanwerya omveka mutokweene naari Mukristu mukhwiihu awiichwelavo yoowo onahaala onihakararya ni “masu aphaama.” (Masi. 12:25) Nuupuwele wi anna ni arokora ahu annanisivela, nave awo ari ooreheryeya onikhaviherya “elukuluku ya wuukhuwa.” (Masi. 17:17) Nyenya awo hanasuwela mukhalelo nnuupuwelaahu naari mukhalelo nnoonaahu. Awo tho hanasuwela wi ninnachuna nikhaviheryo nyenya nnaphwanela waaleela.

13. Moorweela wa otitelela okhala oororomeleya ophiyerya okhwa ichu taani Yesu aakhwanihenryeiye?

¹³ Tiheeni Yesu aalonceiye? Saakhwanaka iwora khumi nathanu sa othana wa 14 a Nisani, Yesu aakhuwela ariki: “Vano, sookhwaanela!” (Yoh. 19:30) Masu yaala aalonceiye ahaalaka vakhaani okhwa, annooniherya wi Yesu aanasuwela wi ohaakhwaniherya soothene Yehova aaweheryeiye wa yoowo. Moorweela wa otitelela okhala oororomeleya ophiyerya okhwa wawe, Yesu aahaakhwaniherya ichu sincipale. Echu yoopacerya, owo aahooniherya wi Satana nawoothe. Yesu aahooniherya wi muchu oophaameya onanwerya wooniherya ororomeleya woophaameya moohipwacha yeeyo Satana onahaaleiye weera. Yanaawiili, Yesu aahivaha ekumi awe ntoko yawoopola. Nthowa nawi Yesu aaveleela okumi awe eyo yoheeriha okhala wooweryeya achu oohiphaameya okhalano onthamwene ni Muluku, ni okhalano eweheryeryo ya okumi woohimala. Yaneeraru, Yesu ohooniherya wi Yehova mulamuleli awookololowa nave ooviihavo munyemu yoowo nsina na Tiithi awe naaloceliwaaya.

14. Nihiku ti nihiku nnaphwanela okhalaka mwawiihai? Mutharihe.

¹⁴ Tiheeni nnaweryaahu ohuserya orweela mmasu a Yesu? Nnaphwanela okhala oolakelela okhapelela ororomeleya wahu nihiku ti nihiku. Moone yeeyo Munna Maxwell Friend, yoowo aari muhusiha a Exikola ya Piipiliya ya o Kiliyati. Va muthukumano wa ikulucu wa ilapo soohiyanahiyana, Munna Friend aahiloca mmwaha awe vooloca sa nroromelo ariki: “Hamunaphwanela oweherya opaka naari oloca omeelo echu yeeyo mwaaphwanelaanyu weera naari oloca olelo. Apwanne munnaroromela wi munahaala okhala ophiyerya omeelo? Nihiku ti nihiku mukhaleke ntoko wi ekwaha anyu yookuchula ya wooniherya wi munnaphwanela okhalano ekumi yoohimala okhala wookhala.” Nnaphwanela okhala nihiku ti nihiku ntoko ekwaha ahu yookuchula ya wooniherya ororomeleya! Neerano hiiha, naamwi nikhwaaka, nnahaala oloca wa Yehova nriki, “Yehova koopaka soothene kinaweryaaka wi kikhapelele ororomeleya waka, wooniherya wi Satana nawoothe, oviihavo munyemu yoowo nnaloceliwaaya nsina nanyu ni okhaviherya otokweene anyu!”

15. Mwawiiwanana ni Luka 23:46, nroromelo taani Yesu oonihenryeiye?

¹⁵ Tiheeni Yesu aalonceiye? (Mwaalakhanye Luka 23:46.) Ni nroromelo nawaakhwanela Yesu aloca ariki: “Tiithi, kinnaveleela munepa aka mmatatani mwanyu!” Yesu aanasuwela wi Yehova taahaala omvaha okumi omwaahiyu nave aanaroromela wi Tiithi awe aahaala omuupuwela.

16. Tiheeni muhusenryaanyu orweela wa yaweereya ya Namoona mmoha yoowo aarino iyaakha 15?

¹⁶ Tiheeni nnaweryaahu ohuserya orweela mmasu a Yesu? Mukhale oolakelela omuroromela Yehova naamwi ekumi anyu eri va yawoopiha. Wi mweereno yeela, munaphwanela ‘waaroromela Apwiya ni murima anyu woothene.’ (Masi. 3:5) Muthokororye yootakiherya ya Joshua, Namoona mmoha yoowo aarino iyaakha 15 nave aahooxeya ni ereca yawiipha. Owo aahikhooca oloola yoowo ohiniiwanana ni malamulo a Muluku. Ehalaka elukuluku vakhaani wi akhwe, Joshua aahaaleela amama awe ariki: “Mama kinnaroromela wi Yehova onahaala okikhapelela. . . . Kinnooleelaani yeela Mama, kiroromelaka wi: Kinnasuwela wi chiryene Yehova onahaala okiviiha mookhwani. Owo onnasuwela muupuwelo ni moonelo aka nave kinnamuroromela moomalela.” * Mmoha ti mmoha a hiyo onaphwanela wiikoha, ‘Wakhala wi nroromelo naka noheereryiwa ni echu vyakala yeeyo yaahaala okeeriha wi kikhwe apwanne kinahaala otitelela okhala oororomeleya wa Yehova, ni ororomela wi owo onamukuupuwela?’

17-18. Ichu taani nihusenryaahu? (Moone tho ekaaxa “ Tiheeni Nnahuseryaahu Orweela wa Masu Ookuchula a Yesu?”)

¹⁷ Nnawerya ohuserya echu yoochuneyaxa orweela mmasu ookuchula a Yesu! Awo annanuupuxerya wi nnaphwanela waakhurumuwela akina nave nnaphwanela ororomela wi Yehova onahaala onikhurumuwela. Nookhalano ekari ya okhalano anna ni arokora a mmulokoni mwahu yaawo ari ooreheryeya onikhaviherya. Nyenya vaavaa nnachunaahu nikhaviheryo, nnaphwanela waaveka akina wi enikhaviherye. Ninnasuwela wi Yehova onahaala onikhaviherya ovilela ni nikacamiho vyakala. Nave nohoona ochuneya waya okhala nihiku ti nihiku ntoko ekari yookuchula ya wooniherya ororomeleya wahu, nave tho wi wakhala wi nookhwa Yehova onahaala oniviiha mookhwani.

¹⁸ Chiryene masu yaawo Yesu aalonceiye vaavaa aakhweiye vamwirini woohooxiwavo annanihusiha ichu sincipale! Moorweela wa opharihela yeeyo nihusenryaahu, nnahaala wiiwelela masu a Yehova vooloca sa Mwanawe yoowo aamwaaheiye ariki: “Munwiriyaneke.”—Mat. 17:5.