1-2. Wanem nao happen lo Jesus bifor hem talem lastfala toktok blo hem?

JESUS hem dae lo Nisan 14, 33 C.E. Bifor datwan, olketa bigman blo Jew kotem hem and nomata hem no duim eni rong samting olketa sei hem guilty. Staka barava tok spoelem and treatim hem nogud. Olketa nilam leg and hand blo Jesus lo post for killim hem dae. Bigfala pain wea hem kasem mekem hem no isi for toktok. Nomata olsem, hem garem samfala important samting for talem.

² Bae iumi storyim lastfala toktok blo Jesus and wanem iumi lanem from datwan. Hem important for iumi “mas herem samting wea hem talem.”—Matt. 17:5.

3. Maet hu nao Jesus storyim taem hem sei: “Dadi, forgivim olketa”?

³ Hu nao Jesus hem storyim? Taem olketa nilam Jesus lo post, hem prea olsem: “Dadi, forgivim olketa.” Hu nao Jesus laekem Jehovah for forgivim? Wanem Jesus talem bihaen datfala toktok helpem iumi for savve. Hem sei: “Olketa no savve long wanem olketa duim.” (Luke 23:33, 34) Maet Jesus laekem Jehovah for forgivim olketa soldia blo Rome wea nilam leg and hand blo hem lo post. Olketa no savve hem Son blo God. Maet Jesus storyim tu samfala pipol wea laekem hem for mas dae bat bihaen hem dae olketa showimaot faith lo hem. (Acts 2:36-38) Nomata pipol hia barava treatim hem nogud, hem no kros and feel nogud lo olketa. (1 Pet. 2:23) Bat hem  askem Jehovah for forgivim olketa wea bae killim hem dae.

4. Wanem nao iumi lanem from Jesus wea willing for forgivim olketa wea againstim hem?

⁴ Wanem nao iumi savve lanem from toktok blo Jesus? Iumi laek followim example blo Jesus wea willing for forgivim narawan. (Col. 3:13) Maet olketa relative and samfala narawan againstim iumi bikos olketa no agree witim wanem iumi bilivim. So maet olketa talem samting wea no tru abaotem iumi, mek shame lo iumi, brekem olketa pablikeson blo iumi, or sei olketa laek for killim iumi. Iumi no laek for gohed feel nogud lo olketa, bat iumi shud askem Jehovah for helpem olketa luksavve lo truth. (Matt. 5:44, 45) Nomata olsem, samfala taem hem no isi for forgivim olketa, especially sapos olketa duim barava nogud samting lo iumi. Bat sapos iumi gohed for feel nogud and no forgivim olketa bae iumi no hapi. Wanfala sista sei: “Mi luksavve taem mi forgivim narawan hem no minim mi tingse hem olraet for hem treatim mi nogud. Bat hem minim mi no laek for gohed feel nogud lo hem.” (Sams 37:8) Taem iumi forgivim narawan hem minim iumi disaed for no gohed feel nogud lo hem.—Eph. 4:31, 32.

5. Wanem nao Jesus promisim lo wanfala criminal, and why nao Jesus mekem datfala promis?

⁵ Wanem nao Jesus hem minim? Olketa nilam lo post wanfala criminal lo left saed blo Jesus and narawan lo raet saed. Firstaem, tufala evriwan tok spoelem Jesus. (Matt. 27:44) Bat then, wanfala stop for duim datwan bikos hem luksavve Jesus nating duim “eni nogud samting.” (Luke 23:40, 41) Wanem man hia talem showimaot hem bilivim Jesus bae laef bak and bae kamap king. Hem sei: “Jesus, plis, iu tingim mi taem iu King.” (Luke 23:42) Datwan showimaot hem garem strongfala faith! Jesus sei lo hem: “Mi talem iu tru samting, Iu bae stap witim mi [no lo Kingdom, bat] long Paradaes.” (Luke 23:43) So Jesus mekem promis witim datfala man. Jesus savve Dadi blo hem laek showim mercy lo pipol, dastawe hem talem datfala toktok wea givim hope for criminal hia.—Sams 103:8.

6. Wanem nao iumi savve lanem from samting wea Jesus talem lo wanfala criminal?

⁶ Wanem nao iumi savve lanem from toktok blo Jesus? Jesus garem sem wei olsem Dadi blo hem. (Heb. 1:3) Jehovah willing for forgivim and showim mercy lo pipol. Bat hem savve duim datwan nomoa sapos man hem repent from olketa sin wea hem duim bifor, and sapos hem garem faith lo ransom sakrifaes blo Jesus Christ. (1 John 1:7) Bat maet iu tingse hem hard for Jehovah forgivim iu for olketa nogud samting wea iu duim bifor. Sapos olsem, hem gud for tingim diswan: Taem Jesus hange lo post, hem showim mercy lo datfala criminal wea just start for showimaot faith lo hem. So iumi sure Jehovah bae showim mercy lo pipol blo hem wea waka hard for duim wanem hem laekem!—Sams 51:1; 1 John 2:1, 2.

7. Lo John 19:26, 27, wanem nao Jesus talem lo Mary and John, and why nao hem talem datwan?

⁷ Wanem nao Jesus hem minim? (Readim John 19:26, 27.) Jesus tingim mami blo hem, wea luk olsem hem widow.  Olketa brata and sista blo Jesus savve provaedem wanem Mary needim, bat lo datfala taem olketa brata blo Jesus no kamap disaepol yet. So Jesus markem John, wanfala aposol and gudfala fren blo hem, for encouragem Mary lo spiritual saed. Jesus tingim olketa wea worshipim Jehovah nao spiritual famili blo hem. (Matt. 12:46-50) Jesus lovem and tingim Mary, dastawe hem sei lo John olsem abaotem mami blo hem: “Man hia bae hem son bilong iu!” And hem sei lo John: “Woman hia bae hem mami bilong iu!” Start lo datfala taem, John kamap olsem son blo Mary and lukaftarem Mary olsem mami blo hem.  Wanem Jesus duim showimaot hem lovem mami blo hem from Mary lukaftarem Jesus start kam taem hem born, and hem no lusim Jesus taem hem klosap for dae.

8. Wanem nao iumi savve lanem from samting wea Jesus talem lo Mary and John?

⁸ Wanem nao iumi savve lanem from toktok blo Jesus? Maet iumi lovem olketa Christian brata and sista winim samfala lo famili. Samfala lo famili savve againstim or lusim iumi, bat Jesus sei sapos iumi fren gud witim Jehovah and stap insaed organization blo Hem, bae iumi kasem big spiritual famili. Olketa hia bae kamap olsem son, dota, mami, or dadi. (Mark 10:29, 30) Iumi hapi for insaed wanfala spiritual famili wea lovem Jehovah and lovem each other, iaman?—Col. 3:14; 1 Pet. 2:17.

9. Wanem nao iumi lanem from toktok blo Jesus lo Matthew 27:46?

⁹ Wanem nao Jesus hem minim? Taem Jesus klosap for dae, hem talem datfala toktok: “God bilong mi, God bilong mi, why nao iu lusim mi?” (Matt. 27:46) Bible no explainim why Jesus talem datwan, bat wanem nao iumi savve lanem from toktok hia? Wanem Jesus talem hem mekem profesi lo Sams 22:1 * for kamap tru. And tu, toktok hia mekem iumi luksavve Jehovah no stopem Son blo hem for dae. (Job 1:10) Jesus luksavve Dadi blo hem no stopem olketa enemy for testim faith blo hem gogo olketa killim hem dae. Nara samting, toktok blo Jesus showimaot olketa killim hem dae for rong wea hem no duim.

10. Wanem nao iumi lanem from samting wea Jesus talem lo Dadi blo hem?

¹⁰ Wanem nao iumi savve lanem from toktok blo Jesus? Wanfala samting iumi lanem nao, iumi shud no expectim Jehovah for stopem olketa test for kasem iumi. Olsem Jesus pruvim hem faithful go kasem taem hem dae, maet iumi tu need for duim datwan. (Matt. 16:24, 25) Bat iumi sure God bae no letem iumi kasem eni test wea iumi no fit for winim. (1 Cor. 10:13) Nara samting iumi lanem hem hao samfala maet persecutim iumi. (1 Pet. 2:19, 20) Nomata iumi no duim rong samting, olketa againstim iumi from iumi no olsem pipol lo world and from iumi preach abaotem olketa tru samting. (John 17:14; 1 Pet. 4:15, 16) Jesus minim why Jehovah letem hem for safa. Bat samfala brata and sista wea kasem test kwestinim why Jehovah letem datwan for happen. (Habakuk 1:3) From Jehovah minim iumi, hem luksavve datkaen kwestin no minim olketa lusim faith blo olketa, bat olketa needim hem for kaen and sorre lo olketa.—2 Cor. 1:3, 4.

11. Why nao Jesus talem toktok lo John 19:28?

¹¹ Wanem nao Jesus hem minim? (Readim John 19:28.) Why nao Jesus talem datfala toktok: “Mi laek drink”? Hem duim datwan for mekem profesi lo Sams 22:15 for “kamap tru.” Datfala scripture sei: “Strong blong mi hemi finis nao, an tang blong mi hemi drae an hemi pas finis insaet long maos blong  mi.” For full day Jesus deal witim staka nogud samting, and hem kasem bigfala pain from hem hange lo post. Masbi bihaen evri samting hia hem barava laek for drink wata.

12. Wanem nao iumi savve lanem from datfala toktok blo Jesus, “mi laek drink”?

¹² Wanem nao iumi savve lanem from toktok blo Jesus? Jesus no shame for talem narawan wanem hem needim, so iumi shud duim olsem tu. Samfala maet shame for askem narawan for samting wea olketa needim. Bat sapos iumi needim help, iumi shud no hol bak for askem narawan. For example, sapos iumi olo, maet iumi askem help from samwan for go baem kam samting lo market for iumi. Or sapos iumi sik, iumi savve askem narawan for go witim iumi lo clinic. Sapos samting mekem iumi for wari tumas, hem gud for storyim datwan lo elder or nara mature Christian wea hapi for lisin lo iumi and talem “gud toktok” wea savve encouragem iumi. (Provebs 12:25) Olketa brata and sista lovem iumi and laek for helpem iumi taem iumi kasem hard taem. (Provebs 17:17) Bat olketa no savve wanem iumi needim or warim sapos iumi no talem lo olketa.

13. Wanem thrifala samting nao kamaot from Jesus faithful go kasem taem hem dae?

¹³ Wanem nao Jesus hem minim? Lo samting olsem 3 klok lo aftanun blo Nisan 14, Jesus sei lo Jehovah: “Mi duim finis evri samting wea iu askem mi for duim!” (John 19:30) Datwan showimaot Jesus sure hem duim finis evri samting wea Jehovah laekem hem for duim. Thrifala samting kamaot from Jesus faithful go kasem taem hem dae. First samting, Jesus pruvim Satan hem man for laea. Hem showimaot man wea perfect savve gohed faithful nomata Satan duim staka nogud samting lo hem. Mek-tu samting, from Jesus dae hem baem bak iumi olketa man. So datwan mekem iumi fit for fren witim God and for garem hope for laef olowe. Mek-thri samting, Jesus mekhae lo nem blo Jehovah and pruvim Jehovah nomoa hem fit for rul.

14. Wanem nao iumi lanem from toktok blo Jesus? Explainim datwan.

¹⁴ Wanem nao iumi savve lanem from toktok blo Jesus? Iumi laek for gohed faithful lo Jehovah. Brata Maxwell Friend, hem wanfala instructor blo Gilead Skul bifor. Lo wanfala international convention hem givim tok abaotem hao for gohed faithful. Hem sei: “No weitim tumoro for talem or duim samting wea iu fit for duim tuday. Maet iumi no laef tumoro, so evriday gohed faithful mekem iumi fit for kasem laef olowe.” Sapos iumi duim datwan, Jehovah bae luksavve iumi faithful go kasem taem iumi dae, iumi pruvim Satan hem man for laea, and iumi mekhae lo nem blo Jehovah and raet blo hem for rul.

15. Olsem Luke 23:46 storyim, wanem nao Jesus sure lo hem?

¹⁵ Wanem nao Jesus hem minim? (Readim Luke 23:46.) Taem Jesus talem datfala toktok, “Dadi, mi putim laef bilong mi long hand bilong iu,” hem  luksavve hem mas depend lo Jehovah for resurrectim hem, and hem sure Jehovah bae duim datwan.

16. Wanem nao iumi lanem from example blo wanfala young brata?

¹⁶ Wanem nao iumi savve lanem from toktok blo Jesus? Iumi mas willing for putim laef blo iumi lo hand blo Jehovah. Datwan showimaot iumi ‘trastem Jehovah long ful haat blong yumi.” (Provebs 3:5) Tingim example blo Joshua, wanfala young brata wea 15 years nomoa. Hem sik tumas bat hem no acceptim medical treatment wea no followim wanem Jehovah laekem. Taem hem klosap for dae, hem sei lo mami blo hem: “Mami, laef blo mi lo hand blo Jehovah. . . . And mami, mi sure Jehovah bae resurrectim mi lo niu world. Jehovah hem savve lo mi and hem savve mi lovem hem.” * Hem gud for iumi tingim diswan: ‘Sapos mi mas dae bikos lo faith blo mi, waswe, bae mi trustim Jehovah for resurrectim mi?’

17-18. Wanem nao iumi lanem from lastfala toktok blo Jesus? (Lukim box “ Wanem Iumi Lanem From Lastfala Toktok blo Jesus.”)

¹⁷ Iumi lanem staka samting from lastfala toktok blo Jesus! Iumi shud forgivim olketa narawan and iumi sure Jehovah bae forgivim iumi tu. Iumi garem olketa brata and sista lo kongregeson wea laek helpem iumi, bat iumi mas no hol bak for askem olketa. Iumi savve Jehovah bae helpem iumi for no givap lo eni hard taem wea kasem iumi. Iumi laek gohed faithful nomata iumi mas dae bikos lo faith blo iumi, and iumi sure Jehovah bae resurrectim iumi.

¹⁸ Lastfala toktok blo Jesus taem hem hange lo post and hem klosap for dae barava encouragem iumi! Taem iumi followim olketa samting wea iumi lanem, iumi obeyim Jehovah wea sei olsem abaotem Son blo hem: “Iufala mas herem samting wea hem talem.”—Matt. 17:5.