1-2. Hlatolla seyemo sa Jeso nakwela a bolabola mantsu yage ya mafelelo.

LE SEGELE la di-14 tsa Nisani ka 33 C.E. Mo ba fetsa go bolabolela Jeso matsaka ba boya ba re ke sekgohlane, baa mo kweranya, ba mo teya go baba ba boya ba mo kokotela phateng ya mohlupego. Ba mo thula matsogo le mawoto ka dipikiri. O kwa go sasamela go gongwana ga go sa hlayisege ka go fo wona ga ggoši le go fo hlaya lentsu ka lloši. Mara o tshwanele a bolabole—tso a tshwaneleng a di hlaye ke ditaba tse dikgolo.

² Tla re bolaboleneng ka mantsu ya ma hlayyeng ke Jeso nakwela a le thina le go kgwa hala phateng ya mohlupego le tso re ka di tšhutang ga wona. Ka mantsu ya mangwana, tla re “mo theetseleneng.”—Mat. 17:5.

3. Di šupetsa nkare Jeso ne a ra bomang mo a re: “Papa, ba tshwarele”?

³ Jeso o yitseri king? Nakwela Jeso ba mo kokotela phateng, o rapele a re: “Papa, ba tshwarele.” O re a tshwarele bomang? Taba yowa yi yela mo a hlaya mantsu yawa: “A ba tšibi so ba se makang.” (Luk. 23:33, 34) Di šupa nkare Jeso ke mo a ra masole ya Roma ya gore ma kokotele dipikiri ho mawotong le matsogong yage. Ke mo ma sa mo tšibi gabutši. Fote di ka makega gore ke mo a naganne ka ba bangwana ba gore ne ba le hala mogobeng ba gore ne ba nyaka a bolayiwe mara ka nthago ba thomisa go dumela gage. (Meber. 2:36-38) Ba mo makiye lešidi ga Jeso, mara aa ba tubela kela go ba tshwara ka pelo. (1 Pet. 2:23) Mara o yye a kgopela Jehova gore a tshwarele bo ba mmolayyeng.

4. Tsa gore Jeso ke mo a tikemisele go tshwarela bo ba mo phigisang di re tšhutisa ying?

 ⁴ Re ka tšhuta ying ga mantsu ya Jeso? Di nyaka re tseyele ga Jeso, re tikemisele go tshwarela ba bangwana. (Makol. 3:13) Mašaga ya rune le ba bangwana ba ka re phigisa ka taba la gore a ba kwisisi tso re di dumelang le maphelelo ya rune. Ba ka re hlayela matsaka, ba re poyilanya mahlong ga batho, ba tlerolanya dipuku tsa rune kela ba ro re tshepisa le go re teya. Re ka kgopela Jehova gore a gelepe bo ba gore baa re hlupegisa gore ba sokologe mara re sa ba tshware ka pelo. (Mat. 5:44, 45) Ka dinako tse dingwana, di ka thathafa go tshwarela ba bangwana, ka matlamatla mo ba re makiye lešidi. Mara mo re ka dulela go ba tshwara ka pelo kela go fo kokomosa dikana, go kwalela rune. Mogageru ye mongwana wa mosadi o yye a re: “Ke di bonne gore go tshwarela ba bangwana a di rele gore tso ba di makiyeng di gabutši kela ke ba lesetsa ba kgana ka nna. Di fo rela gore ke kgeta go lebala ka taba yone.” (Pis. 37:8) Mo re tshwarela ba bangwana, re kgeta go phohla ga dilo tso di yyeng dya re kwisa go baba.—Maef. 4:31, 32.

5. Jeso o yye a se tshepisa ying sekgohlane sela ne ba se kokotele thina naye, fote ke ntaba a se tshepisiye taba yone?

⁵ Jeso o yitseri king? Ka ho mathoko ga Jeso ke mo ba kokotele dikgohlane ka dipedi. Le tsona di thomisiye di mo kweranya. (Mat. 27:44) Mara ka nthagonyana, se sengwana sa fahlologa. Se yye sa di bona tsa gore Jeso aa “sinya selo.” (Luk. 23:40, 41) Go tokegela gana hone, se šupetsiye gore se ya di tshepa tsa gore Jeso o nyoko tsoga le gore tšatš’enngwana o nyoko lawola go le kgoši. Mo Jeso a šele a nyoko kgwa, sekgohlane sowa se yitseri gage: “Jeso, o sa nlebale mo o kena Mmušong wago.” (Luk. 23:42) Wa tšiba morene ke mo a na le tumelo! Mo Jeso a mo fetola o yitseri: “Ka nnete ke go botsa lekgono lowa ke re, [o ka sa be le nna Mmušong mara] o nyoko ba le nna Pharadeyising.” (Luk. 23:43) Mo Jeso a šinya a re “nna” le “wene” ke mo di šupetsa gore taba yo a mo tshepisang ke ya bona ba le ka babedi. Jeso ke mo a di tšiba tsa gore Papage o kwelana go baba, o makiye ke tsotsone mo a kgomoletsa sekgohlane sowa nakwela se le thina le go kgwa.—Pis. 103:8.

6. Re tšhuta ying ga tso Jeso a yyeng a di botsa sekgohlane sela?

⁶ Re ka tšhuta ying ga mantsu ya Jeso? Jeso o tshwana gabutši le Papage. (Maheb. 1:3) Jehova o tikemisele go re tshwarela le go re kwela go baba mo re ka tisola tsa mannete ga dilo tsa go befa tso re di makiyeng ku botala le mo re šupetsa gore re na le tumelo ga sehlabelo sa Jeso Kreste. (1 Joh. 1:7) Di ya thathafa ga ba bangwana go di tshepa tsa gore Jehova a ka tsoga a ba tshwarele ga tso ba di sinnyeng ku botala. Mo nkare le wene o fela o tikwa ka mokgonone, nagana ka taba yowa: Mo Jeso a soko kgwa, o yye a šupetsa gore o se kwela go baba sekgohlane sela sa gore ke mo se ro thoma go šupetsa gore se na le tumelo. Jehova a ka sa šitegi go ba kwela go baba bo ba gore baa tshepega mo ba kene ba mo rapela, ba gore baa karakara gore ba theetsele melawo yage!—Pis. 51:1; 1 Joh. 2:1, 2.

7. Johane 19:26, 27 yi re Jeso o yitseri king ga Mariya le Johane fote ke ntaba a hlayye tsotsone?

⁷ Jeso o yitseri king? (Bala Johane 19:26, 27.) Jeso ne a hlupegiye ka mmane wage wa gore di ka makega gore ke mo a hlokofalele ke monna. Banyanana bage ne ba ka di kgona go pasopa mmane wa bona ka tso a di gayelang. Byalo ga tso tsa Modimo ne a nyoko gelepa ke  mang? A di šupetsi nkare bobhuti bage ne go le malata yage ka nako yonone. Mara Johane ke mo go le lepostola la go tshepega fote go le monghana ye mogolo wa Jeso. Jeso ke mo a tseya bo ba gore ne ba berekela Jehova ba le naye go le mašaga yage. (Mat. 12:46-50) Byalo, ka gore Jeso ke mo a mo nyaka ka matla ga Mariya fote a hlupegiye ka yene, o yye a neya Johane mmereko wa gore a mo gelepe ga tso tsa Modimo. O butsiye mmane wage a re: “Ye naa! Morwayi wago ke yewa!” Ke mokane a botsa Johane gore: “Ye naa! Mmane wago ke yewa!” Go tlugisela ka nako yonone, Johane o yye a ba nkare ke morwayi wa Mariya ke mokane a mo pasopa tsa nkare ke mmane wage. Jeso o šupetsiye mosadi ye wa gore o mo gudisiye  gabutši wa gore fote ne a le gona nakwela a kgwa gore o mo nyaka ka matla!

8. Re tšhuta ying ga tso Jeso a di butsiyeng Mariya le Johane?

⁸ Re ka tšhuta ying ga mantsu ya Jeso? Senghana so re nang naso le magageru ka ho phutegong se ka tiyelela go phala so re nang naso le mašaga ya rune. Mašaga ya rune ma ka re phigisa kela go re jikela, mara Jeso o yitseri mo re ka ngangarela Jehova le mokgahlo Wage, tso di re lahlegeleng re nyoko di “kraya go feta le ga lekgolo.” Ba go tlala ba nyoko tshwana le barwayi, barwediya, bommane kela bopapa ba gore ba re nyaka ka matla. (Mar. 10:29, 30) Wene o tikwa byang mara gore o ka howa mutšing wa batho ba gore tumelo ya bona yi maka gore ba mamarelane fote ga Jehova ba mo nyaka ka matla, le bona beng baa nyakanana?—Makol. 3:14; 1 Pet. 2:17.

9. Re tšhuta ying ga mantsu ya Jeso ya ma leng ga Matewu 27:46?

⁹ Jeso o yitseri king? Mo Jeso a šele a le thina le go kgwa, o yye a yahlamela a re: “Modimo waka, Modimo waka, ke ntaba o nlesetsiye?” (Mat. 27:46) Baebele a yi hlayi gore ke ntaba Jeso a hlayye mantsu yawa. Mara mantsu yane ma re tšhutisa ying? Se sengwana ke gore nakwela Jeso a hlaya mantsu yawa, ke mo a maka gore go makege tso di hlayang ke seporofeto so se leng ga Pisalema 22:1. * Fote mantsu yawa ma šupetsa gore Jehova aa mo “yagelela ka legora” ga Morwayi wage. (Jobo 1:10) Jeso ke mo a kwisisa gore Papage o lesetsiye manaba yage ma mo leketsa ka go felegelela, a go na motho ye a yyeng a leketsiwa go tshwana le Jeso. Fotefote, mantsu yawa ma šupetsa gore ke mo a sa sinya selo, a sa maka selo sa gore se nyaka ba mmolaya.

10. Re ka tšhuta ying ga tso Jeso a di butsiyeng Papage?

¹⁰ Re ka tšhuta ying ga mantsu ya Jeso? Re ka tšhuta gore a di nyake re fo dula re yemele gore Jehova a re kogetse ka legawu mo re gahlana le dilo tsa nkare di nyoko leketsa tumelo ya rune. Akere Jeso o yye a leketsiwa ka go napa go ro felegelela, le rune di nyaka dule re tshepega, re tipotse gore re ka mpa ra kgwa. (Mat. 16:24, 25) Mara re ya di tšiba tsa gore Modimo a ka sa re lesetse re tlela ke dilo tsa gore re ka sa kgone go di yemela. (1 Makor. 10:13) Se sengwana so re se tšhutang ke gore ba ka fo re maka lešidi le mo re sa sinya selo go fo tshwana naye ga Jeso. (1 Pet. 2:19, 20) Bo ba go re phigisa a ba make ke gore go na le mo re sinnyeng, mara ba maka ke gore a yi rune ba lefase lowa fote re yemelela nnete. (Joh. 17:14; 1 Pet. 4:15, 16) Jeso ke mo a di kwisisa gore ke ntaba Jehova a mo lesetsiye a hlupega. Mara ba bangwana ba gore baa tshepega ba fela ba tiputsisa gore ke ntaba Jehova a ba lesetsa ba ghula ke tse dingwana. (Habak. 1:3) Modimo wa rune wa go kwelana go baba wa gore fote o lefisa pelo wa di kwisisa gore batho bowa a ba gayele tumelo, ba fo ba ba tinyakela go kgomoletsiwa fote baa tšiba gore ke yene fela a ko ba kgomoletsang.—2 Makor. 1:3, 4.

11. Ke ntaba Jeso a hlayye mantsu ya ma leng ho ga Johane 19:28?

¹¹ Jeso o yitseri king? (Bala Johane 19:28.) Ke ntaba Jeso a hlayye gore: “Ke wonngwe meetši”? Ke mo a nyaka ‘go makega tso di leng mangwalong,’ dilo tsa gona ke tso di leng ga Pisalema 22:15 ya gore yi re: “Matšhika yaka ma fediye go tshwana le sepetlo tsa pitsa ya botsopa; lleme laka le tanya ho mokginining.” Fote, Jeso a ka fo ba a yye a kwa a wonngwe  meetši ka matla ka nthago ga gore a hlupegisiwe go baba ku phateng ya mohlupego. Ke mo a nyaka sa go mo timula.

12. Re ka tšhuta ying ga mantsu ya Jeso ya gore “Ke wonngwe meetši”?

¹² Re ka tšhuta ying ga mantsu ya Jeso? Mo Jeso a hlaya ka mokgo a tikwang ka gona, tsotsone ke mo di sa rele gore wa lepelela, le rune a ra tshwanela go tikwa ka mokgonone. Re ka fo ba re tlwayele go sa botse ba bangwana ka tso re di gayelang. Mara mo nkare go na le so re nyakang ba bangwana ba re gelepa ka sona, re sa jikajiki go ba kgopela. Mo re beyisa, mo nkare o tsofele kela wa lwala, di ka nyaka gore o kgopele monghanago gore a go felegetse setolo we reka tse dingwana kela ga togotela. Mo nkare o kgongwele kela wa šekela, o sa tšhabe go kgopela mogolo kela monghanago wa gore ke Mokreste wa go butšwa gore a go theetsele mo o kene o bolabola kela a go tiyise ka “lentsu la gabutši.” (Diy. 12:25) Re sa di lebale tsa gore magageru ma re nyaka ka matla fote ma nyaka go re gelepa “mo re gahlana le tsa go re kgahleletsa.” (Diy. 17:17) Mara tsa gore rune re nagana ying a ba di tšibi. Mo re sa ba botse, o ka kraya ba sa tšibi gore re nyaka ba re gelepa.

13. King so Jeso a se segeleleng mo a tshepega go segela a kgwa?

¹³ Jeso o yitseri king? Gana hala ga 3 ya ka sethewo ka di-14 tsa Nisani, Jeso o yahlamele a re: “Di makegiye!” (Joh. 19:30) Mantsu ya Jeso ma re tšhutisa gore mo a soko kgwa ke mo a di tšiba gore o makiye dilo ka mokana ga tsona tso Jehova ne a di nyaka gage. Jeso o segelele dilo tsa go tlala mo a tshepega go segela a kgwa. Sa mathomo, o šupetsiye gore Sathane o na le matsaka. Jeso o šupetsiye gore motho wa go yenela a ka tshepega le mo Sathane a kene a mo šuhlašuhla. Sa bobedi, Jeso o neyele ka lephelo lage gore a thogo lepolla batho. Ka taba la gore Jeso o neyele ka lephelo lage, o makiye gore batho ba go sa yenela ba be le senghana le Modimo fote ba be le tshepo ya go phela go ya go yye. Sa boraro, Jeso o šupetsiye gore a go na ye mongwana ye a ka lawolang go phala Jehova fote o makiye le gore lebitso la Papage le šale le yediye.

14. Di nyaka re tikemisele go maka ying tšatši le lengwana le le lengwana? Hlatolla.

¹⁴ Re ka tšhuta ying ga mantsu ya Jeso? Di nyaka re ro tipotsa gore re nyaka go dula re tshepega ka moka matšatši. Kwang tso di hlayyeng ke Mogageru Maxwell wa ga Friend wa gore ne a tšhutisa ga Sekolo sa Baebele sa Gilead. Mo Mogageru Friend a bolabola ka taba ya go tshepega nakwela ba le ga mogahlano wo mogolo wa batho ba mafase ya mehlobohlobo, o yitseri: “O sa thisi dilo tsa gore o ka kgona go di maka kela go di bolabola lekgono wa re o nyoko di maka ka motshwana. Nje wa di tšiba tsa gore o nyoko ba o le kaye ka motshwana? Tseya letšatši le lengwana le le lengwana go le lešuba la mafelelo la go šupetsa gore o tshwanela ke go phela go ya go yye.” Nkare re ka tseya letšatši le lengwana le le lengwana go le lešuba la mafelelo la go šupetsa gore re ya tshepega! Le mo re le thina le go kgwa, re ko hlayeng gore, “Jehova, nna ke di makiye tso ke kgonneng go di segelela gore ke dule ke tshepega, ke šupetsiye gore Sathane o na le matsaka, ke yedisiye lebitso lago fote ke šupetsiye gore wa gore a ka lawola go phala wene aa šiyo!”

15. Luka 23:46 yi re Jeso ke mo a tshepa ying?

¹⁵ Jeso o yitseri king? (Bala Luka 23:46.) Jeso o bolabodiye a sa kamake gore: “Papa, lephelo laka ke le beya matsogong yago.” Jeso ke mo a di tšiba gore ke Jehova ye a tšibang  tsa lephelo lage la ku mahlong, fote ke mo a di tshepa tsa gore Papage ne a ka sa mo lebale.

16. O tšhuta ying ga tso di makegeleng mogageru wa go ba le 15 ya mengwaga?

¹⁶ Re ka tšhuta ying ga mantsu ya Jeso? Tipotse gore tsa lephelo lago o di beya matsogong ya Jehova. Gore o make tsotsone, di nyaka o “tshepa Jehova ka pelo yago ka mokana ga yona.” (Diy. 3:5) Tla re beyise ka mogageru ye ba reng ke Joshua wa go ba le 15 ya mengwaga wa gore ne a lwala ka matla. O ganne ba mo yalafa ka mokgwa wa gore a wo yelane le molawo wa Modimo. Mo a šele a nyoko hlokofala, o yitseri ga mmane wage: “Mmane, Jehova a ka sa nlebale. . . . Ye mmane, ke ya go botsa, Jehova o nyoko ntsosa mo a tsosa bo ba hlokofeleng. O tšiba tso ke di naganang le ka mokgo ke tikwang ka gona, fote ke mo nyaka ka matla.” * Re nyoko ba re maka gabutši mo re tiputsisa gore, ‘Mo nka gahlana le selo sa gore se šinya se leketsa tumelo yaka la gore nka kgwa, ayitsano nko beya lephelo laka matsogong ya Jehova ka boya ka di tshepa tsa gore a ka sa nlebale?’

17-18. Re tšhutiye ying? (Bona lebhokisi la gore “ Tso re di Tšhutang ga Mantsu ya Jeso ya Mafelelo.”)

¹⁷ Re ka tšhuta dilo tsa go tlala ga mantsu ya Jeso ya mafelelo! Mantsu yawa ma re gopotsa gore di nyaka re tshwarele ba bangwana fote re tshepe gore Jehova o nyoko re tshwarela. Re jabodisa ke gore re na le magageru ka ho phutegong ya gore ma dula ma tikemisele go re gelepa. Le rune di nyaka re hlaye mo re nyaka magageru ma re gelepa. Re ya di tšiba tsa gore Jehova o nyoko re gelepa gore re tiyisele ga se sengwana le se sengwana so se ka re pitegetsang. Di nyaka re tseye letšatši le lengwana le le lengwana nkare ke la mafelelo la go šupetsa gore re tshepega go segela kaye, re kene re di tšiba tsa gore le mo re ka kgwa, Jehova a ka sa re lebale.

¹⁸ Ke nnete gore mantsu ya gore Jeso o ma bolabodiye mo a šele a nyoko kgwa ku phateng ya mohlupego ma ka re tšhutisa dilo tsa go tlala! Mo re ka berekisa tso re di tšhutiyeng, re nyoko ba re maka tso Jehova a di hlayyeng ka Morwayi wage mo a re: “Le mo theetseleneng.”—Mat. 17:5.