1-2. Hadia manö zalua fatua lö ifaʼema Yesu wehedenia safuria?

ME LUO daʼö, 14 Nisana 33 M. Lafobahulu Yesu wa no ifalua gamuata si lö sökhi. Me no lafaduhuʼö ira sangetuʼö huku wa fasala Yesu, laʼoʼaya ia ba abölö-bölö wamakaora yaʼia. Aefa daʼö, laʼosö dangania awö gahenia ba döla geu famakao. Lua-luania, irasoi Yesu waʼafökhö ero na ifahasu hegöi na fahuhuo ia. Hizaʼi, moguna fahuhuo ia börö me so zi tohude sinangea ifaʼema.

² Iadaʼa, datatutunö wehede nifaʼema Yesu me arakhagö mate ia ba döla geu famakao. Tatutunö göi dania hadia wamahaʼö si tola tahalö moroi ba wehede Yesu andrö. Eluahania, ’datafondrondrongo niwaʼönia’.​—Mat. 17:5.

3. Haʼökhö manandrösa wehede Yesu me imane, ”He Ama, efaʼö khöra horöra”?

³ Hadia niwaʼö Yesu? Me so ia ba döla geu famakao, mangandrö Yesu, ”He Ama, efaʼö khöra horöra.” Haniha zinangea muʼefaʼö horö? Tola tasöndra wanema linia moroi ba wehede Yesu aefa daʼö, ”Lö laʼila hadia nifaluara.” (Luk. 23:33, 34) Börö daʼö, te manandrösa wehede Yesu andre khö ndra saradadu Romawi solosö tanga awö gahenia. Lö laʼila wa Ono Lowalangi Yesu andrö. Tola manö göi manandrösa wehede Yesu andre ba niha sotuhini angetula enaʼö lahuku mate ia, hizaʼi mamati ira khönia ba gafuriata. (Hal. 2:36-38) Hewaʼae na lafalua khönia zi lö atulö, lö mofönu mazui fahöʼö Yesu khöra. (1 Fe. 2:23) Hizaʼi, iʼandrö khö Yehowa ba wangefaʼö horö niha samunu yaʼia.

4. Hadia wamahaʼö si tola tahalö moroi ba waʼaoha gölö niforomaʼö Yesu ba wangefaʼö sala niha sanaisi yaʼia?

 ⁴ Hadia wamahaʼö si tola tahalö moroi ba wehede Yesu? Simane Yesu, moguna aoha gölöda wangefaʼö sala niha böʼö. (Kol. 3:13) Te so zanaisi yaʼita, tefarahu ba daʼö nösi nomoda, börö me lö aboto ba dödöra zi no tafaduhusi tödö hegöi lala waʼaurida. Tola manö laböbögö khöda zi lö duhu, laʼailasi ita föna niha böʼö, lafakiko publikasida, mazui lafetaʼu wa hasambalö lafakao ita. Hewaʼae simanö, lö fahöʼö ita khöra. Taʼandrö wanolo khö Yehowa enaʼö latemaʼö zindruhu. (Mat. 5:44, 45) Itaria abua khöda wangefaʼö sala niha böʼö, mendrua manö na alösökhi sibai ira khöda. Hizaʼi, na lö aetu mofönu ita ba lö taʼefaʼö zalara, yaʼita samösa zorasoi faʼafökhö. Imane samösa talifusöda ira alawe, ”Na uʼefaʼö zala niha böʼö, tenga daʼö geluahania wa fao dödögu ba zala si no lafalua mazui utehegö lafalua khögu zi lö sökhi. Hizaʼi, daʼö zangoromaʼö wa lö saʼae mofönu ndraʼo khöra.” (Si. 37:8) Na taʼefaʼö zala niha böʼö, no tahalö gangetula wa lö fahöʼö ita khöra hewaʼae na no lafalua khöda zi lö atulö.​—Ef. 4:31, 32.

5. Hadia nifabuʼu Yesu ba niha si lö sökhi si so ba zingania, ba hana wa ifabuʼu daʼö?

⁵ Hadia niwaʼö Yesu? So darua niha si lö sökhi nihuku ba döla geu famakao ba gambölö hegöi ba gabera Yesu. Ba wamobörö, laʼoʼaya göi Yesu. (Mat. 27:44) Hizaʼi ba gafuriata, so samösa ba gotaluara zi lö saʼae mangoʼaya yaʼia börö me aboto ba dödönia wa ”lö hadöi sala” nifalua Yesu. (Luk. 23:40, 41) Faduhu göi dödönia wa hasambalö tesusugi Yesu ba mamatörö ia tobali razo. Imane khö Yesu, ”Törö tödöu ndraʼo na möiʼö ba Wamatöröu.” (Luk. 23:42) Ebua sibai wamati niforomaʼö niha si lö sökhi andrö! Itema linia Yesu, ”Sindruhu niwaʼögu khöu maʼökhö andre, awögu ndraʼugö ba Waradaiso.” (Luk. 23:43) * Fehede Yesu andrö zangoromaʼö wa yaʼia samösa zi fawuʼu li ba niha si lö sökhi andrö. Tola ifabuʼu daʼö Yesu börö me aboto ba dödönia wa no sebua faʼahakhö dödö Namania andrö.​—Si. 103:8.

6. Hadia wamahaʼö si tola tahalö moroi ba wehede Yesu ba niha si lö sökhi si so ba zingania?

⁶ Hadia wamahaʼö si tola tahalö moroi ba wehede Yesu? Fagölö sibai gamuata Yesu khö Namania. (Heb. 1:3) Omasi Yehowa wangefaʼö salada ba iforomaʼö khöda waʼahakhö dödö. Hizaʼi, awena omasi ia ifalua daʼö na sindruhu-ndruhu maniasa ita ba zala si no tafalua ba mamati ita ba höli nibeʼe Yesu. (1 Yo. 1:7) Te so zi lö faduhu tödö wa no iʼefaʼö Yehowa zala si no irai lafalua ba zilalö. Na no irai örasoi daʼö, angeragö daʼa: Omasi Yesu wangoromaʼö faʼahakhö dödö ba niha si lö sökhi sawena mamati. Börö daʼö, tatu abölö ebua waʼahakhö dödö niforomaʼö Yehowa ba nono mbanuania si lö faröi, samorege ba woloʼö oroisania!​—Si. 51:1; 1 Yo. 2:1, 2.

7. Moloʼö Yohane 19:26, 27, hadia niwaʼö Yesu khö Maria hegöi Yohane, ba hadia mbörö wa iwaʼö daʼö?

⁷ Hadia niwaʼö Yesu? (Baso Yohane 19:26, 27.) Iʼameʼegö tödö sibai Yesu zoguna khö mamania Maria, si no tobali lakha mbanua me luo daʼö. Sindruhu sa,  tola labönökhi ira akhinia zoguna khö mamania sero maʼökhö. Hizaʼi, hewisa zoguna khönia ba wamati? Me luo daʼö, te lö si tobali nifahaʼönia ndra akhinia. Börö daʼö, ifaduhusi tödö Yohane, samösa sinenge hegöi si fahuwu khönia, ba wondrorogö mamania. Ba wamaigi Yesu, no ösi nomonia fefu zamosumange Yehowa. (Mat. 12:46-50) Faduhu dödönia wa hasambalö ibönökhi Yohane zoguna ba wamati khö mamania. Börö daʼö, imane khö mamania, ”Daʼö nonomö saʼae!” Ba imane khö Yohane, ”Daʼö mamamö saʼae!” Iʼotarai daʼö, hulö nono Maria Yohane, ba irorogö ia Yohane simane fondrorogönia ninania samösa. Ba daʼö oroma wa iʼomasiʼö sibai mamania  Yesu, si no mondrorogö yaʼia iʼotarai me ono sawuyu ba sozizio ba zingania me arakhagö mate ia!

8. Hadia wamahaʼö si tola tahalö moroi ba wehede Yesu khö Maria hegöi Yohane?

⁸ Hadia wamahaʼö si tola tahalö moroi ba wehede Yesu? Abölö aro gamakhaitada khö ndra talifusöda ba wamati moroi ba gamakhaitada ba nösi nomoda. Te lasaisi ita ösi nomoda mazui laröi ita. Hizaʼi, na lö tebulö ahatö ita khö Yehowa hegöi organisasinia, no ifabuʼu khöda Yesu wa hasambalö ’tasöndra 100 winaeta’ moroi ba zi no tatehegö. Ato ndra talifusöda si tola tobali amada, inada, hegöi iraonoda. (Mrk. 10:29, 30) Tola teʼosambuaʼö fefu ita tobali sambua ösi nomo börö me mamati ita khö Yehowa, taʼomasiʼö ia, ba faoma taʼomasiʼö nawöda. Hewisa dödöu me no farahu ndraʼugö ba nösi nomo ba wamati andre?​—Kol. 3:14; 1 Fe. 2:17.

9. Hadia zi tola oroma moroi ba wehede Yesu nisura ba Mataiʼo 27:46?

⁹ Hadia niwaʼö Yesu? Fatua lö mate ia, muʼao Yesu imane, ”He Lowalangigu, he Lowalangigu, hana wa öröi ndraʼo?” (Mat. 27:46) Lö nifatunö Zura Niʼamoniʼö hadia mbörö wa iwaʼö daʼö Yesu. Hizaʼi, hadia zi tola oroma moroi ba wehedenia andrö? Me iwaʼö daʼö Yesu, alua wamaʼeleʼö si so ba Zinunö 22:1. * Baero daʼö, fehede Yesu andrö göi zangoromaʼö wa lö ’ifobaʼa-baʼa’ Nononia Yehowa ba wolumöʼö yaʼia. (Yob. 1:10, nisura ba gahe zura) Aboto ba dödö Yesu wa no ilulu ia Amania ba danga zi faʼudu khönia enaʼö tola tetandraigö wamatinia irugi waʼamate. Lö hadöi niha si no irai tetandraigö simane daʼö. Fehede Yesu andrö göi zangoromaʼö wa tenga sinangea lahuku mate ia menaʼö, börö me lö irai ifalua zi lö sökhi.

10. Hadia wamahaʼö si tola tahalö moroi ba wehede Yesu khö Namania?

¹⁰ Hadia wamahaʼö si tola tahalö moroi ba wehede Yesu? Tola tafahaʼö ita wa lö ilumöʼö ita Yehowa moroi ba gabula dödö sanandraigö famatida. Me föna, lö faröi Yesu irugi waʼamate hewaʼae na tetandraigö wamatinia. Iadaʼa, moguna göi tafaʼanö ita enaʼö lö faröi irugi waʼamate. (Mat. 16:24, 25) Hizaʼi, tola faduhu dödöda wa lö ilulu ita Yehowa ba wanandraigö si tebai tataha. (1 Ko. 10:13) Tafahaʼö göi ita wa tola manö tefakao ita simane Yesu hewaʼae na lö nifaluada zala. (1 Fe. 2:19, 20) Lasaisi ita tenga börö me no tafalua zi lö sökhi, hizaʼi börö me tenga tana khö niha gulidanö ita ba taturiaigö zindruhu. (Yoh. 17:14; 1 Fe. 4:15, 16) Aboto ba dödö Yesu hadia mbörö wa itehegö Yehowa na tefakao ia. Hizaʼi, te so ösa nono mbanua Yehowa sanofu-nofu hadia mbörö wa itehegö Yehowa na alua khöra zi lö sökhi. (Hab. 1:3) Aboto ba dödö Lowalangida sebolo tödö ba sahakhö tödö wa manofu ira simane daʼö tenga börö me ambö wamatira. Moguna khöra wondrara dödö, ba ha Yehowa zi tola mondrara tödöra.​—2 Ko. 1:3, 4.

11. Hana wa iwaʼö Yesu wehede nisura ba Yohane 19:28?

¹¹ Hadia niwaʼö Yesu? (Baso Yohane 19:28.) Hadia mbörö wa iwaʼö Yesu, ”Owökhi dödögu”? Iwaʼö daʼö enaʼö ”itörö niwaʼö ba zura”, yaʼia daʼö famaʼeleʼö si no tesura ba Zinunö 22:15. Imane ayati daʼö,  ”Otufo waʼabölögu simane akhökhöla mbowoa tanö; fakitö lelagu ba gararogu.” Baero daʼö, börö me no lafakao ia ba zi maʼökhö daʼö ba itaögö göi waʼafökhö ba döla geu famakao, tatu owökhi sibai dödönia. Moguna khönia wanolo enaʼö taya waʼowökhi dödönia.

12. Hadia wamahaʼö si tola tahalö moroi ba wehede Yesu me imane, ”Owökhi dödögu”?

¹² Hadia wamahaʼö si tola tahalö moroi ba wehede Yesu? Lö aombö dödö Yesu ba wangandrö tolo ba niha böʼö. Lö iwaʼö tödönia wa hulö zi lö faʼabölö ia na ifalua daʼö. Simane daʼö göi ita. Te lö toʼölö ita wangandrö tolo ba niha böʼö. Hizaʼi, na moguna atö khöda wanolo, böi aombö dödöda wangandrö tolo. Duma-dumania, na no alawa ndröfida mazui no göna ita fökhö, tola mangandrö tolo ita ba niha böʼö enaʼö ifasao ita weʼamöi ba fasa mazui ba weʼamöi khö doto. Mazui, na tarasoi waʼide-ide dödö, te tola taʼandrö tolo khö zatua sokubaloi mazui khö dalifusöda si no aro ba wamati enaʼö lafondrondrongo nösi dödöda mazui larara dödöda faoma ”fehede si sökhi”. (Amd. 12:25) Böi taʼolifugö wa laʼomasiʼö ita ira talifusöda ba omasi ira latolo ita ba ”ginötö waʼatosasa”. (Amd. 17:17) Hizaʼi, tebai latahö hadia niʼera-erada mazui nirasoida. Na lö taʼombakhaʼö khöra, tola manö lö laʼila wa moguna khöda wanolo.

13. Börö me lö faröi Yesu irugi waʼamate, hadia manö zi no ifalua irege awai?

¹³ Hadia niwaʼö Yesu? Te mato bözi tölu tanö owi me 14 Nisana, muʼao Yesu imane, ”No awai!” (Yoh. 19:30) Fehedenia andrö zangoromaʼö wa fatua lö mate ia, iʼila wa no iʼasiwai fefu zomasi Yehowa. Börö me lö faröi Yesu irugi waʼamate, so ösa zi no ifalua irege awai. Si oföna, no iforomaʼö wa falimo Zatana. Gofu hadia nifalua Zatana khönia, no iforomaʼö Yesu wa so niha soʼahonoa si lö faröi. Si dua, me ibeʼe nosonia tobali höli, no ibeʼe ginötö ba niha so soʼahonoa enaʼö tola fahuwu ira khö Lowalangi ba lasöndra waʼauri si lö aetu ba zi so miföna. Si tölu, iʼamoniʼö döi si sökhi niʼokhögö Namania ba iforomaʼö wa Yehowa andrö Samatörö fondrege zi sökhi.

14. Hadia zinangea tafalua ero maʼökhö? Tutunö.

¹⁴ Hadia wamahaʼö si tola tahalö moroi ba wehede Yesu? Ero maʼökhö, moguna taforege ba wangoromaʼö faʼalöfaröi. Nehegö atö hadia niwaʼö dalifusöda Maxwell Friend, si no irai tobali instruktur Sekolah Alkitab Gilead Menara Pengawal. Ba zi sambua angowuloa sebua internasional, ifaʼema huhuo talifusöda Friend sanandrösa ba waʼalöfaröi. Imane ba huhuonia andrö, ”Böi baloi irugi mahemolu na so zinangea öfalua mazui öwaʼö ba zi maʼökhö andre. Hadia faduhu dödöu wa auri nasa ndraʼugö irugi mahemolu? Ero maʼökhö, waʼö tödöu wa daʼö ginötö safuria khöu ba wangoromaʼö wa sinangea ösöndra waʼauri si lö aetu.” Datawaʼö tödöda ero maʼökhö wa daʼö ginötö safuria khöda ba wangoromaʼö faʼalöfaröi! Na tafalua daʼö, hewaʼae na mate ita, tola tamane wangumaʼö, ”He Yehowa, no uforege ba wangoromaʼö faʼalöfaröi, no uforomaʼö wa falimo Zatana, no uʼamoniʼö döi si sökhi niʼokhögömö, ba no uforomaʼö wa yaʼugö Zamatörö fondrege zi sökhi!”

15. Moloʼö Luka 23:46, hadia zi faduhu dödö Yesu?

¹⁵ Hadia niwaʼö Yesu? (Baso Luka 23:46.) Imane Yesu si fao faʼafaduhu  dödö, ”He Ama, ba dangau utouʼö nosogu.” Aboto ba dödö Yesu wa Yehowa zotatugöi hewisa waʼaurinia ba zi so miföna, ba faduhu dödönia wa lö iʼolifugö ia Amania.

16. Hadia wamahaʼö si tola öhalö moroi ba zalua khö dalifusöda Joshua?

¹⁶ Hadia wamahaʼö si tola tahalö moroi ba wehede Yesu? Böi faröi khö Yehowa hewaʼae na teʼala nosou. Börö daʼö, ”döna-döna khö Yehowa moroi siʼaikö ba dödöu”. (Amd. 3:5) Nehegö atö zalua khö Joshua, samösa Samaduhuʼö Yehowa si 15 fakhe, si göna fökhö sabölö-bölö. Lö omasi ia itemaʼö lala wamadöhö fökhö si lö tefaudu ba goroisa Lowalangi. Lö ara fatua lö mate ia, imane khö mamania, ”He Ma, hasambalö irorogö ndraʼo Yehowa. . . . Faduhu dödögu wa isusugi dania ndraʼo Yehowa. Iʼila nösi dödögu ba sindruhu-ndruhu uʼomasiʼö ia.” Fefu ita, moguna taʼangeragö wanofu daʼa: ’Na göna ndraʼo fanandraigö si tola mamaʼala faʼaurigu, hadia tola uforomaʼö waʼalöfaröi khö Yehowa ba faduhu dödögu wa lö iʼolifugö ndraʼo?’

17-18. Hadia manö wamahaʼö si no tatutunö? (Faigi göi kotak ” Famahaʼö Nihalöda moroi ba Wehede Yesu Safuria”.)

¹⁷ No tatutunö hadia manö wamahaʼö si tohude si tola tahalö moroi ba wehede Yesu safuria. Tefasugi ba dödöda wa moguna taʼefaʼö zala niha böʼö ba faduhu dödöda wa omasi iʼefaʼö zalada Yehowa. Tafahaʼö göi ita wa so ndra talifusöda somasi manolo yaʼita ba tola taʼombakhaʼö khöra wa moguna khöda wanolo. Baero daʼö, no tafahaʼö ita wa hasambalö itolo ita Yehowa enaʼö anau gölöda gofu hadia gabula dödö salua khöda. No göi tafahaʼö ita wa moguna tawaʼö tödöda ero maʼökhö wa daʼö ginötö safuria khöda ba wangoromaʼö faʼalöfaröida. Hewaʼae na mate ita, faduhu dödöda wa hasambalö isusugi dania ita Yehowa.

¹⁸ Oya sibai wamahaʼö si tola tahalö moroi ba wehede nifaʼema Yesu me arakhagö mate ia ba döla geu famakao! Na tafalua zi no tafahaʼö yaʼita, eluahania no taʼoʼö goroisa Yehowa enaʼö ’tafondrondrongo niwaʼö’ Nononia.​—Mat. 17:5.