1-2. Shoboorora embeera eyaabaire eriho obu Yesu yaagamba ebigambo bye by’aha muheru atakafiire.

EKABA eri Nisani 14, omu gwa 33 Y.A.K. Yesu bwanyima y’okuteebwaho orubanja rwatarakozire, bakamushungisa, baamubonabonesa, kandi baamuhanika aha muti. Bakamuteera emisimaari omu bigyere n’engaro. Buri kwitsya, na buri kugamba ekigambo akaba ayeyongyera kugira obusaasi. Kwonka akaba aine kugamba ahakuba akaba aine enshonga nkuru ey’okugamba.

² Ka tushwijume ebigambo ebi Yesu yaagambire ari haihi kufeera aha muti gw’okubonabona, n’amashomo agu turikubaasa kwegyera aha bigambo bye. Ekirikumanyisa ngu twine ‘kumuhurira.’​—Mat. 17:5.

3. Yesu naabaasa kuba yaabaire naagamba baahi obu yaagira ati: “Taata, obasaasire”?

³ Yesu akagamba ki? Obu Yesu yaabaire ahanikire aha muti, akashaba ati: “Taata, obasaasire.” Kusaasira baahi? Ebigambo ebirikukurataho nibibaasa kutuhwera kutunga eky’okugarukamu: “Tibarikumanya ki barikukora.” (Luk. 23:33, 34) Yesu naabaasa kuba yaabaire naamanyisa abaserukare Abarooma abaamutaire emisimaari omu ngaro ze n’omu bigyere bye. Bakaba batarikumanya ou Yesu yaabaire ari buzima. Kandi Yesu naabaasa kuba yaabaire naateekateeka n’ahari bamwe aha bantu baingi abaashabire ngu ahanikwe, kwonka bwanyima bakamwikiririzamu. (Byak. 2:36-38) Yesu taraikiriize obutari buringaaniza obwamuhikireho kumureetera kugira ekiniga n’okubiika  enziika. (1 Pet. 2:23) Omu mwanya gw’ekyo, akashaba Yehova kusaasira abaamwitsire.

4. Yesu okuba ayeteekateekire kusaasira abazigu be nitukyegyeraho ki?

⁴ Nitubaasa kwegyera ki aha bigambo bya Yesu? Nka Yesu, twine kuba tweteekateekire kusaasira abandi. (Kol. 3:13) Abamwe otwariiremu abanyabuzaare, nibabaasa kutuhakanisa ahabw’okugira ngu tibarikwetegyereza enyikiriza zaitu n’entwaza yaitu. Nibabaasa kutubeiherera, kutuhemura omu maisho g’abandi, kucwekyereza ebitabo byaitu, nari kutiinatiinisa kutukora kubi. Omu mwanya gw’okubiika enziika, nitubaasa kushaba Yehova kwigura amaisho g’abarikutuhakanisa kugira ngu barugyeho bareebe amazima. (Mat. 5:44, 45) Obumwe, nikitugumira kusaasira abandi na munonga omuntu yaaba yaatutwariize omu muringo gw’obutari buringaaniza. Kwonka twaikiriza kuguma twine ekiniga n’enziika omu mutima gwaitu, nitwereetera obusaasi. Munyaanyazi-itwe omwe naashoboorora ati: “Ninyetegyereza ngu okusaasira tikirikumanyisa okushwekyerera ebibi nari kwikiriza abandi kundabyamu amaisho. Beitu nikimanyisa ngu naacwamu kutaguma nyine enziika.” (Zab. 37:8) Twacwamu kusaasira, nikimanyisa ngu titurikwenda kuguma twine ekiniga ahabw’ebintu bibi ebyatuhikireho.​—Efe. 4:31, 32.

5. Yesu akaraganisa ki omwe aha bashuma owaabaire ahanikirwe aha rubaju rwe, kandi ahabw’enki yaamuraganiise atyo?

⁵ Yesu akagamba ki? Abashuma babiri bakaba bahanikirwe aha mbaju ze zombi. Omu kubanza, aba babiri nabo bakateeraho kumushungisa. (Mat. 27:44) Kwonka bwanyima, omwe akeeteera omu kifuba. Akeetegyereza ngu Yesu tihaine eki yaabaire “acumwire.” (Luk. 23:40, 41) N’ekindi, akooreka ngu naikiriza ngu Yesu naija kuzooka omu bafu ategyekye nk’omugabe. Akagambira Yesu Omujuni ati: “Yesu, ku oriija omu bukama bwawe, onyijukye.” (Luk. 23:42) Omushaija ogwo ka yaayorekire ngu aine okwikiriza! Yesu akamugarukamu ngu ‘buzimazima ninkugambira eri izooba nti: Noija kuba naanye omuri Paradiso.’ (Luk. 23:43) Yetegyereze ngu Yesu akooreka ngu omushaija ogwo niwe ariyo naaraganisa nk’omuntu arikukoresa ebigambo nka “ninkugambira,” “noija,” na “naanye.” Yesu ahabw’okumanya ngu Ishe n’omunyambabazi, akagamba ebigambo ebyahaire omushuma ogwo amatsiko.​—Zab. 103:8.

6. Nitwegyera ki aha bigambo ebi Yesu yaagambiire omushuma?

⁶ Nitubaasa kwegyera ki aha bigambo bya Yesu? Yesu naatwariza kimwe nka Ishe. (Heb. 1:3) Yehova naaba aine ekihika ky’okutusaasira n’okutugirira embabazi twayeteisa buzima ahabw’ebibi ebi twakozire ira, kandi tukaikiriza ngu nitwija kusaasirwa ebibi byaitu kurabira omu shagama ya Yesu Kristo eyaasheeshekire. (1 Yoh. 1:7) Abamwe nikibaasa kubagumira kwikiriza ngu Yehova naabaasa kubasaasira ahabw’ebibi ebi baakozire enyima. Ku oraabe nooyehurira otyo obumwe, teekateeka ahari eki: Yesu ari haihi kufa, akagirira embabazi omushuma owaatandikire kumwikiririzamu ahonaaho. Mbwenu shi Yehova tarikwija kugirira embabazi abaheereza be abeesigwa, abarikukora kyona ekirikubaasika kworobera ebiragiro bye?​—Zab. 51:1; 1 Yoh. 2:1, 2.

7. Yesu akagambira ki Mariamu na Yohaana, nk’oku kirikworekwa omuri Yohaana 19:26, 27, kandi ahabw’enki yaagambire ebigambo ebyo?

⁷ Yesu akagamba ki? (Shoma Yohaana 19:26, 27.) Yesu akaba naafayo ahari nyina, orikubaasa kuba yaabaire ari efaakazi. Obundi beene nyina Yesu, bakaba nibabaasa  kumureeberera omu byetengo bye eby’omubiri. Kwonka shi n’oha owaabaire naija kumureeberera omu by’omwoyo? Tihariho ekirikworeka ngu beene nyina bakaba baabaire abeegi. Kwonka, Yohaana akaba ari entumwa ya Yesu omwesigwa kandi munywani we. Yesu akaba naareeba abaamwegaitsireho omu kuramya Yehova nk’ab’eka ye ey’omwoyo. (Mat. 12:46-50) N’ahabw’ekyo, Yesu ahabw’okukunda Mariamu n’ahabw’okumufaho, akatsiga yaamukwatsa Yohaana, arikumanya ngu naija kumureebera omu by’omwoyo. Akagambira nyina ati: “Reeba omwana waawe!” Kandi akagambira Yohaana ati: “Reeba omukaikuru waawe!” Kuruga obwo, Yohaana akaba mutabani wa Mariamu kandi akamureeberera nka nyina.  Yesu ka yaayorekire rukundo omukazi w’omuhendo owaamureebereire gye obu yaazaarwa kandi owaabaire amwemereire haihi arikuza kufa!

8. Nitubaasa kwegyera ki aha bigambo ebi Yesu yaagambiire Mariamu na Yohaana?

⁸ Nitubaasa kwegyera ki aha bigambo bya Yesu? Omukago ogu twine n’Abakristaayo bagyenzi baitu nigubaasa kuba ogw’amaani kukira ogu twine n’ab’omu maka gaitu. Abanyabuzaare baitu nibabaasa kutuhiiganisa nangwa n’okutwanga, kwonka nk’oku Yesu yaaraganiise, twahamira ahari Yehova n’ekibiina kye, nitwija kutunga “emirundi igana” kukira ebi twafeereirwe. Baingi nibaija kuba batabani baitu, bahara baitu, baamaawiitwe, nari baatataitwe. (Mak. 10:29, 30) Nooyehurira ota ahabw’okuba omwe aha b’eka y’eby’omwoyo abaine obumwe omu kwikiriza na rukundo, kandi abarikukundana bakakunda na Yehova?​—Kol. 3:14; 1 Pet. 2:17.

9. Ebigambo bya Yesu ebiri omuri Matayo 27:46 nitubyegyeraho ki?

⁹ Yesu akagamba ki? Akaire kakye Yesu atakafiire, akagira ati: “Ruhanga wangye, n’enki ekyakuntsigisaho?” (Mat. 27:46) Baibuli terikushoboorora ahabw’enki Yesu yaagambire ebigambo ebyo. Kwonka yetegyereze eki ebigambo ebyo birikutumanyisa. Enshonga emwe eri ngu, Yesu okugamba ebigambo ebyo, akaba naahikiiriza obunabi oburi omu Zaaburi 22:1. * Kandi, ebigambo ebyo bikooreka gye ngu Yehova akaba atariyo naarinda Omwana we “embaju zoona.” (Yob. 1:10) Yesu akeetegyereza ngu Ishe akaba amurekuriire abazigu be kumugyeza omu bwijwire, kukira omuntu ondiijo weena. N’ekindi, ebigambo ebi, bikahamya ngu akaba ataine rubanja rwona orwabaire rushemeire kumureetera kufa.

10. Nitubaasa kwegyera ki aha bigambo ebi Yesu yaagambiire Ishe?

¹⁰ Nitubaasa kwegyera ki aha bigambo bya Yesu? Nitwega eishomo rimwe ngu titwine kuteekateeka ngu Yehova naija kuturinda oburemeezi nari twaba nitugyezibwa omu kwikiriza kwaitu. Nk’oku Yesu yaagyeziibwe omu bwijwire, naitwe twine kuba twetebeekaniise kuba abeesigwa kuhika n’aha kufa kyayetengyesa. (Mat. 16:24, 25) Kwonka, twine obuhame ngu Ruhanga tarikwija kutwikiriza kugyezibwa kurenga aha ki turikubaasa kwemera. (1 Kor. 10:13) Eishomo erindi eri turikubaasa kwega n’okugira ngu naitwe nitubaasa kuhikwaho obutari buringaaniza nka Yesu. (1 Pet. 2:19, 20) Abantu tibarikutuhiiganisa ahabw’okugira ngu tukozire omushango, kureka n’ahabw’okugira ngu tituri kicweka ky’ensi egi, kandi nituha obujurizi oburikukwata aha mazima. (Yoh. 17:14; 1 Pet. 4:15, 16) Yesu akaba naayetegyereza gye ahabw’enki Yehova yaamurekire akabonabonesibwa. Kwonka okutashushana na Yesu, abaheereza ba Yehova abeesigwa obumwe nibeebuuza ahabw’enki Yehova arekire ebintu ebimwe kubaho. (Hab. 1:3) Ruhanga waitu ow’embabazi kandi orikugumisiriza naayetegyereza ngu abaheereza be abo tibarikukora ekyo ahabw’okutagira kwikiriza, kureka niwe arikuba aine kubahuumuriza.​—2 Kor. 1:3, 4.

11. Ahabw’enki Yesu yaagambire ebigambo ebiri omuri Yohaana 19:28?

¹¹ Yesu akagamba ki? (Shoma Yohaana 19:28.) Ahabw’enki Yesu yaagizire ati: “Naagira eiriho”? Akagira atyo “kuhikiiriza ebyahandiikirwe,” nibwo bunabi oburi omu Zaaburi 22:15, aharikugira hati: “Amaani  gampweiremu, nyomire nk’orugusyo, orurimi rundamatiire aha nkanka.” Kandi okwongyera aha kubonabona kwa Yesu, otwariiremu n’obusaasi obu yaabaire aine aha muti, ashemereire kuba yaabaire aine n’eiriho. Akaba naayenda obuhwezi kubaasa kukira eiriho rye.

12. Nitubaasa kwegyera ki aha bigambo bya Yesu ngu “naagira eiriho”?

¹² Niki eki turikubaasa kwegyera aha bigambo bya Yesu? Yesu tarateekateekire ngu yaashaba obuhwezi nikimanyisa ngu n’omweremwa, naitwe titwine kuteekateeka tutyo. Nitubaasa kuba tutwire tutarikugambira abandi ebi turikwenda. Kwonka obwire bwahika turikwenda obuhwezi, titwine kweziringa kushaba abandi kutuhwera. Nk’eky’okureeberaho, waaba okuzire nari oine amagara mabi, noobaasa kushaba omunywani kukuvuga kuza kugura ebintu nari kureeba omushaho. Twaba twine ebirikututeganisa, nikibaasa kutwetengyesa kushaba omureeberezi nari Omukristaayo ondiijo okuzire omu by’omwoyo kutuhurikiza twaba nitugamba obusaasi bwaitu, nari kutugambira “ekigambo kirungi” kutugarura omutima omunda. (Enf. 12:25) Ka twijukye ngu ab’eishe-emwe na banyaanyazi-itwe nibatukunda, kandi nibenda kutuhwera omu bwire bw’obusaasi. (Enf. 17:17) Kwonka tibarikubaasa kushoma ebiri omu biteekateeko byaitu. Nibabaasa kutamanya ngu nitwenda obuhwezi okwihaho twaba niitwe twabanza kubagambira.

13. Yesu akahikiiriza ki ahabw’okuguma ari omwesigwa kuhitsya aha kufa?

¹³ Yesu akagamba ki? Shaaha nka mwenda omu ihangwe rya Nisani 14, Yesu akagira ati: “Kyahwa!” (Yoh. 19:30) Yesu ari haihi kufa, akaba naamanya ngu buri kimwe eki Yehova yaabaire naayenda ngu akore akikozire yaakiheza. Yesu ahabw’okuguma ari omwesigwa kuhitsya aha kufa, akahikiiriza ebintu bingi. Eky’okubanza, akooreka ngu Sitaane n’omubeihi. Yesu akooreka ngu omuntu ohikiriire naabaasa kuguma ari omwesigwa n’obu Sitaane yaakukora ki. Ekya kabiri, eki kikamubaasisa kuhayo amagara ge nk’ekitambo. Okufa kwe nk’ekitambo kikabaasisa abantu abatahikiriire kugira omukago murungi na Ruhanga, kandi kyabaha n’amatsiko g’okutuuraho ebiro byona. Ekya kashatu, Yesu akooreka ngu Yehova niwe mutegyeki orikukirayo ohikiriire kandi yaiha n’ekijumo aha iziina rya Ishe.

14. Tushemereire kumariirira kutwaza tuta buri izooba? Shoboorora.

¹⁴ Nitubaasa kwegyera ki aha bigambo bya Yesu? Tushemereire kumariirira kuguma turi abeesigwa buri izooba. Teekateeka aha bigambo by’Ow’eishe-emwe Maxwell Friend, owaabaire naayegyesa omu ishomero rya Gileadi. Omu Ruteerane Oruhango orwabaire rurimu n’ab’amahanga agandi, Ow’eishe-emwe Friend omu rubazo rwe akagamba aha bwesigwa ati: “Eki oine kukora nari kugamba eizooba eri, otakibiika kuhitsya nyenkyakare. Iwe shi noohamya ngu nyenkyakare noija kuba oriho? Buri izooba ritware nk’omugisha gwawe gw’aha muheru ogw’okukorera okutuuraho ebiro byona.” Buri izooba eri turaabe tuhuriire ka turitware nk’omugisha gwaitu ogw’aha muheru ogw’okurinda obwesigwa! Reero obwo n’obu twakuhika omu ncwamba za rufu, nitwija kubaasa kugira tuti: “Yehova, naakora kyona ekirikubaasika kuguma ndi omwesigwa, kworeka ngu Sitaane n’omubeihi, n’okujuririra eiziina ryawe n’obushoboorozi bwawe bw’okutegyeka!”

15. Kurugiirira ahari Luka 23:46, Yesu akaba aine buhame ki?

¹⁵ Yesu akagamba ki? (Shoma Luka 23:46.) Yesu aine obwesigye bwona omuri Ishe, akagira  ati: “Naata omwoyo gwangye omu mikono yaawe.” Yesu akaba naamanya ngu ebiro bye by’omumaisho nibyegamira ahari Yehova, kandi akaba naahamiza kimwe ngu Ishe naija kumwijuka.

16. Nooyegyera ki aha byahikire aha w’eishe-emwe ow’emyaka 15?

¹⁶ Nitubaasa kwegyera ki aha bigambo bya Yesu? Ba oyeteekateekire kuta amagara gaawe omu mikono ya Yehova. Kubaasa kukora ekyo, oine kwesiga Yehova “n’omutima gwawe gwona.” (Enf. 3:5) Teekateeka aha ky’okureeberaho kya Joshua, ow’eishe-emwe ow’emyaka 15 orwaire endwara y’akabi. Akanga kwikiriza obujanjabi oburikuhenda ebiragiro bya Ruhanga. Ahari haihi kufa, akagambira nyina ati: “Maama, ndi omu mikono ya Yehova. . . . Maama ntarikubangaanisa nimbaasa kukugambira eki: Niimanya ngu Yehova kurabira omu kuzooka naija kungaruraho. Naareeba ekiri omu mutima gwangye, kandi buzima nimukunda.” * Buri omwe ahariitwe aine kwebuuza ati: ‘Okwikiriza kwangye ku kwakugyezibwa kwenda n’okuhika aha kufa, ninyija kuta amagara gangye omu mikono ya Yehova, kandi ngire obwesigye ngu naija kunyijuka?’

17-18. Twayega mashomo ki? (Reeba n’akabokusi “ Eki Turikwegyera aha Bigambo Ebi Yesu Yaahererukireyo Kugamba.”)

¹⁷ Ka nitwega amashomo makuru omu bigambo ebi Yesu yaahererukireyo kugamba! Nitwijukibwa ngu twine kusaasira abandi, kandi tugire obwesigye ngu Yehova naija kutusaasira. Twine omugisha gw’okugira eka y’eby’omwoyo ey’ab’eishe-emwe na banyaanyazi-itwe abeeteekateekire kutuhwera. Kwonka twaba nitwenda obuhwezi, twine kuba niitwe twabanza kubushaba. Nitumanya ngu Yehova naija kutuhwera kugumisiriza okugyezibwa kwona oku turaatungye. Kandi nitureeba obukuru bw’okuba abeesigwa buri izooba orikushusha ngu niryo ry’aha muheru, twine obwesigye ngu amagara gaitu gari omu mikono ya Yehova garinzirwe gye.

¹⁸ Buzima, ebigambo ebi Yesu yaagambire obu yaabaire naaza kufa ahanikire aha muti gw’okubonabona biine amakuru maingi! Twagyendera aha mashomo agu twayega, nitwija kuba nitworobera ebigambo bya Yehova byenyini ebirikukwata aha Mwana we ebirikugira ngu, “mumuhurire.”​—Mat. 17:5.