1, 2. ¿Tlenon ipan nochiujtoya Jesús ijkuak sa ika tlami otlajto?

MATIKONNEMILIKAN ika tinemij ipan 14 de nisán itech xiuitl 33. Sakin ika Jesús yokitlajtolchijchiuilijkej niman yokijtokej ika kimiktiskej maski xitlaj kitechiuiliaya, itlauelikniuan kipijpinaujtiaj, kitlajyouiltiaj niman kipilouaj ipan se kojtli melaktik. Pampa Jesús pilkatika, melak kikokoua ijkuak tlajtoua niman hasta ijkuak nijyotia, maski ijkon, nokojtilia tlajtos pampa noneki kijtos itlaj tlen ueyi kijtosneki.

² Matikitakan tlen Jesús okijto ijkuak pilkatoya ipan kojtli melaktik niman tlenon techmachtia tlen okijto. Uelis tikijtoskej ika tijkakiskej (Mat. 17:5).

3. ¿Akinon kinteneujtoya Jesús ijkuak okijto: “NoTajtsin, xkintlapojpolui”?

³ Tlen Jesús okijto. Sakin ika yokipilojkej ipan kojtli melaktik, Jesús okijli Jehová: “NoTajtsin, xkintlapojpolui”. ¿Akinon kinekiya makintlapopolui? Tlen sakin okijto techpaleuiya matikasikamatikan kanaj akinon kinteneujtoya. Jesús okijto: “Xkimatij tlinon kichiuaj” (Luc. 23:33, TNM; Luc. 23:34). Kanaj yejua kinteneujtoya soldados romanos akin okipilojkej ipan kojtli melaktik. Yejuamej xkimatiyaj ika Jesús iKoneuj katka toTajtsin. Kanaj noijki kinteneujtoya  akin okiteijlikej ika makimiktikan, akin sakin itech otlaneltokakej (Hech. 2:36-38, TNM). Maski okichiuilijkej tlen xkuajli, Jesús xotetlauelitak, yejua okitlajtlanili Jehová makintlapopolui itlauelikniuan (1 Ped. 2:23).

4. ¿Tlenon otechmachti Jesús ijkuak okintlapopolui itlauelikniuan?

⁴ Tlen techmachtia. Matitetlapopoluikan ijkon ken Jesús okichiuj (Col. 3:13). Miyekej, kanaj hasta tochanejkauan, techtlauelitaj pampa xkasikamatij tlen tikneltokaj niman pampa xtikchiuaj ijkon ken yejuamej. Kanaj techtlajtolchijchiuiliaj, techpijpinaujtiaj, techintsojtsomoniliaj noso techintsajtsayaniliaj toamatlajkuiloluan niman kanaj hasta techijliaj ika texchiuiliskej itlaj tlen xkuajli. San ika, maka matikintlauelitakan, matiktlajtlanilikan Jehová makinpaleui makasikamatikan tlen melauak (Mat. 5:44, 45). Kemantika, melak ouijtika tikitaj titetlapopoluiskej ijkuak texchiuiliaj itlaj tlen xkuajli. Tla xtitetlapopoluiyaj niman titetlauelitaj, san no tejuamej toijtlakoskej. Se tokniuj siuatl kijtoua: “Ijkuak nitetlapopoluiya, xkijtosneki ika nikuelita tlen nexchiuiliaj noso ika nikuelita manexchiuilikan tlen xkuajli. Kijtosneki ika xnikneki nitetlauelitstos” (Sal. 37:8). Tla titetlapopoluiyaj, techpaleuis maka san matikualantinemikan (Efes. 4:31, 32).

5. ¿Tlenon okijli Jesús se tlakatl akin inakastlan okipilojkaj, niman tleka ijkon okijli?

⁵ Tlen Jesús okijto. Iuan Jesús okinpilojkaj omemej xkuajkualtin tlakamej. Kachtopa yejuamej noijki okipijpinaujtijkej (Mat. 27:44, TNM). San ika, sakin, se xok okipijpinaujti pampa okitak ika Jesús “xitlaj tlajtlakojli kipiya” (Luc. 23:40, 41). Niman xsan yejon, yejua noijki okineltokak ika Jesús yoliuiskia niman Tekiuajtiskia. Yejua okijli: “Jesús, xnechelnamiki ijkuak peuas titlamandaros ken Rey” (Luc. 23:42). Kuajli nesi ika melak tlaneltokaya. Jesús okinankili: “Melauak nimitsijlia ipan yejuin tonajli: Nouan tinemis ipan Xochitlalpan”. Jesús xokijli on tlakatl tla yaskia iluikak (Luc. 23:43, TNM). Ijkuak okijto “nouan tinemis”, Jesús okiteititi ika san kinotstoya yejon tlakatl. Jesús kuajli kimatstoya ika iTaj teikneliani, yejua ika, ouel okijli yejon tlakatl ika iuan nemiskia ipan Xochitlalpan (Sal. 103:8).

6. ¿Tlenon techmachtia tlen Jesús okijli on xkuajli tlakatl?

⁶ Tlen techmachtia. Jesús kichiua ijkon ken iTaj (Heb. 1:3). Tla tiknekij ika Jehová matechtlapopolui niman matechikneli, noneki toyolkuepaskej itech nochi tlen xkuajli otikchiujkej niman titlaneltokaskej itech tlen Cristo okichiuj topampa (1 Juan 1:7). San ika ¿tlenon uelis tikchiuaskej tla kemantika xtikneltokaj ika Jehová yotechtlapopolui? Matitlanemilikan itech yejuin. Ijkuak imikiskia, Jesús okikneli se xkuajli tlakatl akin san kemach itech yopeujka tlaneltoka. Yejuin techititia ika Jehová kimiknelis itekipanojkauan akin yolmelajkanemij niman nokojtiliaj kitlakamatiskej (Sal. 51:1; 1 Juan 2:1, 2).

7. Ijkon ken kijtoua Juan 19:26, 27, ¿tlenon okimijlikej María niman Juan, niman tleka ijkon okimijlikej?

⁷ Tlen Jesús okijto (xpoua Juan 19:26, 27). Jesús kinekiya ika kuajli manemi  inan, akin kanaj yokaualtika. Jesús kuajli kimatstoya ika, ijkuak mikiskia, ikniuan kimakaskiaj inan tlen kipoloskia. San ika, yejuamej xinochiuayaj inomachtijkauan. Kuakon, ¿akinon kichikauiliskia itlaneltokil inan? Apóstol Juan melak kuajli nouikaya iuan Jesús niman itech yolmelajkanemiya. Jesús kimitaya ken ichanejkauan nochimej akin kitekichiuiliayaj Jehová (Mat. 12:46-50). Jesús melak kitlasojtlaya inan, niman kinekiya kuajli manemi. Yejua ika, okijli Juan makitlajpiya inan niman makipaleui más makitekichiuili Jehová. Jesús okijli María: “Ompa on nemi mokoneu”, niman  sakin okijli Juan: “Ompa on nemi monanaj”. Ijkuakon, María okitak Juan kentla ikoneuj niman Juan kuajli okitlajpix María kentla inan. Jesús melak okitlasojtlak inan akin desde ijkuak otlakatiko niman ijkuak omik, iuan onen niman okitlasojtlak.

8. ¿Tlenon techmachtia tlen okimijlikej María niman Juan?

⁸ Tlen techmachtia. Kemantika más kuajli touikaj imiuan tokniuan akin nemij ipan tlanechikojli xijkon ken imiuan tochanejkauan. Hasta sekimej tochanejkauan techtlauelitaj niman xok technotsaj. San ika, ijkon ken Jesús okijto, tla tejuamej tiknisiuiyaj Jehová niman ikalpan, tikseliskej “se ciento más” itech nochi tlen tikpoloskej. Miyekej tikimitaskej ken tokoneuan, tochpochuan, tonanuan noso totajuan (Mar. 10:29, 30). ¿Xmelak ika tiyolpakij pampa tikinpiyaj miyekej tokniuan akin tlaneltokaj itech Jehová niman kitlasojtlaj? (Col. 3:14; 1 Ped. 2:17).

9. ¿Tlenon techmachtia tlen Jesús okijto ipan Mateo 27:46?

⁹ Tlen Jesús okijto. Ijkuak sa achijtsin poliuiya para mikis, Jesús otsajtsik niman okijto: “NoDios, noDios, ¿tline tinechtlalkauiya?” (Mat. 27:46). Biblia xtechijlia tleka Jesús ijkon okijto. San ika, matikonnemilikan tlenon techmachtia. Ijkuak Jesús okijto yejuin, onochiuj teotlajtojli tlen uajlauj ipan Salmo 22:1. * Noijki techititia ika Jehová xokitlajpix Jesús ijkuak okitlajyouiltijkej niman okimiktijkej (Job 1:10). Jesús okasikamat ika iTaj xokipaleui pampa nonekiya san iselti kiteititis ika uelis yolmelajkanemis. Xakaj kitlatlataj ijkon ken yejua okitlatlatakej. Noijki, ika tlen okijto, okiteititi ika yejua xokichiuj itlaj tlen xkuajli.

10. ¿Tlenon techmachtia tlen Jesús okijli iTaj?

¹⁰ Tlen techmachtia. Noneki tikasikamatiskej ika Jehová xtechtlajpiyas itech nochi tlen tikixnamikiskej. Ijkon ken Jesús, tejuamej noijki noneki tokojtiliskej tiyolmelajkanemiskej maski kanaj techmiktiskej (Mat. 16:24, 25). San ika, tikmatstokej ika toTajtsin xkitekauilis matechtlajyouiltikan hasta kampa xok tikxikoskej (1 Cor. 10:13). Noijki, tlen Jesús okijto techmachtia ika kanaj kemantika texchiuiliskej itlaj tlen xkuajli, ijkon ken yejua okichiuilijkej (1 Ped. 2:19, 20). Miyekej xtechtlauelitaj pampa kanaj otikchiujkej itlaj tlen xkuajli, yejuamej techtlauelitaj pampa xtikchiuaj ijkon ken yejuamej niman pampa tikteijliaj tlen melauak temachtia Biblia (Juan 17:14; 1 Ped. 4:15, 16). Jesús kuajli kasikamatiya tleka Jehová kikauilijtoya matlajyoui. San ika, sekimej itekipanojkauan toTajtsin, ijkuak kixnamikiyaj itlaj tlen ouijtika, notlajtoltiayaj tleka Jehová kitekauilijtoya inpan manochiua tlen xkuajli (Hab. 1:3). Pampa Jehová melak teiknelia niman teijyouiya, kuajli kasikamati ika itekipanojkauan kema itech tlaneltokaj, san ika, kinekij yejua makinyolseui (2 Cor. 1:3, 4).

11. ¿Tleka Jesús okijto tlen onka ipan Juan 19:28?

¹¹ Tlen Jesús okijto (xpoua Juan 19:28). ¿Tleka Jesús okijto ika amikiya? Pampa nonekiya nochiuas teotlajtojli tlen onka ipan Salmo 22:15, kampa kijtoua: “Sanoyej  yonikamauak hasta xok ueli nitlajtoua; nonenepil hasta yopepechiuito nokopak”. Noijki, amikiya pampa youejkaujka ika melak tlajyouijtoya ipan kojtli melaktik niman nonekiya yakaj makatliti.

12. ¿Tlenon techmachtia ijkuak Jesús okijto ika amikiya?

¹² Tlen techmachtia. Jesús xkinemiliaya ika yejua xkojtik san pampa kiteijliaya kenon nomachiliaya, tejuamej noijki noneki ijkon titlanemiliskej. Kanaj xmás kuajli tomachiliaj ijkuak tikimijliaj oksekimej tlenon techpoloua. San ika, tla kemantika tiknekij matechpaleuikan, matikimijlikan tokniuan. Tla itiuejueyimej noso tikualoj, matikijlikan se toamigo matechuika kampa tontlakouaskej noso kampa tontopajtiskej. Tla toyolkokouaj, uelis tikijliskej se tlayekanketl noso se tokniuj akin chikauak kipiya itlaneltokil matechyolchikaua (Prov. 12:25). Matikilnamikikan ika tokniuan techtlasojtlaj niman kinekij techpaleuiskej “ijkuak onkaj ajmantli” (Prov. 17:17). San ika, yejuamej xkimatij tlen tiknemilijtokej niman tlen tikmachilijtokej. Kuakon, san uelis techpaleuiskej tla tikintlajtlaniliaj.

13. ¿Tlenon opanok pampa Jesús oyolmelajkanen hasta ijkuak omik?

¹³ Tlen Jesús okijto. Ipan tonajli 14 de nisán kanaj las 3 ika teotlak, Jesús okijto: “Nochi kuajli yonocumpliroj” (Juan 19:30). Ijkuak imikiskia, Jesús kuajli okimat ika yokichiujka nochi tlen Jehová okitlajtlanilijka. ¿Tlenon opanok pampa Jesús oyolmelajkanen hasta ijkuak omik? Kachtopa, okiteititi ika Satanás se tlakajkayaujketl. Ijkon tikijtouaj pampa okiteititi ika se akin xtlajtlakole uelis yolmelajkanemis maski Satanás makitlatlata. Ika ome, yejua okitemakak inemilis niman ijkon otechmakixti. Ipampa tlen okichiuj, maski titlajtlakolejkej ueli touikaj iuan Jehová niman uelis nochipa tinemiskej. Ika yeyi, Jesús okiteititi ika san Jehová kinamiki matlayekana niman okiteititi ika tlen Satanás okijtouili Jehová xmelauak.

14. Xkijto tlenon noneki tikchiuaskej mojmostla.

¹⁴ Tlen techmachtia. Noneki mojmostla tiyolmelajkanemiskej. Matikitakan tlenon okijto tokniuj Maxwell Friend, akin temachtiaya ipan iTlamachtil Galaad. Ipan se ueyi tlanechikojli, tokniuj otlajto itech kenon noneki tiyolmelajkanemiskej, yejua okijto: “Maka xkaua para mostla tlen uelis tikchiuas noso tikijtos aman. ¿Kenon tikmati ika mostla tiuajtlanextilis? Mojmostla xteititi ika mitsnamiki tikselis se nemilistli tlen xkeman tlamis. Ijkon xchiua kentla tla mostla xok tinemiskia”. Ijkon ken okijto tokniuj, mojmostla matikteititijtiakan ika timelajkanemij, kentla tla mostla xok tinemiskiaj. Ijkon, tla timikij, uelis tikijliskej Jehová: “Melak yoninokojtili motech nimelajkanemis. Yonikteititi ika Satanás se tlakajkayaujketl niman yonikteititi ika san tejua mitsnamiki titlayekanas”.

15. Ken kijtoua Lucas 23:46, ¿tlenon kuajli kimatstoya Jesús?

¹⁵ Tlen Jesús okijto (xpoua Lucas 23:46). Pampa Jesús melak tlaneltokaya itech Jehová, yejua okijli: “NoTajtsin, ipan momatsin nimitsmaktilia nonemilis”. Kimatstoya ika san iTaj ueliskia kipaleuis niman ika san yejua nochipa kilnamikiskia.

16. ¿Tlenon techmachtia tlen ipan onochiuj Joshua?

 ¹⁶ Tlen techmachtia. Matikmaktilikan Jehová tonemilis. Tla ijkon tiknekij tikchiuaskej, noneki itech titlaneltokaskej ika nochi toyojlo (Prov. 3:5). Matitlanemilikan itech Joshua, akin kipiaya 15 xiuitl. Yejua melak kualouaya niman xueliskia pajtis. Joshua xokinek makitlalilikan yestli, pampa kimatiya ika toTajtsin xkuelita. Ijkuak imikiskia, okijli inan: “Nonemilis yonikmaktili Jehová”. Niman noijki okijli: “Nonan, kuajli nikmatstika ika Jehová nechyolitis. Yejua yokitak noyojlo niman kimatstika ika melak niktlasojtla”. * Tinochimej noneki totlajtoltiskej: “Tla nikixnamiktika tlen ouijtika noso nikmatstika ika uelis nimikis, ¿niyolmelajkanemis itech Jehová niman nikneltokas ika yejua nechilnamikis niman nechyolitis?”.

17, 18. ¿Tlenon techmachtia tlen Jesús okijto? (Xkita recuadro “ ¿Tlenon techmachtia tlen sa ika tlami okijto Jesús?”).

¹⁷ Tlen sa ika tlami okijto Jesús techmachtia miyek tlen ueyi kijtosneki. Techilnamiktia ika noneki titetlapopoluiskej niman ika noneki tikneltokaskej ika Jehová techtlapopoluis. Noijki, tlen Jesús okijto techititia ika tikinpiyaj miyekej tokniuan akin kinektokej techpaleuiskej. San ika, tla tiknekij matechpaleuikan, noneki tikimijliskej. Tikmatstokej ika Jehová techpaleuis ijkuak tikixnamikiskej itlaj tlen ouijtika. Tikasikamatij ika noneki mojmostla timelajkanemiskej itech Jehová. Niman kuajli tikmatstokej, ika tla timikij, Jehová techyolitis.

¹⁸ Tla tikchiuaj tlen yotomachtijkej, tikchiujtoskej tlen Jehová otechijli ipan Mateo 17:5: “In yejua notlajsojkaKoneu [...,] xtenkakikan”.