1-2. Kɔkɔndɔla wopo woyalisa Yeso winá wɔ ndatepelaka etepela wɛnde w’ekomo lanɛ lá looko.

LA MBILE kɛ Nisana 14, 33 Ɛ.K., m’ɔkɔngɔ w’iwɔ ndotonghanyɛ akambo w’engolo edjinge ndɔkfɛyɛ nkambo lá kɛnɛ kɛ ndotanaghana, Yeso ɔlamaka, akfusamaka edjinge apanyemaka l’otamba wɔ ndjolo. Wɔkɔkɔmɛka sɛti l’ɛwɔ edjinge l’ekolo wɛnde. Lohomo lonkfumɔ lohomolande edjinge otepela onkfumɔ w’otepelande ndɔpɛyɛka paa efula. Koko, nde ladjɛ ntepela, ladjikɛnde alekɔ l’akambo wa djonyi wa ntepela.

² Nyontshɔ tokoshishima etepela wɛ Yeso w’indatepela winá wɔ ndapanyema l’otamba wɔ ndjolo edjinge elakanyelo w’okokaso mba m’eteyi. L’itepela inkina, nyontshɔ ‘towekameyɛ.’​—Mat. 17:5.

3. Anto wakɔna wa Yeso ndakanelaka mbala imɔtshi winá wɔ ndatepela ante: ‘Papa, imeyɛwɔ’?

³ Kɛkɔnge kɛ Yeso ndatepela? M’ɔkɔngɔ wɔ iwɔ ndopanyɛ l’otamba wɔ ndjolo, Yeso alɔmbaka ante: ‘Papa, imeyɛwɔ.’ Anto akɔna w’imeyɛwɔ? Iso mbaka nsakiso m’etepela wɛnde wɛwɔlama wɛnɛ: ‘Iwɔ wapewe kɛnɛ k’onanghawɔ.’ (Luka 23:33, 34) Yeso atepelaki mbala imɔtshi nkambo dj’angala w’ase Ɔrɔma wɔkɔkɔmisa sɛti l’ɛwɔ la l’ekolo l’otamba wɔ ndjolo. Iwɔ watewaki nsɔsɔlɔ oyɛnde na. Lonkina nde akanelaki mbala imɔtshi anto wayalisa l’anteyi k’oloyi w’anto walɔmbaki dj’iwɔ ndoyaka, koko wayisa ndoyala la djawo te nde l’ɔkɔngɔ. (Ele. 2:36-38) Yeso atawola djɛ akambo wa nyɛtshi w’iyonanghɛ ndotshinda djɛ ndjala la nkɛlɛ te anto edjinge ndalamela onkomba. (1 Pɛ. 2:23) Koko, nde alɔmbaka Yehova djɛ nde nyimeyɛ anto woyakisa.

4. Olakanyelo wɔkɔnge w’owaso má ɛkɔpa kɛ Yeso kɛ nyimeyɛ anto ankina?

 ⁴ Olakanyelo wɔkɔnge w’okokaso mba m’etepela wɛ Yeso? Etengo Yeso, iso ladjɛ ndjalaka entshupa djɛ nyimeyɛka anto ankina. (Kɔl. 3:13) Anto amɔtshi, ndjila edjinge boto djɛso, nkoka ntɛnyɛ ndjolo mande wapasipisoyɛ akambo wawolaso edjinge yopo yɛso yɛ lowiko. Iwɔ nkoka ntepela ongolo lá nkambo djɛso, ntɔpɛyɛ nsɔnyi lá ntondo k’anto, ntatela enkanda wɛso, kana kaanga ntokota lá demba. L’edjena k’iso ndawombela onkomba, iso nkoka ndɔmba Yehova djɛ nde ndaakotshɛ djɛ lofu lɔmɔtshi, wangoyawole akambo wa nsɔsɔlɔ. (Mat. 5:44, 45) Lá winá ɛmɔtshi, nkoka ndjala wolo djɛ nyimeyɛ onto, pekapeka ntsha iyombokonanghela nde nyɛtshi k’ekekete. Koko ntsha iso mbombelana nkɛlɛ l’oloko edjinge nsamba nyimeyɛ, tongoyananghela isɔmɛlɛ nyɛtshi. Nkaana kɛmɔtshi apakisolaka ante: “Lambosipisoyɛ ente, nyimeyɛ onto apɛnyɛ ante, nde apakonanghelisa nkambo djɛ nyɛtshi kana ombowatela mboka djɛ nde nkonanghelaka nyɛtshi. Koko nsakisolaka ngo ante, lambɔsɔna dj’ipa mbomba onkomba.” (Yee. 37:8) Winá w’ɔsaso nkano djɛ nyimeyɛ, iso nsɔnaka dj’ipa akambo wa nyɛtshi watokomela, nkomɛ lowiko lɔso ololo.​—Ɛfɛ. 4:31, 32.

5. Daka djɛkɔnge Yeso ndalake kanga wibi ɔmɔtshi w’iyapanyɛ l’otamba l’onkoko wɔnde, edjinge lamo ndolake daka djɛsɔ?

⁵ Kɛkɔnge kɛ Yeso ndatepala? Ase wibi ape wayalisa ladjɛ ndjakema wapanyemaka l’enkoko epe wɛkɔ wɛ Yeso. Má bango iyape kɛkɔ watateyɛka ndɔwɔla. (Mat. 27:44) Koko m’ɔkɔngɔ, ɔmɔtshi atshikitanyɛka oloko. Nde ayɛka ndosipisoyɛ ante Yeso atanangha ‘kaanga nkambo mɔ djɛ nyɛtshi.’ (Luka 23:40, 41) Nkambo deka djonyi nde, nde ayalaka la djawo ante Yeso angokfundɔ má nyɔnyi edjinge angɔlɔndjɛ etengo nkfumi lofu lɔmɔtshi. Nde ashimelaka Nkfumi ketavɔki kɛsɔ ante: ‘Yeso, ongonvungɔ winá wɔ ngongoyala l’Onkfumi wɔkɔ.’ (Luka 23:42) Ɔsɔngo djawo djɛnyisa mpame kɛsɔ! Yeso okadjimolaka ante: ‘Nsɔsɔlɔ ndeke okoshimelami lɔɔko ente, wɛ ongoyala la lemi [ape l’Onkfumi, koko] lá Paradiso.’ (Luka 23:43) Kota ente Yeso akambaka la totepela ‘lemi,’ ‘wɛ,’ edjinge ‘la lemi,’ djɛ nyɛnyɛ ante ndananghe daka djɛso ngo lende toko. Etengo ndewaka ante Papa kɛnde ndjokanaka djandji efula, Yeso atepelaka etepela wɛpɛyisa kanga wibi wotavɔki wɔsɔ nkongi.​—Yee. 103:8.

6. Olakanyelo wɔkɔnge w’owaso m’etepela wɛ Yeso te ose wibi?

⁶ Olakanyelo wɔkɔnge w’okokaso mba m’etepela wɛ Yeso? Yeso nyɛnyɛka l’onto lɔ Papa kɛnde lá yopo yɛ djɔ. (Heb. 1:3) Yehova alekɔ entshupa djɛ ntimeyɛ ntsha tomboyapɛla nsɔsɔlɔ m’akambo wa nyɛtshi w’isanaghaka ntondo edjinge ntsha tomboyala la djawo ente, iso nkokaka mba imeyelo kɛ evunga w’isanaghaka ntondo m’ekila wɛ Yeso Kristo. (1 Dj. 1:7) Anto amɔtshi nkoka ndjala l’okakasano djɛ ndjawola ambɔ Yehova nkoka ndawimeyɛ evunga wɛwɔ wɛ ntondo lotshinda lotshinda. Ntsha lá winá ɛmɔtshi ongoyawokake nghɔsɔ, mbɔ kokanela lá nkambo djɛnɛ: Lá ntondo kɛ nde mvɔ, Yeso ɛnyɛka djandji te ose wibi wotateyisa nyɛnyɛ djawo ngo akɔpa mvɔ. Iya mbala imangha Yehova okokande nyɛnyɛ djandji djɛnde te enkambi wɛnde wɛ nkɔmano wenangha kenkfumɔ k’okokawɔ nangha djɛ nɛmɛyɛ ɛlɛmbɛ wɛnde!​—Yee. 51:1; 1 Dj. 2:1, 2.

7. Etengo Djɔanɛ 19:26, 27 ɛnyɛwɔ, kɛkɔnge kɛ Yeso ndashimela Mariya nya Djɔanɛ, edjinge lamo ndatepela nghɔsɔ?

⁷ Kɛkɔnge kɛ Yeso ndatepela? (Wala Djɔanɛ 19:26, 27.) Yeso ayakiyanyɛki nkambo djɛ  nyɔ kɛnde, kanga loyalaki mbala imɔtshi wadjɛ odjo. Ankfune wande wakokaki ndokotsheyɛ ehomba wɛnde welá demba. Ko onto wɔkɔna w’okokaki ndokotsheyɛ ehomba wɛnde wɛ nyuma? Lako kaanga ekete k’ɛnyɛ ante wananyɔ wande washiyɛka ndjala ambeki wande lá winá wɔsɔ. Koko, Djɔanɛ ayalaki ɔpɔstɔlɔ wɔ nkɔmano edjinge ilongo yɛ ma ma yɛ Yeso. Yeso ɔsaki anto watɛmɔlaki Yehova etengo nkfumbo kɛnde kelá nyuma. (Mat. 12:46-50) Djɛkondeke, má ngandji edjinge wopo wɔ ndoyakiyanyɛka lá nkambo djɛ Mariya, Yeso alɔmbaka Djɔanɛ djɛ nde ndolamaka, mande nde ewaki ante nde ndeke longookotsheyɛka ehomba wɛnde wɛ nyuma. Nde ashimelaka nyɔ kɛnde ante: ‘Lenda wɔnako!’ Edjinge ashimelaka  Djɔanɛ ante: ‘Lenda nyɔ kɛko!’ Má lofu lɔsɔ, Djɔanɛ ayalaka etengo wɔna Mariya edjinge okotsheyɛki ehomba wɛnde etengo nyɔ kɛnde. Ɔsɔngo ngandji kɛ Yeso ndɛnyɛ omoto wɔ ntshina wɔsɔ, wolamaki la ngandji kenkfumɔ winá wɔ ndayalaka ilɛngɛ edjinge wemalisa lá ntondo kɛnde winá wɔ ndotavɔka!

8. Olakanyelo wɔkɔnge w’okokaso mba m’etepela wɛ Yeso te Mariya nya Djɔanɛ?

⁸ Olakanyelo wɔkɔnge w’okokaso mba m’etepela wɛ Yeso? Djokanelo djɛso isa wananyɔ l’ankaana yɛso y’Akristo nkoka ndjala wolo ndeka dj’oyɛso la boto djɛso djelá demba. Boto djɛso nkoka ntɛnyɛ ndjolo kaanga ntokandjɛ, koko etengo Yeso ndatolake, ntsha iso ntshikala entshupa la Yehova edjinge l’olonghanyelo Wɔnde, ‘tongowa mbala 100 ndeka’ kɛnɛ k’isatshutshɛ. Efula wangoyala wɔnaso wɔ mpame, wɔnaso w’omoto, nyɔ kɛso, kana papa kɛso kɛ ngandji. (Mar. 10:29, 30) Oyawokakɛ ngetemo lá kɛnɛ kelendana la ndɔsa opiko l’anteyi kɛ nkfumbo kɛ nyuma kɛ Yehova kembosanghana má djawo la má ngandji, ngandji te Yehova edjinge te wináso ankina?​—Kɔl. 3:14; 1 Pɛ. 2:17.

9. Kɛkɔnge ketolakanyɛ etepela wɛ Yeso welekɔ lá Mateo 27:46?

⁹ Kɛkɔnge kɛ Yeso ndatepala? Ndambo daambi lá ntondo kɛ nde mvɔ, Yeso awelelaka la djoyi djɛ wolo ante: ‘Ndjambe kɛmi, Ndjambe kɛmi, lamo nghomonkadjɛ?’ (Mat. 27:46) Bible apasakisola lamo Yeso ndatepela nghɔsɔ. Koko, tolende kɛnɛ k’okokaso ndjeka m’etepela wɛsɔ. Nkambo mɔtshi dj’ekaso nde, má ntepela etepela wɛsɔ, Yeso akotshɛka prɔfɛsi kelekɔ lá Yeembo 22:1. * Lonkina, etepela wɛsɔ nyɛnyɛka djɛ Yehova atadjinga Wɔnande la ‘lopango lɔ elamelo’. (Djɔ. 1:10) Yeso asipisoyɛki ante Papa kɛnde okadjɛka papoo l’ɛwɔ wɛ antonyi wande dj’iwɔ ndohemba tii l’ekomo, lá yopo yɛ kaanga onto ɔmɔ ndotahembamaka ntondo. Lonkina, etepela wɛsɔ weshikikɛ ambɔ nde atanangha kaanga nkambo mɔ djɛ nyɛtshi djɛ ndakoke ndjakema.

10. Elakanyelo wɛkɔnge w’okokaso mba m’etepela wɛ Yeso te Papa kɛnde?

¹⁰ Olakanyelo wɔkɔnge w’okokaso mba m’etepela wɛ Yeso? Olakanyelo ɔmɔtshi w’okokaso mba nde, topakoke nkongela djɛ Yehova ntolama má ekakasano w’ila djawo djɛso l’ohemba. Ngo ngete Yeso ndahembama tii l’ekomo, edjinge iso ladjɛ ndalɔngɔsɔla djɛ ntshikala la nkɔmano tii kaanga tá nyɔnyi. (Mat. 16:24, 25) Koko, toyashikikɛ ente, Ndjambe apangawola dj’iso mpembama tii lá kɛnɛ k’isopalekɔ l’akoka wa nkfulumeyɛ. (1 Kɔ. 10:13) Olakanyelo onkina w’owaso nde, etengo Yeso, iso nkoka nyɛna ndjolo kaanga ntsha topananghisa nkambo djɛ nyɛtshi. (1 Pɛ. 2:19, 20) Anto amɔtshi watɛnyɛka ndjolo nanghaka nkambo djɛso ape mande tombonangha nkambo mɔtshi djɛ nyɛtshi, koko mande tɔpɔshi opiko m’andja wanɛ edjinge tolekɔ poposanyɛ akambo wa nsɔsɔlɔ. (Dj. 17:14; 1 Pɛ. 4:15, 16) Yeso asipisoyɛki lamo Yehova ndawola djɛ nde nyɛna ndjolo. Koko otshikitanyi lande, enkambi ɛmɔtshi wɛ nkɔmano wɛ Yehova nkoka lá winá ɛmɔtshi ndawopola lamo Yehova awolande dj’akambo amɔtshi ndakomela. (Aba. 1:3) Ndjambe kɛso k’okanaka djandji edjinge kelekɔ la balentshitshi nsipisoyɛka ante apalekɔ djawo ndeke osambawɔ, koko walekɔ la djonyi dj’osukɔ wɔ ngo nde toko ndeke lokoka mpɛyɛ.​—2 Kɔ. 1:3, 4.

11. Lamo Yeso ndatepela etepela welekɔ lá Djɔanɛ 19:28?

¹¹ Kɛkɔnge kɛ Yeso ndatepala? (Wala Djɔanɛ 19:28.) Lamo Yeso ndatepela ante: ‘Lamboka  mposɛ kɛ washi’? Nde atepelaka nghɔsɔ ‘djɛ nkotshɛ efunelo’ welekɔ prɔfɛsi kelekɔ lá Yeembo 22:15, ketepela ante: ‘Wolo wɔmi womboma etengo etatshi kɛ bomba, lolemi lɔmi lombomalema l’ankfunda y’akɔtshi.’ Lonkina, Yeso ayalaki lá ndjolo, ndjila edjinge paa k’efula k’indokaka winá wɔ ndayalaka l’otamba wɔ ndjolo, nde ayalaka ladjɛ ndjoka mposɛ kɛ washi. Nde ayalaki la djonyi dj’okotshɔ djɛ nshiyɛ mposɛ kɛnde kɛ washi.

12. Olakanyelo wɔkɔnge w’okakaso mba m’etepela wɛ Yeso wɛnɛ: ‘lamboka mposɛ kɛ watshi’?

¹² Olakanyelo wɔkɔnge w’okokaso mba m’etepela wɛ Yeso? Yeso atoka nsɔnyi djɛ nshimela anto wopo wɔndoyawokaka edjinge iso ntopakoke ndjoka nsɔnyi. L’akambo efula welá lowiko lɔso, iso nkoka nsamba nshimela anto kɛnɛ k’oyɛso la djonyi. Koko ntsha lá winá ɛmɔtshi tolekɔ la djonyi dj’okotshɔ, totengengake djɛ ndɔmba okotshɔ w’anto ankina. Ndjɔmbɔmba, ntsha tombotshunda, kana tolekɔ l’ɛkɔmɔ, iso nkoka ndɔmba ilongo djɛ nde ntotshindjeyɛ tá lombengo kana tá opitalo. Ntsha tolekɔ l’okiyano ɔmɔtshi kana tɔmbɔlɛmba, iso nkoka ndɔmba ikokolo imɔtshi kana ilongo inkina y’Okristo yembotshunda lá nyuma djɛ nde ntekameyɛ kana ntoshimela ‘itepela yɛ wɔlɔ’ yetokembɛ. (Woo. 12:25) Nyontshɔ tovungɔke ente wananyɔ l’ankaana yɛso ntɔkɔpaka edjinge nkombolaka ntokotshɛ lá ‘winá wɔ ndjolo.’ (Woo. 17:17) Koko iwɔ wapalekɔ l’akoka wa ndjewa kɛnɛ kelekɔ lá wɔɔngɔ wɔso kana wopo woyawokaso. Iwɔ wapakoke ndjewa ambɔ tolekɔ la djonyi dj’okotshɔ ntsha topashimelisa.

13. Akambo wakɔnge Yeso ndakotshɛ má ntshikala la nkɔmano tii tá nyɔyi?

¹³ Kɛkɔnge kɛ Yeso ndatepala? Tá esidji esato, la nkɔlɔ djɛ Nisana 14, Yeso awelelaka la djoyi djɛ wolo ante: ‘Djembokotshama!’ (Dj. 19:30) Etepela wɛsɔ ntolakanyɛka ante ndambo daambi lá ntondo kɛ nde vɔ, Yeso ewaka ante amboshiyɛ nkotshɛ k’enkfumɔ kɛ Yehova ndɔlɔmbɛ djɛ nangha. Má nama nkɔmano djɛnde tii tá nyɔyi, Yeso akotshɛka akambo efula. Djɛ ntondo, nde ɛnyɛka ante Satana alekɔ kanga ongolo. Yeso ɛnyɛka ante onto wɔ djɔ nkoka ntshikala la nkɔmano nkfumɔ, kaanga kɛkɔnge k’ekoka Satana nangha. Dj’epe, Yeso apɛyɛka lowiko lɔnde etengo oshinga wɔ mbendo. Má ndambola lowiko lɔnde, Yeso apɛyɛka anto wa ntshamba djɛ djɔ mbamba kɛ ndjala la djokanelo djɛ wɔlɔ la Ndjambe edjinge nkongi djɛ mbika etshinda etshinda. Dj’esato, Yeso ɛnyɛka ante Papa kɛnde alekɔ ilɔndjɛ yɛ sii edjinge ɛdjɛka djiina djɛnde piyɔɔ má emamanyɛ.

14. Wopo wɔkɔnge okokaso nkáná djɛ mbikaka lofu la lofu? Pakisola.

¹⁴ Olakanyelo wɔkɔnge w’okokaso mba m’etepela wɛ Yeso? Iso ladjɛ nkáná djɛ nama nkɔmano djɛso lofu la lofu. Kolenda kɔmantɛrɛ kɛ wɔnanyɔ Maxwell Friend, kanga lokambaki etengo wetsha lá Nkalasa kɛ Giliyadɛ. Lá losanghanyɛ l’ekekete lotshikitanyi, wɔnanyɔ Friend atepelaka lá djamba djɛnde djetepelaki nkambo djelendana la nkɔmano ante: “Tokawoyɛke kɛnɛ k’okokɛ nangha kana ntepela lɔɔko tá lomi. Oyashikikɛ ente wɛ ongɔkɛsɔyɛ lomi? Wika lofu la lofu etengo oyɛwɔ nde mpeyi kɛko k’ekomo kɛ nyɛnyɛ ente wɛ ɛdje djɛ mbika lotshinda lotshinda.” Topakoke mbikaka lofu la lofu etengo oyɛwɔ nde mpeyi kɛso k’ekomo kɛ nama nkɔmano djɛso! Nghɔsɔ ndeke ntsha kaanga tɔkɔpa mvɔ, tongoyala l’akoka wa ntepela ente, “Yehova, nanghaka k’imakoke nangha djɛ nama nkɔmano djɛmi, djɛ nyɛnyɛ ente Satana alekɔ kanga ongolo edjinge nseela djiina djɛko la lowandji lɔkɔ!”

15. Lá nkilila Luka 23:46, Yeso ndoyashikikɛ ante nge?

¹⁵ Kɛkɔnge kɛ Yeso ndatepala? (Wala Luka 23:46.) La djawo nkfumɔ, Yeso atepelaka ante: ‘Papa lambotshika lohomo lɔmi l’ɛwɔ wɛko.’ Yeso ewaki ante, lowiko lɔnde lɔ l’etsho weyaye ndendamaka me Yehova, edjinge ayashikikɛki ante Papa kɛnde angovungɔ.

16. Olakanyelo wɔkɔnge ngombowa má kɛnɛ kekomelisa Owakɛ wɔ Yehova w’ɛnɔnyi 15?

¹⁶ Olakanyelo wɔkɔnge w’okokaso mba m’etepela wɛ Yeso? Yala entshupa djɛ ntshikala la nkɔmano te Yehova kaanga lowiko lɔko lombingila lá mbalaka. Djɛ nangha nkambo djɛsɔ, wɛ ladjɛ ‘ndawɛkɛ te Yehova l’oloko wɔko onkfumɔ.’ (Woo. 3:5) Kolenda ndjɔmbamba kɛ Joshua, Owakɛ ɔmɔtshi woyalisa l’ɛnɔnyi 15 woyalisa l’olando ɔmɔtshi wɔ wolo wɔtɔlisa tá nyɔyi. Nde atonaka ndɔsa mbɔki dj’etokana l’ɛlɛmbɛ wɛ Ndjambe. Ndambo daambi lá ntondo kɛ nde mvɔ, nde ashimelaka nyɔ kɛnde ante: “Nyɔ, ndekɔ l’ɛwɔ wɛ Yehova. . . . Lambokoshimela nghɔnɛ mama, l’eshikikelo k’enkfumɔ, lemi ndjewaka ente Yehova angokfundola. Nde nsipisoyɛka kɛnɛ kelekɔ l’oloko wɔmi edjinge nsɔsɔlɔ, lemi ndɔkɔpaka.” * Ɔmɔmɔ wɔ l’anteyi kɛso nkoka ndawopola nyɔmɛlɛ ante, ‘Ntsha lambopomana la nkambo mɔtshi dj’ila djawo djɛmi l’ohemba edjinge dj’ila lowiko lɔmi lá mbalaka, langotshika lowiko lɔmi l’ɛwɔ wɛ Yehova edjinge ndawɛkɛ te nde ente nde angoyonvungɔ?’

17-18. Elakanyelo wɛkɔnge isombeka? (Lenda lonkina ipapango “ Elakanyelo w’owaso m’etepela wekomo wɛ Yeso.”)

¹⁷ Ɔsɔngo efula k’elakanyelo wɛ djonyi w’okokaso mba m’etepela wekomo wɛ Yeso! Etepela wɛnde wɛsɔ wetovungola ambɔ iso ladjɛ nyimeyɛka anto ankina edjinge ndjala l’etshikikelo ente Yehova angotimeyɛ. Tolekɔ la mpeyi kɛ ndɔsa opiko l’anteyi kɛ nkfumbo kɛ wɔlɔ kɛ nyuma kɛ wananyɔ l’ankaana yelekɔ entshupa djɛ ntokotshɛ. Koko winá woyɛso la djonyi dj’okotshɔ, iso ladjɛ ndalɔmba okotshɔ. Iso ndjewaka ente Yehova angotokotshɛ djɛ nkfulumeyɛ ehemba enkfumɔ wengopomana laso. Edjinge iso nyɛnaka djonyi djɛ mbikaka nfu inkfumɔ etengo oyɛwɔ nde lufu lɔso l’ekomo lɔ nyɛnyɛ nkɔmano djɛso, la ndashikikɛ kenkfumɔ ente, lowiko lɔso lolamema wɔlɔ l’ɛwɔ wɛ Yehova.

¹⁸ Nsɔsɔlɔ, etepela wɛ Yeso w’indatepela l’otamba wɔ ndjolo ndola kfu l’elakanyelo! Má nkamba l’elakanyelo w’isombeka, tongɔlɛmɛyɛ etepela wɛ Yehova nyɔmɛlɛ ndatepela te Wɔnande ante: ‘Nyowokele.’​—Mat. 17:5.