1, 2. Σο αβιλό-πες πριν τι βακερέλ ο Ιησούς πο τελευταία λάφια;

ΙΣΙ 14 Νισάν 33 Κ.Χ. Αφού κατηγοριντέ ι Ιησούς σινανέ ντα τσσουντέ λέσκε ο βάρετα εκχέ πραγμάσκε σο να κερντάς, ακανά πρασάνα-λες, βασανίνενα-λες ντα σοράν καρφώνενα-λες οπράλ εκχέ καστέστε. Ο καρφιά πφαραβένα λέσκε βαστά ντα λέσκε πιντρέ. Κάθε ανάσα σο λέλα, κάθε λάφι σο νικαβέλα πι μόσταρ ανέλα λέσκε ντουκχ. Αλλά πρέπει τι κερέλ λάφι σόσκε τθερέλα τι βακερέλ σημαντικά πράγματα.

² Κα ντικχάς ο λάφια σο βακερντάς ο Ιησούς καζόμ μερέλας οπράλ κο κας σο βασανίνενας-λες ντα σο σικλιάσα αμέν. Γιαβερέ λαφίντζαρ, κα “ασουνάς-λες”.​—Ματθ. 17:5.

3. Καλά τζενέ μανγκλάς ο Ιησούς τι συγχωρίντιβεν κάνα βακερντάς: «Ντάντε, συγχώρινε-λεν»;

³ Σο βακερντάς ο Ιησούς; Καζόμ καρφώνενας-λες κο κας ο Ιησούς κερντάς προσευχή: «Ντάντε, συγχώρινε-λεν». Κας τι συγχωρίνελ; Ο λάφια σο βακερντάς πιο σοράν βοηθίνενα-αμέν τι αγαβάς: «Να τζανένα σο κερένα». (Λουκ. 23:​33, 34) Ο Ιησούς μάλλον βακερέλας οντουλένγκε σο ισινέ Ρωμαίοι στρατιώτες ντα πφαραντέ λέσκε βαστά ντα λέσκε πιντρέ καρφίντζαρ. Βον να τζανένας κον ισινέ μπαγιά. Επίσης, μπέκιμ τι τθερέλας πι γκοντιάτε ότι κάποια τζενέ μανγκλέας τι μουνταρέν-λες αλλά σοράν κα πακιάνας λέστε. (Πράξ. 2:​36-38) Ο Ιησούς να μουκχλάς κο αδικίες σο νακχλό τι πφερέν λέσκο γκι χολί ντα μίσος. (1 Πέτρ. 2:​23) Οκιά μπάνταρ, μανγκλάς κατά Ιεχωβά τι συγχωρίνελ οντουλέν σο μουνταρένας-λες.

4. Σο μπορίνασα τι σικλιάς κατά Ιησούς σο συγχωρίνελας αντράλ πι γκίσταρ οντουλέν σο τζάνας λέσαρ κόντρα;

 ⁴ Σο σικλιάσα κατά λάφια ι Ιησούσκε; Σαρ ο Ιησούς, αντικάς αμέν-ντα πρέπει τι συγχωρίνας ι γιαβερέν αντράλ αμαρέ γκίσταρ. (Κολ. 3:​13) Μερικοί, αντρέ ανταλέντε αμαρέ τζενέ-ντα, μπέκιμ τι τζάνα αμέντζαρ κόντρα επειδή ναστί αγαβένα οντουλά σο πακιάσα ντα ο τρόπος σο τζουβντιάσα. Μπορεί τι βακερένα ψέματα αμένγκε, τι κερένα-αμέν ρεζίλι ανγκλάλ κο γιαβερά, τι φουρτίνενα αμαρέ έντυπα ή ατζέ-ντα τι βακερένα ότι κα νταπέν-αμέν. Αντίς τι ατσσικιαράς χολί, τι μανγκάς κατά Ιεχωβά τι πουτρέλ λένγκε γιακχά για τι μπορίνεν εκ ντιβές τι ντικχέν ι αλήθεια. (Ματθ. 5:​44, 45) Μπάζιμα, μπορεί τι αβέλ δύσκολος αμένγκε τι συγχωρίνας, ειδικά άμα νακχλάμ παλάλ γιαβερέστε αδικίες. Αλλά άμα μουκχάσα κι χολί ντα κο μίσος τι ασταρέν τθαν αντρέ αμαρέ γκίστε, κεράσα ζιάνι αμαρέ νεαυτόσκε. Εκ πφεν βακερέλα: «Αγαβάβα ότι συγχωρίναβα να μανγκέλα τι βακερέλ ότι δικαιολογίναβα ο λάθη ή ότι μουκχάβα ι γιαβερέν τι κερέν-μαν σο μανγκένα. Μανγκέλα τι βακερέλ ότι τραμπίναβα μα τι ατσσικιαράβ χολί αντρέ μάντε». (Ψαλμ. 37:8) Κάνα αποφασίνασα τι συγχωρίνας, τραμπίνασα μα τι μουκχάς ο μπέτι πράγματα τι πφερέν-αμέν μίσος.​—Εφεσ. 4:​31, 32.

5. Σο βακερντάς ο Ιησούς κο εγκληματίας σο ισινέ πασέ λέστε, ντα σόσκε;

⁵ Σο βακερντάς ο Ιησούς; Ντούι εγκληματίες ισινέ καρφωμέ πασέ κο Ιησούς. Κι αρχή, ο ντούι-ντα πρασάνας-λες. (Ματθ. 27:​44) Αλλά σοράν, ο εκ τανό τσσιναντάς. Αγαντάς ότι ο Ιησούς να κερντάας «καέκ γκεραλό πράγμας». (Λουκ. 23:​40, 41) Επίσης, σικαντάς ότι πακιάλας ότι ο Ιησούς κα τζουβντιόλας κατά μουλέ ντα εκ ντιβές κα αβέλας ο βακίτι σο κα κερέλας κουμάντος σαρ βασιλιάς. Βακερντάς κο Ιησούς: «Ιησού, μα τι μπιστρές-μαν κάνα κα αβές τι Βασιλειάτε». (Λουκ. 23:​42) Σο πίστη σικαντάς ανταβά τζενό! Ο Ιησούς βακερντάς λέσκε: «Μπαγιά βακεράβα τούκε αντιβές, κα αβές μάντζαρ [όχι κι Βασιλεία αλλά] κο Παράδεισος». (Λουκ. 23:​43) Κατά λάφια «τούκε» ντα «μάντζαρ» αγαβάσα ότι ο Ιησούς ντέλας πο λάφι λέστε. Επειδή τζανέλας ότι λέσκο Ντατ σικαβέλα έλεος, ο Ιησούς πι λαφίντζαρ ντινάς ελπίδα ανταλέ εγκληματιάς σο ατζεχάνικ κα μερέλας.​—Ψαλμ. 103:8.

6. Σο σικλιάσα κατά λάφια σο βακερντάς ο Ιησούς κο εγκληματίας;

⁶ Σο σικλιάσα κατά λάφια ι Ιησούσκε; Ο Ιησούς μοιάζελα πι νταντέστε. (Εβρ. 1:3) Ο Ιεχωβά ισί έτοιμος τι συγχωρίνελ-αμέν ντα τι σικαβέλ αμένγκε έλεος άμα μετανιωσάλαμ μπαγιά οντουλένγκε σο κερντάμ ντα πακιάσα ότι κα συγχωρίντιβεν αμαρέ αμαρτίες αντράλ κατά θυσία ι Ιησού Χριστόσκι. (1 Ιωάν. 1:7) Μερικέ τζενένγκε μπορεί τι αβέλ δύσκολος τι πακιάν ότι ο Ιεχωβά μπορίνελα τι συγχωρίνελ πουρανέ αμαρτίες. Άμα μπάζιμα νιωθίνενα τουμέν-ντα αντικάς, σκεφτίνεν ακαβά: Άμα ο Ιησούς χάνικ πριν τι μερέλ σικαντάς έλεος εκχέ εγκληματιάσκε σο αζομάν αρχισάλοας τι σικαβέλ πίστη λέστε, να κα σικαβέλ ο Ιεχωβά έλεος πι πιστέ υπηρετόνγκε σο κερένα ο πιο λατσσό σο μπορίνενα για τι ντεν καν λέσκε λαφίντε;​—Ψαλμ. 51:1· 1 Ιωάν. 2:1, 2.

7. Σο βακερντάς ο Ιησούς κι Μαρία ντα κο Ιωάννης σαρ βακερένα ο εδάφια Ιωάννης 19:​26, 27, ντα σόσκε;

⁷ Σο βακερντάς ο Ιησούς; (Διαβάνεν Ιωάννης 19:​26, 27) Ο Ιησούς ανησυχίνελας πι νταγιάκε, σο μάλλον ισινέ χήρα. Λέσκε πφραλά μπορίνενας τι ντεν-λα οντουλά σο χρειαζίντιβελας. Αλλά κον κα βοηθίνελας-λα τι κερέλ πι πίστη πιο ζουρανί;  Καέκ πράγμας να σικαβέλα ότι λέσκε πφραλά αζομάν αβιλέας λέσκε μαθητές. Όμως, ο Ιωάννης ισινέ πιστός απόστολος ντα εκ κατά πιο λατσσέ αμαλά λέσκε. Ι Ιησούσκε οντουλά σο ντένας λατρεία λέσαρ ι Ιεχωβάς ισινέ σαρ φαμιλί. (Ματθ. 12:​46-50) Οντουλέσκε, επειδή μανγκέλας ντα πφαμπόλας ι Μαριάκε, ο Ιησούς βακερντάς κο Ιωάννης τι αρακχαβέλ-λα, σόσκε τζανέλας ότι κα βοηθίνελας-λα τι ατσσικιαρέλ πι πίστη ζουρανί. Βακερντάς πι νταγιάκε: «Άκ’ το τσσαβό!» Ντα κο Ιωάννης: «Άκ’ τι ντάι!» Οντουλέ ντιβεσέσταρ, ο Ιωάννης αβιλό σαρ τσσαβό ι Μαριάκε ντα αρακχαβέλας-λα σαρ τι αβέλας λέσκι ντάι. Σο μπαρί αγάπη σικαντάς ο Ιησούς ι τζουβλιάκε σο μπιαντάας-λες ντα ισινέ πασέ λέστε αζομάν σο μερέλας!

8. Σο σικλιάσα κατά λάφια σο βακερντάς ο Ιησούς κι Μαρία ντα κο Ιωάννης;

 ⁸ Σο σικλιάσα κατά λάφια ι Ιησούσκε; Η σχέση σο τθεράσα αμαρέ πφραλέντζαρ ντα πφενίντζαρ αντρέ κι κχανγκιρί μπορίνελα τι αβέλ πιο ζουρανί κατά σχέση σο τθεράσα αμαρέ φαμιλιάσαρ. Αμαρέ τζενέ μπορεί τι τζάνα αμέντζαρ κόντρα ή ατζέ-ντα τι μουκχέν-αμέν, αλλά ο Ιησούς βακερντάς ότι άμα κα ατσσάς πασέ κο Ιεχωβά ντα κι οργάνωση Λέσκι, κα τθεράς «100 φαρ πιο μπουτ» οντουλένταρ σο χασαρντάμ. Μπουτ τζενέ κα αβέν αμένγκε σαρ τσσαβέ, τσσαγιά, νταγιά ή νταντά. (Μάρκ. 10:​29, 30) Σαρ νιωθίνενα σο τθερένα πφραλέν ντα πφενίν αντρέ κι κχανγκιρί σο ισί ενωμέ επειδή τθερένα πίστη ντα επειδή μανγκένα ι Ιεχωβάς ντα ο εκ ι γιαβερές;​—Κολ. 3:​14· 1 Πέτρ. 2:17.

9. Σο σικλιάσα κατά λάφια ι Ιησούσκε σο ισί κο εδάφιος Ματθαίος 27:46;

⁹ Σο βακερντάς ο Ιησούς; Χάνικ πριν τι μερέλ, ο Ιησούς ντινάς βίκος: «Ντέβλα μου, Ντέβλα μου, σόσκε μουκχλάν-μαν;» (Ματθ. 27:​46) Η Αγία Γραφή να βακερέλα αμένγκε σόσκε ο Ιησούς βακερντάς-λες ανταβά. Σκεφτίνεν όμως σο σικλιάσα αμέν ανταλέ λαφίνταρ. Πρώτον, ανταλέ λαφίντζαρ, ο Ιησούς κερντάς τι νικιόλ μπαγιά η προφητεία σο ισί κο εδάφιος Ψαλμός 22:1. * Δεύτερον, πι λαφίντζαρ σικαντάς ξεκάθαρα ότι ο Ιεχωβά οντιά στιγμή να “αρακχαβέλας” πι Τσσαβές. (Ιώβ 1:​10) Ο Ιησούς αγαντάς ότι λέσκο Ντατ μουκχλάας-λες κο βαστά κι ντουσμανίνγκε για τι δοκιμάντιβελ σαρ να δοκιμασάλοας καέκ γιαβέρ τζενό. Ντα τρίτον, ανταλά λάφια σικαβένα ότι ο Ιησούς να κερντάας καέκ γκεραλό πράγμας για τι μουνταρέν-λες.

10. Σο σικλιάσα κατά λάφια σο βακερντάς ο Ιησούς πι Νταντέσκε;

¹⁰ Σο σικλιάσα κατά λάφια ι Ιησούσκε; Εκ πράγμας σο σικλιάσα ισί ότι δεν πρέπει τι μπεκλεντίνας κατά Ιεχωβά τι αρακχαβέλ-αμέν κατά δυσκολίες σο δοκιμάνενα αμαρί πίστη. Σαρ δοκιμασάλο ο Ιησούς, αντικάς αμέν-ντα πρέπει τι αβάς έτοιμοι τι ατσσάς πιστοί ατζέ-ντα άμα κα χρειαζίντιβελ τι μουνταρέν-αμέν. (Ματθ. 16:​24, 25) Όμως, μα τι μπιστράς ότι ο Ντεβέλ να κα μουκχέλ-αμέν τι δοκιμάντιβας πιο μπουτ οντουλέσταρ σο αντιχίνασα. (1 Κορ. 10:​13) Κάτι γιαβέρ σο σικλιάσα ισί ότι, σαρ ο Ιησούς, αντικάς αμέν-ντα μπέκιμ τι ταλαιπωρίντιβασα άδικα. (1 Πέτρ. 2:​19, 20) Οντουλά σο τζάνα αμέντζαρ κόντρα κερένα-λες ανταβά, όχι επειδή κερντάμ κάτι γκεραλό, αλλά επειδή να τθεράσα καέκ σχέση ανταλέ ντουνιάσαρ ντα ντάσα μαρτυρία ι αληθειάκε. (Ιωάν. 17:​14· 1 Πέτρ. 4:​15, 16) Ο Ιησούς αγαβέλας σόσκε ο Ιεχωβά μουκχλάς-λες τι τσσίντελ μπουτ πράγματα. Όμως, πιστά τζενέ σο νακχένας δοκιμασίες μπάζιμα σκεφτίνενας σόσκε ο Ιεχωβά μουκχλάς τι αβέν-πες μερικά πράγματα. (Αββακ. 1:3) Ο Ντεβέλ σο σικαβέλα έλεος ντα να χολιάνελα εύκολα αγαβέλα ότι ασακέ τζενέ να μανγκέλα τι βακερέλ ότι να τθερένα πίστη, αλλά ότι χρειαζίντιβενα ι παρηγοριά σο σάντε βοβ μπορίνελα τι ντελ-λεν.​—2 Κορ. 1:3, 4.

11. Σόσκε βακερντάς ο Ιησούς ο λάφια κο εδάφιος Ιωάννης 19:28;

¹¹ Σο βακερντάς ο Ιησούς; (Διαβάνεν Ιωάννης 19:​28) Σόσκε βακερντάς ο Ιησούς: «Μανγκάβα πανί»; Για τι κερέλ «τι νικιόν μπαγιά ο λάφια ι Γραφιάκε», δηλαδή η προφητεία σο ισί κο εδάφιος Ψαλμός 22:​15, σο βακερέλα: «Μι ζορ σουκιλί σαρ εκ κομμάτι κχορέσταρ· μο μούι σουκιλό». Σοράν σαρέ οντουλένταρ σο νακχλάς ο  Ιησούς, σαρ ισί η ντουκχ σο νιωθίνελας οπράλ κο κας, πρέπει τι μανγκέλας μπουτ τι πιλ πανί. Άκ’ σόσκε ο Ιησούς μανγκλάς τι ντεν-λες χάνικ πανί!

12. Σο σικλιάσα κατά λάφια ι Ιησούσκε σο βακερντάς: «Μανγκάβα πανί»;

¹² Σο σικλιάσα κατά λάφια ι Ιησούσκε; Ο Ιησούς να σκεφτίνελας ότι ισινέ λάθος τι βακερέλ σαρ νιωθίνελας. Αμέν-ντα πρέπει τι βακεράς σαρ νιωθίνασα. Μπουτ μπρεσά, μπορεί μα τι μανγκάας τι βακεράς κο γιαβερά οντουλά σο νιωθίναας. Αλλά άμα κα χρειαζίντιβας βοήθεια, δεν πρέπει τι σακιντίνας τι μανγκάς-λα. Για παράδειγμας, άμα ισινάμ πφουρέ ή ναστί κεράσα μερικά πράγματα, μπέκιμ τι χρειαζίντιβελα τι μανγκάς εκχέ αμαλέσταρ τι γκερέλ-αμέν κο σούπερ μάρκετ ή κο γιατρός. Άμα χασαρντάμ αμαρί ζορ μπέκιμ τι χρειαζίντιβελ τι μανγκάς εκχέ πρεσβυτερόσταρ ή εκχέ αμαλέσταρ αντρέ κι κχανγκιρί τι ασουνέλ-αμέν ή τι βακερέλ αμένγκε εκ «λατσσό λάφι» για τι νιωθίνας πιο λατσσές. (Παρ. 12:​25) Τι ντας-αμέν γκοντί ότι ο πφραλά ντα ο πφενιά μανγκένα-αμέν ντα μανγκένα τι βοηθίνεν-αμέν κο “ντιβεσά σο αβέλα στεναχώρια”. (Παρ. 17:​17) Αλλά να μπορίνενα τι διαβάνεν αμαρί γκοντί. Μπορεί μα τι τζανένα ότι χρειαζίντιβασα βοήθεια άμα να κα βακεράς λένγκε αμέν κάτι.

13. Σο μπορισάλο τι κερέλ ο Ιησούς κάνα ατσσικιαρντάς σαστό πο γκι μέχρι κο μεριπέ;

¹³ Σο βακερντάς ο Ιησούς; Περίπου τρεις κο απόγευμας 14 Νισάν, ο Ιησούς ντινάς βίκος: «Αβιλό-πες!» (Ιωάν. 19:​30) Ι Ιησούσκε λάφια σικλιαρένα-αμέν ότι χάνικ πριν τι μερέλ, ο Ιησούς τζανέλας ότι κερντάας σαρέ οντουλά σο μανγκέλας λέσταρ ο Ιεχωβά. Αφού ατσσικιαρντάς σαστό πο γκι μέχρι κο μεριπέ, ο Ιησούς κερντάς μπουτ πράγματα. Πρώτον, σικαντάς ότι ο Μπενγκ ισί ψεύτης. Σικαντάς ότι εκ τέλειος τζενό μπορίνελας τι ατσσικιαρέλ σαστό πο γκι σο-ντα τι κερέλας ο Μπενγκ. Δεύτερον, ντινάς πι ζωή σαρ λύτρος. Χάρη κι θυσία σο κερντάς, ο ατελείς τζενέ μπορίνενα τι αβέν λατσσέ αμαλά ι Ντεβλέσαρ ντα τι τθερέν ι ελπίδα τι τζουβντιόν για πάντα. Τρίτον, σικαντάς ότι ο τρόπος σο κυβερνίνελα ο Ιεχωβά ισί ο πιο λατσσό ντα καθαριντάς ο ναβ πι Νταντέσκο κατά λατζ.

14. Σαρ πρέπει τι αβάς αποφασισμέ τι τζουβντιάς ο κάθε ντιβές; Εξηγίνεν.

¹⁴ Σο σικλιάσα κατά λάφια ι Ιησούσκε; Πρέπει τι αβάς αποφασισμέ τι ατσσικιαράς σαστό αμαρό γκι κάθε ντιβές. Ανέν τουμαρέ γκοντιάτε ο λάφια ι πφραλέσκε Μάξγουελ Φρεντ, σο ισινέ εκ οντουλένταρ σο σικλιαρένας κι Βιβλική Σχολή Γαλαάδ της Σκοπιάς. Σε εκ διεθνής συνέλευση, ο πφραλ Φρεντ κερντάς λάφι για την πίστη: «Μα μουκχέν γιαβινάκε οντουβά σο μπορίνενα τι κερέν ή τι βακερέν αντιβές. Ισινέν σίγουροι ότι κα τζουβντιόν γιαβίν; Τι τζουβντιόν ο κάθε ντιβές σαρ τι αβέλας η τελευταία ευκαιρία τι σικαβέν ότι αξίνενα τι τζουβντιόν για πάντα». Οτθάρ, τι τζουβντιάς ο κάθε ντιβές σαρ τι αβέλας η τελευταία ευκαιρία τι ατσσικιαράς σαστό αμαρό γκι! Αζομάν, ατζέ-ντα άμα κα ερεσάς κο μεριπέ, κα μπορίνας τι βακεράς: «Ιεχωβά, κερντόμ ο πιο λατσσό σο μπορίναβας για τι ατσσικιαράβ σαστό μο γκι, τι σικαβάβ κο Μπενγκ ότι ισί ψεύτης ντα τι δικαιώναβ το ναβ ντα τι κυριαρχία!»

15. Καλέ πραγμάσκε ισινέ σίγουρος ο Ιησούς σαρ βακερέλα ο εδάφιος Λουκάς 23:46;

¹⁵ Σο βακερντάς ο Ιησούς; (Διαβάνεν Λουκάς 23:​46) Με μπαρί σιγουριά ο Ιησούς βακερντάς: «Ντάντε, τι βαστέντε μουκχάβα μι ζωή». Ο Ιησούς τζανέλας ότι λέσκο μέλλον ισινέ κι Ιεχωβάσκο βας ντα  ισινέ σίγουρος ότι λέσκο Ντατ να κα μπιστρέλας-λες.

16. Σο σικλιόνα εκχέ πφραλέσταρ σο ισινέ 15 μπρεσένγκο;

¹⁶ Σο σικλιάσα κατά λάφια ι Ιησούσκε; Τι μουκχέν τουμαρί ζωή κο βαστά κι Ιεχωβάσκε. Για τι κερέν-λες ανταβά, πρέπει τι “ντεν μπέσα κο Ιεχωβά σαρέ τουμαρέ γκίσαρ”. (Παρ. 3:5) Ντικχέν ο παράδειγμας του Τζόσουα, εκχέ πφραλέσκο σο ισινέ 15 μπρεσένγκο ντα τθερέλας εκ πφαρό νασφαλιπέ σο κα μουνταρέλας-λες. Ο Τζόσουα να μανγκλάς τι κερέν λέσκε κάτι ο γιατροί σο κα τζάλας κόντρα κο νόμος κι Ντεβλέσκο. Χάνικ πριν τι μερέλ, βακερντάς πι νταγιάκε: «Ντάι ισινόμ κο βαστά κι Ιεχωβάσκε. . . . Ντα μπορίναβα τι βακεράβ τούκε με σιγουριά ακαβά: Τζανάβα ότι ο Ιεχωβά σίγουρα κα τζουβντιαρέλ-μαν κι ανάσταση. Βοβ ντικχλάς μο γκι ντα με μανγκάβα-λες μπαγιά». * Ο κάθε εκ αμένταρ κα αβέλας λατσσό τι πουτσέλ-πες: “Άμα με κα νακχάβας κάτι σο μπορεί τι κερέλας-μαν τι χασαράβ μι ζωή ντα τι δοκιμάνελ μι πίστη, κα μουκχάβας μι ζωή κο βαστά κι Ιεχωβάσκε ντα κα αβάβας σίγουρος ότι βοβ να κα μπιστρέλ-μαν;”

17, 18. Σο σικλιλάμ; (Ντικχέν ο πλαίσιος « Σο Σικλιάσα Κατά Τελευταία Λάφια ι Ιησούσκε»)

¹⁷ Σο σημαντικά πράγματα σικλιλάμ κατά τελευταία λάφια ι Ιησούσκε! Ανένα αμαρέ γκοντιάτε ότι πρέπει τι συγχωρίνας ι γιαβερέν ντα τι αβάς σίγουροι ότι ο Ιεχωβά κα συγχωρίνελ-αμέν. Τθεράσα ο προνόμιος τι αβάς αντρέ εκχέ φαμιλιάτε πφραλέντζαρ ντα πφενίντζαρ σο μανγκένα τι βοηθίνεν-αμέν. Αλλά κάνα μανγκάσα βοήθεια πρέπει τι τζας ντα τι βακεράς-λες. Τζανάσα ότι ο Ιεχωβά κα βοηθίνελ-αμέν τι νταϊντίνας σο-ντα δοκιμασία τι νακχάς. Ντα αγαβάσα καζόμ σημαντικός ισί τι τζουβντιάς ο κάθε ντιβές σαρ τι αβέλας η τελευταία ευκαιρία τι σικαβάς ότι τθεράσα σαστό γκι, σίγουροι ότι αμαρί ζωή ισί κο βαστά κι Ιεχωβάσκε.

¹⁸ Ισί μπαγιά ότι ο λάφια σο βακερντάς ο Ιησούς καζόμ μερέλας οπράλ κο κας σο βασανίνενας-λες σικλιαρένα-αμέν μπουτ πράγματα! Κάνα κα κεράς οντουλά σο σικλιλάμ, κα ντας καν κο λάφια σο βακερντάς αμένγκε ο Ιεχωβά: «Τι ασουνέν [μι Τσσαβές]».​—Ματθ. 17:5.