1, 2. Jesús imata wilacamunanpäga caycashgarämi, ¿ima nacaypa pasaycartaj chayta wilacamun?

33 WATA, nisán quillapa 14 junajnin cargan, chaychomi alapa chiquicoj runacuna Jesusta lutanpa acusapäcurgan, burlacärirgan y juc gueruta sharcarcachir chaycho clavapäcurgan. Maquincuna chaquincuna clavaraycaptinga pasaypa nanaywanrächi parlarinpis, y upälala cacunanpaj trucanga ima wilacunanpäga caycanrämi.

² Yachacurishun guerucho warcuraycaptin Jesús ima nishganpita, mä imatash tantiarcunchi (Mat. 17:5).

3. ¿Pïcunapätaj Taytanta Jesús ruwacurgan perdunaycunanpaj?

³ Jesús imata nishgan. Gueruchona Jesús clavaraycaptin Papäninta ruwacurgan: “Kay runakunata perdonaykulay” nir. Jina caytapis Jesús nirgan: “Manami musyapäkuntsu imata ruraykashqantapis”. ¿Pï runacunapätaj Jesús parlaycargan? (Luc. 23:33, 34). Ichanga paycunaga cargan Jesusman ichiclapis mana yaracoj Roma soldaducuna. Ichanga ‘¡wanuchun wanuchun!’ nejcunapis carganchi, chayno carga tiempuwanga cristianumanpis ticrapäcurganchi paycunaga (Hech. 2:36-38). Imayca nacaycunapa pasarpis, chiquicojnincunapa nawpancho caycarpis, Jesuspa shongulanga manami chucrucäcurirganchu ni pitapis jagayarganchu (1 Ped. 2:23). Chaypa trucanga Taytantami ruwacurgan wanuchicojcunapa juchanta perdunar gongaycunanpaj.

4. Jesús perdunaycurganmi wanuchicojnincunatapis, ¿imatataj chaypita yachacunchi?

 ⁴ ¿Imatataj yachacunchi? Jesús perdunashgannola noganchicunapis waquincunata perdunashwan (Col. 3:13). Runacunaga o quiquin castanchipis, Diosta imanir sirvishganchipita mana shumaj tantiarmi imatapis nimashwan. Lutantapis noganchicunapita parlapäcunmanmi, ‘upami capäcunqui’ nirpis parlapäcunmanmi, publicaciunninchicunatapis rachicachärinmanmi y wanunanchitapis munapäcunmanmi. Paycunata jagayänapaj trucanga Taytalanchi Jehovata ruwacushwan shongunta cuyurcachinanpaj, imaylapis paycunaga Diosta sirvipäcunmanmi (Mat. 5:44, 45). Pipa culpanraycur alapa nacarga öraga sasa canman payta perdunaycunapaj. Mana perdunacoj carga y rabiashgala cacurga shongunchipis chucrucäcunmanmi y chayga mana alimanpis chayachimashwanmi. Juc pani cayno nin: “Pitapis perdunaptinchiga manami niycanchichu juchayoj cajta ‘alitami ruraycamashcanqui’. Perdunacoj carga, umanchipitami jorguycanchi ima mana alicunata ruramashganchita gongaycunapaj” (Sal. 37:8). Chaymi pitapis perdunarga, mana piñacuypa cushi cushilami cawacushun (Efes. 4:31, 32).

5. ¿Imatataj Jesús awnipargan laduncho caycaj jucnin caj suwacojta y imanirtaj chayta awnipargan?

⁵ Jesús imata nishgan. Jesuspa ladunchoga ishcay suwacojcunapis clavaraycarganmi, nawpachoga paycunapis ashliycarganmi (Mat. 27:44). Chaypitana jucnin caj upälacurgan, tantiarirganmi clavashga cananpaj Jesús juchayoj mana cashganta (Luc. 23:40, 41). Jina tantiarirganmi Jesús yapay cawarimunanpaj y tiempuwanga Reyman ticrananpaj, chaymi cayno Jesusta nirgan: “Mandayta qalaykurqa noqata yarparkalämanki, tayta” (Luc. 23:42). Chaychomi shumaj chay runapa yaracuynin ricacämurgan, chaymi payta Jesús cayno nirirgan: “Paraísuchömi noqawan kankipaq”; cay Pachacho chay runa cawananpämi Jesús parlaycargan (Luc. 23:43). ‘Nogawanmi canquipaj’ nirga Jesusga ali wilapaytami wilapaycargan chay runata. Tayta Jehovapis cuyapäcoj y perdunacoj cashpan, mayna chay runata awnipaycargan cay Pachacho cawananpaj (Sal. 103:8).

6. ¿Imatataj yachacunchi juc suwacojta Jesús ima nishganpita?

⁶ ¿Imatataj yachacunchi? Jesusga imaypis Taytan cashgannola cashga, Taytan rurashgannola rurashga (Heb. 1:3). Jehovaga alapa cuyapämashpanchimi perdunamäshun imayca mana alicunata rurashganchipita, shongupita arrepenticuptinchi y Jesús wanushganman yaracuptinchipis (1 Juan 1:7). Öraga nishwan ‘Jehová perdunamashgachuraj rurashgäcunata o manachuraj’, chayno cashpanga yarpachacushun, imano Jesús perdunashganta laduncho caycaj suwacojta, payga chaylarächi Jesusman yaracuycargan. Chayno juc suwacojta Jesús perdunashga carga, ¿imanirtaj Jehovaga noganchita mana perdunamäshunchu, payta lapan shongunchiwan sirviycarga? (Sal. 51:1; 1 Juan 2:1, 2).

7. Juan 19:26, 27 textucuna wilacushganno, ¿imatataj Jesús nirgan Mariatawan Juantapis, y imanir?

⁷ Jesús imata nishgan (leiriy Juan 19:26, 27). Jesusga alapa yarpachacuycargan mamäninpaj, chay wichanpäga Mariapa runan  mananachi cawaycargannachu. Jesusga nirganchi ‘wawguïcunami mamänïtaga imalantapis goycunga’; chayno captinpis masla yarpachacuycargan mamänin Diosta mana jaguinanpaj y pï chaycho yanapänanpaj. Juanga Diosta aduraj y Jesuspa cuyashgan amigo cargan, y lapan Diosta adurajcunami Jesuspa familian cargan (Mat. 12:46-50). Awmi, mamäninpaj yarpachacur y payta alapa cuyashpanmi Juanta ruwacurgan yanapänanpaj, chaymi mamäninta ricarcur Jesús cayno nirgan: “Paymi canga wawayqui” y Juanta ricaycurna cayno nirgan: “Paymi canga mamayqui”. Chay wichanpitanami Juanga mamäninta täpargan y Mariapis wamrantano payta ricargan. Chayno Jesús  rurashganchomi ricacämurgan imano mamäninta cuyashganta. Mariaga iti cashganlapita ashmargan, winachirgan y wanushgancama mana raquicarganchu.

8. ¿Imatataj yachacunchi Mariatawan y Juantapis Jesús ima nishganpita?

⁸ ¿Imatataj yachacunchi? Öraga familianchipitapis cristiano masinchicunawanmi junto juntula caycanchi. Waquin castanchicunaga Diosta jaguirinapaj nimashwanmi o wasipitapis gargurimashwanmi. Chaypaj parlarmi Jesús nirgan Jehovapita y cristiano masinchicunapita mana raquicarga imayca bendiciuncunata chasquinapaj. Waquin hermanucunaga taytanchino y mamanchino canman, waquincunana wamranchicunanopis (Mar. 10:29, 30). Alapa cushishgachi may chaychopis caycanchi juc yarpayla juc shongula cristiano masinchicunawan Diosta sirvishganchipita (Col. 3:14; 1 Ped. 2:17).

9. ¿Imatataj yachachimanchi Mateo 27:46 textucho yurimoj palabracuna?

⁹ Jesús imata nishgan. Wanunanpäna caycar gapariyparämi Jesús cayno nirgan: “Diosnillä, Diosnillä, ¿imanirtaj cachaycamashcanqui?” (Mat. 27:46). ¿Imanir-raj Jesús chayno ruwacurgan? Bibliaga manami wilacunchu pero tantiarcushun imatataj chaypita yachacunchi. Chayno Jesús Taytanta nirga, Salmo 22:1 texto nishganmi cumplicaycämurgan. *Jina rasunpa cajchoga Papäninga cachaycurganmi, pero ¿imanirtaj chayta rurargan? (Job 1:10). Chaytaga rurargan Taytan Jehovata cuyashganta o mana cuyashganta ricacänanpaj, paylata adurashganta o mana adurashganta ricacänanpäpis, chay pruebapaga manami ni pï runapis pasarganchu, Jesuslami chay lapanta aguantargan. Jina “¿imanirtaj cachaycamashcanqui?” nirga, yarpächimanchi Jesús lapanpitapis juchaynaj cashganta.

10. ¿Imatataj yachacunchi Jesús Taytanta ruwacushganpita?

¹⁰ ¿Imatataj yachacunchi? Noganchipis shuyarashwanchu lapan pruebacunapita Diosninchi libramänanchita. Diosta adurashganchiraycur Jesusnopis wanurpis wanushwanmi (Mat. 16:24, 25). Chayno captinpis alapa nacashganchi hora mana aguantashganchi cajchoga Diosninchiga yanapämäshunmi (1 Cor. 10:13). Imatapis mana rurashganchipita ichanga runacunaga chiquiycämäshun, ashliycämäshun, magaycämäshun, chaychopis Jesús aguantashgannola aguantashun (1 Ped. 2:19, 20). Runacunaga contranchicho caycan cay munduwan mana talucaptinchimi y rasunpa cajpita yachachicuptinchimi (Juan 17:14; 1 Ped. 4:15, 16). Y Jesusga musyarganmi imanir Taytan Jehová chay pruebacunapita mana librashganta. Waquin Diosta sirvejcuna ichanga tapucärinman ‘¿imanir pruebacunapita Dios libramanchu?’ nir (Hab. 1:3). Cuyapäcoj y perdunacoj Taytanchi Jehová captinmi, manami ninchu paycunata yaracuyniynaj runacuna cashganta, chaypa trucanga lapancunatami shogaycun (2 Cor. 1:3, 4).

11. ¿Ima nirgantaj Jesús, Juan 19:28 textucho y imanir?

¹¹ Jesús imata nishgan (leiriy Juan 19:28). ¿Imanirtaj “yacunaycä” Jesús  nirgan? Salmo 22:15 textucho caycaj profecía cumplicänanpaj, chaycho nin: “Shimëpis chaquicäcushami. Gallöpis watacäcushami”. Guerucho warcuraycashgan horaga magapäcushganpita nanachicuycarganchi, ¡imanoraj nanaycargan maquinpis y chaquinpis y yacunaypitapis wanurganchi!

12. ¿Imatataj yachacunchi “yacunaycä” Jesús nishganpita?

¹² ¿Imatataj yachacunchi? Jesús pipis yanaparcunanpaj munaycargan, noganchipis chaynola rurashwan. Imalatapis mana chararga, öraga manchacushwanmi o pengacushwanmi pilatapis wilayta. Chayno manami canmanchu, pilatapis ruwacushun yanapämänanchipaj. Edayashgana caycarga o gueshyaycarga japalanchicunaga manami camäpacushunchu imalatapis rantipacamuyta o jampichicoj aywayta. Laquesawan caycarga alimi canga juc ancianuta o maygan pogushga hermanunchita wilapaptinchi (Prov. 12:25). Ama gongashunchu, cristiano masinchicunaga cuyamanchimi, laquicuycunacho captinchipis paycunaga noganchiwanmi caycanga (Prov. 17:17). Ichanga upälala caycar imarga manami yanapämäshunchu, wilapänanchirämi imacunapa pasaycashganchita.

13. ¿Ima nishwantaj wanushgancama Jesús yaracushganpita?

¹³ Jesús imata nishgan. Nisán quillacho, 14 junaj, malway horanomi Jesús nirgan: “Llapantanami cumlishcä” (Juan 19:30). Chaynoga nirgan Jehová mandashganta lapanta cumplishga carmi. ¿Ima nishwantaj wanushgancama yaracushganpita? Diabluga nirgan ‘runacuna Diosta sirvin bendecishga cashganlapita’, pero chayga manami rasunchu. Jesús rurashgancho ichanga ricanchi Diostaga imayca pruebacunapa pasarpis sirviyta puedinchi. Jesuspis noganchiraycurmi wanurgan. Wanushganraycurmi Diosninchiga ali nawilanwan chasquimanchi y ali cawayta shamoj tiempucho chasquinapäpis awnimanchimi. Y mana chaylachu, Jesusga Taytanpa jutinta respetachirgan y payla rasunpa caj Dios cashganta pï maytapis musyachirgan.

14. ¿Imata rurartaj cada junaj caycashwan?

¹⁴ ¿Imatataj yachacunchi? Waran waran mana gongaypa Taytanchi Jehovalata sirviycashwan. Maxwell Friend wawgui ima nishganta ricarishun. Payga Galaad Escuela nishganchomi yachachicurgan, cayno nirgan juc asambleacho yachachicuycar: “Ama warapaj jaguiriychu cananpaj cajtaga. Manami musyanchichu waray junaj chayamunanpaj o manapis, imano Jehovata sirvishgayquiga cananmi musyacanman”. Cay junajta último junaj cashgantano ricanquiman, chaynomi rurashwan. Wawgui nishganga rasunpami caycan. Chauras wanuy chayaycämaptinchipis caynomi Jehovata niycäshun: “Taytalä Jehová, jutilayquiraycur, gamla autoridäyoj cashpayquiraycur lapanta vencishcä. Lulacoj Diablo imayca rurashgancunapis manami yaracuynïta ushacächishgachu”.

15. Lucas 23:46 texto nishganno, ¿Papänin ima rurananpätaj Jesús yaracurgan?

¹⁵ Jesús imata nishgan (leiriy Lucas 23:46, TNM). Taytalanman yaracurcurmi Jesús cayno nirgan: “Taytalä, maquiquimanmi vidäta cachaycamö”. Jesusga musyarganmi Papänin yapay cawarachimunanpaj y mana gongaycunanpaj cajtapis.

16. ¿Imatataj yachacunchi Joshua jutiyoj mozo imacunapa pasashganpita?

 ¹⁶ ¿Imatataj yachacunchi? Noganchipis Jesusnola Jehovapa maquinman cawayninchita churaycushun, chaypäga lapan shongunchiwan payman yaracushwan (Prov. 3:5). Chayta rurargan Joshua jutiyoj wawgui, 15 watayojlaraj caycar pasaypa gueshyaycargan. Jampicunanpaj yawartaraj chasquicunanpaj waquincuna niycaptinpis payga manami chasquicurganchu. Manaraj wanurmi mamäninta cayno nirgan: “Jehovapa maquincho caycä, rasunpami mamä. Jehovaga yapaymi cawarachimanga. Payga musyanmi shongücho ima cashganta, payga musyanmi paylata alapa cuyashgäta”. * Chauras jucninchi jucninchimi cayno tapucunanchi: “Wanunäpäna caycaptïpis, imayca pruebacunapa pasaptïpis, ¿Jehová Dioslamanchuraj yaracuycäshaj?, y ¿wanuptïpis pay yapay sharcachimänanpaj cajmanpis?”.

17, 18. ¿Imacunatataj yachacushcanchi? (“ Jesús wanunanpäna caycar ima nishganpita yachacunapaj” nej recuadruta ricay).

¹⁷ Imaycatami yachacunchi Jesús wanunanpäna caycar ima nishgancunaman yarpachacurga. Waquincunata perdunanapaj yachacushcanchi y Jehovapa perdunnintapis chasquinapaj. Y cushicuypäga caycan cristiano masinchicunawan mana raquicaypa caycashganchimi. Y pilapis yanapämänanchipäga mana pengacuypami wilarcushwan, y Taytalanchi Jehovapis yanapämäshunmi imayca pruebacuna yurimuptinpis. Jinamanpis cada junajmi Dioswan caycashwan, manami nishwanchu ‘chaypitaraj Diosta sirvishaj’, chayno captinga Diosta sirvir wanurpis payga cawarachimäshunmi.

¹⁸ Lapan Jesús yachachicushgannola cawacurga, Jehovaga caynomi nimäshun ‘gamga wamrätami wiyacushcanqui’ (Mat. 17:5).