1-2. Nkinyi kibadi kikitshikye kumpala kwa’shi Yesu akule bwa musango wa nfudilo?

TWI mwifuku dya 14 dya mweshi wa Nisane, kipwa kya 33 B.B. Kunyima kwabo kumudimbila na kumutshibila kimu bwa mwanda wa’shi mukite, Yesu abadi abamusepe, kumukyengyesha na ku nfudilo, abo nkumukokola ku mutshi wa makyenga. Misumadi ibadi imutubule masa na ngwa. Kupuuka na kwakula bibadi abimwelela bukopo. Anka bibadi abitungu nka’shi akule, mwanda badi na mwanda wina muulo wa kwakula.

² Twisambileyi mayi a nfudilo a Yesu, abakwile kumpala kwa’shi afwe pabadi ku mutshi wa makyenga. Mu ungi ngakwilo, ‘tumutemesheyi.’​—Mat. 17:5.

3. Yesu badi akwila pangi ba nnanyi nsaa ibakwile’shi “Yaaya, ebafwile lusa”?

³ Nkinyi kibadi akikyebe kwamba Yesu? Pabadi ku mutshi wa makyenga, Yesu batekyele amba’shi: “Yaaya, ebafwile lusa.” Bafwile ba nanyi lusa? Lwalulo atwilupete mu mayi aye aalondo: “Mwanda taabawuku kyabakitshi.” (Luk. 23:33, 34) Yesu badi pangi akwila basalayi bena Loma abadi bamukokole misumadi mu masa na ku ngwa. Tababadi abamuwuku kalolo nya. Badi dingi pangi akwila bantu abadi mu kisaka abadi batekye’shi bamwipe, anka kunyima abadi bakumine mwadi. (Bik. 2:36-38) Yesu ta badi mutadile myanda ya kukutwa kululama ibabadi bamukitshine bwa kumukyengyesha, imufiitshishe  munda sunga kulama ngo. (1 Mp. 2:23) Anka badi mutekye Yehowa bwa’shi afwile baba boso abadi bamwipe lusa.

4. Nkinyi ky’atulonbyela kwi Yesu pabitale kufwila beshikwanyi betu lusa?

⁴ Nkinyi ky’atulonbyela ku mayi a Yesu? Nka bu Yesu, abitungu tufwile bangi lusa. (Kol. 3:13) Bangi, mpa na bena kifuko netu, mbalombene kwitushikwa mwanda wa’shi tabapusha bi nkumino yetu na bi nshalelo etu. Mbalombene kwitudimbiila myanda ya madimi, kwitukwatshisha bufu munkatshi mwa bantu, kulwisha mikanda yetu, sunga kwitukyengyesha ku mbidi. Pamutwe pa kwibalamina ngo, twi kuteka Yehowa bwa’shi ebakwashe bakumine bya binyibinyi. (Mat. 5:44, 45) Ingi nsaa, mbilombene kwitwelela bukopo bwa kwibafwila lusa bikishekishe su betukitshina myanda i bubi bukile. Su twatadila’shi nsungu na ngo bimene mishi mwishimba dyetu, atwikyengyesha atwe banabene. Ungi mukwetu mukashi amba’shi: “Nemumone’shi kufwila bangi lusa t’akulesha’shi byabya byabadi bankitshine bi buwa, sunga’shi nakyebe’shi bangi bankitshine bi bubi. Anka abilesha’shi napele kulama ngo.” (Mis. 37:8) Nsaa y’atwata kitshibilo kya kufwila bangi lusa, atusangula bwa kupela kulama nsungu na ngo.​—Ef. 4:31, 32.

5. Nkinyi kibadi Yesu mulee umune a ku ba ntomboshi bababadi bepee pamune naye, na bwakinyi badi mumulee byabya?

⁵ Nkinyi kibadi akikyebe kwamba Yesu? Ba ntomboshi babidi abadi bepayibwe pamune naye. Kumpala, boso babidi abadi abamusepe. (Mat. 27:44) Anka kunyima, umune balekyele kumusepa. Batundwile’shi Yesu ta mukite “kintu su nkimune kii bubi.” (Luk. 23:40, 41) Na mwanda wina muulo, badi muleshe’shi ena lukumino p’aye kwamba’shi, Yesu akasangulwa ku lufu na akekala bu mfumu dingi efuku. Aye nkulungula Yesu’shi: ‘Yesu ontentekyeshe p’okekala bu mfumu.’ (Luk. 23:42) Binyibinyi, uno muntu badi muleshe lukumino lwi bukopo! Yesu badi mumwalule’shi: ‘Eyendo lelo uno nakulungula’shi, okekala nami [kushi mu Bufumu, kadi] mu mpaladiso.’ (Luk. 23:43) Lamina’shi Yesu alaa uno muntu pa bupenka bwaye pa kufubisha kishima “Okekala” na “ami.” Yesu badi mupe uno ntomboshi tabadi afu lukulupilo mwanda badi auku’shi Nshaye sha lusa.​—Mis. 103:8.

6. Mayi abadi Yesu mulungule ntomboshi aakulongyesha kinyi?

⁶ Nkinyi ky’atulonbyela ku mayi a Yesu? Yesu e nka bu Nshaye. (Eb. 1:3) Yehowa akumina kwitufwila lusa. Anka ebikitshi nka su tubalesha’shi tubelanga kwishimba bwa milwisho yetu na su twina lukumino mu mulambu wa Yesu Kidishitu. (1 Yo. 1:7) Bangi mbalombene kupwandjikisha’shi bi bukopo bwa’shi Yehowa ebafwile lusa ku milwisho yabadi bapwe kukita. Su bino binangu byakufwila, tala uno mwanda: Kapindji kapela kumpala kwa’shi Yesu afwe, badi muleshe ntomboshi lusa badi kyabanga kulesha lukumino. Yehowa ta mulombene kufwila bafubi baye ba sha lulamato lusa bakwete abakitshi mwabo moso bwa kukokyela miya yaye su?​—Mis. 51:1; 1 Yo. 2:1, 2.

7. Muyile Yowano 19:26, 27, nkinyi kibadi Yesu mulungule Mariya na Yowano, na bwakinyi badi mwakule bino?

⁷ Nkinyi kibadi akikyebe kwamba Yesu? (Badika Yowano 19:26, 27.) Yesu badi akyebe kupasukila nyin’aye tabadi pangi mupwe kufwisha mulume. Bakwabo abadya kumupasukila ku mbidi. Kadi, nnanyi badya kumupasukila mu kikudi? Ta kwi kintu su  nkimune akilesha’shi bakwabo tabadi balongi baye. Anka, Yowano badi mutumibwa sha lulamato na umune a ku ba kuuku ba p’eshimba ba Yesu. Yesu badi ata boso abalangwila naye Yehowa pamune bu kifuko kyaye kya mu kikudi. (Mat. 12:46-50) Bu bibadi mufule na apasukila Mariya, Yesu badi mutekye Yowano bwadya kupasukila nyin’aye, mwanda badi auku’shi amukwasha bwadya kutungunuka na kufubila Yehowa. Balungwile nyin’aye’shi: “Ngiwu mwan’obe” na alungula Yowano’shi: “Ngiwu nyinoobe.” Kubanga nka dyaya efuku, Yowano bafikile bu mwana a Mariya na badi amupasukila nka bu nyin’aye. Yesu badi muleshe’shi mmfule na ata na muloo uno mukashi badi mumupasukile kubanga efuku dibatandikilwe,  mpa na pabadi mwimane kulupese lwaye nsaa ibafwile.

8. Mayi abadi Yesu mulungule Mariya na Yowano aetulongyesha kinyi?

⁸ Nkinyi ky’atulonbyela ku mayi a Yesu? Kipwano kyatudi nakyo na bakwetu balume na bakashi, nkilombene kwikala bukopo kukila kyatudi nakyo na bena kifuko netu ba ku mbidi. Bena kifuko netu mbalombene kwitushikwa sunga kwitusumbushena, kadi, nka bu bitulee Yesu, patushaala balamate Yehowa na ndumbulwilo Aye, “atupete misusa lukama kukila” byatudi bashimishe. Be bungi mbafikye bu bana betu balume, bana betu bakashi, nyinetu sunga bu nshetu. (Mak. 10:29, 30) Opushaa naminyi pabitale kwikala mu kifuko kya mu kikudi ki mu buumune pa mwanda wa lukumino na kifulo​—kifulo bwa Yehowa na kifulo kya bu bana na bana?​—Kol. 3:14; 1 Mp. 2:17.

9. Nkinyi ky’atulongyela ku mayi a Yesu e mu Mateo 27:46?

⁹ Nkinyi kibadi akikyebe kwamba Yesu? Kapindji kapela kumpala kwa’shi afwe, Yesu belele musase amba’shi: “Efile Mukulu ande, Efile Mukulu ande, bwakinyi bosumbusheena?” (Mat. 27:46) Bible t’alesha bwakinyi Yesu badi mwakule ano mayi. Anka tutaleyi kyaetulongyesha. Kintu kya kumpala ky’atulonbyela ku ano mayi nkya’shi, pa kwakula ano mayi, Yesu badi mukumbashe butemuki bwi mu Misambo 22:2. * Na dingi, ano mayi alesha’shi Yehowa ta badi mwele Mwan’aye “mu lupango” bwa kumukalwila. (Yob. 1:10) Yesu bapushishe’shi Nshaye bamulekyeela mu masa a beshikwanyi bwa’shi batompe lukumino lwaye mpa na ku lufu​—bish’atompelwe dingi ungi muntu. Kukatusha byabya, ano mayi ashinkamisha’shi Yesu ta badi mukite kintu ki bubi kya kumufisha mpa na ku lufu.

10. Nkinyi ky’atulongyela ku mayi abadi Yesu mulungule Nshaye?

¹⁰ Nkinyi ky’atulongyela ku mayi a Yesu? Dilongyesha dy’atupe ndya’shi, t’abitungu tutengyele’shi Yehowa etukalwile ku nkalakashi yoso y’atupe ayitompo lukumino lwetu. Nka bu bibadi bitompibwe Yesu mpa na ku nfudilo, n’atwe namu abitungu twikale belumbule bwa kushala na lukumino mpa na ku nfudilo sunga byatunga’shi tufwe. (Mat. 16:24, 25) Anka, tushinkamishe’shi, Efile Mukulu t’atadila’shi tupete bitompwanga bikile bukome bwetu. (1 Kod. 10:13) Dingi dilongyesha ndya’shi, nka bu Yesu twi kukyenga sunga kwatushi bakite mwanda wi bubi. (1 Mp. 2:19, 20) Bano bantu betushikwe bakwete abebikitshi, kushi mwanda wa’shi twibakite kintu ki bubi, kadi mwanda wa’shi ta twi ba pano pa nsenga na’shi twibatwale bya binyibinyi. (Yo. 17:14; 1 Mp. 4:15, 16) Yesu baukile bwakinyi Yehowa bamutadila’shi akyengye. Mu kwilekena na Yesu, bena Kidishitu be mu nkalakashi, bakwete kwiyipusha ingi nsaa bwakinyi Yehowa kwete kutadila’shi ingi myanda ikitshikye. (Aba. 1:3) Efile etu sha lusa na lwishinko, auku’shi bano bakwetu ta bakutwe lukumino, anka be na lukalo lwa kunyingishibwa kwaye.​—2 Kod. 1:3, 4.

11. Bwakinyi Yesu badi mwakule mayi e mu Yowano 19:28?

¹¹ Nkinyi kibadi akikyebe kwamba Yesu? (Badika Yowano 19:28.) Bwakinyi Yesu bakwile’shi: “Naapusha nyoota”? Badi mwakule ano mayi, bwa’shi “bifundwe bikumbane,”  kwamba’shi butemuki bwi mu Misambo 22:16, abwamba’shi: ‘Bukome bwande bubaumu bu kipese ky’eema, edimi dibandamata mu kilakalaka.’ Na dingi, kunyima kwaye kukyenga ngofu mpa na kupusha mitanyo i bukopo ku mutshi wa makyenga, Yesu badi mupushe nyota i bungi. Badi na lukalo lwa bukwashi bwa kupwa nyoota ibadi nayo.

12. Nkinyi ky’atulongyela ku mayi a Yesu aamba’shi: “Naapusha nyoota”?

¹² Nkinyi ky’atulongyela ku mayi a Yesu? Yesu ta badi mupushe bufu bwa kwakula by’epusha, n’atwe namu abitungu tukite nka byabya. Be bungi ba kwatudi, t’abakuminaa kuteka bangi bukwashi. Anka, nsaa yatudi na lukalo lwa bukwashi, tatwikokanga kwibuteka bangi. Bu kileshesho, Su twekala bapwe kununupa sunga’shi twina maladi, twi balombene kuteka ba kuuku betu bwabadya kwitushindjikila mu kisalwe sunga kwi doktere. Su twi babofule kwishimba, twi kuteka mukulu sunga ungi mwina Kidishitu munyingye mu kikudi, mulombene kwitutemesha na kwitunyingisha ‘n’eyi dya kalolo.’ (Nki. 12:25) Tutentekyeshe’shi, bakwetu balume na bakashi mbetufule na abakumina kwitukwasha mu kipungo kya “mpombo.” (Nki. 17:17) Anka ta mbalombene kuuka by’atwipusha na by’atupwandjikisha. Mbalombene kwibiuka nka su tubebalungula.

13. Mmyanda kinyi ikumbashe Yesu p’aye kulama lulamato mpa na ku lufu?

¹³ Nkinyi kibadi akikyebe kwamba Yesu? Pepi na nsaa a kasatu kunyima kwa midi, mwifuku dya 14 mweshi wa Nisane, Yesu belele musase amba’shi: “Byooso bibaalombana!” (Yo. 19:30) Mayi a Yesu alesha’shi, sunga kumpala kwa’shi afwe, Yesu badi muukye’shi bakitshi byoso bibadi abimutekye Nshaye. Pa kulama lulamato lwaye mpa na ku lufu, Yesu badi mukumbashe myanda i bungi. Wa kumpala, badi muleshe’shi Satana sha madimi. Yesu badi muleshe’shi, muntu mupwidjikye e kulama lulamato lupwidjikye sunga Satana akita kinyi. Wa kabidi, Yesu badi mutushe muwa waye bu nkuulo. P’aye kutusha muwa waye bu nkuulo, bantu ba’shi bapwidjikye mbalombene kwikala mu kipwano ki buwa n’Efile Mukulu na kwikala na lukulupilo lwa kupeta muwa wa ikalayika. Wa kasatu, Yesu badi muleshe’shi Yehowa nyi mukunkushi e buwa, na aye nkutumbisha eshina dya Nshaye.

14. Abitungu twikale na kitshibilo kinyi efuku dyoso? Patuula.

¹⁴ Nkinyi ky’atulongyela ku mayi a Yesu? Abitungu twikale na kitshibilo kya kulama lulamato efuku dyoso. Tala bibadi byakule mu kwetu Maxwell Friend, mulongyeshi ku kalasa ka Galaade. Mu mwisambo ubadi mwele pabitale lulamato, ku kikongeno kya nsenga ishima, mukwetu Friend bambile’shi: “Twambanga’shi nakitshi sunga’shi nakula maloba aku namu we mulombene kwibikita lelo uno. Ouku naminyi’shi maloba wekala na muwa? Mona efuku dyoso bu dyobe dya nfudilo dyodya kulesha’shi w’ata na muulo kwikala na muwa wa loso.” Tumoneyi efuku dyoso bu dyetu dya nfudilo dya kulama lulamato lwetu! Paapa, sunga twekala kumpala kwa lufu, atwikala na ngobesha ya kwakula’shi, “Yehowa, nakitshi mwande moso bwa kulama lulamato, bwa kulesha’shi Satana sha madimi na bwa kutoosha eshina dyobe na kukwatshishena Bufumu bobe!”

15. Muyile Luka 23:46, nkinyi kibadi Yesu mushinkamishe?

¹⁵ Nkinyi kibadi akikyebe kwamba Yesu? (Badika  Luka 23:46.) Na kushinkamisha koso, Yesu bakwile’shi: “Yayà, natûlu kikudi kyande mu mâsa obe.” Yesu badi auku’shi nshalelo aye a mafuku aafiki e mu masa a Yehowa na badi mushinkamishe’shi Nshaye amutentekyesha.

16. Bolongyela kinyi ku mwanda wa Joshua?

¹⁶ Nkinyi ky’atulongyela ku mayi a Yesu? Kumina kushaala na lulamato kwi Yehowa sunga w’ekala kumpala kwa lufu. Bwa kwibikita, abitungu ‘okulupile mwi Yehowa n’eshimba dyoobe dyooso.’ (Nki. 3:5) Tala kileshesho kya Joshua Temwe a Yehowa badi na bipwa 15, badi na mukumbo ushaupu. Badi mupele’shi tabamubukanga mu mushindo wikutwene na miya y’Efile Mukulu. Kapindji kapela kumpala kwa’shi afwe, balungwile nyinaye’shi: “Mama, ne mu masa a Yehowa. . . . Na kulungula’shi, mama, ne mushinkamishe’shi Yehowa akansangula. Auku bi mwishimba dyande na, ne mumufule ngofu.” * Bi buwa oso a kwatudi eyipushe’shi, ‘Su ne kumpala kwa mwanda autompo lukumino lwande, nakumina kutula muwa wande mu masa a Yehowa na kukulupila’shi antentekyesha su?’

17-18. Mmyanda kinyi ibatulongo? (Tala dingi kashibo akamba’shi: “ Ky’atulongyela ku mayi a nfudilo a Yesu.”)

¹⁷ Twi balombene kulongyela myanda i bungi ku mayi a nfudilo a Yesu. Abetuntekyesha’shi abitungu tufwile bangi lusa na tukulupile’shi Yehowa etufwila lusa. Twina kinemo kikata kya kwikala mu kifuko kya mu kikudi ki buwa kya bakwetu balume na bakashi abakumina kwitukwasha, anka bwa’shi bebikite, abitungu twibatekye bukwashi. Atuku’shi Yehowa mulombene kwitukwasha bwa kunyingila lukalakashi loso lwatudi balombene kupeta. Na tubalongo muulo wa kumona efuku dyoso bu dyetu dya kulesha lulamato, bashinkamishe’shi muwa wetu ngulamibwe kalolo mu masa a Yehowa.

¹⁸ Eyendo, mayi abadi akule Yesu kumpala kwa’shi afwe ku mutshi wa makyenga, aetulongyesha myanda i bungi. P’atutumikila malongyesha abatupete, atukokyela mayi abadi Yehowa mwakule pabitale Mwan’aye aamba’shi: “Muteemesheeyi.”​—Mat. 17:5.