1, 2. Ndiéjunʼ xtáa ragíʼnuu Jesús nákha niʼthí iwáá ajngáa rígi̱ rá.

NÁKHA mbiʼi 14 ñajunʼ gu̱nʼ nisán tsiguʼ 33. Nini̱ tsu̱di̱i̱ Jesús mbá rí ikhaa táʼni, nitsijmaa, ni̱ni̱ gawíínʼ me̱ndaʼkho ga̱jma̱a̱ nixuda̱ʼ clavo náa ñawúunʼ ma̱ngaa náa rajkhúu. Nagawúunʼ wéñuʼ tsoxto̱o̱ índo̱ ndayáʼ xi̱ʼ, mu naʼni tsiakimínáʼ numuu rí gíʼdoo mbá ajngáa kiejuunʼ rí maʼthí.

² Gi̱i̱ mbuʼyáá ajngáa rí niʼthí Jesús nákha inu makhañúu náa ixi̱ ga̱jma̱a̱ mbuʼyáá ndiéjunʼ gándoo gájmañulú. Xóo muʼthá “Gudxawíín rí gáʼthi” (Mat. 17:5).

3. Tsíin nindoo gáʼthúún Jesús índo̱ niʼthí: “Anu̱ʼ, atani̱ mba̱a̱ a̱jkia̱a̱nʼ xtañún” xá.

³ Rí niʼthí Jesús. Índo̱ nidujmaa náa ixi̱ niʼtájkháan: “Anu̱ʼ, atani mba̱a̱ a̱jkia̱a̱nʼ xtañún”. Tsíin gáʼni mba̱a̱ a̱jkiu̱u̱n kaʼñún xá. Gi̱i̱ mbuʼyáá mbá chíʼgíiʼ dí niʼthí: “Numuu rí tséyáá rí eni̱” (Luc. 23:33, 34). Gi̱i̱ Jesús xtáa raʼthí ga̱jma̱a̱ numún soldados romanos bi̱ nidujmaa náa ixi̱. Ikhiin na̱nguá niniʼniiʼ. Mú ma̱ngaa niʼthí ga̱jma̱a̱ numún xa̱bu̱ bi̱ nindúún muxiyáa, ga̱jma̱a̱ nda̱wa̱á niguánú niguáʼdáá fe náa ikhaa (Hech. 2:36-38). Mu Jesús na̱nguá niyéjxi̱i̱ sia̱nʼ ga̱jma̱a̱ numuu rí ni̱ni̱ gínáa, rí phú niʼni nindo̱ʼo̱o̱ anu̱u̱ mu maʼni mba̱a̱ a̱jkiu̱u̱n kaʼñúnʼ bi̱ nixiyáa (1 Ped. 2:23).

4. Dí gándoo gájmañulú ga̱jma̱a̱ numuu Jesús rí niʼni mba̱a̱ a̱jkiu̱u̱n kaʼñún bi̱ nikiʼníin kuyáá xá.

⁴ Rí majmañulú. Xó má niʼni Jesús gíʼmaa rí mu̱ʼni̱ mba̱a̱ a̱jkiu̱lú kuʼñúún eʼwíinʼ (Col. 3:13). Asndu bi̱ kuʼñún ma̱ndoo  makiʼníin kuyulú numuu rí nuʼnigajmaa Biblia, numuu rí mixtiʼkhu xóo kuwáanʼ xóo kúwá ikhiin, ma̱ndoo muthi rí nduwaʼ ga̱jma̱a̱ numulúʼ, muni̱ majtiáanʼlu náa inún eʼwíinʼ, muxidíí i̱yu̱lúʼ asndu munimiñúlú dí muradiáanʼ. Mú xuyéjxi̱i̱ sia̱nʼ ga̱jma̱a̱ numuu rí niʼniulúʼ, gíʼmáanʼ munda̱ʼa̱a̱ Jeobá rí mambáñún mu mudxawíín ajngóo (Mat. 5:44, 45). Mú rígá nguáná rí naʼni gakhi̱i̱ mu̱ʼni̱ mba̱a̱ a̱jkiu̱lú kuʼyáá mbáa. Mú itháan á mu niʼniulúʼ mbá dí ra̱májánʼ, xúniʼñámíjná dí muyéjxi̱i̱ sia̱nʼ numuu dí rúʼko̱ gáʼni gawúnlú má ikháanʼ. Xóo má niʼthí mbáa ndxájulú a̱ʼgu̱: “Nijkhánú ndi̱yo̱o̱ rí ma̱ni̱ mba̱a̱ a̱jkiu̱nʼ ka̱ñu̱u̱n eʼwíinʼ, raʼkháa rúʼko̱ eyoo gáʼthúu̱n dí niniuʼ mbá rí májánʼ, nandoo gáʼthúu̱n rí xayéjxi̱i̱ sia̱nʼ ga̱jma̱a̱ dí mambájxu̱ʼ gajmínʼ” (Sal. 37:8). Índo̱ nuraʼwíí mu̱ʼni̱ mba̱a̱ a̱jkiu̱lú kuyáá mbáa, tséniʼñámijná rí ajngáa rí niʼthúlú maʼni dí muyejxíi sia̱nʼ (Efes. 4:31, 32).

5. Dí niʼthúu̱n Jesús xa̱bu̱ ra̱májáanʼ bi̱ frájkhaa náa níjniúu rá. Ga̱jma̱a̱ náá numuu rí xúʼko̱ niʼthúu̱n xá.

⁵ Rí niʼthí Jesús. A̱jmi̱i̱n xa̱bu̱ ra̱míjíinʼ bi̱ jngríguíin náa níjniúu Jesús, wapháá nitsijmaa (Mat. 27:44). Nda̱wa̱á, mbáa rí ikhiin niriʼkhu̱u̱ xóo nindxaʼwámínáʼ, ni̱jkha̱nú ndiʼyoo rí Jesús nda̱a̱ aʼkhúun (Luc. 23:40, 41). Ikhaa niʼthí rí Jesús matujxi̱i̱ ma̱ngaa maʼtáñajunʼ nda̱wa̱á, ikha jngóo asndu niʼthúu̱n: “Jesús, garmáʼáan a̱jkia̱nʼ xta̱yo̱ʼ índo̱ gáta̱ʼa̱ʼ náa reino ndrígáʼ” (Luc. 23:42). ¡Ra̱ʼkhá tháán nigiʼdoo fe xa̱bu̱ bugi̱! Ga̱jma̱a̱ Jesús niriʼñuu: “Natha̱nʼ gajkhun xúgi̱: Maraxtaa ga̱jma̱á ni̱ndxu̱ʼ [raʼkháa náa matañájunʼ] náa ku̱ba̱ʼ mitsaanʼ” (Luc. 23:43). Gi̱i̱ naʼngo̱o̱ nduʼyáá dí Jesús nixná ajngóo náa xa̱bu̱ bugi̱ dí maxtáa ga̱jma̱á nindxu̱u̱ náa ku̱ba̱ʼ mitsaanʼ. Numuu rí ndaʼyoo dí Anu̱u̱ nagáwi̱i̱n a̱jkiu̱u̱n kaʼñúnʼ xa̱bu̱ (Sal. 103:8).

6. Dí ejmañuluʼ náa ajngáa rí niʼthúu̱n Jesús xa̱bu̱ ra̱májánʼ rá.

⁶ Rí majmañulú. Jesús nindxu̱u̱ ikháá kayúʼ xóo Anu̱u̱ (Heb. 1:3). Jeobá naʼni mba̱a̱ a̱jkiu̱u̱n kaʼyulú ga̱jma̱a̱ nagáwi̱i̱nʼ a̱jkiu̱u̱n, á mu natanga̱a̱ a̱jkiu̱lú mbá dí raʼkhí dí ni̱ʼni̱ nákha ginii ga̱jma̱a̱ á mu naguáʼdáá fe náa ikhaa ga̱jma̱a̱ ikhaa gaʼni mba̱a̱ a̱jkiu̱u̱n kaʼyulú numuu rí nixnájxi̱i̱ A̱ʼdióo makhañúu ga̱jma̱á numulú (1 Juan 1:7). Ndiéjunʼ gíʼmaa muʼni á mu nguáná naʼniulú mingíjyúuʼ munimbulú rí Jeobá maʼni mba̱a̱ ajkiu̱u̱nʼ kaʼyoo aʼkhá rí niʼni nákha ginii rá. Á mu xúʼko̱ ku̱ma̱a̱ʼ, atayáá rígi̱: Nákha inu makhañúu Jesús niʼni mba̱a̱ a̱jkiu̱u̱n kaʼyoo xa̱bu̱ ra̱májáanʼ bi̱ ndiʼkhún nisngajmá fe. Á mu xúʼko̱, lá Jeobá xágáwíi̱nʼ a̱jkiu̱u̱n kaʼñún xa̱bi̱i̱ bi̱ nunimíjna̱ munimbu̱u̱n kuyáá ráʼ. (Sal. 51:1; 1 Juan 2:1, 2.)

7. Xó má naʼthí Juan 19:26, 27, dí niʼthúu̱n Jesús María ga̱jma̱a̱ Juan rá. Ga̱jma̱a̱ náá numuu niʼthúún xúʼko̱ xá.

⁷ Rí niʼthí Jesús. (Atraxnuu Juan 19:26, 27). * Jesús nixmiéjuunʼ kaʼyoo ru̱dúu̱, numuu rí niguanúu xóo mbáa a̱ʼgú xuáʼa̱ ga̱jma̱a̱ a̱ngui̱i̱n ma̱ndoo muxnáá xúgíʼ rí ndayóoʼ. Mú, tsáa gándoo gámbáyúu dí mambájxu̱u̱ ga̱jma̱a̱ Dios xá. Numuu rí a̱ngui̱i̱n xóó na̱nguá ni̱ndxu̱ún discípulos ndrígóo Jesús. Mú Juan ninindxu̱u̱ Apóstol bi̱ niwi̱ji̱ jmbu ma̱ngaa nimbájxu̱u̱ májánʼ ga̱jma̱a̱. Jesús ndiʼñún dí ikhiin ni̱ndxu̱ún xóo a̱ngui̱i̱n numuu rí ndiyamajkuíí Jeobá (Mat. 12:46-50). Jesús  nindoo kaʼyoo María ga̱jma̱a̱ nindoo dí maxtiewa̱a̱n májánʼ. Ikha jngóo nindo̱ʼo̱o̱ Juan dí mambáyúu mañewu̱u̱n, numuu rí ndaʼyoo dí Juan mambáyúu maʼni má xúʼko̱ ñajuunʼ Dios. Ikha jngóo niʼthúu̱n Ru̱dúu̱: “¡Aʼkhu wíji̱ a̱ʼdiáaʼ!” ga̱jma̱a̱ Juan niʼthúu̱n “¡aʼkhu xtáa rudáaʼ!”. Mbiʼi má rúʼko̱, Juan ninindxu̱u̱ a̱ʼdióo María ga̱jma̱a̱ niñewu̱u̱n xó má ru̱dúu̱. ¡Ra̱ʼkhá tháán nindoo kaʼyoo ru̱dúu̱ Jesús numuu dí ikhaa niñewu̱u̱n nákha chíʼgíiʼ ga̱jma̱a̱ nixtáa mbiʼi rí muxiyáa!

8. Dí gándoo gajmañulú rí niʼthúu̱n Jesús María ga̱jma̱a̱ Juan rá.

⁸ Rí majmañulú. Mbáa nambájxu itháan gajmiúlú a̱ngiu̱lú bi̱ nuʼnigajmaa gajmiúlú, ki xóo bi̱ kúwá náa guʼulúʼ, mbáa bi̱ kuʼñúún ma̱ndoo  makiʼníin kuyulú o asndu muniñulú, mu Jesús má niʼthí dí Jeobá nditháan xaniñulú ga̱jma̱a̱ náa xuajñuu mundrígúu itháan ki xóo rí nindáti̱gu̱lú. Mbaʼin rí ikhiin muguánu mani̱ndxu̱u̱n e̱jñu̱luʼ, ruduluʼ, anu̱lú bi̱ nandún kuyulú (Mar. 10:29, 30). Xú káʼnii ku̱ma̱a̱ʼ ikháanʼ xúgi̱ rí xtaa mbóó gajmiáanʼ a̱ngiu̱lú bi̱ kuaʼdáá fe ga̱jma̱a̱ bi̱ nandún kuyáá Jeobá rá. (Col. 3:14; 1 Ped. 2:17.)

9. Dí eʼsngúlú ajngáa rí niʼthí Jesús náa Mateo 27:46 rá.

⁹ Rí niʼthí Jesús. Nákha Jesús xóo tsékháñuu, nindxaʼwá: “Dios ndrígóʼ, Dios ndrígóʼ, náá numuu nitatsíñúʼ rá.” (Mat. 27:46.) Náa Biblia tséʼthí náá numuu rí Jesús niʼthí ajngáa rígi̱. Guʼyáá dí eyoo gáʼthúu̱n ajngáa dí niʼthí, ikhaa xtáa raʼnimbánuu kiʼtáriyaʼ dí na̱ʼkha̱ náa Salmo 22:1 *. Ma̱ngaa, ajngáa dí niʼthí Jesús nisngájma kaʼwu dí Jeobá na̱nguá nigíʼ ‹mbóo gúláa náa mbájndi› A̱ʼdióo (Job 1:10). Jesús nikro̱ʼo̱o̱ rí anu̱u̱ niniñuuʼ náa ñawún xa̱bu̱ sia̱nʼ, mu xúʼko̱ mugíʼ tsáʼkhá náa inuu ga̱jma̱a̱ masngájma fe asndu índo̱ gákháñuu, numuu rí nimbáa xa̱bu̱ tagíʼnuu xóo ikhaa, ma̱ngaa ajngáa rí niʼthí, rúʼko̱ nasngájma dí na̱nguá gíʼdoo aʼkhúun ga̱jma̱a̱ dí rakáʼyoo makhañúun.

10. Dí gándoo gajmañulú náa ajngáa rí Jesús niʼthúu̱n anu̱u̱ rá.

¹⁰ Rí majmañulú. Mbá ikha rí ma̱ndoo majmañulú rí xáguaʼthi̱i̱n rí Jeobá mañewu̱nluʼ náa tsáʼkhá dí nuraʼníí náa fe ndrígúlú. Xó má Jesús niʼngo̱o̱ niraʼnuu tsáʼkhá, xúʼko̱ má mangáanʼlu ndayóoʼ rí makuwáanʼlu jmbu, mu xúʼko̱ ma̱ndoo musngajmá fe rí kuaʼdáálú asndu índo̱ gakháñulú (Mat. 16:24, 25). Mú, nduʼyáá gajkhun rí Dios nditháan xániñuuʼ mbá tsáʼkhá dí xáʼngulú muraʼníí (1 Cor. 10:13). I̱mba̱ ikha rí ma̱ndoo majmañulú, xó má nigíʼnuu Jesús ma̱ndoo mumíníiʼ mbá dí raʼkhí maski ajndu raguáʼdáá aʼkhúlú (1 Ped. 2:19, 20). Xúʼko̱ má mangáanʼ, xa̱bu̱ bi̱ tsíñún gúyulú nuni̱ gínáanʼlú, raʼkháa ga̱jma̱a̱ numuu rí ni̱ʼni̱ mbá dí raʼkhí, numuu dí rañájunʼlú náa numbaaʼ ga̱jma̱a̱ ikháanʼ nutaraʼa ajngáa dí gajkhun (Juan 17:14; 1 Ped. 4:15, 16). Jesús ninindxu̱u̱ mbáa xa̱bu̱ mixtiʼkuii ga̱jma̱a̱ nikro̱ʼo̱o̱ náá numuu rí Jeobá niniñuuʼ mamínuuʼ. Mú, tikhuun a̱ngiu̱lú rí mbiʼi xúgi̱ bi̱ niguáʼdáá mbá gamiéjunʼ, naguánú nuraximíjna̱ náá numuu rí Jeobá naniñuuʼ marigá rá. (Hab. 1:3.) Dios bi̱ májáanʼ a̱jkiu̱u̱n ga̱jma̱a̱ bi̱ naʼngo̱o̱ a̱jkiu̱u̱n nakro̱ʼo̱o̱ kaʼñún raʼkháa ga̱jma̱a̱ dí nánguá guáʼdáá fe; i̱ndó rí ndañúu̱nʼ maʼni̱i̱ a̱jkiu̱ún ga̱jma̱a̱ ikhaa ma̱ndoo mambáñún (2 Cor. 1:3, 4).

11. Náá numuu niʼthí Jesús ajngáa rí na̱ʼkha̱ náa Juan 19:28 rá.

¹¹ Rí niʼthí Jesús (atraxnuu Juan 19:28). * Náá numuu niʼthí Jesús: “Nakandawuʼ” rá. Niʼthí rígi̱ mu xúʼko̱ mambanúu dí naʼthí náa kiʼniraʼmáʼ, xó muʼtá rí nijuiʼtáriyaʼ rí na̱ʼkha̱ náa Salmo 22:15 náa naʼthí: ‹Rí tsiakii ndrígóʼ nijndooʼ xóo mbá daan ku̱ba̱ʼ, dí ra̱ju̱nʼ nagiʼma náa xtágajñuʼ›. Ga̱jma̱a̱ xúgíʼ dí nimínu̱u̱ʼ Jesús índo̱ nijuiʼdujmaa náa ixi̱ mbáa nikándawuuʼ wéñuʼ ga̱jma̱a̱ ndiyóoʼ rí mbáa maxnúu iyaʼ maga̱a̱n.

12. Dí gándoo gajmañulú náa ajngáa rí niʼthí Jesús nakandawuʼ rá.

¹² Rí majmañulú. Jesús na̱nguá nindxaʼwámínaʼ dí raʼkhí nindxu̱u̱ rí maʼthí xóo eku̱mu̱u̱,  xúʼko̱ má mangáanʼlu gíʼmáanʼ muʼthá rí xóo nakumulú, mbáa náa xúgíʼ mbiʼi dí kuwáanʼlú tsíyulú guʼthúún eʼwíinʼ rí ndayúlú. Mú, á mu nakumulú dí nánguá maʼngulú itháan, itháan májánʼ gáʼni rí muʼthúún eʼwíinʼ mu mumbayulúʼ. Mbá xkri̱da, á mu guaniáanʼlu o kuaʼdáá nandii, itháan májánʼ gáʼni rí muʼthán mbáa amigiulú mu maʼga kaguáanʼ náa tienda, náa guʼwá thana, o á mu kuwáanʼlu gíná, májánʼ gáʼni rí muʼthán mbáa bi̱ kayá edxu̱u̱ o migiulú mu xúʼko̱ ikhaa maʼdxawunlú ga̱jma̱a̱ maʼtulúʼ ajngáa dí ‹maxnúlú tsiakii› (Prov. 12:25). Garmáʼáan a̱jkiu̱lú rí a̱ngiu̱lú nandún kuyulú ga̱jma̱a̱ nandún mumbayulúʼ “índo̱ narígá gamiéjunʼ” (Prov. 17:17). Gajkhun má dí a̱ngiu̱lú xándoo mbuyáá ndiéjunʼ endxa̱ʼwa̱mínáʼ ga̱jma̱a̱ rí ndayóoʼ mixtambáyúlú, ikha jngóo ikháanʼ gíʼmaa muʼthá rí ndayuluʼ.

13. Ga̱jma̱a̱ numuu rí niwi̱ji̱ jmbu Jesús asndu índo̱ nikháñuu, dí niʼngo̱o̱ niʼni xá.

¹³ Rí niʼthí Jesús. Xóo mbá las 3 dí wakíʼ nákha 14 ñajunʼ gu̱nʼ nisán, Jesús niʼthí: “¡Nimbánuu rá!” (Juan 19:30). Ajngáa rí niʼthí Jesús nákha xóó tsekháñuu naʼsngúlú rí ikhaa niʼngo̱o̱ ninimbánuu rí nindoo Jeobá magumaa ga̱jma̱a̱ niwi̱ji̱ jmbu asndu índo̱ nikháñuu, Jesús niʼngo̱o̱ niʼnimbánuu ajtsú eni̱ rí gíʼdoo wéñuʼ numuu: Timbá, nisngájma rí Gixa̱a̱ nindxu̱u̱ minduwaaʼ. Ikha jngóo Jesús nisngájma rí mbáa xa̱bu̱ jmbii ma̱ndoo mawiji̱ gújkhúʼ tséʼniuu asndu xú káʼnii má tsáʼkhá dí gagrui̱ga̱ Gixa̱a̱ náa majñu̱u̱ʼ. Raga̱jma̱, Jesús niʼtsiwáanʼlú índo̱ nikháñuu. Rúʼko̱ niʼni rí xa̱bu̱ aʼkhá ma̱ndoo mambáxu̱u̱n májánʼ gajmiún Dios ga̱jma̱a̱ rí kuáʼti̱i̱n makuwá kámuu mbiʼi. Rí ragajtsú, Jesús niʼthí rí Jeobá kaʼyoo maʼtáñájunʼ ga̱jma̱a̱ niʼni kaʼwi̱i̱ mbiʼyuu rí niguma gachíí.

14. Xú káʼnii gíʼmaa makuwaanʼ mámbá mbiʼi rá.

¹⁴ Rí majmañulú. Ma̱ndoo muʼni xúgíʼ xóo má eʼngo̱o̱ mu maguajún jmbu. Guʼyáá dí niʼthí ndxájulú Maxwell Friend, bi̱ nisngáa náa Escuela ndrígóo Galaad. Ikhaa nixná mbá discurso náa mbá asamblea internacional náa niʼthí rí muguajún jmbu: “Xaraʼthi̱i̱n imbo̱ʼ mbiʼi rí káʼnii matani o marata xúgi̱, numuu rí tsétayáá á mu marigá imbo̱ʼ mbiʼi”. “Ikha jngóo, atasngájma mámbá mbiʼi dí ikháán kaʼyaaʼ maraxtaa kámuu mbiʼi”. Á mu nikháñulú ma̱ndoo muʼthá: “Jeobá nini̱ xúgíʼ xó má niʼngo̱ʼ mu magujún jmbu ga̱jma̱a̱ masngajmá rí Gixa̱a̱ nindxu̱u̱ minduwaaʼ, nini̱ kaʼwi̱i̱ mbiʼyaaʼ ga̱jma̱a̱ dí naratañájunʼ”.

15. Xó má eʼthí náa Lucas 23:46, dí niʼthí Jesús ga̱jma̱a̱ xúgíʼ a̱jkiu̱u̱n rá.

¹⁵ Rí niʼthí Jesús. (Atraxnuu Lucas 23:46). * Ga̱jma̱a̱ xúgíʼ a̱jkiu̱u̱n Jesús niʼthí: “Anu̱ʼ náa ñawáanʼ eniʼñúnʼ xi̱ʼ ndrígóʼ”. Jesús má ndiʼyoo rí Jeobá má gákujxi̱i̱ ga̱jma̱a̱ dí marmáʼáan a̱jkiu̱u̱n kaʼyoo.

16. Dí ejmañaaʼ rí nigíʼnuu Joshua rá.

¹⁶ Rí majmañulú. Guniʼñáánʼ vida ndrígúlú náa ñawúunʼ Jeobá, mu mu̱ʼni̱ rígi̱ ndayóoʼ rí ‹makumulú kuʼyáá ga̱jma̱a̱ xúgíʼ a̱jkiu̱lú› (Prov. 3:5). Guʼyáá xkri̱da ndrígóo ndxájulú Joshua bi̱ gíʼdoo 15 tsiguuʼ ga̱jma̱a̱ gíʼdoo mbá nandii mbi̱i̱ʼ. Ikhaa tagruigú thana rí nanújngorámuuʼ xtángoo ndrígóo Dios, nákha xóó tsékháñuu niʼthúu̱n ru̱dúu̱: “Mamá, náa ñawúunʼ Jeobá niʼñúuʼ vida ndrígóʼ, nda̱yo̱o̱ gajkhun dí Jeobá makujxu̱ún nda̱wa̱á, numuu rí ndiʼyoo rí gíwánʼ náa a̱jkiu̱nʼ ga̱jma̱a̱ rí nandoʼ  ka̱yo̱o̱”. * Ikha jngóo májánʼ gáʼni rí mámbáa garajximínáʼ: “Á mu naraʼnuu mbá xkujndu náa mbaʼyóoʼ masngajmá fe ndrígóʼ, lá maniʼñúuʼ vida ndrígóʼ náa ñawúunʼ Jeobá ga̱jma̱a̱ maku̱mu̱ʼ kayóo rí ikhaa marmáʼáan a̱jkiu̱u̱n kaʼyoʼ xáʼ”.

17, 18. Dí nijmañulúʼ gi̱i̱ rá. (Atayáá ma̱ngaa náa kúgumaʼá “ Rí nijmañulúʼ náa iwáá ajngáa rí niʼthí Jesús”.)

¹⁷ Dí ejmañulú náa ajngáa rí niʼthí iwáá Jesús rá. Naʼni marmáʼáan a̱jkiu̱lú rí gíʼmáanʼ mu̱ʼni̱ mba̱a̱ a̱jkiu̱lú kuʼñúún eʼwíinʼ ga̱jma̱a̱ rí makumulú kuʼyáá Jeobá dí ikhaa maʼni mba̱a̱ a̱jkiu̱u̱n kaʼyulú. Nadxulú wéñuuʼ numuu rí kuáʼdíin a̱ngiu̱lú bi̱ kúwi̱i̱n xawii mu mumbayulúʼ índo̱ ikháanʼ ndayúlú. Ikha jngóo ndayóoʼ rí mangáanʼ munda̱ʼa̱ rí mixtambáyulúʼ, nduʼyáá gajkhun rí Jeobá mambáyulú, mu maʼngulú muraʼníí asndu xú káʼnii má tsáʼkhá dí gárígá náa ikháanʼlu, ga̱jma̱a̱ ndiʼyáá rí gíʼdoo wéñuʼ numuu mbuʼyáá xúgi̱ xóó iwáá mbiʼi rí kuwáanʼlu ga̱jma̱a̱ rí muʼgímíjna̱ muʼni mámbá mbiʼi, mu xúʼko̱ musnga̱jmá rí naguajúnlu jmbu. Ga̱jma̱a̱ rí makumulú kuʼyáá Jeobá rúʼko̱ naʼni rí mbuʼyáá rí makujxáanʼ nda̱wa̱á.

¹⁸ Á mu nuʼgíʼ nuʼni mbáníí ikha rí nijmañulúʼ ga̱jma̱a̱ rí muʼdxawíín ajngóo Jeobá rí niʼthí ga̱jma̱a̱ numuu A̱ʼdióo: “Gudxawíín rí gáʼthi” (Mat. 17:5).