1-2. Yesuusi reyara albaanni ikkinore xawisi.

YANNA 33 M.D.; barru Niisaani tonaashooleho. Yesuusa kaphunni kassanse jaddo loosino yine beebbate yoo yinihu gedensaanni, qacifantenna beebba assiˈne misimaaretenni ganne qarru haqqira sunte kaˈnoonni. Misimaare angasinna lekkasi dadhite eˈino. Foolannohunna mitto mittonka qaale coyiˈrannohu lowo geeshsha qarrameeti. Kayinni coyiˈrannori lowo geeshsha hasiisannore ikkino daafira coyiˈra hasiissinosi.

² Hanni xa Yesuusi qarru haqqira sutame reyara kae heeˈre coyiˈrinorenna isi coyiˈrinorinni maa ronseemmoro xiinxallino. Wole yaattonni hanni ‘isi yaannota macciishshino.’—Mat. 17:5.

3. Yesuusi “Annaˈya! . . . saonsa aguri” yee huucciˈrinohu ayeoo daafira ikkara dandaanno?

³ Yesuusi mayino? Yesuusi haqqaho sutame heeˈre, “Annaˈya! . . . saonsa aguri” yee huucciˈrino. Yesuusi Annisi ayeoo sao agurara huucciˈranni no? Isi “Diaffe assitanni noona” yaasi ayeoo daafira coyiˈranni nooro leellishshanno. (Luq. 23:33, 34) Yesuusi angasinna lekkasi misimaaretenni haqqaho qolte gantinori Roomu olanto daafira coyiˈranni nooha ikkikki digatino. Insa isi Maganu Beetto ikkinota diaffino. Qoleno Yesuusi hatto yiinohu, ‘Iso shinona’ yee kae gedensoonni kayi iso ammananno manna hede ikkara dandaanno. (Soq. 2:36-38) Yesuusi beebba assiˈnoonnisiha ikkirono dicaaccaawino, hattono koma diamaxxino. (1 Phe. 2:23) Hatteentenni isi, shitanni  noosire gatona yaannonsa gede Yihowa huucciˈrino.

4. Yesuusi gibbannosire gatona yaasinni maa ronseemmo?

⁴ Yesuusi coyiˈrinorinni maa ronseemmo? Yesuusi gede, ninkeno woloota gatona yaa hasiissannonke. (Qol. 3:13) Mitu manni wole agurina fiixinke nafa ammananke woy Kiristaanu heeˈranno heeshsho huwata hoogino daafira giwankera dandaanno. Insa ninke daafira kapho coyidhara, mannu albaanni shollishshankera, borronke huntara wole agurina gawajjitannonketa kulte waajjishiishshankera dandiitanno. Gibbannonkerira koma amaxxantenni, Yihowa halaale huwattanno gede wodanansa fananno gede huuccatto assiˈra dandiineemmo. (Mat. 5:44, 45) Hakko iso wolootu lowo geeshsha miiccinonkeha ikkiro, mito woyite insa gatona yaa qarra ikkitankera dandiitanno. Ikkollana aaraambeemmohanna koma amande keeshshineemmoha ikkiro, tini ninke umonke gawajjitannonke. Mitte rodoo togo yitino: “Gatona yaa, wolootu assitinoeri garaho yaa woy insa gawajjitoena yine wodha ikkitinokkita huwatoomma. Gatona yaa, koma amada agurate.” (Far. 37:8) Mitto mancho gatona yineemmo woyite, isi assinonkehu gara ikkinokki coyi aaraambeemmo gede assannonketa hooˈlinanni heeˈnoommo.—Efe. 4:31, 32.

5. Yesuusi jaddo loose mulesi sutamino manchira mayi hexxo uyino? Isi tenne hexxo uyinohu mayiraati?

⁵ Yesuusi mayino? Jaddo loossinori lamu mannooti Yesuusi mule sutante no. Umi qara lamunku Yesuusa qacifattinosi. (Mat. 27:44) Gedensoonni kayinni lamunku giddo mittu hedosi biddi assiˈrino. Isi Yesuusa “Mitte saono diassino” yee coyiˈrino. (Luq. 23:40, 41) Hakkiinnino sae Yesuusi reyotenni kaˈˈannotanna moote ikke gashshannota ammanannota coyiˈrino. Isi Yesuusa “Mootichaˈya! Gashshootikkinni daatto woyite qaagie” yiino. (Luq. 23:42) Kuni manchi lowo ammana noosita leellishino! Yesuusi isira “Techo ani halaale yeemmohena, ati ane ledo [iimi Mangistera ikkikkinni] Gannatete heeˈratto” yiinosi. (Luq. 23:43, NW) Yesuusi “ani,” “ati” hattono “ane” yee, qaale eanni noohu hakko manchira ikkinota bade kulino. Yesuusi Annisi maarannoha ikkinota afino daafira, konni reyanni noohu jaddo loosino manchira hexxo uyino.—Far. 103:8.

6. Yesuusi jaddo loose sutamino manchira coyiˈrinorinni maa ronseemmo?

⁶ Yesuusi coyiˈrinorinni maa ronseemmo? Yesuusi woˈmunni woˈma Annisi faale haˈrino. (Ibi. 1:3) Alba loonsoommo cubbira addinta maaro eˈnummoronna Yesuusi Kiristoosi mundeenni cubbinkera maaro afiˈneemmota ammannummoro Yihowa ninke gatona yaatenna maarate quqquxamanno. (1 Yoh. 1:7) Mitootaho alba loossino soˈrora Yihowa gatona yaannonsata ammana qarra ikkitansara dandiitanno. Mito woyite aterano hatto macciishshamannoheha ikkiro tenne hedi: Yesuusi reyara albaanni, jaddo loose sutamino mancho maarinosita leellishannore coyiˈrinohu, ammana noosita leellishanni heeˈreennanniiti. Hatto ikkiro, Yihowa hajajosi agadhate sharrantannorenna ammanante magansidhannosire hakkiinni roorse maarannonsati dihuluullissannote!—Far. 51:1; 1 Yoh. 2:1, 2.

7. Yohaannisi 19:26, 27 kultanno garinni, Yesuusi Maariyaamiranna Yohaannisira mayino? Isi hatto yiinohu mayiraati?

⁷ Yesuusi mayino? (Yohaannisi 19:26, 27 nabbawi.) Yesuusa amasiri yaachishinosi; ise hatte yannara gunnitte ikkitukki digattino.  Roduuwisi isera maalaamittete hasiisannosere shiqishshannoha ikkara dandaanno. Kayi ayyaanaamittetenni hasiisannosere ayi wonshannose? Hakka woyite Yesuusi roduuwi rosaanosi ikkitinota leellishannori dino. Yohaannisi kayinni ammanamino soqqamaasinchootinna Yesuusira lubbote jaalaati. Yesuusi ledosi Yihowa magansidhannore ayyaanaamittete maatesi gede asse laˈˈanno. (Mat. 12:46-50) Konnira, Yesuusi Maariyaami baxannonna mararannose daafira, ayyaanaamittetenni towaatannose gede Yohaannisira eeggo uyiˈrino. Isi amasira “Beettikki kuneeti” yiino. Yohaannisira kayi, “Amakki kuneeti” yiinosi. Hakko barrinni kayise Yohaannisi Maariyaamira beettise gede ikke, amasi gede  asse towaatinose. Yesuusi anje heeˈreenna towaaxxitinositanna reyi woyite mulesi noota tenne ayirrado mancho lowo geya baxannoseta leellishino!

8. Yesuusi Maariyaamiranna Yohaannisira coyiˈrinorinni maa ronseemmo?

⁸ Yesuusi coyiˈrinorinni maa ronseemmo? Ammanate roduuwinke ledo noonke aante, muli fiixinke ledo noonke aantenni roortara dandiitanno. Fiixinke giwankera woy kaadankera nafa dandaanno; kayinni Yesuusi yiino garinni, Yihowawanna dirijjitesiwa gamba yine heeˈnummoro “xibbe ero” afiˈneemmo. Lowo roduuwi oosote, amatenna annu gede ikkitannonke. (Maq. 10:29, 30) Ammanatenni hattono Yihowaranna mimmitoho noonsa baxillinni mittooˈmitinote ayyaanaamittete maate miila ikkakkinni mayi macciishshamannohe?—Qol. 3:14; 1 Phe. 2:17.

9. Yesuusi Maatewoosi 27:46 coyiˈrinorinni maa huwanteemmo?

⁹ Yesuusi mayino? Yesuusi reyara kae heeˈre “Maganoˈya, Maganoˈya, mayira agurittoe?” yiino. (Mat. 27:46) Qullaawu Maxaafi Yesuusi hatto yiinohu mayiraatiro xawise dikulanno. Kayinni isi coyiˈrinorinni huwanteemmori no. Umihunni, Yesuusi hatto yee coyiˈrasi Faarso 22:1 noo masaalo woˈmitanno gede assitino. * Hakkiinnino sae, Yesuusi coyiˈrinori Yihowa Beettisira qarru iillannosikki gede ‘huxxa ikkinosikkita’ leellishanno. (Iyo. 1:10) Yesuusi, diinnasi jeefote geeshsha fonqoltannosi gede Annisi fajjinota afino; Yesuusi geeshsha fonqolaminohu mittu manchino dino. Qoleno Yesuusi coyiˈrinori, shinannisi gede assanno cubbo loosinokkita leellishanno.

10. Yesuusi Annisira coyiˈrinorinni maa ronseemmo?

¹⁰ Yesuusi coyiˈrinorinni maa ronseemmo? Umihunni, Yihowa ammananke fonqolannori iillannonketa hoolannonke yine heda hasiissannonkekkita ronseemmo. Yesuusi jeefote geeshsha fonqolaminonte gede, ninkeno reyote geeshsha nafa ikkiro ammanammeemmota leellishate qixxaawa hasiissannonke. (Mat. 16:24, 25) Ikkollana Yihowa wolqankera aleenni ikkino fonqoli iillankera fajjannokkita addaxxa dandiineemmo. (1 Qor. 10:13) Layinkihunni, Yesuusi gede ninkeno miincankera dandiinanni. (1 Phe. 2:19, 20) Mannu giwannonkehu gara ikkinokkire assinoommo daafira ikkikkinni, alamete wido ikkinoommokkihuraatinna halaale farciˈneemmo daafiraati. (Yoh. 17:14; 1 Phe. 4:15, 16) Yesuusi, Yihowa qarru iillasira fajjinohu mayiraatiro wodanchino. Mite ammanantino soqqamaano kayinni, ‘Yihowa qarru iillankera fajjinohu mayiraati?’ yite heddanno woyiti heeˈrara dandaanno. (Imb. 1:3) Maarannohunna cincanno Maganinke, insa hatto yite heddannohu ammana ajjinonsahura ikkinokkita afino; insara shesho baalate Buicho ikkinohu Yihowa aanno shesho hasiissannonsa.—2 Qor. 1:3, 4.

11. Yesuusi Yohaannisi 19:28 noo hedo coyiˈrinohu mayiraati?

¹¹ Yesuusi mayino? (Yohaannisi 19:28 nabbawi.) Yesuusi “Gooˈrummo” yiinohu mayiraati? Isi hatto yiinohu “Qullaawu Qaali woˈmanno gede” yaano Faarso 22:15 noo masaalo woˈmitanno gedeeti; qummeeshshu “Kokke qaˈa yite mooltue; arrawiˈya gaˈroho qaˈmie” yaanno. Qoleno Yesuusira lowo qarri iillinosi daafiranna haqqu aana sunte baasa shetinsoonnisi daafira, lowo geya gooˈrinoti dihuluullissannote. Konnira gooˈro fulanno gede kaaˈlo hasiissinosi.

12. Yesuusi “Gooˈrummo!” yee coyiˈrinorinni maa ronseemmo?

 ¹² Yesuusi coyiˈrinorinni maa ronseemmo? Yesuusi giddosita woleho kuˈla saalsiisannoreeti yee dihedino; ninkeno hatto yine heda dihasiissannonke. Mito woyite hasiisannonkere wolootaho kuˈla hasiˈneemmokkiha ikkara dandaanno. Ikkollana kaaˈlo hasiissannonke woyite woloota kaaˈleˈˈe yaa fokkifata dihasiissannonke. Lawishshaho, geedhimma woy dhuku anje amaddinonkeha ikkiro, woloota dikko soqqa woy akimete minira haadhe hadhannonke gede xaˈmira hasiissannonkeha ikkara dandaanno. Hexxo mudhinoommoha woy baasa yaandoommoha ikkiro, songote cimeessi woy wolu ayyaanaamittetenni gikki yiino Kiristaanchi hasaaphinanna macciishshannonke gede woy ‘danchu hasaawinni’ jawaachishannonke gede xaˈmiˈra dandiineemmo. (Law. 12:25) Ammanate roduuwinke baxxannonketanna “qarru barra” kaaˈlitankera hasidhannota deˈnoonke. (Law. 17:17) Ikkirono insa giddonketa afa didandiitanno. Ninke hasaapha hoongummoro, insa kaaˈlo hasiissannonketa afa hooggara dandiitanno.

13. Yesuusi reyote geeshsha ammanaminoha ikke wonshino coyi maati?

¹³ Yesuusi mayino? Niisaani 14nni barra honse saate balla Yesuusi huurosi gotti asse “Xaate ikkino” yiino. (Yoh. 19:30) Yesuusi reyara kae heeˈre hatto yaasi, Annisi assara hasiˈrannore baala wonshinota leellishshanno. Yesuusi reyote geeshsha ammanaminoha ikke, lowo coye assino. Umihunni, Sheexaanu kaphaancho ikkinoti leeltanno gede assino. Yesuusi, Sheexaanu aye geeshshi fonqolo abbirono, guuta ikkino manchi ammaname heeˈra dandaannota leellishino. Layinkihunni, Yesuusi heeshshosi wodo asse uyino. Isi wodote kakkalo ikke reyasi guuntete xeˈne noonsa manni Maganu ledo jaalooma kalaqiˈranno gedenna hegere heeshsho hexxo afiˈranno gede assitino. Sayikkihunni Yesuusi, Yihowa aliidimma xabbe leeltanno gedenna Annisi suˈmi ayirranno gede assino.

14. Mitto mittonka barra ma garinni heeˈra hasiissannonke? Xawisi.

¹⁴ Yesuusi coyiˈrinorinni maa ronseemmo? Barru baala ammanamme heeˈrate murciˈra hasiissannonke. Hanni alba Giiliyaadi Rosi Mine rosiisannohu Roduu Maksiweli Fireendi coyiˈrinore hendo. Isi mittu jawu gambooshshiwa ammanamate daafira lallawo shiqishanni togo yiino: “Teyo assa woy coyiˈra dandiitinannire gaˈara gashshidhinoonte. Gaˈa ma ikkitinanniro affinoonnini? Hegere heeshsho afiˈrate ikkadda ikkitinoonnita leellishshinannihu techo kaˈa wolu barri nooˈnekkihu gede assitine hedde.” Mitto mittonka barra ammanammoommota leellinsheemmohu jeefote barri gede assine laˈno! Hatto ikkiro reyineemmo gede assannori tuncu yiinkero nafa togo yine coyiˈra dandiineemmo: “Yihowa, ammanamoommoha ikke heeˈrate, Sheexaanu kaphaancho ikkinoti leeltanno gede assate, hattono suˈmikki ayirrannonna aliidimmakki xabbe leeltanno gede assate danduummore baala assoommo!”

15. Luqaasi 23:46te Yesuusi maa addaxxannota coyiˈrino?

¹⁵ Yesuusi mayino? (Luqaasi 23:46 nabbawi.) Yesuusi mitte giddonni “Anna! Kuneeti, lubboˈya atera eeggo uyiˈroommo” yiino. Yesuusi albillittete heeshshosi Yihowa anga noota afino; hattono Annisi hawannosikkita addaxxino.

16. Jooshuwa yinannihu 15 diro ikkannosi rodii woˈnaalshinni maa rosootto?

¹⁶ Yesuusi coyiˈrinorinni maa ronseemmo? Heeshshoˈne Yihowara eeggo uyidhe. Hatto  assate Yihowa ‘woˈmu wodaniˈnenni addaxxa’ hasiissannoˈne. (Law. 3:5) Hanni hurannokki dhibbi amadinosihu 15 dirihu Jooshuwa yinanni rodii lawishsha laˈno. Isi Maganu seeri ledo sumuu yaannokki garinni xagisiˈrate maahoyye diyiino. Isi reyara albaanni amasira togo yiino: “Ama, ani Yihowa anga noommo. . . . Mittoreno dihuluullameemmo; Yihowa reyotenni kayisannoeta afoommo. Isi giddoˈyata afino; Iso lowo geeshsha baxeemmosi.” Mittu mittunku ninkeneeto togo yine xaˈma dandiineemmo: ‘Reyemmo gede assaera dandaannohu ammanaˈya fonqolanno coyi tuncu yiiero, heeshshoˈya Yihowara eeggo uyiˈre isi qaagannoeta addaxxeemmo?’

17-18. Konni birxichira maa ronsoommo? (“ Yesuusi Reyara Albaanni Coyiˈrinorinni Maa Ronseemmo?” yitanno saaxineno lai.)

¹⁷ Addanko, Yesuusi reyara albaanni coyiˈrinorinni lowore ronseemmo! Isi coyiˈrinorinni, woloota gatona yaa hasiissannonketanna Yihowano gatona yaannonketa addaxxa dandiineemmota ronseemmo. Ninke kaaˈlate qixxaabbinori ammanate roduuwi noonke daafira baˈraaˈnoommoreeti! Ikkollana, kaaˈlo hasiissannonke yannara kaaˈleˈˈe yaa fokkifata dihasiissannonke. Yihowa aye geeshshi qarri iillinkerono dandiine saˈneemmo gede kaaˈlannonketa anfoommo. Heeshshonke Yihowa anga noota addaxxine, mitto mittonka barra ammanammoommota leellinsheemmohu jeefote barri gede assine laˈno.

¹⁸ Ee, Yesuusi qarru haqqira sutame reyara kae heeˈre coyiˈrinorinni lowore ronseemmo! Konne roso loosu aana hosiinseemmoha ikkiro Yihowa “Isi yaannota macciishshe!” yee Beettisi daafira coyiˈrinore wonshinanni heeˈnoommo.—Mat. 17:5.