LONGO DIA 15
Malongo Tuajiya Guzula mu Mbimbi Jiazuelele Yesu mu Gisugishilo gia Monyo Wenji
“Yowu Mun’ami ngana guzumba, wana gungusuanguluisa muavula. Mutegelelenu.”—MAT. 17:5, NWT.
LUNGIMBO 17 “Je le veux”
NDAGA JIDI MU LONGO EDI *
1-2. Zuelela ndaga jiakalegewe gutuama egi Yesu afue.
YAKHALELE mu lusugu lua 14 Nisana lua givo 33 gia T.D. Yesu wakhadile wafundiwe gale nu wasophesewa gale nu wafuishiwa gale milonga mukunda nu gubola gunu muene akalegelego. Athu akhalele gumulela, gumubeta mangololo, gungima amukhokhele ha mutshi wa lamba. Amukhokhele misonso (misumadi) gu malu nu gu mago. Yakhalele lamba gudi muene ha guhuima nga ha guzuela. Uvi wakhalele naye guzuela handaga mbimbi jiene jiakhalele nu ndando yavula.
2 Tutadilenu mbimbi jiazuelele Yesu tangua akhalele wa gukhokhewa ha mutshi wa lamba gutuama egi afue nu malongo tuajiya guzula mu mbimbi jiene. Mu guzuela guko, tudi naye ‘gumutegelela.’—Mat. 17:5.
“TATA, ATOTESELE”
3. Athu atshi Yesu wakhalele muzuelela tangua azuelele egi: “Tata, atotesele”?
3 Itshi Yesu watshiginyile guzuela? Yesu wakombelele tangua gakhalele ha mutshi wa lamba egi: “Tata, atotesele.” Athu atshi Yesu wakhalele mutshigina egi Sh’enji a atotesele? Mbimbi jienji jiko jidi gutukuatesa ha gujiya athu ene. Wazuelele egi: “Ene ashigo mujiya ndaga adi mukalagala.” (Luka 23:33, 34, NWT) Yajiya gukhala egi Yesu wakhalele muzuelela masuta a enya Roma anyi amukhokhele gu mutshi wa lamba. Masuta ene akhalelego mujiya muabonga gula Yesu wakhalele nanyi. Yajiya nji gukhala egi, wakhalele muzuelela thundu ya athu inyi yakhalele mutoga egi amushiye, uvi gungima asendesele gusha gutshigina gudi muene. (Makal. 2:36-38) Yesu gakalegelego nga ndaga imoshi yabola inyi yakhalele mutoga egi ashiyiwe, uvi muene gavuilego khabu ha gutuna gutotesela athu anyi amumonesele lamba. (1 Phet. 2:23) Ha fundo dia guavuila khabu, muene watogele Yehowa ha guatotesela.
4. Longo ditshi wazula mu luholo Yesu wakhalele mutotesela mbalagaji jienji?
4 Malongo atshi tuajiya guzula mu mbimbi jia Yesu? Tudi naye gukhala hehi ha gutotesela athu ako gubola gifua muakhalele mutshita Yesu. (Kol. 3:13) Yajiya gukhale egi enya fami yetu adi gutuhagela umbalagaji handaga ashigo mukotelesa ndaga tuana gushila gutshigina nu luholo luetu lua gujinga. Ajiya gutumbila mambo, gutusegulula gutuama dia athu ako, ajiya gukalula mikanda yetu nga gukalagala ndaga yajiya gutubatela lamba mu muila. Ha fundo dia gubambela athu a luholo elu khabu mu mutshima, tuajiya gutoga Yehowa hagula a akuatese ha gutshigina giamatshidia. (Mat. 5:44, 45) Gila athu atukalegela ndaga mu luholo luabola, tangua diko yajiya gukhala lamba ha guatotesela. Uvi gila tudi mubamba khabu mukunda nu athu ene nu tushigo guatotesela, na tudi gudihana lamba esue hakhetu. Phangi mumoshi wa mukhetu udi muzuela egi: “Ngana jiya egi gutotesela athu gubola, ishigo mukotelesa egi ngana mona egi ndaga atshitshi jidi jiabonga nu ngana tshigina egi angukalegele ndaga mu luholo luabola. Ngana guatotesela handaga ngana tshigina ndo guabambela khabu.” (Ngi. 37:8) Tangua tuana zula desizio dia gutotesela aphangi, tuana bembago egi ndaga jiabola atukalegele jitutume ha guavila khabu.—Ef. 4:31, 32.
“MBAWUKHALA NU AME MU PHALADISO”
5. Itshi Yesu walayele nzangi yakhalele ha mutshi wa lamba hehi nu muene nu mukunda natshi?
5 Itshi Yesu atshiginyile guzuela? Nzangi mbadi jiakhalele jia gukhokhewa ha mutshi wa lamba hehi nu Yesu. Thomo muyadi awo tshima akhalele gumulela. (Mat. 27:44) Uvi, gungima mumoshi wasombegesele matangi enji. Wakotelesele egi Yesu gakalegelego ‘nga ndaga imoshi yabola.’ (Luka 23:40, 41) Ndaga ya ndando idi egi, muthu muene washile gutshigina egi Yesu mbawufuzumuga mu gufua nu gudi nu lusugu mbagabua Fumu. Hene wawambelele Yesu gamba: ‘Ngutangize tangua mbawuza mu Ufumu waye.’ (Luka 23:42) Muthu owu wamonesele diago gutshigina! Yesu wamuwambelele egi: “Giamatshidia ngudi guguwambela mangino egi mbawukhala nu ame [ishigo mu Ufumu wami uvi] mu Phaladiso.” (Luka 23:43) Yesu wakalegelele mbimbi “ame” “aye,” ha gumonesa egi wakhalele muhana laji diene gudi muthu mumoshi. Yesu wahanele muthu owu wakhalele nzangi felela handaga wajiyile egi Yehowa udi wazala pha nu khenda.—Ngi. 103:8.
6. Longo ditshi tuajiya guzula mu mbimbi jinyi Yesu wawambelele nzangi?
6 Malongo atshi tuajiya guzula mu mbimbi jia Yesu? Yesu udi gifua Sh’enji. (Heb. 1:3) Yehowa wana khala hehi ha gututotesela gubola, wana gutuvuila nji khenda gila tuadisagesa mukunda nu gubola tuakalegele nu gula tudi musha gutshigina egi gubola guetu mbagutotesewa mu njila ya mahatshi a Yesu Klisto. (1 Yone 1:7) Athu ako ajiya gumona egi idi lamba hagula Yehowa a atotesele gubola akalegele mualeha. Gila matangua ako aye nji wana tangiza ngenyi, ujimbilago ndaga eyi: Tangua diazonda gutuama egi Yesu afue, wavuidile nzangi yakhalele ha mutshi wa lamba khenda, yonu wasendesele gusha gutshigina. Yehowa wana vuila akombeledi enji agujinginyina khenda jiavula, anyi ana tshita ngolo ha gutumagela mikhuala yenji.—Ngi. 51:1; 1 Yone 2:1, 2.
‘TALA! MUN’AYE MUENY’OWU! . . . TALA! GIN’AYE MUENY’OWU!’
7. Ha gutadila Yone 19:26, 27, a) ndaga tshi Yesu wawambelele Madiya nu Yone? b) mukunda natshi wazuelele ngenyi?
7 Itshi Yesu watshiginyile guzuela? (Tanga Yone 19:26, 27.) Yesu wakhalele gudisagesa mukunda nu mama wenji wa mukhetu wa gafunda. Aphangi enji akhalele mukuatesa mama wenji nu ima ya gujingila. Uvi nanyi wakhalele naye gumukuatesa ha gulandula gukhala nu gutshigina guakola gudi Yehowa? Gushigo nga ndaga imoshi idi mumonesa egi mu tangua diene aphangi’enji akhalele alandudi. Uvi, Yone wakhalele mupostolo wagujinginyina, wakhalele nji futa diakola dia Yesu. Yesu wakhalele mutadila athu akhalele mukombelela n’enji Yehowa hamoshi gifua fami yenji ya mu nyuma. (Mat. 12:46-50) Yesu wakhalele muzumba Madiya, wakhalele gudisagesa mukunda nu muene. Gishina giene washile mutshima egi Yone mbawukuatesa Madiya ha gulandula gukombelela Yehowa. Yesu wawambelele mama wenji egi: “Tala! Mun’aye mueny’owu!” Wawambelele Yone egi: “Tala! Gin’aye mueny’owu!” Sendese lusugu luene Yone wabuile gifua muna Madiya, Yone wakhalele gumukuatesa diago gifua gin’enji. Yesu wakhalele diago muzumba mukhetu wakhalele gumukalegela ndaga nu guzumba tangua diavualewe muene nu wakhalele ya gumagana hehi nenji tangua akhalele mutshigina gumushiya!
8. Malongo atshi tuajiya guzula mu mbimbi Yesu wawambelele Madiya nu Yone?
8 Malongo atshi tuajiya guzula mu mbimbi jia Yesu? Ufuta wetu nu aphangi’etu a mala nu a akhetu wajiya gukhala wakola gubalega ufuta tuana khala nawo nu enya fami yetu. Enya fami yetu ajiya gutuhagela umbalagaji nga gututuna, uvi Yesu watulayele egi gila tudi hehi nu Yehowa nu ulondegi wenji, mbatuheta ima “mahugo gubalega 100” gubalega inyi tuatotesele. Avula mbaabua gifua an’etu a mala nu a akhetu, mama nga tata tuana zumba muavula. (Mako 10:29, 30) Wana gudivua gikhuatshi luholo wana khala mukatshi dia aphangi a mala nu a akhetu ana jinga hamoshi, handaga ana khala nu gutshigina nu ana zumba Yehowa nu athu ako?—Kol. 3:14; 1 Phet. 2:17.
“NZAMBI WAMI, MUKUNDA NATSHI WANGUBEMBA?”
9. Mbimbi jia zuelele Yesu jidi mu Matayo 27:46 jidi gutulongesa itshi?
9 Itshi Yesu atshiginyile guzuela? Tangua diazonda gutuama egi afue, Yesu wakalugile egi: “Nzambi wami, Nzambi wami, mukunda natshi wangubemba?” (Mat. 27:46) Biblia yana kotelesago mukunda natshi Yesu wazuelele ngenyi. Uvi tutadilenu malongo tuajiya guzula mu mbimbi jiene. Thomo yajiya gukhala egi Yesu wazulele mbimbi eji ha gutagenesa profesi idi mu Ngimbo 22:1. * Luko, mbimbi jiene jiamonesele diago haphelo egi Yehowa washilego ‘luphango ha gubamba’ Mun’enji. (Yobo 1:10) Yesu wakotelesele egi Sh’enji wabembele egi mbalagaji jienji jilole gutshigina guenji uu nu gu gufua. Gushigo nga muthu walolewe gale gifua mualolewe Yesu. Mbimbi jiazuelele Yesu jiamonesele nji egi muene gakalegelego nga gubola gumoshi hagula wajiya gushiyiwa.
10. Longo ditshi tuajiya guzula mu mbimbi jia Yesu gudi Sh’enji?
10 Malongo atshi tuajiya guzula mu mbimbi jia Yesu? Longo tuajiya guzula didi egi tuajiyilego gudifelela egi Yehowa mbawutubamba mu ndaga jiagasue jiajiya gulola gutshigina guetu. Gifua luholo Yesu walolewe, esue nji tudi naye gudilonda ha gusala agujinginyina uu nu gu gufua gula tualolewa. (Mat. 16:24, 25) Uvi, tudi naye gusha mutshima egi Nzambi mbaashigo gutubemba egi tulolewe mu ndaga tuajiyilego gukolesela. (1 Kol. 10:13) Longo diko tuajiya guzula didi egi esue nji tuajiya gumonesewa lamba gifua Yesu ikhale tuakalegelego ndaga yabola. (1 Phet. 2:19, 20) Mbalagaji jietu jiana gutumonesa lamba handaga tuana gulongesa giamatshidia nu tushigo enya ha mavu awa. (Yone 17:14; 1 Phet. 4:15, 16) Yesu wakotelesele gishina Yehowa wamubembele egi amone lamba. Matangua ako, akombeledi agujinginyina anyi adi mutagana nu malamba ajiya nji gudihula mukunda natshi Yehowa wabemba egi malamba a abuile. (Hab. 1:3) Uvi Nzambi wetu wa khenda nu waguhuiminyina wana jiya kiawaha egi athu enji awa adi nu gutshigina uvi muila waalebi. Adi nu funu ya gikhesa nu guwalagana gunu phamba muene wajiya guahana nago.—2 Kol. 1:3, 4.
“NGUDI MUVUA LUHUNGU”
11. Mukunda natshi Yesu azuelele mbimbi jidi mu Yone 19:28?
11 Itshi Yesu atshiginyile guzuela? (Tanga Yone 19:28, NWT.) Mukunda natshi Yesu azuelele egi: “Ngudi muvua luhungu”? Wazuelele ngenyi ‘ha gutaganesa ndaga jiagasue jiasonegewe mu mukanda wa Nzambi’—jinyi jidi mu profesi idi mu Ngimbo 22:15, idi muzuela egi: ‘Ngolo jiami jianguhua gifua gima gialondewa nu mavu a huma; ludimi luami luadikuatesa nu misunyi ya mazo ami.’ Yesu wakhadile naye guvua luhungu (phuila) handaga wamonesewe lamba diavula uu nu ha mutshi wa lamba. Wakhalele nu funu ya meya ha gumanesa luhungu luenji.
12. Longo ditshi tuajiya guzula mu mbimbi jiazuelele Yesu egi “Ngudi muvua luhungu”?
12 Malongo atshi tuajiya guzula mu mbimbi jia Yesu? Yesu akhadilego mutangiza egi guzuela luholo akhadile gudivua gudi ndaga yabola. Esue nji tudi naye gulandula gifezegeselo gienji. Matangua avula, tuajiya gutangiza egi idi ndaga yabola ha guwambela athu ako ndaga tudi najio funu. Uvi gula tudi mutshigina guheta ukuateshi, tudi naye gutoga athu ako ha gutukuatesa. Ha gufezegesa, gila udi muthu wa gukola nga ndo udi nu makhashi mu muila, wajiya gutoga futa diaye ha gugukuatesa ha gugusumbila ima nga ha gugutuala ha gudimona nu minganga. Gula muila wa guleba nga ndo udi nu gikenene, wajiya gutoga mukulu nga futa diaye wa Muklisto wa gukula mu nyuma ha gugutegelela nga ha guguwambela “mbimbi jiabonga” jiajiya guguhana ngolo. (Ish. 12:25) Tujimbilago egi aphangi etu a mala nu a akhetu ana gutuzumba muavula nu ana tshigina gutukuatesa mu ‘matangua a lamba.’ (Ish. 17:17) Uvi aphangi ene anago gujiya matangi etu nga luholo tudi gudivua. Gishina giene ajiyilego gutukuatesa gula tuawambelelego luholo tudi gudivua.
“YATAGENESEWA!”
13. Ndaga jitshi Yesu ataganesele luholo asalele wagujinginyina uu nu gu gufua?
13 Itshi Yesu atshiginyile guzuela? Hataganele kumbi dia thathu gungima dia midi mu lusugu lua 14 Nisana, Yesu wazuelele mu mbimbi yakola egi: “Yatagenesewa!” (Yone 19:30, NWT) Mbimbi eyi ya Yesu idi gutulongesa egi gutuama egi afue, Yesu wajiyile egi wataganesele ndaga jiagasue jia mutogele Yehowa. Luholo Yesu asalele wagujinginyina uu nu gu gufua, wataganesele ndaga jiavula. Thomo, wamonesele egi Satana muenya mambo. Yesu wamonesele egi muthu watagana wajiya gusala wagujinginyina ikhale walolewa genji gudi Satana mu maluholo agasue. Ya mbadi, Yesu wahanele monyo wenji gifua gibawu. Luholo ahanele monyo wenji gifua mulambu, yakuatesele athu ashigo atagana ha gukuata ufuta nu Nzambi nu ha guheta felela dia monyo wa ivo nu ivo. Ya thathu, Yesu wamonesele lume egi Yehowa udi mutuameji watagana nu wawevele jina dia Tata wenji.
14. Desizio ditshi tudi naye guzula lusugu nu lusugu? Mukunda natshi?
14 Malongo atshi tuajiya guzula mu mbimbi jia Yesu? Tudi naye guzula desizio dia gusala agujinginyina lusugu nu lusugu. Tutadile gale ndaga jiazuelele Phangi Maxwell Friend, wakhalele mulongeshi gu Khalasa dia Gileade. Gu assemblée internationale amoshi, Phangi Friend wakalegele diskur diakhalele muzuelela gujinginyina. Wazuelele egi: “Mutangizago egi mbamuzuela nga ndo mbamutshita hamene ndaga muajiya guzuela nga gukalagala mangino. Mudi mutangiza egi mbamukhala guene hamene ba? Khalenu mujinga lusugu luagasue gifua luene lusugu lua gisugishilo muajiya gumonesa gujinginyina guenu ha guheta monyo wa ivo nu ivo.” Tulandulenu gujinga lusugu luagasue gifua luene luasuga lua monyo wetu tudi naye gumonesa gujinginyina guetu! Ngenyi, ikhale tuatagana nu gufua, tuajiya guzuela nu gikhesa giagasue egi: “Yehowa, ngakalagala yagasue ha gusala wagunginyina, ha gumonesa egi Satana udi muenya mambo, ha guwevua jina diaye nu ha gutumbuisa uhinyinyi waye!”
“NGABEMBA NYUMA YAMI HA MAGO AYE”
15. Ha gutadila Luka 23:46, ndaga jitshi Yesu wakhadile mujiya?
15 Itshi Yesu atshiginyile guzuela? (Tanga Luka 23:46, NWT.) Yesu washile mutshima wenji wagasue gudi Sh’enji, hene wazuelele egi: “Tata, ngabemba nyuma yami ha mago aye.” Yesu wakhalele mujiya egi monyo wenji wa mu masugu adi muza wakhalele ha mago a Yehowa. Washile nji mutshima egi Tata wenji mbaashigo gumubuita mutshima.
16. Longo ditshi tuajiya guzula mu ndaga yabuidile Temue wa Yehowa wa ivo 15?
16 Malongo atshi tuajiya guzula mu mbimbi jia Yesu? Khala muhaga monyo waye ha mago a Yehowa. Ha gutshita ngenyi, udi naye ‘gusha mutshima waye wagasue gudi Yehowa.’ (Ish. 3:5) Tutadilenu gifezegeselo gia Joshua, Temue wa Yehowa wa ivo 15 wakhadile mukata misongo ya gufua. Watunyile gusagewa mu luholo luakhalelego munemesa mikhuala ya Nzambi. Matangua azonda gutuama dia gufua guenji, wawambelele mama wenji egi: “Mama, Ngudi ha mago a Yehowa. . . . Ngudi guguwambela nu gutshigina guagasue egi: Ngudi mujiya egi Yehowa mbawungufuzumuna. Wana tala mu mutshima wami, ngana gumuzumba nji muavula.” * Muthu wagasue mukatshi dietu wajiya gudihula egi: ‘Mbangusala wangujinginyina gudi Yehowa gula ndaga imoshi yajiya gungubatela gufua yangubuila ba? Mbangusha diago monyo ha mago a Yehowa nu gutshigina guagasue egi muene mbaashigo gungubuita mutshima ba?’
17-18. Malongo atshi tuazula? (Tala galuanda “ Malongo Tuazula mu Mbimbi Jiazuelele Yesu mu Gisugishilo gia Monyo Wenji.”)
17 Tuajiya guzula malongo mu mbimbi jia gisugishilo jiazuelele Yesu! Mbimbi jiene jidi gutuwunguluisa (gutuyabuluisa) egi tudi naye gutotesela athu ako gubola guawo, tudi naye nji gusha mutshima egi Yehowa mbawututotesela. Tuana khala nu luendu lua gukhala nu aphangi avula a mala nu a akhetu anyi ana khala hehi ha gutukuatesa. Uvi gula tudi nu funu ya ukuateshi, tudi naye guatoga ha gutukuatesa. Tudi mujiya egi Yehowa mbawutukuatesa ha gukolesela mu malamba agasue tuajiya gutagana nawo. Luko, tudi mumona ndando ya gujinga lusugu luagasue gifua luene luasuga tudi naye gumonesa gujinginyina guetu gudi Yehowa nu ha gusha mutshima egi monyo wetu udi ha mago enji.
18 Yadiago, mbimbi jia gisugishilo jiazuelele Yesu gutuama dia gufua ha mutshi wa lamba, jidi gutulongesa ndaga jiavula! Gula tuakagelela malongo tuazula mu longo edi, mbatutumagela mbimbi jiazuelele Yehowa mukunda nu Mun’enji egi: “Mutegelelenu.”—Mat. 17:5.
LUNGIMBO 126 “Reste éveillé, tiens ferme, deviens fort”
^ par. 5 Gifua luholo mukanda wa Matayo 17:5 udi guyimonesa, Yehowa wana tshigina egi tukhale mutegelela Mun’enji. Mu longo edi tuza muzuelela malongo tuajiya guzula mu mbimbi jia gisugishilo jiazuelele Yesu hakhalele muene wagukhokhewa gu mutshi wa lamba gutuama egi afue.
^ par. 9 Ha gujiya mukunda natshi Yesu wazuelele mbimbi jidi mu Ngimbo 22:1, tala “Mihu Yana Guhula Athu Ana Gutanga Mikanda Yetu” mu zulunalu eyi.
^ par. 16 Tala longo “La foi de Joshua: une victoire pour les droits de l’enfant” didi mu Réveillez-vous! ya Français ya 22 Janvier 1995.
