1-2. Antoy situasyon nen Jesus nen imbaga to ray sampot ya salita to?

NISAN 14 ed saman, taon 33 C.E. Kayarin inakusaan si Jesus tan senentensiaan na patey ed krimen ya agto ginawa, sikatoy binalaw-balaw tan ininsulto, pinairap dan maong, tan impasak ed poste. Seguradon pinasyan sakit so alikna nen Jesus nen impanek da iray pasak ed lima tan sali to. Tan segurado met ya kada no oningas tan kada no ibuka toy sangi to pian mansalita et ansakisakit. Balet pinilit toy mansalita, ta walay kaukolan ton ibaga.

² Pantongtongan tayo pa sirin iray sampot ya imbaga nen Jesus nen sikatoy manpapanabos lad panamairapan a poste tan no antoy naaralan tayo ed saratan. ‘Ondengel tayo ed sikato.’—Mat. 17:5.

3. Siopa ray posiblin tutukoyen nen Jesus nen impikasi ton: “Ama, perdonam ira”?

³ Antoy imbaga nen Jesus? Nen akapasak lay Jesus ed poste, impikasi to: “Ama, perdonam ira.” Siopa ray labay ton naperdona? Makaala tayoy ideya ed sayay tinmumbok ya imbaga to: “Agda amtay gagawaen da.” (Luc. 23:33, 34) Posiblin say tutukoyen nen Jesus et saray Romanon sundalo ya angipasak ed sikato ta agda amta ya sikato so Anak na Dios. Posiblin say tutukoyen to met et saramay wadman ya akibabalin nansugsog ya sikatoy pateyen, ya say arum ed sikara et anisia lanlamang ed sikato. (Gawa 2:36-38) Anggano onman so ginawa ra, agto  ra tinetel tan agnanem-em na sakit na linawa. (1 Ped. 2:23) Imbes, impikasi tod Ama to ya perdonaen To ra komon.

4. Antoy naaralan tayod impamerdona nen Jesus ed saray mamubusol ed sikato?

⁴ Antoy naaralan tayod imbaga nen Jesus? Singa si Jesus, nepeg ya akaparaan tayon mamerdona. (Col. 3:13) Ompan wala ray onkokontra ed panlilingkor tayod si Jehova, singa saray kakanayon tayo, ta agda natatalosan iray papanisiaan tan prinsipyo tayod bilay. Ompan deralan da tayo, pabpabaingan da tayo ed arap na totoo, ibantak da ray publikasyon tayo, odino ompan sakitan da tayo ni ingen pian ontunda tayo lan manlingkor ed si Jehova. Imbes ya manem-em tayoy sakit na linawa, ipikasi tayod si Jehova ya onlemek komon so puso ra tan onsabi panaon et awaten da met so katuaan. (Mat. 5:44, 45) No maminsan, mairap so mamerdona, lalo la no aliwliwan talagay ginawa rad sikatayo. Balet no pinunuyan tayoy liknaan tayo, singa tayo sasakitan so sarili tayo. Oniay imbaga na sakey ya sister: “No perdonaen koy arum, agto labay ya ibagan kokonsintien koy ginawa ra tan manpapaka-martir ak. Labay ko labat ya naekal la yay belat ed pagew ko.” (Sal. 37:8) No mamerdona tayo tan agtayo manem-em na sakit na linawa, onlemew so liknaan tan ondeen so nonot tayo.—Efe. 4:31, 32.

5. Antoy insipan nen Jesus ed samay sakey ya kriminal ya impasak ed abay to, tan akin et insipan to itan?

⁵ Antoy imbaga nen Jesus? Walay duaran kriminal ya impasak met ed poste diad abay nen Jesus. Diad gapo et ininsulto day Jesus. (Mat. 27:44) Balet tinmunda lanlamang may sakey ta naisip ton “anggapoy ginawa [nen Jesus ya] kasalanan.” (Luc. 23:40, 41) Diad tua, napatnagan ed imbaga to ya sikatoy manisia ya nabilay lamet si Jesus tan magmaliw ya ari. Kuan to: “Jesus, nonot mo ak sano onsabi kad Panarian mo.” (Luc. 23:42) Makapadinayew so pananisia to! Oniay ebat nen Jesus ed sikato: “Ibagak ed sika natan, nakaiba ta ka ed Paraiso.” (Luc. 23:43) * Nen imbaga nen Jesus iray salitan, “Ibagak ed sika” tan “nakaiba ta ka,” labay ton ipalikna ed samay kriminal ya personal to itan ya isisipan ed sikato. Lapud amta nen Jesus ya mapangasi so Ama to, agnan-alangan ya ibaga ed sayan manpapanabos lan kriminal ya sikatoy nabilay ed Paraiso.—Sal. 103:8.

6. Antoy naaralan tayo ed imbaga nen Jesus ed samay kriminal?

⁶ Antoy naaralan tayod imbaga nen Jesus? Si Jesus et perpekton repleksion nen Ama to—parehon-pareho so ugali da. (Heb. 1:3) Perdonaen tan kasian itayo nen Jehova no talagan pagbabawian tayo ray mauges ya ginawa tayo tan no manisia tayo ya sarag itayon ‘linisan na dala nen Jesu-Kristo.’ (1 Juan 1:7) Iisipen balet na arum ya imposiblin naperdona nen Jehova iray agawaan dan lingo. No ontan so naliliknam, nonot mo iya: No kinasian nen Jesus so sakey a kriminal anta aganggano nin angipanengneng na pananisia, seguradon kasian nen Jehova iray matoor ya lingkor To ya gagawaen day anggaay nayarian dan unoren iray ganggan To.—Sal. 51:1; 1 Juan 2:1, 2.

7. Base ed Juan 19:26, 27, antoy imbaga nen Jesus ed si Maria tan Juan? Akin et imbaga to itan?

⁷ Antoy imbaga nen Jesus? (Basaen so Juan 19:26, 27.) Sankanonot nen Jesus si Maria ya diad saman et posiblin abalo la. Tua, wala met iray agagi nen Jesus ya sarag dan itarya so materyal iran pankaukolan nen  ina to. Pero siopay ontulong ed sikato pian mansiansian mabiskeg ed espiritual? Mapatnag ya diad saman et anggapo nid saray agagi nen Jesus so nagmaliw ya disipulo to. Balet wadtay Juan ya malet ya kaaro nen Jesus tan matoor ya apostol to. Diad tua, kapamilya so turing nen Jesus ed saray kapara ton mandadayew ed si Jehova. (Mat. 12:46-50) Inar-aro tan imamalasakit nen Jesus si Maria kanian si Juan so angibilinan to. Matalek si Jesus ya agpaulyanan nen Juan so espiritual ya pankaukolan nen Maria. Oniay imbaga nen Jesus ed ina to: “Nia so anak mo!” Insan imbaga tod si Juan: “Nia so inam!” Manlapu lad saman ya agew, si Juan la so angasikaso ed si Maria, tan inturing to la ya ina to. Talagan inar-aro tan  pinabpabli nen Jesus so ina to ya angasikaso ed sikato manlapud inkiyanak to tan wadman ya akaalagey ed abay to diad agew na impatey to.

8. Antoy naaralan tayo ed samay imbaga nen Jesus ed si Maria tan Juan?

⁸ Antoy naaralan tayod imbaga nen Jesus? No maminsan, mas ka-close tayo ray agagi nen say mismon kapamilya tayo. Anggano kontraen odino itakwil itayo na saray kapamilya tayo, tandaan tayo imay insipan nen Jesus ya “maminlasus ed karakel” so onsalat basta manmatoor tayod si Jehova tan ed organisasyon To. Dakdakel so magmaliw ya anak, ina, o ama ya mangaro ed sikatayo. (Mar. 10:29, 30) Diad kongregasyon, singa tayo sakey ya pamilya ta amin tayo et walaan na pananisia. Inaro tayoy Jehova tan inaro tayoy sakey tan sakey. Balibali ed liknaan ya kabiangan itayo na pamilya nen Jehova!—Col. 3:14; 1 Ped. 2:17.

9. Anto ray naamtaan tayo ed samay imbaga nen Jesus diad Mateo 27:46?

⁹ Antoy imbaga nen Jesus? Nen asingger lan nauyosan na linawa si Jesus, inyeyag to: “Dios ko, Dios ko, akin et pinaulyanan mo ak?” (Mat. 27:46) Anggapoy nabasad Biblia no akin ya imbaga to man. Pero antoy naamtaan tayo ed satan ya imbaga to? Nen imbaga itan nen Jesus, sinumpal to imay propesiya ya nabasad Salmo 22:1. * Sakey ni, malinlinew ed satan ya imbaga to ya sikatoy agprinotektaan nen Ama to tan ag-angiyan na “alar ed paliber” to. (Job 1:10) Amta nen Jesus ya talagan inabuloyan nen Ama to ya sikatoy pairapen na saray mamubusol ed sikato pian nasubok so pananisia to anggad ipapatey. Anggapo lay arum a too ya dinmalan ed onia kairap ya subok. Ontan met, prueba iyan imbaga to ya talagan anggapoy kasalanan to tan agto kanepegan so ompatey.

10. Anto ray naaralan tayod samay imbaga nen Jesus ed Ama to?

¹⁰ Antoy naaralan tayod imbaga nen Jesus? Agtayo iisipen ya ekalen nen Jehova iray subok ya dadalanen tayo. No panon ya asubok so pananisia nen Jesus anggad ipapatey, nepeg ya akaparaan tayo met ya arapen iray subok tan manmatoor tayo anggano bilay tayo lay nalalanor. (Mat. 16:24, 25) Pero tandaan tayo imay imbaga nen Jehova ya “agto abuloyan a nipaarap [tayod] tukso ya [agtayo] nayarian.” (1 Cor. 10:13) Say sakey nin naaralan tayo et posiblin makaeksperiensya tayo met na ag-inkahustisya ya singa agawad si Jesus. (1 Ped. 2:19, 20) Bubusolen itayo na arum aliwan lapud walay ginawa tayon aliwa, noagta lapud ag-itayo kabiangan na sayan mundo tan ipupulong tayo so katuaan. (Juan 17:14; 1 Ped. 4:15, 16) Atalosan nen Jesus no akin ya sikatoy inabuloyan nen Jehova ya manirap. Pero no maminsan, iisipen na arum ya agagi no akin et aabuloyan nen Jehova ya manirap ira anta matoor met ira. (Hab. 1:3) No ontan so nalilikna tayo, tandaan tayo ya mapangasi tan maanos si Aman Jehova kanian agto isipen ya makapuy so pananisia tayo. Natatalosan toy situasyon tayo tan amta to ya kaukolan tayoy ligliwa.—2 Cor. 1:3, 4.

11. Akin et imbaga nen Jesus imay nabasad Juan 19:28?

¹¹ Antoy imbaga nen Jesus? (Basaen so Juan 19:28.) Akin et imbaga nen Jesus ya: “Makakainum ak”? Imbaga to itan pian nasumpal iyan propesiya ya nabasad Salmo 22:15: “Naupot lay kasil ko, singa ak no langa;  say dilak et ompepeket ed ngares ko.” Sakey ni, seguradon apaet lay Jesus diad amin ya irap ya dinalan to, kaiba lay pinasyan panutot legan ya akapasak ed poste! Imbaga toy pakakapaet to pian ikdan da komoy nainum.

12. Antoy naaralan tayod samay imbaga nen Jesus ya “Makakainum ak”?

¹² Antoy naaralan tayod imbaga nen Jesus? Si Jesus ya mismo et imbaga toy nalilikna to tan kinmerew na tulong. Tandaan mo sirin ya aliwan kababaing so ikerew na tulong. Pero no maminsan, ompan mas labay tayon soloen so problema tayo. Balet walan walay panaon ya kaukolan tayoy tulong na arum. No ontay situasyon tayo, agtayo komon nababaingan ya onkerew na tulong. Singa bilang, no maedad tayo la odino walay sakit tayo, manpaiba tayod kaaro tayo no onla tayon man-grocery odino manpacheck-up ed doktor. No maermen odino nadidismaya tayo, kerewen tayoy tulong na elder o maespiritual ya agi ya akaparaan ya ondengel tan mangibaga na saray makapaseseg tan “maabig a salita.” (Pro. 12:25) Tandaan tayo ya inar-aro itayo na saray agagi tan nailaloan tayo ra diad panaon na problema. (Pro. 17:17) Pero agda nabasa no antoy walad isip tayo. Kanian no agtayo ibagay nalilikna tayo, agda niiter so kaukolan tayon tulong.

13. Anto ray agawaan nen Jesus lapud nanmatoor anggad patey?

¹³ Antoy imbaga nen Jesus? Manga alas-3 lad ngarem na Nisan 14 nen inyeyag nen Jesus: “Asumpal la!” (Juan 19:30) Imbaga itan nen Jesus pigaran segundo labat la antis na ipatey to ta amta ton asumpal ton amin so ipapagawa nen Jehova ed sikato. Lapud nansiansian matoor si Jesus anggad patey, dakel so importantin agawaan to. Unona, pinaneknekan to ya matila si Satanas. Impanengneng nen Jesus ya sarag na perpekton too so manmatoor ed amin a bengatla anggan anto ni tay gawaen nen Satanas. Komadua, inter nen Jesus so bilay to bilang dondon. Lapud inyapay toy bilay to, sarag tayoy mikaaro ed Dios anggano agtayo perpekto tan walay ilalo tayon manbilay na andi-anggaan. Komatlo, pinaneknekan nen Jesus ya si Jehova so karapat-dapat ya manuley ed interon uniberso tan nilinisan toy ngaran nen Ama to.

14. Antoy nepeg tayon gawaen kada agew? Ipaliwawa.

¹⁴ Antoy naaralan tayod imbaga nen Jesus? Nepeg ya determinado tayon manmatoor kada agew. Imanoen so imbaga nen Brother Maxwell Friend ya nanlingkor bilang instruktor ed Watchtower Bible School of Gilead. Diad sakey ya international assembly, oniay imbaga tod paliwawa to tungkol ed katooran: “No antoy sarag mon gawaen o ibaga natan, agmo la ipapanabuas. Segurado ka sirin ya mabilay ka ni nabuas? Kada agew, isip mo ya sampot la man ya agew ya nipanengneng mon karapat-dapat kan manbilay ya andi-anggaan.” On, kada agew et isipen tayo ya sampot la itan ya agew pian nipanengneng tayon matoor tayod si Jehova! Kanian anggano nipaarap tayod ipapatey, sarag tayo met ya ibagan, “Aman Jehova, ginawaan koy anggaay nayarian ko pian makapanmatoor ak ed sika, pian napaneknekan ya matila si Satanas, tan pian napasanto so ngaran mo tan napruebaan ya sika so karapat-dapat ya manuley.”

15. Base ed Lucas 23:46, antoy imbaga nen Jesus ed Ama to tan antoy ipapanengneng na satan?

¹⁵ Antoy imbaga nen Jesus? (Basaen so Lucas 23:46.) Oniay sampot ya imbaga nen Jesus  antis ya inatey: “Ama, imamatalek kod sika so espirituk.” Impalima to lad Ama to so bilay to. Tan segurado si Jesus ya sikatoy agbalot lingwanan nen Jehova.

16. Antoy naaralan mo ed eksperiensya nen Joshua?

¹⁶ Antoy naaralan tayod imbaga nen Jesus? Komon ta akaparaan ka met ya ipalimad si Jehova so bilay mo. Pian nagawaan mo itan, nepeg ya “manmatalek ka ed si Jehova diad interon pusom.” (Pro. 3:5) Imanoen so alimbawa nen Joshua ya nansakit na grabe nen 15 so edad to. Agto labay so manpasaksak na dala lapud labay toy manmatoor ed si Jehova. Antis ya inatey, oniay imbaga tod si nanay to: “Ma, si Aman Jehova lay akauley ed siak. . . . Segurado ak ya bilayen to ak. Amta toy walad pusok tan amta to ya inar-arok.” * Maabig no tepetan tayoy sarili tayo: ‘No bilang ta nipaarap ak ed subok ya nalalanor lay mismon bilay ko, kasin ipalimak met so bilay ko ed si Jehova ta walay talek ko ya agto ak lingwanan?’

17-18. Anto ray naaralan tayo? (Nengnengen met so kahon ya “ No Anto ray Naaralan Tayo ed Saray Sampot ya Imbaga nen Jesus.”)

¹⁷ Dakel so importantin leksion ya naaralan tayod saray sampot ya imbaga nen Jesus! Naaralan tayo ya kaukolan tayon perdonaen so arum tan manmatalek tayo ya perdonaen itayo met nen Jehova. Baleg a pribilehyo ya kabiangan itayo na espiritual a pamilya ya akaparaan ya ontulong ed sikatayo. Balet no kaukolan tayoy tulong, agtayo komon nababaingan ya mangibaga. Segurado tayo ya tulongan itayo nen Jehova pian nasarag tayo so anggan anton subok. Tan naaralan tayo ya importantin isipen tayo kada agew ya aman la so sampot ya agew ya nipanengneng tayoy katooran tayo. No ontan so gawaen tayo, ipapalima tayo lay bilay tayod si Jehova ta matalek tayo ya agto tayon balot lingwanan.

¹⁸ Talagan makabkabaliksan iray imbaga nen Jesus nen manpapanabos la diad panamairapan ya poste. No iyaplika tayo iray naaralan tayo, uunoren tayo iyan imbaga nen Jehova: “Saya so Ana’ko. . . . Dengel kayod sikato.”—Mat. 17:5.