1, 2. ¿Jesusca pai huañugrishpa tucuri shimicunata manaraj nishpaca ima shinataj sintirirca?

HUATA 33, 14 de Nisán punllapimi Jesustaca paipaj contracunaca yangamanta juchachin, burlarincuna, mana alli tratancuna, llaquinaita macancuna. Chai huashaca Jesustaca paicunaca shuj caspipimi clavashpa huarcuncuna. Jesusca maquicunapi, chaquicunapi clavashca cashcamantami samaita aisashpapish, parlashpapish achca nanaita charin. Pero nanaita sintishpapish imata nina cashcataca mana upalla saquirinchu.

² Cunanca Jesús huañugrishpa imacunata nishcata, chaimanta imata yachai tucushcata ricushun. Caimanta yachashpaca Jesusta uyacuj shinami cashun (Mateo 17:5).

3. ¿Jesusca ‘Yayitu paicunata perdonahuai’ nishpaca picunamantashi parlacushcanga?

³ ¿Jesusca imatataj nirca? Paica caspipi clavashca cashpaca: “Yayitu, paicunaca imata rurashcacunataca mana yachancunachu, perdonapailla” nircami (Lucas 23:33, 34). ¿Caicunata nishpaca picunamantataj parlacushcanga? Tal vez Jesusca paita caspipi huarcuj romano soldadocunamantami parlacushcanga. Cai soldadocunaca Jesús pi cashcataca mana yacharcacunachu. Shinallataj paita huañuchichun  entregaj gentecunamantapishmi parlacushcanga. Caimanta huaquincunaca qꞌuipaca Jesuspimi feta churarcacuna (Hechos 2:36-38). Jesusca paita yangamanta llaquichishpa mana alli tratajpipish paica mana resintirishca saquirircachu (1 Pedro 2:23). Chaipaj randica Jehová Diostami paicunata perdonachun mañarca.

4. ¿Jesusca paipaj contracunata perdonashpaca imatataj yachachirca?

⁴ ¿Imatataj yachanchij? Jesús shinallatajmi shujtajcunata perdonanalla canchij (Colosenses 3:13). Huaquinpica familiacuna o gentecunaca ñucanchij crishcacunata mana intindishcamantami llaquichincuna. Maijancunaca ñucanchijmantaca llullacunata nishpami ñucanchij publicacioncunata lliquincuna o de verdadtajmi llaquichisha nincuna. Pero pꞌiñarishca o llaquirishca saquirinapaj randica paicunapish Bibliamanta estudiachunmi Jehová Diosta mañana canchij (Mateo 5:44, 45). Huaquinpica ñucanchijta mana alli tratajpica paicunata perdonanaca sinchimi can. Pero llaquirishca, resintirishca saquirishpaca ñucanchijllatajmi llaquilla causashun. Shuj panica: “Shujtajcunata perdonana nishpaca paicuna Ilaquichijpi chaita chasquinalla cashcata, chashna llaquichishpa catichun saquinalla cashcataca mana nisha ninchu. Ashtahuanpish shujtajcuna llaquichijpi mana resintirishca saquirinatami nisha nin” ninmi (Salmo 37:8). Cai pani nishca shina shujtajcunata perdonashpaca tranquilosmi sintirishun (Efesios 4:31, 32).   

5. a) ¿Jesusca shuj shuhuamanca imatataj nirca? b) ¿Imamantataj chai promesata rurarca?

⁵ ¿Jesusca imatataj nirca? Ishqui shuhuacunaca Jesuspaj ladopimi paicunapish clavashca, huarcushca carcacuna (Mateo 27:44). Paicunaca puntaca Jesusmantami burlarircacuna. Pero shujmi Jesusta burlarinata saquishpa, Jesús ima mana allita mana rurashcata cuentata curca (Lucas 23:40, 41). Shinallataj Jesús causarinata, pai mandaj tucunatami cuentata curca. Chaimi paica: “Jesús, can ña mandaj tucushpaca ñucata yuyaripangui” nirca (Lucas 23:42, NWT ). Cai runa Jesuspi feta charishcata ricushpami Jesusca: “Cunanmi canmanca cashna nini. Ñucahuanmi paraisopi cangui” nirca (Lucas 23:43, NWT ). Jesusca paipaj Yaya llaquij, perdonaj cashcata yachashpami chai huañugrij runamanca “ñucahuanmi paraisopi cangui” nishpa paillataj shuj promesata rurarca (Salmo 103:8).

6. ¿Shuhua runaman Jesús imata nishcamantaca imatataj yachanchij?

⁶ ¿Caimantaca imatataj yachanchij? Jesusca Jehová Dios ima shina cashcatami ricuchin (Hebreos 1:3). Ñucanchij juchacunamanta arrepintirijpi, Jesuspi feta churajpica Jehová Diosca perdonangami (1 Juan 1:7). Pero maipica: “Jehová Diosca ñucanchij juchacunataca mana perdonangachu” nishpachari yuyanchij. Chashna yuyashpaca caipi yuyashunchij. Jesusca shuj shuhua paipi recienlla feta churajpica paica perdonarcami. Jehová Dioscarin ñucanchij paita sirvingapaj esforzarijpi, paita cazujpica perdonangami (Salmo 51:1; 1 Juan 2:1, 2).

7. ¿Jesusca Juanman, Mariamanca imatataj nirca?

⁷ ¿Jesusca imatataj nirca? (Juan 19:26, 27-ta liyipai). Jesusca paipaj mama tal vez viuda cashcamanta pi cuidachunmi ricurca. Jesuspaj lahuauqui panicunaca paipaj  mamataca minishtirishca cosascunahuanmi ayudai tucurca. Pero paicunaca Jesuspaj discipulocunaca manaraj carcachu. Jesuspajca Diosta sirvijcunaca familia shinami carca (Mateo 12:46-50). Chaimantami Jesusca paipaj mamamanta preocuparishpa paipaj cꞌuyashca amigo Juanman paipaj mamata Jehová Diosta sirvishpa catichun, ayudachun mingarca. Paica Mariamanca: ‘Huarmi, paimi cambaj churi’ nirca. Cutin Juanmanca: ‘Ricui, paimi cambaj mamaca’ nirca. Chai punllamanta huichimanmi Juanca paipaj mamata shina cuidashpa catirca. Chashnami Jesusca huachari horasmanta huañuna horascama paipaj mama paihuan cajpi paita cꞌuyashcata ricuchirca.

8. ¿Mariaman, Juanman Jesús ima nishcamantaca imatataj yachanchij?

 ⁸ ¿Imatataj yachanchij? Maipica ñucanchij familiacunaca ñucanchijtami mana alli tratancuna o saquishpa rincuna. Chaimantami huauqui panicunahuanca ñucanchij familiacunahuanpish yalli alli apanacunchij. Jesusca ‘Jehová Diosmanta mana caruyashpa, Jehová Diospaj organizacionpi catishpaca achca huauquicunata, panicunata, mamacunatami charinguichij’ nircami (Marcos 10:29, 30). Tucuicuna Jehová Diosta tandalla sirvishcamanta, huauqui panicunaman cꞌuyaita ricuchishcamantami cushilla sintirinchij (Colosenses 3:14; 1 Pedro 2:17).

9. ¿Mateo 27:46-pi nishcacunamantaca imatataj yachanchij?

⁹ ¿Jesusca imatataj nirca? Ña huañugrishpaca Jesusca: ‘Ñuca Dioslla, ñuca Dioslla, ¿imamantataj saquihuanguiyari?’ nircami (Mateo 27:46). Bibliapica cai shimicuna ima nisha nishcataca mana parlanchu. Pero Jesusca cai shimicunata nishpaca Salmo 22:1-pi nishcacunatami pajtachirca. * Shinallataj chashna nishpaca Jesusca pai huañuna horaspi Jehová Dios paita cuidanata saquina cashcatami nisha nicushcanga (Job 1:10). Chashnami Jesusca huañuna horascama Jehová Diosta tucuipi cazushcata ricuchirca. Cashna laya pruebacunataca ni pi runa mana charishcachu. Chashnallataj Jesusca Salmo 22:1-pi tiyaj shimicunata nishpaca pai ima culpata mana charishcatami ricuchirca.

10. ¿Jehová Diosman Jesús ima nishcamantaca imatataj yachanchij?

¹⁰ ¿Jesusmantaca imatataj yachanchij? “Jehová Diosca ima pruebacunata ama charichunca paimi cuidanga” nishpaca mana yuyanachu canchij. Jesusca huañuna cashpapish Jehová Diostaca tucuipimi cazurca. Ñucanchijpish huañuna cashpapish Jehová Diostaca tucuipimi cazuna canchij (Mateo 16:24, 25). Pero Jehová Diosca mana ahuantai tucushca pruebacunata charichunca mana saquingachu (1 Corintios 10:13, QC, 1989). Contracunaca ima shinami Jesusta catirashpa llaquichirca. Chashnallatajmi ñucanchijta llaquichincuna (1 Pedro 2:19, 20). Paicunaca ñucanchij paicuna laya mana allita rurashcamantaca mana llaquichincunachu. Ñucanchij cai mundopaj ruraicunapi mana chagrurijpi, Diosmanta yachachijpimi ñucanchijtaca llaquichincuna (Juan 17:14; 1 Pedro 4:15, 16). Jesusca allimi yacharca imamanta llaquicunata ahuantana cashcata. Cutin huaquin huauqui panicunaca pruebacunahuan cashpaca Jehová Diostaca: “¿imamantataj pruebacunata charichun saquingui?” nishpachari tapuncuna (Habacuc 1:3). Pero Jehová Diosca paicuna chashna tapurijpipish paicunapaj fe mana sinchi cashcata shinaca mana yuyanchu. Chaipaj randica paica alli intindishcamantami cꞌuyaihuan, pacienciahuan ayudan (2 Corintios 1:3, 4).

11. ¿Jesusca imamantataj Juan 19:28-pi nishca shimicunata nirca?

¹¹ ¿Jesusca imatataj nirca? (Juan 19:28-ta liyipai). ¿Jesusca imamantataj yacunanca nirca? Paica Salmo 22:15-pi nishca shimicuna pajtarichunmi chashna nirca. Chaipica: “Ñuca shimipish callana shinami chaquishca. Ñuca cꞌallupish palagrapimi llutarishca” ninmi. Paica caspipi huarcushca cashcamanta, achca llaquicunata apashcamantami yacunaihuan cashcanga.

12. ¿Jesús yacunanca nishcamantaca imatataj yachanchij?

 ¹² ¿Caimantaca imatataj yachanchij? Jesusca ima shina sintirishcataca mana pingashpami shujtajcunaman huillarca. Ñucanchijpish imapi ayudachun minishtishpa o ima shina sintirishcataca mana pingashpami shujtajcunaman huillana canchij. Por ejemplo, mayorlla o ungushca cashpaca shujtajcuna ayudachunmi mañana canchij. Tal vez comprasta rurachun, doctorpajman pushachunmi ayudata mañana canchij. Desanimarishca cashpapish congregacionta pushaj huauquiman, mana cashpaca experienciata charij huauquiman o panimanmi ayudachun huillana canchij. Paicunami animai tucuncuna (Proverbios 12:25). Huauqui panicunaca ñucanchijtami ayudasha nincuna (Proverbios 17:17). Pero paicunaca ñucanchij imata minishtishcata o imata yuyashcataca mana yachancunachu. Chaimantami ñucanchijca tucui ima shina sintirishcataca huillana canchij.

13. ¿Jesusca huañuna horascama Jehová Diosta sirvishpaca imatataj ricuchirca?

¹³ ¿Jesusca imatataj nirca? 14 de Nisán punllapi casin las tres de la tardetami Jesusca: “Tucuimi pajtarishca” nirca (Juan 19:30, NWT ). Paica chashna nishpaca Diospaj munaita tucui alli pajtachishcatami nisha nicurca. ¿Huañuna horascama Jehová Diosta tucuipi sirvishcamantaca imatataj ricuchirca? Puntapica, Diablo llulla cashcata, jucha illaj runapish Jehová Diosta tucuipi cazui tucushcatami ricuchirca. Ishquipica, paipaj causaitami ñucanchijta quishpichingapaj curca. Paipaj causaimantami gentecunaca Jehová Dioshuanpish alli apai tucuncuna, huiñai causaitapish chari tucuncuna. Quimsapica, Jesusca Jehová Diospaj Mandanata apoyashcata, paipaj shutita difindishcatami ricuchirca.

14. ¿Cada punlla imata rurangapajtaj decididos cana canchij?

¹⁴ ¿Imatataj yachanchij? Cada punlla Jehová Diosta alli sirvingapajmi decididos cana canchij. Escuela de Galaadpi yachachij huauqui Maxwell Friend shuj jatun tandanacuipi ima nishcata ricushun. Paica: “Cunanman rurana cashcataca ama cayapaj saquishunchu. Caya punlla causashpa catinataca mana yachanchijchu. Chaimantami cada punlla causacushparaj Jehová Diosta sirvingapaj tucui pudishcata rurana canchij” nircami. Cai huauqui nishca shinaca caya punlla ima tucunataca mana yachanchijchu. Chaimantami cada punlla Jehová Diosta cazungapaj esforzarina canchij. Chashnami huañunata yachashpapish Jehová Diostaca cashna ni tucungui: “Canta tucuipi alli sirvingapajmi esforzarishcani. Diablotapish llulla cashcatami ricuchishcani. Cambaj shutitami jatunyachishcani. Cambaj Mandanallatami apoyacushcani”.

15. Lucas 23:46-pi nishca shinaca ¿Jesusca imatataj tucui shunguhuan crirca?

¹⁵ ¿Jesusca imatataj nirca? (Lucas 23:46-ta liyipai). Jesusca: “Yayitu, cambaj maquipimi ñuca espirituta mingani” nircami. Paica pai huañujpipish Jehová Dios paita causachinataca tucui shunguhuanmi crirca.

16. ¿Joshuapaj ejemplomantaca imatataj yachanchij?

¹⁶ ¿Caimantaca imatataj yachanchij? Huañunata yachashpapish Jehová Diosta tucuipi sirvingapajmi esforzarina canchij. Chaipajca  tucui shunguhuanmi Yaya Diospi confiana canchij (Proverbios 3:5). Huauqui Joshuapi yuyashun. Paica 15 huatacunata charishpami achca ancha ungüita charirca. Pero jambiringapajca Dios mana munashca tratamientocunataca mana chasquircachu. Paica huañungapaj asha tiempo faltajpica paipaj mamitamanca: “Jehová Diosmi ñucata cuidacun. Ñuca paita shungumanta sirvishcata, paita tucui shunguhuan cꞌuyashcataca allimi yachan. Chaimanta ñuca huañujpipish Jehová Diosmi de seguro causachinga” nircami. * Ñucanchijpish chashnallatajmi tapurina canchij: ¿Sinchi pruebacunata charishpa, huañunata yachashpaca Jehová Diostaca tucuipichu alli sirvisha? ¿Pai ñucata yuyarishpa causachinatachu tucui shunguhuan crisha?

17, 18. ¿Cai yachaipica imatataj yachashcanchij? (“ Jesús ima nishca tucuri shimicunamanta” nishca recuadrota ricui).

¹⁷ Jesús nishca tucuri shimicunamantaca shujtajcunata perdonana cashcata, Jehová Diospish ñucanchijta perdonaj cashcatami yachashcanchij. Shinallataj ñucanchij cꞌuyashca huauqui panicunapaj ayudata mañana cashcatami yachashcanchij. Ima pruebacunahuan cajpipish Jehová Dios ñucanchijta ayudanatami ricushcanchij. Ashtahuancarin causacushparaj Jehová Diosta tucuipi cazujpica ñucanchij huañujpipish pai causachinatami yachashcanchij.

¹⁸ Cai yachachishcacunata tucui ñucanchij causaipi pajtachishpaca Jehová Dios ñuca Churita uyaichij nishcatami pajtachishun (Mateo 17:5).