1-2. Wanem samting i kamap taim Jisas i mekim ol laspela tok bilong em?

TUDE em Nisan 14, 33 C.E. Ol man i sutim tok giaman long Jisas na ol i tok em i gilti long wanpela rong em i no bin mekim, ol i tok bilas long Jisas, ol i paitim em nogut tru na nilim em long diwai pos. Ol i sutim nil long tupela han na lek bilong em. Long olgeta win em i pulim, long olgeta tok em i mekim, em i pilim bikpela pen tru. Tasol em mas toktok bikos em gat sampela bikpela tok long autim.

² Yumi ken stori long ol tok Jisas i bin mekim taim em i hangamap long diwai pos na ol skul yumi ken kisim long em. Taim yumi mekim olsem, i olsem yumi “harim tok bilong em.”—Mat. 17:5.

3. Taim Jisas i tok “Papa, fogivim ol,” em i tok long husat?

³ Jisas i tok wanem? Taim ol i nilim em long diwai pos, long dispela taim stret Jisas i beten olsem: “Papa, fogivim ol.” Fogivim husat? Lukim tok em i mekim: “Ol i no save long samting ol i mekim.” (Luk 23:33, 34) Ating Jisas i tok long ol soldia bilong Rom em ol i sutim ol nil i go insait long han na lek bilong em. Ol i no save long em i husat tru. O ating em i tok long sampela bilong ol manmeri em ol i bin strong long ol i mas kilim em i dai, tasol bihain ol bai bilip long em. (Apo. 2:36-38) Maski Jisas i karim hevi long ol pasin i no stret ol i bin mekim long em, em i no belhat long ol o holim yet bel kros long ol, nogat. (1 Pita 2:23) Em i askim Jehova long fogivim ol man husat i bin kilim em i dai.

4. Yumi kisim wanem skul long pasin bilong Jisas long redi long fogivim ol birua bilong em?

 ⁴ Yumi kisim wanem skul long tok bilong Jisas? Olsem Jisas, yumi mas redi long fogivim ol narapela. (Kol. 3:13) Ating sampela, na ol wanblut tu, inap birua long yumi bikos ol i no kliagut long ol bilip bilong yumi o wei bilong yumi long mekim ol samting. Ating ol i mekim sampela tok giaman long yumi, semim yumi long ai bilong ol narapela, bagarapim ol pablikesen bilong yumi, o tok long ol bai paitim yumi. Tasol yumi no ken holim bel kros long ol, yumi ken askim Jehova long helpim ol long kisim save long tok i tru. (Mat. 5:44, 45) Sampela taim yumi bai pilim hatwok long fogivim ol narapela, moa yet sapos ol i bin mekim nogut tru long yumi. Tasol sapos yumi belhat yet na holim yet bel kros inap longpela taim, yumi bagarapim yumi yet. Wanpela sista i tok: “Nau mi save olsem taim mi fogivim ol narapela, dispela i no makim olsem mi orait long pasin ol i mekim long mi o ol i gat rait long mekim dispela pasin long mi. Em makim olsem mi no laik holim bel kros long ol.” (Sng. 37:8) Taim yumi fogivim ol narapela, yumi no larim ol pasin nogut ol i bin mekim long yumi i mekim yumi belhat yet i stap.—Efe. 4:31, 32.

5. (a) Jisas i mekim wanem tok promis long raskolman i hangamap klostu long em? (b) Wai na em i mekim dispela tok promis?

⁵ Jisas i tok wanem? Tupela raskolman i hangamap klostu long Jisas. Pastaim tupela i wok long tok bilas long em. (Mat. 27:44) Tasol bihain wanpela bilong ol i senisim tingting bilong em. Em i luksave olsem Jisas “i no bin mekim wanpela rong.” (Luk 23:40, 41) Em i bilip olsem bihain Jisas bai kirap bek na em bai mekim wok king. Olsem na em i tokim Jisas: “Jisas, tingim mi taim yu kamap King.” (Luk 23:42) Dispela man i gat strongpela bilip! Olsem na Jisas i tokim em: “Mi tok tru long yu tude, yu bai stap wantaim mi long Paradais [na i no long Kingdom].” (Luk 23:43) Lukim, Jisas i soim olsem em i tingim tru dispela man taim em i yusim ol dispela tok olsem “mi” na “yu.” Em i save olsem Papa bilong em i gat pasin marimari, olsem na em i mekim ol dispela tok bilong givim hop long dispela raskolman.—Sng. 103:8.

6. Yumi kisim wanem skul long tok Jisas i mekim long dispela raskolman?

⁶ Yumi kisim wanem skul long tok bilong Jisas? Jisas i bihainim stret olgeta pasin bilong Papa bilong em. (Hib. 1:3) Jehova i laik tru long fogivim yumi na marimari long yumi sapos yumi sori tru long ol rong yumi bin mekim long bipo na yumi bilip tru olsem God bai fogivim yumi long rot bilong ofa bilong Jisas Krais. (1 Jon 1:7) Sampela i pilim hatwok long bilip olsem Jehova bai fogivim ol long ol rong ol i bin mekim long bipo. Sapos yu pilim olsem, orait tingim dispela: Paslain long Jisas i dai, em i mekim ol tok bilong soim olsem em i marimari long dispela raskolman husat i kirap nau tasol long bilip. Sapos Jehova i ken marimari long dispela raskolman, orait em bai marimari moa yet long ol wokman bilong em husat i wok strong long bihainim ol lo bilong em!—Sng. 51:1; 1 Jon 2:1, 2.

7. Long Jon 19:26, 27, Jisas i tok wanem long Maria na Jon, na wai na em i tok olsem?

⁷ Jisas i tok wanem? (Ritim Jon 19:26, 27.) Jisas i wari tru long mama bilong em, em wanpela wido meri. Em i save olsem bratasista bilong em bai lukautim mama long sait bilong skin. Tasol husat bai lukautim em long sait bilong bilip? Long dispela taim, ol brata bilong Jisas i no kamap disaipel yet. Tasol Jon  em wanpela gutpela aposel na gutpela pren bilong Jisas. Jisas i tingim ol man i lotuim Jehova olsem ol famili bilong em. (Mat. 12:46-50) Jisas i laikim tru Maria na em i tingim em tru, olsem na em i askim Jon long lukautim em bikos em i save olsem Jon bai helpim Maria long wok yet long lotuim Jehova. Jisas i tokim mama bilong em: “Lukim! Em pikinini bilong yu!” Na em i tokim Jon: “Lukim! Em mama bilong yu!” Long dispela de stret na i go, Jon i kamap olsem pikinini bilong Maria na em i lukautim em gut olsem mama bilong em. Jisas i laikim tru mama bilong em, em meri husat i bin lukautim em gut taim em i bon na nau em i sanap wantaim em taim em i dai.

8. Yumi kisim wanem skul long tok Jisas i mekim long Maria na Jon?

 ⁸ Yumi kisim wanem skul long tok bilong Jisas? Yumi inap pas gut moa wantaim ol bratasista Kristen bilong yumi winim pasin bilong yumi long pas gut wantaim ol wanfamili bilong yumi. Ol wanfamili inap birua long yumi na givim baksait long yumi, tasol Jisas i tok promis olsem taim yumi pas gut wantaim Jehova na oganaisesen bilong Em, yumi bai “kisim 100 taim moa” ol samting yumi bin lusim. Planti bai kamap olsem ol pikinini man, ol pikinini meri, na ol mama na ol papa bilong yumi. (Mak 10:29, 30) Yumi amamas tru olsem yumi stap insait long bikpela lain famili em bilip na pasin laikim i bungim yumi wantaim—em pasin bilong yumi long laikim Jehova na laikim narapela narapela.—Kol. 3:14; 1 Pita 2:17.

9. Yumi kisim wanem skul long tok Jisas i mekim long Matyu 27:46?

⁹ Jisas i tok wanem? Paslain tasol long Jisas i dai, em i singaut olsem: “God bilong mi, God bilong mi, bilong wanem yu lusim mi?” (Mat. 27:46) Baibel i no stori long as na Jisas i tok olsem. Tasol yumi inap kisim sampela skul long ol dispela tok em i mekim. Wanpela samting yumi save long en em olsem, taim Jisas i mekim dispela tok em i truim tok profet i stap long Song 22:1. * Na tu, ol tok bilong Jisas i soim olsem Jehova i no lukautim gut pikinini bilong em “olsem banis i raunim em.” (Jop 1:10) Jisas i save olsem Papa bilong em i larim ol man i mekim nogut long em bilong traim bilip bilong em inap long em i dai—kain traim olsem i no bin painim wanpela man. Na tu, dispela tok i soim olsem Jisas i no bin mekim wanpela rong we ol i ken kilim em i dai long en.

10. Yumi kisim wanem skul long tok Jisas i mekim long Papa bilong em?

¹⁰ Yumi kisim wanem skul long tok bilong Jisas? Wanpela skul yumi kisim em olsem: Yumi no ken ting olsem Jehova bai banisim yumi long ol samting i kamap long traim bilip bilong yumi. Jisas i bin karim hevi i go inap long em i dai, so yumi tu mas redi long dai bilong holimpas bilip bilong yumi. (Mat. 16:24, 25) Tasol yumi ken save tru olsem God i no inap long larim ol hevi i daunim yumi. (1 Kor. 10:13) Narapela skul yumi inap kisim em olsem, wankain olsem Jisas, ol man bai mekim nogut long yumi maski yumi no gat asua long wanpela samting. (1 Pita 2:19, 20) Yumi no mekim wanpela rong, tasol ol i birua long yumi bikos yumi no insait long ol pasin bilong dispela graun na yumi save autim tok i tru. (Jon 17:14; 1 Pita 4:15, 16) Jisas i kliagut long risen na Jehova i larim em i karim pen na hevi. Tasol sampela bratasista i no kliagut long dispela samting, olsem na taim hevi i painim ol, ol i tingting olsem wai na Jehova i larim dispela hevi i kamap long ol. (Hab. 1:3) God i save marimari na em i no save les kwik, so em i save olsem ol dispela bratasista i no sot long bilip, tasol ol i nidim em long mekim isi bel bilong ol.—2 Kor. 1:3, 4.

11. Wai na Jisas i mekim tok i stap long Jon 19:28?

¹¹ Jisas i tok wanem? (Ritim Jon 19:28.) Wai na Jisas i tok: “Nek bilong mi i drai”? Em i mekim olsem “bilong truim tok i stap long Rait Holi”—em tok profet i stap long Song 22:15, em i tok: “Strong bilong mi i pinis olgeta olsem hap sospen graun i drai olgeta; tang bilong mi i pas long gam bilong mi.” Na tu,  tingim olgeta hevi Jisas i karim long dispela de, na em i pilim bikpela pen tru taim em i hangamap i stap long diwai pos, dispela i mekim na nek bilong em i drai olgeta. Em i nidim wanpela long givim em wara long dring.

12. Yumi kisim wanem skul long tok bilong Jisas olsem “nek bilong mi i drai”?

¹² Yumi kisim wanem skul long tok bilong Jisas? Jisas i no pilim olsem i gat rong long autim filings bilong em; so yumi tu no ken pilim olsem i gat rong long yumi autim filings bilong yumi. Ating em kamap pasin bilong yumi long yumi no laik tokim ol narapela long ol samting yumi nidim. Tasol sapos yumi nidim tru helpim, orait long dispela taim stret yumi mas askim ol narapela long helpim yumi. Olsem, sapos yumi lapun o yumi gat sik, yumi ken askim wanpela pren long kisim yumi long kar i go long stua o maket samting o long go long haus sik. Sapos yu bel hevi tru, orait yu ken askim wanpela elda o wanpela strongpela Kristen long putim yau long ol tok yu mekim o long mekim “gutpela tok” bilong mekim yu belgut. (Prov. 12:25) Yumi mas tingim olsem ol bratasista Kristen i laikim yumi tru, na ol i laik helpim yumi “long taim bilong hevi.” (Prov. 17:17) Tasol ol i no save long samting i stap long tingting bilong yumi. Ol i no inap save olsem yumi nidim helpim, olsem na yumi yet i mas tokim ol.

13. Jisas i mekim wanem samting taim em i stap gut long God i go inap long em i dai?

¹³ Jisas i tok wanem? Nau em 3 kilok long apinun bilong Nisan 14, na Jisas i tokaut olsem: “Em pinis nau!” (Jon 19:30) Klostu nau em bai dai, na Jisas i pinisim olgeta wok em Jehova i laik bai em i mas mekim. Jisas i stap gut long God i go inap long em i dai, na dai bilong em i mekim wanem? Namba 1: Dai bilong em i kamapim klia olsem Satan em man bilong giaman. Jisas i soim olsem man i gutpela olgeta inap stap gut long God maski Satan i putim wanem ol hevi long em. Namba 2: Jisas i givim laip bilong em olsem pe bilong baim bek ol man. Dai bilong Jisas i opim rot long ol sinman i ken pas gut wantaim God, na tu, em i opim rot long ol i ken kisim laip oltaim long bihain. Namba 3: Jisas i kamapim klia olsem i stret long Jehova i mekim wok bos, na tu, em i stretim bek gutnem bilong Papa bilong em.

14. Long olgeta de, yumi mas tingting strong long mekim wanem?

¹⁴ Yumi kisim wanem skul long tok bilong Jisas? Long olgeta wan wan de, yumi mas tingting strong long holimpas bilip bilong yumi. Lukim tok bilong Brata Maxwell Friend, em wanpela instrakta long Wastaua Baibel Skul Bilong Gileat. Long wanpela intenesenel kibung, Brata Friend i mekim tok long pasin bilong holimpas bilip, na em i tok: “Wanem samting yu laik mekim o wanem tok yu laik autim, mekim tude. No ken holim i stap i go inap long tumora, yu no save yu bai stap laip long tumora o nogat. Long olgeta de, mekim ol samting bilong soim olsem God i ken givim yu laip oltaim.” Long olgeta de, tingim olsem em laspela de bilong yu long holimpas bilip bilong yu! So maski sapos dai i laik painim yumi, yumi inap long tok olsem, “Jehova, mi bin wok strong long holimpas bilip bilong mi, na pruvim olsem Satan em man bilong giaman, na mi bin stretim bek gutnem bilong yu na sapotim wok bos bilong yu!”

15. Wai na Jisas i mekim tok i stap long Luk 23:46?

¹⁵ Jisas i tok wanem? (Ritim Luk 23:46.) Jisas i gat strongpela bilip na em i tok: “Papa mi putim strong bilong laip bilong mi i go long  han bilong yu.” Jisas i save olsem laip bilong em long bihain i stap long han bilong Jehova, olsem na em i bilip tru olsem Papa bilong em bai tingim em.

16. Yu lainim wanem samting long ekspiriens bilong yangpela Witnes i gat 15 krismas?

¹⁶ Yumi kisim wanem skul long tok bilong Jisas? Redi long putim laip bilong yu long han bilong Jehova. Bilong mekim olsem, yu mas “trastim Jehova long bel olgeta bilong yu.” (Prov. 3:5) Tingim ekspiriens bilong wanpela yangpela Witnes i gat 15 krismas, nem bilong em Joshua na em i bin sik inap longpela taim. Em i tok nogat long kisim ol medikal tritmen i brukim lo bilong God. Paslain liklik long em i dai, em i tokim mama bilong em olsem: “Mama, mi stap long han bilong Jehova. . . . Mama, dispela tok mi mekim long yu em tru: Mi save tru olsem Jehova bai kirapim mi bek. Em i save long bel na tingting bilong mi, na mi laikim em tru.” * Yumi wan wan ken askim yumi yet olsem, ‘Sapos wanpela samting i kamap bilong traim bilip bilong mi na mi mas lusim laip bilong mi, mi bai putim laip bilong mi long han bilong Jehova na trastim em olsem em bai tingim mi?’

17-18. Yumi kisim wanem ol skul? (Lukim blok “ Skul Yumi Kisim Long Ol Laspela Tok Bilong Jisas.”)

¹⁷ Yumi kisim planti gutpela skul long ol laspela tok bilong Jisas! Yumi kisim skul olsem yumi mas fogivim ol narapela na bilip olsem Jehova bai fogivim yumi. Gutpela samting yumi gat em yumi insait long bikpela lain famili em ol bratasista bilong yumi. Ol i redi long helpim yumi, olsem na taim yumi nidim helpim, yumi yet mas go pas long askim ol long helpim yumi. Yumi ken save tru olsem Jehova bai helpim yumi long sanap strong na karim wanem ol hevi i painim yumi. Na em i bikpela samting long tingim olsem, long olgeta de yumi mas mekim ol samting bilong stap gut long Jehova na bilip tru olsem laip bilong yumi i stap seif long han bilong em.

¹⁸ Tru tumas, ol laspela tok Jisas i mekim taim em i hangamap long diwai pos inap skulim yumi long planti samting! Taim yumi bihainim ol dispela tok, yumi wok long bihainim tok em Jehova i mekim long Pikinini bilong em olsem: “Harim tok bilong em.”—Mat. 17:5.