1-2. Ino iaby ty raha niseho talohani-safà farany nataoni-Jesosy rey?

ANDRO 14 Nisana tao 33 tamy zay. Nasara nanao raha raty Jesosy, bakeo nisazỳ amy raha tsy nataony. Nikizakizahy ie, nivangoa, bakeo nifantsihy tamy hazo fijalea. Nifantsihy ty tanany noho ty tombony. Narary azy iaby ndre ty hiay ndre ty hivola. Fe tsy maintsy nivola ie satria nisy raha bevata teany hovolany.

² Ndao tsika handiniky ty raha nivolanini-Jesosy tamy ie nihanto tamy hazo fijalea teo iny, noho ty raha azontsika ianara baka amy raha nivolaniny rey. ‘Hijanjy’ azy tsika laha mandiniky ani-reo.​—Mat. 17:5.

3. Ia ty teani-Jesosy hovolany lafa nivola ie hoe: “Baba, engao ty hadisoan-drozy”?

³ Ino ty raha nivolanini-Jesosy? Nivavaky ho zao Jesosy tamy ie nihanto tamy hazo fijalea teny: “Baba, engao ty hadisoan-drozy.” Hadisoan’ia teany hovolany io? Hanampy antsika hahay ani-zay raha nivolanini-Jesosy manaraky toy: “Tsy hain-drozy raha ataon-drozy io.” (Lioka 23:33, 34) Ho raha maramila romanina namantsiky ty tanani-Jesosy noho ty tombony rey ro teany hovolany. Tsy hain-drozy hoe ia marina ie. Mety vahoaky nangataky ty hamonoa azy rey koa ro teani-Jesosy hovolany, fe bakeo nino azy olo rey. (Asa. 2:36-38) Tsy misy antony tokony hahafaty ani-Jesosy. Fe ndre zay, tsy neloky ie na nieritseritsy hoe tsy hanenga ty hadisoan’olo nanenjiky azy rey. (1 Pet. 2:23) Vomaiky aza ie nivavaky tamy Jehovah mba hanenga ty hadisoani-azy namono azy rey.

4. Parè hanenga ty hadisoani-mpanohitsy azy rey avao Jesosy, ino ty azontsika ianara baka amy zay?

 ⁴ Ino ty azontsika ianara baka amy raha nivolanini-Jesosy io? Tokony ho parè hanenga hadisoa manahaky ani-Jesosy tsika. (Kol. 3:13) Mety hanohitsy antsika ty olo sisany, anatini-zay ty longontsika, satria tsy mahay ty raha inoantsika noho ty fomba fiainantsika rozy. Mety hamory vandy mikasiky antsika rozy, hanala baraka antsika, hamotiky ty bokintsika, na hamango antsika mihintsy. Mety ho meloky tsika, fe aleo mivavaky amy Jehovah mba hanampy ani-azy manohitsy antsika rey haneky ty fahamarina. (Mat. 5:44, 45) Mety ho sarotsy amintsika kindraiky ty hanenga hadisoa, sirtò laha niraty fanahy amintsika rozy. Fe laha mitanjaky lolompo tsika sady tsy manenga hadisoa mihintsy, le tsika avao ro harary. Nivola ranabavy raiky zay hoe: “Takatsiko fa ty hoe manenga hadisoa le tsy midika hoe mieritseritsy fa soa raha nataon’olo iny na manenga azy hanao raty an-tena avao. Midika avao raha io hoe mifily tsy heloky amin’olo iny sasy tena.” (Sal. 37:8) Laha manenga hadisoa tsika, le tsy hengantsika hampeloky antsika avao raha tsy nety iny.​—Efes. 4:31, 32.

5. Ino ty raha nampitamanini-Jesosy ani-malaso raiky nifantsihy tanilany teo iny, le manino ie ro nanao ani-zay?

⁵ Ino ty raha nivolanini-Jesosy? Nisy malaso roe lahy nifantsihy niaraky tamy Jesosy. Nikizakizaky azy tse rozy roe lahy tamy voalohany. (Mat. 27:44) Fe niova ty raiky amin-drozy lafa bakeo. Nivola mihintsy ie hoe “tsy nanao raha raty” Jesosy. (Lioka 23:40, 41) Nasehony koa fa nino ie hoe hovelomy ndraiky Jesosy le ho lasa mpanjaka ndraiky andro any. Nivola tamy Jesosy ie hoe: “Jesosy e, tiarovo aho lafa avy amy Fanjakànao any iha.” (Lioka 23:42) Tena nanam-pinoa lahilahy io! Namaly azy Jesosy hoe: “Volaniko aminao mazava soa androany, fa hiaraky amiko [tsy amy Fanjakà any, fa] amy Paradisa any iha.” (Lioka 23:43.) Henteo fa nampiasa mpisolo anara “ko” noho “iha” Jesosy eo. Mampiseho raha zay hoe nivanta tamy lahilahy iny fampitamana nataony io. Haini-Jesosy fa mamindra fo Babany, ka afaky nampitamà raha soa ani-malaso fa ho maty io ie.​—Sal. 103:8.

6. Ino ty azontsika ianara baka amy raha nivolanini-Jesosy tamy malaso iny?

⁶ Ino ty azontsika ianara baka amy raha nivolanini-Jesosy io? Tena nitovy tanteraky tamy Babany Jesosy. (Heb. 1:3) Parè hamindra fo noho hiferinay antsika Jehovah laha tsika tena maneny amy raha raty nataontsika sady mino hoe afaky hahazo fanengà hadisoa tsika baka amy soro nataoni-Jesosy Kristy. (1 Jaona 1:7) Mety sarotsy amin’olo sisany ty hino hoe afaky manenga ty hadisoa nataony taloha Jehovah. Laha ho zay ty raha tsapanao, le eritsereto zao: Taloha kelikelini-hahafatesani-Jesosy, le natorony fa namindra fo tamy lahilahy malaso vo nino azy iny ie. Ka vo handraky Jehovah tsy hamindra fo amy mpanompony tsy mivaliky, sady manao ze azon-drozy atao mba hanoriha ty didiny!​—Sal. 51:1; 1 Jaona 2:1, 2.

7. Ino ty raha nivolanini-Jesosy tamy Maria noho Jaona laha hentea ty Jaona 19:26, 27, le manino ie ro nivola ani-zay?

⁷ Ino ty raha nivolanini-Jesosy? (Vakio Jaona 19:26, 27.) Ta hikarakara ani-reniny Jesosy satria fa maty valy ie. Mety afaky nikarakara ze raha nilàni-reniny ty troky raiky tamy Jesosy. Fe ia ty hanampy azy tsy  hivaliky amy Jehovah? Atao raha mbo tsy nisy lasa mpianatsini-Jesosy troky raiky aminy reo, kanefa Jaona ninamany sady apostoly tsy nivaliky. Sahala amy fianakaviany ara-panahy ty fandrambesani-Jesosy ani-ze olo niaraky taminy nanompo ani-Jehovah. (Mat. 12:46-50) Tena teani-Jesosy Maria sady teany ho voakarakara soa. Farany nankininy tamy Jaona raha zay satria hainy fa afaky hanampy azy hanompo ani-Jehovah avao Jaona. Hoy ty asany tamy reniny: “Io anakilahinao!” Le hoy koa ty asany tamy Jaona: “Io reninao!” Nanomboky teo, le sahala anakilahini-Maria Jaona ka nikarakara azy mitovy amy reniny. Natoroni-Jesosy hoe tena teany Maria satria nikarakara azy soa liany nahakely azy sady  mbo mitsanga anilany eo koa amy andro hahafatesany zao!

8. Ino ty azontsika ianara baka amy raha nivolanini-Jesosy tamy Maria noho Jaona?

⁸ Ino ty azontsika ianara baka amy raha nivolanini-Jesosy io? Tokony ho ambony mandilatsy ty fitiavantsika ty longontsika ty fitiavantsika ani-rahalahy noho anabavintsika reo. Mety hanohitsy antsika na hanenga antsika ty longontsika. Fe nampitamà antsika Jesosy hoe laha tsy miala amy Jehovah noho amy fandaminany tsika, le hahazo “in-jato mandilatsy” ty raha nafointsika. Lasa hahazo anakilahy, anakampela, reny, na baba tea antsika tsika. (Mar. 10:29, 30) Ino ty raha tsapanao satria iha anatini-fianakavia miharo raiky, manam-pinoa noho tea ani-Jehovah sady mifankatea?​—Kol. 3:14; 1 Pet. 2:17.

9. Ino ty raha haintsika baka amy raha nivolanini-Jesosy amy Matio 27:46 ao?

⁹ Ino ty raha nivolanini-Jesosy? Nikaikaiky ho zao Jesosy taloha kelikelini-hahafatesany: “Ndranahariko ô, Ndranahariko ô, nanino ro nahafoy ahy iha?” (Mat. 27:46) Tsy hazavanini-Baiboly hoe nanino Jesosy ro nivola an’io. Fe ino ty raha haintsika baka amy safàny reo? Voalohany, lafa nivola ani-reo Jesosy le nanatanteraky ty faminania amy Salamo 22:1 ao. * Faharoe, hita amy safà reo koa hoe tsy “niaro” ani-Anakilahiny io Jehovah. (Joba 1:10) Nihaini-Jesosy zany hoe nengani-Jehovah hitsapa ty finoany zisiky hahafatesany olo nalay azy rey. Mbo tsy nisy mihintsy olombelo nitratsini-fitsapà manahaky nahazo ani-Jesosy io. Ankoatsini-zay, manaporofo safà reo hoe tsy nanao raha raty tokony hamonoa azy Jesosy.

10. Ino ty raha azontsika ianara baka amy raha nivolanini-Jesosy tamy Babany iny?

¹⁰ Ino ty azontsika ianara baka amy raha nivolanini-Jesosy io? Voalohany, tsy tokony hitamà tsika hoe hiaro antsika amy ze fitsapà iaby mahazo antsika Jehovah. Manahaky ty nahazo ani-Jesosy, le tokony ho parè tsy hivaliky zisiky farany tsika, ndre mety hahafaty antsika aza raha zay. (Mat. 16:24, 25) Fe ndre zay, afaky matoky tsika fa tsy hanenga antsika ho tratsini-fakam-panahy mandilatsy ze zakantsika Ndranahary. (1 Kor. 10:13) Faharoe, mety ho tratsini-tsy rariny manahaky nahazo ani-Jesosy iny koa tsika. (1 Pet. 2:19, 20) Ampijalini-mpanohitsy reo, ohatsy, tsika ndre tsy nanao raha raty, satria tsy miharo amy tontolo toy sady manambara ty marina. (Jaona 17:14; 1 Pet. 4:15, 16) Nihaini-Jesosy soa hoe manino ie ro nengani-Jehovah hijaly. Fe tsy ho zay iaby ty ataoni-mpanompo-Ndranahary tsy mivaliky lafa misy raha mahazo an-drozy. Nieritseritsy, ohatsy, ty sisany hoe manino raha rey ro engà-Ndranahary hiseho. (Hab. 1:3) Fe mamindra fo noho mahaliny raha Ndranaharintsika iny ka hainy soa fa tsy hoe tsy ampy finoa mpanompony rey, fa mila fampahereza baka aminy avao.​—2 Kor. 1:3, 4.

11. Nanino Jesosy ro nivola ani-safà amy Jaona 19:28 ao io?

¹¹ Ino ty raha nivolanini-Jesosy? (Vakio Jaona 19:28.) Nanino Jesosy ro nivola hoe: “Marandrano aho?” Nivola ani-zay ie mba “hahatanteraky ty Soratsy Masy”, zany hoe ty faminania amy Salamo 22:15 ao. Zao ty volaniny: “Maiky manahaky pilakini-valàny  tanimanga io ty heriko. Mipitiky amy lanilaniko ty lelako.” Ankoatsini-zay, tena nijalijaly Jesosy tamy hazo fijalea teo, le azo antoky hoe tsy maintsy narandrano biby ie. Nila fanampea ie mba hahafaky farandranony zay.

12. Ino ty raha azontsika ianara baka amy safàni-Jesosy toy hoe “marandrano aho”?

¹² Ino ty azontsika ianara baka amy raha nivolanini-Jesosy io? Tsy nieritseritsy Jesosy hoe malemy ie laha miresaky ze raha tsapany. Tsy tokony hieritseritsy ho zay koa tsika. Mety misy amintsika tsy tea mangataky fanampea. Fe tsy tokony hisalasala hila fanampea amin’olo hafa tsika laha misy raha ilàntsika. Laha fa antitsy, ohatsy, tsika na tsy salama, le mety hangataky amy ty namantsika mba hanao bazary ho antsika na hanampy antsika handeha amy dokotera. Laha kivy koa tsika, le mety hila olo hijanjy antsika na hampahery antsika, ohatsy hoe anti-panahy na Kristiana matotsy hafa. (Ohab. 12:25) Tiarovo hoe tea antsika rahalahy noho anabavintsika reo ka ta hanampy antsika rozy ‘lafa sahira’ tsika. (Ohab. 17:17) Fe tsy ho hain-drozy ty raha an-tsaintsika any na ty raha tsapantsika. Mety tsy ho hain-drozy aza hoe mila fanampea tsika laha tsy mivola.

13. Ino iaby ty raha nivitani-Jesosy lafa tsy nivaliky mihintsy ie zisiky nahafaty azy?

¹³ Ino ty raha nivolanini-Jesosy? Tamy folakandroni-14 Nisana, tokotokony tamy telo teo, le nivola marè biby Jesosy hoe: “Vita!” (Jaona 19:30) Hita amy safàni-Jesosy io hoe tamin’ie fa narìny ho maty iny le fa nihainy hoe nivitany iaby ty raha nampanaovini-Jehovah azy. Tsy nivaliky mihintsy ie zisiky nahafaty azy ka maro biby ty raha nivitany. Voalohany, voaporofoni-Jesosy hoe mpavandy Satana. Natorony hoe vitan’olombelo lavorary ty tsy mivaliky mihintsy ndre ino ino raha ataoni-Satana aminy. Faharoe, nanome ty ainy ho vilim-panavota Jesosy. Lafa nanao ani-soro io ie le afaky hifandramby soa amy Ndranahary ty olombelo tsy lavorary sady afaky mitamà hiay zisiky farany. Fahatelo, niporofoeny hoe Jehovah ro mana zo handay ani-raha iaby zao sady nihamasininy koa ty anarani-Babany io.

14. Tokony ho tapa-kevitsy hanao ino tsika sanandro? Hazavao.

¹⁴ Ino ty azontsika ianara baka amy raha nivolanini-Jesosy io? Tsy maintsy tapa-kevitsy tsy hivaliky avao tsika sanandro. Mba diniho moa ty raha nivolanini-Rahalahy Maxwell Friend, mpampianatsy tamy Sekolini-Gileada taloha, lafa ie nanao lahateny tamy fivoriambe iraisam-pirenena. Hoy ty asany: “Ka alìny hamaray laha misy raha azonao atao na volany androany. Matoky va iha hoe mbo ho velo hamaray? Atorò avao sanandro hoe andro liànao iny ty farany azonao ampisehoa hoe tena maeva hiay zisiky farany iha.” Loniky lahy hatorontsika avao sanandro hoe tsy mivaliky tsika! Ka ndre ho maty aza tsika le ho afaky hivola hoe: “Jehovah, nahavita tsy nivaliky zisiky farany aho, voaporofoko hoe mpavandy Satana, sady nanamasy ty anaranao aho noho nanoha ty zonao handay!”

15. Laha hentea ty Lioka 23:46, ino ty raha natokisani-Jesosy?

¹⁵ Ino ty raha nivolanini-Jesosy? (Vakio Lioka 23:46.) Tsy nisalasala mihintsy Jesosy nivola hoe: “Baba, apetrako an-tananao eo ty aiko.” Haini-Jesosy fa mianky amy Jehovah ty mbo hahavelo azy ndraiky ka tena natoky ie hoe tsy hanalino azy mihintsy Babany.

16. Ino ty ianaranao baka amy tantarani-rahalahy 15 tao io?

 ¹⁶ Ino ty azontsika ianara baka amy raha nivolanini-Jesosy io? Ka mivaliky amy Jehovah mihintsy ndre miatriky raha mety hahafaty. Mila ‘matoky ani-Jehovah amy ty fonao iaby’ iha laha ta hahavita ani-zay. (Ohab. 3:5) Eritsereto moa ty tantarani-Joshua, rahalahy 15 tao. Nisy arety mahafaty nahazo azy, le nijalijaly ie. Fe tsy naneky fitsaboa tsy mifanaraky amy ty lalàna-Ndranahary ie. Zao ty nivolanini-Joshua tamy mamany taloha kelikelini-hahafatesany: “Mama, fa an-tanani-Jehovah eo aho. ... Tena matoky ani-zay aho mama. Haiko fa hovelomini-Jehovah ndraiky aho. Mahay ty raha eritseretiko noho ty am-poko ao ie, sady zaho koa tena tea azy.” * Tena soa aloha laha samby mieritseritsy sandrany tsika hoe: ‘Laha miatriky fitsapà mety hahafaty ahy aho, tsy hivaliky amy Jehovah mihintsy va aho le hatòky fa hahatiaro ahy ie?’

17-18. Ino iaby ty raha nianarantsika? (Henteo ty efajoro hoe “ Ino ty Ianarantsika Baka amy Safà Farany Nataoni-Jesosy Rey?”)

¹⁷ Tena nianarantsika raha maro vatany ty raha nivolanini-Jesosy tamy ie nihanto tamy hazo fijalea teo! Nampitiaro antsika raha rey hoe tena ilà ty manenga hadisoa noho matoky hoe hanenga ty hadisoantsika Jehovah. Mana rahalahy noho anabavy maro parè hanampy antsika tsika. Fe tokony hivola tsika laha mila fanampea. Haintsika fa hanampy antsika hiaritsy Jehovah ndre ino ino raha sarotsy mety hahazo antsika. Hitantsika fa tena vatan-draha ty ampisehoantsika amy andro kiraidraiky hoe tsy mivaliky tsika, ka matoky tsika hoe hovelomini-Jehovah ndre maty.

¹⁸ Maro biby ty raha azontsika ianara baka amy raha nivolanini-Jesosy tamy hazo fijalea teo rey! Laha orihintsika raha rey, le atorontsika hoe manaraky ani-raha nivolanini-Jehovah mikasiky Anakilahiny iny toy tsika: “Janjino ie.”​—Mat. 17:5.