1-2. Oganirire akanga Yezu alimo erhi aderha enderho zage nzinda.

GWALI mushi nsiku 14, mwezi gwa Nisani mwaka gwa 33 muli Kano Kasanzi Kirhu (K.K.K.). Enyuma z’okushobeka Yezu n’okumutwira olubanja kw’ebi arhajijire, Yezu ashekerwa, bamushurhagula, na buzinda bamumanika oku murhi gw’amalibuko. Bakomerha emisumari omu maboko n’omu magulu gage. Ngasi kuyisa na ngasi kuderha ali ayumva amalumwa makali bwenene. Cikone ashinganine aderhe bulya ebi aderha biri bya bulagirire.

² Olekage rhuganirire enderho Yezu aderhaga hisanzi hisungunu embere afê oku murhi gw’amalibuko n’amasomo rhwakaciyigiriza kugerera ezo nderho. Kw’okuderha oku rhukola ‘rhwamuyumvirhiza.’​—Mt. 17:5.

3. Nkaba bandi Yezu aganiriraga erhi aderha: “Larha, obafe bwonjo”?

³ Bici Yezu alonzagya okuderhera? Erhi Yezu âli oku murhi gw’amalibuko, asalira ntya: “Larha, obafe bwonjo.” Afe bonjo bandi? Kugerera ezi nderho zikulikire rhwanabona bandi abo aderhaga: “Barhamanyiri eci badwirhe bajira.” (Lk. 23:33, 34) Nkaba Yezu aganiriraga abasoda b’e Roma bakomerhaga emisumari omu maboko n’omu magulu gage. Kobinali barhalimanyire Yezu ali indi. Kandi byanahashikana akagirhanya oku bandi bantu bakagiderha oku atundikwe, cikone buzinda bakayishir’iba n’obuyemere muli ye. (Ebj. 2:36-38) Oko kurhashinganini koshi bamukoleraga kurharhumaga ayumviza abo bantu obumvu erhi kubabikira akarhinda. (1 Pt. 2:23) Lubero n’oko, Yezu ashenga Yehova oku ababalire ngasi boshi balonzagya oku afê.

4. Bici rhwakaciyigiriza kugerera okubabalira n’obulonza Yezu ababaliraga abakagimuhagalika?

 ⁴ Bici ezo nderho za Yezu zakarhuyigiriza? Aka Yezu, nirhu rhushinganine rhube babidu okukababalira abandi. (Kl. 3:13) Bantu baguma, ciru n’ab’omu mulala gwirhu, banarhuhagalike bulya barhahugusirwi obwemere bwirhu n’ebirhuma rhulama kulebé. Banarhuderhera obunywesi, banarhuha oloho embere z’abandi, banabera ebitabu birhu kandi erhi kurhuyobohya oku barhujirira kubi. Ahali hw’okubabikira akarhinda, rhwanashenga Yehova oku abayigule omurhima lyo nabo bahikira aha bayemera okuli. (Mt. 5:44, 45) Hali amango rhubona oku kuli kuzibu okubabalira abarhugokize, bwenene erhi bakarhujirira kubi bwenene. Cikone erhi rhwakaleka obumvu n’akarhinda birhôle enafasi omu murhima gwirhu, rhwanaba erhi rhuli rhwacilumisa rhwene. Mwali wirhu muguma ahugwîre ntya: “Nahugûsirwe oku okubabalira kurhali kuyemereza amagosa erhi kuleka abandi bakarhujirira oku banalonzize. Cikone kuli kuderha oku nshinganine nyake okubika akarhinda.” (Enna. 37:8) Erhi rhuhiga okubabalira, rhurhacigendekera rhwaciyumva kubi enyanya z’amagosa barhujiriraga.​—Ef. 4:31, 32.

5. Bici Yezu alaganyize mushumusi muguma walimumanike oku murhi eburhambi bwage, na bulya gurhi amuhâga eco ciragane?

⁵ Bici Yezu alonzagya okuderhera? Bishumusi bibirhi byâli bimanisirwe oku murhi eburhambi bwa Yezu. Aha murhonderho ebyo bishumusi nabyo byarhondera okuderha Yezu kubi. (Mt. 27:44) Cikone, enyumya z’aho muguma wa mulibo ashanja entanya zage. Ahikira ah’aderha oku “nta cibi ciguma” Yezu anajijire. (Lk. 23:40, 41) Na kandi, ayerekana n’obwalagale obuyemere bwage oku Yezu afûka n’oku anabe mwami. Abwira Yezu ntya: “Yezu, oyishinkengera han’oja omu Bwami bwawe.” (Lk. 23:42, NWT) Kobinali oyo mulume eyerekîne obuyemere buzibu! Yezu amushuza ntya: “Kobinali nkubwizire ene, wayishiba haguma na nani [arhali omu Bwami, cikone] omu Paradizo.” (Lk. 23:43, NWT) Rhuhugûkwe oku Yezu yene wahâga oyo mulume eco ciragane. Yezu alimanyire oku Ishe aba wakubabalira, co carhumaga aderha enderho z’okuha obulangalire oyo mushumusi wali hofi kufâ.​—Enna. 103:8.

6. Bici enderho Yezu abwiraga olya mushumusi zakarhuyigiriza?

⁶ Bici ezo nderho za Yezu zakarhuyigiriza? Yezu aba bulangashane b’oborhere bw’Ishe. (Hb. 1:3) Yehova aba mubidu okurhuyumviza obonjo n’okurhubabalira erhi rhwakahungama kobinali ebintu bibi rhwajijire omu mango gageraga n’okuba n’obuyemere oku rhwanababalirwa ebyaha birhu kugerera omuko gwa Yezu Kristu. (1 Yn. 1:7) Bantu baguma baguma banabone nka Yehova arhakababalira amagosa bajiraga omu mango gageraga. Erhi akaba onaciyumve ntyo, wanarhanya kw’aka kanga: Hisanzi hisungunu embere Yezu afê, ayumviza mushumusi muguma obonjo bulya amarhondera okuyerekana obuyemere. Co cirhumire orhanye kunganaci ayumviza obonjo abakozi bage bishwekerezi bajira okwabo koshi lyo barhumikira amarhegeko gage!​—Enna. 51:1; 1 Yn. 2:1, 2.

7. Nk’oku biyerekinwe omu lwandiko lwa Yowane 19:26, 27, bici Yezu abwizire nnina na Yowane, na bulya gurhi ababwiraga ntyo?

⁷ Bici Yezu alonzagya okuderhera? (Osome Yowane 19:26, 27.) Yezu alonza owayishishibirira nnina, bulya byanahashikana abe alikola mukana. Nkaba balumuna ba Yezu bakashibirire amalagirire gw’omubiri ga nnina. Cikone, indi wakashibirire amalagirire gage  g’ekiroho? Nta kantu koshi-koshi kayerekine oku balumuna ba Yezu bali bamaba banafunzi bage. Cikone, Yowane yehe ali ntumwa na mwîra murhonyi wa Yezu. Yezu akagibona abantu bakagicilunga haguma naye omu kuharamya Yehova oku go mulala gwage. (Mt. 12:46-50) Co carhumaga obuzigire bwa Yezu kuli Mariya n’okubona alimushibirire kwarhuma aha Yowane omukolo gw’okushibirira amalagirire gage g’ekiroho. Abwira nnina ntya: “Ala mugala wawe” na buzinda abwira Yowane ntya: “Ala nyoko” Kurhondera olo lusiku, Yowane aba nka mwene Mariya anarhondera okumushibirira nk’oku akanashibirire nnina. Kobinali obo buli buzigire bunji Yezu ayeresire nnina muzigirwa wamushibiriraga kurhangira erhi aburhwa n’okuyimanga aha burhambi bwage erhi afâ!

8. Bici enderho Yezu abwiraga Mariya na Yowane zakarhuyigiriza?

 ⁸ Bici ezo nderho za Yezu zakarhuyigiriza? Obwîra bwirhu haguma na bene wirhu na bali birhu Bakristu bwanasêra kulusha obwîra rhujira haguma na bene wirhu b’omu mulala. Bene wirhu b’omu mulala banarhuhagalika na ciru banarhulikirira, cikone nk’oku Yezu arhulaganyagya, erhi rhwakabêra bishwekerezi kuli Yehova n’ikubuliro Lyage, ‘rhwanahâbwa kali igana’ kulusha ebi rhwahezize. Bene wirhu banji banabà nka bagala birhu erhi bali birhu, n’abandi banaba nka ba nyama erhi ba larha. (Mk. 10:29, 30) Gurhi ociyumva omu kubà omu mulala gw’ekiroho gubamwo ecinyabuguma kugerera obuyemere n’obuzigire bajira kuli Yehova na kuli ngasi muguma wabo?​—Kl. 3:14; 1 Pt. 2:17.

9. Bici enderho za Yezu ziri omu lwandiko lwa Mateyo 27:46 zirhuyigirizize?

⁹ Bici Yezu alonzagya okuderhera? Hisanzi hisungunu embere Yezu afê, ayakuza n’izu linene erhi: “Nyamuzinda wani, Nyamuzinda wani, carhumire ondeka?” (Mt. 27:46) Ebibliya erhahugwîri bulya gurhi Yezu aderhaga ntyo. Ciru akaba ntyo, rhwaganirira ebi ezi nderho zakarhuyigiriza. Akantu kaguma zakarhuyigiriza kuli kubona oku erhi Yezu aderha ezo nderho, ahikiriza obulebi buli omu Ennanga 22:1. * Na kandi, ziyerekine n’obwalagale oku Yehova arhaliyubasire “ecogo c’okulanga” Omugala. (Ayu. 1:10, NWT) Yezu ahugûkwa oku Yehova amulesire aje omu maboko g’abashombanyi bage lyo bamurhangula kuhika oku buzinda; nta wundi muntu okola ojire omu marhangulo ga ntyo. Na kandi, ezi nderho zaliyerekine oku ali mweru-kweru: arhajiraga igosa lyoshi-lyoshi lyakarhumire anigwa.

10. Masomo gahi rhwakaciyigiriza kugerera enderho Yezu abwiraga Ishe?

¹⁰ Bici ezo nderho za Yezu zakarhuyigiriza? Isomo liguma rhwakakula aho kuli kumanya oku rhurhakagirhanya mpu Yehova anarhuyasa amazibu gakahira obuyemere bwirhu omu marhangulo. Nk’oku Yezu anarhangulagwa kuhika oku buzinda, nirhu rhushinganine rhube bwishwekerezi kuhika ebwa kufâ nka byamahûna ntyo. (Mt. 16:24, 25) Cikone, rhuyemire n’obwalagale oku Yehova arhakayemera rhwaja omu marhangulo garhalusire emisi yirhu. (1 Kr. 10:13) Erindi isomo rhwakaciyigiriza, kuli kuhugûkwa oku aka Yezu, byanahashikana nirhu rhulibuzibwe okurhakwanini. (1 Pt. 2:19, 20) Abantu banarhuhagalike arhali mpu bulya rhwajijire akantu kabi, cikone bulya rhurhaba cigabi c’er’igulu na kandi bulya rhunakahamiriza okuli. (Yn. 17:14; 1 Pt. 4:15, 16) Yezu alihugûsirwe bulya gurhi Yehova amulekereraga oku alibuzibwe. Lubero na Yezu, hali amango abakozi bishwekerezi ba Yehova bali omu mazibu bahikira aha bacidosa bici birhumire Yehova alekerera bintu bilebe bibahikire. (Hab. 1:3) Nnamahanga wirhu w’obonjo na wakulembera aba amanyire oku erhi abo bene wirhu bacidosa ntyo, kurhaba kubula obuyemere, cikone babà balagirire oku burhulirize yene akabaha.​—2 Kr. 1:3, 4.

11. Bici byarhumaga Yezu aderha enderho ziri omu lwandiko lwa Yowane 19:28?

¹¹ Bici Yezu alonzagya okuderhera? (Osome Yowane 19:28.) Bici byarhumaga Yezu aderha erhi: “Enyorha yamangwarha”? Aderhaga ntyo “ly’ahikiriza amandiko,” k’okudeha bulebi buli omu Ennanga 22:15, Mashi Bible, budesire ntya: “Amarhi  ganganyire ekanwa Nka kula omurhi guyuma. Olulimi lwanzogobarhine ebiraka.” Kandi, enyuma z’amalibuko goshi Yezu ageziremo, ciru na galya malumwa makali gw’oku murhi gw’amalibuko, alishinganine ayumve enyorha. Alilagirire oku mishi ly’ayusa enyorha yamugwerhe.

12. Bici rhwakaciyigiriza kugerera ezi nderho Yezu aderhaga “enyorha yamangwarha”?

¹² Bici ezo nderho za Yezu zakarhuyigiriza? Yezu arhabonaga nka buli buzamba okubwira abandi oku ali aciyumva; nirhu rhurhashinganini rhukarhanya ntyo. Banji muli rhwe banabone oku kurhali kwa bulagirire okuhuna abandi oburhabale. Cikone erhi rhwakalagirira oku burhabale, rhurhakagirhindira okubwira abandi burhurhabale. Kwa lwiganyo, erhi akaba rhuli bashosi erhi balwala, rhwanaba n’obulagirire b’omwîra wakarhujîra ecibuye erhi kurhulusa emwa munganga. Erhi rhwakavunika omurhima, rhwanabwira omugula erhi mwîra wirhu Mukristu okuzire kiroho entanya zirhu ly’arhubwira “akanwa kinja” karhushagalusa. (Mig. 12:25) Rhukengere oku bene wirhu na bali birhu babà barhuzigire bwenene, banaba balonzize okurhurhabala amango rhuli “omu mbaka.” (Mig. 17:17) Cikone barhakahashisoma ebirhuli emurhima. Nkaba barhakanahashimanya ebi rhulagirireko nka rhurhababwiziri byo.

13. Bici Yezu ahikirizize omu kuba mwishwekerezi kuhika ebwa lufû?

¹³ Bici Yezu alonzagya okuderhera? Olo lusiku enyuma z’emidi aha nsa mwenda, nsiku 14 mwezi gwa Nisani, Yezu ayakuza n’izu linene ntya: “Byamahikirira!” (Yn. 19:30, NWT) Hisanzi hisungunu embere z’okufâ kwage, Yezu ali amahikiriza ngasi byoshi Yehova amubwiraga oku ajire. Omu kuba mwishwekerezi kuhika ebwa lufû, Yezu ahikiriza bintu binji. Burhangiriza, ayerekana oku Shetani aba munywesi. Yezu ayerekana oku byanahashikana omuntu mwimana abêre mwishwekerezi ciru Shetani akamuhira omu mazibu gahi. Bwa kabirhi Yezu ahâna akalamo kage nka ngombôlo. Olufû lwage lwahashisize bene bantu barhali bimana babe n’obulyo bw’okuyegerera Yehova n’obw’okuyishilama ensiku n’amango. Bwa kasharhu, Yezu ayerekana oku kobinali Yehova yeshinganine okurhambula bene bantu, anakûla izino ly’Ishe kw’izinga.

14. Muhigo guhi rhushinganine rhukarhôla ngasi lusiku? Ohugûle.

¹⁴ Bici ezo nderho za Yezu zakarhuyigiriza? Rhukwanine rhuhige okuba bishwekerezi lusiku oku lundi. Rhuganirire ebi Mwene wirhu Maxwell Friend wàli mwalimu oku Masomo g’Egileadi aderhaga. Oku ntimanano nkulu y’omw’igulu lyoshi, Mwene wirhu Friend ajira ehotuba eganirire obwishwekerezi. Aderha ntya: “Ebi wakajijire erhi kuderha ene, orhakagiderha mpu wabijira erhi kuderha irhondo. K’omanyire erhi irhondo waba ozine? Okabona ngasi lusiku oku l’olusiku lwawe luzinda oshinganine oyerekanemwo oku olonzize olame ensiku n’amango.” Neci, rhushinganine okubona ngasi lusiku oku lo lusiku lwirhu luzinda l’okuyerekana obwishwekerezi bwirhu! N’erhi rhwakahikira aha rhwafâ, rhwanahashiderha ntya n’obwalagale: “Yehova, najijire okwani koshi lyo ngendekera nabêra mwishwekerezi kuli we, lyo nyereka Shetani oku ali munywesi, lyo mpalira izino lyawe n’ehaki yawe y’okurhambula!”

15. Nk’oku biyerekinwe omu lwandiko lwa Luka 23:46, bulangalire buhi Yezu agwerhe?

¹⁵ Bici Yezu alonzagya okuderhera? ( Osome Luka 23:46.) N’obulangalire boshi, Yezu aderha ntya: “Larha, mpizire omûka gwani omu maboko gawe.” Yezu alimanyire oku Yehova ye wakamuhashisa okucibilama, analimanyire oku arhakamuyibagira.

16. Bici olwiganyo l’oyu Muhamirizi wa myaka 15 lukuyigirizize?

¹⁶ Bici ezo nderho za Yezu zakarhuyigiriza? Obe mubidu okuhira akalamo kawe omu maboko ga Yehova. Ly’ojira ntyo, oshinganine “oyegemere Nyamuzinda n’omurhima gwawe gwoshi.” (Mig. 3:5) Rhuganirire olwiganyo lwa Joshua, Muhamirizi muguma wa myaka 15, walilwazire endwala ndarhi. Alahira okubukwa n’amafumu gapingine n’Amarhegeko ga Nnamahanga. Hisanzi hisungunu embere afê, abwira nnina ntya: “Nyama, ndi omu maboko ga Yehova. . . . Nkubwizire ntya n’obwalagale: Manyire oku ayishinfûla amango afûla abafîre. Anasome omu murhima gwani, ayishi oku mba muzigire.” * Ngasi muguma muli rhwê anacidosagya ntya: ‘Erhi nakaja omu kanga kahira obuyemere bwani omu marhangulo, ka nanahira obuzine bwani omu maboko ga Yehova n’okulangalira oku arhakanyibagira?’

17-18. Masomo gahi rhwayizire? (Olole ecisanduku cidesire “ Ebi Rhwakaciyigiriza Kugerera Enderho Nzinda za Yezu.”)

¹⁷ Rhwaciyigirizize masomo manji g’obulagirire kugerera enderho nzinda za Yezu! Rhwakengezibwe obulagirire b’okubabalira abandi n’okuyemera oku Yehova naye anarhubabalire. Rhugwerhe olukengwa l’okuba n’omulala gwa bene wirhu na bali birhu baba babidu okurhurhabala. Cikone amango rhulonzize barhurhabale rhushinganine rhubabwire ebi rhulagirireko. Rhuyemire oku Yehova anarhurhabala rhulembere ngasi mazibu gakarhuhikira. Na kandi, rhwabwine obulagirire b’okubona ngasi lusiku oku lo lusiku lwirhu luzinda l’okuyerekana obwishwekerezi bwirhu n’okulangalira oku ciru rhwakafâ Yehova anarhufûle.

¹⁸ Kobinali, enderho nzinda Yezu aderhaga erhi ali hofi hw’okufâ, zanarhuyigiriza bintu binji! Erhi rhwakakolesa amasomo rhuciyigirizize kugerera ezo nderho, rhwanayerekana oku rhurhumikire ebi binwa Yehova aderhaga kuyerekera Omugala: “Mukaz’imuyumva.”​—Mt. 17:5.