1-2. Kakɔna kakasalema la ntondo ka Yeso mbuta ɛtɛkɛta ande w’ekomelo?

TEKƆ la yanyi lo Ngɔndɔ ka Nisana 14, 33 T.D. L’ɔkɔngɔ wa vɔ mbomamatanyiyɛ awui wa kashi, ndo mbuta dia nde akasale awui wa kɔlɔ, anto wakɔlɛ Yeso, wakosoya, ndo oma laasɔ wakɔkɔkɔla nsɛti l’otamba w’asui. Nsɛti yambɔtɔ l’anya ndo l’ekolo. Etena tshɛ kahɛngande ndo katɛkɛtande, nde mbokaka kandji. Koko nde pombaka ntɛkɛta. Nde ekɔ l’awui w’ohomba wahombande ntɛkɛta.

² Nyɛsɔ tɔsɛdingole ɛtɛkɛta wa Yeso wakandate etena kakinde suke la mvɔ l’otamba w’asui ndo wetshelo wakokaso nkondja oma lɔkɔ. L’ɛtɛkɛta ekina, nyɛsɔ ‘towohokame.’​—Mat. 17:5.

3. Dikambo dia waa na ondo diakatɛkɛtaka Yeso etena kakandate ate: “Papa, dimanyiyawɔ”?

³ Kakɔna kakate Yeso? Etena kakawɔkɔkɔla nsɛti l’otamba, Yeso akalɔmbɛ ate: “Papa, dimanyiyawɔ.” Dimanyiya waa na? Sho kondjaka kanyi oma l’ɛtɛkɛta wayela ɛnɛ: “Vɔ haweye kɛnɛ kasalawɔ.” (Luka 23:33, 34) Ondo Yeso akatɛkɛtaka dikambo di’asɔlayi w’ase Rɔmɔ wanɛ wakɔkɔkɔla nsɛti l’anya ndo l’ekolo. Vɔ kombeyaka onto akɔna akinde mɛtɛ. Ondo nde akatɛkɛtaka nto dikambo di’anto amɔtshi waki l’atei w’olui w’anto, wanɛ wakalɔmbɛ dia nde ndjakema, koko l’ɔkɔngɔ diko, wakayonga la mbetawɔ le nde. (Ets. 2:36-38) Yeso kombetawɔ di’awui wa wɛngiya wakawosalɛ mbokonya dia monga la lohetsho kana nama tokumbɛkumbɛ. (1 Pe. 2:23) Koko nde akalɔmbɛ Jehowa dia dimanyiya wanɛ wakodiake.

4. Wetshelo akɔna wakokaso nkondja oma lo woho waki Yeso suke dia dimanyiya andɔshi ande?

 ⁴ Wetshelo akɔna wakokaso nkondja oma l’ɛtɛkɛta wa Yeso? L’ɛnyɛlɔ ka Yeso, sho pombaka monga suke dia dimanyiya anto akina. (Kɔl. 3:13) Anto amɔtshi, mbidja ndo ewotɔ aso koka tɔlɔsha nɛ dia vɔ hawoshihodia dietawɔ diaso ndo yoho yaso ya lɔsɛnɔ. Vɔ koka mbuta kashi lo dikambo diaso, tɔnyɔla la ntondo k’anto akina, ndanya ekanda aso kana taanɛ dia tosalɛ kɔlɔ. Lo dihole dia sho mbalamɛ tokumbɛkumbɛ, sho koka nɔmba Jehowa dia nde dihola washo w’andɔshi aso l’oyango wa vɔ mbetawɔ akambo wa mɛtɛ lushi lɔmɔtshi. (Mat. 5:44, 45) Lo tena dimɔtshi, sho koka mboka wolo dimanyiya, djekoleko naka takadiɛnɛ l’awui wa wɛngiya w’efula. Koko naka sho mbetawɔ lohetsho kana tokumbɛkumbɛ mbika edio l’etema aso, kete tekɔ lo ndjasalɛ kɔlɔ shoamɛ. Kadiyɛso kɛmɔtshi akate ate: “Dimi shihodiaka dia dimanyiya onto kɔlɔ hɛnya ɔnɛ haleye dia nde akasalɛ kɔlɔ kana lambosha anto akina diaaso dia vɔ salɛkami akambo la wɛngiya. Kɛsɔ mɛnyaka tsho dia dimi halolange namɛ anto akina tokumbɛkumbɛ.” (Os. 37:8) Etena kɔsaso yɛdikɔ ya dimanyiya, tatetawɔke dia tokanyi ta kɔlɔ tokonya dia sho ntetemala momala kana monga ɛkɛlɛkɛlɛ keto.​—Ɛf. 4:31, 32.

5. Daka diakɔna diakasha Yeso ɔpɔtwanyi ɔmɔtshi waki suke la ndjakema suke la nde, ndo lande na kakandawosha daka sɔ?

⁵ Kakɔna kakate Yeso? Apɔtwanyi ahende wakahombe ndjakema waki suke la Yeso. Oma l’etatelo, vɔ akɔ ahende wakatatɛ mbɔtɛnga ndo vɔ lawɔ. (Mat. 27:44) Koko l’ɔkɔngɔ diko, ɔmɔtshi l’atei awɔ akakadimola otema. Nde akayoshihodia ɔnɛ Yeso kosala “ndooko dikambo dia kɔlɔ.” (Luka 23:40, 41) Kɛnɛ kakaleke ele, nde akakɛnɛmɔla dietawɔ diande di’ɔnɛ Yeso ayolɔ oma lo nyɔi ndo ayolɛ oko Nkumekanga lushi lɔmɔtshi. Nde akatɛ Oshimbedi waki suke la mvɔ ɔsɔ ate: “Yeso, kombohɔ lam’ayoyonga lo Diolelo diayɛ.” (Luka 23:42) Ande mbetawɔ kakɛnya pami kɛsɔ lee! Dia mbokadimola, Yeso akawotɛ ate: “Lo mɛtɛ kakotɛmi ɛlɔ nte: Wɛ ayoyala la mi lo Paradiso [koko aha lo Diolelo].” (Luka 23:43) Tolembete dia Yeso ndamɛ mbakasha daka sɔ lo mbuta ate “dimi,” “wɛ” ndo “la mi.” Lo mbeya dia She mbokanaka kɛtshi, Yeso akatɛkɛta ɛtɛkɛta wakasha ɔpɔtwanyi waki suke la mvɔ elongamelo.​—Os. 103:8.

6. Wetshelo akɔna wakondjaso oma l’ɛtɛkɛta wakatɛ Yeso ɔpɔtwanyi ɔmɔtshi?

⁶ Wetshelo akɔna wakokaso nkondja oma l’ɛtɛkɛta wa Yeso? Yeso kɛnɛmɔlaka lo yoho ya kokele lonto la She. (Hɛb. 1:3) Jehowa nomɔlomɔka dia todimanyiya ndo toka kɛtshi naka sho ndjatshumoya mɛtɛ oma l’akambo wa kɔlɔ wakatasale lo nshi yakete ndo monga la mbetawɔ ɔnɛ, sho koka dimanyiyama pɛkato yaso lo tshimbo ya dikila dia Yeso Kristo diakatshulwama. (1 Jni. 1:7) Anto amɔtshi koka monga l’okakatanu dia mbetawɔ ɔnɛ Jehowa koka mbadimanyiya munga yakawasale lo nshi yakete. Naka ngasɔ mbakokayɛ ndjaoka lo tena dimɔtshi, kete enda dui nɛ: Yema tshitshɛ la ntondo ka nde mvɔ, Yeso akoke ɔpɔtwanyi waki suke la ndjakema kɛtshi nɛ dia nde akatatɛ mɛnya mbetawɔ. Shi Jehowa ayoleka mboka atɛmɔdi ande wa kɔlamelo kɛtshi, wanɛ wasala la wolo dia nkitanyiya wadjango ande!​—Os. 51:1; 1 Jni. 2:1, 2.

7. Kakɔna kakatɛ Yeso Mariya la Joani, oko wofundamidiɔ lo Joani 19:26, 27, ndo lande na kakandate ngasɔ?

⁷ Kakɔna kakate Yeso? (Adia Joani 19:26, 27.) Yeso akayakiyanya lo dikambo dia nyango laki ondo wadi aki odo. Ondo anango  wakakoke kotshɛ nyangɛwɔ ehomba wa lo demba. Ko onde vɔ wakakoke mbokotshɛ ehomba wa lo nyuma? Ndooko kɛnya dia l’etena kɛsɔ ko anango waya ambeki. Koko Joani aki ɔpɔstɔlɔ wa kɔlamelo ndo ɔngɛnyi ɔmɔtshi wa ma ma waki Yeso. Yeso akɔsaka wanɛ wakatɛmɔlaka Jehowa kaamɛ la nde oko nkumbo kande ka lo nyuma. (Mat. 12:46-50) Koko, lam’ele Yeso akayakiyanyaka dikambo dia Mariya ndo akawokaka ngandji, nde akasha Joani ɔkɛndɛ wa mbokokɛka ndo nde akeyaka dia nde ayowokotshɛka ehomba ande wa lo nyuma. Yeso akatɛ nyango ate: “Eenda ɔnayɛ!” Ndo Yeso akatɛ Joani ate: “Eenda nyɔ!” Oma lo lushi lɔsɔ, Joani akayala oko ɔnaki Mariya ndo akokokɛka oko nyango. Yeso mɛtɛ akɛnya  ngandji kakandokaka womoto lakɔsamaka la nɛmɔ ɔsɔ, ɔnɛ lakokokɛka la ngandji tshɛ etena kakandotɔ ndo lakemala suke la nde etena kakandadiakema!

8. Wetshelo akɔna wakokaso nkondja oma l’ɛtɛkɛta wakatɛ Yeso Mariya la Joani?

⁸ Wetshelo akɔna wakokaso nkondja oma l’ɛtɛkɛta wa Yeso? Dimama diele lam’asaso l’anangɛso l’akadiyɛso w’Akristo koka ndeka dimama diele lam’asaso l’ase nkumbo kaso ka lo demba wolo. Ewotɔ aso koka tɔlɔsha kana tɔsɛka, koko oko wakalake Yeso, naka sho ndjaɛkɛ le Jehowa ndo le okongamelo Ande, kete tayokondja “mbala 100” ndeka kɛnɛ kakatashisha. Efula kawɔ wayoyala oko ɔna pami, ɔna womoto, mama, kana papa ka ngandji. (Makɔ 10:29, 30) Ngande wayaokayɛ lo kɛnɛ kendana la monga lo nkumbo ka lo nyuma kele kaamɛ lo mbetawɔ ndo lo ngandji, mbuta ate ngandji kokawɔ Jehowa ndo kokanawɔ lam’asawɔ?​—Kɔl. 3:14; 1 Pe. 2:17.

9. Wetshelo akɔna wakokaso nkondja oma l’ɛtɛkɛta wa Yeso wele lo Mateo 27:46?

⁹ Kakɔna kakate Yeso? Yema tshitshɛ la ntondo ka nde mvɔ, Yeso akate ate: “Nzambi kami le, Nzambi kami le, lande na kamboyɔsɛka?” (Mat. 27:46) Bible halembetshiya lande na kakate Yeso ɛtɛkɛta ɛsɔ. Koko tɔsɛdingole wetshelo wakokaso nkondja oma l’ɛtɛkɛta ɛsɔ. Ɔkɔkɔ ɔmɔtshi ele, lo mbuta ɛtɛkɛta ɛsɔ, Yeso akakotsha prɔfɛsiya kele lo Osambo 22:1. * Ndo nto, ɛtɛkɛta ɛsɔ mɛnyaka hwe dia Jehowa kodinga Ɔnande la “lokombo l’ekokelo.” (Jɔbɔ 1:10) Yeso akashihodia dia She aketawɔ dia wanɛ wakohetshaka mpemba mbetawɔ kande lo yɛdikɔ y’efula, mbuta ate polo lo nyɔi. Ndooko onto lakahembama oko Yeso. Laadiko dia laasɔ, ɛtɛkɛta ɛsɔ shikikɛka dia Yeso kosala ndooko dui diakandakoke ndjakema.

10. Wetshelo akɔna wakokaso nkondja oma l’ɛtɛkɛta wa Yeso wakandatɛ She?

¹⁰ Wetshelo akɔna wakokaso nkondja oma l’ɛtɛkɛta wa Yeso? Wetshelo ɔmɔtshi wakokaso nkondja ele hatohombe nongamɛ ɔnɛ Jehowa ayotokokɛka oma l’ehemba wendana la mbetawɔ kaso. Oko wakahembama Yeso polo l’ekomelo, sho lawɔ pombaka ndjalɔngɔsɔla dia mɛnya dia tekɔ la kɔlamelo polo lo nyɔi, naka kokaka. (Mat. 16:24, 25) Koko, tekɔ l’eshikikelo ɔnɛ Nzambi hetawɔ sho pembama polo lo yɛdikɔ yahatakoke mbikikɛ. (1 Kɔr. 10:13) Wetshelo okina wakokaso nkondja ele, l’ɛnyɛlɔ ka Yeso, vɔ koka tosalɛ akambo aha la losembwe. (1 Pe. 2:19, 20) Wanɛ watɔlɔsha salaka dui sɔ aha l’ɔtɛ wakatasale dui dimɔtshi dia kɔlɔ, koko l’ɔtɛ weso bu ase andja ɔnɛ ndo l’ɔtɛ wasambishaso akambo wa mɛtɛ. (Jni. 17:14; 1 Pe. 4:15, 16) Yeso akashihodia lande na kaketawɔ Jehowa dia nde nsowa. Koko, otshikitanyi la nde, atɛmɔdi wele la kɔlamelo wadiɛnɛ l’ohemba ɔmɔtshi ndjambolaka lo tena dimɔtshi lande na ketawɔ Jehowa di’awui amɔtshi mbakomɛ. (Hab. 1:3) Nzambi kaso kokana kɛtshi ndo kele la solo dia lotutsha shihodiaka di’anto asɔ hawohombi mbetawɔ, koko wekɔ l’ohomba w’ekeketshelo kele paka nde mbakoka mbasha.​—2 Kɔr. 1:3, 4.

11. Lande na kakate Yeso ɛtɛkɛta wele lo Joani 19:28?

¹¹ Kakɔna kakate Yeso? (Adia Joani 19:28.) Lande na kakate Yeso ɔnɛ: “Lamboka mposa k’ashi”? Nde akate ngasɔ “dia nkotsha afundelo,” mbuta ate prɔfɛsiya kele lo Osambo 22:15, kata ɔnɛ: “Wolo ami wamboma oko ɛtshi ka diwomba; lolemi lami lambomamatana la eshingi ami.” Laadiko di’asui tshɛ  wakasowe Yeso, mbidja ndo sui dia l’otamba w’asui, nde akahombe mboka mposa efula k’ashi. Nde aki l’ohomba w’ekimanyielo dia nshidiya mposa kande k’ashi.

12. Wetshelo akɔna wakokaso nkondja oma l’ɛtɛkɛta wa Yeso w’ɔnɛ “lamboka mposa k’ashi”?

¹² Wetshelo akɔna wakokaso nkondja oma l’ɛtɛkɛta wa Yeso? Yeso kɔfɔnya ɔnɛ mbuta woho wakandayaokaka ekɔ djembetelo yɛnya dia nde ekɔ wɔdu, ndo sho pombaka mbuta woho wayaokaso. L’awui efula wa lo lɔsɛnɔ, ondo hatokombola mbutɛ anto akina ehomba aso. Koko naka aya etena ka sho nyanga ekimanyielo, kete hatohombe mengenga dia nɔmba ekimanyielo k’anto akina. Ɛnyɛlɔ, naka taya osombe, kana tekɔ l’ɛkɔmɔ kɛmɔtshi, sho koka nɔmba ɔngɛnyi aso ɔmɔtshi dia totshindɛ otsha lo makashinyi kana dia tɛnana la dɔkɔtɛlɛ. Naka tambɔkɔmɔ, sho koka nɔmba ekumanyi kɛmɔtshi kana ɔngɛnyi aso ɔmɔtshi wele Okristo wambotshunda lo nyuma dia tohokamɛ kana totɛ “tshɛkɛta y’ɔlɔlɔ” dia tokeketsha. (Tok. 12:25) Tohɔ di’anangɛso l’akadiyɛso tokaka ngandji, ndo vɔ nangaka tokimanyiya etena keso lo “tena dia paa.” (Tok. 17:17) Koko vɔ hawoteya kɛnɛ kele lo timba taso. Mbeyaka monga ko vɔ hawoteya dia tekɔ l’ohomba w’ekimanyielo naka hatowate.

13. Kakɔna kakakotsha Yeso lo nama olowanyi ande polo lo nyɔi?

¹³ Kakɔna kakate Yeso? L’eshidi esato kokele wa l’ɔkɔngɔ a midi lo Nisana 14, Yeso akate ate: “Diambokotshama!” (Jni. 19:30) Ɛtɛkɛta wa Yeso ɛsɔ tetshaka dia yema tshitshɛ la ntondo ka nde mvɔ, Yeso akeye dia nde ambokotsha dui tshɛ diakalange Jehowa dia nde nsala. Lo nama olowanyi ande polo lo nyɔi, Yeso akakotsha awui efula. Ntondotondo, nde akɛnya dia Satana ekɔ kanga kashi. Yeso akɛnya dia onto lele kokele kokaka ntetemala nama olowanyi ande lo yoho ya kokele oyadi dui tshɛ diayokoka Satana nsala. Dui dia hende, Yeso akakimɔ lɔsɛnɔ lande oko oshinga w’etshungwelo. Nyɔi kande k’olambo kakakimanyiya anto wele keema kokele dia mbɔsama oko anto wosembwe la ntondo ka Nzambi ndo dui sɔ diakawasha elongamelo ka lɔsɛnɔ la pondjo. Dui dia sato, Yeso akɛnya dia Jehowa ekɔ ɔnɔmbɔdi wele la losembwe ndo akanya lokombo la She oma lo sɔnyi.

14. Ngande wahombaso ndjashikikɛ dia sɛnaka lushi la lushi? Lembetshiya.

¹⁴ Wetshelo akɔna wakokaso nkondja oma l’ɛtɛkɛta wa Yeso? Sho pombaka ndjashikikɛ dia namaka olowanyi aso lushi tshɛ. Tende ɛtɛkɛta w’ɔnangɛso Maxwell Friend, ɔnɛ lakakambaka oko ombetsha lo Kalasa ka Ngiliyadɛ ka Bible k’Ɛmɛnyi wa Jehowa. Lo losanganya lɔmɔtshi la wedja efula, ɔnangɛso Friend akate lo sawo dimɔtshi diendana la kɔlamelo ate: “Totaloyake dui dimɔtshi diakokayɛ nsala kana mbuta ɛlɔ, ɔnɛ layosala loyi. Onde wɛ ekɔ l’eshikikelo ɔnɛ wɛ ayonga la lɔsɛnɔ loyi? Ɔsa lushi tshɛ oko diɛsɛ di’ekomelo dia wɛ mɛnya ɔnɛ wɛ sunganaka nkondja lɔsɛnɔ la pondjo.” Nyɛsɔ tɔsake lushi tshɛ oko lɔ mbele diɛsɛ diaso di’ekomelo dia nama olowanyi aso! Oma laasɔ, kaanga naka tayovɔ, tayokoka mbuta ɔnɛ: “Jehowa le, lakasale la wolo dia nama olowanyi ami dia mɛnya dia Satana ekɔ kanga kashi ndo dia nyindja lokombo layɛ ndo lowandji layɛ!”

15. Lo ndjela Luka 23:46, eshikikelo kakɔna kaki la Yeso?

¹⁵ Kakɔna kakate Yeso? (Adia Luka 23:46.) La eshikikelo tshɛ, Yeso akate ate: “Papa, lambokimɔ lomu lami l’anya ayɛ.” Yeso akeyaka dia nshi yande yayaye yaki l’anya wa Jehowa ndo nde aki l’eshikikelo dia She ayowohɔ.

16. Wetshelo akɔna wakondjayɛ oma lo kɛnɛ kakakomɛ Ɔmɛnyi wa Jehowa ɔmɔtshi waki l’ɛnɔnyi 15?

 ¹⁶ Wetshelo akɔna wakokayɛ nkondja oma l’ɛtɛkɛta wa Yeso? Etawɔ dia nkitsha lɔsɛnɔ layɛ l’anya wa Jehowa. Dia nsala dui sɔ, wɛ pombaka ‘ndjaɛkɛ le Jehowa l’otema ayɛ tshɛ.’ (Tok. 3:5) Tɔsɛdingole ɛnyɛlɔ ka Joshua, Ɔmɛnyi wa Jehowa waki l’ɛnɔnyi 15 waki la hemɔ kaki suke la mbodiaka. Nde akatone esakelo wahɔtɔnɛ l’ɛlɛmbɛ wa Nzambi. Yema tshitshɛ la ntondo ka nde mvɔ, nde akatɛ nyango ate: “Mama, dimi lekɔ l’anya wa Jehowa. . . . Lambokotɛ dui nɛ l’eshikikelo tshɛ ɔnɛ: Dimi mbeyaka dia Jehowa ayombolola. Nde mbeyaka tokanyi la nsaki yami. Ndo dimi mɛtɛ mbookaka ngandji.” * Sho tshɛ pombaka ndjambola ɔnɛ: ‘Naka lambohomana l’okakatanu ɔmɔtshi lo lɔsɛnɔ lami wadja mbetawɔ kami l’ohemba, onde layokitsha lɔsɛnɔ lami l’anya wa Jehowa ndo layonga l’eshikikelo ɔnɛ nde ayombohɔ?’

17-18. Wetshelo akɔna wambotokondja? (Enda ndo kiombo yele l’ɔtɛ a dui ɔnɛ: “ Wetshelo wakondjaso oma l’ɛtɛkɛta wa Yeso w’ekomelo.”)

¹⁷ Sho koka nkondja wetshelo w’amɛna efula oma l’ɛtɛkɛta wa Yeso w’ekomelo! Vɔ toholaka ɔnɛ sho pombaka dimanyiya anto akina ndo monga l’eshikikelo ɔnɛ Jehowa ayotodimanyiya. Tekɔ la diɛsɛ dia monga lo nkumbo ka lo nyuma ka diambo k’anangɛso l’akadiyɛso wele suke dia tokimanyiya. Koko naka tekɔ l’ohomba w’ekimanyielo, sho pombaka mbalɔmbatɔ. Sho mbeyaka dia Jehowa ayotokimanyiya dia sho mbikikɛ ohemba akɔna tshɛ wayotokomɛ. Ndo tambɛna di’ekɔ ohomba dia sho mbɔsaka lushi tshɛ oko diɛsɛ di’ekomelo dia mɛnya olowanyi aso, tele l’eshikikelo ɔnɛ lɔsɛnɔ laso lekɔ lo ekokelo l’anya wa Jehowa.

¹⁸ Lo mɛtɛ, ɛtɛkɛta wa Yeso wakandate etena kakinde suke la mvɔ l’otamba wekɔ la wetshelo efula! Naka sho nkamba la wetshelo wambotokondja, kete tayokitanyiya ɛtɛkɛta wa Jehowa wakandate lo dikambo di’Ɔnande ate: “Nyohokame.”​—Mat. 17:5.