1, 2. Йесо ӕ фӕстаг дзурдтӕ кӕд загъта?

ЦУДӔЙ нӕ эри 33 анз, 14 нисан. Еци бон Йесобӕл дуйне цидӕртӕ ӕримистонцӕ ӕма ин хӕран тӕрхон рахастонцӕ. Гириз ибӕл кодтонцӕ ӕма ’й ехсӕй фӕннадтонцӕ, уой фӕсте ба ’й гъӕдӕбӕл ӕрауигътонцӕ, ӕ къохтӕ ӕма ин ӕ къӕхтӕ зӕгӕлтӕй ниххудтонцӕ, уотемӕй. Ӕ алли исуолӕфт дӕр ӕма ин ӕ алли дзурд дӕр рист хаста. Фал уотемӕй дӕр ӕхсидзгӕ дзурдтӕ загъта.

² Матфеййи 17:5 куд финст ӕй, уомӕ гӕсгӕ Йегови фӕндуй, цӕмӕй ин ӕ Фуртмӕ игъосӕн. Гъӕйдӕ мадта ӕркӕсӕн, Йесо мӕлгӕ ку кодта, уӕд ци дзурдтӕ загъта, уомӕ ӕма расагъӕс кӕнӕн, еци дзурдтӕй цӕбӕл ахур кӕнӕн, уобӕл.

3. Йесо Йеговӕмӕ ку искувта, «мӕ Фидӕ, ниххатир син кӕнӕ», уӕд ке кой кодта?

³ Йесо ци загъта? Йесо гъезӕмӕртти гъӕдӕбӕл ку адтӕй уӕд кувта: «Мӕ Фидӕ, ниххатир син кӕнӕ». Цума ке кой кодта? Е бӕрӕг ӕй, идарддӕр ци загъта, уомӕй: «Уомӕн ӕма, ци косунцӕ, уой нӕ лӕдӕрунцӕ» (Лук. 23:33, 34). Йесо, ӕвӕдзи, дзурдта, гъӕдӕбӕл ӕй ка ниййауигъта, еци ромаг ӕфсӕддонти туххӕй, уомӕн ӕма етӕ нӕ зудтонцӕ, Йесо ӕцӕгӕй ка адтӕй, уой. Удта ма, ӕвӕдзи, мӕлӕти тӕрхон ин ка рахӕссун кодта, еци адӕни кой кодта. Фӕстӕдӕр ибӕл еци адӕнӕй беретӕ баууӕндтӕнцӕ (Гъуд. 2:36–38). Кӕд Йесо уӕхӕн ӕфхуӕрд баййафта, уӕддӕр ӕ зӕрди маст нӕ ниддардта, фал ма Йеговӕй курдта, цӕмӕй син ниххатир кодтайдӕ (1 Пет. 2:23).

4. Йесо е знӕгтӕн ке ниххатир кодта, уомӕй цӕбӕл ахур кӕнӕн?

 ⁴ Йесой дзурдтӕй цӕбӕл ахур кӕнӕн? Йесо иннетӕн зӕрдиагӕй хатир кодта, ӕма мах дӕр гъӕуама уотӕ кӕнӕн (Кол. 3:13). Еуӕй-еу адӕн кенӕ нӕ хеуӕнттӕ нӕ нихмӕ цӕун райдайунцӕ, уомӕн ӕма ’й нӕ фӕллӕдӕрунцӕ, цӕбӕл ӕууӕндӕн ӕма куд цӕрӕн, уой. Аллихузи мӕнгӕттӕ нӕбӕл фӕдздзорунцӕ, ӕгадӕ бунати нӕ райвӕрунцӕ, нӕ литературӕ нин нискъудтӕ кӕнунцӕ кенӕ нӕмӕ ӕргом февзедунцӕ. Уӕхӕн уавӕри нӕ зӕрди маст даруни бӕсти гъӕуама Йеговӕмӕ ковӕн, цӕмӕй син сӕ зӕрдитӕ райгон кӕна ӕма етӕ дӕр еу афони рӕстдзийнадӕ базононцӕ (Матф. 5:44, 45). Уой туххӕй ковун ӕнцон нӕй, уӕлдайдӕр ба, нецӕй туххӕй ӕфхуӕрд ку баййафӕн, уӕд. Фал маст нӕ зӕрди едӕгтӕ ку рауадза, уӕд уомӕй нӕхецӕн фулдӕр зиан ӕрхӕсдзиан. Еу хуӕрӕ зӕгъуй: «Адӕймагӕн ку ниххатир кӕнун, уӕд е уобӕл дзорӕг нӕ фӕууй, ӕма ’й рӕститӕ кӕнун кенӕ ’й мӕ сӕрбӕл бадун уадзун. Е уобӕл дзорӕг ӕй, ӕма имӕ мӕ зӕрди маст нӕбал фӕддарун» (Пс. 37:8). Хатир ку кӕнӕн, уӕд нӕ зӕрди маст не ’мбурд кӕндзӕй ӕма нин ӕнцондӕр цӕрӕн уодзӕй (Еф. 4:31, 32).

5. Йесо фудгӕнӕгӕн зӕрдӕ цӕмӕй байвардта ӕма цӕмӕн?

⁵ Йесо ци загъта? Йесой фӕйнӕ фарси ма ауигъд адтӕнцӕ дууӕ фудгӕнӕги. Фиццаг ин етӕ дӕр ӕфхуӕрӕн дзубандитӕ кодтонцӕ (Матф. 27:44). Фал фӕстӕдӕр ба сӕ еу балӕдӕрдтӕй, Йесо лӕгъузӕй ке неци ракодта, уой (Лук. 23:40, 41). Уотӕ дӕр ма ин загъта: «Йесо, паддзах ку исуай, уӕд мӕ ӕргъуди кӕнӕ» (Лук. 23:42). Еци лӕг баууӕндтӕй, Йесо ке райгас уодзӕй ӕма Паддзах ке исуодзӕй, уобӕл. Ӕма ин Йесо дӕр загъта: «Ӕцӕгӕй дин зӕгъун абони, уодзӕнӕ мӕ хӕццӕ Дзенети» (Лук. 23:43). Йесо аци дзурдтӕ уомӕн загъта, ӕма ’й зудта, ӕ Фидӕ куд фӕлмӕнзӕрдӕ ӕма хатиргӕнагӕ ӕй, уой. Еци дзурдтӕ, мӕлгӕ ка кодта, еци фудгӕнӕгӕн нифс равардтонцӕ (Пс. 103:8).

6. Йесо фудгӕнӕгӕн ци дзурдтӕ загъта, уонӕй цӕбӕл ахур кӕнӕн?

⁶ Йесой дзурдтӕй цӕбӕл ахур кӕнӕн? Йесо дӕр ӕ Фиди хузӕн хатиргӕнагӕ ӕй (Дзиуит. 1:3). Йеговӕ нин нӕ тӕрегъӕдтӕ зӕрдиагӕй ниххатир кӕнуй, ӕрмӕст уой туххӕй гъӕуама фӕсмон ӕркӕнӕн, удта федарӕй ӕууӕндӕн, Йеговӕ нин сӕ ӕ Фурти нивонди фӕрци ке хатир кӕнуй (1 Иоан. 1:7). Еуӕй-еуетӕн зин баууӕндӕн фӕууй, Йеговӕ син сӕ тӕрегъӕдтӕ ке ниххатир кӕндзӕй, уобӕл. Кӕд дӕумӕ дӕр хатгай уотӕ фӕккӕсуй, уӕд расагъӕс кӕнӕ еу гъуддагбӕл: Йесой фарсмӕ ке ӕрауигътонцӕ, еци фудгӕнӕг ибӕл гъе уӕд райдӕдта ӕууӕндун. Фал имӕ Йесо цӕхуӕн цӕстӕй ракастӕй? Нур ба расагъӕс кӕнӕ Йеговӕ ӕ еузӕрдон лӕггадгӕнгутӕмӕ цӕхуӕн цӕстӕй кӕсуй. Етӕ ба ӕгас хъауритӕй фӕййархайунцӕ, цӕмӕй ин ӕ фӕдзӕхститӕ ӕнхӕст кӕнонцӕ. Мадта еци фудгӕнӕгӕн кӕми ниххатир кодта, уоми дӕуӕн нӕ ниххатир кӕндзӕй? (Пс. 51:1; 1 Иоан. 2:1, 2).

7. Иоанни 19:26, 27 куд финст ӕй, уомӕ гӕсгӕ Йесо Марийӕ ӕма Иоаннӕн ци загъта ӕма цӕмӕн?

⁷ Йесо ци загъта? (Бакӕсӕ Иоанни 19:26, 27.) Йесо ӕ идӕдзӕ мадӕбӕл тухстӕй. Ӕной ӕй ӕ иннӕ сувӕллӕнттӕ дӕр ӕнӕ къӕбӕрӕй нӕ ниууагътайуонцӕ. Фал ин Йеговӕн лӕггадӕ кӕнунмӕ ба ка банхус кодтайдӕ? Йесой хуӕртӕ ӕма ӕнсувӕртӕй  уӕдмӕ ӕ фӕдбӕлдзӕуӕг некема иссӕй. Иоанн ба адтӕй Йесой апостол ӕма ӕ хуӕздӕр ӕмбӕлттӕй сӕ еу. Йесо ба, Йеговӕн еузӕрдонӕй ка лӕггадӕ кодта, уони еугурейдӕр ӕ бийнонтӕбӕл нимадта (Матф. 12:46–50). Марийи дӕр Иоаннбӕл уой туххӕй бафӕдзахста. Йесо ӕ мади берӕ уарзта ӕма ’й зудта, Иоанн ибӕл ке батухсдзӕй. Йесо Марийӕн загъта: «Амӕй фӕстӕмӕ айӕ ӕй дӕ фурт». Иоаннӕн ба загъта: «Амӕй фӕстӕмӕ айӕ ӕй дӕ мадӕ». Еци бонӕй фӕстӕмӕ Иоанн Марийӕн иссӕй куд ӕхе фурт, уотӕ. Марийӕ Йесойӕн хуарз ниййерӕг адтӕй, удта ӕ мӕлӕти сахат дӕр ӕ фарсмӕ адтӕй, ӕма си Йесо хъӕбӕр боз адтӕй.

8. Йесо Марийӕ ӕма Иоаннӕн ци дзурдтӕ загъта, уонӕй цӕбӕл ахур кӕнӕн?

 ⁸ Йесой дзурдтӕй цӕбӕл ахур кӕнӕн? Нӕ хуӕртӕ ӕма ӕнсувӕртӕ нин хатгай нӕхе бийнонтӕй дӕр хӕстӕгдӕр исунцӕ. Нӕ хеуӕнттӕ нӕ хӕццӕ дзоргӕ дӕр нӕбал фӕккӕнунцӕ, Йеговӕн ке лӕггадӕ кӕнӕн, уой туххӕй кенӕ ба ма нӕ нихмӕ дӕр рацӕунцӕ. Фал Йесо зӕрдӕ куд байвардта, уомӕ гӕсгӕ Йеговӕбӕл ӕма ӕ организацибӕл нӕхе ку бӕттӕн, уӕд иссердзиан, ци фесафтан, уомӕй «сӕдӕ хатти фулдӕр». Беретӕ нин исуодзӕнцӕ нӕ сувӕллӕнтти, мадтӕлти ӕма фидтӕлти хузӕн (Мар. 10:29, 30). Ӕцӕгӕйдӕр, мах еу бийнонти хузӕн ан, уомӕн ӕма Йеговӕбӕл ӕууӕндӕн ӕма ’й уарзӕн, удта кӕрӕдзей дӕр уарзӕн (Кол. 3:14; 1 Пет. 2:17).

9. Матфеййи 27:46 финст дзурдтӕ цӕбӕл дзорӕг ӕнцӕ?

⁹ Йесо ци загъта? Ӕ мӕлӕти хуӕдразмӕ нигъгъӕр кодта: «Мӕ Хуцау, мӕ Хуцау, цӕмӕн мӕ ниууагътай?» (Матф. 27:46). Йесо аци дзурдтӕ цӕмӕн загъта, уой туххӕй Библий неци финст ес, фал сӕбӕл гъӕйдӕ расагъӕс кӕнӕн. Фиццаг: Йесо исӕнхӕст кодта Псалом 22:1 финст дзурдтӕ *. Дуккаг: еци дзурдтӕй бӕрӕг адтӕй, Йеговӕ ӕ Фурти аллирдигӕй ке нӕ гъӕуай кодта (Иов 1:10). Йесо ӕй лӕдӕрдтӕй, е знӕгти къохмӕ цӕмӕн бахаудтӕй, уой. Цӕмӕй кӕронмӕ фӕлвӕрд ӕрцудайдӕ. Киристей хузӕн фӕлварӕнтӕ еунӕг адӕймаг дӕр нӕ бавзурста. Ӕртиккаг: ӕ дзурдтӕй бавдиста, тӕрегъӕд ке неци ракодта, уӕлдайдӕр ба, мӕлӕти аккаг ка ӕй, уӕхӕн тӕрегъӕд.

10. Йесо Йеговӕн ци дзурдтӕ загъта, уонӕй цӕбӕл ахур кӕнӕн?

¹⁰ Йесой дзурдтӕй цӕбӕл ахур кӕнӕн? Фиццаг: уомӕ гъӕуама ма ӕнгъӕлмӕ кӕсӕн, ӕма нӕ Йеговӕ не ’гас зиндзийнӕдтӕй дӕр багъӕуай кӕндзӕй. Йесо е ’гас фӕлварӕнти дӕр федар фӕллӕудтӕй, ӕма мах дӕр гъӕуама Йегови туххӕй нӕ цард раттунмӕ дӕр цӕттӕ уӕн (Матф. 16:24, 25). Кӕбӕл не ’схъаурӕ кӕнӕн, уӕхӕн фӕлварӕни бахаун нӕ Йеговӕ нӕ бауадздзӕй (1 Кор. 10:13). Дуккаг: мах дӕр, гӕнӕн ес, ӕма Йесой хузӕн ӕнӕ фудӕй ӕфхуӕрд баййафӕн (1 Пет. 2:19, 20). Нӕ нихмӕ ка цӕуй, етӕ нӕ, лӕгъуз ести ке кӕнӕн, уой туххӕй нӕ фефхуӕрунцӕ, фал аци дуйнейӕй ке нӕ ан ӕма адӕнӕн рӕстдзийнадӕ ке ӕргом кӕнӕн, уой туххӕй (Иоан. 17:14; 1 Пет. 4:15, 16). Йесо ӕй зудта, гъезӕмӕрттӕ цӕмӕн ӕвзаруй, уой. Фал ӕй еуӕй-еу киристӕнттӕ ба нӕ фӕллӕдӕрунцӕ, бӕллӕхтӕ сӕбӕл цӕмӕн ӕрцӕуй, уой (Ав. 1:3). Нӕ фӕлмӕнзӕрдӕ Фидӕ ’й лӕдӕруй, е се ’ууӕндундзийнадӕ ке фесафтонцӕ, уобӕл дзорӕг ке нӕй. Уони гъӕуй уодӕнцойнӕ, ӕма син еци уодӕнцойнӕ ба ӕрмӕстдӕр Йеговӕ ратдзӕй (2 Кор. 1:3, 4).

11. Йесо Иоанни 19:28 финст дзурдтӕ цӕмӕн загъта?

¹¹ Йесо ци загъта? (Бакӕсӕ Иоанни 19:28.) Йесо уотӕ цӕмӕн загъта, «ӕдонуг дӕн», зӕгъгӕ? Уотемӕй исӕнхӕст ӕй Псалом 22:15 финст пахампарадӕ: «Мӕ хъаурӕ гъосини къӕртти хузӕн ниххускъӕ ’й, ме ’взаг мӕ комикъолӕбӕл ниццӕфстӕй». Удта ӕной дӕр дессаг нӕй, уӕхӕн гъезӕмӕртти фӕсте ке исӕдонуг ӕй, е. Фал ӕй ӕнхус гъудӕй, цӕмӕй ин еске дон бадардтайдӕ.

12. Йесо уотӕ ке загъта, ӕдонуг дӕн, зӕгъгӕ, уомӕй цӕбӕл ахур кӕнӕн?

 ¹² Йесой дзурдтӕй цӕбӕл ахур кӕнӕн? Йесомӕ ӕгадӕ нӕ кастӕй ӕнхус ракорун, ӕма махмӕ дӕр е гъӕуама ӕгадӕ ма кӕса. Ести гъуддаг бакӕнун нӕ ку фӕгъгъӕуй, уӕд ӕй нӕхуӕдтӕ фӕккӕнӕн, ескӕбӕл нӕ зӕрдӕ нӕ фӕддарӕн. Фал, кӕбӕл не ’схъаурӕ кӕнӕн, уӕхӕн гъуддаг бакӕнун нӕ ку фӕгъгъӕуй, уӕдта гъӕуама ӕнхус ракорунмӕ ӕфсӕрми ма кӕнӕн. Зӕгъӕн, ӕригон нӕбал ан ӕма не ’нӕнездзийнадӕ хуӕздӕргъӕуагӕ ’й. Уӕд ӕнгъезуй ӕмбурди ескӕмӕн зӕгъун, цӕмӕй нӕ туканмӕ кенӕ дохтирмӕ фӕлласонцӕ. Кенӕ ба, зӕгъӕн, нӕ зӕрдӕ естӕбӕл ресуй. Уӕдта ӕнгъезуй хестӕр нӕлгоймӕгтӕн зӕгъун, цӕмӕй нӕмӕ байгъосонцӕ кенӕ нӕ бафедар кӕнонцӕ (Ӕмб. 12:25). Гъӕйдӕ мадта нӕ зӕрдӕбӕл дарӕн, хуӕртӕ ӕма ӕнсувӕртӕ нин банхус кӕнунмӕ алкӕддӕр цӕттӕ ке фӕуунцӕ (Ӕмб. 17:17). Фал син ӕй зӕгъгӕ ку нӕ кӕнӕн, уӕд ӕй кӕцӕй базондзӕнцӕ ӕнхус нӕ ке гъӕуй, уой?

13. Йесо ӕ мӕлӕти уӕнгӕ дӕр Йеговӕбӕл еузӕрдонӕй ке байзадӕй, е цӕхуӕн пайда ӕрхаста?

¹³ Йесо ци загъта? 14 нисани бонӕ еу ӕртӕ сахаттебӕл, Йесо, мӕлгӕ ку кодта, уӕд загъта: «Цидӕриддӕр мин бафӕдзахстай, уой исӕнхӕст кодтон» (Иоан. 19:30). Йесо ӕй зудта, ӕ Фиди фӕндон ке исӕнхӕст кодта. Фиццаг: ӕ цардӕй бавдиста, Сайтан мӕнгӕттӕ ке дзурдта, удта ӕнхӕст адӕймаги бон ке ӕй Хуцаубӕл еузӕрдонӕй байзайун, Сайтан ин цийфӕнди ма бавзарун кӕна, уӕддӕр. Дуккаг: Йесо ӕ цард нивонди ӕрхаста. Уой фӕрци ӕнӕнхӕст адӕнӕн фӕззиндтӕй ӕносон царди нифс. Удта сӕ Хуцау рӕстгӕнгутӕбӕл нимайуй. Ӕртиккаг: Йесо исбӕлвурд кодта, Дун-дуйней хецау, ӕрмӕстдӕр Йеговӕ ке гъӕуама уа ӕма ин ӕ ном исрохс кодта.

14. Алли бон дӕр куд гъӕуама цӕрӕн?

¹⁴ Йесой дзурдтӕй цӕбӕл ахур кӕнӕн? Гъӕуама алли бон дӕр нӕ бон ци ӕй, уой кӕнӕн, цӕмӕй Хуцаубӕл еузӕрдон уӕн. Еу хатт Галаади скъолай ахургӕнӕг Максвелл Френд ӕхсӕнадӕмон конгресси ӕ радзубандий уӕхӕн гъуди загъта: «Аци бон уӕ бон ци ӕй бакӕнун, уой исонмӕ ма уадзетӕ, исон ци уодзӕй, е бӕрӕг нӕй. Алли бон дӕр уотӕ цӕретӕ, цума уин фӕстаг фадуат ӕй, Йеговӕн бавдесун, ӕносон царди аккаг ке айтӕ, уой». Ӕма ӕцӕгӕйдӕр, гъӕуама алли фадуатӕй дӕр пайда кӕнӕн, Йеговӕбӕл еузӕрдон ке ан, уой бавдесунмӕ. Ӕма гъе уӕд мӕлӕти цӕсгонмӕ кӕсгӕй дӕр нӕ бон уодзӕй зӕгъун: «Йеговӕ, мӕ зӕрдӕ дӕбӕл не ’сӕййивтон, Сайтан сайгӕ ке кодта, уой бавдистон ӕма дин дӕ ном исрохс кодтон».

15. Лукай 23:46 куд финст ӕй, уомӕ гӕсгӕ Йесо ци зудта?

¹⁵ Йесо ци загъта? (Бакӕсӕ Лукай 23:46.) Йесо ӕй зудта, ӕ федӕн Йеговӕй кӕнгӕ ке ӕй. Е ӕппундӕр нӕ гурусхӕ кодта, ӕ Фидӕ ’й ке нӕ феронх кӕндзӕй, ӕма уомӕ гӕсгӕ загъта: «Мӕ Фидӕ, дӕ къохтӕмӕ дӕттун мӕ уод».

16. 15-анздзуд Джошуай хабарӕй цӕбӕл ахур кӕнӕн?

¹⁶ Йесой дзурдтӕй цӕбӕл ахур кӕнӕн? Уӕ цард Йегови къохмӕ раттетӕ. Уой туххӕй ба не ’гас зӕрдӕ дӕр гъӕуй Йеговӕбӕл дарун (Ӕмб. 3:5). Ӕркӕсӕн Джошуай хабармӕ. Джошуа адтӕй Йегови Ӕвдесӕн, ӕма ибӕл 15 анзи ку цудӕй, уӕд рамардӕй,  исдзӕбӕх кӕнӕн кӕмӕй н’ адтӕй, уӕхӕн незӕй. Джошуа не ’сарази ӕй ӕхе, Хуцауи закъони нихмӕ ка адтӕй, уӕхӕн мадзӕлттӕй дзӕбӕх кӕнун. Ӕ мӕлӕти размӕ ӕ мадӕн загъта: «Мамӕ, ӕз Йегови къохти дӕн, ӕма ’й федарӕй зонун, Йеговӕ мӕ ке райгас кӕндзӕй. Е ӕй зонуй, мӕ зӕрди ци ес, удта ’й куд уарзун, уой» *. Алкедӕр ни гъӕуама ӕхе бафӕрса: «Равзарун мӕ ку багъӕуа, Йеговӕбӕл еузӕрдонӕй байзайон ӕви мӕ уод фӕййервӕзун кӕнон, уӕд куд бакӕндзӕн? Мӕхе Йегови къохтӕмӕ ратдзӕн ӕма федарӕй ӕууӕнддзӕн, ке мӕ нӕ байронх уодзӕй, уобӕл?»

17, 18. Киристей фӕстаг дзурдтӕй цӕбӕл ахур кӕнӕн? (Кӕсӕ рамкӕ « Ахур кӕнӕн Киристей фӕстаг дзурдтӕй».)

¹⁷ Цӕйбӕрцӕ ӕхсидзгӕ гъудитӕ ес иссерӕн, Йесо ӕ мӕлӕти сахат ци дзурдтӕ загъта, уонӕми. Еци дзурдтӕй бӕрӕг ӕй, иннетӕн ке гъӕуама хатир кӕнӕн. Удта Йеговӕ махӕн дӕр ке хатир кӕндзӕй, уобӕл дӕр гъӕуама ма гурусхӕ кӕнӕн. Йесой дзурдтӕ нин нӕ зӕрдӕбӕл лӕуун кӕнунцӕ, цӕхуӕн дессаги бийнонтӕ нин ес ӕма нин нӕ хуӕртӕ ӕма не ’нсувӕртӕ се ’нхуси къох ӕрбадарунмӕ алкӕддӕр цӕттӕ ке фӕуунцӕ. Удта ма еци дзурдти фӕрци федарӕй ӕууӕндӕн, Йеговӕ нин цийфӕнди фӕлварӕн исфӕразунмӕ ке банхус кӕндзӕй. Уомӕй уӕлдай ма нӕ Йесой дзурдтӕ разӕнгард кӕнунцӕ, цӕмӕй алли бон дӕр уотӕ цӕрӕн, цума нин фӕстаг фадуат байзадӕй Йеговӕн бавдесун, еузӕрдон ибӕл ке ан, уой. Удта ’й федарӕй зонӕн, ку рамӕлӕн, уӕддӕр нӕ Йеговӕ ке нӕ байронх уодзӕй.

¹⁸ Йесо ӕ мӕлӕти размӕ ци дзурдтӕ загъта, уонӕй берӕ цӕбӕлдӕрти ахур кӕнӕн. Гъӕйдӕ мадта сӕ макӕд иронх кӕнӕн ӕма си ци базудтан, уомӕ гӕсгӕ цӕрӕн. Уотемӕй Йеговӕн бавдесдзиан, ӕ Фуртмӕ ин ке игъосӕн (Матф. 17:5).